1. მუ ოკო ვაკეთათ არძაქ?

მიღენდითო მონაწილებას რულაშ რთულ შეჯიბრებას, მითუმეტეს ლახალა ქუგაწუხენა ვარდა მანგარ შულადირ ქორეთ-და? ალბათ ვარ. მარა მოციქულ პავლექ თქუ, ნამდა არძა ჭეშმარიტ ქრისტიან რულას ღებულენს მონაწილებას (ებრ. 12:1). იეჰოვაშე ჯილდოშ მეღება ქუმოკონან-და, არძაქ, ახალგაზრდაქ დოვარ ხანშამიშულირქ, ძალეფით ეფშაქ დო ვარ შულადირქ, ბოლოშა ოკო მიფთვინათ (მათ. 24:13).

2. მუშენ შეულებუდ პავლეს თამამას თქუკო 2 ტიმოთეშ 4:7,8-ს ინოჭარილ სიტყვეფ?

² პავლეს თამამას შეულებუდ თე თემაშე ჩიება, მუშენდა თიქ ბოლოშა ირულ „ორულარ შარა“ (წეკითხით 2 ტიმოთე 4:7, 8). მარა, კონკრეტულო მუს ნიშნენს თი რულა, ნამდგაშეთ პავლე იჩიებუდ?

3. მუს ნიშნენს თი რულა, ნამდგაშეთ პავლე იჩიებუდ?

³ მინშა პავლე მუშ წერილეფს თი ლაჸაფეფს გიმირინუანდჷ, ნამუთ ჯვეშ საბერძნეთის იტარებუდ, მუშენდა მნიშვნელოვან მუდგარენ ქუდაგურუკო თიმ დროს მახორუ ქრისტიანეფს (1 კორ. 9:25—27; 2 ტიმ. 2:5). თიქ მუსხირენშა გიმირინუ მაგალით რულას შეჯიბრებაშ გურშენ, ნამუთ ქრისტიანულ ცხოვრებას დუკავშირ (1 კორ. 9:24; გალ. 2:2; ფილ. 2:16). პიროვნება თე „რულას“ თიმწკუმა იჭყანს, მუჟამსით დუდის უძღვინენს იეჰოვას დო ინათუ (1 პეტ. 3:21). თინა თიმწკუმა გინოკვათუნს ფინიშიშ ხაზის, მუჟამსით იეჰოვა მარადიულ სიცოცხლეშ ჯილდოს ქიმეჩანს (მათ. 25:31—34, 46; 2 ტიმ. 4:8).

4. მუს გუვარჩიენთ თე სტატიას?

⁴ მუთ მოგენს ართიანს დიდ დისტანციას რულა დო ქრისტიანულ ცხოვრება? მორთ გუვარჩუათ სუმ მხარე. პირველ, ჩქი ოკო მივაჸუნათ სწორ შარას; მაჟია, მთელ ყურადღება ოკო გინიბღათ  ფინიშიშ ხაზშა; დო მასმა, სირთულეეფიშ უმკუჯინუო, მოთვინებათ გუვაგრძელათ რულა.

5. ნამ შარას ოკო მივაჸუნათ დო მუშენ?

⁵ შეჯიბრებაშ მონაწილეეფქ ჯილდო მიღანინ, ოკო მიაჸუნან შეჯიბრებაშ ორგანიზატორეფიშ დოდგინელ კურსის. თეშნერო, მარადიულ სიცოცხლეშ ჯილდოშ მეღება ქუმოკონან-და, ოკო მივაჸუნათ ქრისტიანულ ცხოვრებაშ შარას (საქ. 20:24; 1 პეტ. 2:21). მარა, სატანას დო თიშ მიმაჸუნალეფს, ოკონა ნამდა ქრისტიანულ შარათ ვარინ, მუნეფიშ შარათ გილაფრთათ (1 პეტ. 4:4). თინეფ გაძიცანა ჩქინ გიშაგორილ ცხოვრებაშ შარას დო ამტკიცენა, ნამდა თი შარა, ნამდგათ მუნეფ გილულა უჯგუშ რე დო თის თავისუფლება მოუღ. მუშმანწარას ჩირთუნა თინეფ! (2 პეტ. 2:19).

