1. Xana hinkwezru hi fanela ku yentxa yini?

XANA u nga pfumela ku tsrutsruma ka mphikisanu lowu u swi tivaka leswaku wa kazrata, ngopfu-ngopfu na u vabya kumbe u kazralile? Kumbexana u nge pfumeli. Kambe mupostola Pawulo a te hinkwavu vakriste va xihlayelamfuzri va le ku tsrutsrumeni. (Hb 12:1) Nakone hinkwezru, lavatsrongo kumbe lavakulu, lava nga ni ntamu kumbe lava kazraliki, hi fanela ku tiyisela ku ya tlhasa wugamu loko hi djula ku kuma hakelo ledzri Yehovha a hi dumbisaka dzrone.​—Mt 24:13.

2. Hi laha swi tsraliwiki ha kone ka 2 Timoteo 4:7, 8, ha yini Pawulo a nga tilumalumanga?

² Pawulo a nga tilumalumanga loko a khanela hi mhaka leyi hikusa a kote ku ‘hetisa ku tsrutsruma kwakwe’. (Dondzra 2 Timoteo 4:7, 8.) Kambe, hi ku kongoma, hi wini mphikisanu lowu Pawulo a khaneliki ha wone?

3. Hi wini mphikisanu lowu Pawulo a a vulavula ha wone?

³ Pawulo minkama yin’wana a tizrise mintxhumu leyi a yi yentxiwa ka mintlangu leyi a yi li kone a Grécia wa khale akuva a dondzrisa tindondzro ta lisima. (1Ko 9:25-27; 2Tm 2:5) Minkama ya ku hlawa a tizrise ku tsrutsruma ka ku fana ni loku nga kone a mimphikisanwini akuva a fananisa wutomi bya wukriste. (1Ko 9:24; Ga 2:2; Flp 2:16) A mhunu a nghena a “mphikisanwini” lowu loko a tinyiketela ka Yehovha a va a babatisiwa. (1Pe 3:21) A heta mpfhuka lowo loko Yehovha a mu nyika hakelo dzra wutomi lebyi nga helikiki.​—Mt 25:31-34, 46; 2Tm 4:8.

4. Hi ta bula hi yini ka nhloko-mhaka leyi?

⁴ Hi kwini ku fana loku nga kone a xikazri ka ku tsrutsruma mpfhuka wa ku leha hi milenge ni wutomi bya wukriste? Ku ni mintxhumu yinyingi leyi fanaka. A hi buleni hi yizrazru ya yone. Wa ku sungula, ku djuleka hi landzra ndlela leyi nga yone; wa wubidzri, hi fanela ku lavisa wugamu bya mpfhuka; nakone wa  wuzrazru, hi fanela ku tiyisela nambi loko hi tlhangana ni swizralanganya.

5. Hi yini ndlela leyi hi fanelaka ku yi landzra, nakone ha yini?

⁵ Akuva va kuma hakelo ka mphikisanu wa ku kongoma, vatsrutsrumi va fanela ku landzra ndlela leyi tsrimbiwiki hi valulamiseli va ntlangu wa kone. Hi laha ku fanaka, loko hi djula ku kuma hakelo dzra wutomi lebyi nga helikiki, hi fanela ku landzra ndlela ya wukriste, kumbe wutomi bya wukriste. (Min 20:24; 1Pe 2:21) Nambitanu, Sathana ni lava landzraka xikombiso xakwe va djula hi hlawula leswi hambaniki; va djula hi tama hi ‘tsrutsruma navu’. (1Pe 4:4) Va poyilela mahanyela lawa hi ma landzraka. Va li ndlela leyi va nga ka yone ya yampswa ku tlula yezru, nakone yi va nyika ntsrhunxeko. Kambe vo hemba.​—2Pe 2:19.

