1. Obuminyereri bwe Biblia bukaleka ithwaminyaki?

NI BYAHI ebikisiya ibyahika okwa bandu ba Yehova? Thwanganaminya eky’erisubirya. Amaminyereri we Biblia akaleka ithwathoka eriyitheghererya ebindu bikulhu-bikulhu ebikayathuhambako ithwe bosi. Hane obuminyereri bughuma obukaleka ithwalhangira ebya syogavumente sy’amaaka okwa kihugho sikendi kolha. Obuminyereri obo, obuli omu Danieli sura 11, bukakanaya okwa mathabali abiri awakalhwa, omwami w’elhuthambi lhw’endatha n’omwami w’elhuthambi lhw’eyikwa. Ekitsweka kinene eky’okwa buminyereri obo kyabiribererera, neryo thwangana yikethera ngoku n’ekindi kitsweka kikendi bererera.

2. Ngoku kikanganibwe omwa Enzuko 3:15 na Eribisulirwa 11:7 na 12:17, ni byahi ebya thutholere ithwabya ithun’ibukire thuk’igha obuminyereri bwa Danieli?

² Eriyitheghererya obuminyereri obuli omu Danieli sura 11, thutholere ithwabya ithun’ibukire ngoku bukakanaya lisa okwa bathabali n’esyogavumente ababirikolha nabi abandu ba Nyamuhanga. Kandi nomwakine indi abaghombe ba Nyamuhanga ni bake omwa kihugho, mughulhu mungyi esyogavumente sikabatsogherera. Busana naki? Kundi Sitani n’ekihugho kiwe bawithe ekilhubirirwa kighuma​—erighunzaho abakakolera Yehova na Yesu. (Soma Enzuko 3:15 na Eribisulirwa 11:7; 12:17.) Kandi, obuminyereri obuli omu Danieli butholere ibwahambangana n’awandi maminyereri awali omwa Kinywe kya Nyamuhanga. Erithwalira haghuma, ithukendi yitheghererya ndeke obuminyereri obuli omu Danieli ithunalyabulinganisaya n’awandi Masako.

3. Omo mwatsi ono n’owakakwamako thukendi kania okuki?

 ³ Ebyo bine omwa bulengekania, thukayakanaya okwa biri omu Danieli 11:25-39. Thukendi minya omwami w’elhuthambi lhw’endatha n’omwami w’elhuthambi lhw’eyikwa nga babya bahi omwa 1870 erihika 1991, kandi ithwalhangira ekikaleka ikyabya ikitholere erihindulha eriyitheghererya lyethu ery’ekitsweka ky’okwa buminyereri obu. Omo mwatsi owakakwamako, thukendi syakania okwa biri omu Danieli 11:40–12:1, n’erithasyongera eriyitheghererya ndeke ekitsweka ky’obuminyereri ekyo nga kikabisulhaki okwa buthuku obw’eritsuka 1990 erihika okwa lhuhi lhwe Harmagedoni. Wuk’igha emyatsi ibiri eyi, wutholere eribya iwunemulebya okwa chati eya “Abami Abawitheneko Obuyighu Omwa Mughulhu w’Enduli.” Erimbere, thutholere ithwatsuka eriminya abami babiri abali omwa buminyereri obu.

