1, 2. Бу јӧрмӧлдӧ не кӧрӱлер?

БӰГӰНГИ кӱнде бис телекейдиҥ калганчы кӱндеринде јадып турганысты, алдындагызына кӧрӧ, канча киреге јарт кӧрӧдис. Удабас Иегова ла Иисус Христос, Каандыкка удурлажып турган ончо башкаруларды јоголтып салар. Је ол ӧйгӧ јетире, тӱндӱк ле тӱштӱк каандар бой-бойыла да, Кудайдыҥ албатызыла да оноҥ ло ары тартыжар.

² Бу јӧрмӧлдӧ Даниил 11:40—12:1-де бичилген судур кӧрӱлер. Бис бӱгӱнги кӱнде кем тӱндӱк каан болуп турганын билип аларыс. Анайда ок келер ӧйдӧ кӱчтер де болотон болзо, Иеговага канайып иженерин шӱӱжип кӧрӧрис.

3, 4. Кем јаҥы тӱндӱк каан болуп калган? Јартап беригер.

³ 1991 јылда, Советский Союз аҥтарылган кийнинеҥ, оныҥ јаан јерлеринде јадып турган Кудайдыҥ албатызына «бир эмеш болуш» эдилген — олор бир кичинек ӧйдиҥ туркунына јайым јарлап, Кудайга бажырар аргалу болгон (Дан. 11:34). Јаан удабай ла СССР-га кирген ороондордо јарчылардыҥ тоозы канча јӱс муҥга једе берген. Кийнинде, Россия ла оныҥ союзниктери тӱндӱк каан болуп калган. Ӧткӧн јӧрмӧлдӧ јарталганыла, тӱндӱк ле тӱштӱк каандарды ӱч темдектеҥ танып ийерге јараар: 1) олор Кудайдыҥ кӧп ишчилери јадып турган јерде башкарып јат, ол эмезе Кудайдыҥ албатызын истежип јат; 2) олордыҥ эткен керектеринеҥ Иегованыҥ ла оныҥ албатызыныҥ ӧштӱлери болгоны кӧрӱнет; 3) бу эки каан бой-бойыла тартыжып јат.

⁴ Россияны ла оныҥ союзниктерин тӱндӱк каан деп айдып турганыска мындый ӱч шылтак бар: 1) бу ороондор јарлаар  ижисти токтодып, канча јӱс муҥдар тоолу ака-эјелерди истежип јат; 2) анайып олор Иегованы ла оныҥ албатызын кӧрӧр кӱӱни јогын кӧргӱзет; 3) олор тӱштӱк кааннаҥ, Англо-Американский телекейлик державанаҥ, артык болорго албаданат. Эмди, Россия ла оныҥ союзниктери тӱндӱк каан деп, недеҥ кӧрӱнип турганын кӧрӱп ийектер.

5. Даниил 11:40—43-те кандый ӧй керегинде айдылат? Ол ӧйдӧ не болор?

⁵ Даниил 11:40—43 кычырыгар *. Судурдыҥ бу бӧлӱгинде калганчы кӱндер керегинде айдылат, анайда ок тӱндӱк ле тӱштӱк каандардыҥ тартыжып турганы аҥылалып јат. Даниилдиҥ судурлаганыла, чактыҥ учында тӱштӱк каан тӱндӱк каанла јуулажар (Дан. 11:40).

6. Эки каан бой-бойыла канайып оноҥ ло ары тартыжып јат?