6. Hi dondzra yini ka xikombiso xa Brian?

⁶ Mani na mani lweyi a tsrutsrumaka ni lava kutxeteliwaka hi misava ya Sathana hi ku hatlisa a ta gungula leswaku ndlela leyi a yi langiki a yi yisi ntsrhunxekweni kambe yi yisa wukazraweni. (Ro 6:16) Vona xikombiso xa Brian. Vapswele vakwe va mu kutxe ku landzra wutomi bya wukriste. Kambe loko a ndzruluke djaha, a a nga ha kholwi leswaku ndlela leyo yi nga mu nyika ku nyonxa. Brian a hlawule ku tsrutsruma ni lava hanyaka hi milawu ya Sathana. A li: “A ni nga swi xiyi leswaku ntsrhunxeko lowu a ni wu djula a wu ta ni yentxa xikazrawa xa mikhuva ya ku biha. Hi ku famba ka nkama, a ni tizrisa timbangi, ni kukutlela byala ni va ni famba-famba ni vavasati. Ka malembe ma nge mangani lama landzreliki, ni dzringete timbangi leta tikulu swinene, kutani ni pele hi nhloko ka tone. Ni sungule ni ku xavisa timbangi akuva ni kuma mali ya ku dzraha, ya ku nwa ni ya ku tlanga hi vavasati.” Hi wugamu, Brian a hlawule ku hanya hi ku landzra milawu ya Yehovha. A tsrhike mahanyela yakwe ya khale a va a babatisiwa hi 2001. Swoswi a nyonxe ngopfu hi leswi a landzraka wutomi bya wukriste. *

7. Hi ku ya hi Mattheo 7:13, 14, hi tini tindlela tibidzri leti nga mahlweni kwezru?

⁷ I swa lisima ku va hi hlawula ndlela leyi nga yone akuva hi yi landzra! Sathana a djula leswaku hinkwezru hi tsrhika ku tsrutsruma a ndleleni leyi laliki leyi yisaka a wuton’wini hi tlulela a ndleleni leyi yanamiki leyi vhanu vanyingi a misaveni leyi va yi landzraka. Vanyingi va yi zrandzra ndlela leyo nakone va vona swi nabyala ku famba ka yone. Kambe yi yisa ku feni. (Dondzra Mattheo 7:13, 14.) Akuva hi tama hi va ndleleni leyi nga yone ni ku va hi nga hambukisiwi ka yone, hi fanela ku dumba ni ku yingiseta Yehovha.

8. Xana mutsrutsrumi a yentxa yini loko a txhuka a wa?

⁸ Vatsrutsrumi lava nga mphikisanwini lowukulu va tsrhama na va lavise lomu va kandzretelaka kone akuva va nga txhuki va wisiwa ha ntxhumu. Nambitanu, swi nga ha yentxeka va wisiwa hi mutsrutsrumi-kulobye kumbe va peta nenge xikheleni hi mphazamu. Kambe, loko va wa, va tlhela va pfuka va ya mahlweni va tsrutsruma. A va beki miyanakanyu yavu ka leswi va wisiki, kambe ka wugamu bya mpfhuka lowu va wu tsrutsrumaka ni hakelo ledzri va dzri yimeliki.

9. Xana hi fanela ku yentxa yini loko hi txhuka hi wa?

⁹ A ku tsrutsrumeni kwezru, hi nga ha hoxa minkama ya ku tala, hi mazritu kumbe hi swiyentxo. Kumbe vatsrutsrumi-kulozri va nga ha yentxa swihoxo leswi hi vavisaka. Swoleswo a swi fanelanga swi hi hlamalisa. Ha yini? Hikusa hinkwezru a hi hetisekanga, nakone ndlela leyi hi tsrutsrumaka ka yone, leyi yisaka wuton’wini yi lalile. Xileswo, minkama yin’wana hi ta pfana hi “gunyana”. Pawulo a a swi tiva leswaku minkama yin’wana hi nga ha va ni xivangelo lexi twisisekaka xa ku ‘holovela’ van’wana ha xone. (Kl 3:13) Kambe, a matsrhan’wini ya ku beka miyanakanyu yezru ka leswi hi wisiki, a hi bekeni miyanakanyu yezru ka hakelo ledzri nga mahlweni. Loko hi txhuka hi wa, a hi pfukeni hi tlhela hi ya mahlweni hi tsrutsruma. Loko hi tala hi mahlundzru ni xiviti, hi va hi yala ku pfuka hi sungulisa ku tsrutsruma, hi nga ti swi kota ku hetisa mpfhuka hi va hi kuma hakelo. Handle ka leswo, hi nga ha sivela van’wana lava dzringetaka ku tama va tsrutsruma a ndleleni leyi laliki, leyi yisaka a wuton’wini.