4. Ni bindu byahi bisathu ebyanga thuwathikya eriminya omwami w’elhuthambi lhw’endatha n’omwami w’elhuthambi lhw’eyikwa?

⁴ Ekinywe “omwami w’elhuthambi lhw’endatha” mukyakolesibwa erimanyisya omuthabali w’ebitsweka by’endatha we Israeli na “omwami w’elhuthambi lhw’eyikwa” erimanyisya omuthabali w’ebitsweka by’eyikwa. Busana naki ithwabugha thuthya? Lebaya ekya omumalaika oyuwalethera Danieli y’omwatsi abugha: ‘Nabirihika erikuminyisya ebikendi syahika oko bandu bawu omwa biro by’enyuma.’ (Dan. 10:14) Ekihanda kye Israeli babya ibakine bandu ba Nyamuhanga erihika okwa Pentekote 33 E.K. Aliwe eritsuka-tsukana n’aho, Yehova mwakikangania ndeke-ndeke ngoku abigha ba Yesu abathaleghulha b’abandu biwe. Neryo, ebingyi ebiri omwa buminyereri obuli omu Danieli sura 11 si bihambire okwa Israeli y’omubiri, aliwe bihambire okwa bigha ba Kristo. (Emib. 2:1-4; Abar. 9:6-8; Gal. 6:15, 16) Kandi omwami w’elhuthambi lhw’endatha n’omwami w’elhuthambi lhw’eyikwa mwathabya mughumerera. Nomwabine, abami aba ibanawithe ebyo basosenemo. Eky’erimbere, abami mubendererya abandu ba Nyamuhanga. Ekyakabiri, emibere bathwaliramu abandu ba Nyamuhanga mukyakangania ku baponire Nyamuhanga w’okwenene, Yehova. N’ekyakasathu, abami babiri abo mubalhwira eribya n’obuthoki.

5. Mbwino thwangana minyerera omwami w’elhuthambi lhw’endatha n’omwami w’elhuthambi lhw’eyikwa eritsuka omwaka 100 erihika 1870? Soborera.

⁵ Okwa buthuku bulebe omwa kighana kyakabiri E.K., Abakristayo ab’amabehi mubatsuka eringira omwa kithunga ky’Abakristayo ab’okwenene, bamatsuka erikangirirya esyongangirirya sy’ekikafiri n’eribisa ekwenene eyiri omwa Kinywe kya Nyamuhanga. Eritsuka okwa buthuku obo erihika okw’ihwererera ly’ekighana kya 19, okwa kihugho kw’abya isikukiri ekithunga ky’abaghombe ba Nyamuhanga ekiyithondekenie. Abakristayo b’amabehi mubakulha-kulha ng’ebithi neryo mukyakalha eriminya Abakristayo b’ekwenene nga babahi. (Mt. 13:36-43) Busana naki ni kikulhu eriminya ekyo? Kundi kikakanganaya ngoku ebya thukasoma oko mwami w’elhuthambi lhw’endatha n’omwami w’elhuthambi lhw’eyikwa sibirikanaya okwa bathabali kutse esyogavumente esyabyaho ahakathi-kathi k’omwaka 100 na 1870. Sihabya abandu ba Nyamuhanga abali kithunga abo esyogavumente syangabambira. * Aliwe, enyuma wa 1870, omwami w’elhuthambi lhw’endatha n’ow’elhuthambi lhw’eyikwa mubathasyabanika. Thukaminya ekyo kya thuthi?

6. Ni buthuku bwahi obo abandu ba Nyamuhanga bangabereho kandi? Soborera.

 ⁶ Eritsuka 1870, abandu ba Nyamuhanga mubatsuka eriyithondekania ng’egurupu. Oyo w’omwaka ogho Charles T. Russell n’abandi batsukiramo erigha e Biblia. Mughalha wethu Russell n’abanywani biwe bababya bakolire ng’omukwenda ‘oyuwuwanaya enzira’ Obwami bw’Ekimasiya buthe bwatsuka. (Mal. 3:1) Muhabya ihamathasyabanika egurupu y’abandu abakaramaya Yehova omo nzira eyitholere! Mbwino hanabya esyogavumente sy’amaaka esyang’endererye abaghombe ba Nyamuhanga? Thulebaye.

7. Nindi oyuwabya mwami w’elhuthambi lhw’eyikwa erihika buthuku bulebe omwa Lhuhi lhw’Ekihugho Kyosi Olhw’Erimbere?

⁷ Ah’omwaka wa 1870 ahikira, e Bwengereza yabya iy’eyamabiribya iyithabere emyanya mingyi kwilhaba ekindi kihugho kyosi-kyosi, kandi iy’eyiwithe amahe awakalire kutsibu. Obuthabali obo bw’obukasosekanibawa ng’erihembe erike eryakinda awandi mahembe asathu​—France, Spain, ne Netherlands. (Dan. 7:7, 8) Kandi e Bwengereza y’eyabya yabere mwami w’elhuthambi lhw’eyikwa erihika buthuku bulebe omwa Lhuhi lhw’Ekihugho Kyosi Olhw’Erimbere. Okwa buthuku ibwan’obo, e Amerika muyabya nyigaga omwa kihugho kyosi kandi muyatsuka erinywana e Bwengereza.