⁶ Тӱндӱк ле тӱштӱк каандар бастыра јерди бойына бактырып аларга, бой-бойыла оноҥ ло ары тартыжып јат. Темдектезе, Экинчи телекейлик јуу-согуштыҥ кийнинеҥ, Европаныҥ кӧп саба јерлери СССР-дыҥ ла оныҥ союзниктериниҥ колына кирген. Мынаҥ улам тӱштӱк каанга телекейлик военно-политический биригӱ, ол эмезе НАТО тӧзӧӧргӧ келишкен. Тӱндӱк ле тӱштӱк каандар, камык акча-манат чыгарып, јуулажатан баалу јепселдериле бой-бойынаҥ артык болорго, оноҥ ло ары тартыжып јат. Анайда ок тӱндӱк каан Африкада, Азияда ла Латинский Америкадагы болгон јуу-согуштарга ла ӧӧн-бӧкӧнгӧ јӧмӧжип, тӱштӱк каанга удурлажып јат. Калганчы јылдарда Россияныҥ ла оныҥ союзниктериниҥ ийде-кӱчи там ла тыҥып турган. Анайда ок бу эки каан киберпространстводо јуулажып, бой-бойын каршулу компьютерный программалар тузаланганында бурулап јат. Бу программалар ороонныҥ экономический ле политический системаларына каршу јетирет. Бого ло коштой, Даниилдиҥ судурлаганыла, тӱндӱк каан Кудайдыҥ албатызына оноҥ ло ары табару эдет (Дан. 11:41).

7. «Јараш јер» нени темдектейт?

⁷ Даниил 11:41-де судурлалганыла, тӱндӱк каан «Јараш јерге» кирер. Бу кандый јер? Јебрен ӧйдӧ бу јер «ончо јерлердиҥ эҥ јаражы» деп адалган Израиль јери болгон (Иез. 20:6). Нениҥ учун бу јер аҥылу болгон? Нениҥ учун дезе, анда Иеговага бажырып турган албаты јаткан. Је б. э. 33-чи јылында ӧткӧн Беженинчи кӱннеҥ ала бу «јер» деген сӧс чыннаҥ кандый бир јерди темдектебей барган. Бӱгӱнги кӱнде Иегованыҥ албатызы бастыра јердиҥ ӱстинде јадат. Оныҥ учун бистиҥ ӧйдӧ «Јараш јер» — Иегованыҥ јердеги организациязын темдектейт. Бу организацияга кирип турган улус христиан туштажуларга јӱрӱп, јарлаар ишке туружып јат.

8. Тӱндӱк каан «Јараш јерге» канайып кирген?

⁸ Калганчы кӱндердиҥ туркунына, тӱндӱк каан «Јараш јерге» канча катап кирген. Темдектезе, Нацистский Германияныҥ тӱндӱк каан болгон ӧйин, анчада ла Экинчи телекейлик јуу-согушты, эске алып ийектер. Бу каан Кудайдыҥ ишчилерин истежип, ӧлтӱргениле, «Јараш јерге» кирген. А Экинчи телекейлик јуу-согуштыҥ кийнинеҥ, Советский  Союз Кудайдыҥ ишчилерин истежип, ссылкага аткарганыла, «Јараш јерге» кирген.

9. Россия ла оныҥ союзниктери «Јараш јерге» канайып кирген?

⁹ Тоолу јыл кайра тӱндӱк каан ойто ло катап «Јараш јерге» кирген. Бу канайып болгон? 2017 јылда Россия Иегованыҥ албатызыныҥ ижин токтодып, кезик ака-эјелерди тӱрмелеп салган. Бого ло коштой, Россия бистиҥ бичиктерди, ол тоодо «Јаҥы телекейдиҥ кӧчӱрмезин» токтодып ийген. Мыныҥ кийнинде Россиядагы Бет-Элди, анайда ок Каандыктыҥ Тураларын ла Курултайлардыҥ Тураларын айрып алган. Бу ончо немениҥ кийнинеҥ, Башкару јӧп 2018 јылда, Россияны ла оныҥ союзниктерин — тӱндӱк каан деп оҥдоп ийген. Је Иегованыҥ албатызы мындый кату истежӱлердиҥ де ӧйинде, ороонныҥ јаҥына удура кӧдӱрилип турган тӱймеенге турушпай јат ла јаҥды аҥтарарга јӧмӧшпӧй јадылар. Карын Кудайдыҥ ишчилери «јаҥда тургандар» учун мӱргӱзин деп айдылган Агару Бичиктиҥ сӧстӧрин тузаланып јат, анчада ла андый улус Кудайга јайым бажырар арганы токтодорго эмезе јарадарга турган болзо (1 Тим. 2:1, 2).

10. Тӱндӱк каан тӱштӱк каанды јеҥип болор бо? Јартап беригер.

