1. Andi hiniwan fuu musu du?

I BI o kë kule wan fia kule hii fa i sabi taa a o taanga da i, möönmöön ee i dë ku suwaki nasö ee i wei ö? Kandë ja bi o kë du di soni dë. Apösutu Paulosu bi taki taa hii dee tuutuu bakama u Keesitu dë a wan fia kule (Heb. 12:1). Aluwasi u ko gaandi kaa, nasö u njönku jeti, ee u abi kaakiti jeti, nasö ee u wei, tökuseei u musu hoi dou te a di kaba u di fia kule, ee u kë feni di paka di Jehovah kë da u.​—Mat. 24:13.

2. Faandi mbei Paulosu bi sa taki di soni di sikifi a 2 Timoteo 4:7, 8?

² Paulosu bi sa taki u di soni aki, u di a bi kule di fia kule te „dou a di kaba.” (Lesi 2 Timoteo 4:7, 8.) Ma andi da di fia kule di Paulosu bi taki fëën?

3. Andi da di fia kule di Paulosu bi taki fëën?

³ So juu Paulosu bi ta sikifi soni di sëmbë bi ta du, te de bi ta hoi dee pëë a Giikiköndë, u lei sëmbë wan fanöudu soni (1 Kol. 9:25-27; 2 Tim. 2:5). Sömëni pasi Paulosu bi maaka di libi u wan Keesitu sëmbë ku di kule di wan sëmbë ta kule wan fia kule (1 Kol. 9:24; Gal. 2:2; Fil. 2:16). Wan sëmbë ta bigi kule di ’fia kule’ aki, te a buta hën libi a Gadu maun, nöö a tei dopu (1 Pet. 3:21). A ta kaba di fia kule te Jehovah pakëën ku di teego libi.​—Mat. 25:31-34, 46; 2 Tim. 4:8.

4. Andi woo luku a di woto aki?

⁴ Faandi mbei u sa maaka di fia di sëmbë ta fia kule ku di libi u wan Keesitu sëmbë? Wë peipei soni dë di sa mbei a dë sö. Ma boo taki u dii u de. Di fosu soni, hën da u musu kule a di soifi pasi. Di u tu soni, hën da u musu buta hii u pakisei  a di kule di u musu kule dou ka u musu dou. Nöö di u dii, hën da u musu kule go dou aluwasi ee soni ta taanga da u.

5. Na un pasi u musu ta kule, nöö faandi mbei?

⁵ Dee sëmbë dee kë feni di paka te de ta kule wan tuutuu fia kule, musu kule a di pasi di de buta da de u de kule. Sö nöö a dë taa ee u kë feni teego libi, nöö u musu dë a di pasi di Keesitu ta lei u, hën da u musu libi a di fasi fa a ta lei u taa u musu libi (Tjab. 20:24; 1 Pet. 2:21). Ma Saatan ku dee sëmbë dee ta waka nëën baka, an kë fuu libi kumafa Keesitu ta lei u fuu libi. De kë fuu ta „mökisi ku de” (1 Pet. 4:4). De ta mbei u fa u di fasi fa u ta libi, nöö de ta taki taa di fasi fa de ta libi möön bunu, söseei taa a ta mbei de ko fii. Ma di soni di de ta taki dë an dë sö seei.​—2 Pet. 2:19.

6. Andi i lei a di woto u Brian?

⁶ Dee sëmbë dee ta libi kuma dee sëmbë dee dë a di goonliba u Saatan, ta ko si taa di pasi di de tei an ta mbei de ko fii, ma a ta mbei de toon saafu u Saatan ku dee zöndu fii u de (Lom. 6:16). Luku di woto u Brian. Dee gaansëmbë u Brian bi dëën taanga faa libi kumafa Keesitu ta lei u fuu libi. Ma di a bi njönku, nöö an bi ta si kuma di fasi u libi dë, bi o mbei a dë waiwai. Fëën mbei Brian bigi ta waka ku dee sëmbë dee ta libi kumafa Saatan kë. A bi taki taa: „Ma bi sabi taa di suti libi di mi bi kë, bi o mbei mi toon saafu u soni di an bunu. Mi bi bigi ta tei drugs, mi bi ta bebe daan ta dööngö, söseei mi bi ta libi fanafiti. A dee jaa baka di dë, mi bi bigi ta tei möön hebi drugs, nöö te u kaba fëën mi bi toon saafu u sömëni u de. . . . Mi bi bigi ta sei drugs u mi bi sa abi möni u mi bi sa ta libi a di lö fasi dë go dou.” Te u kaba fëën, Brian buta taa a o libi kumafa Jehovah kë. Brian bia hën libi, hën a dopu a di jaa 2001. Nöunöu a dë waiwai tuutuu, u di a ta libi kumafa Keesitu ta lei u fuu libi. *

