1. Cosa kanaton ta habla el maga profecia na Biblia?

COSA cerca ya sucede con el maga siervo de Jehova? Sabe kita si cosa el contestacion. El maga profecia na Biblia ta habla kanaton si cosa el maga importante suceso que afecta kanaton todo. Por ejemplo, asegun na Daniel capitulo 11, tiene un particular profecia que ta dale mira si cosa hace el maga de con todo poderoso gobierno na tierra. Ta discuti este acerca con el dos rey que tan contra na uno y otro, el rey del norte y el rey del sur. Ya cumpli ya el mayoria de este profecia, poreso puede kita asigura que hay cumpli tambien el los demas detalle de este.

2. Como cosa ya dale mira na Genesis 3:15 y Revelacion 11:7 y 12:17, cosa kita debe acorda si ta estudia con el profecia de Daniel?

² Para entende kita con el profecia na Daniel capitulo 11, necesita kita acorda que ta refiri lang este con el maga rey y maga gobierno del gente quien tiene grande efecto con el maga siervo del Dios. Poco lang el siervo del Dios si compara con el populacion del mundo. Pero porque con el maga siervo del Dios gayot tan contra este maga gobierno del gente? Cay si Satanas y el de suyu sistema bien quierre destroza con el maga quien ta sirvi con Jehova y con Jesus. (Le con el Genesis 3:15 y Revelacion 11:7; 12:17.)  Mas pa, el profecia de Daniel debe man uyun na otro maga profecia na Palabra del Dios. Gane, puede lang kita tiene justo entendimiento na profecia de Daniel si compara kita con este na otro maga texto na Biblia.

3. Cosa kita discuti na este articulo y na siguiente?

³ Poreso, discuti kita con el Daniel 11:25-39. Sabe kita si quien el rey del norte y el rey del sur na año 1870 hasta 1991 y si porque kita necesita cambia con el diaton entendimiento na un parte de este profecia. Na siguiente articulo, hay discuti kita con el Daniel 11:40–12:1 y hace kita claro si cosa ta habla kanaton ese parte del profecia acerca na año 1991 hasta na guerra del Armagedon. Mientras ta estudia tu con este dos articulo, mas bueno si mira tu con el chart “Dos Rey que Tan Contra na Uno y Otro na Tiempo del Fin.” Pero una, necesita kita conoce con este dos rey na este profecia.

4. Cosa el tres cosas que puede ayuda kanaton para conoce si quien el rey del norte y el rey del sur?

⁴ Del primero, el titulo “rey del norte” ta refiri con el quien ta rula na norte parte del Israel y el titulo “rey del sur” ta refiri con el quien ta rula na sur parte del Israel. Porque se kita puede habla? Nota si cosa ya habla el angel quien ya lleva mensaje con Daniel: “Ya vene yo para hace entende contigo si cosa sucede con el maga gente na de ustedes nacion na ultimo parte del maga dia.” (Dan. 10:14) Del una, el literal nacion del Israel amo el maga siervo del Dios. Pero ya principia del Pentecostes 33 C.E., ya hace claro si Jehova que el maga fiel dicipulo de Jesus amo el de suyu maga siervo. Poreso, mayoria del profecia na Daniel capitulo 11 amo acerca na maga dicipulo del Cristo y gendeh acerca na nacion del Israel. (Act. 2:1-4; Roma 9:6-8; Gal. 6:15, 16) Y mientras ta pasa el tiempo, ta cambia-cambia si quien el rey del norte y rey del sur. Pero maskin pa ansina, tiene tres cosas que comon kanila. Una, este maga rey tiene grande efecto na maga siervo del Dios. Ika-dos, el diila tratamiento na maga siervo del Dios ta dale mira que ta odia sila con el verdadero Dios, si Jehova. Y ika-tres, este dos rey tan contra na uno y otro para na poder.

5. Tiene ba rey del norte y rey del sur principia na año 100 hasta na año 1870? Explica.

⁵ Cuanto tiempo despues del año 100, mucho del maga falso Cristiano el ya entra na Cristiano congregacion. Ya enseña sila maga pagano idea y ya esconde con el verdad que puede incuntra na Palabra del Dios. Desde de ese tiempo hasta 1870, nuay organizao grupo del maga siervo del Dios aqui na tierra. Ya queda manada el maga falso Cristiano igual na sahbut, poreso dificil ya conoce si quien el verdadero Cristiano. (Mat. 13:36-43) Porque importante que sabe kita se? Cay ta dale este mira que el rey del norte y el rey del sur gendeh puede refiri na maga rey o gobierno principia na año 100 hasta 1870. Nuay organizao grupo del maga siervo del Dios con quien sila ataca. * Pero puede kita expecta  que el rey del norte y el rey del sur hay abuya otravez despues del año 1870. Porque kita se sabe?

