1, 2. Бу мәгаләдә нәји арашдыраҹағыг?

БУ ҜҮНӘ гәдәр ахырзаманын сон ҝүнләриндә јашадығымызы сүбут едән бу гәдәр дәлил олмајыб. Тезликлә Јеһова вә Иса Мәсиһ Падшаһлыға гаршы чыхан бүтүн һөкумәтләри мәһв едәҹәк. О вахта гәдәр исә шимал падшаһы вә ҹәнуб падшаһы һәм бир-бири илә, һәм дә Аллаһын халгы илә чәкишмәјә давам едәҹәк.

² Бу мәгаләдә Дәнјал 11:40—12:1 ајәләриндә јазылмыш пејғәмбәрлији арашдыраҹағыг. Шимал падшаһынын һал-һазырда ким олдуғуну, һәмчинин гаршыдакы сынаглара нәјә ҝөрә ҹәсарәтлә синә ҝәрә биләҹәјимизи өјрәнәҹәјик.

3, 4. Бу ҝүн шимал падшаһы кимдир? Изаһ един.

³ 1991-ҹи илдә Совет Иттифагы девриләндән сонра онун табелијиндә јашамыш Аллаһын халгы «бир аз көмәк» алды, јәни бир мүддәт сәрбәстлик әлдә етди (Дән. 11:34). Онлар артыг сәрбәст шәкилдә тәблиғ едә билирди. Беләҹә, чох кечмәмиш Совет Иттифагынын тәркибиндә олмуш өлкәләрдә тәблиғчиләрин сајы артараг јүз минләрлә олду. Тәдриҹән Русија вә мүттәфигләри шимал падшаһы гисминдә ашкара чыхды. Әввәлки мәгаләдә арашдырдығымыз кими, шимал падшаһынын вә ҹәнуб падшаһынын ким олдуғуну мүәјјән етмәк үчүн үч амили нәзәрә алмалыјыг: 1) о, Аллаһын халгына һүҹум етмәлидир, 2) давранышы илә Јеһованын вә Онун халгынын дүшмәни олдуғуну ҝөстәрмәлидир вә 3) рәгиб падшаһла чәкишмәлидир.

⁴ Бу ҝүн шимал падшаһынын Русија вә мүттәфигләри олдуғуну  демәјә һансы әсасларымыз вар? 1) Онларын Аллаһын халгы үзәриндә әһәмијјәтли дәрәҹәдә тәсири олуб: табеликләриндә олан әразидә јашајан јүз минләрлә баҹы-гардашымызы тәгиб едибләр вә тәблиғ ишинә гадаға гојублар. 2) Бу давранышлары онларын Јеһова Аллаһа вә Онун халгына нифрәт етдијини ҝөстәрир. 3) Онлар ҹәнуб падшаһы илә, Инҝилтәрә-Америка дүнја империјасы илә чәкишир. Ҝәлин ҝөрәк Русија вә онун мүттәфигләри шимал падшаһы олдугларыны неҹә ҝөстәрибләр.

5. Дәнјал 11:40—43 ајәләриндә нәдән бәһс олунур?

⁵ Дәнјал 11:40—43 ајәләрини охујун. Пејғәмбәрлијин бу һиссәси биздә ахырзаман барәдә үмуми тәсәввүр јарадыр. Бу ајәләрдә шимал падшаһы илә ҹәнуб падшаһы арасындакы рәгабәтдән данышылыр. Пејғәмбәрликдә дејилир ки, ахырзаманда ҹәнуб падшаһы шимал падшаһы илә «чәкишәҹәк» (Дән. 11:40).

6. Ики падшаһын бир-бирилә чәкишдијини нәләр ҝөстәрир?

⁶ Шимал падшаһы вә ҹәнуб падшаһы бүтүн дүнјаја һөкмранлыг етмәк уғрунда бир-бирилә чәкишир. Мисал үчүн, ҝәлин ҝөрәк Икинҹи Дүнја мүһарибәсиндән сонра Совет Иттифагы вә мүттәфигләри Авропанын бөјүк бир һиссәси үзәриндә тәсирә малик олдуғу вахт нә баш вермишди. Шимал падшаһынын атдығы аддымлар ҹәнуб падшаһыны һал-һазырда НАТО кими танынан бејнәлхалг һәрби иттифаг јаратмаға сөвг етмишди. Шимал падшаһы вә ҹәнуб падшаһы ән ҝүҹлү ордуја саһиб олмаг үчүн күлли мигдарда пул хәрҹләмәклә дә бир-бирилә чәкишир. Онлар һәмчинин Африка, Асија вә Латын Америкасында ҝедән мүһарибәләрдә вә үсјанларда бир-биринин дүшмәнләрини дәстәкләјибләр. Сон илләр Русија вә онун мүттәфигләри өз тәсир ҝүҹләрини бүтүн дүнјада мөһкәмләндирир. Онлар һәмчинин ҹәнуб падшаһы илә кибер мүһарибәләр апарыр. Бу ики падшаһ дағыдыҹы компүтер програмлары васитәсилә игтисади вә сијаси системләринә зијан вурмагда бир-бирини иттиһам едир. Үстәлик, Дәнјалын пејғәмбәрлик етдији кими, шимал падшаһы Аллаһын халгына һүҹумуну давам етдирир (Дән. 11:41).