7. Andi da dee tu pasi dee dë, te u luku andi sikifi a Mateosi 7:13, 14?

⁷ A dë taanga fanöudu fuu ta kule a di soifi pasi! Saatan kë u hii u tuu kumutu a di piki pasi di ta „tja sëmbë go feni libi”, nöö u go waka a di baai pasi di gaansë u dee sëmbë u di goonliba aki ta waka. Di pasi dë da wan nëbai pasi, nöö an taanga u waka. Ma a ta „tja sëmbë go poi kaba a sösö.” (Lesi Mateosi 7:13, 14.) Ee u kë fika a di soifi pasi, söseei ee wa kë u soni puu u pakisei a di pasi, nöö u musu futoou Jehovah, söseei u musu ta haikëën.

8. Andi wan sëmbë di ta kule wan fia kule ta du te a naki futu kai?

⁸ Dee sëmbë dee ta kule wan fia kule ta buta hii de pakisei wantewante a di pasi sö taa de an naki futu kai. Ma tökuseei wan woto sëmbë di ta kule tu sa mbei de kai, nasö wan baaku di dë a di pasi, sa mbei de kai. Ee de kai seei, de ta hopo baka, nöö de ta kule go dou. De ta buta hii de pakisei a di paka di de o feni ee de wini, ma na a di soni di mbei de kai.

9. Andi u musu du ee u naki futu kai?

⁹ A di kule di u ta kule, u sa naki futu kai sömëni pasi. Kandë u di u taki soni, nasö u di u du soni di an bunu. Nasö kandë wan woto sëmbë di u ku ën ta kule du wan soni di hati u. An musu foondo u ee sö wan soni pasa. Hii u tuu ta mbei föutu, söseei hii u tuu ta kule a di piki pasi di ta tja u go a libi. Fëën mbei a sa pasa taa u bökusu ku useei. Paulosu bi taki taa so juu a sa pasa taa ’wan wotowan du wan soni di hati u’ (Kol. 3:13). Ma ka fuu buta pakisei a di soni di mbei u naki futu kai, a bi o möön bunu fuu buta pakisei a di paka di woo feni a di ten di ta ko. Ee u naki futu kai, boo hopo, nöö u kule go dou. Ee hati fuu ta boonu u te wa kë dini Jehovah möön, nöö wa o dou di kaba, söseei wa o feni di paka. Boiti di dë, woo tapa pasi da dee wotowan dee ta kule a di piki pasi di ta mbei sëmbë feni libi.

10. Unfa u sa köni fuu wa ko dë ’wan sitonu a pasi’ da wotowan?

¹⁰ Wan woto fasi fa u sa köni fu wa ko dë kuma ’wan sitonu a pasi’ sö taa dee baaa ku dee sisa fuu an naki futu kai’, da te u ta da de pasi so juu u de du soni kumafa de bi o kë du ën. Wa musu ta kë taa soni musu pasa kumafa u kë (Lom. 14:13, 19-21; 1 Kol. 8:9, 13). A di lö fasi aki wa dë kuma dee sëmbë dee ta kule a wan tuutuu fia kule. De ta fia ku deseei, nöö hiniwan u de ta mbei möiti u de wini di paka. De ta möön buta pakisei a di soni di sa heepi de u de wini di fia kule. Fëën mbei de ta mbei möiti u tötö wotowan go a wan së, sö taa de sa dë a fesi. Wa dë kuma dee sëmbë aki. Wa ta fia ku useei (Gal. 5:26; 6:4). U kë heepi sömëni sëmbë u de feni libi a di njunjun  goonliba, söseei u de libi u teego. Di soni aki mbei u kë du di soni di Paulosu bi piki u fuu du. A bi piki u taa ’wa musu ta mëni fuu wanwan soni nöö a kaba, ma hibiwan fuu musu ta mëni soni u di otowan fëën tu’.​—Fil. 2:4.

11. Andi wan sëmbë di ta kule wan fia kule musu ta hoi a pakisei hii juu, nöö faandi mbei a musu ta du di soni aki?

¹¹ Na luku nöö dee sëmbë dee ta kule wan fia kule musu ta luku di pasi liba, ma de musu ta hoi a pakisei taa de musu kule te dou di kaba. Aluwasi ee de an sa si di kaba, tökuseei de sa ta pakisei unfa de o kaba di fia kule, söseei unfa de o feni di paka. De sa ta kule go dou te de ta hoi di paka di de sa feni, a pakisei.

