1. Nuuni ubbay ay oottana bessii?

NEENI sahettiyo woy daafuriyo wode, neessi deexxiya wottaa woxxana koyay? Neeni waaya koyana. SHin, tumu Kiristtaaneti ubbay woxxiyoogaa PHawuloosi yootiis. (Ibr. 12:1) Nuuni Yihooway nuuyyo immiyo woytuwaa ekkanawu koyikko, yelaga woy cima gidin, woykko nuuyyo wolqqay deˈin woy nu daafurin, nuuni ubbay wurssettay gakkanawu genccana bessees.—Maa. 24:13.

2. Naaˈˈantto Ximootiyoosa 4:7, 8y yootiyoogaadan, PHawuloosi hegaadan zorana danddayidoy aybissee?

² PHawuloosi ‘wottaa woxxidi wurssido gishshawu,’ hagaadan zorana danddayiis. (2 Ximootiyoosa 4:7, 8 nabbaba.) Gidoppe attin, PHawuloosi yootido wottay aybee?

3. PHawuloosi yootido wottay aybee?

³ PHawuloosi keehi koshshiyaabaa tamaarissanawu, beni Giriike kaassatun oosettiyaabatubaa issi issitoo xaafiis. (1 Qor. 9:25-27; 2 Xim. 2:5) I Kiristtaanetu deˈuwaa tohuwan woxxiyo wottaara geeddarssiis. (1 Qor. 9:24) Issi uri bana Yihoowawu sheedhdhidi xammaqettiyo wode, ha “wottaa” woxxiyoogaa doommees. (1 PHe. 3:21) Yihooway ayyo merinaa deˈuwaa woytuwaa immiyo wode, I wottaa wurssees.—Maa. 25:31-34, 46; 2 Xim. 4:8.

4. Nuuni ha huuphe yohuwan ay tamaaranee?

⁴ Adussa wottaa woxxiyoogeenne Kiristtaanetu deˈoy issi mala gidiyo amaridabati aybee? Issi mala gidida darobay deˈees. Hegeetuppe heezzata ane beˈoos. Koyro, nuuni likke ogiyaa kaallana koshshees; naaˈˈantto, nuuni wottaa wurssiyoogaa tishshi ootti xeellana bessees; qassi heezzantto, nuuni metoy gakkiyo wode genccana koshshees.

5. Nuuni kaallana bessiya ogee awugee, qassi aybissi?

⁵ Woxxiyaageeti woytuwaa demmanawu, woxxanaadan etawu giigissido ogiyaa eti kaallana bessees. Hegaadan, nuuni merinaa deˈuwaa woytuwaa demmanawu koyikko, Kiristtoosi bessido ogiyaa kaallana koshshees. (Oos. 20:24; 1 PHe. 2:21) Gidoppe attin, Seexaanaynne A kaalliyaageeti nuuni Kiristtoosi bessido ogiyaa kaallanaadan koyokkona; he asati nuuni kase deˈido deˈuwaa ogiyan etaara woxxanaadan koyoosona. (1 PHe. 4:4) Nuuni deˈiyo deˈuwaa qilliiccoosona, qassi eti nuugaappe kehiya, laˈatettaa demissiya deˈo deˈiyoogaa yootoosona. SHin eti yootiyoobay worddo.—2 PHe. 2:19.

6. Briyana hanotaappe neeni ay tamaaray?

⁶ Seexaanaa alamiyaa kaalliyaageetuura woxxiyaageeti eti woxxanawu doorido ogee laˈatettaa demissennaagaa sohuwaara akeekoosona; hegee aylletettawu kaalettees. (Roo. 6:16) Briyana hanotaa qoppa. A yelidaageeti Kiristtoosi bessido ogiyaa I kaallanaadan minttettidosona. SHin, he ogee A ufayssanaagaa I yelagatettan siriis. Briyani Seexaanaa alamee tamaarissiyoogaadan deˈiyaageetuura woxxanawu kuuyiis. I hagaadan giis: “Taani laˈatetta giidobay taassi iitabay amale gidanaadan oottanaagaa akeekabeykke. Guyyeppe, taani jallissiyaabaa goˈettiyoogaa, ushshaa likkiyaappe aattada uyiyoogaanne shori baynna deˈuwaa deˈiyoogaa doommaas. Taani unddenna layttawu, keehi jallissiyaanne qohiyaabaa goˈettaasinne etappe darotuyyo aylle gidaas. . . . Ta meezetido deˈuwawu koshshiyaabawu taani jallissiyaabaa bayzziyoogaa doommaas.” Wurssettan, Briyani Yihooway kessido maaraadan deˈanawu kuuyiis. I ba ogiyaa laammidi 2001n xammaqettiis. I Kiristtoosi bessido ogiyaa kaalliyoogan haˈˈi wozanappe ufayttees. *

