1. Weh Baibl prafesi ku help wi fi andastan?

WEH wahn soon hapm tu Jehoava peepl? Baibl prafesi help wi fi andastan, bikaaz da laik wahn windo weh wi ku luk chroo fi si weh wahn hapm eena di fyoocha. Dehn ga wan prafesi weh help wi fi si weh som a di moas powaful govament dehn pahn di ert wahn du. Da prafesi deh eena Daniel chapta 11, an ih tel wi bowt too king weh wahn fait gens wan anada, di king a di naat ahn di king a di sowt. Wahn lata da prafesi don kohn chroo, soh wi ku bee shoar dat di res a it wahn kohn chroo tu.

2. Laik weh wi si da Genesis 3:15 ahn Revilayshan 11:7 ahn 12:17, weh impoatant faks wi haftu memba wen wi stodi Danyel prafesi?

² Fi andastan di prafesi eena Daniel chapta 11, wi haftu memba sohn impoatant faks. Wi haftu memba dat dis prafesi onli taak bowt di difrent king dehn ahn govament dehn weh mi ga dairek deelinz wid Gaad peepl, eeda fi rool oava dehn er atak dehn. Gaad peepl da onli wahn lee bit wen yu kompyaa dehn tu aala di peepl weh liv pahn di ert. Soh wai wen sohnting impoatant hapm eena di werl dehn aal taim deh rait eena di midl a it? Bikaaz Saytan ahn fi hihn hoal sistem ga wan mayn goal. Hihn waahn dischrai enibadi weh serv Jehoava ahn Jeezas. (Reed Genesis 3:15 * ahn Revilayshan 11:7; 12:17.) Pahn tap a dat,  di prafesi weh Danyel mi rait haftu gree wid ada prafesi eena Gaad Werd tu. Az a mata a fak, wi onli ku andastan Danyel prafesi karek if wi kompyaa it tu weh di res a di Baibl seh.

3. Weh wi wahn diskos eena dis aatikl ahn di wan afta?

³ Soh, eena disya aatikl wi wahn diskos Daniel 11:25-39. Wi wahn si hoo da-mi di king a di naat ahn di king a di sowt fahn 1870 tu 1991. Wi wahn aalso si wai wi ga gud reezn fi chaynj di way wi andastan dis paat a Danyel prafesi. Eena di neks aatikl, wi wahn diskos Daniel 11:40–12:1, ahn wi wahn geh wahn moa karek andastandin a weh da paat a di prafesi tel wi bowt di taim bitween di 1990’s ahn di waar a Armagedon. Wail yu stodi dehnya too aatikl, yu ku yooz di chaat “Too King Weh Fait Gens Eech Ada Joorin di Taim a di En” fi help yu andastan dis prafesi. Bot fers, wi haftu fain owt hoo da di too king dehn weh dis prafesi taak bowt.

4. Weh chree tingz wahn help wi fi aidentifai di king a di naat ahn di king a di sowt?

⁴ Fers, di taitl “king a di naat” mi rifaa tu hoo mi-di rool di ayrya tu di naat a di nayshan a Izrel, ahn “king a di sowt” mi rifaa tu hoo mi-di rool tu di sowt a da ayrya. How wi noa dat? Noatis weh di aynjel weh mi diliva di mesij tel Danyel: “Ah kohn fi tel yu mek yu andastan weh wahn hapm tu fi yoo peepl eena di laas dayz.” (Dan. 10:14) Bifoa Pentikaas 33 C.E., di nayshan a Izrel da-mi Gaad peepl. Bot afta dat, Jehoava mi mek it klyaa dat now Krais disaipl dehn da fi Hihn peepl. Ahn soh wahn lata di prafesi eena Daniel chapta 11 da bowt Krais disaipl dehn, noh di nayshan a Izrel. (Aks 2:1-4; Roam. 9:6-8; Gal. 6:15, 16) Ahn di aidentiti a di king a di naat ahn di king a di sowt mi chaynj oava di yaaz. Bot sertn tingz neva chaynj. Fers, aala dehndeh king mi eeda rool oava wahn ayrya weh lata Gaad peepl mi liv er dehn mi atak er persikyoot Gaad peepl. Sekant, di way how dehn mi chreet Gaad peepl shoa dat dehn hayt di chroo Gaad, Jehoava. Ahn terd, di too king dehn mi fait gens eech ada fi powa.