6. მუს ბგურაფლენთ ბრაიანიშ მაგალითშე?

⁶ არძა, მით თინეფცალო ცხოვრენს, მიდგაშე სატანაშ ქვეყნიერება მოქმედენს, მალას მეხვადუ, ნამდა მუნეფიშ გიშაგორილ შარას თავისუფლება ვარინ, სატანაშ ქვეყნიერებაშ მონობა მოუღ (რომ. 6:16). დეფიქრით ბრაიანიშ მაგალითშე. ბაღანობას თის მშობლეფ ელუჩანდეს, ქრისტიანულ ცხოვრებაშ შარას მიაჸუნკო. მარა, მუჟამსით გემწირდჷ, თის ეჭვიქ გურჩქინდჷ, ქუმუღანდჷ დოვარ თეცალ ცხოვრება ბედნერობას. ბრაიანქ გეგნოჭყვიდჷ, თინეფცალო იცხოვრუკო, მით სატანაშ ნორმეფით ცხოვრენდჷ. თინა იჩიებ: „ვა ფიფქრენდჷ, ნამდა ითამ თავისუფლება, ნამუშ მენჭირნაფა მოკოდ, გლახა მუდგარენეფიშ მონათ გინმოშქვანდჷ. დროშ მიკულაწკუმა ართო, ნარკოტიკეფიშ მეღება, გინოჸუნელ შუმა დო უზნეო ცხოვრება ქიდიბჭყჷ. თეშ უკულ, მუსხირენ წანას, უმოს ძალიერ ნარკოტიკეფს ბღებულენდჷ დო თინეფიშ მონათ გინიფრთჷ . . . ნარკოტიკეფით ვაჭრუა ხოლო ქიდიბჭყჷ, მუშენდა დასაბაღ ფარა ქიფშიკო ჩქიმ სურვილეფიშ დაკმაყოფილებერო“. საბოლათ, ბრაიანქ გინოჭყვიდ, იეჰოვაშ ნორმეფით იცხოვრუკო. თიქ დითირუ ცხოვრებაშ წეს დო 2001 წანას დინათ. ბრაიან ასე ბედნერ რე, მუშენდა ქრისტიანულ ცხოვრებაშ შარას მეჸუნს. *

7. მუჭოთ მათეშ 7:13, 14-ის ჭარჷ, ნამ ჟირ შარა რე ჩქინ წოხოლე?

⁷ მუზმათ მნიშვნელოვან რე, სწორ შარა გიშებგორათ! სატანას ოკო, ნამდა არძაქ მივოტუათ რულა ჭიფე შარას, ნამდგას „სიცოცხლეშა მეჸუნს კოჩ“ დო იბრულათ ფართო შარას, ნამდგას ქვეყნიერება მეჸუნს. თე შარათ ბრელ გილურს დო თენა ადვილ რე. მარა თის „ღურაშა მეჸუნს კოჩ“ (წეკითხით მათე 7:13, 14). სწორ შარაშე ვეგნურთათინ, ოკო მივენდათ იეჰოვას დო ვურჩქილათ თის.

8. მუს ორთჷ მარულე, მუჟამსით იბრკოლებ?

⁸ დიდ დისტანციას რულას მონაწილეეფ შარას უჯინენა, მუშენდა მუთუნს ვეკახაბარკან. მარა მონაწილეეფს შილებე შემთხვევით მუნეფიშ ხასლას მარულექ ქეკახაბარკას ვარდა ჭიჭე იამაშა ქინუოლან კუჩხიქ. თე დროს ქუდანთხუნან-და, თინეფ ხეთეშე წუმოდირთნა დო რულას აგრძელენა. თინეფს მთელ ყურადღება დაბრკოლებაშა ვარინ, ფინიშიშ ხაზშა დო ჯილდოშა აფნა გინოღალირ, ნამდგაშ მოგებაშ იმენდ უღნა.

