1-2. Ka nou ké vwè adan awtik-lasa ?

NI ONPAKÈT prèv ki ka montré kè nou ka viv dènyé jou a mond-lasa. Nou po’o té jen ni tousa prèv. Talè, Jéova é Jézi ké détwi tout gouvènman ki kont Wayòm-la. Men avan sa fèt, wa di Nò la é wa di Sid la ké kontinyé goumé yonn èvè lòt é yo ké kontinyé goumé èvè pèp a Bondyé.

² Adan awtik-lasa, nou ké palé dè on pwofési kè nou ka touvé an Danyèl 11:40 – 12:1. Nou ké vwè kimoun ki wa di Nò jòdijou. Nou ké vwè osi poukwa nou pé rété kalm é poukwa fò-nou ni konfyans kè Jéova ké sové-nou kèlkèswa sa ki rivé.

3-4. Kimoun ki wa di Nò jòdijou ? Bay on ti èsplikasyon.

³ Lè Linyon sovyétik disparèt an 1991, sèwvitè a Bondyé ki té anba dominasyon a-y, touvé-yo lib pannan on moman. Danyèl ka kriyé libèté-lasa « tibwen sèkou » (Dan. 11:34). Kifè, sa pèwmèt-yo préché alèz a yo é adan on batzyé, yo té a plizyè santenn dè milyé adan sé péyi-la ki té ka fè pawti a Linyon sovyétik. Men apré kèlkè lanné, Larisi é sé péyi-la ki té ka soutyenn-li la vin wa di Nò. Kon nou vwè adan awtik a simenn pasé, pou nou pé sa di kè on gouvènman wa di Nò oben wa di Sid, fò i ka fè twa biten alafwa. 1) Fò i ka gouvèné sèwvitè a Bondyé é fò i ka pèwsékité-yo, 2) fò i ka montré kè i lènmi èvè Jéova é èvè pèp a-y é 3) fò i anripaj èvè lòt wa-la.

 ⁴ An-nou vwè poukisa nou pé di jòdijou kè wa di Nò la sé Larisi é sé péyi-la ki èvè-y la. 1) Yo ka ataké pèp a Bondyé pou anpéché-y préché é yo ka pèwsékité-y. 2) Mannyè yo ka aji ka montré kè yo hay Jéova é pèp a-y. 3) Yo bizwen vin pi fò ki wa di Sid la, kivédi pi fò ki Langlètè é Lamérik. An-nou vwè ka Larisi é sé péyi-la ki èvè-y la fè, é poukwa sa ka montré kè sé yo ki wa di Nò.

5. Dè ki péryòd Danyèl 11:40-43 ka palé, é ka i ka pasé pannan péryòd-lasa ?

⁵ (Li Danyèl 11:40-43.) Adan pwofési a Danyèl, pawti-lasa ka konsèwné on péryòd yo ka kriyé « tan a lafen ». I ka montré kè wa di Nò la té’é anripaj èvè wa di Sid la. Danyèl té ja anonsé kè an tan a lafen, wa di Sid la té’é ay goumé èvè wa di Nò la é kè i té’é bay on pousad, kivédi yonn té’é goumé èvè lòt (Dan. 11:40 ; nòt).

6. Sé 2 wa-la anripaj é yonn ka bouré lòt. Ka i ka montré sa ?

⁶ Wa di Nò la é wa di Sid la ka kouri dèyè pouvwa-la pas yochak té’é vé kè sé gouvènman a yo ki pi puisan asi latè. Pa ègzanp, apré 2^èm Gè mondyal la, Linyon sovyétik koumansé gouvèné on gwo pawti a Léwòp. Wa di Sid la mété-y dakò èvè dòt péyi pou lawmé a yo fè onsèl pou yo goumé èvè wa di Nò la. Yo ka kriyé òwganizasyon-lasa : Òwganizasyon a Akò a Latlantik Nò (OTAN an fransé). Dépi sa, wa di Nò la é wa di Sid la kontinyé dépansé onpakèt lajan pou yo pé sa ni on gwo lawmé. Défwa, lè 2 péyi té ka goumé, wa di Nò la té ka pran pou yonn é wa di Sid la té ka pran pou lòt la. Sé sa ki fèt an Afrik, an Azi é an Amérik latin. Dépi kèlkètan, Larisi é sé péyi-la ki èvè-y la ka montré toutmoun asi latè kè yo ni onlo pouvwa. Yo ka sèvi èvè òwdinatè osi pou yo pé sa goumé èvè wa di Sid la. Sé 2 wa-lasa ka sèvi èvè pwogram ki asi òwdinatè pou yonn fè lòt pèd lajan é pou yonn fè gouvènman a lòt pèd fòs. É kon Danyèl té ja anonsé, wa di Nò la ka kontinyé ataké pèp a Bondyé (Dan. 11:41).

