ოგურაფალ სტატია 19
მი რე „ჩრდილოეთიშ მეფე“ ბოლო დღალეფს?
„ბოლო დროს სამხრეთიშ მეფე ჩრდილოეთიშ მეფეშ წინააღმდეგ გიშელენს“ (დან. 11:40).
ობირეში 150 დოგორით იეჰოვა დო გინოსქიდით
შინაარსი *
1. მუშ გაგებას მოხვარნა ბიბლიურ წინასწარმეტყველება?
მუ ელჷ ღორონთიშ ხალხის ხოლოჟამო? თეშ გაგება შეიოლებერ რე. ბიბლიურ წინასწარმეტყველება მოხვარნა, ქიგებგათ, მუ მნიშვნელოვან მოვლენეფ მოხვადუ მალას, მუთ თითოულს შემეხებნა. ართ-ართ თეცალ წინასწარმეტყველებაშე ვორწყეთ, მუს გაკეთენა არძაშ უმოს ძალიერ მსოფლიო მართველეფ. თე წინასწარმეტყველება დანიელიშ მა-11 დუდის ინოჭარ, სოდეთ ეჭარილ რე ჟირ ართიანიშ მოწინააღმდეგე მეფე — ჩრდილოეთიშ დო სამხრეთიშ მეფეეფ. თე წინასწარმეტყველებაშ უმენტაშ ნაწილქ უკვე შისრულ, ათეშენ შემლებნა დარწმუნებულ ვორდათ, ნამდა დოსქილადირ ნაწილ ხოლო შისრულებ.
2. მუჭოთ დაბადებაშ 3:15 დო გამოცხადებაშ 11:7 დო 12:17-შე იძირე, მუ ოკო გეფთვალისწინათ, მუჟამსით დანიელიშ წინასწარმეტყველებას გიმიბრკვიენთ?
2 დანიელიშ მა-11 დუდის ინოჭარილ წინასწარმეტყველებას ქინვანჭათინ, ოკო გეფთვალისწინათ, ნამდა თინა ხვალე თი მართველეფს დო მთავრობეფს ოხუ, მით ღორონთიშ ხალხის ობრძოლდეს ვარდა თი ქიანას მართუნდეს, სოდეთ თინეფ ცხოვრენდეს. მართალ რე, ღორონთიშ მსახურეფ დედამიწაშ მოსახლეობაშ ჭიჭე ნაწილ რე, მარა ხშირას მსოფლიო მოვლენეფიშ ცენტრის რენა. მუშენ რე თენა თაშ? მუშენდა სატანა დო თიშ ქვეყნიერებაშ მთავარ მიზან რე მოსპას თინეფ, მით ომსახურნა იეჰოვა დო იესოს (წეკითხით დაბადება 3:15; გამოცხადება 11:7; 12:17). თეს გეძინელ, დანიელიშ წინასწარმეტყველება ოკო ოთანხმუდას ღორონთიშ სიტყვას ინოჭარილ შხვა წინასწარმეტყველებეფს. ათეშენ, დანიელიშ წინასწარმეტყველებას ხვალე თიმ შემთხვევას ინვანჭუთ, მუჟამსით თის ქეშვუდარენთ წმინდა წერილეფიშ შხვა ადგილეფს.
3. მუს გუვარჩიენთ თე დო უკულიან სტატიას?
3 თაშ ნამდა, ასე გუვარჩიენთ დანიელიშ 11:25—39 მუხლეფს. ქობძირუნთ, მი რდეს ჩრდილოეთიშ დო სამხრეთიშ მეფეეფ 1870—1991 წანეფს დო ქიგებგენთ, მუ მიზეზეფიშ გურშენ ოკო დოფთირუათ თე წინასწარმეტყველებაშ გარკვეულ ნაწილიშ ჯვეშობურ გაგება. უკულიან სტატიას გუვარჩიენთ დანიელიშ 11:40—12:1-ს დო ქობძირუნთ, მუს მირაგადნა წინასწარმეტყველებაშ თე ნაწილ თი პერიოდიშ გურშენ, ნამუთ 1990-იან წანეფშე მოჸუნაფილ არმაგედონშახ იგრძელებ. თე ჟირ სტატიაშ გარჩიებაშ დროს მიგეხვარებნა ჩარჩო: „მეფეეფიშ ბრძოლა ბოლო დროს“. დუდშე ქობძირათ, მი რე თე წინასწარმეტყველებას მოშინაფილ ჟირ მეფე.
