1. Kenca sipelajari nubuat Pustaka, kai si banci siteh?

KAI kentisik nari si iadapi umat Jahwe? Enggo siteh jawapenna. Enggo ikataken nubuat Pustaka kejadin penting kai saja si terjadi kentisik nari. Arah salah sada nubuat e siteh kai pagi si ilakoken piga-piga pemerentahen si mbelin kel kuasana. Nubuat e icatat bas Daniel pasal 11. Bas nubuat e, lit dua raja si ermusuhen, eme raja utara ras raja selatan. * Menam kerina nubuat e nggo terjadi. Emaka banci kita tek bagin-bagin si debanna pe pasti terjadi pagi.

2. Bagi si ikataken bas Kejadin 3:15, Ketangkasen 11:7 ras 12:17, kai saja si arus siinget sanga sipelajari nubuat Daniel?

² Gelah banci siangkai nubuat bas Daniel pasal 11, lit dua si arus siinget. Si pertama, pemerentahen si imaksudken bas nubuat e eme pemerentahen si mbelin kel kuasana ras pengaruhna man umat Dibata. Adi ibandingken ras kerina penduduk doni enda, sitik kel ngenca umat Dibata. Tapi rusur kalak e isiksa pemerentah. Engkai? Perban tujun utama Setan ras si ndukung ia eme ngkernepken kalak si ngelayani Jahwe ras Jesus. (Baca  Kejadin 3:15 ras Ketangkasen 11:7; 12:17.) Si peduaken, perlu siinget maka nubuat Daniel arus cocok ras nubuat-nubuat si deban si lit bas Pustaka. Emaka, gelah banci tuhu-tuhu siangkai nubuat Daniel, arus sibandingken nubuat e ras bagin-bagin si deban bas Pustaka.

3. Kai si man bahasenta bas artikel enda ras artikel seterusna?

³ Bas artikel enda, sibahas kari Daniel 11:25-39. Sibahas ise raja utara ras raja selatan mulai tahun 1870 seh tahun 1991. Sibahas ka kari ngkai maka perlu siubah pengangkanta kerna sada bagin arah nubuat e. Bas artikel seterusna, sibahas nubuat bas Daniel 11:40–12:1. Bas artikel e reh jelasna kari pengangkanta kerna kai si terjadi mulai tahun 1991 seh asa perang Harmagedon. Gelah lebih siangkai dua artikel enda, banci sinen bagan “Dua Raja si Ermusuhen bas Wari-Wari Pendungi.” Gundari, mari sidarami ise kin raja utara ras raja selatan bas nubuat Daniel.

4. Lit telu si banci nampati kita nandai ise kin raja utara ras raja selatan. Kai saja e?

⁴ Tangtangna, si igelari “raja utara” ras “raja selatan” eme penguasa-pengusa si lit i daerah utara ras selatan negri Israel. Ja nari siteh? Nina sekalak malekat man Daniel, “Aku reh ku jenda gelah banci iertindu kai si nandangi jadi man bangsandu [umat Dibata] i bas paksa si reh.” (Dan. 10:14) Mbarenda, bangsa Isreal eme umat si ipilih Dibata. Tapi kenca Pentakosta 33 Masehi, ibuktiken Jahwe maka si jadi umatNa eme kerina pengikut Kristus si setia. Emaka, menam kerina nubuat si lit bas Daniel pasal 11 lit hubungenna ras pengikut Kristus, labo bangsa Israel. (Perb. 2:1-4; Rom. 9:6-8; Gal. 6:15, 16) Janah, penguasa-penguasa si jadi raja utara ras raja selatan terus ganti-ganti. Aminna pe bage, lit si seri bas kalak e. Si pertama, isiksa kalak e umat Dibata. Si peduaken, arah perbahanen kalak e man umat Dibata siteh maka segat ate kalak e Jahwe, Dibata si benar. Janah si peteluken, duana penguasa e ersaing guna ndatken kekuasan.

5. Lit nge raja utara ras raja selatan mulai abad si peduaken Masehi seh asa akhir abad si pe-19-ken? Jelasken.

⁵ Bas abad si peduaken Masehi, jumlah kalak Kristen si palsu reh teremna. Kalak e masuk ku runggun guna ngajarken ajaren si salah ras muniken kebenaren si lit bas Pustaka. Emaka mulai je nari seh ngasa akhir abad si pe-19-ken, la lit organisasi Dibata i doni. Kalak Kristen palsu ndai, si bali bagi sesa, terus reh buena. Emaka, mesera kel nandaisa ise situhuna pengikut Kristus. (Mat. 13:36-43) Erkiteken si e, nubuat kerna raja utara ras raja selatan la mungkin maksudna penguasa-penguasa si merentah mulai abad si peduaken Masehi seh asa akhir abad si pe-19-ken. Engkai? Perban paksa si e, la lit sada kelompok umat Dibata si banci iserang kalak e. * Tapi kenca si e, mulihi lit raja utara ras raja selatan. Ja nari banci siteh?