8. Omwa biro by’enyuma-nyuma, omwami w’elhuthambi lhw’eyikwa nindi?

⁸ Omwa Lhuhi lhw’Ekihugho Kyosi olhw’Erimbere, e Amerika ne Bwengereza mubyayiyunga haghuma eribya mahe awakalire kutsibu. Okwa buthuku obo, e Bwengereza ne Amerika by’ebyabya byabere Buthabali bw’Ekihugho Kyosi obwe Anglo-America. Ngoku Danieli anakanganaya omwa buminyereri, omwami oyu abya awithe “omulhondo w’amalhwa omunene n’ow’amaaka.” (Dan. 11:25) Omwa biro by’enyuma-nyuma, e Anglo-America y’omwami  w’elhuthambi lhw’eyikwa. * Neryo kwesi, omwami w’elhuthambi lhw’endatha nindi?

9. Omwami muhyaka ow’elhuthambi lhw’endatha abanika mughulhu wahi, kandi Danieli 11:25 muhabererera hathi?

⁹ Omwa 1871, ihamabirilhaba omwaka Russell n’abanywani biwe balitsukisirye egurupu ey’abigha be Biblia, muhabanika omwami muhyaka ow’elhuthambi lhw’endatha. Omwaka oyo ya Otto von Bismarck mwawathikya erihira emyanya mingyi omwa bughuma neryo hamabya obuthabali bw’amaaka obwa Germany. Omwami we Prussia ya Wilhelm ow’Erimbere yuwabya muthabali mukulhu wabu ow’erimbere, neryo amasombolha Bismarck eribya mukulhu w’egavumente ow’erimbere. * Emyaka eyakwamako, e Germany muyathabalha okwa bihugho by’omwa Afirika n’ebiri omwa Pasifiki Ocean, kandi muyatsuka eribya n’amaaka kwilhaba e Bwengereza. (Soma Danieli 11:25.) Obuthabali bunene bwe Germany mubwathunga amahe awakalire, bwamabya bwakabiri omwa kihugho kyosi omwa by’amahe. Omwa Lhuhi lhw’Ekihugho Kyosi olhw’Erimbere, e Germany muyakolesya amahe ayo erilhwa n’esyonzighu syayu.

10. Danieli 11:25b, 26 muhabererera hathi?

¹⁰ Kandi Danieli mwabugha ekyangahikire okwa Buthabali bunene bwe Germany n’amahe agho bwabya ibwabirithunga. Obuminyereri bukabugha buthi omwami w’elhuthambi lhw’endatha “syendisyahangana.” Busana naki? “Kusangwa basyamusohera n’amenge. Kandi abakalya akalyo kabuya haghuma nayu oko meza basyamuherya.” (Dan. 11:25b, 26a) Kera omwa buthuku bwa Danieli, ababya bakalya okwa “bisi-bisi by’omwami” mwabya abanya-mwami ababya “bakahangana embere sy’omwami.” (Dan. 1:5) Hano obuminyereri bukakanaya oku bahi? Bukakanaya okwa bakulhu-bakulhu omwa Buthabali bunene bwe Germany​—imwamuli abakamanda n’abahani b’amahe b’omuthabali mukulhu​—abaleka obuthabali obo ibwawa. * Obuminyereri mubuthasubulira okw’ikania okw’iwa ly’obuthabali obo aliwe kandi mubwakania n’okwa byanga lhwiririre omw’ilhwa n’omwami w’elhuthambi lhw’eyikwa. Omwa buminyereri omwami w’elhuthambi lhw’endatha akakanibawako bino: “Emilhondo yiwe yasyalhusibwaho, nikwa abangyi basyawa n’erikwa omo malhwa.” (Dan. 11:26b) Ngoku kyanabughawa, omwa lhuhi lhw’ekihugho kyosi olhw’erimbere, amahe we Germany ‘mwalhusibwaho’ n’abangyi mub’ithibwa. Habya isihali hathabya olhundi lhuhi olhwakwiramo abandu bangaha n’abakwiramu.

