1. San den polofeititoli aini Beibel e soi u?

SAN o pasa anga a foluku fu Yehofa aini a ten di e kon? Beibel e gi wi a piki. Den polofeititoli aini Beibel e soi u sowtu pelensipali sani o pasa aini a ten di e kon. Wan fu den polofeititoli ya e soi san den moo makiti tiimakiti a goontapu o du. A polofeititoli ya sikiifi aini Daniyeli kapitel 11. Ai taki fu tu kownu di be o go e sitee anga denseefi. Den kownu ya na a kownu fu noord anga a kownu fu zuid. Gaanse fu den sani di sikiifi aini a polofeititoli ya pasa kaba. Neen meke u sa biibi taki den taa pisi fu a polofeititoli ya o pasa tu.

2. Enke fa Genesesi 3:15, Openbaring 11:7 anga 12:17 e soi, da san u mu holi a pakisei te wi o luku a polofeititoli fu Daniyeli?

² Efu u wani fusutan a polofeititoli di sikiifi a Daniyeli kapitel 11, u mu holi wantu sani a pakisei. Wan fu den sani ya a taki den tiiman di a polofeititoli ya e taki, be o tii kondee pe tyaipi sama di e dini Yehofa e tan, efuso kondee pe den e du ogii anga a foluku fu Yehofa. Te i luku den sama di e dini Yehofa anga den sama di de a hii goontapu da den sama di e dini Yehofa ná ipi, tokuso ala yuu a den sama di e dini Yehofa den e fooseli. Saide? A fu di Saatan anga den bakaman fi en wani puu ala den sama di e holibaka gi Yehofa anga Yesesi a pasi. (Leisi Genesesi 3:15 anga Openbaring 11:7; 12:17.) Wan taa sani di u mu holi a pakisei, a taki a polofeititoli  fu Daniyeli mu e kai anga den taa polofeititoli di sikiifi aini a Wowtu fu Gadu. U mu luku taa pisi fu Beibel tu fu man fusutan san a polofeititoli fu Daniyeli wani taki.

3. San wi o luku aini a artikel ya? San wi o luku aini a taa artikel?

³ Wi o luku Daniyeli 11:25-39 aini a artikel ya. Wi o si sama a be a kownu fu noord anga a kownu fu zuid fanafu a yali 1870 te anga a yali 1991. Wi o luku tu saide u be abi fu kengi a fasi fa u be e fusutan son pisi fu a polofeititoli ya. Aini a taa artikel, wi o luku Daniyeli 11:40–12:1. Wi o luku san a pisi fu a polofeititoli ya e taki fu a pisiten fu a yali 1991 te anga Alimakedon. Te yu e sutudeli den tu artikel ya, i sa luku a faki „Den kownu di e sitee anga denseefi na a ten fu a kaba”. Ma wi o luku fosi sama a den tu kownu di a polofeititoli ya e taki.

4. Sowtu dii sani o yeepi u fu sabi sama na a kownu fu noord anga a kownu fu zuid?

⁴ Aini a ten fu Islayeli, a den kownu di be de na a noord anga zuid se fu Islayeli a be „a kownu fu noord” anga „a kownu fu zuid”. Saide u taki a sani ya? Bika a engel be taigi Daniyeli taki: „Mi kon fu yeepi i fu fusutan san o pasa anga a foluku fi i na a kaba pisi fu den lasiti dei” (Dan. 10:14). Fosi a Pinksterfesa fu a yali 33, a den Islayelisama a be a foluku fu Gadu. Ma fanafu a Pinksterfesa fu a yali 33, Yehofa soi kiin taki a den bakaman fu Yesesi a be a foluku fi en. Neen meke a ná fu a foluku Islayeli gaanse fu a polofeititoli di sikiifi a Daniyeli kapitel 11 e taki, ma a den bakaman fu Kelestesi (Toli 2:1-4; Rom. 9:6-8; Gal. 6:15, 16). Winsi fa a omen tiiman toon a kownu fu noord anga a kownu fu zuid aini den ten di pasa, tokuso ala den du wantu sani aseefi fasi. A fosi sani, a taki ala den tiiman ya be e tii kondee pe tyaipi sama di e dini Yehofa e tan, efuso kondee pe lanti e du ogii anga a foluku fu Yehofa. Du fu tu sani, a taki a fasi fa den be e libi anga a foluku fu Gadu be e soi taki den e buuse a tuu Gadu, Yehofa. Du fu dii sani, a taki den tu kownu ya be e sitee anga denseefi.

