CHIHANDE CHAKULINANGULA 19
Veya Vanemanyinangako “Mwangana waKunote” muMakumbi Akukuminyina?
“Hamakumbi akukuminyina mwangana wakusulo mwakalipika [namwangana wakunote].”—NDANYE. 11:40.
MWASO 150 Tondenunga Kalunga Mangana Mukayovoke
VYUMA NATUSHIMUTWILA *
1. Uno upolofweto wamuMbimbiliya watukafwa tutachikize vyuma muka?
VYUMA muka navikasoloka kuli vatu jaYehova kulutwe? Upolofweto wamuMbimbiliya watulweza vyuma navikasoloka vize navikakwata hali etu tuvosena. Upolofweto umwe watulweza vyuma najikalinga jifulumende jimwe jangolo chikuma. Mujimbu wamumukanda waNdanyele kapetulu 11, wahanjika hali mwangana wakunote namwangana wakusulo vaze kavalivwasanako. Chihanda chachinene chaupolofweto kana chinatesamo lyehi, ngocho twafwelela ngwetu nachihanda chinasaleko nachikatesamo chikupu.
2. Kweseka naKuputuka 3:15 naKusoloka 11:7 na 12:17, vyuma maka twatela kutachikiza omu natulinangula upolofweto waNdanyele?
2 Hakusaka tutachikize kanawa upolofweto wamumukanda waNdanyele kapetulu 11, twatela kutachikiza ngwetu upolofweto kana wahanjika kaha hali vaka-kuyula najifulumende jize jayulilenga mafuchi aze apwilenga navatu jaKalunga vavavulu, chipwe jize jinavayanjisanga. Numba tuhu vatu jaKalunga vapwa vavandende chikuma hakuvesekesa kukuvula chavatu vosena mukaye, oloze veji kuvafumbukilanga. Mwomwo ika? Mwomwo Satana nakaye kenyi vafwila kufungulula vosena vaze veji kuzachilanga Yehova naYesu. (Tangenu Kuputuka 3:15 naKusoloka 11:7; 12:17.) Kaha nawa upolofweto asonekele Ndanyele watela kulitombola naupolofweto weka wamuMazu aKalunga. Shikaho, hakusaka twivwishise upolofweto kana, kuvanga tuwesekese kuVisoneka vyeka.
3. Vyuma muka natushimutwila muchihande chino nechi nachikavangizaho?
3 Natushimutwila jino chisoneka chaNdanyele 11:25-39. Natumona vemanyinyineko mwangana wakunote namwangana wakusulo kufuma mu 1870 nakuheta mu 1991, novyo chinapwila chakutamo kwalumunako ulumbunwiso wachihanda chimwe chaupolofweto kana. Kaha muchihande chinakavangizaho natukashimutwila chisoneka chaNdanyele 11:40–12:1, nakwalumunako ulumbunwiso wachihanda chaupolofweto kana kufuma mu 1991 swi nakuAlamangetone. Kaha omu namulinangula vihande vino vivali, talenu nawa chati yakwamba ngwavo “Vamyangana Vavali VamuMakumbi aKukuminyina.” Tuvangilenu kushimutwila tutachikize ava vamyangana vavali vavuluka muupolofweto kana.
