1. San wi alamala musu du?

YU BEN o wani lon na ini wan streilon efu yu ben siki noso weri? Nowan fu wi ben o wani du dati. Ma na apostel Paulus taki dati ala tru Kresten de na ini wan streilon (Hebr. 12:1). Èn wi alamala musu horidoro te na a kaba, awinsi wi yongu noso owru, awinsi wi tranga noso wi weri. Soso te wi du dati wi o kisi a pai fu Yehovah.​—Mat. 24:13.

2. Soleki fa 2 Timoteyus 4:7, 8 e sori, dan fu san ede Paulus ben man gi Kresten a rai fu horidoro na ini a streilon?

² Paulus ben man gi den Kresten a rai disi fu di a ben „lon a streilon te na a kaba”. (Leisi 2 Timoteyus 4:7, 8.) Ma fu sortu streilon Paulus ben e taki?

3. Fu sortu streilon Paulus ben taki?

³ Son leisi Paulus ben gebroiki den sani di ben pasa na den streilon di ben hori na ini Grikikondre fu owruten, fu leri den brada nanga sisa prenspari sani (1 Kor. 9:25-27; 2 Tim. 2:5). Wan tu leisi a agersi a libi fu wan Kresten nanga wan streilon (1 Kor. 9:24; Gal. 5:7; Fil. 2:16). Wan sma e bigin lon a „streilon” te a e gi en libi abra na Yehovah èn a e dopu (1 Petr. 3:21). A o klari a streilon disi te Yehovah gi en têgo libi.​—Mat. 25:31-34, 46; 2 Tim. 4:8.

4. San wi o luku na ini na artikel disi?

⁴ Fu san ede Paulus agersi a libi fu wan Kresten nanga wan streilon? Fu di wan tu sani fu a libi fu wan Kresten de a srefi leki wan streilon. Meki wi go luku dri fu den sani disi. A fosi sani na taki wi musu lon na tapu a yoisti pasi. A di fu tu sani na taki ala ten wi musu prakseri a pai di wi  o kisi te wi klari a streilon. Èn a di fu dri sani na taki wi musu tan lon awinsi wi abi problema.

5. Fa wi musu libi èn fu san ede?

⁵ Efu sma wani wini wan streilon, dan den musu lon a pasi di den sma di orga a streilon taki dati den musu lon. Na so a de tu taki efu wi wani kisi têgo libi, wi musu waka a pasi fu Yehovah. Sobun, wi musu libi leki fa en wani (Tori 20:24; 1 Petr. 2:21). Ma Satan nanga den sma di e waka na en baka no wani taki wi libi soleki fa Bijbel e sori. Den wani taki wi libi leki den (1 Petr. 4:4). Den e spotu wi fu di wi e libi soleki fa Yehovah wani èn den wani kisi wi fu denki taki a pasi fu den moro bun èn taki den de fri. Ma den e kori densrefi.​—2 Petr. 2:19.

6. San yu e leri fu na eksempre fu Brian?

⁶ Iniwan sma di e libi leki den sma fu a grontapu fu Satan, o kon si taki a pasi dati no e meki den kon fri. Na presi fu dati den e tron srafu fu Satan èn fu den eigi sondu skin (Rom. 6:16). Luku na eksempre fu Brian. En papa nanga mama ben leri en fu waka a pasi fu Yehovah. Ma di a ben kon moro bigi a ben feni taki a libi dati no ben o meki a de koloku. Brian bosroiti fu libi leki den sma fu a grontapu fu Satan. A e taki: „Mi ben denki taki mi ben o fri, ma na presi fu dati mi tron wan srafu fu omeni sani. Mi ben gebroiki drugs, mi ben dringi furu sopi èn mi ben libi wan hurulibi. Wan tu yari langa mi ben gebroiki moro hebi drugs èn mi no ben man sondro den. . . . Mi bigin seri drugs fu man libi a libi disi.” Bakaten Brian bosroiti fu libi soleki fa Yehovah wani. A kenki en libi èn a dopu na ini 2001. Now a de koloku fu di a e waka a pasi fu Yehovah. *

7. Soleki fa Mateyus 7:13, 14 e sori, dan san na den tu pasi di sma e waka?

⁷ A prenspari taki wi lon na tapu a yoisti pasi. Satan wani taki wi alamala tapu fu lon na tapu a smara pasi di e „tyari sma go na libi”. A wani taki wi abra go tapu a bradi pasi pe furu sma fu a grontapu disi de. Furu sma lobi a pasi dati èn a makelek fu waka drape. Ma a pasi dati e „tyari sma go na dede”. (Leisi Mateyus 7:13, 14.) Efu wi wani tan na tapu a yoisti pasi, dan wi no musu meki sma kori wi. Wi musu frutrow tapu Yehovah èn wi musu arki en.

8. San wan sma na ini wan streilon e du te a fadon?

⁸ Sma di e lon na ini wan streilon musu luku pe den e lon, so taki den no fadon. Ma toku a kan pasa taki wan tra sma noso wan olo na ini a pasi e meki den fadon. Efu den fadon, den e opo baka èn den e tan lon. Den no e tan luku a sani noso a sma di meki den fadon, ma den e prakseri fa a o de te den klari a streilon èn te den kisi a pai.

