1-2. An bena mun lo lajɛ barokun nin na?

DALILU caaman b’a yira bi ka tɛmɛ sanga ni wagati bɛɛ kan ko an be duniɲa nin laban wagati la. Gofɛrɛnɛman minw be Ala ka Masaya kɛlɛ, Jehova ni Yezu Krista bena u bɛɛ halaki yanni dɔɔni. Yanni o cɛ, saheli yanfan fɛ masacɛ ani worodugu yanfan masacɛ bena to ka ɲɔgɔn kɛlɛ ani ka Ala sagokɛlaw fana kɛlɛ.

² Barokun nin na, an bena Daniyɛli 11:40–12:1 ka kiraya kuma lajɛ. An bena a ye saheli yanfan fɛ masacɛ ye min ye bi. An bena a ye fana fɛɛn min kama an hakili siginin be se ka to ani ka la a la ko Jehova bena an kisi gwɛlɛyaw bɛɛ n’a ta.

3-4. Jɔn lo ye saheli yanfan fɛ masacɛ ye bi? A ɲɛfɔ.

³ Saan 1991, Soviyetiki mara ka fanga nagasira. O kɔ, Ala sagokɛlaw ye “dɛmɛ dɔɔni dama sɔrɔ” yen, o kɔrɔ, u lafiyara dɔɔni (Dan. 11:34). O kama, u sera ka waajuli kɛ u sago la. Dɔɔni o kɔ, jamana minw tun be Soviyetiki mara kɔnɔ, caaman farala weleweledalaw hakɛ kan yen. U kɛra mɔgɔ waa kɛmɛ kɛmɛ caaman ye. Saan damanin o kɔ, Irisi jamana n’a jɛnɲɔgɔnw kɛra saheli yanfan fɛ masacɛ ye. Barokun tɛmɛnin na, an y’a ye ko walisa gofɛrɛnɛman dɔ ka kɛ saheli yanfan fɛ wala worodugu yanfan fɛ masacɛ ye, a ka ɲi ka koo saba nunu kɛ: 1) Ala ka mɔgɔw ka ca yɔrɔ minw na, o masacɛ ka ɲi ka kuntigiya kɛ yen wala k’u tɔɔrɔ, 2) k’a yira a ka kɛwalew  fɛ ko Jehova n’a sagokɛlaw koo ka gwo a ye ani 3) o masacɛ ni tɔɔ kelen ka ɲi ka ɲɔgɔn kɛlɛ.

⁴ An k’a filɛ fɛɛn min kama an be se k’a fɔ ko Irisi n’a jɛnɲɔgɔnw lo ye saheli yanfan fɛ masacɛ ye bi. 1) U ye Ala sagokɛlaw kɛlɛ u kɛtɔ ka bali sigi u ka waajuli baara kan ani ka balima waa caaman tɔɔrɔ. 2) O b’a yira ko Jehova n’a sagokɛlaw koo ka gwo u ye. 3) Irisi n’a jɛnɲɔgɔnw ni worodugu yanfan fɛ masacɛ be ɲɔgɔn kɛlɛla. Worodugu yanfan fɛ masacɛ ye Angletɛri ni Ameriki lo ye. An k’a filɛ Irisi n’a jɛnɲɔgɔnw ye min kɛ ani fɛɛn min kama u ye saheli yanfan fɛ masacɛ ye.

5. Daniyɛli 11:40-43 be kuma mun lo koo la?

⁵ Daniyɛli 11:40-43 kalan. O kiraya kuma be laban wagati lo kofɔ. Bɛnbaliya min be saheli yanfan fɛ masacɛ ani worodugu yanfan fɛ masacɛ cɛ, a b’o yira ka gwɛ. Daniyɛli ko laban wagati la, o masacɛ fila bena ɲɔgɔn “kɛlɛ.” A y’a fɔ fana u bena o kɛ cogo min na.—Dan. 11:40.