¹⁰ Даниил 11:40—45-теги судурда кӧп сабада тӱндӱк каан керегинде айдылат. Оныҥ учун бу судур, тӱндӱк каан тӱштӱк каанды јеҥип алар деп кӧргӱзет пе? Јок. Иегова ла Иисус јердиҥ ончо башкаруларын Армагеддон деп јуу-согушта јоголтып баштаган ӧйдӧ, тӱштӱк каан јоголголок болор (Ачыл. 19:20). Нениҥ учун бис мынайып айдадыс? Озо баштап Даниилдиҥ бичигинде ле Ачылтада бичилген судурларда не айдылганын шӱӱжип ийектер.

11. Даниил 2:43—45-теги судурдаҥ нени билип алдыс? (Кадарындагы јурукты кӧрӱгер.)

¹¹ Даниил 2:43—45 кычырыгар *. Бу судурда Даниил тӧрт башка темирлердеҥ эдилген коркышту јаан статуя керегинде айдат. Бу статуяныҥ бӧлӱктери башка-башка ӧйдӧ башкарган телекейлик державаларды темдектейт. Олордыҥ јерлеринде Кудайдыҥ кӧп ишчилери јадат. Судурда айдылган калганчы телекейлик держава, шагайынаҥ ала таманына јетире (ступни) темирдеҥ ле той балкаштаҥ эдилген буттар эдип кӧргӱзилет. Бу дезе, Англо-Американский телекейлик держава. Айдарда, Кудайдыҥ Каандыгы ончо башкаруларды јоголтып баштаза, бу держава эмдигенче башкарып турган болор.

12. Аҥныҥ јетинчи бажы нени темдектейт? Мыны нениҥ учун билер керек?

¹² Элчи Иоанн, Иегованыҥ албатызы јадып турган јерлерде башкарган телекейлик державалар керегинде база айдат. Иоанн бу башкаруларды јети башту аҥ деп кӧргӱзет. Бу аҥныҥ јетинчи бажы Англо-Американский телекейлик державаны темдектейт. Бу јаан учурлу јетирӱ, нениҥ учун дезе судурда айдылганыла, аҥда база ӧскӧ баштар чыгып келер деп айдылбай јат. Айдарда, Христос ло оныҥ теҥеридеги черӱзи бу аҥды јоголтып јатса, аҥныҥ јетинчи бажы башкарып турган болор * (Ачыл. 13:1, 2; 17:13, 14).

13, 14. «Магог јериниҥ Гогы» ол кем? Ол недеҥ улам Кудайдыҥ албатызына табару эдер болор?

¹³ Агару Бичиктиҥ ӧскӧ бичиги, Иезекииль, тӱштӱк ле тӱндӱк каандарды јоголторынаҥ озо не болоры керегинде айдылган болор деп, оҥдоп аларга болужат. Иезекииль 38:10—23-те Даниил 2:43—45; 11:44—12:1-де ле Ачылта 16:13—16, 21-де айдылган судурларда бир ле ӧй айдылып турган деп сананып јадыс. Бу судурлар биске келер ӧйдӧ не болорын билерге болужып јат.

¹⁴ Улу тӱбектиҥ башталганыныҥ кийнинеҥ, «бастыра телекейдиҥ каандары» албатылардыҥ коалициязын тӧзӧӧр (Ачыл. 16:13, 14; 19:19). Агару Бичик бу коалицияны «Магог јериниҥ Гогы» деп адайт (Иез. 38:2). Албатылардыҥ коалициязы Кудайдыҥ албатызына табару эдип, оны јоголтып саларга бастыра ийде-кӱчин салар. Олор недеҥ улам табару эдер? Бу ӧй керегинде апостол Иоанныҥ судурлаганыла, Кудайдыҥ ӧштӱлерине «јаан мӧндӱр» тӱжер (Ачыл. 16:21). Бу мӧндӱр, Иегованыҥ ишчилериниҥ коркышту кату јаргы айдарын темдектеер аргалу. Магог јериниҥ Гогы Кудайдыҥ албатызын јердиҥ ӱстинеҥ кырып салатан табаруны, шак ла мынаҥ улам эдер болор.

15, 16. а) Даниил 11:44, 45-те не керегинде айдылган болор? б) Тӱндӱк каан ла Магог јериниҥ Гогыныҥ ӧскӧ дӧ башкараачыларыла не болор?