7. Maatiyoosa 7:13, 14y yootiyoogaadan, nuuni baanawu giigida naaˈˈu ogeti awugeetee?

⁷ Nuuni likke ogiyaa kaallanawu dooriyoogee keehi koshshiyaaba! Nuuni ubbay “de7uwau efiya” xuntta ogiyan woxxiyoogaa aggidi ha alamiyan deˈiya daro asay biyo aaho ogiyaara baanaadan Seexaanay koyees. He ogee daro asay dosiyooba, qassi hemettanawu wayssenna. SHin hegee ‘bashshawu efees.’ (Maatiyoosa 7:13, 14 nabbaba.) Ubbatoo likke ogiyan baanawunne wora simmennan agganawu, nuuni Yihoowan ammanettananne I yootiyoobaa siyana bessees.

8. Issi wottanchchay xubettikko, waatii?

⁸ Annaaciyan adussa wottaa woxxiyaageeti  xubettenna mala woxxiyo ogiyaa xeelloosona. Gidikkonne, eti akeekennan banttanaara woxxiya uran xubettana woy ollan gelana danddayoosona. Eti kunddikkokka, denddidi aggennan woxxoosona. Eti tishshi ootti xeelliyo waannabay xubbidabaa gidennan, wottaa wurssiyoogaanne xoonidi woytuwaa ekkiyoogaa.

9. Nuuni xubettikko, ay oottana koshshii?

⁹ Nu wottan nuuni haasayiyooban woy oottiyooban baliyoogan darotoo xubettana danddayoos. Woy qassi nunaara woxxiyaageeti nuna qohiyaabaa oottana danddayoosona. Hegaadan hanikko nuuni garamettana koshshenna. Nuuni ubbaykka nagaranchcha, qassi deˈuwawu efiya xuntta ogiyan woxxoos. Yaatiyo gishshawu, nuuni issoy issuwaa hanqqetissiyaabaa issi issitoo oottoos. PHawuloosi nuuni issoy issuwaa issi issitoo ‘hanqqetissiyoogaa’ yootiis. (Qol. 3:13) SHin nuuni nuna xubbiyaaban xeelaa wottiyoogaa aggidi sinttappe demmana woytuwan xeelaa wottana koshshees. Nuuni xubettidi kunddikko, denddidi aggennan woxxana bessees. Nuuni Yihoowayyo haggaaziyoogaa hanqqettidi aggikko, nu wottaa wurssokkonne woytuwaa ekkokko. Qassi, deˈuwawu efiya xuntta ogiyan woxxanawu baaxetiyaageetuyyo xube gidana danddayoos.

10. Nuuni harata ‘xubbennaadan’ waani naagettana danddayiyoo?

¹⁰ Nu ishanttanne michchontta ‘xubbennaadan’ nuuni naagettiyo hara ogee, danddayettiyo wode ubban eti nu koyiyoogaadan oottiyoogaa aggidi bantta koyiyoogaadan oottana mala eeno giyoogaa. (Roo. 14:13, 19-21; 1 Qor. 8:9, 13) Nuuni woxxiyo wottan haniyaabay coo wottaagaa mala gidenna. Coo wottaa woxxiyaageeti woytuwaa ekkanawu koyoosona, qassi eti ubbay woytuwaa banttawu ekkanawu annaacettoosona. He wottanchchati xoonanaadan banttana maaddanabaa aybippenne aaruwan qoppoosona. Hegaa gishshawu, eti woxxiya harata sugidi sinttawu aadhdhanawu baaxetana danddayoosona. SHin, nuuni issoy issuwaara annaacettokko. (Gal. 5:26; 6:4) Nu halchchoy danddayettida keenan daroti Xoossay ehaana ooratta alamiyan merinaa deˈuwaa demmanaadan maaddiyoogaa. Hegaa gishshawu, nuuni harata “go77iyaabaa  koyanaappe attin, [nu] huuphe xalaalaa go77iyaabaa” koyennaadan PHawuloosi geeshsha ayyaanay denttettin zorido zoriyaa oosuwan peeshshanawu baaxetoos.—Pili. 2:4.   

11. Issi wottanchchay qoppiyoobay aybee, qassi aybissi?

¹¹ Wottanchchati woxxiyo ogiyaa xeelliyoogaa xalla gidennan, wurssana sohuwaakka qoppoosona. He sohoy etawu beettana xayikkonne, wurssidi woytuwaa ekkana danddayiyaabadan qoppoosona. Eti woytuwaabaa ubbatoo qoppiyoogee aggennan woxxanaadan eta denttettees.