5. Wan kownu fu noord anga wan kownu fu zuid be de na a pisiten fu a yali 100 te anga a yali 1870?

⁵ Baka a yali 100, a omen falisi Kelesten be kon aini a kemeente. Den Kelesten ya be e paati omen falisi leli di be e buuya sama. Sama á be sabi san a den tuu leli fu Gadu Wowtu moo. Fanafu a ten de te anga a yali 1870, Yehofa á be abi wan olikanisâsi a goontapu. Den falisi Kelesten be e kon moo ipi, leti enke fa uwii e goo tapu wan goon. Neen meke sama á be sabi moo sama a den tuu Kelesten (Mat. 13:36-43). Saide a pelensipali fu sabi a sani ya? Bika fanafu a pisiten fu a yali 100 te anga a yali 1870, kownu fu noord anga kownu fu zuid á be de. Den á be poi du ogii anga a foluku fu Gadu, bika Yehofa á be abi wan olikanisâsi a goontapu a pisiten de. * Ma  baka a yali 1870, wan nyun kownu fu noord anga wan nyun kownu fu zuid be kon baka. Fa u du sabi a sani ya?

6. Fanafu on ten Gadu be abi wan olikanisâsi a goontapu baka?

⁶ Fanafu a yali 1870, Gadu be abi wan olikanisâsi a goontapu baka. Aini a yali ya Charles T. Russell anga wantu taa sama bigin sutudeli Beibel makandaa. A Baala Russell anga den sama ya na a bosikopuman di be e „seeka a pasi” fosi a Mesiyas Kownukondee sete (Male. 3:1). Gadu be abi wan foluku a goontapu baka di be e dini en enke fa a wani. Ma tiimakiti be de na a ten de di be e libi ogii anga a foluku fu Gadu? Wi o luku a toli ya aini den paragraaf di e kon.

7. Sama a be a kownu fu zuid te anga a yali 1917?

⁷ Aini a yali 1870, a omen kondee be de a Ingiisikondee ondoo. Den suudati fu den be taanga moo ala den taa kondee. A polofeititoli fu Daniyeli e taki fu wan pikin tutu di puu dii taa tutu a den peesi. A pikin tutu a Ingiisikondee. Den dii tutu di a puu a den peesi, a Faansikondee, Sipanyookondee anga Bakaakondee (Dan. 7:7, 8). Ingiisikondee a be a kownu fu zuid te anga a yali 1917. Na a ten de Ameekankondee be toon a moo gudu kondee a hii goontapu, neen a bigin wooko makandaa anga Ingiisikondee.

8. Sama na a kownu fu zuid fanafu di den lasiti dei bigin?

⁸ Ameekankondee anga Ingiisikondee be e wooko makandii na a ten fu a Fosi Goontapu Feti. Den tu kondee ya be abi tyaipi makiti. Di Ingiisikondee  anga Ameekankondee bigin wooko makandaa, den toon a kownu fu zuid. * Leti enke fa Daniyeli be taki, da a kownu fu zuid be abi wan „gaan kulu suudati” (Dan. 11:25). Ma sama a be a kownu fu noord?

9. On ten wan taa tiimakiti toon a kownu fu noord? Fa Daniyeli 11:25 kon tuu?

⁹ Aini a yali 1871, wan taa tiimakiti be toon a kownu fu noord. A sani ya pasa wan yali baka di Baala Russell anga wantu taa sama bigin sutudeli Beibel. Doisilikondee be toon a kownu fu noord. A yali de, a omen kondee aini Europa kon a wan fu holibaka gi Doisilikondee. Bakaten a omen kondee aini Afiikan anga kondee di be de na a pisi fu a Gaan Oseyaniya be de a Doisilikondee ondoo. Doisilikondee be wani abi makiti moo Ingiisikondee. (Leisi Daniyeli 11:25.) Doisilikondee be kon abi wan gaan kulu suudati. Baka Ingiisikondee a Doisilikondee be abi den moo bun suudati. Anga a gaan kulu suudati ya Doisilikondee feti anga den feyanti fi en na a Fosi Goontapu Feti.

