1-2. Aha ma na laho iulas hita bani artikel on?

LAMBIN bahat do bukti na patuduhkon anggo sonari on hita manggoluh bani ujungni ari parpudi. Lang piga dokah nari, iripaskon Jahowa pakon Jesus Kristus ma ganup pamarentahan na manlawan hubani Harajaon ni Naibata. Tapi paima masa ai, torus do marsidoraban atap marsilawanan raja utara pakon raja selatan. Janah iserang sidea do homa juakjuak ni Naibata.

² Bani artikel on iulas hita ma holi panjahaion na isurat i Daniel 11:40–12:1. Holi iparlajari hita ma ise do na gabe raja utara sonari. Janah iulas hita homa mase pos uhurta paluahon ni Jahowa do holi hita, lang soal aha pe na masa.

3-4. Ise ma na gabe raja utara sonari? Patorang.

³ Dobkonsi lang adong be Uni Soviet bani tahun 1991, songon na bebas ma tongkin juakjuak ni Naibata. Nabi Daniel mangkatahon “dapot partolongan do sidea otik”. (Dan. 11:34) Hasilni, boi ma sidea marbarita use janah mintor tambah ma marratus ribu parbarita i nagori-nagori bagian Uni Soviet hinan. Tapi dob piga-piga tahun gabe raja utara ma Rusia pakon sekutuni. Songon na dob iulas hita bani artikel na salpu, dong tolu na maningon ibahen pamarentah na patuduhkon anggo sidea raja utara atap raja selatan: (1) iarsik-arsik haduasi raja ai do juakjuak ni Naibata, (2) taridah do humbani pambahenanni  anggo sidea munsuh ni Jahowa pakon juakjuak-Ni, anjaha (3) torus do marsilawanan sidea.

⁴ Pardiateihon ma alasan mase boi ihatahon hita anggo Rusia pakon sekutuni do na gabe raja utara sonari. (1) Iserang sidea do juakjuak ni Naibata marhitei manlarang horja parambilanonta, anjaha iparburu sidea do homa marratus ribu sanina botou na tading ijai. (2) Humbani pambahenanni taridah ma anggo sidea sogam mangidah Jahowa pakon juakjuak-Ni. (3) Marusaha do sidea ase gogohan humbani Inggris pakon Amerika Serikat, raja selatan ai. Sonari ulas hita ma aha do na ibahen Rusia pakon sekutuni, anjaha mase ai patuduhkon sidea do na gabe raja utara.

5. Pasal aha do na ipatorang bani Daniel 11:40-43?

⁵ Basa Daniel 11:40-43. Panjahaion na isurat ijon patorangkon pasal aha na laho masa bani panorang parpudi. Ijai ipatorang sonaha raja utara pakon raja selatan marsiporangan. Songon na ihatahon si Daniel, bani panorang marayak ujungni, “marsidoraban” atap marsilawanan ma raja utara pakon raja selatan.​—Dan. 11:40.

6. Bukti aha do na patuduhkon anggo haduasi raja ai torus marsilawanan?

⁶ Torus do raja utara pakon raja selatan marsilawanan halani haduasi sidea sihol gabe pamarentah na sigogohan i dunia on. Umpamani, pardiateihon ma aha na masa dobkonsi Porang Dunia II. Mulai ma irajai Uni Soviet nagori-nagori i Eropa. Halani ai, ibahen raja selatan ma perjanjian pakon nagori-nagori na legan. Ipasada sidea ma tentarani laho manlawan raja utara ai. Isobut ma organisasi ai NATO. Bahat tumang do homa duit iboiskon raja utara pakon raja selatan laho mampargogohi tentarani. Sanggah masa porang i Afrika, Asia, pakon Amerika Latin, iurupi raja utara ma munsuh ni raja selatan. Sonai homa raja selatan, iurupi do munsuh ni raja utara. Baru-baru on, domma lambin gogoh Rusia pakon sekutuni. Marhitei internet, ituduh sidea samah sidea do anggo munsuhni domma pasedahon sistem ekonomi ampa politik ni sidea marhitei program komputer. Anjaha songon na ihatahon si Daniel, iserang raja utara do homa juakjuak ni Naibata.​—Dan. 11:41.

7. Aha do “tanoh na marmulia ai”?

⁷ Bani Daniel 11:41 ihatahon das ma raja utara ai hu “tanoh na marmulia”. Aha do maksudni ai? Hinan, tanoh Israel do maksudni ai halani ai do “tanoh sijengesan humbani sagala nagori”. (Hes. 20:6) Tapi na mambahen tanoh ai ponting tumang ai ma ijai do tading sisombah Jahowa. Tapi humbani ari Pentakosta 33 M, tanoh na marmulia ai sedo sada ianan i tanoh on. Ihatahon sonai halani juakjuak ni Naibata dong i sab dunia on. Jadi sonari “tanoh na marmulia ai” mangartihon aha pe na ihorjahon juakjuak ni Naibata laho manombah Jahowa. Tarmasuk ma ai partumpuan ampa pangidangion ni sidea.