¹⁵ Даниил 11:44, 45 кычырыгар *. Бу да ӱлгерде, коркышту кату јаргы айдылары ла Кудайдыҥ албатызына табару эдилери керегинде айдылып турган болор. Ондо мынайып айдылат: «Кӱнчыгыштаҥ ла тӱндӱк јанынаҥ келген јар оны [тӱндӱк каанды] шакпырадып ийер. Ол тыҥ атыйланып, кӧптӧрди ӧлтӱрерге ле јоголторго чыгар». «Кӧптӧрди» дегени Иегованыҥ ишчилерин темдектеер аргалу. Бу ӱлгерлерде Даниил Кудайдыҥ албатызына калганчы катап болотон коркышту јаан табаруны айдып турган болор *.

 ¹⁶ Тӱндӱк каан ла ӧскӧ дӧ башкараачылар Кудайдыҥ албатызына табару этсе, Иегова тыҥ чугулданып, Армагеддон деген јуу-согуш баштаар (Ачыл. 16:14, 16). Ол тушта тӱндӱк каан ла, Агару Бичикте Магог јериниҥ Гогы деп адалган ӧскӧ дӧ албатылар јоголтылып калар. Олорго кем де болушпас (Дан. 11:45).

17. Даниил 12:1-де «улу јайзаҥ» деп адалган Михаил ол кем? Ол бӱгӱнги кӱнде нени эдет, келер ӧйдӧ нени эдер?

¹⁷ Даниилдиҥ судурыныҥ база бир ӱлгери, биске тӱндӱк каан ла оныҥ союзниктери канайып јоголтылары керегинде ле бис канайып аргадаларыс деп, кӧптӧдӧ билип аларга болужат. (Даниил 12:1 кычырыгар *.) Бу ӱлгер нени темдектейт? Михаил — башкарып турган Кааныстыҥ, Иисус Христостыҥ, база бир ады. Ол Кудайдыҥ албатызы учун 1914 јылдаҥ ала, теҥеридеги Каандыктыҥ кааны болуп калганынаҥ ала, «турат». Удабас ол Армагеддон деп јуу-согушта, Кудайдыҥ албатызы учун туруп, ончо ӧштӱлерин јоголтып салар. Даниилдиҥ бичигинде тӱӱкиниҥ эҥ ле кӱч деп адалган ӧй бу јуу-согушла тӱгенер. Бу эҥ ле кӱч ӧй, Ачылтада бичилген Иоанныҥ судурында «улу тӱбек» (ЈТ) деп адалат (Ачыл. 6:2; 7:14).

18. Бис нени этсеес, келер ӧйдӧҥ коркыбазыс?

¹⁸ Бис келер ӧйдӧҥ бир де коркыбас аргалу. Нениҥ учун дезе Даниилдиҥ ле Иоанныҥ судурлаганыла, улу тӱбектиҥ ӧйинде Иегова ла Иисус бойыныҥ ишчилерин аргадап алар. Даниил: «Бичикте бичилген кажы ла кижи аргадалар» — деп айткан (Дан. 12:1). Бистиҥ ады-јолыс бу бичикке бичилзин деп, нени эдер керек? Биске дезе, «Кудайдыҥ Кураанына», Иисуска, бӱдӱп турганысты кӧргӱзер керек (Иоанн 1:29). Анайда ок јӱрӱмисти Кудайга учурлап, сууга чӧҥӱрилер керек (1 Петр 3:21). Бого ло коштой, Кудайдыҥ Каандыгына јӧмӧжӧр керек, ӧскӧртӧ айтса, улуска Иегова керегинде билип алзын деп болужарга, бастыра ийде-кӱчистеҥ албаданар керек.

19. Биске эмди ле нени эдер керек, нениҥ учун?

¹⁹ Шак ла эмди Иеговага ла оныҥ организациязына бӱдӱп турганысты тыҥыдатан ӧй. Шак ла эмди Кудайдыҥ Каандыгына јӧмӧжӧтӧн ӧй. Јӱк ле анайып, Кудайдыҥ Каандыгы тӱндӱк ле тӱштӱк каандарды јоголтып јатса, аргадаларыс.