6. Mun lo b’a yira ko saheli yanfan fɛ masacɛ ni worodugu yanfan fɛ masacɛ be ɲɔgɔn kɛlɛla?

⁶ O masacɛ fila bele be ɲɔgɔn kɛlɛla kuntigiya kosɔn duniɲa kɔnɔ. Ɲɛyirali fɛ, kɛlɛba 2nan kɔ, Soviyetiki mara n’a jɛnɲɔgɔnw y’a daminɛ ka kuntigiya kɛ yɔrɔ caaman na Erɔpu. O kama, worodugu yanfan fɛ masacɛ jɛnna ni jamana wɛrɛw ye ka ɔriganisasiyɔn dɔ sigi min be weele ko OTAN. A y’o kɛ walisa u k’u ka kɛlɛbolow fara ɲɔgɔn kan ka saheli yanfan fɛ masacɛ kɛlɛ. Saheli yanfan fɛ masacɛ ni worodugu yanfan fɛ masacɛ be wari caaman don kɛlɛkɛminanw na. U kelen kelen bɛɛ b’a fɛ a ka kɛlɛbolo barika ka bonya ni tɔɔw ta ye. U ye ɲɔgɔn kɛlɛ fana u kɛtɔ ka ɲɔgɔn juguw dɛmɛ kɛlɛ la Afiriki, Azi ani Ameriki Latine. A saan damanin ye nin ye, dɔ be farala Irisi n’a jɛnɲɔgɔnw ka setigiya kan. U be tɛmɛ ɔridinatɛriw fɛ ka worodugu yanfan fɛ masacɛ kɛlɛ. O masacɛw kelen kelen b’a tɔɲɔgɔn jalaki ko a be tɛmɛ ɔridinatɛri porogramuw fɛ k’a kɛ ale be bɔnɛ wari la ani k’ale ka gofɛrɛnɛman nagasi. Ka kɛɲɛ ni Daniyɛli ka fɔta ye, saheli yanfan fɛ masacɛ bele be Ala sagokɛlaw kɛlɛla fana.—Dan. 11:41.

7. “Jamana min ka di ni jamanaw bɛɛ ye,” o ye mun lo ye?

⁷ Daniyɛli 11:41 b’a fɔ ko “jamana min ka di ni jamanaw bɛɛ ye,” saheli yanfan fɛ masacɛ bena don yen. O ye jamana juman lo ye? Galen, o tun ye Israɛl jamana lo ye, o min tun be jati “jamanaw bɛɛ la ɲuman” ye (Ezek. 20:6). O jamana tun ka di kosɔbɛ sabu tiɲɛn batoli tun be kɛ yen le. Kabi saan 33 Pantekɔte loon na, “jamana min ka di ni jamanaw bɛɛ ye,” o tɛ yɔrɔ tigitigi dɔ ye tugun. Mun na do? Sabu bi, Jehova sagokɛlaw jɛnsɛnnin lo dugukolo kuru bɛɛ kan. O la, “jamana min ka di ni jamanaw bɛɛ ye,” o ɲɛsinna Jehova sagokɛlaw ka ɲɛnamaya kɛcogo lo ma. O faan dɔ ye u ka batoli ye, u be min lase Jehova ma lajɛnw ni waajuli sababu fɛ.

8. “Jamana min ka di ni jamanaw bɛɛ ye,” saheli yanfan fɛ masacɛ donna yen cogo di?

 ⁸ Laban wagati la, “jamana min ka di ni jamanaw bɛɛ ye,” saheli yanfan fɛ masacɛ donna yen siɲɛ caaman. Tuma min na Alemaɲi tun ye saheli yanfan fɛ masacɛ ye, ale donna yen kɛlɛba 2nan wagati la. Naziw lo tun be Alemaɲi kun na. Alemaɲi donna o jamana kɔnɔ cogo di do? A ye Jehova sagokɛlaw tɔɔrɔ ani k’u caaman faga. Kɛlɛba 2nan kɔ, Soviyetiki mara kɛra saheli yanfan fɛ masacɛ ye. “Jamana min ka di ni jamanaw bɛɛ ye,” ale donna yen a kɛtɔ ka Ala sagokɛlaw tɔɔrɔ ani ka taga n’u caaman ye fanga baarakɛyɔrɔw la.

9. A saan damanin ye nin ye, “jamana min ka di ni jamanaw bɛɛ ye,” Irisi jamana n’a jɛnɲɔgɔnw donna yen cogo di?

⁹ An y’a ye ko Irisi jamana n’a jɛnɲɔgɔnw lo ye saheli yanfan fɛ masacɛ ye bi. “Jamana min ka di ni jamanaw bɛɛ ye,” a saan damanin ye nin ye, olu fana donna yen. Cogo di do? Saan 2017, u ye bali sigi Jehova sagokɛlaw ka baara kan ani k’u dɔw don kaso la. U ye bali sigi an ka sɛbɛw kan, hali Bibulu Traduction du monde nouveau yɛrɛ. U fana y’an ka Betɛli, Masaya Boonw ani lajɛnba kɛyɔrɔw bɔsi an na. O walew kɔ, Koow Ɲɛnabɔla Jɛnkulu y’a fɔ saan 2018 ko Irisi n’a jɛnɲɔgɔnw lo ye saheli yanfan fɛ masacɛ ye. Jehova sagokɛlaw t’a ɲini abada ka gofɛrɛnɛman si kɛlɛ wala ka dɔ wɛrɛ sigi a nɔɔ na. An t’o kɛ hali n’o gofɛrɛnɛman b’an tɔɔrɔla. Bibulu b’a fɔ ko an ka delili kɛ “masaw ni fangatigiw” bɛɛ ye. An b’o ladili sira tagama sanko n’o masaw b’a fɛ ka koo dɔ latigɛ min be se k’an bali ka Jehova bato a ɲɛɛ ma.—1 Tim. 2:1, 2.