7. «Дилбәр өлкә» дејиләндә нә нәзәрдә тутулур?

⁷ Дәнјал 11:41 ајәсиндә дејилир ки, шимал падшаһы «дилбәр өлкәјә ҝирәҹәк». Бу, һансы өлкәдир? Гәдим заманларда Исраил торпағы «дүнјанын ән дилбәр ҝушәси» һесаб олунурду (Һизг. 20:6). Бу өлкәни ҝөзәлләшдирән әсас амил һагг ибадәтин орада бәргәрар олмасы иди. Ерамызын 33-ҹү илинин Әллинҹи ҝүн бајрамындан бәри бу «өлкә» конкрет бир ҹоғрафи мәканда јерләшән әрази дејил, чүнки Јеһованын хидмәтчиләри дүнјанын һәр јериндә јашајыр. Бу ҝүн «дилбәр өлкә» Јеһованын халгынын тутдуғу һәјат јолудур. Мисал үчүн, бура Јеһоваја ибадәтин ајрылмаз һиссәси олан јығынҹагларда вә тәблиғ хидмәтиндә иштирак дахилдир.

8. Шимал падшаһы «дилбәр өлкәјә» неҹә ҝирмишди?

⁸ Ахырзаман дөврүндә шимал падшаһы «дилбәр өлкәјә» дәфәләрлә ҝириб. Мисал үчүн, насист Алманијасы шимал падшаһы оланда, хүсусилә дә Икинҹи Дүнја мүһарибәси әрзиндә, Аллаһын халгыны тәгиб едәрәк вә гәтлә јетирәрәк «дилбәр өлкәјә» ҝирмишди. Икинҹи Дүнја мүһарибәсиндән сонра шимал падшаһы Совет Иттифагы оланда  «дилбәр өлкәјә» Аллаһын халгыны тәгиб едәрәк, онлары сүрҝүнә ҝөндәрәрәк ҝирмишди.

9. Бир нечә ил өнҹә Русија вә мүттәфигләри «дилбәр өлкәјә» неҹә ҝирди?

⁹ Бир нечә ил өнҹә Русија вә мүттәфигләри дә «дилбәр өлкәјә» ҝирди. Неҹә? 2017-ҹи илдә Русија һөкумәти Јеһованын халгынын фәалијјәтинә гадаға гојду вә бәзи баҹы-гардашларымызы һәбсә атды. Һәмчинин «Јени Дүнја Тәрҹүмәси» дә дахил, нәшрләримизи гадаған етди. Даһа сонра Русијадакы филиалымызы, еләҹә дә ибадәт евләринин вә топланты залларынын бәзиләрини мүсадирә етди. Бүтүн бунлардан сонра, 2018-ҹи илдә Рәһбәрлик Шурасы шимал падшаһынын һал-һазырда Русија вә мүттәфигләри олдуғуну ачыглады. Амма Јеһованын хидмәтчиләри шиддәтли тәгибләрә мәруз галсалар белә, дөвләтә гаршы чыхмыр вә чеврилиш етмәјә ҹәһд етмир. Әксинә, Мүгәддәс Китабдакы мәсләһәтә ујғун давранараг «мәмурлар үчүн» дуа едир, хүсусилә дә бу мәмурлар ибадәт етмәк азадлығына тәсир едәҹәк гәрарлар гәбул едән заман (1 Тим. 2:1, 2).

10. Шимал падшаһы ҹәнуб падшаһыны мәғлуб едәҹәк? Изаһ един.