6. Ndigan nge umat Dibata mulai ipepulung mulihi jadi sada kelompok? Jelasken.

 ⁶ Mulai tahun 1870, umat Dibata ipepulung jadi sada kelompok. Bas tahun e, Charles T. Russell ras teman-temanna mulai pulung guna mpelajari Pustaka. Bagi si inubuatken Pustaka, kalak e me utusen si “nikapken dalan” ope Kerajan Dibata merentah i surga. (Mal. 3:1) Emaka kenca si e, mulai ka lit sada kelompok kalak si ngelayani Jahwe! Lit nge penguasa si niksa umat Dibata paksa si e? Mari sibahas.

7. Seh asa Perang Doni I, ise nge raja selatan?

⁷ Bas tahun 1870, pemerentahen si mbelangna daerah kekuasanna i doni eme Inggris janah ia ka me si megegehna pasuken militerna. Bas nubuat Daniel, Inggris igambarken bagi sada tanduk si kitik si erban telu tanduk si debanna jadi meruah. Telu tanduk e eme Prancis, Spanyol, ras Belanda. (Dan. 7:7, 8) Seh asa Perang Doni I, Inggris me si jadi raja selatan. Paksa si e, negara si bayakna bas doni eme Amerika Serikat janah mulai ia kerja sama ras Inggris.

8. Ise nge si jadi raja selatan bas wari-wari pendungi?

⁸ Sanga Perang Doni I, kerja sama Amerika Serikat ras Inggris janah mbelin kel kekuasanna. Paksa si e me kalak e jadi Kuasa Doni Inggris-Amerika. Bagi si inubuatken Daniel, ‘tentera kalak e la tanggung teremna ras gegehna.’ (Dan. 11:25) Sedekah wari-wari pendungi, Kuasa Doni Inggris-Amerika jadi raja selatan. * Tapi, ise nge raja utara?

9. Ndigan nge raja utara lit mulihi? Janah uga Daniel 11:25 terjadi?

⁹ Bas tahun 1871, sada tahun kenca iban Russell ras teman-temanna kelompok erlajar Pustaka, mulai ka lit raja utara si mbaru. Bas tahun e, kerja sama me piga-piga wilayah i Eropa janah ibanna Kekaisaren Jerman. Puluhen tahun kenca si e, berhasil Jerman ngkuasai piga-piga negara i Afrika ras Samudra Pasifik. Iusahaken Jerman ka gelah belinen kuasana asangken Inggris. (Baca Daniel 11:25 si lit bas cataten i teruh.) * Pasuken militer si ipepulung Jerman seh kel gegehna, menam seri gegehna ras Inggris. Sanga perang doni si pertama, igunaken Jerman pasuken militerna e guna ngelawan musuh-musuhna.

10. Uga nubuat bas Daniel 11:25b, 26 terjadi?

¹⁰ Enggo inubuatken Daniel kai pagi si terjadi man Jerman ras pasuken militerna. Ikataken Daniel maka raja utara e “labo pagi ia ngasup ertahan.” Engkai? “Sebap nggo sekongkol kalak e guna nyerang ia. Kalak si man panganna si ntabeh pagi si erban ia ndabuh.” (Dan. 11:25b, 26a, NW) Bas jaman Daniel, kalak si banci man pangan raja eme pejabat-pejabat si ertugas bas istana. (Dan. 1:5) Emaka, kalak si imaksud bas nubuat e eme pejabat-pejabat tinggi i Jerman termasuk jendral ras penasehat militer. Kalak e me si dungna erban kaisar lanai erkuasa, janah imulai me pemerentahen si mbaru i Jerman. * Selain inubuatken Daniel kerna ndabuhna Kekaisaren Jerman, ikatakenna ka kai kari hasilna sanga perang raja utara ras raja selatan. Nina, “Igedapken pagi pasuken [raja utara] janah mbue pagi si terbunuh.” (Dan. 11:26b, NW) Bagi si ikataken nubuat e, talu me pasuken Jerman bas perang doni si pertama janah melala tenterana si terbunuh. Ibandingken ras perang-perang sebelumna, bas perang e me si nteremna kalak si terbunuh.

11. Kai si ilakoken raja utara ras raja selatan?

¹¹ Bas Daniel 11:27, 28 ikataken kai si terjadi sope Perang Doni I. Ikataken ayat e maka raja utara ras raja selatan ‘ras-ras man janah erguak ia sapih-sapih ia.’ Ikataken ayat e ka maka ‘melala barang rampasen’ si ipepulung raja utara. Duana si inubuatken e tuhu-tuhu terjadi. Ikataken Jerman ras Inggris maka ras-ras kalak e ndukung perdamen. Tapi e bual, perban bas tahun 1914, erperang me kalak e sanga Perang Doni I. Janah bas tahun e, Jerman nggo jadi negara si peduaken si bayakna kel i doni. Kenca si e, bagi si inubuatken Daniel 11:29 bage pe bagin si pertama ayat 30, talu me Jerman sanga erperang ngelawan raja selatan.