12. Andi Jehovah ta da u?

¹² Dee dinima u Jehovah dë a wan fia kule. Nöö Jehovah ta piki dee dinima fëën taa ee de kule di fia kule aki te dou di kaba, nöö de o feni wan paka. Di paka dë da di libi di de o sa libi u teego a liba ala, nasö a wan paladëisi a goonliba aki. U sa pakisei unfa soni o dë a di ten dë, u di di Bëibel ta konda da u unfa soni o dë te woo feni di paka. Möön u ta pakisei unfa soni o dë te woo feni di paka di Jehovah ta paamusi u, möön woo köni u soni an mbei u naki futu kai.

13. Andi u abi di dee sëmbë dee dë a wan tuutuu fia kule an abi?

¹³ A bi sa pasa taa dee sëmbë dee bi ta kule dee kule u dee Giiki pëë, bi ta wei nasö taa sinkii bi ta hati de, ma dee soni dë an bi musu puu de a di pëë. Di seeka di de bi seeka a fesi da di fia kule ku di kaakiti di de abi, nöö bi o sa heepi de. Leti kuma dee sëmbë aki, sö nöö de ta seeka u a fesi fuu sa wini di fia kule di u ta kule. Ma u abi wan woto soni jeti di dee sëmbë dee ta kule wan tuutuu fia kule an abi. U sa feni kaakiti a Jehovah, nöö di kaakiti di u abi fanöudu u sa feni nëën. Ee u ta buta futoou a Jehovah, nöö a ta paamusi u taa na seeka nöö a o seeka u da di fia kule, ma a o da u di kaakiti di u abi fanöudu tu!​—1 Pet. 5:10.

14. Unfa 2 Kolenti 12:9, 10 ta heepi u te fuka ta miti u?

¹⁴ Sömëni fuka bi ta miti Paulosu. Boiti taa sëmbë bi ta kosi ën, ta mbei ën fa, so juu a bi ta fii kuma an abi kaakiti möön, nöö a bi musu libi ku wan soni ’di bi ta tjökö ën leti kuma maka’ (2 Kol. 12:7). Ma Paulosu an bi ta si dee fuka aki kuma soni di bi sa puu ën a di dini di a ta dini Jehovah. A bi ta si de kuma soni di sa heepi ën faa möön buta futoou a Jehovah. (Lesi 2 Kolenti 12:9, 10.) U di Paulosu bi ta si soni sö, mbei Jehovah bi heepi ën di fuka bi ta miti ën.

15. Andi o pasa ee u ta djeesi Paulosu?

¹⁵ Sëmbë sa ta kosi u, nasö de sa du ku u u di biibi fuu hedi. Kandë u ta dë ku suwaki, nasö kandë u ta wei. Ma ee u ta djeesi Paulosu, nöö woo sa si unfa Jehovah ta heepi u ku dee fuka aki.

16. Andi i sa ta du hii fa ja dë gösöntu?

¹⁶ I musu ta dë kandikandi a bedi u di i dë ku suwaki ö? Nasö i ta dë a wan suwakima sutuu ö? Kini ta toobi i ö? Nasö wojo fii ta booko u? Ee sö a dë, nöö i ta si kuma ja o sa dini Jehovah makandi ku dee njönkuwan dee dë gösöntu ö? Wë aai, i sa dini Jehovah makandi ku de! Sömëni baaa ku sisa di ko gaandi kaa, söseei dee dë ku suwaki, ta kule a di pasi di ta mbei sëmbë feni libi. De an ta du di soni aki ku di u deseei kaakiti. Jehovah ta da de kaakiti te de ta luku dee fëlön u dee komakandi di de ta hai tei. Nöö de ta du di peleikiwooko te de ta peleiki da dee data, dee sösutu ku dee famii u de.

17. Unfa Jehovah ta si dee sëmbë dee dë ku suwaki?

 ¹⁷ Aluwasi ee ja sa du hii soni di i bi o kë du da Jehovah, tökuseei ja musu lasi hati, nöö na si kuma ja o sa hoi dou te a di kaba. Jehovah lobi i u di i ta lei taa i ta biibi ën, söseei a lobi i u di i bi du sömëni soni dëën a dee jaa dee pasa. A di pisiten aki, i abi Jehovah heepi fanöudu möön hiniwan ten, nöö an o go disa i (Ps. 9:10). A o ko möön zuntu ku i. Wan sisa di ta suwaki gaanfa bi taki taa: „U di mi ko ta abi peipei siki, mbei ma sa ta peleiki da sëmbë kumafa mi bi naa. Ma mi sabi taa di piki möiti di mi ta mbei, ta mbei Jehovah wai, nöö miseei ta wai tu.” Te i ta fii bookosaka, nöö hoi a pakisei taa ja dë i wanwan. Pakisei di fasi fa Paulosu bi ta du soni ku di soni di a bi taki. Di soni di a bi taki ta da u taanga seei. A bi taki taa: „Ee mi suwaki a soni më a toobi. . . . Mi ta wai seei a dee soni dë dendu. Biga wë hii dee suwaki pisi u mi dë tuu ta buta mi fu mi dë taanga.”​—2 Kol. 12:10.

