NGANI JAKULIJIGANYA 18
Kuwutuka Mpaka Kumbesi kwa Mpikisano
‘Malisisye chenene [mpikisano] wakuwutuka’—2 TIM. 4:7.
NYIMBO 129 Chitujendelechele Kuŵa Ŵakupilila
YACHITULIJIGANYE *
1. Ana wosopewe tukusosekwa kutenda chichi?
ANA mpaka asache kuwutuka nawo pampikisano wakusawusya, nambo ali mkulwala kapena ali apesile mnope? Kusala yisyene, nganaŵa atesile yeleyi. Ndumetume Paulo jwasasile kuti, Aklistu wosope ŵakuwona ali pampikisano. (Aheb. 12:1) Myoyo chinga tuli ŵachikulile kapena ŵachinandipile, soni chinga tuli ŵamachili kapena ŵangali machili, wosopewe tukusosekwa kupilila mpaka pambesi naga tukusaka kuti chitupochele mbote jachachitupa Yehofa.—Mat. 24:13.
2. Mwakamulana ni 2 Timoteo 4:7, 8, ligongo chichi Paulo jwaliji jwagopoka kupeleka malangiso gelega?
2 Paulo jwaŵechetaga mwagopoka ligongo lyakuti jwalakwe jwamalisisye chenene “luwilo lwakuwutuka” kapena kuti mpikisano wakuwutuka. (Aŵalanje 2 Timoteo 4:7, 8.) Nambo ana Paulo jwaŵechetaga ya mpikisano wakwe wapi?
ANA MPIKISANO UKUSAGOPOLELA CHICHI?
3. Ana Paulo jwasasile ya mpikisano wapi?
3 Ndaŵi sine, Paulo jwakamulichisyaga masengo yindu yayatendekwaga pa mipikisano ja ku Gilisi pakusaka kwiganya yindu yakusosekwa mnope. (1 Akoli. 9:25-27; 2 Tim. 2:5) Kwa maulendo gejinji, jwalakwe jwakamulichisye masengo mpikisano wakuwutuka pakulandanya ni yakusosekwa kutenda Aklistu kuti akapate umi wangamala. (1 Akoli. 9:24; Aga. 2:2; Afil. 2:16) Mundu akusatanda kuwutuka pa “mpikisanowu” palipeleche kwa Yehofa soni kubatisidwa. (1 Pet. 3:21) Jwalakwe akusamalisya mpikasanowu papochele mbote ja umi wangamala kutyochela kwa Yehofa.—Mat. 25:31-34, 46; 2 Tim. 4:8.
4. Ana chitukambilane chichi munganiji?
4 Ana pana kulandana kwamtuli pasikati pampikisano wakuwutuka lutando lwelewu, ni umi wa Chiklistu? Pana yindu yejinji yayikusalandana. Kwende tugambe kulola yindu yitatupe. Chandanda, chili kuwutuka mwakuŵajilwa. Chaŵili, chili kuganichisya mnope yakuja kuyika kumbesi kwa mpikisanowo. Soni chatatu, chili kupilila yakusawusya yampaka tusimane nayo pampikisano.
KUWUTUKA MWAKUŴAJILWA
Wosopewe tukusosekwa kuya ndamo sya Chiklistu kuti tukapate umi (Alole ndime 5-7) *
5. Ana tukusosekwa kuwutuka chamtuli, soni ligongo chichi?
5 Jwakuwutuka pampikisano usyesyene kuti akapochele mbote, akusosekwa kuwutuka ali mkupita mumsewu wasagwile achimsyene ŵalinganyisye ya mpikisanowo. Mwakulandana ni yeleyi, kuti tukapochele mbote ja umi wangamala tukusosekwa kuŵa ni umi ŵakusasosekwa kola Aklistu. (Mase. 20:24; 1 Pet. 2:21) Nambope, Satana pampepe ni ŵandu ŵali kumbali jakwe ŵangasakaga kuti tutendeje yeleyi. Jemanjaji akusasaka kuti ‘tuwutucheje nawo’ yimpepe. (1 Pet. 4:4) Kupwatika pelepa, jemanjaji akusasinyosya ndamo syambone syatukusakola mpela Aklistu, soni akusasala kuti yakusatendaga yili yambone mnope ligongo yikusiyapa ufulu. Nambope yakusaŵechetagayi yili yaunami.—2 Pet. 2:19.