10. Saheli yanfan fɛ masacɛ bena se ka worodugu yanfan fɛ masacɛ halaki wa? A ɲɛfɔ.

¹⁰ Daniyɛli 11:40-45 ka kiraya kuma be sinsin saheli yanfan fɛ masacɛ ka kɛtaw lo kan. Yala o kɔrɔ ko a bena se ka worodugu yanfan fɛ masacɛ halaki wa? Ayi. Sabu tuma min na Jehova ni Yezu bena adamadenw ka gofɛrɛnɛmanw bɛɛ halaki Arimagedɔn kɛlɛ la, worodugu yanfan fɛ masacɛ bele bena kɛ yen (Yir. 19:20). Mun na an lanin b’o la? An k’a filɛ min fɔra kiraya kumaw na minw be Daniyɛli ani Yirali ka kitabuw kɔnɔ.

11. Daniyɛli 2:43-45 be mun lo yira? (Jaa lajɛ ɲɛɛ fɔlɔ kan.)

¹¹ Daniyɛli 2:43-45 kalan. Daniyɛli ye adamadenw ka gofɛrɛnɛman dɔw kofɔ minw tugutugura ɲɔgɔn kɔ ani u ye nɔɔ to Ala sagokɛlaw kan. Jaa belebeleba min dilanna ni nigɛ ye, Daniyɛli k’o gofɛrɛnɛmanw y’o jaa yɔrɔw lo ye. A k’o gofɛrɛnɛmanw laban ye jaa sentigɛ lo ye min dilanna ni nigɛ ni bɔgɔ ye. O gofɛrɛnɛman ye Angletɛri ni Ameriki ka fangatigiya lo ye. Daniyɛli ka kiraya kuma b’a yira ko Angletɛri ni Ameriki bele bena kɛ yen fɔɔ tuma min na Ala ka Masaya bena adamadenw ka gofɛrɛnɛmanw halaki.

12. Sogo kungolo 7nan ye mun lo tagamasiɲɛ ye? Mun na a kɔrɔtanin lo an k’o lɔn?

¹² Ciden Zan fana ye kiraya kɛ ko gofɛrɛnɛman dɔw bena tugutugu ɲɔgɔn kɔ ani u bena nɔɔ to Jehova sagokɛlaw kan. A ye sogo dɔ kofɔ min be ni kungolo 7 ye. Kungolo kelen kelen bɛɛ ye gofɛrɛnɛman dɔ lo tagamasiɲɛ ye. Kungolo 7nan ye Angletɛri ni Ameriki  ka fangatigiya lo ye. A kɔrɔtanin lo an k’o lɔn sabu kungolo 8nan tɛ yen. Kungolo 7nan do bena kɛ yen tuma min na Krista n’a ka sankolola kɛlɛbolow bena ale ni sogo tɔɔ halaki. *—Yir. 13:1, 2; 17:13, 14.

13-14. “Gɔgi . . . min be Magɔgi jamana na,” o ye mun lo ye? N’a sɔrɔ mun lo bena a lasun ka wuli Ala sagokɛlaw kama?

¹³ A be komi koo minw bena saheli yanfan fɛ masacɛ ani worodugu yanfan fɛ masacɛ sɔrɔ laban wagati la, Ezekiyɛli 38:10-23 b’an dɛmɛ k’o lo faamu. N’a sɔrɔ kiraya kuma nunu fana ɲɛsinna o koow lo ma: Daniyɛli 2:43-45, 11:44–12:1 ani Yirali 16:13-16, 21. N’o lo, an k’a filɛ koo minw be se ka kɛ.

¹⁴ Wagati dɔ la tɔɔrɔba daminɛnin kɔ, “diɲɛ kɔnɔ masaw” bena fara ɲɔgɔn kan ka kɛ jɛnkulu kelen ye (Yir. 16:13, 14; 19:19). Bibulu b’o jɛnkulu lo weele ko “Gɔgi . . . min be Magɔgi jamana na.” (Ezek. 38:2). O jɛnkulu bena wuli Ala sagokɛlaw kama. A bena a ɲini k’u halaki pewu. Mun na do? Kira Zan y’a fɔ o wagati koo la ko sanbɛrɛ gwilimanw bena ben Ala juguw kan. N’a sɔrɔ o sanbɛrɛw ye Jehova ka kitiko gwɛlɛw lo ye, a sagokɛlaw bena minw lase mɔgɔw ma. Gɔgi min be Magɔgi, n’a sɔrɔ o kiti kumaw lo bena ale lasun a b’a ɲini ka Ala sagokɛlaw halaki pewu a kɛtɔ ka wuli u kama.—Yir. 16:21.

