1. ¿Bin ya skʼan ya jpastik ta jpisiltik te j-abatotik yuʼun te Diose?

¿YABAL jkʼan ya kaʼiytik tsaltamba animal teme jnaʼojtik te ayotik ta chamel o te lujben ya kaʼiy jbatike? Maniwan. Te Pablo la yalbey skʼoplal te yakotik ta animal te j-abatotik yuʼun te Diose (Heb. 12:1). Chikan teme ayix kaʼbilaltik o maʼyukix kiptik ma skʼan ya xlujbotik ta animal teme ya jkʼan ya jtatik te premio ya yakʼbotik te Jehovae (Mat. 24:13).

2. Jich bitʼil ya yal 2 Timoteo 4:7, 8, ¿bin yuʼun jun yoʼtan kʼopoj te Pabloe?

² Te Pablo juʼix yuʼun-a te animale, jaʼ yuʼun jun yoʼtan la yalbey skʼoplal (kʼopona 2 Timoteo 4:7, 8). Pero, ¿bin tsaltamba animal la yalbey skʼoplal?

3. ¿Bin-a te tsaltamba animal la yalbey skʼoplal te Pabloe?

³ Te Pablo ay baeltik la stuuntes ejemploetik ta swenta te tajimaletik ya spasik ta namey Grecia swenta ay bin mukʼ skʼoplal ya yakʼ ta nopel-a (1 Cor. 9:25-27; 2 Tim. 2:5). Bayal buelta la spajbey skʼoplal te skuxlejal te j-abat yuʼun Dios sok te tsaltamba animal (1 Cor. 9:24; Gál. 2:2; Filip. 2:16). Jtul ants winik ya xjajch ta tsaltamba animal kʼalal ya yakʼ skuxlejal ta stojol Dios sok te ya yichʼ jaʼe (1 Ped. 3:21). Te Jehová ya yakʼbey te premio te jaʼ te kuxlejal ta sbajtelkʼinal kʼalal juʼix yuʼun-a te tsaltamba animale (Mat. 25:31-34, 46; 2 Tim. 4:8).

4. ¿Bin ya kilbeytik skʼoplal ta artikulo ini?

⁴ Te skuxlejal te jtul j-abat yuʼun Dios ay bayal banti pajal sok te tsaltamba animale. Kiltik oxchajp. Sbabial, mame yanuk be ya jtʼuntik. Schebal, ma skʼan ya xchʼay ta jsitik te banti ya xkʼootike. Yoxebal, ya skʼan ya jtsaltik te wokolil ya jtatik te bee.

5. ¿Bin beil ya skʼan ya jtʼuntik sok bin yuʼun?

⁵ Swenta ya jpastik ganar te premio ta jun tsaltamba animal, ya skʼan ya x-animajotik te banti ya yalik te machʼatik la schajpanik te tajimale. Jaʼnix jich teme ya jkʼan ya jtatik te premio yuʼun te kuxlejalil ta sbajtelkʼinal ya skʼan ya jtʼuntik te be o te bin yilel stalelik te j-abatetik yuʼun te Diose (Hech. 20:24; 1 Ped. 2:21). Pero te Satanás sok te machʼatik ya skʼayinbeyik te stalele, jaʼ ya skʼanik te yanuk be ya jtʼuntik sok te yakuk jpastik-euk te bin chopole (1 Ped. 4:4). Ya slabanotik yuʼun te yan-a te jtaleltik sok ya yalik te libre ayik ta spasel te bin ya skʼan yoʼtanike, pero chʼayemik (2 Ped. 2:19).

6. ¿Bin ya yakʼ jnoptik te ejemplo yuʼun te Brian?