6. Ana akulijiganya chichi kutyochela ku chisyasyo cha Brian?
6 Ŵandu ŵakwete umi pakujigalila yitendo ya m’chilambo cha Satanachi, mkupita kwandaŵi akusamanyilila kuti litala lyaŵasagwile nganiliŵa lyakupeleka ufulu, nambo likusilyatendekasya kuŵa achikapolo. (Alo. 6:16) Kwende tulole chisyasyo cha Brian. Achinangolo ŵakwe ŵamlimbikasisye kuti akuyeje ndamo sya Chiklistu. Nambo pajwakulaga jwakayichilaga naga yaŵamsalilagayi mpaka yimtendekasye kuŵa jwakusangalala. Kaneko jwalakwe jwaganisisye yakuti atendeje ndamo mpela syakusatenda ŵandu ŵakuchilamboku. Brian jwatite, “Namanyilile kuti ufulu wakusawusala ŵandu kuchilamboku wandendekasisye kukola ndamo syakusakala. Pali papitile kandaŵi, natandite kamulichisya masengo mitela jakusokonasya mtwe, kumwa mnope ukana, nambosoni kola ndamo sine syakusakala. Yaka payamalaga, natandite kukamulichisya masengo mitela jakusokonasya mtwe jakogoya mnope, mwamti naŵele kapolo jwa yeleyo. . . . Natandite kusumisya mitelaji pakusaka kulimbikasya ndamo janguji.” Kaneko, Brian jwaganisisye ya kukola umi wakuya malamusi ga Yehofa. Brian jwachenjile ndamo syakwe sila soni jwabatisidwe mu 2001. Jwalakwe ali jwakusangalala mnope ligongo lyakuya ndamo sya Chiklistu. *
7. Mwakamulana ni Mateyu 7:13, 14, ana pana misewu jiŵili japi?
7 Kusala yisyene, kusagula litala lyambone kuli kwakusosekwa mnope. Satana akusasakaga kuti tuleche kuwutuka mumsewu wakanganika wawuli wakwawula ku “mbepo kapena kuti ku umi” pakusaka kuti tujendeje mumsewu wekulungwa wakwendamo ŵandu ŵajinji. Msewu welewu uli wakumanyika mnope soni uli wangasawusya kwendamo. Nambo msewu welewu ukwawula “kuchonasiko.” (Aŵalanje Mateyu 7:13, 14.) Kuti tupitilisyepe kwenda pa msewu welewu mwangasokonasidwa, tukusosekwa kumpikanila soni kumdalila Yehofa.
KUGANICHISYA MNOPE YA MPIKISANO SONI KUSAMALA NI CHILICHOSE CHAMPAKA CHITUKUŴASYE
Tuganichisyeje mnope ya mpikisano soni kuŵambala chilichose champaka chitukuŵasye (Alole ndime 8-12) *
8. Ana mundu jwakutenda mpikisano wakuwutuka akusatenda wuli pagwile?
8 Ŵandu ŵakuwutuka pampikisano akusalolechesya mwachitema yayili kusogolo ni chakulinga chakuti akakuŵala. Nambope, mwangosi mpaka agundane ni mjakwe kapena kwinjisya lukongolo pesimbo. Nambo naga agwile akusajimuka ni kutandilasoni kuwutuka. Ŵakuwutukaŵa akusaganichisya mnope yakumalisya mpikisano kuti akapochele mbote, mmalo mwakuganichisya mnope yayatendekasisye kuti akuŵale.
