1. ¿Tuku talakaskin natlawayaw putum kstalaninanin Cristo?

¿XLAKGATIW xmakgkgosnaw niku katsiyaw pi tuwa, liwaka komo tatatlayaw o tlakgwanitaw? Xlikana pi ni. Pero apóstol Pablo wa pi putum xaxlikana kstalaninanin Cristo kgosnamaw (Heb. 12:1). Pero maski linawa kata o ni kgalhiyaw lhuwa litliwakga, putum akinin talakaskin natayaniyaw asta namasputuyaw komo lakaskinaw pi Jehová nakinkamaxkiyan kintatlajakan (Mat. 24:13).

2. Chuna la wan 2 Timoteo 4:7, 8, ¿tuku xlakata Pablo lu xlikana xkanajla tuku lichuwinalh?

² Pablo liwana xkanajla uma chu asta lichuwinalh: «Kmasputulh uma takgosni» (kalikgalhtawakga 2 Timoteo 4:7, 8). Pero ¿tuku takgosni xlichuwinama Pablo?

3. ¿Tuku uma takgosni nema lichuwinalh Pablo?

³ Xlakata Pablo namasiya tuku lu xlakaskinka, lakgachunin xmaklakaskin liʼakxilhtit xlakata takgaman nema xtlawakan kxamakgan Grecia (1 Cor. 9:25-27; 2 Tim. 2:5). Makglhuwa, tamalakxtumilh xlatamat chatum kstalanina Cristo la akgtum takgosni (1 Cor. 9:24; Gál. 2:2; Filip. 2:16). Chatum lataman tsuku kgosnan akxni tamakamastani Jehová chu tamunu (1 Ped. 3:21). Chu masputu takgosni akxni Jehová maxki tatlaja xlakata latamat nema ni kgalhi xlisputni (Mat. 25:31-34, 46; 2 Tim. 4:8).

4. ¿Tuku naʼakxilhaw kʼuma artículo?

⁴ Pulaklhuwa tuku tatalakxtumi takgosni chu xlatamat chatum kstalanina Cristo. Kaʼakxilhwi pulaktutu. Pulana, talakaskin naʼanaw ktiji niku kiliʼanatkan. Xlipulaktiy, talakaskin kajwatiya nalilakpuwanaw niku nachanaw. Chu xlipulaktutu,  talakaskin natayaniyaw maski nakgalhiyaw makgapitsi taʼakglhuwit.

5. ¿Niku ktiji kiliʼanatkan, chu tuku xlakata?

⁵ Xlakata tlan natlajanankan kʼakgtum takgosni, talakaskin pi tiku nakgosnankgo nastalanikgo tiji nema lakkaxwilikanit. Nachuna, komo makglhtinamputunaw tatlaja xlakata latamat nema ni kgalhi lisputni, talakaskin naʼanaw ktiji nema kalakkaxwilinikanit kstalaninanin Cristo (Hech. 20:24; 1 Ped. 2:21). Pero Satanás chu tiku stalanikgo lakaskinkgo pi tiku skujnanimaw Dios, kʼatanu tiji kaʼaw xlakata lakaskinkgo pi wa kakatakgosnaw (1 Ped. 4:4). Kinkalikgalhkgamanankgoyan xlakata la linaw kilatamatkan chu wankgo pi xlatamatkan tlakg tlan xlakata tlawakgo tuku lakaskinkgo. Pero uma nixlikana (2 Ped. 2:19).

6. ¿Tuku katsiniyaw xliʼakxilhtit Brian?