6. Del cuando ya queda organizao otravez el maga siervo del Dios? Explica.

⁶ Principia del 1870, ya queda organizao el maga siervo del Dios como un grupo. Amo se el año cuando si Charles T. Russell y el de suyu maga uban ya forma un grupo para estudia con el Biblia. Si Hermano Russell y de suyu maga amigo amo ya sirvi como el mensajero quien ya ‘prepara con el camino’ antes establicia con el Mesianico Reino. (Mal. 3:1) Puede ya otravez conoce si quien el maga siervo del Dios! Tiene ba maga gobierno na ese tiempo que ya tiene grande efecto na maga siervo del Dios? Mira kita.

7. Quien el rey del sur hasta 1917?

⁷ Ya llega el 1870, el Britain ya queda el de con todo grande imperio na tierra y tiene este el de con todo poderoso fuerza militar. Ese imperio ta representa con el diutay cuerno que ya hace perde con el otro tres cuerno​—el France, Spain y Netherlands. (Dan. 7:7, 8) Y este amo el rey del sur hasta 1917. Na ese mismo tiempo, el United States of America ya queda el de con todo rico nacion y ya principia man alianza na Britain.

8. Quien el rey del sur durante el ultimo maga dia?

⁸ Durante el Guerra Mundial I, el United States y Britain junto yan guerra contra na otro maga nacion. Na ese tiempo, este dos amo el ya queda el Anglo-American World Power. Como cosa ya predicta si Daniel, este rey tiene “bien manada y bien  mafuerza maga soldao.” (Dan. 11:25) Durante el ultimo maga dia, el Britain y el United States amo el rey del sur. * Pero quien el rey del norte?

9. Del cuando ya abuya otravez el rey del norte y paquemodo ya cumpli el Daniel 11:25?

⁹ Del 1871, el año despues forma si Russell y de suyu maga uban con el un grupo para estudia con el Biblia, ya abuya otravez el rey del norte. Na ese mismo año, si Otto von Bismarck ya hace manera para establicia con el Imperio de Germany. Si Wilhelm I amo el primer emperador de este y ya iscuji le con Bismarck para queda el lider de este gobierno. * Adentro del cuanto decada, el Germany ya controla con el cuanto nacion na Africa y na Pacific Ocean y ya pricura este queda mas poderoso contra na Britain. (Le con el Daniel 11:25.) El Germany ya forma un bien poderoso fuerza militar que amo el ika-dos na entero mundo. Del primer guerra mundial, ya usa este el Germany contra na de este maga contrario.

10. Paquemodo ya cumpli el Daniel 11:25b, 26?

¹⁰ Ya predicta tambien si Daniel si cosa hay sucede con el Imperio del Germany y con el fuerza militar de este. El profecia ya habla que ‘gendeh para’ el rey del norte. Porque? “Cay plaña sila malo contra con ele. Y aquellos quien ta come con el de suyu maga sabroso comida hay causa con el de suyu caida.” (Dan. 11:25b, 26a) Na tiempo de Daniel, incluido na maga ta come con el “maga sabroso comida del rey” amo el maga oficial na palacio quien ‘ta sirvi con el rey.’ (Dan. 1:5) Con quien ta refiri este profecia? Ta refiri este con el maga alto oficial na gobierno de Germany​—incluido el maga general y militar oficial quien ta sirvi con el emperador. Por causa na cosa sila ya hace, ya perde el poder del emperador y ya tiene un nuevo gobierno na Germany. * Ya menciona tambien na profecia si cosa el resulta del guerra de este contra na rey del sur. Acerca na rey del norte, este ya habla: “Hay perde el de suyu maga soldao y manada el quien muri.” (Dan. 11:26b) Del primer guerra mundial, ‘ya perde’ el Germany y “manada el quien ya muri,” igual como cosa ya predicta. Bien manada gente el ya muri na ese guerra si compara na otro maga guerra de antes.

11. Cosa ya hace el rey del norte y el rey del sur?

¹¹ Ya dale mira na Daniel 11:27, 28 si cosa sucede antes del Guerra Mundial I. Ya predicta este que el rey del norte y el rey del sur hay ‘sinta junto na un mesa y man imbusterias con uno y otro.’ Ya habla tambien este que el rey del norte hay tiene “bien manada cosas.” Y ya sucede gayot se. El Germany y Britain ya habla con uno y otro que quierre sila paz, pero ya dale prueba que imbusterias quel cuando ya principia el guerra del 1914. Y na maga decada antes el 1914, el Germany ya queda el ika-dos de con todo rico nacion na entero mundo.  Despues, ya cumpli el Daniel 11:29 y el primer parte del versiculo 30 cuando el Germany yan contra con el rey del sur pero ya perde.