15-16. a) N’a sɔrɔ koo jumanw lo lakalila Daniyɛli 11:44, 45 kɔnɔ? b) Mun lo bena saheli yanfan fɛ masacɛ ni jamana tɔɔw sɔrɔ?

¹⁵ An y’a ye ko Ala sagokɛlaw bena a ka kitiko gwɛlɛw fɔ ani ko a juguw bena a ɲini k’a sagokɛlaw halaki pewu. N’a sɔrɔ o lo lakalila Daniyɛli 11:44, 45 kɔnɔ. (A kalan.) Daniyɛli ko “kibaruyaw bena bɔ kɔrɔn fɛ, ni [saheli] ɲafan fɛ,” ka na saheli yanfan fɛ masacɛ hakili ɲagami. “A dimininba” bena a ɲini ka “mɔgɔ caaman nii bɔ.” A be komi o mɔgɔw ye  Ala sagokɛlaw lo ye. * N’a sɔrɔ Daniyɛli b’a fɔra le ko Ala juguw bena a ɲini k’a sagokɛlaw halaki pewu!

¹⁶ Tuma min na saheli yanfan fɛ masacɛ ni jamana wɛrɛw bena wuli Jehova sagokɛlaw kama, o bena Sebagayabɛɛtigi dimi kosɔbɛ. O bena a to Arimagedɔn kɛlɛ be daminɛ (Yir. 16:14, 16). Saheli yanfan fɛ masacɛ ni jamana tɔɔw bena halaki o wagati la ani “dɛmɛbaga si tena sɔrɔ [u] la.” (Dan. 11:45). O jamanaw lajɛnnin lo ye Gɔgi ye min be Magɔgi.

17. “Mɛlɛkɛw kuntigiba” Misɛli min kofɔra Daniyɛli 12:1 kɔnɔ, ale ye jɔn lo ye? A be mun lo kɛra sisan ani a bena mun lo kɛ yanni dɔɔni?

¹⁷ Saheli yanfan fɛ masacɛ ni jamana tɔɔw bena halaki ani an bena kisi. O bena kɛ cogo min na, Daniyɛli 12:1 be kunnafoni wɛrɛw di an ma o koo la. (A kalan.) O vɛrise kɔrɔ ko di? Misɛli y’an ka Masacɛ Yezu Krista tɔgɔ dɔ lo ye. A be Ala sagokɛlaw dɛmɛna kabi saan 1914. O tuma lo la Ala ka Masaya sigira sen kan sankolo la. Yanni dɔɔni, Yezu “bena bɔ,” o kɔrɔ, a bena wuli a juguw kama k’u halaki Arimagedɔn kɛlɛ la. Daniyɛli k’o kɛlɛ bena kɛ “waatigwɛlɛn” dɔ laban ye, o min ɲɔgɔn ma deli ka kɛ. Yirali ka kitabu kɔnɔ, Zan k’o ye “tɔɔrɔba” wagati lo ye.—Yir. 6:2; 7:14.

18. Koow mana kɛ cogo o cogo, mun na an hakili siginin be se ka to?

¹⁸ Daniyɛli ni Zan y’a fɔ ko Jehova ni Yezu bena u sagokɛlaw kisi tɔɔrɔba wagati la. O kama, koow mana kɛ cogo o cogo, an hakili siginin be se ka to. Daniyɛli ko minw tɔgɔ sɛbɛnin lo “Ala ka sɛbɛ kɔnɔ,” olu lo bena kisi (Dan. 12:1). An be se ka mun lo kɛ walisa an tɔgɔ ka sɔrɔ o sɛbɛ kɔnɔ? An ka ɲi k’a yira ko an limaniyanin lo Yezu la, ale min ye Ala ka Sagaden ye (Zan 1:29). An ka ɲi k’an yɛrɛkun di Ala ma ani ka batize (1 Piyɛri 3:21). Ka fara o kan, an ka ɲi ka dɛmɛ don Ala ka Masaya ka koow la, an kɛtɔ ka tɔɔw dɛmɛ u ka Jehova lɔn.

19. An ka ɲi ka mun ni mun lo kɛ sisan ani mun na?

¹⁹ Sisan lo an ka ɲi k’an jigi la kosɔbɛ Jehova n’a ka ɔriganisasiyɔn kan ani ka dɛmɛ don a ka Masaya ka koow la. O la, an bena kisi tuma min na Ala ka Masaya bena saheli yanfan fɛ masacɛ ani worodugu yanfan fɛ masacɛ halaki.