⁶ Komo wi tiku nalaksaka naʼan kxtijikan tiku stalanikgo Satanás, kaj ni makgas nakatsikgo pi uma ni limin tapaxuwan, wata xtachuna la chatum skujni litaxtukgo (Rom. 6:16). Kaʼakxilhwi xliʼakxilhtit chatum tala chixku wanikan Brian. Akxni aktsujku xwanit, xnatlatni masiyanikgolh nalilatama xtastakyaw Biblia. Pero akxni tsukulh staka tsukulh lilakpuwan komo xlikana xʼama limini tapaxuwan uma latamat. Wa xlakata, laksakli nachuna nalin xlatamat chuna la tiku tlawakgo xtalakaskin Satanás. Brian wan: «Ni lu xaklilakpuwanit pi tuku xaktlawaputun ama kilhtamaku xʼama tlawa pi xakkgalhilh nitlan talismanin». Tsukulh maklakaskin drogas, tsukulh wa kuchu chu lixkajni tsukulh lin xlatamat. Wampara: «Chuna la titaxtulh kata kmaklakaskilh drogas nema tlakg lakgtliwakga chu nialhla xakmakgxtakga. Chu milh kilhtamaku ktsukulh sta drogas xlakata naklixokgo nema akit xakmaklakaskin». Alistalh, lakpuwa nalipawan Jehová chu nalilatama xtastakyaw. Lakgpalilh la xlin xlatamat chu tamunulh kkata 2001. La uku kgosnama niku xliʼanat, chu lu xlikana kgalhi tapaxuwan. *

7. Chuna la wan Mateo 7:13, 14, ¿tuku akgtiy tiji wi kkilakatinkan?

⁷ Lu xlakaskinka pi nalaksakaw tiji nema xatlan. Satanás lakaskin pi nialh nakgosnanaw kxatitsu tiji nema linan «klatamat» chu pi kaʼaw kxatilanka tiji niku ankgo lhuwa latamanin xalak uma kakilhtamaku. Kʼuma tiji tlakg ni tuwa ankan, pero linan «kpulakgsputni» (kalikgalhtawakga Mateo 7:13, 14). Komo lakaskinaw pi nitu nakinkamaxtutayayan kxatlan tiji, talakaskin nalipawanaw Jehová chu nakgaxmataw tuku kinkawaniyan.

8. ¿Tuku tlawakgo kgosnanin akxni akgchakgxkgo chu lhtujkgo?

⁸ Tiku makgat kgosnankgo putum kilhtamaku kuenta tlawakgo xtijikan xlakata ni naʼakgchakgxkgo. Maski chuna, max min kilhtamaku akgchakgxkgo o atanu tiku kaj lakapala kamakgchakgxni. Komo lhtujkgo, takikgo chu chuntiya tsukuparakgo kgosnankgo. Ni lilakpuwankgo tuku kamakgchakgxnilh, wata wa lilakpuwankgo nachankgo niku xlichanatkan chu tuku nakamaxkikan.

9. ¿Tuku talakaskin natlawayaw komo naʼakgchakgxaw?

⁹ Niku akinin kgosnamaw, max makglhuwa naʼakgchakgxaw, xlakata tuku wanaw, tuku nitlan tlawayaw o xlakata chatum tala wi tuku nitlan natlawa chu nitlan nakinkamamakgkatsiniyan. Uma ni kaks kinkamalakawaniyan, xlakata putum akinin makglakgalhinanin chu na anta kgosnamaw kxatitsu tiji nema linan klatamat. Chu wa xlakata namin kilhtamaku max nalamakgasitsiyaw. Pablo lichuwinalh pi xmilh kilhtamaku wi tuku xlalimakgasitsiw (Col. 3:13). Pero ni wa kalilakpuwaw tuku kinkamakgchakgxnin, wata wa tuku namakglhtinanaw. Komo nalhtujaw, katakiw chu chuntiya kakgosnaw. Ni anta katamakgxtakgwi kaj xlakata kintasitsikan, xlakata nikxni katichaw niku kilichanatkan chu ni katimakglhtinaw kintatlajakan. Chu nachuna, komo anta natamakgxtakgaw max natlawayaw pi amakgapitsin tiku na kgosnamakgolh tuwa namakgkatsikgo naʼankgo kxatitsu tiji nema linan klatamat.

10. ¿Tuku talakaskin natlawayaw xlakata kinatalankan ni tuwa namakgkatsikgo nakgosnankgo?

