1. Ino ty tsy maintsy ataontsika iaby?

MBO HANAO korsa avao va iha, ndre fa hainao hoe sarotsy raha iny, sirtò laha marary iha na vozaky? Tsy hanao ani-zay aloha iha. Fe nivola apostoly Paoly fa manao korsa iaby ty tena Kristiana. (Heb. 12:1) Ka ndre tanora tsika ndre antitsy, ndre matanjaky ndre reraky, le tsy maintsy miaritsy zisiky farany mba hahazo ani-loka ameani-Jehovah antsika iny.—Mat. 24:13.

2. Nanino Paoly ro nahasaky nanome torohevitsy, laha hentea ty 2 Timoty 4:7, 8?

² Nahasaky nivola ani-zay Paoly satria “fa nahavita ani-korsa iny” ie. (Vakio 2 Timoty 4:7, 8.) Fe, ino marina korsa niresahini-Paoly io?

3. Ino korsa niresahini-Paoly iny?

³ Lafa nampianatsy hevitsy bevata Paoly, le kindraiky niresaky mikasiky ty fisà nataoni-grika taloha tany reo. (1 Kor. 9:25-27; 2 Tim. 2:5) Nampitoviziny amy korsa matetiky ty fiainani-Kristiana. (1 Kor. 9:24; Gal. 2:2; Fil. 2:16) Manomboky manao ani-“korsa” io ty olo raiky lafa manokam-bata ho ani-Jehovah noho atao batisa. (1 Pet. 3:21) Mandinga ty tsipiky farany ie lafa ameani-Jehovah fiaina zisiky farany mba ho lokany.—Mat. 25:31-34, 46; 2 Tim. 4:8.

4. Ino ty hodinihintsika amy lahatsoratsy toy ato?

⁴ Manino ro azo ampitovizy amy korsa lavitsy io ty fiainani-Kristiana? Maromaro ty raha mampitovy an-drozy. Ndao hodinihintsika ty telo aminy. Voalohany, mila manoriky ty fitsipiky amy korsa iny tsika. Faharoe, mila mifantoky amy tsipiky farany iny tsika. Le fahatelo, mila lomay avao tsika ndre misy raha sarotsy an-dala eny.

5. Ino ty lala tsy maintsy orihintsika, le ino ty antony?

⁵ Laha ta hahazo loka ty mpandramby anjara amy korsa ara-bakiteny, le tsy maintsy manaraky ty lala nalamini-mpikarakara ani-korsa iny. Manahaky ani-zay koa fa laha ta hahazo ty lokani-fiaina zisiky farany tsika, le tsy maintsy manoriky ty lala na fomba fiaina kristiana. (Asa. 20:24; 1 Pet. 2:21) Fe teani-Satana noho ty mpanori-dia azy handeha amy lala hafa tsika. Nainan-drozy tsika ‘hiaraky lomay amin-drozy.’ (1 Pet. 4:4) Ratiratin-drozy ty fomba fiaina orihintsika, fa ty lalan-drozy hoasan-drozy ro soa satria manome fahafaha. Fe vandy avao raha zay.—2 Pet. 2:19.

6. Ino ty azonao ianara baka amy tantarani-Brian?

⁶ Tsiela avao le tsapani-ze mifily hiaraky amin’olo tarihini-Satana reo hoe tsy lala mana amy fahafaha ro nifilin-drozy, fa mana amy fanandevoza. (Rom. 6:16) Mba diniho moa ty nahazo ani-Brian. Nampirisiky azy hanoriky fomba fiaina kristiana ty baba amy reniny. Fe lafa nimpamaraky ie, le nisalasala hoe hahafalifaly azy va ty fanaraha ani-lala io. Nanapa-kevitsy Brian fa hiara-dia amin’olo manaraky ty fomba fiaina teani-Satana. Hoy ty asany: “Tsy nampoiziko mihintsy hoe azy fahafaha niriko iny ro hamandriky ahy amy fahazaran-draty. Lafa nandeha ty fotoa, le nanjary mpitroky jamala noho mpinon-toaky aho sady niraty fandaisam-bata. Tanatini-tao maromaro tafarani-zay aho, nanandra karazan-jamala mahery biby, farany nanandevo ahy ty ankamaroany. ... Nanomboky namarotsy jamala aho mba hahazoako drala.” Nanapa-kevitsy hanaraky ty fitsipikini-Jehovah avao Brian tafara tatoy. Niova lala ie, le natao batisa tamy 2001. Tena falifaly ie henanizao fa manaraky ty fomba fiaina kristiana. *