მუჭო შემლებნა გებგათ, მი რენა ჩრდილოეთიშ დო სამხრეთიშ მეფეეფ
4. ნამ სუმ ფაქტორ ოკო გეფთვალისწინათ, ნამდა ქიგებგათ, მი რენა ჩრდილოეთიშ დო სამხრეთიშ მეფეეფ?
4 წოდებეფ „ჩრდილოეთიშ მეფე“ დო „სამხრეთიშ მეფე“ თი პოლიტიკურ მართველეფშა მეუთითენდჷ, მით თი დროს ისრაელიშ ჩრდილოეთით დო სამხრეთით რდეს. მუშენ იფჩიებუთ თეს? ქიდეკვირით, მუ უწუ ანგელოზიქ დანიელს: „ასე მოფრთჷ, ნამდა ქუგგოგებაფუე, მუ აღოლე სქან ხალხის [ღორონთიშ ხალხის] ბოლო დღალეფს“ (დან. 10:14). ახ. წ. 33 წანაშ ჟარნეჩდომავითა დღაშ დღახუშახ ისრაელ ერი ღორონთიშ ხალხ რდუ. მარა, თეშ უკულ იეჰოვაქ გეგმაარგამ, ნამდა იესოშ ართგურ მოწაფეეფს მირჩქინანდჷ მუშ ხალხო. ათეშენ, დანიელიშ მა-11 დუდის ინოჭარილ წინასწარმეტყველებაშ უმენტაშ ნაწილ ისრაელ ერს ვარინ, ქრისტეშ მიმაჸუნალეფს ოხუ (საქ. 2:1—4; რომ. 9:6—8; გალ. 6:15, 16). შხვადოშხვა დროს ჩრდილოეთიშ დო სამხრეთიშ მეფეეფ ითირუდეს. მარა თინეფს მუსხირენ საერთო უღდეს. პირველ, თე მეფეეფ ღორონთიშ ხალხის ობრძოლდეს ვარდა თი ქიანას მართუნდეს, სოდეთ თინეფ ცხოვრენდეს. მაჟია, ღორონთიშ ხალხიშ მიმართ მუნეფიშ დამოკიდებულებათ ოძირანდეს, ნამდა ჯოგდეს ჭეშმარიტ ღორონთ, იეჰოვა. დო მასმა, თე ჟირ მეფე ძალაუფლებაშ მიოღებელო ართიანს ობრძოლდეს.
5. არსებენდესო მაჟია საუკუნეშე მა-19 საუკუნეშ ბოლოშახ ჩრდილოეთიშ დო სამხრეთიშ მეფეეფ? გენწყით.
5 მაჟია საუკუნეს ჭეშმარიტ ქრისტიანეფ შქას გემკორჩქინდეს ცრუ ქრისტიანეფქ, მიდგაქ ტყურა გურაფეფ გავრცელეს დო ღორონთიშ სიტყვას ინოჭარილ ჭეშმარიტება დოფულეს. თე დროშე მოჸუნაფილ მა-19 საუკუნეშ ბოლოშა დედამიწას ვარდჷ ღორონთიშ მსახურეფიშ ორგანიზებულ ჯგუფ. ცრუ ქრისტიანობაქ ღვანძგილცალო გევრცელ დო ათეშენ, რთულ რდუ თიშ გაგება, მი რდეს ჭეშმარიტ ქრისტიანეფ (მათ. 13:36—43). მუშენ რე თეშ რჩქინა მნიშვნელოვან? თე ფაქტ ამტკიცენს, ნამდა ჩრდილოეთიშ დო სამხრეთიშ მეფეეფ ვა რდეს თი მართველეფ ვარდა მთავრობეფ, ნამუთ მაჟია საუკუნეშე მა-19 საუკუნეშ ბოლოშა არსებენდჷ, მუშენდა თი დროს ვარდჷ ღორონთიშ მსახურეფიშ ორგანიზებულ ჯგუფ, მიდგაშ წინააღმდეგ თე მართველეფ ვარდა მთავრობეფ მიდეშეს. * მარა, ჩრდილოეთიშ დო სამხრეთიშ მეფეეფ მა-19 საუკუნეშ ბოლოს გემკორჩქინდუდეს. სოვრეშე მიჩქნა თენა?