9. მუ ოკო ვაკეთათ დებრკოლით-და?

⁹ ჩქი ხოლო სიცოცხლეშო რულაშ დროს, შილებე ბრელშა დებრკოლათ დო სიტყვათ ვარდა საქმეთ დუვაშუათ. ვარდა შილებე ჩქინ ხასლას მარულექ მეჩირთას დო გურ მიწყუნუან. თექ ქუმოხვად-და, ოკო ვა გამკვირდან. ჩქი არძა არასრულყოფილეფ ვორეთ დო არძა მიბრულეთ სიცოცხლეშ ჭიფე შარას. ათეშენ, შილებე მინშა ართიანს „ქუვარაგვათ“. პავლეს უჩქუდ, ნამდა მინშა ართიანს „ჩიულიშ მიზეზის“ ქიმეფჩანდით (კოლ. 3:13). მარა, თე დროს მთელ ყურადღება გინოღალირ ოკო მაფდან ჯილდოშა დო ვართ ხოლო დაბრკოლებაშ მიზეზშა. დებრკოლით-და, გემწობდირთათ დო გუვაგრძელათ რულა. გურს ქიმიპჸუნანთ დო იეჰოვაშ მსახურებას ვა გუვაგრძელენთ-და, ვეგნმაკვათენა ფინიშიშ ხაზ დო ჯილდოს ვემიბღენთ. თეს გეძინელ, შილებე თინეფ ხოლო დუვაბრკოლათ, მით ოცადნა სიცოცხლეშ ჭიფე შარას ირულან.

10. მუჭო შემლებნა, ვა დუვაბრკოლათ შხვეფ?

¹⁰ ხოლო ართ საშვალება, მუდგათ შემლებნა ვა დუვაბრკოლათ შხვეფ თინა რე, ნამდა მუჟამსით შეიოლებერ რე, დათმობაშა მიდაფრთათ დო ვა ვეცადათ ჩქინ უფლებეფიშ დაცვებას (რომ. 14:13, 19—21; 1 კორ. 8:9, 13). თენა რე ართ-ართ მნიშვნელოვან განსხვავება, მუდგათ ვა ბგუთ პირდაპირ გაგებათ მარულეეფს. თინეფ ართიანიშ კონკურენტეფ რენა დო თითოულ ოცად, ხვალე მუქ მიღას ჯილდო. თე მარულეეფ ხვალე მუნეფიშ დუდშე ფიქრენა. თეს გეძინელ, შილებე ნამდგაინქ გეუჯიკუას მუშ ხასლას მარულეს, ნამდა მუქ უმოს წოხლე მიდართას. თეშ გინაწონს, ჩქი ართიანიშ კონკურენტეფ ვა ვორეთ (გალ. 5:26; 6:4). ჩქინ მიზან რე, მუთ შილებენ მეტ პიროვნებას მივეხვარათ, ნამდა ჩქინწკუმა ართო გეგნოკვათან ფინიშიშ ხაზ დო მიღან სიცოცხლეშ ჯილდო. ათეშენ, ვოცადუთ გეგმიბრინუათ პავლეშ რჩევა „ხვალე თქვან ჯგირობუაშე  ვარინ, შხვეფიშ ჯგირობუაშე ხოლო იფიქრით“ (ფილ. 2:4).

11. მუშა აფნა მარულეეფს ყურადღება გინოღალირ დო მუშენ?

¹¹ თეს გეძინელ, მუჟამსით მარულეეფ შარას უჯინენა, თინეფს ყურადღება გინოღალირ აფნა ფინიშიშ ხაზშა. თის ვარწყედანინ ხოლო, შეულებნა წერმიდგინან, მუჭო გინოკვათნა თე ხაზის დო მუჭო ღებულენა ჯილდოს. თინეფს გონებას უღნა ჯილდო, მუთ ოხვარნა, გაგრძელან რულა.

12. მუს მოპირნა იეჰოვა?