8. Sonaha raja utara das hu “tanoh na marmulia ai”?

⁸ Sadokah panorang parpudi, marulak-ulak do raja utara ai das hu “tanoh na marmulia ai”. Umpamani, das raja ai hu “tanoh na marmulia” sanggah Nazi Jerman na gabe raja utara. Iarsik-arsik janah ibunuh sidea do juakjuak ni Naibata tarlobih sadokah porang dunia na paduahon. Dobkonsi Porang Dunia II, sanggah Uni Soviet na gabe raja utara, das do raja ai hu “tanoh na marmulia”  sanggah iarsik-arsik sidea juakjuak ni Naibata janah iboan hu habuangan.

9. Baru-baru on, sonaha ma Rusia pakon sekutuni das hu “tanoh na marmulia ai”?

⁹ Baru-baru on, sonaha Rusia pakon sekutuni das hu “tanoh na marmulia”? Bani tahun 2017, ilarang raja utara ma horja parambilanonta. Ipenjarahon sidea do piga-piga sanina botounta. Janah ilarang do publikasinta ibagihon, tarmasuk ma Bibel Terjemahan Dunia Baru. Isita sidea do homa kantor cabang i Rusia, ampa Balei Harajaon pakon Balei Kebaktian. Halani ai, bani tahun 2018 ihatahon Pangurus Pusat ma anggo Rusia pakon sekutuni do na gabe raja utara. Hassi pe sonai pambahenan ni sidea, lang ongga Saksi-Saksi Jahowa marusaha manlawan pamarentah, atap marusaha ase sidea igantih. Tapi iihutkon sidea do podah ni Bibel. Itonggohon sidea do “haganup siparkuasa”, tarlobih sanggah pamarentah sihol mambahen haputusan na markaitan hubani horja parambilanonta.​—1 Tim. 2:1, 2.

10. Ai italuhon raja utara do holi raja selatan? Patorang.

¹⁰ Panjahaion na isurat bani Daniel 11:40-45 bahatan mangulas pasal aha na ihorjahon raja utara ai. Ai na laho italuhon raja utara do raja selatan? Lang. “Manggoluh” ope raja selatan sanggah roh Jahowa pakon Jesus laho manripaskon ganup pamarentahan i Harmagedon. (Pangk. 19:20) Hunja ibotoh hita ai? Pardiateihon ma panjahaion bani buku Daniel ampa Pangungkabon.

11. Aha do artini panjahaion bani Daniel 2:43-45? (Tonggor ma gambar sampul.)

¹¹ Basa Daniel 2:43-45. Ipatorang nabi Daniel ma aha do na igambarhon patung na banggal tumang, na ibahen humbani marmasam logam. Tiap bagian humbani patung ai manggambarhon pamarentahan na manrajai daerah na iiankon juakjuak ni Naibata. Janah lang bani panorang na sarupa sidea mamarentah. Nahei ni patung ai ibahen humbani bosi pakon tanoh liat. On manggambarhon pamarentahan na parpudi, ai ma Inggris pakon Amerika Serikat. Humbani panjahaion ai, ibotoh hita ma manrajai ope Inggris pakon Amerika Serikat sanggah roh Harajaon ni Naibata manripaskon ganup pamarentahan ni dunia on.

12. Manggambarhon aha do ulu na papituhon humbani binatang buas ai, janah mase porlu ibotoh hita on?

¹² Apostel Johannes pe patorangkon pasal pamarentahan na manrajai juakjuak ni Jahowa. Igambarhon do pamarentahan ai songon binatang buas na pitu uluni. Ulu na papituhon manggambarhon Inggris pakon Amerika Serikat. Ponting tumang do ibotoh hita on halani lang dong be ulu na legan dobkonsi ai. Mamarentah ope ulu na papituhon on sanggah Kristus pakon malekatni manripaskon binatang buas ai. *—Pangk. 13:1, 2; 17:13, 14.

13-14. Ise do “Gog na i tanoh Magog”, janah mase iserang sidea juakjuak ni Naibata?

¹³ Humbani panjahaion ni nabi Hesekiel ibotoh hita ma aha do na laho masa paima iripaskon raja utara pakon raja selatan. Anggo ipardiateihon hita panjahaion bani Hesekiel 38:10-23; Daniel 2:43-45; 11:44–12:1; pakon Pangungkabon 16:13-16, 21, sarupa do ra na igambarhon ijai. Anggo tongon do ai, gabe ibotoh hita ma aha do holi na laho masa.