¹⁰ Komo lakaskinaw pi kinatalankan tiku na kgosnamakgolh ni tuwa namakgkatsikgo, kamastaw talakaskin pi katlawakgolh tuku xlakan tlan lakpuwankgo chu ni wa tuku akinin lakpuwanaw (Rom. 14:13, 19-21; 1 Cor. 8:9, 13). Uma nixtachuna la akxni kgosnankgo latamanin. Latamanin tiku kgosnankgo, xputumkan liskujkgo xlakata natlajanankgo pero kaj chatum tiku tlajanan. Ni kalilakgaputsakgo amakgapitsin. Wa xlakata liskujkgo wa napulakgo. Pero akinin ni katalatlajayaw kinatalankan (Gál. 5:26; 6:4). Akinin kamakgtayaputunaw amakgapitsin xlakata na nachankgo  niku kilichanatkan chu namakglhtinanaw latamat nema ni kgalhi xlisputni. Wa xlakata liskujaw namakgantaxtiyaw tuku lichuwinalh Pablo xlakata ni kiʼakstukan nakinkalilakgaputsakanan, wata nachuna «tuku lakaskinkgo amakgapitsin» (Filip. 2:4).

11. ¿Tuku kajwatiya lilakpuwankgo tiku kgosnankgo, chu tuku xlakata?

¹¹ Ni kajwatiya talakaskin kuenta natlawakgo xtijikan, nachuna kuenta tlawakgo niku nachankgo. Maski nila akxilhkgo, lilakpuwankgo akxni nachankgo chu namakglhtinankgo xtatlajakan. Uma kamakgpuwantini.

12. ¿Tuku kinkamalaknuniyan Jehová xlakata tapaxkit nema kinkakgalhiniyan?

¹² Xlakata Jehová kinkapaxkiyan kinkamalaknuniyan pi putum tiku namasputukgo uma takgosni natlajakgo o nakamaxkikan latamat nema ni kgalhi xlisputni, anta kʼakgapun o kParaíso kKatiyatni. Biblia kinkamasiyaniyan tsinu la natawila uma latamat nema kinkamalaknuniyan. Chuna tlan nalilakpuwanaw stlan latamat nema kgalhkgalhimaw. Akxni tlakg nalilakpuwanaw uma takgalhkgalhin, tlakg kuenta natlawayaw kintijikan xlakata ni naʼakgchakgxaw chu natayaniyaw.

13. ¿Tuku tamakgtay kgalhiyaw akinin nema latamanin tiku kgosnankgo nitu kgalhikgo?

¹³ Kxamakgan Grecia, tiku xkgosnankgo xtalakaskin natayanikgo tuku tuwa xmakgkatsikgo la komo akxni xtlakgwankgo chu akxni wi tuku xkakatsani. Pero kajwatiya xlitamakgtayakgo xlitliwakgakan chu la xlakgtawakgakgonit. Chuna la xlakan, akinin na kinkamalakgtawakgakanan xlakata nakgosnanaw. Pero akinin kgalhiyaw akgtum tamakgtay: kilitliwakgakan nikxni sputa, xlakata wa kinkamaxkiyan Jehová. Komo wa nalipawanaw, kinkamalaknuniyan pi nakinkamalakgtawakgayan chu nakinkamatliwakglhan (1 Ped. 5:10).

14. ¿La kinkamakgtayayan 2 Corintios 12:9, 10 xlakata natayaniyaw tuku tuwa natitaxtuyaw?

¹⁴ Apóstol Pablo lhuwa taʼakglhuwit titaxtulh. Ni kajwatiya xlikgalhkgamanankan chu xputsastalanikan, lakgachunin lu xtaxlajwani chu xtalakaskin natayani tuku xla limapakuwilh «xtachuna la lhtukun» (2 Cor. 12:7). Pero maski tuwa tuku titaxtulh ni lakpuwa pi anta natamakgxtakga, wata akxilhli pi xtalakaskin tlakg nalipawan Jehová (kalikgalhtawakga 2 Corintios 12:9, 10). Wa xlakata Jehová ankgalhin makgtayalh.