6. მუჟამშე დიჭყეს კინ არსებობა ღორონთიშ მსახურეფქ, მუჭოთ ჯგუფიქ? გენწყით.
6 ღორონთიშ ხალხიქ 1870-იან წანეფიშ დაჭყაფუს ორგანიზებულ ჯგუფო გინირთჷ. ზუსტას თე დროს ჩარლზ ტეიზ რასელ დო თიშ თანამოაზრეეფქ ბიბლიაშ მარკვიებელეფიშ ჯგუფ შექმნეს. თინეფქ შეასრულეს ნაწინასწარმეტყველებ „ამბეშ გუმაცხადებელიშ“ როლ, მიდგაქ მამზად შარა მესიანურ სამეფოშ მოულაშახ (მალ. 3:1). თი დროს კინ ქიდიჭყჷ არსებობა ორგანიზებულ ჯგუფიქ, ნამუთ სწორას ომსახურუდ იეჰოვას! მარა ქორდესო თიმ დროს თიცალ მსოფლიო მართველეფ, მით ღორონთიშ ხალხიშ წინააღმდეგ გიშელენდეს? მორთ ქობძირათ.
მი რე სამხრეთიშ მეფე?
7. მი რდუ სამხრეთიშ მეფე პირველ მსოფლიო ომიშ დროს?
7 ბრიტანეთიქ 1870 წანაშო მსოფლიოშ არძაშ უმოს დიდ იმპერიათ გინირთჷ, ნამდგას არძაშ უმოს ძალიერ სამხედრო ძალა ჸუნდჷ. თე იმპერია ეჭარილ რდუ, მუჭოთ ჭიჭე რქა, ნამდგაქ გიორჯგინ შხვა სუმ რქას — საფრანგეთის, ესპანეთის დო ნიდერლანდებს (დან. 7:7, 8). პირველ მსოფლიო ომიშ დროს სამხრეთიშ მეფე ბრიტანეთ რდუ. თე დროს ამერიკაშ შეერთებულ შტატეფქ მსოფლიოს მთავარ ეკონომიკურ ძალათ დო ბრიტანეთიშ ხოლოშიან მოკავშირეთ გინირთჷ.
8. მი რე სამხრეთიშ მეფე ბოლო დღალეფს?
8 პირველ მსოფლიო ომიშ დროს, ამერიკაშ შეერთებულ შტატეფ დო ბრიტანეთიქ ძალიერ სამხედრო ალიანს შექმნეს. თე დროს ბრიტანეთიქ დო თიშ ყოფილ კოლონიაქ ინგლის-ამერიკაშ მსოფლიო იმპერიათ გინირთჷ. მუჭოთ დანიელქ იწინასწარმეტყველ, თე მეფეს „არძაშ უმოს დიდ დო არძაშ უმოს ძალიერ ჯარ“ ჸუნდჷ (დან. 11:25). ბოლო დღალეფს ინგლის-ამერიკაშ მსოფლიო იმპერია სამხრეთიშ მეფე რე. * მარა, მი იჸუაფუდ ჩრდილოეთიშ მეფე?
მი რე ჩრდილოეთიშ მეფე?
9. მუჟამ მიკორჩქინდჷ ახალ ჩრდილოეთიშ მეფექ დო მუჭო შისრულ დანიელიშ 11:25-ის ინოჭარილ წინასწარმეტყველებაქ?