10. Fa Daniyeli 11:25b, 26 kon tuu?

¹⁰ Daniyeli be taki san be o pasa anga Doisilikondee anga den suudati fi en. A polofeititoli e soi taki a kownu fu noord á be „o man wini”. Saide? „Bika sama o meke mofu fu du ogii anga en. A denseefi sama di e nyan a switi nyanyan fi en o kii en” (Dan. 11:25b, 26a). A ten fu Daniyeli, wantu fu den sama di be e nyan „a switi nyanyan” fu a kownu, a den sama di be e „wooko gi a kownu” (Dan. 1:5). Sama a polofeititoli ya e taki? Den sama ya, a den bigiman fu Doisilikondee anga den suudati-edeman di be e wooko gi a kownu. Den sama ya meke a kownu lasi a makiti fi en, neen den sete wan nyun tiimakiti a Doisilikondee. * A polofeititoli be taki tu taki a kownu fu zuid be o wini den. A polofeititoli be taki fu a kownu fu noord taki: „Den o wai den suudati fi en puu enke fa fuudu e wai sani puu neen pasi” (Dan. 11:26b). Doisilikondee be lasi a Fosi Goontapu Feti, leti enke fa a polofeititoli e soi. A omen sama dede tu. Sama dede aini a feti ya moo ala den taa feti di be pasa a fesi.

11. Enke fa Daniyeli 11:27-30 e soi, da san a kownu fu noord anga a kownu fu zuid du?

¹¹ Daniyeli 11:27, 28 e soi san pasa fosi a Fosi Goontapu Feti bigin. A polofeititoli e soi taki a kownu fu noord anga a kownu fu zuid be ’o sidon a tafaa fu kengi pakisei, ma a soso koli den be o go e koli denseefi’. Boiti dati, a taki a kownu fu noord be o kon abi „tyaipi gudu”. A so sani waka tu. Doisilikondee anga Ingiisikondee be taki den wani libi na a wan. Ma aini a yali 1914 den bigin feti anga denseefi. A sani ya e soi taki a koli den be e koli denseefi. Aini den yali fosi 1914, Doisilikondee be toon du fu tu moo gudu kondee a goontapu. Enke fa Daniyeli 11:29 anga a bigin pisi fu vers 30 e soi, da a kownu fu zuid wini Doisilikondee.

12. San a Kownu fu noord anga a kownu fu zuid be du na a Fosi Goontapu Feti?

¹² Fanafu 1914, a feti di den tu kownu e feti anga denseefi kon moo ogii. Den e moo du ogii anga a foluku fu Gadu tu. Aini a Fosi Goontapu Feti, den tiiman fu Doisilikondee anga den tiiman fu Ingiisikondee be e du ogii anga a foluku fu Gadu fu di den á be wani feti aini oloku. Boiti dati, Ameekankondee be poti den baala di be e tii a peleikiwooko a sitaafu-osu, enke fa Openbaring 11:7-10 be taki a fesi.

13. San a kownu fu noord du fanafu a yali 1933 anga a ten fu a Du Fu Tu Goontapu Feti?

¹³ Fanafu a yali 1933, a kownu fu noord bigin du omen ogii anga a foluku fu Gadu, moomoo aini a ten fu a Du Fu Tu Goontapu Feti. Di den Nazisama bigin tii Doisilikondee, Hitler anga den bakaman fi en tapu a wooko fu a foluku fu Gadu. A wan sani fu 1500 Kotoigi den kii. Den poti dunsudunsu a sitaafuman kampu. Daniyeli be taki a fesi taki a sani ya be o pasa. A kownu fu noord be tapu a peleikiwooko. A so a ’tyobo a santa peesi’, neen a puu a ofaandi di den be mu tyai gi Gadu ala dei’ (Dan. 11:30b, 31a). Hitler, a tiiman fu Doisilikondee be sweli taki a be o kii ala den Kotoigi di be de a Doisilikondee.

