1. Ginani egi hatshavbo hi yedego gu gira?

INA u di hadzi gu dzumeya gu patega avba nya mapalisana nya gututume u dzitigo gu khuwe ma ngu garadza, ngudzungudzu wa ba gu u dwala mwendro na wu garade? Khu lisine ne. Ganiolu, mupostoli Pawulo a di khuye maKristo yatshavbo nya lisine momo omu nya mapalisana nya gututume. (Hebh. 12:1) Nigu hatshavbo, vaphya mwendro ava va dandridego khu tanga, va nya tshivba mwendro ava va garadego, gu vbwetega hi timiseya kala mahegiso ha gu ba hi vbweta gu mana gihiwa hi tumbiswago khu Jehovha. — Mat. 24:13.

2. Guya khu 2 Thimoti 4:7, 8, khu ginani Pawulo a nga tiya gu ningeya wusingalagadzi wowu?

² Pawulo a di gu ganeya nya mba thava kholu a di gu tutumide gwadi kala mahegiso. (Leri 2 Thimoti 4:7, 8.) Ganiolu, gwadigwadi ginani gututuma gu nga thudwa khu Pawulo?

3. Ginani gututuma ogu Pawulo a ganedego khugo?

³ Dzimbe dzitepo Pawulo a di gu ganeya khu silo si nga ba si girwa omu nya mapalisana ma nga ba ma girwa Gresiya wa gale gasi gu hevbudza silo nya lisima. (1 Kor. 9:25-27; 2 Thim. 2:5) Gutala nya dzitepo uye fananiside mavbanyelo nya muKristo ni mapalisana nya gututume. (1 Kor. 9:24; Gal. 2:2; Filp. 2:16) Muthu a gu beleya mapalisana yaya tepo a dzi hendzeledzago ga Jehovha a bwe a bhapatiswa. (1 Ped. 3:21) Uye a gu vboha mahegiso nya mapalisana yoyo tepo Jehovha a mu ningago gihiwa nya womi nya gupindruge. — Mat. 25:31-34, 46; 2 Thim. 4:8.

4. Ginani hi na ganeyago khigyo avba nya ndrima yeyi?

⁴ Khu gwevbini gufana gu gomogo avba nya mapalisana nya gu tutume pfhuka nyo laphe ni gu vbanya kha nga muKristo? Gu na ni silo nya singi si fanago. Hongoleni hi ganeya khu siraru sakone. Nyo pheye, gu vbwetega hi landra ndziya hi yeyedzidwego; nya wuvili, gu vbwetega hi vega gupima avba wu hegisago pfhuka; nya wuraru, gu vbwetega hi timiseya, hi tutuma ambari ha gu emisana ni sigaradzo.

5. Khu yevbi ndziya hi yedego gu yi landreya nigu khu ginani?

⁵ Gasi gu mana gihiwa avba nya mapalisana nya gututume gu vbwetega gu vatutumi va tutuma ndziyani va yeyedzidwego khu vathangeyi nya mapalisana. Khu ndziya nyo fane, ha gu ba hi vbweta gu mana gihiwa nya womi nya gupindruge gu vbwetega hi landreya ndziya nya wuKristo mwendro ndziya nya womi. (Mith. 20:24; 1 Ped. 2:21) Ambari ulolo, Sathane ni vale va landreyago giyeyedzo gyaye kha va vbweti gu khavo hi landreya ndziya nya womi nya wuKristo, avo va gu vbweta gu khavo hi tutuma gumogo navo. (1 Ped. 4:4) Avo va gu hega mavbanyelo yathu va bwe khavo mavbanyelo yawe khayo ma gu yadi nigu ma ngu va ninga gutshulega. Ganiolu esi va ganeyago malipha. — 2 Ped. 2:19.