12. Na primer guerra mundial, cosa ya hace el rey del norte y el rey del sur?

¹² Desde 1914, mas ya agraba el pelea del dos rey y ya ataca tambien sila na maga siervo del Dios. Por ejemplo, del primer guerra mundial, el gobierno del Germany y el gobierno del Britain ya persigui con el maga siervo del Dios, quien no quierre participa na guerra. Y ya cumpli el profecia na Revelacion 11:7-10 cuando el gobierno del United States ya hace preso con aquellos quien ta guia con el trabajo predicacion.

13. Despues del 1930 y durante del Guerra Mundial II, cosa ya hace el rey del norte?

¹³ Despues del 1930, especialmente durante del Guerra Mundial II, el rey del norte ya ataca con el maga siervo del Dios sin lastima. Cuando ya puede controla el Nazi con el Germany, si Hitler y aquellos quien ta suporta con ele ya prohibi con el trabajo del maga siervo del Dios. El rey del norte ya mata maga 1,500 del maga siervo de Jehova y miles el ya pone na maga concentration camp. Ya predicta si Daniel con ese maga suceso. El rey del norte nuay “respeta con el santuario” y ya ‘quita con el ofrecimiento que debe ofrece cada dia’ cuando ya prohibi le con el trabajo predicacion del maga siervo del Dios. (Dan. 11:30b, 31a) El de este lider, si Hitler, ya promete pa gane que mata con el todo siervo del Dios na Germany.

14. Quien ya queda el rey del norte despues del Guerra Mundial II? Explica.

¹⁴ Despues del Guerra Mundial II, el gobierno del Soviet Union ya saca con el grande teritorio del Germany y ya queda el rey del norte. Igual con el maga Nazi, ya persigui tambien el Soviet Union con maskin quien ta hace una na diila vida con el adoranza con el verdadero Dios.

15. Cosa ya hace el rey del norte despues del Guerra Mundial II?

¹⁵ Despues del Guerra Mundial II, el nuevo rey del norte​—el Soviet Union y el maga aliado de este—​ya ataca con el maga siervo del Dios. Uyun na cosa ya habla na Revelacion 12:15-17, este rey ya prohibi con el diaton trabajo predicacion y ya hace destierro con el miles del maga siervo de Jehova. Gane, na ultimo maga dia, el rey del norte ta continua vacia “un rio” de persecucion para hace descanza con el trabajo del maga siervo del Dios. *

16. Paquemodo el Soviet Union ya cumpli con el Daniel 11:37-39?

¹⁶ Le con el Daniel 11:37-39. Como cumplimiento del profecia, el rey del norte nuay “respeta con el Dios del de suyu maga tata.” Na cosa manera? Ciendo el Soviet Union quierre quita con el todo maga religion, ya pricura este quita con el influencia del todo religioso organizacion. Para puede se hace, del 1918, el gobierno de Soviet ya principia hace maga decision que ya causa con el maga escuela para enseña ateismo. Paquemodo este rey del norte ya  ‘dale gloria con el dios del maga fortaleza’? El Soviet Union ya gasta grande cantidad de sen para forma fuerza militar y produci miles de nuclear weapon para queda este mas poderoso. El rey del norte y el rey del sur ya tiene bien manada armas que puede mata billones de gente!

17. Cosa el “maka-asco cosa que ta causa destrozo”?

¹⁷ Maskin pa tarda ya tan contra na uno y otro este dos rey, el rey del norte ya ayuda con el rey del sur na un importante cosa​—ya “pone sila con el maka-asco cosa que ta causa destrozo.” (Dan. 11:31) Ese “maka-asco cosa” amo el United Nations.

18. Porque ya llama con el United Nations como “maka-asco cosa”?

¹⁸ Ya llama con el United Nations como “maka-asco cosa” cay ta clama este que puede lleva paz na entero mundo​—un cosa que el Reino del Dios lang puede hace. Ya habla tambien el profecia que el maka-asco cosa “ta causa destrozo” cay el United Nations hay ataca y destroza con el todo falso religion.​—Mira con el chart “Dos Rey que Tan Contra na Uno y Otro na Tiempo del Fin.”

19-20. (a) Porque kita necesita sabe con este informacion? (b) Cosa pregunta hay contesta na siguiente articulo?

¹⁹ Necesita kita sabe con este informacion cay prueba este que del 1870 hasta 1991, el profecia de Daniel acerca na rey del norte y rey del sur ya cumpli ya. Poreso, puede kita confia que el los demas parte de este profecia hay cumpli tambien.

²⁰ Del 1991, ya bungca el Soviet Union. Entonces, quien el rey del norte ahora? El siguiente articulo hay contesta con ese pregunta.