5. Bitween di yaa 100 C.E. ahn di yaa 1870, eni roola da-mi king a di naat er king a di sowt? Pleez eksplayn yu ansa.

⁵ Som taim afta di yaa 100 C.E., wahn lata faals Kristyan mi kom een ahn tek oava di chroo Kristyan kangrigayshan. Dehn mi teech lata lai ahn dehn mi haid di chroot weh deh eena Gaad Werd. Fahn da taim op tu eena di 1800’s, no aaganaiz groop a Gaad peepl mi deh pahn di ert. Di faals Kristyan dehn mi groa laik paiznos plaant eena wahn feel. Sayka dat, ih mi haad fi noa hoo da chroo Kristyanz. (Mach. 13:36-43) Wai ih impoatant fi noa dat? Dat tel wi dat weh wi reed bowt di king a di naat ahn di king a di sowt kudn rifaa tu eni roola er govament weh mi rool bitween di yaa 100 C.E. ahn di yaa 1870 C.E. Gaad peepl neva deh az wahn aaganaiz groop az yet fi mek dehn atak. * Bot, wi ku ekspek dat di king a di naat ahn di king a di sowt wuda shoa op agen som taim soon afta 1870. How wi noa dat?

6. Da wen Gaad peepl mi staat tu geh aaganaiz az wahn groop agen? Pleez eksplayn yu ansa.

 ⁶ Fahn di yaa 1870, Gaad peepl mi staat tu geh aaganaiz az wahn groop agen. Dat da-mi di yaa wen Charles Taze Russell an adaz mi staat wahn Baibl stodi klaas tugeda. Ahn den Brada Russell an ih kloas fren dehn mi mek di prafesi kohn chroo bikaaz dehndeh da-mi di mesinja weh di Baibl seh mi wahn “klayr op di way” fi mek di Mesaiya staat tu rool eena ih Kingdom. (Mal. 3:1) Wahn aaganaiz groop a peepl mi-di serv Jehoava agen! Joorin da taim, dehn mi ga eni govament weh mi egzis weh mi wahn rool oava er atak Gaad peepl? Mek wi si.

7. Hoo da-mi di king a di sowt op tu nayli di en a Werl Waar I?

⁷ Bai 1870, Britain da-mi di moas powaful konchri eena di werl, an ih mi ga di schrangis aami. Danyel prafesi taak bowt wahn smaal haan weh kanka chree ada haan. Da smaal haan stan fi Britain, ahn di ada chree haan stan fi France, Spain, ahn di Netherlands. (Dan. 7:7, 8) Ahn Britain da-mi di king a di sowt op tu nayli di en a di fers werl waar. Rong da saym taim, di United States of America mi groa fi bee di richis konchri eena di werl an ih mi staat tu werk tugeda wid Britain.

8. Hoo da di king a di sowt joorin di laas dayz?

⁸ Joorin Werl Waar I, di United States ahn Britain mi jain op ahn dat da how dehn mi staat werk tugeda fi bee di moas powaful nayshan eena di werl. Jos laik weh Danyel mi prafesai, dis king mi gyada wahn ‘big ahn powaful aami.’ (Dan. 11:25) Joorin di laas dayz, Britain ahn  di United States tugeda da di king a di sowt. * Bot hoo mi wahn bee di king a di naat?