6. Ginani u gi hevbulago avba nya esi si nga dugeleya Brian?

⁶ Vatshavbo va gu na ni mavbanyelo nya nga aya nya vathu va kutsedzedwago khu litigo la Sathane nya mba hweya va gu tugula gu khavo ndziya va yi hathidego kha yi va yisi gutshulegani ganiolu ya gu va gira dzigumbi dza Sathane ni gudogoreya gwawe. (Rom. 6:16) Nga dundrugeya khu giyeyedzo gya Brian. Vavelegi vaye va di mu kutsa gu landreya ndziya nya mavbanyelo nya wuKristo. Ganiolu, tepo a nga ba a pheya gu beleya tanga nya wuphya a di pheya gu kanakana gu khuye mavbanyelo yoyo ma di hadzi gu mu reseya gutsaka gani? Brian a di pheya gu tutuma ni vale va nga ba va vbanya khu milayo ya Sathane. Uye wari khuye: “Nya mba hweya nyi di pheya gu wona gu kheni gutshulega va nga ba va gu thula gu di hadzi gu nyi yisa mhangoni. Khu gitepwana nyi di pheya gu daha ni gu seya ngundzu nyi bwe nyi vbanya khu ndziya nya mba handzega. Ga myaga nya yingi yi nga landreya nyi di linga sidahadaha nyo hambanehambane nyo bwe nyi khala gumbi nya singi nya iso . . . . Nyi di pheya gu rengisa sidahadaha gasi nyi mana dzitsapawu nyo vbanye womi nyi nga ba nyi wu landreya.” Khu gu gimbiya nya tepo, Brian a di si wona nari tshukwana gu vbanya khu milayo ya Jehovha. A di vbindrugedza mavbanyelo yaye a bwe a bhapatiswa khu 2001. Olu a na ni gutsaka nya lisine kholu a landreyago ndziya nya wuKristo yi yisago womini. *

7. Guya khu Matewu 7:13, 14, dzindziya muni nya dzimbili dzi gomogo?

⁷ Si na ni lisima gu hatha ndziya nya yadi gasi gu yi landreya. Sathane o vbweta gu khuye hatshavbo hi diga gu tutuma khu ndziya yile nya gu honge, “yi yisago guvbanyani,” ganiolu hi tutuma khu ndziya nyo gule eyi vathu nya vangi va yi landreyago. Ndziya yoyo yi ngu tidwa ngudzu nigu si ngu vbevbuga gu gimbiya khiyo. Ganiolu iyo ya gu hi ‘yisa gumbembani.’ (Leri Matewu 7:13, 14.) Gasi gu hi kodza gu simama ndziyani nya lisine hi bwe hi si pengiswe gu vbwetega hi tumba Jehovha hi bwe hi mu engisa.

8. A gu tshuka mututumi a tshunganeya a thega, ginani a girago?

⁸ Vatutumi va gomogo avba nya mapalisana va gu tutuma na va khedzide mbeli gasi va si tshunganeyi va thega. Ambari ulolo, va nga tshuka va tshunganiswa khu mututumi kwawe mwendro khu liphala nyo khaguri. Va gu tshuka va thega va gu dzegeya gu wuga va simama gu tutuma. Avo va gu vega gupima mahegiso nya pfhuka ni gu mana gihiwa nasiri avba nya egi gi nga va tshunganisa.

9. Ha gu tshuka hi tshunganeya hi thega, ginani hi yedego gu gira?

⁹ Ndrani nya mapalisana yathu nethu, hi ngu tshuka hi tshunganeya dzitepo nya dzingi, khu gu phazama ga esi hi ganeyago mwendro hi girago. Vatutumi vakhwathu va nga tshuka va gira gihoso gi nga hi pwisago wuvi. Kha hi yeli gu hlamala go tshuka gu dugeleya silo nya nga isoso. Hatshavbo kha ha vbeleya nigu hatshavbo ha gu tutuma ndziyani yayimweyo nyo honge yi yisago guvbanyani. Khu kharato, anethu hi nga tshuka hi khala “sitshunganiso” ga moyo ni moyo wathu. Pawulo ganede gu khuye dzimbe dzitepo hi na tshuka hi manega ni “gighelo nyo solane.” (Kol. 3:13, NM) Ganiolu, wulangani nyo vege gupima avba nya egi gi nga hi tshunganisa hongoleni hi vega gupima avba nya gihiwa hi na gi manago. Ha gu tshuka hi tshunganeya hi thega hongoleni hi dzegeya gu wuga hi simama gu tutuma. Ha gu goroga, hi vega likhulo hi bwe hi bomba gu wuga hi simama gututuma kha hi na nga vboha mahegiso nya pfhuka nigu kha hi na nga hakha gihiwa. Guvbindra isoso, hi na tshunganisa gambe ni ava va landrago khu hwane gwathu va zamago navo gu tutuma khu ndziya yeyi nyo honge yi yisago guvbanyani.