¹⁴ Lang piga dokah dob ipungkah hamarsikon  banggal, marsada ma “raja-raja ni sab dunia on” mambahen sada kalompok. (Pangk. 16:13, 14; 19:19) Bani Bibel isobut do kalompok ai “Gog na i tanoh Magog”. (Hes. 38:2) Marusaha do sidea manripaskon ganup juakjuak ni Naibata. Halani aha do ase iserang sidea juakjuak ni Naibata? Dong do homa panjahaion na ipatugah si Johannes pasal panorang ai. Ia mangkatahon roh do udan sira-sira na banggal tumang na mangonai munsuh ni Naibata. Ra, udan sira-sira ai manggambarhon barita panguhuman na ipadas Saksi-Saksi Jahowa. Ra do ai na mambahen Gog hun Magog sihol manripaskon ganup juakjuak ni Naibata hun tanoh on.​—Pangk. 16:21.

15-16. (a) Domu bani Daniel 11:44, 45 aha do ra na laho masa ari simagira? (b) Aha do na laho masa bani raja utara pakon Gog hun Magog?

¹⁵ Ra, sarupa do na imaksud si Johannes ai pakon na ihatahon bani Daniel 11:44, 45. (Basa.) Ijai si Daniel mangkatahon anggo “barita na hun hapoltakan ampa na hun utara” mambahen raja utara ai tarsonggot, janah bingkat ma ia “ibagas gila”. Sihol do ia “manraseihon ampa mamboiskon buei halak”. “Buei halak” ijon ra do mangartihon juakjuak ni Jahowa. * Jadi, serangan na ipatugah si Daniel ijon ra do mangartihon serangan na parpudi hubani juakjuak ni Naibata.

¹⁶ Sanggah raja utara pakon pamarentahan na legan mamorangi juakjuak-Ni, gabe manggila tumang ma Naibata, Sigomgom Haganupan ai. Bani panorang ai ma roh Harmagedon. (Pangk. 16:14, 16) Sanggah ai, iripaskon ma raja utara pakon bangsa-bangsa na gabe bagian humbani Gog hun Magog, janah “lang dong na mangurupi” sidea.​—Dan. 11:45.

17. Ise do si Mikael, “kopala ni malekat na banggal ai” na isobut bani Daniel 12:1, janah aha do na ibahen ia?

¹⁷ Dobkonsi ai ipatugah si Daniel homa sonaha holi raja utara pakon pamarentah na legan iripaskon, ampa sonaha holi hita ipaluah. (Basa Daniel 12:1.) Aha do maksudni ai? Jesus Kristus do si Mikael na ipatugah bani ayat ai. Humbani tahun 1914 sanggah ia gabe raja i Harajaon ni Naibata, domma gabe “sijagai” juakjuak ni Naibata ia. Bani ari  simagira, “jongjong” do ia atap iripaskon ia do ganup munsuh ni Naibata i Harmagedon. On ma porang na parpudi, na isobut si Daniel “panorang hasosakan” na lape ongga masa sadokah on. Bani panjahaion ni si Johannes na isurat i buku Pangungkabon, panorang paima Harmagedon ai isobut “hamarsikon banggal”.​—Pangk. 6:2; 7:14.

18. Mase lang pala mabiar hita bani ari na laho roh?

¹⁸ Si Daniel pakon si Johannes mangkatahon sadokah hamarsikon banggal, paluahon ni Jahowa pakon Jesus do juakjuak ni Naibata. Jadi, lang pala mabiar hita bani aha na laho masa. Si Daniel mangkatahon halak na ipaluah ai ma halak na “tarsurat goranni bani buku ai”. (Dan. 12:1) Sonaha ase goranta tarsurat bani buku ai? Maningon marhaporsayaon do hita bani Jesus, biribiri ni Naibata. (Joh. 1:29) Maningon iondoskon hita do dirinta bani Naibata anjaha ididi. (1 Ptr. 3:21) Janah maningon marpihak do hita bani Harajaon ni Naibata marhitei mangurupi halak marlajar pasal Jahowa.

19. Aha do na maningon bahenonta humbani sonari?

¹⁹ Jadi, humbani sonari, patoguh ma haporsayaonta hubani Jahowa. Patuduh ma anggo hita marpihak hubani Harajaon ni Naibata. Anggo sonai ibahen hita, ipaluah do holi hita sanggah Harajaon ni Naibata manripaskon raja utara pakon raja selatan.