¹² ჩქი, მიდგა სიცოცხლეშო მიბრულეთ, იეჰოვა მოპირნა, ნამდა საბოლათ მიბღენთ ჯილდოს — მარადიულ სიცოცხლეს ზეცას ვარდა დედამიწას სამოთხეს. ბიბლიას ეჭარილ რე თე ჯილდო, თაშ ნამდა შემლებნა წერმიბდგინათ მუშმაჯგირა იჸუაფ ჩქინ ცხოვრება. თე იმენდ გურ დო გონებას ირიათო ქუმაღვენუნა-და, მუთუნს ვემეფჩანთ საშვალებას, დუმაბრკოლან დო ბოლოშა მიბთვინენთ.

13. მუ უპირატესობა მიღნა მარულეეფიშ გინაწონს?

¹³ ჯვეშო საბერძნეთის რულას მონაწილეეფქ თიცალ სირთულეეფს ოკო გაურზესკო, მუნერით რე შულადა დო ჭუა. თეს გეძინელ, თინეფს ხვალე ფიზიკურ მომზადებაშ დო მუნეფიშ ძალაშ იმენდ ოკო უღდესკო. თე მარულეეფცალო ჩქი ხოლო წინასწარ ვემზადებუთ რულაშო. მარა, თინეფიშ გინაწონს უპირატესობა მიღნა — ჩქი მოხვარნა იეჰოვა, ნამდგას ულიებ ძალა უღჷ. თის ქიმვენდებუთ-და, მოპირნა, ნამდა მუმამზადენა დო ძალას ხოლო ქომჩანა (1 პეტ. 5:10).

14. მუჭო მოხვარნა 2 კორინთელეფიშ 12:9, 10-ის ინოჭარილ სიტყვეფ სირთულეეფიშ გარზებას?

¹⁴ პავლე ბრელ სირთულეს ურზუდ. თის თხოზუდეს დო შეურაცხყოფას მიორინუანდეს. მინშა თინა ძალაგიშალიებურ რდუ. თეს გეძინელ, თიქ თქუ, ნამდა „სხეულს ძიგირ“ უღუდ (2 კორ. 12:7). მარა პავლეშო თე სირთულეეფ ღორონთიშ მსახურებაშ მეტებაშ მიზეზ ვარინ, იეჰოვაშა მენდებაშ საშვალება რდუ (წეკითხით 2 კორინთელები 12:9, 10). პავლეს თეცალ აზროვნება უღუდუნ თიშენ, იეჰოვაქ მეხვარ თის სირთულეეფიშ დროს.

15. მუს გიმოფცადუნთ ჩქინ დუდშა, პავლეშ მაგალითის ქიმვაჸუნუთ-და?

¹⁵ შილებე ჩქი ხოლო ფთხოზუდან ვარდა ბლანძღუნდან რწმენაშ გურშენ. შილებე ჯამრთელობაშ პრობლემეფს ვობრძოლუდათ ვარდა ძალაგიშალიებურ ვორდათ. მარა პავლეშ მაგალითის ქიმვაჸუნუთ-და, თე სირთულეეფიშ დროს ჩქინ დუდშა გეგმობცადუნთ იეჰოვაშ ელარნას.

16. მუშ კეთება შეილებნა გლახა ჯამრთელობაშ უმკუჯინუო?

¹⁶ ლახალაშ გურშენ დონჯირელო ხომ ვა რეთ ვარდა კალიასკას ხომ ვენოხეთ? კუჩხეფს ძალაქ ხომ ვემგოკორდეს ვარდა გლახა მხედველობა ხომ ვაიღნა? თაშ ქორენ-და, შეილებნანო თინეფწკუმა ართო ემსახურათ იეჰოვას, მით ახალგაზრდა დო ჯამრთელ რე? მუშო ოკო რაგად, ქო! ბრელ, მით ხანშამიშულირ დო ძალაგიშალიებურ რე, სიცოცხლეშო რულას ღებულენს მონაწილებას. მარა თეს მუნეფიშ ძალათ ვარინ იეჰოვაშ ძალათ ორთნა. თინეფ ქრისტიანულ შეხვალამეფს ტელეფონით ურჩქილენა ვარდა ვიდეო სტრიმინგიშ საშვალებათ უჯინენა თის. თეს გეძინელ, თინეფ მოწაფეეფიშ მომზადებაშ საქმეს ხოლო ღებულენა მონაწილებას დო უქადაგენა ექიმეფს, ექთანეფს დო ნათესეფს.