12. Kai si ilakoken raja utara ras raja selatan bas perang doni si pertama?

¹² Mulai tahun 1914, duana raja e terus  ermusuhen janah reh rusurna iserang kalak e umat Dibata. Misalna, bas perang doni si pertama, isiksa pemerentah Jerman ras Inggris umat Dibata si la nggit erperang. Selain si e, ipenjaraken pemerentah Amerika Serikat turang seninata si minpin pendahin erberita. Kerina e nggo inubuatken bas Ketangkasen 11:7-10.

13. Bas tahun 1930-en bage pe sanga perang doni si peduaken, kai si ilakoken raja utara?

¹³ Bas tahun 1930-en janah khususna bas perang doni si peduaken, iserang raja utara umat Dibata alu kejam. Sanga erkuasa partai Nazi i Jerman, Hitler ras pengikutna ngelarang pendahin erberita si ilakoken umat Dibata. Lit kira-kira 1.500 umat Jahwe si ibunuh raja utara janah ribun ka si ikirimna ku kamp-kamp konsentrasi. Kerina kejadin e nggo inubuatken Daniel. Perban iusahaken raja utara mpengadi dahin erberita, ‘ibanna najis ingan si badia’ janah “ipengadina persembahen si ibereken alu ratur.” (Dan. 11:30b, 31a, NW) Ersumpah ka peminpin Jerman eme Hitler maka ikernepkenna kari umat Jahwe i Jerman.

14. Kenca perang doni si peduaken, ise raja utara si mbaru? Jelasken.

¹⁴ Kenca perang doni si peduaken, ikuasai Uni Soviet melala wilayah si mbarenda ikuasai Jerman. Bali bagi pemerentahen Nazi si kejam, Uni Soviet ras negara-negara si ndukung ia pe niksa kerina kalak si iutamakenna nembah Dibata Jahwe. Alu bage kalak e jadi raja utara.

15. Kai si ilakoken raja utara kenca dung Perang Doni II?

¹⁵ La ndekah kenca dung Perang Doni II, raja utara si mbaru eme Uni Soviet ras negara-negara si ndukung ia mulai nyerang umat Dibata. Ikataken bas Ketangkasen 12:15-17, serangen si iadapi umat Dibata e bali bagi “lau mbelin.” Bagi si ikataken nubuat e, ilarang raja utara pendahin erberita janah iasingkenna ribun umat Jahwe ku Siberia. Bas wari-wari pendungi, reh kelekna raja utara niksa umat Dibata. Tapi, pendahin umat Dibata la banci ipengadi. *

16. Menurut Daniel 11:37-39, kai si ilakoken Uni Soviet?

¹⁶ Baca Daniel 11:37-39. Menurut nubuat e, raja utara “la mperdiateken dibata si isembah nini-ninina.” Kai maksudna? Ikernepken Uni Soviet atena agama. Emaka iusahaken kalak e mbeneken pengaruh agama-agama si nggo ndekah lit. Erkiteken si e, bas tahun 1918, iban pemerentah Uni Soviet keputusen gelah sekolah-sekolah ngajarken maka Dibata e la lit. Uga raja utara ‘nghamati dibata si ngkawali benteng’? Melala kel sen si igunaken Uni Soviet gelah reh gegehna pasuken militerna janah ibanna ribun senjata nuklir. Dungna berhasil raja utara ras raja selatan mpepulung melala kel senjata si banci munuh miliaren jelma.

17. Kai “si erban ciga ate si erban hancur”?

¹⁷ Raja utara ras raja selatan nggo ndekah  ermusuhen. Amin gia bage, raja utara ndukung raja selatan guna ngelakoken kai si penting. ‘Ipajekken kalak e kai si erban ciga ate si erban hancur.’ (Dan. 11:31, NW) “Kai si erban ciga ate” e eme Perserikatan Bangsa-Bangsa.

18. Engkai maka Perserikatan Bangsa-Bangsa igelari “si erban ciga ate si erban hancur”?

¹⁸ Perserikatan Bangsa-Bangsa igelari “si erban ciga ate” perban ikatakenna maka banci ibanna dame doni enda, padahal Kerajan Dibata ngenca si banci ngelakokenca. Ikataken nubuat Daniel ka maka kai si erban ciga ate e “erban hancur.” Enda cocok perban iserang ras ihancurken Perserikatan Bangsa-Bangsa pagi kerina agama palsu.​—Nen bagan “Dua Raja si Ermusuhen bas Wari-Wari Pendungi.”

19-20. (a) Engkai maka perlu sipelajari sejarah enda? (b) Penungkunen kai kari sijawap bas artikel seterusna?

¹⁹ Perlu sipelajari sejarah enda perban e mbuktiken maka mulai tahun 1870 seh tahun 1991, nubuat Daniel kerna raja utara ras raja selatan nggo terjadi. Emaka, banci kita tuhu-tuhu tek bagin-bagin si deban arah nubuat e pe pasti ka terjadi pagi.

²⁰ Bas tahun 1991, ibubarken me Uni Soviet. Adi bage, ise nge gundari raja utara? Jawapenna sibahas kari bas artikel seterusna.