10. Hi nga yentxa yini akuva hi nga vi ‘xikhunguvanyiso’ ka van’wana?

¹⁰ Ndlela yin’wana ya kuva hi nga vi ‘xikhunguvanyiso’ ka vatsrutsrumi-kulozri i ku va pfumelela ku yentxa mintxhumu hi ndlela leyi va yi zrandzraka loko swi koteka a matsrhan’wini ya ku sindzrisa mavonela yezru. (Ro 14:13, 19-21; 1Ko 8:9, 13) A mhakeni leyi ya lisima, a hi fani ni lava tsrutsrumaka a mphikisanweni wa ku kongoma. Vatsrutsrumi lavo vo lwa ni van’wana, nakone mun’wana ni mun’wana a lwela ku kuma hakelo wuswakwe. Vo lwela byavu ntsena. Xileswo, va nga ha dzringeta ni ku susumeta vambeni akuva vone va kumeka a mahlweni. Ku hambana ni leswo, hine a hi lwetani. (Ga 5:26; 6:4) Nkongometo wezru i ku  pfuna hinkwavu lava hi nga swi kotaka akuva va tsrutsruma na hine ku ya tlhasa wugan’wini, hi kuma hakelo dzra wutomi. Xileswo, hi dzringeta ku tizrisa xilayu lexi Pawulo a huhuteliwiki xone, lexi liki: ‘A mun’wana ni mun’wana a nga txhuki a . . . tilavisela swakwe, kambe a a lavisele ni swa van’wana.’​—Flp 2:4.

11. Xana mutsrutsrumi a beka miyanakanyu yakwe ka yini, nakone ha yini?

¹¹ Lava tsrutsrumaka a mphikisanweni wa ku kongoma a va lavisi lomu va kandzretelaka kone ntsena, kambe va tlhela va beka miyanakanyu yavu lomu mpfhuka wavu wu helelaka kone. Nambi loko lomu mpfhuka wu helelaka kone va nga ku voni hi matihlo ya ku kongoma, hi miyanakanyu va tivona na va tlhasa kone va va va yamukela hakelo. Va kuma ntamu wa ku tama va tsrutsruma loko va tsrhama hi ku pimisa hi hakelo ledzro.

12. I yini leswi Yehovha a hi dumbisaka swone?

¹² Ka mpfhuka lowu hi wu tsrutsrumaka, Yehovha a hi dumbisa leswaku loko hi tsrutsruma ku ya tlhasa wugamu, a ta hi nyika hakelo​—a nga wutomi lebyi nga helikiki a tilweni kumbe a paradeyisini dzra la misaveni. Matsralwa ma tlhamuxela leswi hakelo ledzro dzri taka va xiswone, ku hi pfuna ku vona leswaku wutomi byezru byi ta nyonxisa ngopfu swinene. Loko hi tsrhama hi ku yanakanya hi wumundzruku lebyi Yehovha a hi dumbisiki byone, hi ta tama hi kuma ntamu wa ku tiyisela.

13. Hi dzrini bindzru ledzri hi nga na dzrone ledzri tlulaka dzra vatsrutsrumi va ku kongoma?

¹³ Vatsrutsrumi va mintlangu ya va-Grika va hlule swikazratu, swa ku fana ni ku kazrala ni swivavu. Leswi a va fanela ku swi dumba a ku li ntamu wavu ni leswi va dondzrisiwiki swone. Ku fana ni vatsrutsrumi volavo na hine hi dondzrisiwa ndlela leyi hi nga tsrutsrumaka ha yone ka mphikisanu lowu hi nga ka wone. Kambe hi ni bindzru dzrikulu ku tlula dzra vatsrutsrumi va ku kongoma. Hi nga kuma ntamu lowu pfaka ku Yehovha lweyi a nga xihlovo xa ntamu hinkwawu. Loko hi dumbela kwakwe, Yehovha a nga dumbise ku hi dondzrisa ntsena kambe a tlhela a dumbisa ni ku hi tiyisa!​—1Pe 5:10.

14. Xana 2 Ba-le-Korinte 12:9, 10 yi hi pfunisa kuyini ku langutana ni swikazratu?

¹⁴ Pawulo a tlhangavetane ni swikazratu swinyingi. Handle ka ku zrukiwa ni ku xanisiwa hi vhanu, minkama yimbeni a a titwa a hele ntamu nakone a langutana ni leswi a swi vitaniki ‘mutwa a nyameni’. (2Ko 12:7) A matsrhan’wini ya ku va a vona swikazratu swoswo swanga xivangelo xa ku va a tsrhika ku tizrela Yehovha, a swi vone swanga mukhandlu wa kuva a dumba Yehovha. (Dondzra 2 Ba-le-Korinte 12:9, 10.) Leswi Pawulo a viki ni mayanakanyela wolawo, Yehovha a mu pfunile ka mindzringo hinkwayu leyi a langutaniki na yone.