10. Hi nga gira ginani gasi gu mba “tshunganedzisa” vambe?

¹⁰ Gimbe gilo gi nga hi phasago gu mba “tshunganedzisa” vandriyathu khu gu hi va diga va gira silo khu ndziya va yi vbwetago sa gu ba si kodzega, wulangani nya gu tepo yatshavbo hi vbweta gu khethu va gira silo khu magirelo yathu basi. (Rom. 14:13, 19-21; 1 Kor. 8:9, 13) Ganiolu gu na ni gilo nya lisima ngudzu gi hi hambanisago ni vatutumi nya mapalisana nya lisine, kholu moyo ni moyo wawe a gu dzi dwaneya gyaye gipandre gasi gu pala vambe vatutumi a bwe a mana gihiwa. Vatutumi vava va gu pimisa ngudzu khegi gi na va phasago gu pala avba nya mapalisana. Khu kharato, si nga gira va zama gu rindrividza vambe vatutumi gasi gu va thanga avo. Guhambana navo, ethu khandri ha gu palisana. (Gal. 5:26; 6:4) Makungo yathu  khu gu phasa vambe vathu nya vangi khavba hi si kodzago khavbo gasi gu hi vboha navo mahegiso nya pfhuka hi bwe hi mana hatshavbo gihiwa nya womi. Khu kharato, ha gu zama gu vbanya khu malito ma lovidwego khu Pawulo na gu thangedwa khu Nungungulu khuye “muthu ni muthu a nga dwaneli basi gu sayisa esi si gu saye, aholu, a na dzi garadze gambe khu sile si gu sa vangana.” — Filp. 2:4.

11. Mututumi a gu vega gupima avba nya ginani nigu khu ginani?

¹¹ Gimbe gambe khu gu vatutumi nya mapalisana nya gututume nya lisine kha va hegeyi gu khedza basi mbeli tepo va tutumago ganiolu va gu vega gambe gupima avba pfhuka wu hegisago avbo. Ambari va gu ba va si gu woni khu maho avba wu hegisago avbo pfhuka, avo va nga dzi dundrugeya na va gu vboha mahegiso nya pfhuka va bwe va hakha gihiwa. Va gu mana tshivba nyo simame khu gu dundrugeya khu gihiwa tepo yatshavbo.

12. Ginani egi Jehovha a hi tumbisago?

¹² Avba nya mapalisana hi gomogo gwawo, khu wuhindzi, Jehovha tumbiside vathu vaye tshatshazelo, va gu tutuma kala mahegiso, wu gu womi nya mba vbeya, ndzadzini mwendro paradhesini mafuni. Milowo yi ngu hi ninga magavbudzo nya edzi wu na ba wu khade khidzo tshatshazelo wowo gasi hi kodza gu dundrugeya edzi womi wu na tsakisago khidzo. Ha gu vega gupima gwathu ni monyo wathu avba nya gutumba hi gu nago si na garadza gu hi dzumeleya ni gevbini gi hi tshunganisa hi thega hi si wugi gambe.

13. Lithomo muni hi gu nalo guvbindra vatutumi nya mapalisana nya lisine?

¹³ Vatutumi nya mapalisana nya vaGreki va di yede gu timiseya sigaradzo nya nga gugarala ni gupwa guvbisa sivbango. Ganiolu, va di gu tumba tshivba yawe ni gu trenari. Gufana ni vatutumi vovo anethu hi ngu hakha sihevbudzo nya edzi hi nga tutumago khidzo ndrani nya mapalisana hi gomogo gwawo. Ganiolu, ethu hi na ni lithomo guvbindra vatutumi vovo. Ethu hi nga mana tshivba nya mba vbeya ga Jehovha nigu uye kha hi pimeyi tshivba yoyo. Ha gu tumba Jehovha, uye a ngu tumbisa gu hi hevbudza ni gu hi gira hi tiya. — 1 Ped. 5:10.

14. Lowo wa 2 Vakorinto 12:9, 10, wu nga hi phasa kharini gu timiseya silingo?

¹⁴ Pawulo a di yede gu emisana ni sigaradzo nya singi. Vbavbandze nyo vadwe ni gu tshaniswa khu vambe, dzimbe dzitepo a di gu dzipwa na vbede tshivba nigu a di yede gu timiseya egi uye mune a nga gi rana khuye “muba givilini.” (2 Kor. 12:7) Wulangani nyo wone sigaradzo soso kha nga gighelo nyo dige gu thumeya Jehovha, uye a di si wona kha nga lithomo nyo tumbe Jehovha. (Leri 2 Vakorinto 12:9, 10.) Kha nga olu Pawulo a nga ba a dzi emisede gu gira isoso, Jehovha a mu phaside gu timiseya silingo satshavbo.