KUTACHIKIZA MWANGANA WAKUNOTE NAMWANGANA WAKUSULO
4. Vyuma muka vitatu vize twatela kukekesa numba tutachikize kanawa mwangana wakunote namwangana wakusulo?
4 Hakavanga, “mwangana wakunote” “[na]mwangana wakusulo” vapwile vaka-kuyula vaze vapwile kunote nakusulo yalifuchi lyaIsalele. Mwomwo ika tunahanjikila ngocho? Talenu mazu ahanjikile kangelo kuli Ndanyele. Ambile ngwenyi: “Nguneza nakukulweza vyuma navikasolokela vatu jove [vatu jaKalunga] kumakumbi akukuminyina.” (Ndanye. 10:14) VaIsalele vakiko vapwile vatu jaKalunga swi namumwaka wa 33 C.E., haPendekoseta. Yehova asolwele hatoma ngwenyi kufuma haze jino, tumbaji twaYesu vakushishika vakiko vapwile vatu jenyi. Shikaho, upolofweto wahali Ndanyele kapetulu 11 kawahanjika hali vaIsaleleko oloze hali vaka-Kulishitu. (Vili. 2:1-4; Loma 9:6-8; Ngale. 6:15, 16) Kaha mukuhita chalwola, mwangana wakunote namwangana wakusulo vanapunga nakwalumuka-alumuka. Chipwe ngocho, kuliko vyuma vize kavyalumukilengako. Chatete, vamyangana kana vanayanjisanga vatu jaKalunga chipwe kuyula mafuchi aze vatwaminenga vatu jaKalunga vavavulu. Chamuchivali, vyuma vanalinginga vamyangana kana kuvatu jaKalunga vyasolola hatoma nge vahunga Kalunga wamuchano Yehova. Kaha chamuchitatu, ava vamyangana vavali vanalizungisanga hakufwila ulemu.
5. Uno mwangana wakunote namwangana wakusulo kuvapwile kuputuka mumwaka wa 100 C.E. nakuheta mu 1870 tahi? Lumbununenu.
5 Kufuma kafwe mumwaka wa 100 C.E. nakuheta mu 200 C.E., muchikungulwilo chavaka-Kulishitu mwazalile vaka-Kulishitu vamakuli vaze vanangwilenga vyuma vyamakuli nakutangisa muchano wamuMazu aKalunga. Shikaho kufuma halwola kana nakuheta muji 1870, kakwapwile liuka lyaKalunga hano hamavuko. Halwola kana vaka-Kulishitu vamakuli vavulile chikuma ngana mwamwila uze ahanjikile Yesu, ngocho chapwile chachikalu chikuma kutachikiza vaka-Kulishitu vamuchano. (Mateu 13:36-43) Mwomwo ika twatela kutachikijila chuma kana? Mwomwo chuma kana chasolola nge vyuma tweji kutanganga hali mwangana wakunote namwangana wakusulo kavyatalisa kuli vaka-kuyula chipwe mawangana aze apwileko kuputuka mumwaka wa 100 C.E. nakuheta mu 1870 koko. Halwola kana hano hamavu kahapwile liuka lyaKalunga lize vamyangana kana vatelelele kufumbukilako. * Chipwe ngocho, omu mwahichile lwola lwalundende kufuma mumwaka wa 1870 mwangana wakunote nawakusulo vatelelele kusoloka jino. Mwomwo ika?
6. Lwola muka kwapwile cheka vatu jaKalunga? Lumbununenu.
6 Vatu jaKalunga vaputukile kuvakungulula mwalizavu kuputuka mu 1870. Mumwaka kana, mukiko Charles T. Russell namasepa jenyi vaputukile kulikungulula nakulinangula Mbimbiliya. Ngocho vakiko vapwile jino muluwa uze vavulukile muupolofweto ‘wakuwahisa jila’ shimbu kanda Wangana wauMeshiya uputuke kuyula. (Mala. 3:1) Kaha kwapwile jino lizavu lyavatu jaKalunga. Kutala kwapwile vaka-kuyula vaze vayanjishilenga vangamba jaKalunga tahi? Tushimutwilenuko havyuma vimwe.
IYA APWA MWANGANA WAKUSULO?
7. Iya apwile mwangana wakusulo palanga nakuJita yaKaye yatete?
7 Mu 1870, lifuchi lyaBritain lyayulilenga mafuchi amavulu mukaye, kaha lyapwile nawa nalizavu lyamaswalale vangolo. Wangana wavaka-Britain ukiko vafwanyishile kulumbinga lwalundende luze lwashishile jimbinga jikwavo jitatu, jize jemanyinyineko France, naSpain naNetherlands. (Ndanye. 7:7, 8) Kaha wangana kana wapwile jino mwangana wakusulo palanga nakuJita yaKaye yatete. Halwola kana nawa, lifuchi lyaUnited States of America lyapwile naluheto chikuma mukaye, kaha vaputukile kuzachila hamwe nalifuchi lyaBritain.