9. Da wen wahn nyoo king a di naat mi apyaa, ahn how Daniel 11:25 mi kohn chroo?

⁹ Di yaa afta Brada Russell an adaz mi staat op dehn Baibl stodi groop, 1871, wahn nyoo king a di naat apyaa. Da saym yaa, Otto von Bismarck mi yoonait sevral ayrya da Europe, ahn tugeda dehn mi mek op wahn powaful nayshan naym Germany. King Wilhelm I da-mi di fers roola oava dis nyoo nayshan, ahn hihn mi chooz Bismarck fi bee di leeda a dis govament. * Oava taim, Germany mi tek kanchroal oava sevral konchri da Africa an eena di Pacific Ocean, an ih mi-di chrai fi bee moa powaful dan Britain. (Reed Daniel 11:25.) * Germany mi gyada tugeda wahn big aami, nayli az big az Britain aami. Eena di fers werl waar, Germany mi yooz da aami fi fait gens ih enimi dehn.

10. How Daniel 11:25b, 26 mi kohn chroo?

¹⁰ Den Danyel prafesai weh mi wahn hapm tu Germany ahn di aami weh ih mi gat. Di prafesi seh dat di king a di naat “wahn faal.” Wai? “Bikaaz dehn wahn plan op aal kaina chriks gens ahn. Ahn dehn wan weh di eet fi hihn bes food wahn mek hihn faal.” (Dan. 11:25b, 26a) Bak eena Danyel dayz, peepl weh mi eet “di king bes food” mi inklood di raiyal ofishal dehn weh mi “serv di king.” (Dan. 1:5) Soh da hoo dis prafesi di taak bowt? Ih di taak bowt di ofishal dehn weh mi ga hai pozishan eena di German govament. Dat wuda inklood di jenaral dehn ahn aala di ada aafisa dehn weh mi werk lang wid di king. Sayka weh dehndeh aami aafisa mi du, di king mi looz powa ahn dehn mi en op di staat wahn difrent kaina govament da Germany. * Dis prafesi neva jos seh weh mi wahn hapm tu di govament, bot ih mi aalso seh wat wuda bee di rizolt a di waar wid di king a di sowt. Dis da weh di prafesi mi seh bowt di king a di naat: “Wahn flod wahn wash weh fi hihn aami, ahn lata peepl wahn ded.” (Dan. 11:26b) Eena di fers werl waar, jos laik weh di prafesi seh, di German aami mi looz ahn lata peepl mi ded. Da waar da-mi di wers waar eva op tu da taim.

11. Weh di king a di naat ahn di king a di sowt mi du?

¹¹ Daniel 11:27, 28 taak bowt weh mi wahn hapm joorin di taim bifoa Werl Waar I. Ih seh dat di king a di naat ahn di king a di sowt wuda “sidong tugeda da di saym taybl ahn tel wan anada lai.” An ih seh dat di king a di naat wuda kalek “wahn lata tingz” tu. Dat da egzakli weh mi hapm. Germany ahn Britain mi tel eech ada dat dehn mi waahn pees, bot dat da-mi loan lai kaaz waar mi brok owt eena 1914. Ahn bai 1914 Germany da-mi di sekant richis konchri eena di werl. Soh Daniel 11:29 ahn di fers paat a vers 30 mi  kohn chroo wen Germany mi fait gens di king a di sowt ahn looz.

12. Weh di king a di naat ahn di king a di sowt mi du eena di fers werl waar?

¹² Fahn sins 1914, di too king dehn fait gens wan anada ahn gens Gaad peepl moa ahn moa. Fi egzampl, eena di fers werl waar, di German govament ahn di British govament mi persikyoot Gaad peepl, hoo mi rifyooz fi fait eena di waar. Ahn di U.S. govament mi tek di bradaz weh mi-di tek di leed eena di preechin werk ahn chroa dehn eena prizn. Dis persikyooshan mi fulfil di prafesi eena Revilayshan 11:7-10.