12. Yihooway nuussi kehatettan immiyoobay aybee?

¹² Nuuni woxxiyo wottaa wurssiyo wode, saluwan woy gannate gidida saˈan merinaa deˈuwaa woytuwaa kehatettan immanawu Yihooway ba asawu qaalaa geliis. Nu deˈoy ay keena ufayssiyaaba gidanaakko nuuni qoppana mala, Geeshsha Maxaafay he woytuwaabaa qonccissees. Yihooway nuuyyo sinttappe immanawu qaalaa gelidobaa nuuni ubbatoo qoppikko, kaseegaappe aaruwan genccanawu murttana.

13. Wottanchchatussi baynnabay, nuussi deˈiyaabay aybee?

¹³ Beni Giriike wottanchchati woxxiyo wode arggaaciyoogaanne qohettiyoogaa mala metota genccana koshshiis. SHin eti bantta loohidobaaninne bantta wolqqa xallan ammanettana koshshiis. Nuuni waani woxxanaakko he wottanchchatudan loohoos. SHin etassi baynnabay nuuyyo deˈees. Nuuni Yihoowappe wolqqaa demmana danddayoos, qassi I nuna maaddana danddayennabi baawa. Nuuni Yihoowan ammanettikko, I nuna loohissana xallawu gidennan, minttanawukka qaalaa geliis!—1 PHe. 5:10.

14. Naaˈˈantto Qoronttoosa 12:9, 10y nuuni metota genccanaadan waati maaddii?

¹⁴ PHawuloosi daro metota genccana koshshiis. Harati A cayiyoogaanne yedettiyoogaa xalla gidennan, I issi issitoo daafuriisinne bana agunttaadan ‘caddi oyqqiis’ giidobaa genccana koshshiis. (2 Qor. 12:7) I he metota Yihoowayyo haggaaziyoogaa agganawu gaaso oottiyoogaappe, Yihoowan ammanettanawu injjetiya hanota ootti xeelliis. (2 Qoronttoosa 12:9, 10 nabbaba.) PHawuloosi hegaadan qoppido gishshawu, A gakkida meto ubban Yihooway A maaddiis.

15. Nuuni PHawuloosa leemisuwaa kaallikko, ay akeekanee?

¹⁵ Nu ammanuwaa gishshawu asay nunakka cayana woy yedettana danddayees. Nuuni sahuwaa woy daafuraa gencciyoogeekka koshshana danddayees. SHin, nuuni PHawuloosa leemisuwaa kaallikko, he meto ubbay Yihooway nuna siiquwan maaddiyoogaa nuuni akeekanaadan oottiyaaba gidana danddayees.

16. Nena sahoy caddikko, ay oottana danddayay?

¹⁶ Neeni sahettada zinnaˈadii, woy gooman biya wombbaran uttadii? Neeyyo abbee ixxii woy ayfee wayssii? Yaanikko, neeni payya yelagatuura Yihoowayyo haggaazana danddayay? Ee, danddayaasa! Cimidanne sahettiya daroti deˈuwawu efiya ogiyan woxxiiddi deˈoosona. Eti he oosuwaa bantta wolqqan oottana danddayokkona. Eti shiiqota silkkiyan ezggiyoogan woy JW isttiriminggiyaappe wottido shiiqotu biidota beˈiyoogan Yihoowappe wolqqaa demmana danddayoosona. Eti dottoretussi, narssetussinne bantta dabbotussi markkattiyoogan asaa erissiyo ashkkara oottoosona.

17. Sahettiyaageeta xeelliyaagan Yihoowawu aybi siyettii?

¹⁷ Neeni Yihoowawu oottana koyiyo ubbabaa oottana danddayennaba gidikko,  hidootaa qanxxoppa, qassi wurssettay gakkanawu genccana danddayikke gaada qoppoppa. Yihooway neeni A ammaniyo gishshawunne neeni ayyo kase oottido ubbabaa gishshawu nena siiqees. Haˈˈi neessi awudeegaappenne aaruwan A maadoy koshshees, qassi I nena mule aggenna. (Maz. 9:10) I neekko kaseegaappe aaruwan shiiqana. Sahettiya issi michchiyaa yootidobaa akeeka: “Taani keehi sahettiyo gishshawu, ta koyiyoogaadan mishiraachchuwaa haratuyyo darotoo yootana danddayikke. Gidikkokka, taani guuttaa baaxetiyoogeekka Yihoowa ufayssiyoogaa erays, qassi hegee tana ufayssees.” Neeni hidootaa qanxxiyo wode, Yihooway nena maaddiyoogaa hassaya. PHawuloosa leemisuwaa qoppa, qassi I “metootiyoogan ufaittais; aissi giikko, taani daafuriyo wode, he wode minnais” yaagidi yootido minttettiyaabaa hassaya.—2 Qor. 12:10.