9 თიშ უკულ, მუთ 1871 წანას რასელ დო თიშ თანამოაზრეეფქ ბიბლიაშ მარკვიებელეფიშ ჯგუფ შექმნეს, ახალ ჩრდილოეთიშ მეფექ გემკორჩქინდჷ. თე წანას ოტო ფონ ბისმარკიქ მთავარ როლ ილაჸაფ გერმანიაშ იმპერიაშ შექმნას. პრუსიაშ მეფექ ვილჰელმ I გერმანიაშ პირველ იმპერატორო გინირთჷ დო პირველ კანცლერო ბისმარკ დანიშნჷ. * უკულიან წანეფს გერმანიას კოლონიეფ უღუდ, ნამდგაშა მიშეშ აფრიკაშ დო წყნარ ოკეანეშ ქიანეფ დო ოცადუდ, ბრიტანეთიშ უმოს ძალაუფლება უღუდკო (წეკითხით დანიელი 11:25). გერმანიაშ იმპერიაქ არძაშ უმოს ძალიერ ჯარ დო მსოფლიოს სიდიდათ მაჟია სამხედრო-საზღვაო ფლოტ შექმნჷ. თიქ პირველ მსოფლიო ომიშ დროს თე ძალა მუშ ნტერეფიშ წინააღმდეგ გიმირინუ.
10. მუჭო შისრულ დანიელიშ 11:25ბ, 26-ის ინოჭარილ სიტყვეფქ?
10 თეს გეძინელ, დანიელქ იწინასწარმეტყველ მუ აღოლედ გერმანიაშ იმპერიას დო თიშ შექმნილ სამხედრო ძალას. მუჭოთ თე წინასწარმეტყველებას ჭარჷ, ჩრდილოეთიშ მეფე „ქუდანთხუ, მუშენდა თინეფ ხრიკეფს ქეთუნწყუნა. თინეფ, მით თიშ ოჭკუმალს ჭკუმნა, მოსპუნა თის“ (დან. 11:25ბ, 26ა). დანიელიშ დროს თინეფშა, მით „მეფეშ ოჭკუმალშე“ ჭკუმუნდეს, მიშეშ სამეფო კარიშ უმაღლეს თანამდებობაშ კათა (დან. 1:5). თანამედროვე დროს მი იგულისხმებ თინეფს, მით მეფეშ ოჭკუმალშე ჭკუმნა? თინა მეუთითენს გერმანიაშ იმპერიაშ მაღალ თანამდებობაშ კათაშა, თინეფ შქას იმპერატორიშ გენერალეფ დო სამხედრო მრჩეველეფ; საბოლათ თინეფქ მოუღეს ბოლო მონარქიულ მართველობას. * თე წინასწარმეტყველებას ხვალე იმპერიაშ დონთხაფა ვარინ, თინა ხოლო რდუ მოშინაფილ, მუ მაჸუნუდ სამხრეთიშ მეფეწკუმა ომს. თე წინასწარმეტყველებას ჩრდილოეთიშ მეფეშ გურშენ ჭარჷ: „თიშ ჯარ გენადგურებ დო ბრელ გოჭყორდუ“ (დან. 11:26ბ). მუჭოთ ნაწინასწარმეტყველებ რდუ, პირველ მსოფლიო ომს, გერმანიაშ ჯარქ გენადგურ დო ბრელქ გოჭყორდჷ. კაცობრიობაშ ისტორიას არძაშ უმოს კოჩიქ თე ომს ღურჷ.
11. მუს გაკეთენდეს ჩრდილოეთიშ დო სამხრეთიშ მეფეეფ?