⁶ Teme ay machʼa ya skʼan ya stʼun te be yuʼun te Satanás, yame sta ta ilel te maba ya x-akʼot ta libre sok te jaʼnax ya xmosoinote (Rom. 6:16). Kiltik te ejemplo yuʼun te Brian. Te kʼalal chʼinto-ae, nojptesot yuʼun te smeʼ stat te jaʼuk ya stʼun ta skuxlejal te tojobtesel yuʼun te Bibliae. Pero te kʼalal kaj ta mukʼubele ma la schʼuun te jaʼ ya x-akʼbot stseʼelil yoʼtane. Jaʼ yuʼun jajch stʼunbey stalel te machʼatik jaʼ ya spasik te bin ya smulan te Satanase. Te Brian jich ya yal: «La jkʼan te libre ayukone, pero maʼyuk jpasoj pensar-a te ya smosoinon te bintik chopole». Jajch stuuntes drogaetik, och ta yakubel sok jajch spas mulwej. Jich ya yalxan: «Kʼalal kʼax bael te jaʼbil jajch jtuuntes drogaetik te bayalxan yip sok kʼayon ta stuuntesel. Jaʼnix jich jajch jchon drogaetik yuʼun ya jtabey stojol-a te jdrogae». Ta patil, te Brian la sta ta nopel te ya schʼuunbey smantal te Jehovae. La sjeltay te stalel sok la yichʼ jaʼ ta 2001. Ta ora ini yakix ta tsaltamba animal sok ayix stseʼelil yoʼtan. *

7. Jich bitʼil ya yal ta Mateo 7:13, 14, ¿bin cheb beil ay ta jwentatik stsael?

⁷ Mukʼ skʼoplal te jaʼuk ya jtʼuntik te lekil bee. Te Satanás ya skʼan te manchuk ya x-animajotik ta chʼin be te ya yikʼotik bael «ta cuxlejal» sok te jaʼuk ya jtʼuntik te mukʼul be te banti yakik ta bael bayal ants winiketik. Maba wokol ta tʼunel yilel te be ini, pero ya yikʼotik bael ta lajel (kʼopona Mateo 7:13, 14). Teme ma jkʼan ya xlokʼotik ta be yuʼun te kuxlejalil ya skʼan ya smukʼulin koʼtantik te Jehová sok te ya jchʼuuntik te bin ya yalbotike.

8. ¿Bin ya spasik te machʼatik ya yaʼiyik tsaltamba animal teme ay bin ya xmakbot yokik sok teme ya xyalike?

⁸ Te machʼatik ya yaʼiyik tsaltamba animal maba ya xchʼay yoʼtanik yuʼun maba ya  xyalik-a. Manchukme jich-abi, ayniwan ya staik ta tekʼel te banti lomol ochel te be o ya xmakbot yokik yuʼun te sjoʼtak ta animale. Teme ya xyalik, ya xjajchik ta ora sok maba ya skom sbaik ta animal. Ma jaʼuk ya xbajt ta yoʼtanik te bin makbot yokik yuʼune, jaʼ ya xbajt ta yoʼtanik stael te premioe.

9. ¿Bin ya skʼan ya jpastik teme ay bin la smakbotik koktike?

⁹ Ayniwan bayal bin ya smakbotik koktik kʼalal yakotik ta animal yuʼun ya jtatik-a te kuxlejalil, jaʼniwan yuʼun te ay bin ma lekuk ya kaltik o ya jpastik, o jaʼniwan ta skaj te ay jtul ermano te ay bin ma lekuk la spas te ya x-ilinotik yuʼune. Jaʼ yuʼun mame chajpuk ya kaʼiytik-a, melel jpisiltik jmulawilotik sok yakotik ta animal ta chʼin be yuʼun kuxlejal. Jaʼ yuʼun stalelnanix-a te ay ya jten jbatik sok te yantike. Te Pablo la yal te ayniwan baeltik te ay bin ma lek ya spasbotik te kermanotaktike (Col. 3:13). Pero mame jaʼuk ya xbajt ta koʼtantik te bin la smakbotik te koktike, jaʼuk ya xbajt ta koʼtantik stael te premioe. Teme yalotike, jajchukotik sok mame jkom jbatik ta animal. Mame jawaluk ya xjilotik ta lum te jkʼaxel maʼyuk bin ya jkʼantikix sok te ilinem ya xjilotike, teme jich ya jpastike mananix ya jtatik-a te premioe. Te bin mel-oʼtantik sbae, jaʼ te yaniwan jmakbeytik sbe te yantik te yakik ta animal ta chʼin be yuʼun kuxlejal.

10. ¿Bin ya skʼan ya jpastik yuʼun maba ya jmakbeytik sbe te yantike?