13. Eena di 1930’s ahn joorin di sekant werl waar, weh di king a di naat mi du?

¹³ Den, joorin di 1930’s di king a di naat mi atak Gaad peepl widowt mersi ahn dat mi onli geh wers joorin di sekant werl waar. Wen di Nazi paati mi tek kanchroal a Germany, Hitler ahn fi hihn falowaz mi ban di werk weh Gaad peepl mi-di du. Di king a di naat mi kil honjridz a Jehoava peepl ahn dehn mi sen towznz moa da kansenchrayshan kyamp. Danyel mi prafesai bowt dehndeh ivent. Di king a di naat mi aybl fi “mek di hoali plays noh bee hoali nohmoh” ahn “stap di regyula sakrifais” wen ih mi ban di preechin werk. (Dan. 11:30b, 31a) Hitler, hoo da-mi di roola a Germany, mi eevn pramis fi kil aala Gaad peepl weh mi deh da Germany.

14. Hoo da-mi di king a di naat afta di sekant werl waar? Pleez eksplayn yu ansa.

¹⁴ Afta di sekant werl waar, di Soviet Union mi tek kanchroal oava aala di teritori weh dehn mi kyapcha fahn Germany ahn dehn mi tek oava az king a di naat. Di Soviet Union mi rool peepl eena wahn rof way jos laik di Nazi govament. Dehn mi persikyoot enibadi weh mi mek wership a di chroo Gaad tek fers plays eena dehn laif.

15. Weh di king a di naat mi du afta Werl Waar II mi finish?

¹⁵ Wahn lee wail afta Werl Waar II mi finish, di nyoo king a di naat, di Soviet Union, mi atak Gaad peepl. Jos laik weh di prafesi da Revilayshan 12:15-17 seh, dis king mi ban wi preechin werk ahn foas towznz a Jehoava peepl fi goh liv da Siberia. Az a mata a fak, joorin di laas dayz, di king a di naat poar owt “wahn riva” a persikyooshan fi chrai stap di werk weh Gaad peepl mi-di du, bot dat neva werk. *

16. How Daniel 11:37-39 mi kohn chroo?

¹⁶ Reed Daniel 11:37-39. * How di king a di naat mi shoa dat ih noh ga “no rispek fi di Gaad a ih ansesta dehn”? Di Soviet Union mi waahn geh rid a aal rilijan, soh ih mi chrai tek weh powa fahn di difrent rilijos aaganaizayshan dehn. Fahn way bak eena 1918 di Soviet govament mi aada aala di skool dehn fi teech dat no Gaad noh deh. How dis king a di naat mi “gi gloari tu di gaad a di schrang plays  dehn”? Di Soviet Union mi spen wahn hoal lata moni fi bil op ih aami ahn fi mek towznz a wepan fi bil op ih powa. Di too king dehn, di king a di naat ahn di king a di sowt, mi en op di kalek inof wepan fi kil bilyanz a peepl!

17. Wat da “di disgostin ting weh kaaz dischrokshan”?

¹⁷ Di king a di naat mi akchwali werk lang wid di king a di sowt fi du wan impoatant ting. Dehn mi “set op di disgostin ting weh kaaz dischrokshan.” (Dan. 11:31) Da “disgostin ting” da di United Nations.

18. Wai di prafesi diskraib di United Nations az wahn “disgostin ting”?

¹⁸ Di prafesi diskraib di United Nations aaganaizayshan az wahn “disgostin ting” bikaaz ih klaym dat ih ku bring werl pees ahn onli Gaad Kingdom ku du dat. Ahn di prafesi seh dat di disgostin ting wuda “kaaz dischrokshan” bikaaz di United Nations wahn play wahn impoatant paat eena di dischrokshan a aal faals rilijan.—Si di chaat “Too King Weh Fait Gens Eech Ada Joorin di Taim a di En.”

19-20. (a) Wai wi need fi noa dis hischri? (b) Weh kweschan wi wahn ansa eena di neks aatikl?

¹⁹ Wi need fi noa dis hischri bikaaz ih proov dat fahn di 1870’s dong tu di erli 1990’s, Danyel prafesi bowt di king a di naat ahn di king a di sowt mi kohn chroo. Soh wi ku ga fayt dat di res a di prafesi wahn kohn chroo tu.

²⁰ Eena 1991, di Soviet Union mi brok op. Soh hoo da di king a di naat tudeh day? Wi wahn ansa da kweschan eena di neks aatikl.