17. მუჭო უჯინე იეჰოვა თინეფს, მიდგას ჯამრთელობაშ პრობლემეფ უღჷ?

¹⁷ ჯამრთელობაშ პრობლემეფს ვემეჩათ უფლება, გურ გოიტახან დო გოფიქრებაფუან, ნამდა ვეშქალებენა სიცოცხლეშო რულა. იეჰოვას უჸორთ, მუშენდა რწმენას დო მოთვინებას გიმირჩქინანთ. თქვა ასე მანგარო გოსაჭირნა  თიშ მოხვარა დო რჯერდან, ნამდა თინა დღას ვემგოტენა (ფსალმ. 9:10). თეშ გინაწონს, ხოლო უმოსო დეგეახლოებნა. ქიდეკვირით, მუს იჩიებ ართ და, ნამდგას ჯამრთელობაშ პრობლემა უღჷ: „დროშ მიკულაწკუმა ართო ჩქიმ ჯამრთელობა იუფრაშებ, ვორწყექ, ნამდა ჭეშმარიტებაშ გურშენ თიცალ ხშირას ვა მაქადაგებე, მუჭოთ აიშახ. მარა მიჩქჷ, თი ჭიჭე მუდგარენ ხოლო, მუდგას ვორთუქ, იეჰოვას მანგარო ახარენს დო ათეშენ, ბედნერ ვორექ“. მუჟამსით გურ გაფნა გოტახილ, რშუდან, ნამდა ხვალე ვა რეთ. დეფიქრით, პავლეშ მაგალითშე დო ქიგიშინით თიშ გურიშემაკინალ სიტყვეფ: „მოსიამოვნ სისუსტეეფ, . . . მუშენდა, მუჟამსით სუსტ ვორექ, თიმწკუმა ვორექ ძალიერ“ (2 კორ. 12:10).

18. მუ რთულ მდგომარეობას რე ნამთინე?

¹⁸ ნამთინე, მით სიცოცხლეშო რულას ღებულენს მონაწილებას, შხვა სირთულეს ხოლო შეხვადუ. ნამთინეს პირადულ პრობლემა უღჷ, ნამდგას შხვეფ ვარწყენა დო შილებე ვართ გეგან. მაგალთო, შილებე დეპრესიას რდან ვარდა მუდგარენშენ მანგარო წუხენდან. მუშენ რენა ღორონთიშ თე ართგურ მსახურეფ განსაკუთრებით რთულ მდგომარეობას? მაგალთო, მუჟამსით პიროვნებას კილე აფჷ ტახილ, ვარდა კალიასკას ენოხე, ირკოჩ ორწყე თიშ პრობლემას დო ოკონა, თის მეხვარან. თეშ გინაწონს, მუჟამსით მიდგარენს ემოციურ ვარდა ფსიქიკურ პრობლემეფ უღჷ, შილებე თენა ართ უცბას ვერწყებედას. მარა თინეფ ხოლო თიცალ რთულ მდგომარეობას რენა, მუჭოთ თი კათა, მიდგას ხე ვარდა კუჩხ აფჷ ტახილ. შხვეფ ვარწყენა თინეფიშ ტანჯებას, ათეშენ, შილებე გურშა ველუკინან თეცალ კათას.

19. მუშ გურაფა შემლებნა მეფიბოშეთიშ მაგალითშე?