18. Amaridaageeta gakkiya keehi deexo metoy aybee?

¹⁸ Deˈuwawu efiya ogiyan woxxiya amaridaageeta hara metoy gakkees. Eti gencciyo metota harati beˈana danddayokkona, ubba qassi akeekennan aggana danddayoosona. Leemisuwawu, eti unˈˈettoosona woy keehi hirggoosona. Yihooway siiqiyo ha ashkkarata hegaa mala keehi deexo metoy gakkiyoy aybissee? Issi uraa kushee meqqido gishshawu woykko I woy A gooman biya wombbaraappe denddenna gishshawu, asay A metuwaa woy I metuwaa beˈana danddayees; ubba qassi maaddanawu qoppennan waayi aggana. SHin, ubbatoo unˈˈettiya he asati waayettiya asa waayi milatana. Eta hanotay etawu kushee woy gedee meqqidoogaa mala keehi deexxiyaaba. Gidoppe attin, hara asay eta waayiyaa akeekenna gishshawu, eta siiqennan woy etawu qarettennan aggana danddayees.

19. Nuuni Mafibosheeta hanotaappe ay tamaariyoo?

¹⁹ Neeni koyiyoogaa keena Yihoowawu oottennaadan diggiya metoy nena gakkiyaabanne harati ne hanotaa akeekennabadan neeyyo siyettiyaaba gidikko, Mafibosheeta hanotan neeni minettana danddayaasa. (2 Sam. 4:4) I abbiyaa pacaa genccana koshshiis, qassi Kawuwaa Daawiti abaa balan qoppidi A likke gidenna ogiyan oyqqiis. Mafibosheeta hegaa malabay gakkidoy I mooridobaana gidenna. Gidikkonne, I lanccibeenna. I demmido loˈˈobaa gishshawu galatiis. Daawiti awu kase kehidobaa gishshawu I galatiis. (2 Sam. 9:6-10) Hegaa gishshawu, Daawiti A bessenna ogiyan oyqqido wode, Mafibosheeti hegaara gayttida ubbabaa yuushshi qoppiis. Daawiti mooridoban I lanccibeenna. Qassi Daawiti oottidobaa gishshawu I Yihoowa amassalibeenna. Mafibosheeti Yihooway sunttido  kawuwaa I maaddana danddayiyooban xeelaa wottiis. (2 Sam. 16:1-4; 19:24-30) Mafibosheeti oottido loˈˈobaappe nuuni tamaaranaadan Yihooway hegaa Geeshsha Maxaafan xaafissiis.—Roo. 15:4.

20. Unˈˈettiyoogee amaridaageeta waati qohana danddayii, qassi eti ay ammanettana danddayiyoonaa?

²⁰ Amarida ishanttinne michchontti keehi unˈˈettiyo gishshawu, hara asaara eta gattiya hanotatun eti keehi yayyoosona. Daro asaara walahettiyoogee eta metiyaaba gidikkonne, eti gubaaˈiyaa shiiqotanne gita shiiqota aggennan shiiqoosona. Erenna asaara haasayiyoogee eta metiyaaba gidikkonne, eti haggaazuwan harata haasayissoosona. Ne hanotay hegaa mala gidikko, hegee ne xallaa gakkiyaabaa gidennaagaa ammanetta. Daro asay neegaadan qoppees. Neeni ne kumetta shemppuwaappe oottiyoogee Yihoowa ufayssiyoogaa hassaya. Neeni hidootaa qanxxabeennaagee I nena anjjiyoogaanne neessi koshshiya wolqqaa immiyoogaa bessees. * (Pili. 4:6, 7; 1 PHe. 5:7) Neessi abbee pacci uttidaashin woy neeni unˈˈettaydda Yihoowawu haggaaziyaagaa gidikko, hegan Yihooway ufayttiyoogaa ammanettana danddayaasa.

21. Yihooway maaddin nuuni ubbay ay oottana danddayiyoo?

²¹ PHawuloosi yootido wottay annaacettidi woxxiyo wottaappe dummatiyoogee tuma. Beni wode woxxiyo wottan xoonida ura xallay woytuwaa ekkees. Gidoppe attin, Kiristtoosi bessido ogiyan aggennan genccidi woxxiya ubbay merinaa deˈuwaa woytuwaa ekkees. (Yoh. 3:16) Qassi annaaciyan woxxiyaageeti ubbay payya gidana koshshees. Hankkoode, eti wottan xoonennan aggana danddayoosona. SHin, nuuppe daroti sahoy caddiyoogeeta gidikkonne, genccoos. (2 Qor. 4:16) Yihooway maaddin, nuuni ubbay wottaa woxxidi wurssana!