15. Loko hi yetisela Pawulo, i yini leswi hi taka swi vona?

¹⁵ Na hine hi nga ha zrukiwa ni ku xanisiwa hi mhaka ya lipfumelo dzrezru. Nakambe hi nga ha langutana ni mavabyi ni ku kazrala. Kambe loko hi yetisela Pawulo, hi nga vona nseketelo wa lizrandzru dzra Yehovha.

16. I yini leswi u nga swi yentxaka nambiloko u ni swikazratu swa lihanyu?

¹⁶ Xana wa vabya kumbe u limalile? Xana u ni xikazratu xa matihlo kumbe xa matsrolo lama gudlagudlaka? Loko swi li tanu, xana u nga tizrela Yehovha ni lava ha liki vampswha va tlhela va tiya a mizrini? Nakunene u nga swi kota! Swiduhwati swinyingi ni leswi nga tiyangakiki swi tsrutsruma a ndleleni leyi yisaka a wuton’wini. A swi swi koti hi ntamu wa swone. A matsrhan’wini ya leswo, swi kuma ntamu lowu pfaka ka Yehovha hi ku yingiseta kumbe ku hlalela mintlhanganu ya wukriste hi ku tizrisa telefone. Nakone  swi ni mukhandlu wa ku zrezrela va dotori ni vambeni lava kumekaka a xipiritana.

17. Xana Yehovha a titwisa kuyini hi lava nga ni swikazratu swa le nyameni?

¹⁷ U nga heli ntamu hi leswi swikazratu swaku swa mavabyi swi ku sivelaka ku yentxa hinkwaswu leswi u nyonxela ku swi yentxela Yehovha lakakuva u yanakanya leswaku a wu nge swi koti ku tsrutsruma ku ya tlhasa wugamu. Yehovha wa ku zrandzra hi leswi u nga ni lipfumelo kwakwe, nakone wa ku dzrimuka ku tiyisela kwaku. Swoswi u vilela mpfunu wakwe ku tlula dzrini na dzrini, nakone a nga ti ku tsrika. (Ps 9:10) A matsrhan’weni ya leswo, a ta tsrhindzrekela kusuhi na wene. Vona leswi makwezru wa kukazri wa xisati lweyi a kazratiwaka hi mavabyi a swi hlayiki, a li: “Swanga leswi ni tsrhamelaka ku vabya, ni xiya leswaku mikhandlu ya ku zrezrela vambeni yi ya yi pumbeka. Kambe na swi tiva leswaku switsrongo leswi ni kotaka ku swi yentxa swi tsrhavisa mbilu ya Yehovha nakone leswo swi ni yentxa ni nyonxa.” Loko u titwa u hela ntamu dzrimuka leswaku a wu wuswaku. Dzrimuka xikombiso xa Pawulo ni mazritu yakwe lama kutxaka lama liki: ‘Ndzri titsrhavela gomeni, . . . hikusa ndzra ku ndzri va ni gome, ka ku va kone ndzri nga ni ntamu.’​—2Ko 12:10.

18. Hi xini xikazratu lexikulu lexi van’wana va langutanaka na xone?

¹⁸ Ku ni xikazratu xin’wana lexi lava nga ku tsrutsrumeni ka ndlela leyi yisaka wuton’wini va kumanaka na xone. Va kumana ni swikazratu leswi van’wana va nga swi vonikiki ni ku tlhela va nga swi twisisi. Hi xikombiso, va lavisana ni gome kumbe ku vilela lokukulu. Ha yini malandzra ya ku zrandzreka ya Yehovha ma langusana ni swikazratu leswikulu? Hikusa loko mhunu a tsrhoveke voko kumbe a tsrhamise xitsrhan’wini xa lava ku limala, vhanu hinkwavu va nga vona xikazratu xakwe kumbe tsrhamela dzrakwe nakone va nga ha titwa va susumeteleka ku mu pfuna. Nambitanu, lava lavisanaka ni swikazratu swa miyanakanyu swi nga ha va swi nga tikombi leswaku va li ku hluphekeni. Kambe xiyimu lexi va nga ka xone xa kazrata, xi fana ni xa mhunu lweyi a tsrhovekeke swizro, kambe a nga kombisiwikiki lizrandzru ledzri a dzri vilelaka.