7. Ino iaby ty lala roe natao alohantsika eo, laha hentea ty Matio 7:13, 14?

⁷ Tena mila mahay mifily ty lala horihintsika vatany tsika! Teani-Satana laha tsy lomay amy lala tery “mandeha amy fiaina” iny sasy tsika, fa hifindra amy lala malalaky andehanan’olo maro amy tontolo toy eto. Maro mpandeha lala io sady mora ombà. Fe “mandeha amy fandripaha.” (Vakio Matio 7:13, 14.) Mba hahavy antsika tsy ho diso lala sady tsy ho tandrena, le tsy maintsy matoky ani-Jehovah noho mijanjy azy tsika.

8. Ino ty ataoni-mpanao korsa raiky laha lavo ie?

⁸ Mifantoky amy ze lala alohany eo ty olo mpanao korsa lavitsy mba hahavy an-drozy  tsy ho lavo. Fe mety mbo ho lavo avao ie laha voafingani-namany na mandia lavaky. Laha lavo amy zay ie, le miongaky bakeo manohy lomay ndraiky. Tsy ty raha nandavo azy ro tena ifantohany, fa ty tsipiky farany noho ty loka tamaniny ho azo.

9. Ino ty tokony hataontsika laha lavo tsika?

⁹ Mety ho lavo matetiky tsika amy korsa ataontsika toy, satria manao hadisoa amy ty raha volanintsika na ataontsika. Mety hanao raha mamparary fo antsika koa ty olo miaraky manao korsa amintsika. Fe tsy tokony hahatseriky antsika laha miseho raha zay. Samby tsy lavorary tsika, sady tery ty lala ilaisantsika iaby. Ka mety “hifampidofotsy” tsika kindraiky. Nieky Paoly fa samby mety hana “antony hitaraina” mikasiky ty hafa tsika. (Kol. 3:13) Fe aleo mifantoky amy loka alohantsika eo iny, tozay hieritseritsy ani-ze raha nandavo antsika avao. Laha sanatria lavo tsika, le soa laha miongaky bakeo manohy lomay ndraiky. Fa laha mitanjaky lolompo tsika fa tsy mahefa miongaky, le tsy ho avy amy tsipiky farany iny ka tsy hahazo loka. Mbo hanakasaka ani-ze miezaky lomay amy lala tery iny koa tsika laha manao ani-zay.

10. Ino ty hataontsika mba tsy hanjary “vato maminga” ty hafa?

¹⁰ Tsy ho “vato maminga” ani-mpanao korsa namantsika reo koa tsika laha mandefitsy amy raha tean-drozy, laha mbo azo atao, sady tsy mizizo hanao ze mety amintsika. (Rom. 14:13, 19-21; 1 Kor. 8:9, 13) Tsy teantsika ty hanahaky ani-mpanao korsa ara-bakiteny rey. Manao kapindry amy ty mpilay hafa rozy, le samby miezaky ty kiraidraiky mba hahazo ani-loka iny ho azy. Ze hahasoa ty vatany avao ro eritseretini-mpilay amy korsa rey. Mety hatositosiny azy miaraky manao korsa aminy rey, amy zay ie ho lasa voalohany. Mifanohitsy amy zay ty ataontsika satria tsy manao kapindry amin’olo tsika. (Gal. 5:26; 6:4) Ty raha kendrentsika, le hanampy olo farani-ze maro mba ho avy amy tsipiky farany noho hahazo ty lokani-fiaina. Farany tsika miezaky manoriky ani-torohevitsy Paoly iny ka ‘mieritseritsy ze hahasoa ty hafa fa tsy ze hahasoa ty vatantsika avao.’—Fil. 2:4.

11. Ino ty raha ifantohani-mpanao korsa, le ino ty antony?

¹¹ Tsy ze lala alohany eo avao ro ifantohani-mpanao korsa ara-bakiteny fa ty tsipiky farany  koa. Ndre tsy hitany maso aza tsipiky iny, le fa alàny sary an’eritseritsy hoe mandalo eo ie bakeo mahazo loka. Voatosiky hanao raha avao ie lafa ataony mazava soa an-tsainy ao loka iny.