7. « Bèl Péyi-la », ka sa yé ojis ?

⁷ Danyèl 11:41 té anonsé kè wa di Nò la té’é rantré adan « Bèl Péyi-la ». Ki péyi ésa ? An tan lontan, Izrayèl sé té « pi bèl péyi ki té tini » (Ézék. 20:6). Si yo té ka di kè péyi-lasa té bèl, sé paskè sé la yo té ka adoré Jéova. Men dépi Lapannkòt 33, « Bèl Péyi-la » a pa on koté asi latè ankò. Dayè pou yonn sa pa posib piskè sèwvitè a Bondyé ka viv toupatou asi latè. Jòdijou, « Bèl Péyi-la » ni on rapò èvè sa sèwvitè a Bondyé ka fè touléjou pou suiv prensip a-y adan vi a yo. Pa ègzanp, lè yo k’ay réinyon oben lè yo k’ay préché yo ka montré kè yo adan Bèl Péyi-lasa.

8. Kijan wa di Nò la rantré adan « Bèl Péyi-la » ?

⁸ Pannan dènyé jou a sistèm-lasa, wa di Nò la rantré adan « Bèl Péyi-la » a plizyè rèpriz. Pa ègzanp, lè Lalmagn nazi té wa di Nò, é siwtou pannan 2^èm Gè mondyal la i rantré adan « Bèl Péyi-la » pas i pèwsékité é i tchouyé sèwvitè a Bondyé. É apré 2^èm Gè mondyal la, lè Linyon sovyétik té wa di Nò, i rantré adan « Bèl Péyi-la » pas i pèwsékité sèwvitè a Bondyé. I té ka voyé-yo pa fòs lwen a kaz a yo.

9. Dépi déotwa lanné, Larisi é sé péyi-la ki ka soutyenn-li la rantré adan « Bèl Péyi-la ». Kijansa ?

 ⁹ Dépi déotwa lanné, Larisi é sé péyi-la ki ka soutyenn-li la rantré adan « Bèl Péyi-la ». Kijansa ? An 2017, wa di Nò lasa entèwdi aktivité a Témwen a Jéova é i mèt déotwa adan yo lajòl. I di osi kè i vé pa vwè piblikasyon a Témwen a Jéova an péyi a-y é i vé pa vwè Traduction du monde nouveau la nonplis. Anplisdisa, i pran Bétèl a Larisi, déotwa Sal di Wayòm é déotwa Sal a lasanblé. Sé konsa an 2018, Komité santral la di kè Larisi é sé péyi-la ki èvè-y la sé wa di Nò la. Sèlman, pèp a Bondyé pa’a chèché a goumé èvè pon kalté gouvènman é yo pa’a chèché a chalviré-yo nonplis menmsi sé gouvènman-la ka pèwsékité-yo. Okontrè, yo ka suiv konsèy a Labib ki ka ankourajé-nou a priyé pou touséla ki ni on ‘gwo plas adan sé gouvènman-la’, siwtou lèwvwè sé gouvènman-lasa kay pran on désizyon pou di si yo ka ban-nou dwa, oben si yo ka entèwdi-nou adoré Bondyé (1 Tim. 2:1, 2).

10. Ès wa di Nò la ké rivé about a wa di Sid la ? Bay on ti èsplikasyon.