¹⁰ Teme ma jkʼan ya jmakbeytik sbe te joʼtaktik ta animale, mame skʼan te spisil-ora jaʼ ya kakʼtik ta pasel te bin ya jkʼantik sok te bin lek ya kiltike (Rom. 14:13, 19-21; 1 Cor. 8:9, 13). Jaʼ ini ma pajaluk sok te machʼatik ya yaʼiyik tsaltamba animale, melel jtulnax te machʼa ya skʼan ya spas ganar te premioe. Jaʼ yuʼun maʼyuk skʼoplal ta yoʼtanik te yantik sok ya spasik tulan te jaʼuknax ya xjuʼ yuʼunik tsalawe. Yan te joʼotike, maba ya jtsal jbatik sok te kermanotaktike (Gál. 5:26; 6:4). Ya jpastik tulan ta skoltayel te yantik yuʼun jpisiltik ya xjuʼ kuʼuntik tsalaw sok te ya jtatik te premio yuʼun te kuxlejal. Jaʼ yuʼun ya jpastik tulan ta spasel ta jkuxlejaltik te tsitsel la yakʼ te Pabloe, mame jaʼuk ya jletik te kutsil jlekiltik, jaʼ ya jlebeytik «yutsil slequilic te yantique» (Filip. 2:4).

11. ¿Bin ya xbajt ta yoʼtanik yilel te machʼatik ya x-animajik sok bin yuʼun?

 ¹¹ Ma skʼan ya xchʼay yoʼtanik te machʼatik ya x-animajik sok jaʼ ya skʼan ya xbajt ta yoʼtanik yilel te banti ya xkʼotike. Manchukme mato xjuʼ ya staik ta ilel, ya snop ta yoʼtanik te kʼoemikix tey-a sok te ya yichʼik te premioe. Jaʼ ya x-akʼbot smukʼul yoʼtanik yuʼun.

12. ¿Bin jamal yaloj te Jehová te ya yakʼbotik ta swenta te skʼuxul yoʼtane?

¹² Ta swenta skʼuxul yoʼtan te Jehová jamal yaloj te spisil te machʼatik ya xjuʼ yuʼunik te tsaltambae, ya staik te premio te jaʼ te kuxlejal sbajtelkʼinal chikan teme ta chʼulchan o ta Nichimal Kʼinal. Te Biblia ya yakʼ kiltik te bin yilel te premio-abi. Jich ya xjuʼ ya jnop ta koʼtantik te tʼujbil kuxlejalil yakotik ta smaliyele. Kʼalal jaʼ ya xbajt ta koʼtantik yilel te bin ya jmaliytik ta pajel chaʼbeje, spisil koʼtantik ya x-animajotik sok maba ya kakʼtik te ay bin ya smakbotik koktik te jich ma xjuʼ kuʼuntik te animale.

13. ¿Bin koltayel ay kuʼuntik te maʼyuk yuʼun stukelik te machʼatik ya yaʼiyik tsaltamba animale?

¹³ Ta namey Grecia te machʼatik ya yaʼiyik tsaltamba animal ya skʼan ya stsʼikik te lujbel sok te bin kʼux ya yaʼiyike. Pero jaʼnax ya xjuʼ ya skoltay sbaik ta swenta te pʼijubtesel la yichʼik soknix te yipike. Jaʼnix jich te joʼotike, ya kichʼtik pʼijubtesel swenta ya xjuʼ kuʼuntik te tsaltamba animale. Melel jaʼ ya skoltayotik te Jehová te maʼyuk bin-ora ya xlaj yip stukele. Teme ya jkʼanbeytik koltayele, jamal yaloj te ya spʼijubtesotik sok te ya yakʼbotik kiptike (1 Ped. 5:10).

14. ¿Bin-utʼil ya skoltayotik te 2 Corintios 12:9, 10 swenta ya xkujch kuʼuntik te jwokoltike?

¹⁴ Te jpuk-kʼop Pablo kujch yuʼun bayal wokoliletik. Ma jaʼuknax la yichʼ bolkʼoptayel sok utsʼinel, jaʼnix jich ay baeltik la yaʼiy te maʼyuk yip sok te ay bin tsʼapal ta sbakʼetal te «pajal soc mucʼul chʼix» (2 Cor. 12:7, TZOXCH). Pero ma jaʼuk bajt ta yoʼtan te swokole, melel jich la yil te ya xjuʼ ya smukʼulinxan yoʼtan te Jehová ta skaj te swokole (kʼopona 2 Corintios 12:9, 10). Ta swenta-abi, spisil-ora koltayot yuʼun te Jehovae.

15. ¿Bin yaʼiyel ya kaʼiy jbatik teme ya jtʼuntik te ejemplo yuʼun te Pabloe?