9. Ana tukusosekwa kutenda chichi ŵane patulemwechesye?
9 Pampikisano wetu, mpaka tukuŵale ndaŵi syejinji. Mwachisyasyo, mpaka tulemwesye yindu mu kaŵechete soni katende ketu ka yindu. Nambosoni achimjetu ŵatukuwutuka nawo mpaka atende yindu yampaka yitupweteche. Payitendekwe yeleyi tukasimongaga. Wosopewe tuli ŵangali umlama, nambosoni wosopewe tukuwutuka pa msewu wakanganika wakwawula ku umi. Myoyo ndaŵi sine mpaka twakuŵasye achimjetu. Paulo jwasasile kuti ndaŵi sine mundu mpaka “amlemwechesye mjakwe.” (Akolo. 3:13) Nambo mmalo mwaganichisya mnope yindu yampaka yitukuŵasye, tukusosekwa kuganichisya mnope ya mbote jatuchipata. Patukuŵele ni kugwa tukusosekwa kwimuka ni kutandilasoni kuwutuka. Nambo naga tukutumbila nikuleka kutumichila Yehofa, nikuti nganituŵa tumalisisye mpikisanowu nikuja kupochela mbote. Kupwatika pelepa, naga tukupitilisya kutumbilaku mpaka twatendekasye ŵane kuti yasawusyeje kumtumichila Yehofa mwakusangalala.
10. Ana mpaka tuŵambale chamtuli ‘kwakuŵasya’ ŵane?
10 Litala line lyampaka litukamuchisye kuŵambala ‘kwakuŵasya’ achimjetu lili kuŵambala kwakanganichisya kuti atendeje yindu mwakamulana ni mwatukusachila m’wejo. (Alo. 14:13, 19-21; 1 Akoli. 8:9, 13) Kutenda yeleyi kuli kwakusosekwa mnope ligongo kukulekangana ni mwayikusaŵela pampikisano usyesyene ŵakuwutuka. Jemanjaji akusawutuka kuti ŵapunde ŵane, soni jwakuwutuka jwalijose akusalingalinga kuti aŵe nambala wani. Akusagambaga ganichisya yindu yampaka yakamuchisye kuti awine mpikisano. Jemanjaji akusiŵatutila ŵane kumbali pakusaka kuti alongolele. Nambo uweji ngatukupikisana ni jwalijose. (Aga. 5:26; 6:4) Chakulinga chetu chili kwakamuchisya ŵandu ŵajinji kuti nombe nawo akapate umi wangamala. Myoyo tukusosekwa kulingalinga kukamulichisya masengo maloŵe gaŵasasile Paulo gakuti, ‘Mkagambaga kusaka yindu yayikumnonyelesya mmwejo jikape, mmalo mwakwe msacheje yayikwanonyelesya ŵane.’—Afil. 2:4.
11. Ana jwakuwutuka akusaganichisyaga mnope ya chichi, soni ligongo chichi?
11 Konjechesya pa kulolechesya yindu yayili kusogolo, ŵakuwutuka pampikisano usyesyene akusaganichisya mnope yakuti akayiche pawukupelela mpikisanowo. Atamose kuti jemanjaji pakutanda kuwutuka ngakusagawona malilega, nambope munganisyo mwawo akusaganichisya ali ayiche pamalilego soni ali mkupochela mbote. Jemanjaji akusaganichisya mnope yakumalisya mpikisano basi, mwamti akusalimbichila.
12. Ana Yehofa akwasalila ŵandu ŵakwe kuti chachapa chichi?
12 Pampikisano wakuwutukawu, Yehofa akwasalila ŵandu ŵakwe kuti chachapa mbote naga akumalisya mpikisanowu. Mbote jakwe jili ja umi wangamala, chinga kuja kutama kwinani kapena pachilambo chapasi. Baibulo jikusalondesya chenene mwawuchiŵela umi wetu msogolo. Patukuganichisya mnope ya chembecheyo chatukwete ni kuti nganituŵa tukundile kuti chilichose chitusokonasye kuja kupata umi wangamala.