¹⁰ Danyèl 11:40-45 ka palé siwtou dè wa di Nò la. Men ès sa vé di kè i ké rivé about a wa di Sid la ? Awa ! Wa di Sid la ké vivan toujou lè Jéova é Jézi ké détwi tout gouvènman ki ni asi latè pannan Awmagédon (Rév. 19:20). Poukwa nou pé sèten dè sa ? An-nou vwè ka pwofési a Danyèl é ta Révélasyon ka di-nou asi sa.

11. Ka Danyèl 2:43-45 ka aprann-nou ? (gadé imaj-la ki asi po a jounal-la).

¹¹ (Li Danyèl 2:43-45.) Pwofèt Danyèl ka palé dè plizyè gouvènman diféran ki jouwé on wòl adan vi a sèwvitè a Bondyé. Adan pwofési-lasa, yo palé dè on gran gran èstati. Chak pawti a kò a-y fèt èvè on métal diféran é ka rèprézanté on gouvènman. Dènyé gouvènman-la sé 2 pyé a èstati-la. Yo fèt an fè é an awjil. Sé pyé-lasa ka rèprézanté Langlètè é Lamérik, on Puisans mondyal. Pwofési a Danyèl ka montré kè puisans-lasa ké ka gouvèné toujou lè wayòm a Bondyé ké détwi tout gouvènman ki asi latè.

12. Ka 7^èm tèt-la ka rèprézanté, é ki enfòwmasyon enpòwtan pou nou rètyenn ?

¹² Lapòt Jan osi ka palé dè plizyè gouvènman diféran ki jouwé on wòl adan vi a sèwvitè a Bondyé. I ka di kè yo kon on bèt sovaj ki ni 7 tèt. 7^èm tèt-lasa sé Langlètè é Lamérik. Sa enpòwtan kè nou sav sa pas pa ni dòt tèt apré 7^èm tèt-lasa. 7^èm tèt-la ké ka gouvèné toujou lè Jézikris é zanj a-y ké détwi-y anmenmtan ki rèstan a bèt-la * (Rév. 13:1, 2 ; 17:13, 14).

13-14. Ka ki « Gòg ki sòti an péyi a Magòg » é pétèt ka ki ké pousé-y ataké pèp a Bondyé ?

¹³ Ézékyèl ékri on pwofési ki ka di-nou ka ki pé rivé a fèt avan yo détwi wa di Nò la é wa di Sid la. I ka sanm sa kè Ézékyèl 38:10-23, Danyèl 2:43-45, Danyèl 11:44 – 12:1, é Révélasyon 16:13-16, 21 ka palé dè menm biten-la. Si sé sa, pétèt kè nou ké viv sé évènman-la nou kay ègzaminé adan sé paragraf-la ki ka vin la.

¹⁴ Gwo tribilasyon-la ké koumansé é on ti moman apré, « sé wa-la ki asi tout latè » ké mèt-yo ansanm pou fòwmé on  gwoup (Rév. 16:13, 14 ; 19:19). Adan Labib, yo ka kriyé gwoup-lasa « Gòg ki sòti an péyi a Magòg » (Ézék. 38:2). Sé nasyon-lasa ké ataké sèwvitè a Bondyé toupatou si latè é yo ké éséyé détwi yotout. Ka ki ké pousé-yo fè sa ? Adan on vizyon ki ka konsèwné épòk-lasa, lapòt Jan vwè on tanpèt a lagrèl ki té ka tonbé anlè lènmi a Bondyé. Chak mòso glas-la té gwo toubònman ! Pétèt kè tanpèt a lagrèl-lasa ka rèprézanté on mésaj a kondannasyon é sé sèwvitè a Bondyé ki ké anonsé-y. Sé pé ké on mésaj an kouyonnad ! É sé pétèt sa ki ké pousé Gòg dè Magòg ataké pèp a Bondyé pou éséyé fè-y disparèt (Rév. 16:21).

15-16. a) Dè ki biten Danyèl 11:44, 45 dwèt ka palé ? b) Ka ki ké rivé wa di Nò la é sélézòt nasyon-la kivédi Gòg dè Magòg ?