¹⁵ Ayniwan ya kichʼtik bolkʼoptayel sok utsʼinel ta swenta te schʼuunel koʼtantik jich bitʼil kʼax ta stojol te jpuk-kʼop Pabloe. Jaʼnix jich ya xjuʼ ya xkʼax jwokoltik ta skaj chamel o lujbel. Teme ya jtʼuntik te ejemplo yuʼun te Pabloe, te jujun wokolil ya xkʼax ta jtojoltike ya xjuʼ ya skoltayotik yuʼun jich ya kiltikxan ta lek-a te skʼuxul yoʼtan te Jehová sok te koltayel yuʼune.

16. ¿Bin ya xjuʼ ya spasik te machʼatik ayik ta chamele?

¹⁶ Yan te machʼatik ma xjuʼ ya xjajchikix yuʼun te chamel o ayik ta siya de rueda, te kʼux sjol yakanik o te ma mero ya yilikix kʼinale, ¿yabal xjuʼ ya x-animajik jich bitʼil te jchʼieletik te maʼyuk bin kʼux ya yaʼiyike? Ya xjuʼ. Bayal ermanoetik te ayix yaʼbilalik sok yantik te ayik ta tulan chamel yakik ta animal yuʼun ya staik te premio yuʼun te kuxlejalile, pero ma jaʼuk ta swenta yipik, jaʼ ta swenta te ya yichʼik koltayel yuʼun te Jehovae. Ya schʼam yaʼiyik te tsoblejetik ta telefono o ya yilik ta Internet. Ya scholbeyik skʼop Dios te sfamiliaik, te doktoretik o enfermeraetik.

17. ¿Bin yilel ya yil Jehová te machʼatik ay swokolik ta skaj te chamele?

¹⁷ Mame ayuk bin-ora ya kakʼtik te ya schebajtes koʼtantik te chamel o te ya jnoptik te ma xjuʼix kuʼuntik te ya x-animajotik ta stael te kuxlejalil ta sbajtelkʼinale.  Kʼuxotik ta yoʼtan te Jehová ta swenta te ay schʼuunel koʼtantik sok te aʼtelil jpasojtik ta stojole. Te kʼalal ayotik ta wokol, bayalxan ya xtuun kuʼuntik te koltayel yuʼun te Jehovae, jaʼ yuʼun ya xnoptsajxan ta jtojoltik sok maba ya yijkitayotik (Sal. 9:10). Jtul ermana te tsakbil ta tulan chamel jich la yal: «Te bitʼil yak ta batsʼejel te chamel kichʼoje, ma mero ya xjuʼix kuʼun scholbeyel skʼop Dios te ants winiketike. Manchukme jtebnax te bin ya jpas ta stojole, jnaʼoj te ya x-akʼbot stseʼelil yoʼtan yuʼun te Jehová. Jaʼ-abi ya yakʼbon stseʼelil koʼtan». Te kʼalal ya kaʼiytik te ya xchebaj koʼtantike, julukme ta koʼtantik te sjokinejotik te Jehovae. Akʼa jnop ta koʼtantik te bin la spas te Pablo sok te bintik la yal te bayal ya stij koʼtantike: «Tseʼel coʼtan yuʼun te mayuc quip [...] como te cʼalal mayuc quip, ha bayelix quip a» (2 Cor. 12:10).

18. ¿Bin tulan wokolil ya sitintayik chaʼoxtul ermanoetik?

¹⁸ Ay chaʼoxtul te machʼatik yakik ta animal ta swenta te kuxlejalil ya sitintayik yan wokolil. Te ermanoetik-abi ya xkʼax swokolik te maʼyuk machʼa ya sta ta ilel o te maniwan ya xkʼot ta yoʼtanike, jich bitʼil te tulan mel-oʼtan. ¿Bin yuʼun te kʼax tulan te wokolil ini? Melel te kʼalal ay machʼa ya skʼas snejkʼel o ay ta siya de rueda, jpisiltik ya xjuʼ ya jtatik ta ilel sok yaniwan jkoltaytik. Yan te machʼatik yichʼojik tulan mel-oʼtan, depresion o yan chamel te pajal soke ma jtatik ta ilel stukel. Te swokole jaʼ pajal skʼuxul sok te machʼa ya skʼas te sbakele, pero maniwan ayuk machʼa ya xkʼuxultayot o ya xkanantayot stukel.