15. ¿Tuku namakgkatsiyaw komo nastalaniyaw xliʼakxilhtit Pablo?

¹⁵ Xtachuna la Pablo, max akinin nachuna nitlan tuku nakinkawanikanan o nakinkaputsastalanikanan. Nachuna, max talakaskin natayaniyaw kintajatatkan o natlakgwanaw. Pero komo nastalaniyaw xliʼakxilhtit, pulakatunu taʼakglhuwit nema natitaxtuyaw nakinkamaxkiyan talakaskin namakgkatsiyaw xtapaxkit chu xtamakgtay Jehová.

16. ¿Tuku tlan natlawakgo tiku tatatlakgo?

¹⁶ ¿Chu tuku natlawakgo tiku nialhla takikgo, tiku wilakgolh ksilla de ruedas, tiku nialh kgalhikgo litliwakga chu nialhla liwana lakawanankgo? ¿Tlan nakatakgosnankgo kamanan tiku ni tatatlakgo? Chuna. Lhuwa natalan tiku linkgoya kata chu makgapitsi tiku tatatlakgo nachuna makgkgosnamakgolh niku nakamaxkikan latamat nema ni kgalhi xlisputni, pero ni kaj xʼakstukan xlitliwakgakan maklakaskinkgo, wata wa Jehová tiku kamakgtaya. Kgaxmatkgo tamakxtumit kteléfono o akxilhkgo kʼInternet. Makgtayanankgo xlakata latamanin kstalaninanin Cristo nalitaxtukgo, tiku xalak xfamilia chu makuchinanin.

17. ¿La kaʼakxilha Jehová tiku nialhla lhuwa tuku tlawakgo?

 ¹⁷ Ni namastayaw talakaskin pi nakinkamaxlajwaniyan kaj xlakata nila lhuwa tuku tlawayaw chu nalakpuwanaw pi nila chuntiya nakgosnanaw ktiji nema linan klatamat. Jehová kinkapaxkiyan xlakata kgalhiniyaw takanajla chu xlakata nikxni makgxtakgnitaw. Akxni chuna titaxtuyaw tlakg lakaskinaw xtamakgtay chu xla nikxni kintikamakgxtakgni (Sal. 9:10). Xla ankgalhin lakatsu kinkatawilan. Kaʼakxilhwi tuku wan chatum tala puskat tiku kgalhi laktuwa tajatat: «Xlakata kintajatat chuntiya taliwakama, nachuna nialh lu la kkalitachuwinan xlakata Dios amakgapitsin latamanin. Pero kkatsi pi tuku ktlawa maski kaj ni lhuwa, makgapaxuwa Jehová. Chu nachuna kimakgapaxuwa». Akxni makgkatsiyaw pi taxlajwanimaw, kalakapastakwi pi Jehová kinkatawilan. Kalilakpuwaw xliʼakxilhtit Pablo chu lakwan xtachuwin: «Luwa klipaxuway lantla [ktaxlajwani], sampi akxni [ktaxlajwani], akxni ntlakg kkgalhi litliwakga» (2 Cor. 12:10).

18. ¿Tuku tlakg xatuwa taʼakglhuwit titaxtukgo makgapitsin?

¹⁸ Makgapitsi tiku kgosnamakgolh ktiji nema linan klatamat kgalhikgo atanu taʼakglhuwit. Umakgolh xlakskujnin Jehová kgalhikgo taʼakglhuwit nema amakgapitsin nila akxilhkgo chu max ni akgatekgskgo, la komo tajatat xla talipuwan o tajatat xla talakgaputsit. ¿Tuku xlakata uma lu tuwa? Xlakata akxni wi tiku tatukxnit xlukut o wi ksilla de ruedas, putum akxilhkgo tuku titaxtuma chu max makgtayakgo. Pero tiku kgalhikgo tajatat xla talipuwan ni tasiya, xlakata kxmaknikan chu kxtalakapastaknikan makgkatsikgo. Pero xtakatsanajwatkan xtachuna la tiku tatukxnit xlukut, chu amakgapitsin max ni lu limasiyanikgo tapaxkit chu tamakgtay nema maklakaskinkgo.