11. Omwami w’elhuthambi lhw’endatha n’omwami w’elhuthambi lhw’eyikwa mubakolhaki?

¹¹ Danieli 11:27, 28 hakabya hakakania okwa buthuku obwakolhaya okwa Lhuhi lhw’Ekihugho Kyosi olhw’Erimbere, hakabugha hathi omwami w’elhuthambi lhw’endatha n’omwami w’elhuthambi lhw’eyikwa “basy’ikalha oko meza ibanemubihirana.” Hakathasyabugha hathi omwami w’elhuthambi lhw’endatha asyabya “n’obusoki bunene,” kutse ebindu binene kutsibu. Kandi eki ky’ekyanabya kyabere. E Germany ne Bwengereza mubabwirana bathi bakasondaya obuholho, aliwe ebi mubyalhangirika ku ni mabehi hakabya olhuhi omwa 1914. Kandi myaka mingyi omwaka wa 1914 athali ahika, e Germany muyabya nyigaga kutsibu, yamabya  yakabiri omwa bugaga omwa kihugho kyosi. Neryo Danieli 11:29 n’ekitsweka ky’erimbere eky’omulhondo 30 muhabererera e Germany yikalhwa n’omwami w’elhuthambi lhw’eyikwa aliwe yamakindwa.

12. Omwa lhuhi lhw’ekihugho kyosi olhw’erimbere, omwami w’elhuthambi lhw’endatha n’omwami w’elhuthambi lhw’eyikwa mubakolhaki?

¹² Eritsuka 1914 erilholya embere, abami babiri abo babiryongera erilhwa ibo basana-basa n’erilhwa n’abandu ba Nyamuhanga. Ng’eky’erileberyako, olhuhi lhw’ekihugho kyosi olhw’erimbere, egavumente eye Germany n’eye Bwengereza musy’endererya abaghombe ba Nyamuhanga, abaghana eringira omwa by’amahe. N’egavumente ye Amerika muyahira ababya bakasondolha omubiiri w’erithulira omwa ngomo. Eriendereribwa eri mulyaberererya obuminyereri obuli omwa Eribisulirwa 11:7-10.

13. Omo myaka ya 1930 n’omwa lhuhi olhw’ekihugho kyosi olhwakabiri, omwami w’elhuthambi lhw’endatha mwakolhaki?

¹³ Neryo omo myaka eya 1930 na kwilhabirirya omo lhuhi lhw’ekihugho kyosi olhwakabiri, omwami w’elhuthambi lhw’endatha mwanubya kutsibu abandu ba Nyamuhanga. Ekyama kye Nazi kyabere kikathabalha e Germany, Hitler n’abandu biwe mubahira okwa mubiiri w’abandu ba Nyamuhanga kw’olhukako. Abahakani mubitha abandu ba Yehova bangyi n’erihira abandi omwa kampu y’abanya ngomo. Danieli abya iniabirikania oko myatsi eyo. Omwami w’elhuthambi lhw’endatha mwathoka “eritsandya ahakongothere ahabuyirire, n’erilhusya obuhere bw’ebiro byosi” omw’ikakirya kutsibu obwiranda bw’abaghombe ba Nyamuhanga obw’eripipa erina lya Yehova. (Dan. 11:30b, 31a) Hitler, omuthabali wabu, mwalhahirya athi akendi ghunza abandu ba Nyamuhanga b’omwa Germany.

14. Nindi oyuwabya wabere mwami w’elhuthambi lhw’endatha enyuma w’olhuhi lhw’ekihugho kyosi olhwakabiri? Soborera.

¹⁴ Enyuma w’olhuhi olhw’ekihugho kyosi olhwakabiri, e Soviet Union muyabya mwami w’elhuthambi lhw’endatha n’eritsuka erithabalha emyanya eyo yalhusaya oko Germany. Eribya ng’egavumente ye Nazi eyabya yikalire kutsibu, e Soviet Union muyendererya kutsibu abosi ababya bakahira eriramya lya Nyamuhanga w’okwenene ly’embere omwa ngebe syabu.