19. ¿Bin ya yakʼ jnoptik te bin kʼax ta stojol te Mefi-boset?

¹⁹ Teme ayotik ta tulan chamel o teme jich ya kaʼiytik te maʼyuk machʼa ya xkʼot ta yoʼtan te jwokoltike, ya xjuʼ ya skoltayotik te bin kʼax ta stojol te Mefi-boset (2 Sam. 4:4). Ma jaʼuknax kʼax swokol yuʼun te ma xjuʼ ya xbeene, jaʼnix jich kujch yuʼun te wokolil manchukme ma smeleliluk te bin la yichʼ akʼbeyel smulin sok te ma lek ilot yuʼun te Davide. Te Mefi-boset ma jaʼuk la sle te swokole, pero maba chebaj yoʼtan yuʼun. Mukʼ skʼoplal la yil te bin ay yuʼun sok la yal wokol yuʼun te kʼux aʼiyot yuʼun te Davide (2 Sam. 9:6-10). Jaʼ yuʼun te kʼalal ma lek ilote, ma jaʼuk bajt ta yoʼtan te bin la yichʼ pasbeyele. Maba la skʼej yilinba ta swenta te bin ma lek la spas te David sok maba la yakʼbey smulin te Jehovae. Jaʼ bajt ta yoʼtan skoltayel te ajwalil stsaoj te Diose (2 Sam. 16:1-4; 19:24-30). Te Jehová la yakʼ ta tsʼibayel ta Biblia te bin kʼax ta stojol te Mefi-boset yuʼun ay bin ya yakʼ jnoptik-a (Rom. 15:4).

20. ¿Bin wokolil ya xkʼax ta stojolik chaʼoxtul ermanoetik, pero bin ya xjuʼ ya smukʼulin yoʼtanik?

 ²⁰ Ay chaʼoxtul ermanoetik te ya xiwik o ma lek ya yaʼiy sbaik te kʼalal ya xkʼopojik sok te ants winiketik ta skaj te tsakbilik ta tulan mel-oʼtan o te bayal bin ya snaʼulanike. Wokolniwan ya yaʼiyik te joytaybilik ta bayal ants winiketik, pero ya spasik tulan te ya xbajtik ta tsoblej sok ta mukʼul tsoblej. Wokol ya yaʼiyik te ya xkʼopojik sok te machʼatik ma snaʼbeyik sba, pero ya xlokʼik ta scholel skʼop Dios. Teme jich yak ta kʼaxel ta jtojoltik, ma jtukeltikuk te jich ya kaʼiy jbatike. Bayal machʼatik jich yak ta kʼaxel ta stojolik-euk. Julukme ta koʼtantik te kʼax lek ya yil Jehová te yakotik ta spasel tulane. Te bitʼil juʼem kuʼuntik spasbeyel te yaʼtele, ya yakʼ kiltik te jaʼ yak yakʼbelotik bendision sok kiptik * (Filip. 4:6, 7; 1 Ped. 5:7). Teme maba ya jkom jbatik ta abatinel ta stojol te Jehová manchukme ayotik ta chamel o ay ma lek ya kaʼiy jbatik, ya xjuʼ ya smukʼulin koʼtantik te tseʼel yoʼtan yuʼun te aʼtelil ya jpastik ta stojole.

21. ¿Bin ya xjuʼ kuʼuntik spasel ta jpisiltik ta swenta te ya skoltayotik te Jehovae?

²¹ La kilbeytikix skʼoplal te ma pajaluk te tsaltamba animal sok te tsaltamba animal la yalbey skʼoplal te Pabloe. Ta namey kʼinal, jtulnax te machʼa ya sta te premioe. Yan stukel te tsaltamba animal yuʼun te j-abatetik yuʼun te Diose, spisilik ya staik te premio yuʼun te kuxlejalil ta sbajtelkʼinal teme jun yoʼtan ya yakʼ sbaike (Juan 3:16). Te machʼatik ya yaʼiyik tsaltamba animal ya skʼan maʼyukik ta chamel, melel teme ayik ta chamel maniwan ya xjuʼ yuʼunik. Yan te joʼotik ay bayalotik te tsakbilotik ta chamel, pero yak ta kujchel kuʼuntik (2 Cor. 4:16). Ta swenta te koltayel yuʼun Jehová, ta jpisiltik ya xjuʼ kuʼuntik animal jaʼto ta slajibal.