12. Ino ty fanomeza soa hameani-Jehovah antsika?

¹² Soa fanahy Jehovah, ka nampitamà fa hameany kadò ze mahavita ani-korsa ataontsika toy, le ho velo zisiky farany an-danitsy any na an-tany etoa. Miresaky mikasiky ani-kadò io ty Baiboly, amy zay ho azontsika sary an’eritseritsy hoe tena ho soa ty fiainantsika amy fotoa zay. Lafa mitombo am-pontsika noho an-tsaintsika ao raha tamanintsika zay, le vomaiky ho tapa-kevitsy hiaritsy tsika.

13. Ino ty tombony ananantsika mandilatsy ani-mpanao korsa rey?

¹³ Nila nandresy raha sarotsy maro mpanao korsa grika taloha rey. Mety ho nireraky, ohatsy, rozy na naharary. Fe niantehitsy tamy fampiofana an-drozy noho ty herim-batan-drozy rozy. Nampiofany manahaky an-drozy koa tsika hoe ino ty tokony hatao amy korsa ataontsika iny. Fe misy tombony ananantsika mandilatsy ani-mpanao korsa reo. Misy afaky manome hery antsika, sady tsy mety lany ty heriny. Laha miantehitsy amy Jehovah tsika, le mampitamà hampiofana antsika ie, fe hampatanjaky antsika koa!—1 Pet. 5:10

14. Manino ty 2 Korintianina 12:9, 10 ro manampy antsika hiatriky raha sarotsy?

¹⁴ Niatriky raha sarotsy maro Paoly. Nisy nanenjiky noho nandratiraty ie. Tsy vitani-zay fa mbo nahatiaro ho malemy koa ie sady niaritsy ani-azy nikaihiny hoe “fatiky amy nofotsy” iny. (2 Kor. 12:7) Fe ndre zay, le tsy nieny nanompo ani-Jehovah ie. Nihararaotiny raha rey mba hiantehera amy Jehovah. (Vakio 2 Korintianina 12:9, 10.) Nana toe-tsay soa Paoly, ka nanampy azy Jehovah mba hiatriky ani-ze fitsapà iaby nahazo azy.

15. Ino ty raha ho hitantsika laha manahaky ani-Paoly tsika?

¹⁵ Mety hisy hanenjiky noho handratiraty koa tsika satria manompo a Ndranahary. Na mety tsy salama tsika na reraky marè. Fe laha manahaky ani-Paoly tsika, le vomaiky ho hitantsika hoe tea antsika noho manoha antsika Jehovah saky misy raha sarotsy manahaky ani-reo.

16. Ino ty azonao atao ndre tsy salama iha?

¹⁶ Tsy mihetsiky am-pandrea avao va iha sa mipetraky amy sezy misy larò? Malemy ongotsy va iha sa tsy mahita soa? Laha zay, mbo mahavita lomay miaraky amy azy tanora noho matanjaky reo va iha? Tena vitanao zay! Maro amin’olo lomay amy lala mandeha amy fiaina iny ro fa be na tsy salama. Tsy ho nivitan-drozy raha zay, laha ty herim-batan-drozy avao. Ty herini-Jehovah ro mampatanjaky an-drozy, lafa mijanjy ani-fivoria rey amy telefony rozy na manenty ani-videoni-fivoria rey. Mandramby anjara amy asa fanaova mpianatsy koa rozy, ka mitory amy dokotera, noho ty mpikarakara an-drozy, voho ty longon-drozy.

17. Akory ty fahitani-Jehovah ty olo tsy salama?

¹⁷ Mety ho kely ty herim-batanao, fe ka kivy. Ka mieritseritsy mihintsy hoe tsy hahavita hilay zisiky farany amy lala mandeha amy fiaina any iny iha. Tea anao Jehovah, satria mino azy iha sady niaritsy raha maro. Amy henanizao mihintsy iha ro mila ty fanampeany, ka tsy hanenga anao ie. (Sal. 9:10) Vomaiky aza ie hihamarìny anao. Mba henteo moa ty raha nivolanini-ranabavy raiky narary mafy toy: “Lafa nihananjeky ty tsy fahasalamako, le tsy de afaky niresaky fahamarina amin’olo sasy aho. Fe haiko fa mahafalifaly ty foni-Jehovah  ndre ty ezaky kelikely ataoko. Manjary falifaly koa aho.” Lafa kivy iha, le tiarovo hoe tsy raiky iha. Eritsereto ty modelini-Paoly, le tiarovo safà mampahery nivolaniny toy hoe: “Falifaly aho amy fahalemea, ... lafa malemy aho, le amy zay aho ro mahery.”—2 Kor. 12:10.