¹⁹ თქვა ხოლო შეზღუდულ შესაძლებლობეფ ქოიღნა დო ქოფიქრენთ, ნამდა შხვეფს თქვან ვარჩქილენან-და, შილებე მეფიბოშეთიშ მაგალითიქ მიგეხვარან (2 სამ. 4:4). თის ფიზიკურ ნაკლ უღუდ. თეს გეძინელ, მეფე დავითიქ თის უსამართლოთ მექცუ. მეფიბოშეთიშ ბრალ ვარდჷ, თე პრობლემეფ უღუდუნ. მარა თე ირფელს ვარზენდჷ თიშ საშვალებას, უარყოფითო ქიდიჭყუკო ფიქრ; თინა აფასენდჷ თი ჯგირ მუდგარენეფს, მუთ უღუდ. თინა მარდულ რდუ მეფე დავითიშ გიმორჩქინელ ჯგირობუაშე (2 სამ. 9:6—10). ათეშენ, მუჟამსით დავითიქ თის უსამართლოთ მექცუ, მეფიბოშეთ ოცადუდ სრულ სურათ ქოძირუკო. თინა ვა გარისხებე დო იეჰოვაშა ვეგუდვალ ბრალ დავითიშ საქციელშე. მეფიბოშეთის ყურადღება თიშა აფუდ გინოღალირ, მუჭო ელუდირთკო იეჰოვაშ ცხებულ მეფეს (2 სამ. 16:1—4; 19:24—30). იეჰოვაქ მეფიბოშეთიშ ჯგირ მაგალით ჩქინ ოგურაფალო მუშ სიტყვას ენაჭარაფუ (რომ. 15:4).

20. მუ ოწუხებელ უღჷ ნამთინეს დო მუშა შეულებნა რდან დარწმუნებულ?

 ²⁰ ნამთინე თანაქრისტიანს მუსხირენ ოწუხებელ უღჷ, ათეშენ ბრელს ნერვიანენს დო უჭირს შხვეფწკუმა ურთიერთობაშა მიშულა. შილებე თინეფშო რთულ რდას ბრელ ხალხწკუმა რინა, მარა თინეფ იშენით ოსწრუნა კრებაშ შეხვალამეფს დო კონგრესეფს. თინეფშო რთულ რე უჩინებუეფწკუმა რაგად, მარა მსახურებაშ დროს იშენით ურაგადნა შხვეფს. თქვან შემთხვევას ხოლო თაშ ქორენ-და, დარწმუნებულ რდათ, ნამდა ხვალე ვა რეთ. ბრელ შეხვადუ თეცალ სირთულეეფს. რშუდან, იეჰოვას გურს უხარენს თქვან მონდომა. თქვა აგრძელენთ მსახურებას, მუთ ამტკიცენს, ნამდა ღორონთ კურთხევეფს ვა გარკენა დო საჭირო ძალას გარზენა * (ფილ. 4:6, 7; 1 პეტ. 5:7). ფიზიკურ ვარდა ემოციურ პრობლემეფიშ უმკუჯინუო იეჰოვაშ მსახურებას ქაგრძელენთ-და, შეილებნა დარწმუნებულ რდათ, ნამდა გურს უხარენთ თის.

21. მუშ კეთება შემალებენა იეჰოვაშ მოხვარათ?

²¹ საბედნეროთ, რულას შეჯიბრებაშ დო პავლეშ მოშინაფილ რულაშ შქას განსხვავებეფ რე. ბიბლიურ დროს, რულას შეჯიბრებას ხვალე ართ პიროვნება ღებულენდჷ ჯილდოს. თეშ გინაწონს, არძა, მით ქრისტიანულ ცხოვრებაშ შარას ართგურობას დო მოთვინებას გიმირჩქინანს, ღებულენს მარადიულ სიცოცხლეშ ჯილდოს (იოან. 3:16). რულას შეჯიბრებაშ მონაწილეეფს ჯგირ ჯამრთელობა ოკო უღდესკო. თაშ ვეჸუაფუდ-და, მოგებაშ ნაკლებ შანს აღვენუდეს. თეშ გინაწონს, ჩქინდე ბრელს ვა მიღნა ჯგირ ჯამრთელობა, მარა იშენით ბთვინებულენთ (2 კორ. 4:16). იეჰოვაშ მოხვარათ, არძა გეგნობკვათუნთ ფინიშიშ ხაზის!