11 თი პერიოდიშ გურშენ, ნამდგას I მსოფლიო ომქ მაჸუნ, დანიელიშ 11:27, 28-ს ჭარჷ, ნამდა ჩრდილოეთიშ დო სამხრეთიშ მეფეეფ „ართ სტოლს [ქუმკოზოჯუნდეს] დო ართიანს ტყურეფს [ქუწინდეს]“. თეს გეძინელ, თინა ხოლო ჭარჷ, ნამდა „დიდ ქონებას“ დოშაყარანდეს. თექ ზუსტას თაშ ქუმოხვად. გერმანიაქ დო ბრიტანეთიქ ქიმირაგადეს, ნამდა მშვიდობა ოკოდეს, მარა 1914 წანას თინეფ ართიანიშ წინააღმდეგ ბრძოლენდეს, მუდგაქ დამტკიც, ნამდა თინეფიშ შეთანხმება მშვიდობაშ გურშენ, ტყურა რდუ. 1914 წანაშახ, წანეფით წოხოლე გერმანიაქ მსოფლიოს მაჟია არძაშ უმოს მდიდარ ქიანათ გინირთჷ. თეშ უკულ, შისრულ დანიელიშ 11:29 დო 30-იშ პირველ ნაწილქ, გერმანიაქ გიშელ სამხრეთიშ მეფეშ წინააღმდეგ, მარა წაგჷ თე ბრძოლა.
მეფეეფ ღორონთიშ ხალხიშ წინააღმდეგ გიშულა
12. მუს ორთუდეს ჩრდილოეთიშ დო სამხრეთიშ მეფეეფ პირველ მსოფლიო ომიშ დროს?
12 ჟირ მეფექ 1914 წანაშე მოჸუნაფილ, უმოსო გაძლიერ ართიანიშ წინააღმდეგ ბრძოლა დო ღორონთიშ ხალხის ხოლო უმოსო თხოზუდეს. მაგალთო, პირველ მსოფლიო ომიშ დროს, გერმანიაშ დო ბრიტანეთიშ მთავრობეფ თხოზუდეს ღორონთიშ თი მსახურეფს, მით ვარიას იჩიებდეს ომს მონაწილებაშ მეღებაშ გურშენ. შეერთებულ შტატეფიშ მთავრობაქ ხოლო ოჭოფ თინეფ, მით ხემძღვანელენდჷ ქადაგებაშ საქმეს. თეშნერო შისრულ გამოცხადებაშ 11:7—10-ის ინოჭარილ წინასწარმეტყველებაქ.
13. მუ აკეთ ჩრდილოეთიშ მეფექ 1930-იან წანეფშე მოჸუნაფილ, განსაკუთრებით მაჟია მსოფლიო ომიშ დროს?
13 თეშ უკულ, 1930-იან წანეფშე მოჸუნაფილ, განსაკუთრებით მაჟია მსოფლიო ომიშ დროს ჩრდილოეთიშ მეფე სასტიკო ოქცუდ ღორონთიშ ხალხის. მუჟამსით გერმანიაშ მთავრობაშა ნაცისტურ რეჟიმქ ქუმორთჷ, ჰიტლერ დო თიშ თანამოაზრეეფქ აკრძალეს ღორონთიშ ხალხიშ საქმიანობა. მოწინააღმდეგეეფქ დოჸვილეს ოშობით იეჰოვაშ მოწმე დო ანთასობით ჩქინ და დო ჯიმა საკონცენტრაციო ბანაკეფშა გოუტეს. ზუსტას თე მოვლენეფ იწინასწარმეტყველ დანიელქ. ჩრდილოეთიშ მეფექ აკრძალ ქადაგებაშ საქმე დო თეთ შეურაცხყოფა მიორინუ „წმინდა ადგილს“ დო მეჭყვიდ „ირდღაშიან მსხვერპლიშ“ შეწირუა (დან. 11:30ბ, 31ა). ხვალე თენა ვარინ, ჰიტლერქ პირობა დოდვჷ, ნამდა გერმანიას ღორონთიშ ხალხის მოსპუნდჷ.
ახალ ჩრდილოეთიშ მეფექ გემკორჩქინდჷ
14. მიქ გინირთჷ ჩრდილოეთიშ მეფეთ მაჟია მსოფლიო ომიშ უკულ? გენწყით.