8. Iya napunga mwangana wakusulo mumakumbi akukuminyina?
8 Halwola lwaJita yaKaye yatete, lifuchi lyaUnited States lyalikashile chivwasano nalifuchi lyaBritain kaha vazachilile hamwe hakulwa jita. Aha hakiko valifutwile nakupwa jino Chiyulo chaNgolo chaKaye chaAnglo-America. Ngana muze apolofwetele Ndanyele, ou mwangana wakusulo apwile “nalizavu lyenyi lyalinene lyavaka-jita vangolo.” (Ndanye. 11:25) Kaha nawa hamakumbi ano akukuminyina, chiyulo chaAnglo-America, chikiko chemanyinako mwangana wakusulo. * Jino iya emanyinako mwangana wakunote?
IYA APWA MWANGANA WAKUNOTE?
9. Mwaka uka asolokele cheka mwangana wakunote, kaha chisoneka chaNdanyele 11:25 chateselemo ngachilihi?
9 Mwangana wakunote wamuhya asolokele mu 1871, omu alingile Russell namasepa jenyi vanatungu lyehi lizavu lyavaka-kulinangula Mbimbiliya. Mumwaka vene uze, Otto von Bismarck akungulwile jingalila jajivulu nakutunga lifuchi lyaGermany. Wilhelm I ikiye apwile mwangana watete, kaha atongwele Bismarck apwenga twamina wafulumende. * Hamyaka yakavangijileho, lifuchi lyaGermany lyayulilenga jino mafuchi amavulu muAfrica namatungu akuKalungalwiji waPacific, kaha lyasakile kutambula ngolo lifuchi lyaBritain. (Tangenu Ndanyele 11:25.) Chiyulo chaGermany chapwile namaswalale vangolo, kaha nawa chikiko chahachile kuli vaka-Britain. Kaha hajita yakaye yatete chiyulo chaGermany chazachishile maswalale kana.
10. Uno chisoneka chaNdanyele 11:25b, 26 chateselemo ngachilihi?
10 Ndanyele apolofwetele nawa vyuma vize vyejile nakusoloka kuChiyulo chaGermany namaswalale jacho. Kaha upolofweto wahanjikile ngwawo, mwangana wakunote “keshi kukahasa kwimanako.” Mwomwo ika? “Mwomwo navakajina kumulinga mwamupi. Vaze vali nakulya vyakulya vyenyi viyema vakiko navakamunongesa.” (Ndanye. 11:25b, 26a) Mumakumbi aNdanyele, navilolo vaze ‘vazachililenga mwangana’ valilenga “kulya chiyema chize alilenga [mwangana].” (Ndanye. 1:5) Uno ou upolofweto watalisa kuli veya? Watalisa kuli vilolo vavalemu vamuChiyulo chaGermany vaze vahonene kukundwiza mwangana wavo nakulingisa wangana ushiuke. * Upolofweto kana wahanjikile nawa vyuma navikasoloka kuli mwangana wakunote omu mwakalwa jita namwangana wakusulo. Mbimbiliya yahanjikile ngwayo: “Lizavu lyenyi lyavaka-jita navakalikomba, kaha vavavulu navakafwa.” (Ndanye. 11:26b) Ngocho mujita yakaye yatete, maswalale javaka-Germany ‘vavakombele,’ kaha vavavulu ‘vafwile.’ Vatu vavavulu vafwile mujita kana kuhambakana jijita josena valwilenga kunyima.
11. Mwangana wakunote namwangana wakusulo valingile vyuma muka?
11 Chisoneka chaNdanyele 11:27, 28 chahanjikile ngwacho shimbu kanda Jita yaKaye yatete mwangana wakunote namwangana wakusulo “navakatwama hamesa yimwe nakulyonga mwavomwavo.” Chahanjikile nawa ngwacho mwangana wakunote mwakapwa “navikumba vyavivulu chikuma.” Kaha chisoneka kana chateselemo. Lifuchi lyaGermany naBritain vashimutwilile ngwavo vali nakusaka kuneha kuunda, oloze vapwile nakulyonga kaha, mwomwo kwepukile jita mu 1914. Kaha nawa shimbu kanda 1914, lifuchi lyaGermany likiko lyahachile kulifuchi lyaUnited States muluheto. Lifuchi kana nawa lyalwile jita namwangana wakusulo, oloze valifungulwile. Kahechi chateselemo upolofweto wahali Ndanyele 11:29, 30a.