19. I yini leswi hi nga swi dondzraka ka xikombiso xa Mefiboxeth?

¹⁹ Loko u ni swikazratu a wuton’wini byaku nakone u twa ingiki a wu twisisiwi, u nga tiyisiwa hi xikombiso xa Mefiboxeth. (2Sa 4:4) A tiyisele mavabyi ni ku tlhela a yavanyisiwa hi ndlela ya ku biha hi Hosi Davhida. Mefiboxeth a a nga honanga ntxhumu akuva a nga kumana ni ndzringo wolowo. Kambe a tlangeli mintxhumu leyinene leyi Davhida a mu yentxeliki yone a wuton’wini. A tlangeli ndlela leyinene leyi Davhida a tsrhamiki a mu khoma ha yone. (2Sa 9:6-10) Kambe loko Davhida a mu yavanyisile,  Mefiboxeth a dzringeti ku vona hinkwaswu. A nga pfumelelanga swihoxo swa Davhida swi mu siyela swilondzra. Nakone a nga nyikanga Yehovha nandzru ka leswi a swi yentxiki. Mefiboxeth a lavisisise ka leswi a nga swi yentxaka akuva a seketela Hosi leyi bekiwiki hi Yehovha. (2Sa 16:1-4; 19:24-30) Yehovha a teke Mefiboxeth swanga xikombiso lexinene lakakuva a xi tsraliwa a Zritwini dzrakwe leswaku xi hi pfuna.​—Ro 15:4.

20. Xana ku vilela ku va khumbisa kuyini vambeni, kambe i yini leswi va nga swi dumbaka?

²⁰ Hi mhaka ya ku vilela lokukulu, vamakwezru vambeni a va titwe ha hombe loko va li ni vhanu vambeni. Swa va kazratela ku va a mbangwini lowu taliki hi vhanu, kambe va tama va ya mintlhanganwini, tinhlengeletanwini ta muganga ni le ka tinhlengeletanu letikulu ta swifundzra. Swa va kazratela ku khanela ni vhanu lava nga va tolovelangakiki, nambitanu va khanela ni vambeni a ntizrweni wa nsimu. Loko swi li tanu ni le ka wene, tiyiseka leswaku a wu wuswaku. Vanyingi va lwisana ni swikazratu leswi fanaka. Dzrimuka leswaku Yehovha wa nyonxa hi minzamu leyi u yi yentxaka hi mbilu hinkwayu. Ku va u nga si na godola i xitiyisekiso xa leswaku wa ku tovokisa nakone a ku nyika ntamu lowu u wu vilelaka. * (Flp 4:6, 7; 1Pe 5:7) Loko ku li leswaku u tizrela Yehovha nambi leswi u tiyiselaka swikazratu swa le nyameni kumbe swa miyanakanyu, u nga tiyiseka leswaku u tsrhavisa Yehovha.

21. Hi ku pfuniwa hi Yehovha, i yini leswi hinkwezru hi tiyimiseliki ku swi yentxa?

²¹ Ku ni ku hambana ka ku tsrutsruma ka ku kongoma ni loku Pawulo a khaneliki ha kone. Ka ntlangu wa ku tsrutsruma a minkameni ya Bibele, a ko va mhunu mun’we ntsena lweyi a a kuma hakelo. Ku hambana ni leswo, hinkwavu lava tiyiselaka hi ku dumbeka a wuton’wini bya wukriste va ta kuma hakelo dzra wutomi lebyi nga gamikikiki. (Yh 3:16) Ka mphikisanu wa ku kongoma, vatsrutsrumi hinkwavu a va fanela va va ni lihanyu ledzrinene; loko swi nga li tanu, a swi ta va kazratela ku kuma hakelo. Ku hambana na vone, vanyingi vezru hi ni swikazratu swa lihanyu, kambe ha swi tiyiselela. (2Ko 4:16) Hi ku pfuniwa hi Yehovha, hinkwezru hi ta tsrutsruma a mphikisanwini ku ya tlhasa wugamu!