14 მაჟია მსოფლიო ომიშ უკულ საბჭოთა კავშირიშ კომუნისტურ რეჟიმქ გერმანიაშ ტერიტორიაშ უმენტაშ ნაწილშე გეჭოფ კონტროლ. ნაცისტურ რეჟიმცალო, საბჭოთა კავშირ დო თიშ მოკავშირეეფ თხოზუდეს არძას, მით ჭეშმარიტ ღორონთიშ თაყვანიშცემას გიორინუანდჷ სახელმწიფოშ მორჩილებაშ წოხოლე. თეშნერო ჩრდილოეთიშ მეფეთ საბჭოთა კავშირ დო თიშ მოკავშირეეფქ გინირთჷ.
15. მუს ორთუდ ჩრდილოეთიშ მეფე მაჟია მსოფლიო ომიშ თებაშ უკულ?
15 მაჟია მსოფლიო ომიშ თებაშე მალას, ახალ ჩრდილოეთიშ მეფექ, საბჭოთა კავშირქ დო თიშ მოკავშირეეფქ, ღორონთიშ ხალხიშ წინააღმდეგ გიშელ. გამოცხადებაშ 12:15—17-ის ღორონთიშ ხალხიშ თხოზინ შედარებულ რე მალწყარშა. ჩრდილოეთიშ მეფექ აკრძალ ქადაგებაშ საქმე დო ანთასობით იეჰოვაშ მოწმე ციმბირშა გეგნახორუ. ბოლო დღალეფს ჩრდილოეთიშ მეფე ხოლო უმოსო აგრძელენს ღორონთიშ ხალხიშ თხოზინს, მარა თის დღას ვა გაჩერებე თინეფიშ საქმიანობა. *
16. მუჭო შეასრულ საბჭოთა კავშირქ დანიელიშ 11:37—39-ს ინოჭარილ სიტყვეფ?
16 წეკითხით დანიელი 11:37—39. მუჭოთ დანიელქ იწინასწარმეტყველ, ჩრდილოეთიშ მეფე მუთუნო ვემირჩქინანდჷ „მუშ მუმალეფიშ ღორონთის“. მუჭო გაკეთენდჷ თეს? საბჭოთა კავშირიშ მიზან რდუ რელიგიეფიშ განადგურება, მუშენდა ტრადიციულ რელიგიეფს ძალა მიდუღკო. თე მიზანიშ მიოჭირნაფალო საბჭოთა ხელისუფლებაქ 1918 წანაშო გეგშაშქვჷ ბრძანება, სკოლეფს ათეიზმიშ გურაფაშ გურშენ. მუჭო განადიდ ჩრდილოეთიშ მეფექ „ციხესიმაგრეშ ღორონთ“? საბჭოთა კავშირქ ქიანაშ ფარა ახარჯჷ ჯარიშ გამანგარებაშე დო ატომურ იარაღიშ შექმნაშე, თი მიზანით, ნამდა გამანგარკო მუშ სახელმწიფო. საბოლათ ჩრდილოეთიშ დო სამხრეთიშ მეფეეფქ თიცალ ძალიერ იარაღეფ შექმნეს, ნამდგას მილიარდობით კოჩიშ ჸვილუა შეულებუდ!
მოწინააღმდეგეეფ ართიანწკუმა თანამშრომლენა
17. მუ რე „გუმაპარტახებელ სისაძაგლე“?
17 მართალ რე, სამხრეთიშ დო ჩრდილოეთიშ მეფეეფ ართიანს ოწინააღმდეგდეს, მარა ართ მომენტის ჩრდილოეთიშ მეფექ ქელუდირთჷ სამხრეთიშ მეფეს, მუჟამსით „კუჩხის ქიგიორინეს გუმაპარტახებელ სისაძაგლე, ნამუთ აპარტახენს“ (დან. 11:31). თე „გუმაპარტახებელ სისაძაგლე“ გაერთიანებულ ერეფიშ ორგანიზაცია რე.