KUPITILISYA KUWUTUKA ATAMOSE TULI MKUSIMANA NI YAKUSAWUSYA
Tukusosekwa kuwutuka pampikisanowu atamose kuti tukusasimana ni yakusawusya (Alole ndime 13-20) *
13. Ana tukusalekangana chamtuli ni ŵakuwutuka ŵasyesyene?
13 Ŵakuwutuka ŵa ku Gilisi ŵalimbanaga ni yakusawusya mpela kupela soni kupikana kupweteka. Nambo jemanjaji ŵasosekwaga kulijiganya kawutuche soni kola machili kuti awine mpikisanawo. Mwakulandana ni jemanjaji, m’wejisoni tukusasosekwa kulijiganya yampaka tutende kuti tukombole kuwutuka mpikisano watukutendawu. Nambope m’wejo tukwete upile wekulungwa pakulandanya ni wakusakola ŵakuwutuka ŵasyesyene. Tukuŵecheta yeleyi ligongo lyakuti, mpaka tupate machili kutyochela kwa Yehofa. Soni jwalakwe akusapeleka chikamuchisyo changali malile. Kusala yisyene, jwalakwe ngasagamba kutujiganya kuti tukombole mpikasanowu, mmalo mwakwe chachitukamuchisya kuti tuŵe ŵakulimba. Yeleyi mpaka yitendekwe naga tukumdalila.—1 Pet. 5:10.
14. Ana lilemba lya 2 Akolinto 12:9, 10, mpaka litukamuchisye chamtuli kupilila yakusawusya?
14 Paulo, jwasosekwaga kulimbana ni yakusawusya yejinji. Kupwatika pa kulagasidwa soni kutendeledwa yachipongwe ni ŵane, ndaŵi sine jwalakwe jwaliji jwakufowoka nambosoni jwalagaga ni “chakusoma mpela miŵa mchilu.” (2 Akoli. 12:7) Nambo mmalo mwakuti yakusawusyayi yimlepelekasye kumtumichila Yehofa, jwalakwe jwayiweni kuti yampaga upile wakumdalila Yehofa. (Aŵalanje 2 Akolinto 12:9, 10.) Ligongo lyakuti Paulo jwayiwonaga yindu m’litala lyeleli, yatendekasisye kuti Yehofa amkamuchisye pa yakusawusya yajwasimanaga nayo.
15. Ana tuchikola upile wakutenda chichi naga tukumsyasya Paulo?
15 M’wejisoni mpaka tulagasidweje kapena kutendeledwa yachipongwe ligongo lya chikulupi chetu. Mwine mpaka tulajeje ni ulwele kapena kupela mnope. Nambo naga tukumsyasya Paulo, yakusawusya yeleyi mpaka yitupe upile wakuyamichila yakusatenda Yehofa pakutukamuchisya.
16. Ana mpaka atende wuli naga ali ŵakulwalalwala?
16 Ana wawojo ali ŵachigonele kapena akusakamulichisya masengo njinga ja ŵandu ŵalemale? Ana akusapikana kupweteka ngongolo, kapena akusalajilila kulola? Naga yili myoyo, ana akuyiwona kuti mpaka akombole kutumichila Yehofa yimpepe ni ŵandu ŵakwete chilu chambone? Mwangakayichila mpaka akombole. Ŵandu ŵajinji ŵali ŵachikulile soni ŵakulwalalwala akuwutuka nawo pampikisano wakuja kupata umi wangamala. Jemanjaji nganaŵa akombwele kumtumichila Yehofa ni machili gawo. Mmalo mwakwe, akusapata machili kutyochela kwa Yehofa kupitila pamisongano ja Chiklistu jagamba kupikanila. Nambosoni akusakombola kulalichila kwa madokotala gawo soni ŵachibale ŵawo.