9. San wi musu du te wi fadon?

⁹ Wi kan fadon furu leisi na ini a streilon fu a libi. Son leisi wi e taki noso wi e du sani di no bun. Noso tra sma e du sani di e hati wi. Wi no musu skreki te disi pasa fu di wi alamala na sondusma. Wi alamala e lon na tapu a smara pasi. Dati meki son leisi wi o boks nanga makandra. Paulus ben taki dati son leisi wi ben o ’du hati sani nanga’ makandra (Kol. 3:13). Ma na presi taki wi tan prakseri a sani di wan sma du nanga wi, wi musu prakseri a pai di wi o kisi. Efu wan sma meki wi fadon, wi musu opo baka èn wi musu lon go doro. Efu wi e tan ati bron èn wi e stop dini Yehovah, dan wi no o man klari a streilon èn wi no o kisi a pai. Boiti dati, wi kan meki trawan di e lon na tapu a smara pasi, fadon tu.

10. Fa wi kan sorgu taki wi no e meki trawan „fadon”?

¹⁰ Wan tra fasi fa wi kan sorgu taki wi no meki wi brada nanga sisa „fadon”, na te wi e gi den na okasi fu du sani na den fasi, na presi fu dwengi den fu du san wi wani (Rom. 14:13, 19-21; 1 Kor. 8:9, 13). A sani disi e meki taki wi e difrenti fu sma di e lon na ini wan trutru streilon. Den sma dati e strei nanga makandra èn ibriwan fu den e suku fu wini a prijs gi ensrefi. Nofo tron den lonman dati e prakseri densrefi nomo. Son leisi den e pusu den tra lonman so taki den kan doro na fesisei. Ma wi no e strei nanga makandra (Gal. 5:26; 6:4). Wi wani yepi so furu sma leki wi man fu klari a streilon makandra nanga wi èn fu kisi têgo libi. Dati meki wi e pruberi fu fiti a rai  disi di Paulus gi wi: „No poti prakseri na un eigi afersi nomo, ma poti prakseri na den afersi fu trawan tu.”​—Fil. 2:4.

11. San wan lonman e tan prakseri èn fu san ede?

¹¹ Boiti taki wan lonman e luku a pasi di de na en fesi, a e tan prakseri fa a o de efu a wini a streilon. Awinsi a no man si a strepi na a kaba fu a streilon, toku a man si kaba fa a e abra en èn fa a e kisi a prijs. A man tan lon fu di a e tan prakseri a prijs.

12. San Yehovah gi wi?

¹² Na ini a streilon di wi e lon, ala sma e kisi wan prijs fu Yehovah. A o gi wi têgo libi na hemel noso na ini a paradijs na grontapu. Furu Bijbeltekst e sori fa a libi disi o de. Dati e yepi wi prakseri fa a o de te wi o libi fu têgo. Te wi e tan prakseri den moi sani di Yehovah pramisi wi, dan dati o yepi wi fu horidoro.

13. San wi abi di trutru lonman no abi?

¹³ Den sma di ben lon na ini den streilon fu Grikikondre ben kon weri èn den skin ben hati den. Ma a wan-enkri sani di ben o yepi den, na efu den ben oefen bun èn efu den ben tranga. Neleki den lonman dati wi srefi musu oefen fu lon a streilon fu a libi. Ma toku wi abi wan sani di den lonman disi no abi. Wi e kisi krakti fu Yehovah èn a krakti fu en no e kaba. Yehovah pramisi taki efu wi e frutrow na en tapu, a o gi wi leri èn a o gi wi krakti.​—1 Petr. 5:10.

14. Fa 2 Korentesma 12:9, 10 kan yepi wi fu horidoro te wi e kisi tesi?

¹⁴ Paulus ben kisi furu problema. Sma ben spotu en, den ben frufolgu en, son leisi a ben firi swaki èn a ben taki dati a ben abi ’wan maka na ini en skin’ (2 Kor. 12:7). Ma den sani disi no ben meki taki a gi abra. A ben si den leki wan okasi fu sori taki a e frutrow tapu Yehovah. (Leisi 2 Korentesma 12:9, 10.) Fu di Paulus ben denki so, meki Yehovah ben man yepi en fu pasa ala den tesi disi.

15. San wi o ondrofeni efu wi e teki na eksempre fu Paulus?

¹⁵ Kande sma e spotu wi noso den e frufolgu wi fu di wi e dini Yehovah. A kan tu taki wi siki noso wi weri. Ma efu wi e teki na eksempre fu Paulus, dan wi o si fa Yehovah o gi wi a krakti fu pasa ibriwan fu den tesi disi.