18. მუშენ რე გაერო მოშინაფილ, მუჭოთ „გუმაპარტახებელ სისაძაგლე“?
18 გაერთიანებულ ერეფიშ ორგანიზაცია ეჭარილ რე, მუჭოთ „გუმაპარტახებელ სისაძაგლე“, მუშენდა თინა იჩიებ, ნამდა შეულებ თიცალ მუდგარენიშ კეთება, მუდგაშ ძალა ხვალე ღორონთიშ სამეფოს უღჷ — დამყარას მშვიდობა მსოფლიოს. წინასწარმეტყველებას ჭარჷ, ნამდა „გუმაპარტახებელ სისაძაგლე . . . აპარტახენს“, მუშენდა გაერო ტყურა რელიგიეფიშ მოსპუალას მთავარ როლს შეასრულენს (ქოძირით ჩარჩო „მეფეეფიშ ბრძოლა ბოლო დროს“).
მუშენ ოკო მიჩქუდან თე წინასწარმეტყველებაშ დეტალეფ?
19, 20. ა) მუშა მარწმუნენა თე ისტორიაშ რჩქინა? ბ) მუ კითხვას გუვარჩიენთ უკულიან სტატიას?
19 თე ისტორიაშ რჩქინა მარწმუნენა, ნამდა 1870-იან წანეფშე 1990-იან წანეფშა, დანიელიშ წინასწარმეტყველებაქ ჩრდილოეთიშ დო სამხრეთიშ მეფეეფიშ გურშენ შისრულ. თაშ ნამდა, ბჯერა, წინასწარმეტყველებაშ დოსქილადირ ნაწილ ხოლო შისრულებ.
20 საბჭოთა კავშირქ 1991 წანას აკოცუ. თაშ ნამდა, მი რე ჩრდილოეთიშ მეფე ამდღა? თე კითხვაშ პასუხის უკულიან სტატია ქომჩანა.
ობირეში 128 ბოლოშა მიბთვინათ
^ აბზ. 5 ჩქი არგამათ ვორწყეთ, ნამდა დანიელიშ წინასწარმეტყველება „ჩრდილოეთიშ მეფეშ“ დო „სამხრეთიშ მეფეშ“ გურშენ, ამდღა ხოლო ისრულებ. მუშენ იფჩიებუთ თეს? მუშენ ოკო მიჩქუდან თე წინასწარმეტყველებაშ დეტალეფ?
^ აბზ. 5 მოშინაფილ მიზეზეფიშ გურშენ მეტო ვემიფშინუანთ რომიშ იმპერატორ ავრელიანეს (ახ. წ. 270—275 წწ.) მუჭოთ „ჩრდილოეთიშ მეფეს“ დო დედოფალ ზენობიას (ახ. წ. 267—272 წწ.) მუჭოთ „სამხრეთიშ მეფეს“. თე ცვლილება ოხუ, ჩქინ ართ-ართ პუბლიკაციაშ (წიგნი „ყურად იღეთ დანიელის წინასწარმეტყველება!“) მა-13 დო მა-14 დუდეფს მოჩამილ გაგებას.
^ აბზ. 9 1890 წანას ბისმარკ თანამდებობაშე გეგნარინუ კაიზერ ვილჰელმ II.
^ აბზ. 10 თინეფქ ხე შეუნწყის გერმანიაშ იმპერიაშ ხეთეშე დამარცხებას. მაგალთო, თინეფქ ხუჯ ვა დუკინეს კაიზერს, საიდუმლო ინფორმაცია გაცხადეს ომიშ წაგებაშ გურშენ დო აძულეს კაიზერ, გეგნოდირთკო.
^ აბზ. 15 მუჭოთ დანიელიშ 11:34-ის ჭარჷ, ჩრდილოეთიშ მეფე ჭიჭე ხანით მიოტენდჷ ღორონთიშ ხალხიშ თხოზინს. თე წინასწარმეტყველებაქ შისრულ, მუჟამსით, 1991 წანას საბჭოთა კავშირქ აკოცუ.