19. ¿Tuku kinkamasiyaniyan xliʼakxilhtit Mefibóset?

¹⁹ Komo nila tuku lhuwa tlawayaw chu makgkatsiyaw pi niti kinkaʼakgatekgsniyan, xliʼakxilhtit Mefibóset nakinkamakgtayayan (2 Sam. 4:4). Ni kajwatiya nila xtlawan, nachuna tayanilh pi mapakgsina David nitlan likatsilh. Taʼakglhuwit nema titaxtulh Mefibóset ni wa putsalh, pero ni mastalh talakaskin pi kajwatiya xlilakpuwa tuku nitlan tlawanika. Wata lhuwa xtapalh xliʼakxilha tuku xkgalhi. Lu xpaxtikatsini talakgalhaman nema limasiyanilh David xapulana (2 Sam. 9:6-10). Wa xlakata, akxni David nitlan likatsinilh Mefibóset xla akxilhli putum tuku xlama. Ni lisitsilh tuku nitlan tlawanilh David chu ni limawakalh Jehová tuku nitlan xtitaxtuma. Wata tatayalh mapakgsina tiku xlaksaknit Dios (2 Sam. 16: 1-4; 19:24-30). Jehová tsokgwililh kxTachuwin uma lu tlan liʼakxilhtit nema kinkawilinin Mefibóset xlakata tlan nalitamakgtayayaw (Rom. 15:4).

20. ¿Tuku katlawani makgapitsin tajatat xla talakgaputsit, pero tuku liwana katsikgo?

²⁰ Xlakata tajatat xla talipuwan o talakgaputsit, makgapitsi natalan pekuankgo chu nitlan makgkatsikgo akxni akxtum katalakgo amakgapitsi latamanin. Max lu tuwa makgkatsikgo tawilakgo niku lhuwa wilaka, pero chuntiya ankgo ktamakxtumit chu klaklanka tamakxtumit. Tuwa makgkatsikgo katachuwinankgo tiku ni lakgapaskgo, pero ankgo lichuwinankgo Dios. Komo chuna titaxtumaw, ni kaj kiʼakstukan. Lhuwa tiku nachuna titaxtumakgolh. Kalakapastakwi pi Jehová lhuwa xtapalh akxilha akxni xatapaxuwan skujnaniyaw. Xlakata ni taxlajwaniyaw anta litasiya pi xla kinkasikulunatlawayan chu kinkamaxkiyan litliwakga nema maklakaskinaw * (Filip. 4:6, 7; 1 Ped. 5:7). Komo skujnanimaw Jehová maski nila putum tuku tlawayaw xlakata kintajatatkan o tuku makgkatsiyaw, liwana katsiyaw pi xla lu makgapaxuwa.

21. ¿Tuku tlan natlawayaw putum akinin xlakata xtamakgtay Jehová?

²¹ Chuna la akxilhnitaw, wi makgapitsi tuku litalakgpali takgosni niku latlajakan chu nema lichuwinalh Pablo. Tiku xkgosnankgo makgasa kaj chatum tiku xtlajanan. Pero niku akinin kstalaninanin Cristo kgosnamaw putum namakglhtinanaw latamat nema nikxni katisputli komo ni namakgxtakgaw Jehová (Juan 3:16). Ktakgosni nema latlajakan, putum tiku makgkgosnankgo xtalakaskin pi putum tlan xtawi xmaknikan. Komo nichuna max nila xtlajanankgolh. Pero maski lhuwa akinin tatatlayaw o nila putum tlawayaw, chuntiya tayanimaw (2 Cor. 4:16). Xlakata xtamakgtay Jehová, putum akinin tlan namasputuyaw uma takgosni.