VAMYANGANA NAVAZUNGISA VATU JAKALUNGA
12. Mwangana wakusulo mwangana wakunote valingile ika hajita yakaye yatete?
12 Kufuma vene mu 1914, ava vamyangana vavali vanalizungisanga chikuma nakuzungisa nawa vatu jaKalunga. Chakutalilaho, mujita yakaye yatete, fulumende yaGermany nayaBritain vayanjishilenga vangamba jaKalunga vaze vakanyine kwingila uswalale. Kaha fulumende ya U.S. yahakile mukamenga vandumbwetu vaze vapwile nakutetekela mulimo wakwambulula. Chuma kana chateselemo upolofweto vasoneka hali Kusoloka 11:7-10.
13. Vyuma muka alingile mwangana wakunote muji 1930 nahajita yakaye yamuchivali?
13 Kuheta muji 1930, chikumanyi hajita yakaye yamuchivali, mwangana wakunote afumbukilile chikuma vatu jaKalunga nakuhona kuvatetela. Omu liuka lyavaka-Nazi lyaputukile kuyula Germany, Hitler uze apwile twamina navaka-kumukavangiza vasokele mulimo wavangamba jaKalunga. Ava vaka-kole vajihile vatu jaYehova vavavulu nakutwala nawa vamwe kuvilombo vyakulamina vafunge. Ndanyele ahanjikilile chimweza vyuma kanevi. Ambile ngwenyi mwangana wakunote ‘mwakajilulula chihela chajila’ “nakufumisako mulimo wakuhana wana wahakumbi hakumbi” hakukanyisa vangamba jaKalunga kulemesa Yehova. (Ndanye. 11:30b, 31a) Kaha Hitler uze apwile twamina walifuchi kana alishingile ngwenyi mwalalisa vatu jaKalunga vosena muGermany.
MWANGANA WAKUNOTE WAMUHYA
14. Iya ejile nakupwa mwangana wakunote hanyima yajita yakaye yamuchivali? Lumbununenu.
14 Hanyima yajita yakaye yamuchivali, fulumende yaCommunist yamuSoviet Union yatambwile jingalila jajivulu jize vayulilenga kulifuchi lyaGermany. Ngocho fulumende kana yikiko yapwile jino mwangana wakunote. Vaka-Soviet Union vayanjishilenga vatu vaze valemeselenga Kalunga wamuchano, ngana muze valingilenga vaka-Nazi.
15. Mwangana wakunote alingile ika omu yakumine Jita yaKaye yamuchivali?
15 Omu yakumine Jita yaKaye yamuchivali, ou mwangana wakunote wamuhya navaze vamukundwijilenga vafumbukilile vatu jaKalunga. Akanyishile mulimo wakwambulula nakutwala vatu jaYehova vavavulu muufunge. Kaha mukanda waKusoloka 12:15-17 wafwanyisa luyanjisa kana ‘kukalwiji.’ Ngocho hamakumbi akukuminyina, mwangana wakunote nayanjisanga chikuma vatu jaKalunga mangana vahone kuzata mulimo wavo, oloze navahono. *
16. Uno chiyulo chaSoviet Union chateselemo ngachilihi upolofweto wahali Ndanyele 11:37-39?
16 Tangenu Ndanyele 11:37-39. Hakutesamo upolofweto kana, mwangana wakunote kavumbikile “Kalunga kavakakuluka jenyi[ko].” Mujila muka? Chiyulo chaSoviet Union chasakile kulingisa vatu vahone kufwelela mumauka akwitava osena. Shikaho mu 1918, vahanyine lushimbi luze lwalingishile mumashikola vanangulenga ngwavo kakwatwama Kalungako. Uno ou mwangana wakunote alishile ngachilihi “kalunga wachihela chakukola”? Azachishile jimbongo jajivulu hakunangula maswalale vavavulu nakutunga vitwa vyajita vyavivulu. Shikaho, mwangana wakunote namwangana wakusulo vapwile navitwa vyavivulu chikuma, ngocho vajihile makombakaji avatu.