15. Ha gu pimedzeya Pawulo hi na mana ginani?

¹⁵ Anethu hi nga tshuka hi tshaniswa mwendro gu vadwa khu kotani nya gukhodwa gwathu. Dzimbe dzitepo hi ngu emisana ni madwali mwendro gu vbeya tshivba. Ganiolu ha gu pimedzeya Pawulo, sigaradzo soso satshavbo hi na si wona kha nga lithomo nya gu mane giphaso nya lihaladzo gya Jehovha.

16. Ginani u nga gi kodzago gu gira ambari wa gu ba u dwala?

¹⁶ U womo vbadahutuno khu madwali mwendro saye wa gu gimbiya khu kadera nya marodha? U na ni gigaradzo nya mawundru mwendro gigaradzo nya maho? Abari kharato, ina u nga si kodza gu tutuma ni vale va ngarigu vaphya ni ava va gu ni womi nya wadi? Khu lisine, u nga si kodza! Gu na ni vathu nya vangi va dandridego khu tanga, va dwalago, va tutumago navo ndziyani nya womi. Avo va mwalo makodzelo nyo gire isoso khu tshivba yawe. Jehovha a ngu va ninga tshivba tepo va engiseyago mitshangano nya wuKristo adzina khu telefone mwendro nya gu garavharwi va yisedwa va ya yi engiseya. Nigu va ngu patega thumoni nya gu gire vapizane khu gu tshumayela vadhogodheya, vaenferimero ni valongo.

17. Jehovha a gu dzipwa kharini khu vale va gu na ni gigaradzo nya madwali?

 ¹⁷ U nga dzumeleyi gu khuwe sigaradzo nya womi wago si gu gira u khodwa gu khuwe u mwalo tshivba nyo tutume ndziyani yi yisago guvbanyani. Jehovha a ngu gu haladza khu kotani nya gukhodwa gwago ni satshavbo u mu giredego ga myaga yatshavbo yi vbindridego. U ngu gi vbweta ngudzu giphaso gyaye nigu gima kha na nga gu diga. (Ndzi. 9:10) Wulangani nya isoso, uye a na engedzeya gu hidzimeya vbafuvbi gwago. Ngapwa esi si ganedwago khu moyo nya ndriyathu nya nyamayi a emisanago ni gigaradzo nya madwali: “Tepo gigaradzo nya madwali gi yago gi dandra nya gu si wona na si gu engedzeya gu nyi garadzeya gu mana lithomo nyo tshumayele. Ganiolu nyi ngu dziti gu kheni gudzigaradza gogu nya gudugwana nyi gu girago gu ngu tsakisa monyo wa Jehovha nigu isoso si ngu nyi gira nyi tsaka.” Tepo u dzipwago na wu vbede tshivba, dundruga gu khuwe khandruwe wenga. Dundrugeya khu giyeyedzo gya Pawulo u bwe u dundruga malito yaye nya gu tiyise ma gu khayo: ‘Nyi ngu nengela khu gupwa guvbunguga nya tshivba . . . kholu gikhati nyi dzi pwago na nyi vbungugide tshivba, khavbo nyi gu ni tshivba.’ — 2 Kor. 12:10.

18. Sigaradzo muni va emisanago naso vambe vathu si hambanago ngudzu ni esi sa vambe?

¹⁸ Vambe va tutumago navo ndziyani yi yisago guvbanyani va ngu emisana ni gimbe gilo nyo garadze. Va ngu emisana ni sigaradzo nya gu vambe kha va kodzi gu si pwisisa. Khu giyeyedzo, vambe va ngu emisana ni depressão (madwali nya gu hamuge gutsaka) mwendro ansiedade (gigaradzo nya gu va khaleya gu garadzega). Khu ginani hi nga ganeyago gu khethu sithumi sesi nyo golege sa Jehovha sa gu emisana ni sigaradzo si hambanago ngudzu ni sa vambe? Kholu abari gu muthu nyo khaguri a di fanyega libogo mwendro saye a gu gimbiya khu kadera nya marodha, vathu vatshavbo va ngu kodza gu gi wona gigaradzo gyaye nigu adzina va kutsega gu mu phasa. Ganiolu vale va emisanago ni sigaradzo sa monyoni mwendro mapimoni si nga gira va si wonegi khatshi va ngu tshaniseka. Gigaradzo gyawe gi ngu vbisa nya nga gu fanyega libogo mwendro litundru, ganiolu, kha nga olu vambe va si kodzigo gu si wona gu khavo va ngu tshaniseka si nga gira va si ningwi giphaso ni gu yeyedzwa lihaladzo li vbwetegago.