15. Omwami w’elhuthambi lhw’endatha mwakolhaki enyuma w’Olhuhi lhw’Ekihugho kyosi Olhwakabiri?

¹⁵ Olhuhi lhw’Ekihugho Kyosi Olhwakabiri imulhwanamahwa, omwami muhyaka ow’elhuthambi lhw’endatha, e Soviet Union n’abakasighikayo, nabu mubabambira abandu ba Nyamuhanga. Erikwamana n’obuminyereri obuli omwa Eribisulirwa 12:15-17, omwami oyu mwahira okwa mubiiri w’erithulira kw’olhukako n’erithwalha abandu ba Yehova bangyi omwa bunyewa. Omwa biro by’enyuma-nyuma, omwami w’elhuthambi lhw’endatha abiryuthulha “olhusi” lhw’eriendererya akanza erimania omubiiri w’abandu ba Nyamuhanga nomwakine indi syali athathoka. *

16. E Soviet Union muyaberererya yithi ebiri omu Danieli 11:37-39?

¹⁶ Soma Danieli 11:37-39. Omw’iberererya obuminyereri obo, omwami w’elhuthambi lhw’endatha mwathatsomana Nyamuhanga w’abathatha wiwe. Athi? E Soviet Union muyanza erighunzaho amadini neryo yamalengaho erighunza kugho kw’obuthoki bwagho. Erithoka ekyo, omwa 1918, egavumente ye Soviet muyaha ekihamulho ekyaleka ihabya erisomesya omwa masukuru engangirirya y’eribugha indi  sihali Nyamuhanga. Omwami w’elhuthambi lhw’endatha oyu mwasikya athi “nyamuhanga w’ahakongothere”? E Soviet Union muyakolesya esyosente nene eriyikolera amahe aw’amaaka manene n’erihulhukya esyombundu nyingyi esy’obutwa. Erighunzerera omwami w’elhuthambi lhw’endatha n’omwami w’elhuthambi lhw’eyikwa mubathunga ebyuma by’amalhwa ebikalha-kalire ebikaghunza ebyang’itha abandu bangyi!

17. “Enye y’eriherya” niki?

¹⁷ Omwami w’elhuthambi lhw’endatha mwasighika omwami w’elhuthambi lhw’eyikwa erikolha kindu kighuma ekikulhu; ‘mubahangania enye y’eriherya.’ (Dan. 11:31) “Enye” eyo bw’Obughuma bw’Ebihanda (UN).

18. Busana naki Obughuma bw’Ebihanda bukakanibawako ng’enye?

¹⁸ Obughuma bw’Ebihanda (UN) bukakanibawako ‘ng’enye y’eriherya’ kundi bukabugha buthi bwangana thoka erikolha ekindu ekya Bwami bwa Nyamuhanga busa bwanga kolha​—eriletha obuholho omwa kihugho. Kandi obuminyereri bukabugha buthi enye ‘yikaheraya’ kundi ebihugho ebikasighika Obughuma bw’Ebihanda bikendi syabambira n’erithoghothya amadini wosi w’amabehi.​—Lebaya echati “Abami Abawitheneko Obuyighu Omwa Mughulhu w’Enduli.”

19-20. (a) Busana naki thutholere ithwaminya emyatsi eyi? (b) Ni kibulyo kyahi ekyo thukendi syasubirya omo mwatsi owakakwamako?

¹⁹ Thutholere ithwaminya emyatsi eyi kundi yikakanganaya ngoku eritsuka emyaka eya 1870 erihika okw’itsuka ery’eya 1990, obuminyereri bwa Danieli obuhambire oko mwami w’elhuthambi lhw’endatha n’omwami w’elhuthambi lhw’eyikwa bwabiribererera. Neryo thwangana yikethera ngoku ekitsweka ky’obuminyereri obo nakyo kikendi syabererera.

²⁰ Omwa 1991, e Soviet Union muyawa. Neryo munabwire omwami w’elhuthambi lhw’endatha nindi? Omwatsi owakakwamako akasubiraya ekibulyo ekyo.