18. Ino ty raha sarotsy miavaky atrehin’olo sisany?

¹⁸ Miatriky raha sarotsy hafa koa ty olo sisany mandeha amy lala mana amy fiaina iny. Miaritsy raha manahira amy fiainan-drozy manoka rozy fe mety tsy hain’olo na tsy azon-drozy. Malahelo lava, ohatsy, rozy na tratsini-fiasan-doha marè. Manino ro miavaky ty raha sarotsy mahazo ani-vahoakini-Jehovah tena teany reo? Satria lafa folaky tana na mipetraky amy sezy misy larò ty olo raiky, le mahita ani-raha manahira azy iny iaby ty olo ka voatosiky hanampy azy. Fa laha mana problemo amy fihetseham-po ty olo raiky na mikorontan-tsay, le mety tsy ho hita baka ambaliky etoy hoe mijaly ie. Tena misy ty fijalean-drozy, manahaky ty ahin’olo tapa-tomboky io avao, fe tsy maro manahaky ani-zay ty mahatsapa ty raha mahazo an-drozy.

19. Ino ty ianarantsika baka amy modelini-Mefiboseta?

¹⁹ Laha tsy salama iha sady mahatsapa hoe tsy azon’olo ty raha mahazo anao, le mety hanome hery anao ty tantarani-Mefiboseta. (2 Sam. 4:4) Niatriky raha sarotsy ie satria nalemy, sady nidiso fitsara azy Davida Mpanjaka. Tsy ty hadisoani-Mefiboseta mihintsy ro nahavy azy ho azoni-fitsapà reo. Fe tsy nifantoky tamy ty raha raty niseho tamy fiainany ie. Nankasitrahany ty hasoam-panahy nasehoni-Davida taminy talohani-zay. (2 Sam. 9:6-10) Ka lafa nidiso fitsara azy Davida, le nahay nandiniky soa ty raha iaby niseho ie. Tsy nengani-Mefiboseta hampeloky azy ty hadisoani-Davida. Tsy nanome tsiny ani-Jehovah koa ie, amy ty raha nataoni-Davida. Ze azony natao mba hanohana ty mpanjaka nitendreni-Jehovah ro nifantohany. (2 Sam. 16:1-4; 19:24-30) Nampanoratini-Jehovah amy Safàny ao ty modely soani-Mefiboseta mba hahasoa antsika.—Rom. 15:4.

20. Ino ty mety ho vokatsini-fiasan-doha amin’olo sisany, fe ino ty azon-drozy atokisa?

²⁰ Miasa loha marè ty rahalahy noho anabavy sisany ka mety ho sosotsy lava ndre manao ty raha fataony andavanandro aza. Mety ho sarotsy aminy ty miaraky amin’olo maro, fe miezaky mamonjy fivoria noho fivoriambe avao ie. Mety tsy ho mora aminy ty miresaky amin’olo tsy zatsy azy, fe manompo an-tonda eny avao ie. Laha zay ty mahazo anao, le matokisa fa tsy raiky avao iha. Maro ty tratsini-raha manahira anao io. Tiarovo fa mahafalifaly ani-Jehovah ty ezaky ataonao amy fonao  iaby. Tsy naneky ho resy mihintsy iha zisiky henanizao, ka manaporofo raha zay fa mitahy anao ie sady manome anao ty hery ilànao. * (Fil. 4:6, 7; 1 Pet. 5:7) Laha miaritsy tsy fahasalamà ara-bata na ara-pihetseham-po iha fe manompo ani-Jehovah avao, le afaky matoky iha hoe falifaly Jehovah mahita anao.

21. Ino ty raha ho vitantsika iaby lafa manampy antsika Jehovah?

²¹ Soa avao fa misy raha tsy mampitovy ani-korsa niresahini-Paoly iny amy ty korsa ara-bakiteny. Tamy korsa ara-bakiteny tamy androni-Baiboly rey, le olo raiky avao ro mahazo loka. Mifanohitsy amy zay ty korsa ataoni-Kristiana, satria hahazo ty lokani-fiaina zisiky farany iaby ze miaritsy noho tsy mivaliky. (Jaona 3:16) Tamy korsa taloha rey koa, le tsy maintsy salama soa ara-bata ty mpandramby anjara, fa laha tsy zay mety tsy handresy. Fa ty ahintsika, ndre maro aza ty malemy ara-bata, le miaritsy avao. (2 Kor. 4:16) Hanampy antsika Jehovah, ka hahavita ani-korsa iny zisiky farany tsika iaby!