17. Ana Yehofa akusiŵawona chamtuli ŵandu ŵakulepela kutenda yejinji ligongo lya kulwala?
17 Naga nganaŵa akombwele kumtumichila Yehofa mwakusasachila wawojo, akadandawulaga, kapena kulipikana kuti nganaŵa apilile mpaka kuja kupata umi wangamala. Yehofa akusiŵanonyela wawojo ligongo lyakuti akusamkulupilila soni ligongo lya yindu yaŵele ali kumtendela jwalakwe munyumamu. Akusosekwa kumdalila mnope Yehofa kuti mpaka ŵakamuchisye apano kupundana ni kalakose, soni jwalakwe ngasiŵaleka. (Sal. 9:10) Yehofa chachaŵandichila kuti aŵe najo paunasi. Alole yaŵasasile mlongo jwine jwaŵalagasikaga ni ulwele. Jwalakwe jwatite, “Ligongo lya kulwalalwala, yikusandendekasyaga kuti ngalalichilaga mnope. Nambope ngumanyilila kuti yindu yamnono yangusakombola kutenda yikusamsangalasya Yehofa soni yikusandendekasya kuti mbeje jwakusangalala.” Pakulagasika ni chinechakwe, amanyilileje kuti nganaŵa jika, Yehofa mpaka ŵakamuchisye. Aganichisye maloŵe gakulimbikasya gaŵaŵechete Paulo gakuti, “Ngusisangalala pandaŵi jingusaŵa jwakulepetala, . . . Pakuti ndaŵi jele jindili jwakulepetala ni pingusaŵa ni machili.”—2 Akoli. 12:10.
18. Ana ŵakutumichila ŵa Yehofa ŵane akusasimana ni chakusawusya chapajika chapi?
18 Ŵandu ŵane ŵakuwutuka nawo pa litala lyakwawula ku umi akusasimana ni yakusawusya yine. Jemanjaji akusalimbana ni yakusawusya yele ŵandu ŵane ngaŵa mkuyiwona soni kuyipikanichisya. Mwachisyasyo, ŵane akusaŵa kuti akulaga ni ulwele wanganisyo kapena kudandawula ni chinechakwe. Ana ligongo chichi ŵakutumichila ŵa Yehofa akusasimana ni chakusawusya chapajika mpela chelechi? Yikusaŵa yangasawusya kuti ŵandu amkamuchisye mundu jwatemeche mkono kapena jwakwendela panjinga ja ŵandu ŵalemale. Nambo kwa mundu jwakulwala ulwele wa munganisyo yikusaŵa yakusawusya kumkamuchisya ligongo lyakuti akusawoneka mpela kuti pangali chilichose chakulaga nacho. Yakusasimana nayo jemanjaji yikusaŵa yakupweteka mnope mpela mwayikusaŵela ni mundu jwatemeche mkono kapena lukongolo. Nambo ligongo lyakuti ŵandu nganaŵa ayiweni yakuti kalaje, yikusaŵa yakusawusya kuti ŵane ŵanonyeleje kapena kwapa chikamuchisyo chakusosechela.
19. Ana tukulijiganya chichi pa chisyasyo cha Mefiboseti?
19 Naga akusimana ni yakusawusya yayikwalepelekasya kutenda yindu yejinji, soni ngakupikanichisya mwayikwendela yindu paumi wawo, mpaka apate machili pakuganichisya yayamtendechele Mefiboseti. (2 Sam. 4:4) Jwalakwe jwaliji jwamlemale, soni pandaŵi jine Mwenye Daudi ŵamtendele yindu mwangamganichisya, atamose kuti jwalakwe nganalemwesya chilichose. Mefiboseti nganatumbila, mmalo mwakwe jwaganichisyaga mnope yindu yambone yayatendekwe paumi wakwe. Jwalakwe jwayamichilaga yindu yambone yaŵamtendele Daudi munyuma. (2 Sam. 9:6-10) Mefiboseti paŵatendeledwe yindu mwangamganichisya, jwalinjile kuganichisya ngani josope mwajaŵelele. Nganakunda kuti yaŵatesile Daudi yimtumbilikasye. Soni nganamjimba magambo Yehofa payaŵatesile Daudi. Mefiboseti jwaganichisyaga mnope yampaka atende pakumkamuchisya mwenye jwamsagulwe jwa Yehofa. (2 Sam. 16:1-4; 19:24-30) Yehofa ŵakundile kuti chisyasyo chambone cha Mefiboseti chilembedwe m’Baibulo pakusaka kuti chitukamuchisye.—Alo. 15:4.