¹⁰ Дәнјал 11:40—45 ајәләриндә јазылмыш пејғәмбәрликдә диггәт әсасән шимал падшаһынын фәалијјәтинә јөнәлир. Бу, шимал падшаһынын ҹәнуб падшаһыны мәғлуб едәҹәјини ҝөстәрир? Хејр. Јеһова вә Иса Мәсиһ Армаҝеддонда бүтүн инсан һөкумәтләрини мәһв едәнә гәдәр ҹәнуб падшаһы «дири» олаҹаг (Вәһј 19:20). Нә үчүн буна әминик? Ҝәлин ҝөрәк Дәнјал вә Вәһј китабларындакы пејғәмбәрликләр нәји ачыглајыр.

11. Дәнјал 2:43—45 ајәләриндән нә ајдын олур? (Үз габығындакы шәклә бахын.)

¹¹ Дәнјал 2:43—45 ајәләрини охујун. Дәнјал пејғәмбәр Аллаһын халгы үзәриндә тәсири олмуш бир сыра инсан һөкумәтләриндән бәһс едир. Бу һөкумәтләр нәһәнҝ һејкәлин мүхтәлиф һиссәләри кими тәсвир олунур. Сонунҹу инсан һөкумәти һејкәлин дәмирлә ҝил гарышығындан ибарәт олан ајағыны тәмсил едир. Бу ајаг Инҝилтәрә-Америка дүнја империјасыдыр. Пејғәмбәрликдән ајдын олур ки, Аллаһын Падшаһлығы бүтүн инсан һөкумәтләрини мәһв едән заман Инҝилтәрә-Америка дүнја империјасы һәлә мөвҹуд олаҹаг.

12. Вәһши һејванын једдинҹи башы нәји тәмсил едир вә нәјә ҝөрә бу, ваҹиб мәгамдыр?

¹² Һәвари Јәһја да Јеһованын халгына тәсири олмуш бир сыра инсан һөкумәтини тәсвир едир. Јәһјанын пејғәмбәрлијиндә бу һөкумәтләр једдибашлы вәһши һејвана бәнзәдилир. Вәһши һејванын једдинҹи башы Инҝилтәрә-Америка дүнја империјасыдыр. Бу, ваҹиб мәгамдыр, чүнки һејванын ҹәми једди башы вар, башга башы јохдур. Бу о демәкдир ки, Иса Мәсиһ вә онун сәмави ордусу вәһши һејваны једдинҹи башы илә бирҝә мәһв едәнә гәдәр једдинҹи баш дүнјаја ағалыг едәҹәк * (Вәһј 13:1, 2; 17:13, 14).

13, 14. «Мәҹуҹ өлкәсиндән олан Јәҹуҹ» кимдир вә еһтимал ки, ону Аллаһын халгына һүҹум етмәјә нә тәһрик едәҹәк?

¹³ Һизгијалын јаздығы пејғәмбәрликдә шимал падшаһынын вә ҹәнуб падшаһынын мәһвиндән өнҹә баш верә биләҹәк һадисәләр  тәсвир олунур. Еһтимал ки, Һизгијал 38:10—23; Дәнјал 2:43—45; 11:44—12:1; Вәһј 16:13—16, 21 ајәләриндә ејни вахтда баш верән һадисәләрдән данышылыр. Әҝәр бу еһтимал доғрудурса, онда нөвбәти һадисәләрин баш верәҹәјини ҝөзләмәк олар.

¹⁴ Бөјүк мүсибәт башлајандан бир гәдәр сонра «јер үзүнүн падшаһлары» милләтләр бирлији јарадаҹаг (Вәһј 16:13, 14; 19:19). Бу бирлик Мүгәддәс Китабда «Мәҹуҹ өлкәсиндән олан Јәҹуҹ» адланыр (Һизг. 38:2). Милләтләр бирлији Аллаһын халгына һүҹум едиб ону тамамилә мәһв етмәјә чалышаҹаг. Буну етмәјә ону нә тәһрик едәҹәк? Һәвари Јәһја һәмин вахтла бағлы ҝөрүнтүдә Аллаһын дүшмәнләринин үзәринә гејри-ади бөјүклүкдә долу јағдығыны ҝөрүр. Ола билсин, бу мәҹази долу Јеһованын халгынын бәјан едәҹәји ағыр һөкм хәбәридир. Бәлкә дә, елә бу хәбәр Мәҹуҹ өлкәсиндән олан Јәҹуҹу Аллаһын халгыны јер үзүндән силмәк нијјәтилә һүҹума кечмәјә тәһрик едәҹәк (Вәһј 16:21).

15, 16. а) Дәнјал 11:44, 45 ајәләриндә еһтимал ки, һансы һадисәләр тәсвир олунур? б) Мәҹуҹ өлкәсиндән олан Јәҹуҹу тәшкил едән диҝәр милләтләрлә бирҝә шимал падшаһынын агибәти нә олаҹаг?