16. San yu kan du awinsi yu siki?

¹⁶ A de so taki yu no man komoto na yu bedi fu di yu siki, noso yu e sidon na ini wan rolsturu? Den kindi fu yu e hati yu noso yu no e si bun? Efu dati de so, dan yu o man lon makandra nanga yongusma èn nanga sma di de gosontu? Seiker! Furu owrusma nanga sikisma e lon a streilon fu a libi, ma den no e du disi nanga den eigi krakti. Fa den e kisi krakti fu Yehovah? Den wan di no man go na a Kownukondre zaal, e luku den konmakandra na den oso. Wan tra fasi fa den e kisi krakti, na te den e preiki gi den datra, den ati-oso zuster nanga den famiri fu den.

17. Fa Yehovah e denki fu den wan di swaki?

¹⁷ Efu yu no man du so furu gi Yehovah, yu no musu lasi-ati èn yu no musu denki taki yu no o man lon a streilon te na a kaba. Yehovah lobi yu fu di yu e bribi na ini en èn a no e frigiti ala den sani di yu du gi en. Now di yu swaki yu abi en yepi tranga fanowdu èn a no o gowe libi yu (Ps. 9:10). Na presi fu dati a o kon  krosibei na yu. Luku san wan sisa di e siki taki: „Fu di mi gosontu e go na baka, meki mi no man preiki so furu moro. Ma mi sabi taki a pikinso di mi e du, e prisiri Yehovah ati èn dati e meki mi prisiri.” Te yu e firi brokosaka, no frigiti taki Yehovah de nanga yu. Prakseri na eksempre fu Paulus èn a sani disi di a taki: „Mi e prisiri te mi swaki, . . . bika te mi swaki, mi tranga.”​—2 Kor. 12:10.

18. Sortu hebi tesi son brada nanga sisa abi?

¹⁸ Son sma di e lon a streilon fu a libi abi tra sortu problema. Den abi problema di sma no man si èn di trawan no e frustan son leisi. Fu eksempre, kande den e firi brokosaka doronomo noso den e broko den ede doronomo nanga ala sortu sani. Fu san ede a tesi disi hebi srefisrefi gi den futuboi disi fu Yehovah? Fu di te wan sma anu broko noso te a de na ini wan rolsturu, dan ala sma kan si dati èn den wani yepi den. Ma furu tron sma no e si te wan brada noso wan sisa e feti nanga son firi. Den brada nanga sisa disi de na ini wan muilek situwâsi, neleki wan sma di broko en anu noso en futu. Ma fu di sma no e si san e du den, meki den no e gi den a lobi nanga a yepi di den abi fanowdu.

19. San wi kan leri fu na eksempre fu Mefiboset?

¹⁹ Efu yu abi wan problema di e meki taki yu no man du furu gi Yehovah èn efu a gersi leki sma no e frustan fa yu e firi, dan yu kan kisi deki-ati fu na eksempre fu Mefiboset (2 Sam. 4:4). A ben siki èn Kownu David ben denki taki a ben du wan ogri, aladi dati no ben de so. Mefiboset no suku den problema disi gi ensrefi. Toku en ati no ben bron di den sani disi miti en. A ben de nanga tangi gi den bun sani di a ben abi. A ben breiti taki David ben du bun gi en (2 Sam. 9:6-10). Sobun, di David ben krutu en, Mefiboset no ben atibron na en tapu. A no hori David na ati èn a no ben atibron tapu Yehovah fu a sani di David du. Mefiboset ben prakseri nomo fa a ben kan horibaka gi a kownu di Yehovah ben poti (2 Sam. 16:1-4; 19:24-30). Yehovah meki sma skrifi a moi eksempre fu Mefiboset na ini a Wortu fu en, so taki wi kan leri fu en.​—Rom. 15:4.

20. Sortu tesi son brada nanga sisa abi, ma fu san den kan de seiker?

²⁰ Son brada nanga sisa e senwe hebi te den de nanga tra sma. A kan muilek gi den fu de nanga furu sma, ma den e tan go na den konmakandra, den kring  konmakandra èn na den kongres. A muilek gi den fu taki nanga sma di den no sabi, toku den e taki nanga sma na ini a preikiwroko. Efu dati de so nanga yu, dan yu kan de seiker taki yu no de yu wawan. Furu sma e firi leki yu. Hori na prakseri taki Yehovah breiti taki yu e dini en nanga yu heri ati. A hori di yu e horidoro e sori taki Yehovah e blesi yu èn taki a e gi yu a krakti di yu abi fanowdu (Fil. 4:6, 7; 1 Petr. 5:7). * Efu yu e dini Yehovah aladi yu siki èn aladi yu e feti nanga son firi, dan yu kan de seiker taki Yehovah lobi yu.

21. Yehovah o yepi wi fu du san?

²¹ Koloku taki a streilon di Paulus ben taki fu en no de a srefi leki wan trutru streilon. Na ini den trutru streilon na ini Bijbel ten, na wán sma nomo ben wini. Ma ala sma di e horidoro na ini a streilon fu a libi o kisi têgo libi (Yoh. 3:16). Na ini wan trutru streilon ala den lonman musu tranga, noso den no man wini. Ma furu fu wi no de gosontu, ma toku wi e horidoro (2 Kor. 4:16). Yehovah o yepi wi fu lon a streilon te na a kaba!