20. Ana kulagasika nganisyo kukusakwaya chamtuli ŵandu ŵane, soni ŵanduŵa mpaka aŵe ŵakusimichisya ya chichi?
20 Ligongo lyakulagasika nganisyo kwandaŵi jelewu, abale ni alongo ŵane ngakusagopoka kutama ni ŵandu ŵane. Atamose kuti jemanjaji yikusiyasawusya kutama pali ŵandu ŵajinji, nambope akusapitilisyape kusimanikwa pamisongano jampingo, jamkuli soni jaupande. Jemanjaji yikusiyasawusya kuŵechetana ni mundu jwachilendo, nambope ngakusaleka kuŵecheta ni ŵandu pali mu utumiki. Naga yeleyi yikusiyatendechela, ngakusosekwa kudandawula, ligongo nganaŵa jika. Ŵandu ŵajinji akusimana ni yakusawusya mpela yakusimana nayo wawojo. Yehofa akusasangalala ni yakutenda wawojo pakulipeleka ni umi wawo wosope. Soni ligongo lyakuti ngakukunda kuwujila munyuma, welewu wuli umboni wakulosya kuti jwalakwe akwakamuchisya mwakwapa machili gagakusosechela. * (Afil. 4:6, 7; 1 Pet. 5:7) Naga akumtumichila Yehofa atamose kuti akusimana ni yakusawusya ya paumi mpaka aŵe ŵakusimichisya kuti Yehofa akusasangalala ni yakutenda wawojo.
21. Ana wosope mpaka tukombole kutenda chichi ni chikamuchisyo cha Yehofa?
21 Pana kulekangana kwakupali pasikati pampikisano usyesyene ni mpikisano waŵawusasile Paulo. Mpikisano usyesyene wakuwutuka, mundu jumo ni juŵawinaga. Mwakulekangana ni yeleyi, mpikisano wakuwutuka Aklistu wuli wakuti mundu jwalijose jwakuwutuka mwakulupichika, chachipochela mbote ja umi wangamala. (Yoh. 3:16) Ŵandu ŵaŵawutukaga pampikisano usyesyene ŵasosekwaga kuŵa ŵakulimbangana. Ligongo naga ngatenda yeleyi yikaliji yakusawusya kuti awine. Mwakulekangana ni yeleyi, ŵajinji mwa m’weji tukulimbana ni yakusawusya yejinji, nambope tukupitilisyape kupilila. (2 Akoli. 4:16) Kusala yisyene, ni chikamuchisyo cha Yehofa wosope chitukombole kuwutuka pampikisanowu mpaka kumbesi.
NYIMBO 144 Meso Gawo Gaŵeje pa Mbote!
^ ndime 5 Masiku agano ŵakutumichila ŵajinji ŵa Yehofa akusimana ni yakusawusya mpela ukalamba nambosoni ulwele. Kupwatika pelepa, wosopewe tukusapelaga ndaŵi sine. Yeleyi mpaka yitutendekasye kuganisya kuti nganituŵa tukombwele kuwutuka nawo pampikisano. Munganiji, chitukambilane yindu yampaka tutende kuti tukombole kuwutuka pampikisano waŵawukolasile ndumetume Paulo wakuja kupochela umi wangamala.
^ ndime 6 Alole ngani ja mtwe wakuti “Baibulo Jikusachenga Umi wa Ŵandu” mu Sanja ja Mlonda ja Chichewa ja Januwale 1, 2013.
^ ndime 63 KULONDESYA YIWULILI: Kulipeleka mnope pamasengo gakulalichila kukumkamuchisya jwachikulile kupitilisyape kutenda yindu mwakamulana ni ndamo sya Chiklistu.
^ ndime 65 KULONDESYA YIWULILI: Mpaka twakuŵasye ŵane naga tukwakanganichisya kuti amwe mnope ukana kapena naga m’weji tukusamwa mwakupelenganya malile.
^ ndime 67 KULONDESYA YIWULILI: M’bale akwalalichila ŵandu ŵakumsamalila, atamose kuti agonechedwe kuchipatala.