¹⁵ Чох ҝүман ки, бу ағыр һөкм хәбәри вә Аллаһын дүшмәнләринин сонунҹу һүҹуму илә бағлы јазыланлар Дәнјал 11:44, 45 ајәләриндә тәсвир олунан һадисәләрлә ејнидир. (Ајәләри охујун.) Бу ајәләрдә Дәнјал дејир ки, «шәргдән вә шималдан ҝәлән хәбәрләр» шимал падшаһыны нараһат едәҹәк вә о, «шиддәтли гәзәблә галхаҹаг». Шимал падшаһы «чохларыны гырыб мәһв етмәк» нијјәтиндә олаҹаг. Ҝөрүнүр, «чохлары» дејиләндә Јеһованын халгы нәзәрдә тутулур *. Ола билсин, Дәнјал пејғәмбәр бу ајәләрдә Аллаһын халгына гаршы сонунҹу һүҹуму тәсвир едир.

¹⁶ Шимал падшаһынын, о ҹүмләдән диҝәр һөкумәтләрин һүҹуму Гадир Аллаһы гәзәбләндирәҹәк вә беләҹә, Армаҝеддон мүһарибәси башлајаҹаг (Вәһј 16:14, 16). Һәмин вахт Мәҹуҹ өлкәсиндән олан  Јәҹуҹу тәшкил едән диҝәр милләтләрлә бирҝә шимал падшаһынын да «агибәти чатаҹаг вә дадына јетишән олмајаҹаг» (Дән. 11:45).

17. Дәнјал 12:1 ајәсиндә ады чәкилән «бөјүк әмир Микајыл» кимдир? О, инди нә едир вә јахын ҝәләҹәкдә нә едәҹәк?

¹⁷ Бу һадисәләрин тәсвир олундуғу ајәләрдән дәрһал сонра, нөвбәти ајәдә шимал падшаһынын вә мүттәфигләринин агибәти, еләҹә дә бизим хиласымыз барәдә тәфәррүатлардан бәһс олунур. (Дәнјал 12:1 ајәсини охујун.) Бу ајәнин мәнасы нәдир? Микајыл һал-һазырда идарә едән падшаһымыз Иса Мәсиһин диҝәр адыдыр. О, 1914-ҹү илдә ҝөјдә Падшаһлыг гуруландан бәри Аллаһын «халгынын һимајәсиндә» дурур. Јахын ҝәләҹәкдә, Армаҝеддон мүһарибәсиндә о, «ајаға галхаҹаг», јәни дүшмәнләрини мәһв едәҹәк. Бу мүһарибә јекун һадисә олаҹаг. Дәнјал бу мүһарибәни тарихдә ән «ағыр бир зәманә» адландырыр. Јәһјанын Вәһј китабында јаздығы пејғәмбәрликдә исә бу мүһарибә илә нәтиҹәләнән дөвр «бөјүк мүсибәт» адланыр (Вәһј 6:2; 7:14).

18. Гаршыдакы сынаглара ҹәсарәтлә синә ҝәрәҹәјимизә нәјә ҝөрә әмин ола биләрик?

¹⁸ Гаршыдакы сынаглара ҹәсарәтлә синә ҝәрәҹәјимизә әмин ола биләрик. Чүнки Дәнјал да, Јәһја да вурғулајыр ки, Јеһова вә Иса Мәсиһ бөјүк мүсибәт заманы садиг хидмәтчиләрини хилас едәҹәк. Дәнјал јазыр ки, хилас оланларын ады китабда јазылаҹаг (Дән. 12:1). Бәс адымызын о китабда јазылмасы үчүн нә едә биләрик? «Аллаһын Гузусу» олан Иса Мәсиһә иман етдијимизи ајдын шәкилдә ҝөстәрмәлијик (Јәһ. 1:29). Аллаһа һәср олунуб вәфтиз олунмалыјыг (1 Бут. 3:21). Инсанлара Јеһованы танымаға көмәк едәрәк Падшаһлығы дәстәкләмәлијик.

19. Инди нә етмәјин вахтыдыр вә нә үчүн?

¹⁹ Инди Јеһоваја вә Онун тәшкилатына етибарымызы мөһкәмләндирмәк вахтыдыр. Инди Аллаһын Падшаһлығыны дәстәкләмәк вахтыдыр. Бунлары етсәк, Аллаһын Падшаһлығы шимал падшаһыны вә ҹәнуб падшаһыны мәһв едәндә биз дә хилас оланларын арасында олаҹағыг.