14. Sama be toon a kownu fu noord baka a Du Fu Tu Goontapu Feti?

¹⁴ Baka a Du Fu Tu Goontapu Feti, Soviyet Unie be bigin tii omen fu den kondee di Doisilikondee be e tii fosi. Leti enke fa den Nazisama be e du ogii anga a foluku fu Gadu, a so Soviyet Unie anga ala den kondee di be e holibaka gi en bigin du ogii anga den sama di be e dini a tuu Gadu anga den hii ati. Di den du a sani ya, neen den toon a kownu fu noord.

15. San a kownu fu noord du baka a Du Fu Tu Goontapu Feti?

¹⁵ Baka a Du Fu Tu Goontapu Feti, Soviyet Unie anga den kondee di be e holibaka gi en bigin du ogii anga a foluku fu Gadu. Openbaring 12:15-17 e ageisi den ogii di den du anga a foluku fu Gadu anga wan „liba”. A kownu fu noord tapu a peleikiwooko, leti enke fa a polofeititoli be taki. A dwengi dunsudunsu Kotoigi tu fu go a Siberiya enke sitaafuman. A sani ya e soi taki fanafu di den lasiti dei bigin, neen a kownu fu noord e du ogii anga a foluku fu Gadu. Ma noiti a be poi tapu den fu du a peleikiwooko. *

16. Fa Soviyet Unie du san sikiifi a Daniyeli 11:37-39?

¹⁶ Leisi Daniyeli 11:37-39. A polofeititoli ya e soi taki a kownu fu noord á be o „abi lesipeki gi a Gadu fu den afo fi en”. Fa a kownu fu noord soi taki a á be abi lesipeki gi a Gadu fu den afo fi en? Soviyet Unie á be wani yee sani fu keliki aini a kondee. Den be wani den keliki di be de aini a kondee senten kaba lasi den makiti. Fa den du a sani ya? Aini 1918, den sete sani fu leli pikin a sikoo taki Gadu á de. Fa a kownu fu noord „gi a gadu fu den kibiipeesi gaandi”? A omen moni Soviyet Unie koboloiki fu kon abi  tyaipi suudati. A meke dunsudunsu fetisani tu di sa kii tyaipi sama. Den du a sani ya fu di den be wani abi tyaipi makiti a goontapu. A kownu fu noord anga a kownu fu zuid be kon abi fetisani di be sa kii miliyunmiliyun sama!

17. San na a „fa ná fiti sani di e tyai ogii kon”?

¹⁷ A kownu fu noord anga a kownu fu zuid wooko makandaa fu du wan pelensipali sani. Den tu kownu ya „sete a fa ná fiti sani di e tyai ogii kon” (Dan. 11:31). A „fa ná fiti sani” ya, a den Verenigde Naties.

18. Saide Beibel e kai den Verenigde Naties wan „fa ná fiti sani di e tyai ogii kon”?

¹⁸ Beibel e kai a olikanisâsi fu den Verenigde Naties wan „fa ná fiti sani”, bika den taki den o tyai freide kon. Ma a lei den e lei, bika na a Kownukondee fu Gadu wawan poi du a sani ya. A polofeititoli e soi tu taki a ’fa ná fiti sani e tyai ogii kon’, bika den Verenigde Naties o go feti anga den falisi keliki. A den o poli ala den falisi keliki.​—Luku a faki „Den kownu di e sitee anga denseefi na a ten fu a kaba”.

19-20. (a) Saide u mu sabi den sani di u luku aini a artikel ya? (b) Sowtu akisi wi o luku aini a taa artikel?

¹⁹ Den sani di u luku ya e soi taki fanafu 1870 te anga 1991, a polofeititoli fu Daniyeli di e taki fu a kownu fu noord anga a kownu fu zuid kon tuu. Neen meke u sa biibi taki a taa pisi fu a polofeititoli seefi o kon tuu.

²⁰ Soviyet Unie lasi en makiti aini a yali 1991. Da sama na a kownu fu noord aini a ten ya? A taa artikel o piki a akisi ya.