VAMYANGANA VAVALI NAVAZACHILA HAMWE
17. Uno “chuma chakwivwisa unyengwe chakuneha kunongesa” chemanyinako ika?
17 Mwangana wakunote nazachilanga hamwe namwangana wakusulo hakuhakako “chuma chakwivwisa unyengwe chakuneha kunongesa.” (Ndanye. 11:31) Echi “chuma chakwivwisa unyengwe” chemanyinako liuka lyaUnited Nations.
18. Mwomwo ika liuka lyaUnited Nations valivulukila ngwavo “chuma chakwivwisa unyengwe”?
18 Liuka lyaUnited Nations valivuluka ngwavo “chuma chakwivwisa unyengwe” mwomwo lyamba ngwalyo linahase kuneha kuunda mukaye kosena, okunyi Wangana waKalunga kaha ukiko unahase kulinga chuma kana. Kaha upolofweto wambile ngwawo chuma kana chapwa “chakuneha kunongesa” mwomwo liuka lyaUnited Nations likiko nalikanongesa kwitava chamakuli chosena.—Talenu chati yakwamba ngwavo “Vamyangana Vavali VamuMakumbi Akukuminyina.”
MWOMWO IKA TWATELA KUTACHIKIZA CHIHANDE KANA?
19-20. (a) Mwomwo ika twatela kutachikiza chihande kana? (b) Chihula muka navakumbulula muchihande chinakavangizaho?
19 Twatela kutachikiza chihande kana mwomwo chasolola nge kufuma vene muji 1870 nakuheta mu 1991, upolofweto waNdanyele wakuvuluka mwangana wakunote namwangana wakusulo unapunga nakutesamo. Shikaho twafwelela ngwetu nachihanda chinasaleko chaupolofweto kana, nachikatesamo.
20 Chiyulo chaSoviet Union chakumine mu 1991. Jino iya nemanyinako mwangana wakunote oholyapwa? Chihula kana navachikumbulula muchihande chinakavangizaho.
MWASO 128 Kukakachila Palanga Nakusongo
^ par. 5 Tuli nakumona unjiho wakusolola nge upolofweto waNdanyele wakuvuluka “mwangana wakunote” “[na]mwangana wakusulo” uchili nakutesamo lika. Uno tunatachikiza ngachilihi ngocho? Kaha mwomwo ika twatela kutachikiza kanawa mashina namasongo aupolofweto kana?
^ par. 5 Kweseka naunjiho kana, tunawane nge kachatelemo kwamba ngwetu Aurelian Mwangana wavaLoma (uze ayulile kufuma mu 270 C.E nakuheta mu 275 C.E.) ikiye apwile “mwangana wakunote” chipwe Mwangana wapwevo Zenobia (uze ayulile kufuma mu 267 C.E nakuheta mu 272 C.E.) apwile “mwangana wakusulo[ko].” Kulumbununa nge twatela kwalumunako ulumbunwiso wamumukanda waPay Attention to Daniel’s Prophecy! kapetulu 13 na 14.
^ par. 8 Talenu lipwata lyakwamba ngwavo, “ Upolofweto WamuMbimbiliya Wakuvuluka Chiyulo chaNgolo chaKaye chaAnglo-America.”
^ par. 9 Mu 1890, Kaiser Wilhelm II afumishile Bismarck hachiyulo.
^ par. 10 Kuli vyuma vyavivulu valingile vize vyahonesele wangana kana kufukila. Chakutalilaho, valitwaminyinyine kukundwiza mwangana, kaha vambulwilenga mijimbu yakusweka yajita nakulingisa mwangana asuluke halitanda.
^ par. 15 Ngana muze vasoneka hali Ndanyele 11:34, mwangana wakunote echele chindende kuyanjisa vaka-Kulishitu vaze vapwile mungalila ayulilenga. Echi chasolokele omu chakumine chiyulo chaSoviet Union mu 1991.