19. Ginani hi gi hevbulago avba nya matimo ya Mefibhosete?

¹⁹ Wa gu ba uri ni gigaradzo egi vambe va gu mba gi pwisisa adzina u nga tiyiswa khesi si dugeledego Mefibhosete. (2 Sam. 4:4) Uye a emisanide ni gu dwala a bwe a lamudwa khu ndziya nya mba yadi khu Pfhumu Dhavhidhe. Mefibhosete kha ghoha gilo gasi gu manega ni silingo soso. Ambari ulolo, uye kha dzumeleya gu khuye isoso si mu vbedza tshivba. Uye a di gu bonga khesi nya sadi si nga ba si mu dugeleya. Uye yeyedzide gubonga khu wuwadi a nga ba a giredwe khu Dhavhidhe matshigu hwane. (2 Sam. 9:6-10) Khu kharato, tepo Dhavhidhe a nga mu lamula khu ndziya nya  mba yadi uye a di zama gu pwisisa satshavbo si nga ba si patega. Kha dzumeleya gu khuye gihoso gya Dhavhidhe gi mu gira a manega ni likhulo. Nigu uye kha ninga nandru Jehovha khu kotani nya esi Dhavhidhe a nga ba a giride. Mefibhosete a di vega gupima avba nya esi a nga ba a si kodza gu gira gasi gu seketeya pfhumu yi todzidwego khu Jehovha. (2 Sam. 16:1-4; 19:24-30) Jehovha lovide matimo ya Mefibhosete omu nya Bhibhiliya gasi hi hevbula gilogyo gwawo. — Rom. 15:4.

20. Gigaradzo nyo khaleye gugaradzega gi nga khuha kharini vambe nigu ginani va nga tiyisegago khigyo?

²⁰ Khu kotani nya gigaradzo nyo khale na va garadzegide vambe vandriyathu va ngu garadzega ngudzu va gu ba vari vbakari nya vambe vathu. Dzimbe dzitepo si ngu va garadzeya gu khala wulanga gu gu ni vathu nya vangi ganiolu va ngu simama gu hongola mitshanganoni nya libandla ni eyi nya yikhongolo. Vambe si ngu va garadzeya gu bhula ni vathu va gu mba vati ambari ulolo va ngu ganeya ni vambe thumoni nya gu tshumayele. Wa gu ba uri ni gigaradzo gyogyo dziti gu khuwe khandruwe wenga. Vangi va emisanago ni gigaradzo nya nga gyogyo. Dundruga gu khuwe Jehovha a ngu tsaka khu gudzigaradza u gu girago khu monyo wago watshavbo. Gu ba u timiseya kala muhuno, so yeyedza gu khiso uye a ngu gu kategisa ni gu gu ninga tshivba u yi vbwetago. * (Filp. 4:6, 7; 1 Ped. 5:7) Wa gu ba u thumeya Jehovha ambari na wu emisana ni gigaradzo nya madwali, tiyisega gu khuwe u ngu tsakisa Jehovha.

21. Khu gu phaswa khu Jehovha ginani egi hatshavbo hi na gi kodzago gu gira?

²¹ Egi gi tsakisago khu gu, gu na ni guhambana avba nya mapalisana nya gututume nya lisine ni aya Pawulo a ganedego khayo. Avba nya mapalisana nya gututume ya teponi ya gale, muthu moyo basi a nga ba a mana gihiwa. Guhambana ni mapalisana yoyo, ni wevbini a timiseyago khu gutumbega ndziyani nya wuKristo yi yisago guvbanyani a na hakha gihiwa nya womi nya gupindruge. (Joh. 3:16) Avba nya mapalisana nya gututume nya lisine, vatutumi vatshavbo gu vbwetega na vari ni womi nya wadi gasi va kodza gu pala. Gutala nya ethu hi na ni sigaradzo nya womi, ambari ulolo, hi ngu timiseya. (2 Kor. 4:16) Khu gu phaswa khu Jehovha hatshavbo hi na si kodza gu tutuma kala mahegiso!