18. Un fuka so sëmbë ta tja?

¹⁸ So sëmbë di ta kule a di pasi di ta mbei sëmbë feni libi, ta abi woto fuka jeti. De ta abi fuka di wotowan an ta si, nöö kandë wotowan an sa fusutëën tu. Kandë de ta abi sömëni bookohedi, nöö di soni dë ta mbei de ko abi wan siki. Faandi mbei a sa ta taanga da dee dinima u Jehovah aki? Biga te wan sëmbë maun booko, nasö te a dë a wan suwakima sutuu, nöö hii sëmbë sa si taa wan soni du ën, nöö de o kë heepi ën ku soni. Ma ja ta si te so sëmbë abi wan siki u di de abi hia bookohedi. Di fuka di de ta tja, dë leti kuma di fuka di wan sëmbë di maun fëën booko ta tja. Ma u di woto sëmbë an sa si taa de ta tja fuka, mbei de an ta feni di lobi ku di sölugu di de abi fanöudu.

19. Andi u ta lei a di woto u Mefibosëti?

¹⁹ Ee ja sa ta du hii soni di i kë du, nasö ee i ta fii kuma sëmbë an ta fusutan i, nöö i sa feni taanga a di woto u Mefibosëti (2 Sam. 4:4). A bi dë ku suwaki, nöö wan pasi Könu Dafiti an bi kuutu ën a wan leti fasi. Mefibosëti an bi du soni di bi mbei taa dee fuka aki bi miti ën. Tökuseei Mefibosëti hati an bi boonu, ma a bi ta wai ku dee bunu dee a bi ta feni. A bi hoi a pakisei fa Dafiti bi ta libi bunu ku ën, nöö a bi tei di soni dë u bigi (2 Sam. 9:6-10). Mefibosëti bi hoi hii dee soni aki a pakisei di Dafiti bi kuutu ën a wan föutu fasi. Hati fëën an bi boonu ku Dafiti. Söseei an bi ta si kuma Jehovah bi mbei Dafiti du di soni aki ku ën. Mefibosëti bi du andi a bi sa du u heepi di könu di Jehovah bi buta u tii (2 Sam. 16:1-4; 19:24-30). Jehovah bi mbei sëmbë sikifi di woto u Mefibosëti a di Wöutu fëën sö taa u sa lei wan soni nëën.​—Lom. 15:4.

20. Andi ta pasa ku so sëmbë u di de ta booko de hedi ku soni gaanfa poi, ma fu un soni de sa dë seiki?

 ²⁰ U di so baaa ku sisa abi wan siki di ta mbei de ta booko de hedi gaanfa ku soni, mbei de sa ta fëëë te de musu du soni ka woto sëmbë dë. A sa ta taanga da de u de dë a gaan hia sëmbë dendu. Ma hii fa a dë sö, tökuseei de nango a dee komakandi fuu, dee keling-komakandi fuu, ku dee könklësi fuu. A sa ta taanga da de u de fan ku sëmbë di de an sabi, ma tökuseei de ta fan ku sëmbë te de ta du di peleikiwooko. Ee sö soni dë da i tu, nöö hoi a pakisei taa ja dë i wanwan. Sömëni sëmbë ta fii sö tu. Söseei hoi a pakisei taa Jehovah ta wai ku dee taanga möiti dee i ta mbei. Di hoi di i ta hoi dou ta lei taa Jehovah ta mbei i feni gaan bunu, söseei taa a ta da i di kaakiti di i abi fanöudu * (Fil. 4:6, 7; 1 Pet. 5:7). Ee i ta dini Jehovah go dou hii fa ja dë gösöntu nasö hii fa i ta fii booko saka, nöö i sa dë seiki taa Jehovah ta wai ku i.

21. Andi Jehovah sa heepi hii u tuu fuu du?

²¹ Di fia kule di Paulosu bi taki fëën an dë kuma di tuutuu fia kule di sëmbë ta kule. Na awooten, wan kodo sëmbë nöö bi ta wini. Ma hii sëmbë di ta hoi dou, ta libi kuma wan bakama u Keesitu, o feni teego libi (Joh. 3:16). Boiti di dë, dee sëmbë dee ta kule a wan tuutuu fia kule, musu dë gösöntu, ee nasö de an o sa wini di fia kule. Ma hii fa sömëni fuu an dë gösöntu, tökuseei hii u tuu ta hoi dou (2 Kol. 4:16). Jehovah sa heepi hii u tuu fuu kule dou te a di kaba!