¹⁵ Pétèt kè mésaj puisan-lasa é dènyé fwa lènmi a Bondyé ké ataké sèwvitè a-y ka korèsponn èvè sa nou ka touvé adan Danyèl 11:44, 45 (li-y). Adan sé vèwsé-lasa, Danyèl ka di kè ni déotwa « nouvèl ki sòti a lès é ki sòti o nò » ki ké tèwbolizé lèspri a wa di Nò la. É i ké pati « anrajé menm ». Wa-lasa ké vin èvè lidé i ké « détwi on gran kantité moun », kivédi « on gran kantité » a sèwvitè a Bondyé * pétèt. Pétèt kè adan pasaj-lasa Danyèl ka palé dè dènyé fwa yo ké ataké pèp a Bondyé.

¹⁶ Lè wa di Nò la é sélézòt gouvènman-la ké ataké pèp a-y, Bondyé Toupuisan la ké fè gwo kòlè é lagè a Awmagédon kè koumansé (Rév. 16:14, 16). Alò, Bondyé ké détwi wa di Nò la é sélézòt nasyon-la kivédi Gòg dè Magòg é « pé’é ni ponmoun pou pòté-y sèkou » (Dan. 11:45).

17. a) Adan Danyèl 12:1 yo ka palé dè Michèl, « gran prens-la ». Kimoun ésa é ka i ka fè konnyéla ? b) An ki sans Michèl ké « mété-y doubout » ?

¹⁷ An Danyèl 12:1, yo ka ban-nou plis détay asi mannyè yo ké détwi wa di Nò la é sé gouvènman-la ki èvè-y la. Anplisdisa, yo ka ban-nou détay asi jan Bondyé ké sové-nou (li-y). Ka vèwsé-lasa vlé di ?  Déja, fò-nou sav kè Jézikris, Wa an nou, ni ondòt non. Yo ka kriyé-y Michèl osi. I ka aji an favè a pèp a Bondyé dépi i vin Wa a wayòm a Bondyé an syèl-la an 1914. Talè, i ké ‘mété-y doubout’ kivédi i ké ataké lènmi a-y pannan lagè a Awmagédon. É lagè-lasa sé ké dènyé évènman a on péryòd kè Danyèl ka kriyé « on tan a malè » kè nou pò’ò jen vwè adan tout Listwa a limanité. Adan Larévélasyon nou ka touvé on pwofési a Jan ki ka palé dè péryòd-lasa. É yo ka kriyé-y « gwo tribilasyon-la » (Rév. 6:2 ; 7:14).

18. Poukwa dépi aprézan nou pé ni lèspri trankil kèlkèswa sa ki ké fèt plita ?

¹⁸ Fò pa sé évènman-la nou sòti ègzaminé la fè nou pè pas ki Danyèl ki Jan ka di-nou kè Jéova é Jézi ké sové sèwvitè a yo pannan gwo tribilasyon-la. Alò, dépi aprézan nou pé ni lèspri trankil kèlkèswa sa ki ké pasé. Danyèl di konsa kè séla ki ké sové la ké ni non a yo « maké adan liv-la » (Dan. 12:1). Ka fò-nou fè pou non an nou maké adan liv-lasa ? Fò-nou montré on mannyè ki klè kè nou ni fwa an Jézi, Timouton a Bondyé (Jan 1:29). Fò-nou ba Bondyé vi an nou é fò-nou pran lèbatèm (1 Pyè 3:21). É fò-nou fè tousa nou pé pou édé lézòt aprann konnèt Jéova. Konsa nou ké montré kè nou ka soutyenn Wayòm-la.

19. Ka fò-nou fè dépi alè, é poukwa sa ?

¹⁹ Sé dépi alè pou nou fè tousa ki fo pou nou ni plis konfyans adan Jéova é adan òwganizasyon a-y. Sé dépi alè osi pou nou soutyenn wayòm a Bondyé. É si sé sa nou ja ka fè, Bondyé ké sové-nou jou-la wayòm-lasa ké détwi wa di Nò la é wa di Sid la !