1-2. Hea lekhant ami kitem bhasabhas kortolim?

AMI hea sonvsarachea nimannea disanchea nimannea disamnim asat mhunn sangonk amkam aiz poilim poros chodd purave asat. Beginuch, Jehova ani Jezu Krist aplea Rajeachea add voitat tea soglea sorkarancho nas kortolo. Hem zaunchea poilim, ut’torecho raza ani dokxinnecho raza eka-meka add ani Devachea lokam add zhuzot ravtole.

² Hea lekhant, ami Daniel 11:40–12:1-ant aslolea bhasaunne vixim bhasabhas kortolim. Ut’torecho raza aiz konn asa tea vixim ami xiktolim ani fuddarak kitem-i zaum Jehovacher ami kiteak patieun ravonk xoktat hea vixim ami bhasabhas kortolim.

3-4. Aiz ut’torecho raza konn zaun asa? Somzaiat.

³ 1991 hea vorsa, Soviet Union poddlea uprant tachea khala aslolea Devachea lokank ‘bhov thoddi’ modot mell’lli mhunnche, tankam thoddo vell svotontrtai mell’lli. (Dan. 11:34) Taka lagon, tim zaitea zannank porgott korunk pavlim ani rokddench Soviet Union-achea khala aslolea desanim hozaramnim porgottnnar vaddle. Thoddea vorsa uprant, Russia ani tachim vangddi raxttram ut’torecho raza zalo. Ami fattlea lekhant bhasabhas kel’lea pormonnem, eka sorkarak ut’torecho raza vo dokxinnecho raza mhunnttolim zalear, tannem tin vixoi korunk zai: (1) tannem Devachea lokancher razvottki cholounk zai vo tankam dhumallo diunk zai, (2) tannem aplea korneamnim Jehovacho ani tachea lokancho dusman mhunn dakhoun diunk zai, ani (3) tea bhasaunnent  sanglolea pormonnem tannem dusrea raza poros chodd odhikar melloun gheunk proitn korunk zai.

⁴ Aiz, Russia ani tachim vangddi raxttram ut’torecho raza, oxem ami kiteak mhunnonk xoktat tem polloum-ia. (1) Tannim Devachea lokancher razvottki choloilea vo tankam dhumallo dila. Hacho orth, tannim tanchea porgottnnechea kamacher bondi haddlea ani tanchea vattarant ravtolea hozaramnim bhav-bhoinnank dhumallo dila. (2) Devachea lokam sangata te jea toren vagtat tantuntlean te Jehovacho ani tachea lokancho dves kortat mhunn dakhoitat. (3) Dokxinnecho raza zaun aslolea Anglo-America poros chodd bollixt zaunk te proitn kortat. Tor atam Russia ani tachea vangddi raxttrank ut’torecho raza mhunnonk tannim kitem kelam tem ami polloim-ia.

5. Daniel 11:40-43-ant khoinchea vella vixim sanglam, ani hea vellar kitem ghoddtta?

⁵ Daniel 11:40-43 vachat. Bhasaunnecho ho bhag, amkam xevottachea disamnim kitem zaunchem asa tem sangta. Hea versamnim amkam ut’torechea raza modem ani dokxinnechea raza modem asloli dusmankai dison ieta. Daniel porvadean sanglolea pormonnem, xevottachea disamnim, dokxinnecho raza ut’torechea raza sangata “xingamnim zhuztolo.”—Dan. 11:40;

6. Dogui raza eka-mekacho virodh korit asat mhunn amkam kitem purave asat?

⁶ Sonvsarantlem sogleant bollixtt sorkar zaunk, ut’torecho raza ani dokxinnecho raza eka-meka lagim zhuzot asat. Udharonnak, Sonvsarachea Dusrea Zhuza uprant, Soviet Union ani tachea vangddi raxttramnim Europe-anchea choddxea desancher odhikar ghetlo tednam kitem zalem tem polloum-ia. Ut’torechea razacho virodh korunk dokxinnechea razan her desankodden ixttagot korun ek ontoraxttria songotton toiar kelem, zachem nanv NATO aslem. NATO mhunnttlear, North Atlantic Treaty Organization. Ut’torecho raza ani dokxinnecho raza eka-meka poros bollixtt soin toiar korunk zaito poiso moddttat. Afrikent, Asia-nt, ani Latin America-nt zhuzam zatalim tednam ut’torecho raza dokxinnechea razachea dusmanank tenko diun eke toren tachea sangata zhuzlo. Halinchea vorsamnim, Russia ani tachim vangddi raxttram khub bollixtt zaleant. Te dokxinnechea raza lagim kompiuttora udexim zhuzleat. He raza aplo dusman kompiuttor program uzar korun poixeanchea vatten apleak luksonn kelam ani aplo sorkar uddouncho proitn kela oxem mhunnon eka-mekacher bogllant ghaltat. Danielan sanglolea pormonnem ut’torecho raza Devachea lokancher akromonn korit asa.—Dan. 11:41.

7. ‘Mhoimecho des’ mhunnttlear kitem?

⁷ Ut’torecho raza ‘Mhoimechea desant’ bhitor sortolo mhunn, Daniel 11:41 sangta. To des mhunnche kitem? Adlea tempar, Israel des “soglea desa poros sobit des” aslo. (Ez. 20:6, NW) Punn lok thoim Jehovachi bhokti kortale dekhun to des chodd khas aslo. 33 K.X. Pon’nasavea vorsa uprant, to “des” prithumevelo ek vattar vo zago mhunn sangonk zaina, karonn Jehovache lok ak’khea sonvsarant asat. Tor, aiz ‘Mhoimecho des’ Jehovachea lokanchea kamak suchit korta. Hem kam te songottit toren kortat dekhun te eka desant aslolea sarke asat, zoim te Jehovachi bhokti mittingent ani porgottnnent bhag gheun ani her kamam korun kortat.

8. Ut’torecho raza ‘Mhoimechea desant’ koso bhitor sorlo?

⁸ Nimannea disamnim, ut’torecho raza  zaitea pavtti ‘Mhoimechea desant’ bhoitor sorla. Udharonnak, Nazi Germany ut’torecho raza aslo tednam, khas korun sonvsarachea dusrea zhuza vellar Devachea lokank dhumallo diun ani tankam jivexim marun to ‘Mhoimechea desant’ bhitor sorlo. Sonvsarachea Dusrea Zhuza uprant, Soviet Union ut’torecho raza zalo tednam tannem Devachea lokank dhumallo diun, ani tankam koidi korun ‘Mhoimechea desant’ bhitor sorlo.

9. Halinchea vorsamnim, Russia ani tachim vangddi raxttram ‘Mhoimechea desant’ koxim bhitor sorleant?

⁹ Halinchea vorsamnim, Russia ani tachim vangddi raxttram pasun ‘Mhoimechea desant’ bhitor sorleant. Te koxe? 2017-ant, hea ut’torechea razan Jehovachea lokanchea kamacher bondi haddli ani amchea thoddea bhav-bhoinnank bondkhonnint ghatlim. Tannim, New World Translation, hea Bible-acher ani amchea prokaxonancher pasun bondi haddli. Russia-nt aslolem amchem xakha ofis, Raj-ghoram ani Zomatichim holam tannem amchea thaun kaddun ghetlim. Hea uprant, 2018-ant Sonchalon Monddollan Russia ani tachim vangddi raxttram, ut’torecho raza zaun asa mhunn sanglem. Punn, Jehovachea lokank sorkaran dhumallo dilo zalear pasun te sorkarachea add vochonant vo te to sorkar bodlunk proitn korinant. Tachea bodlek, te Bible-acho sol’lo apnnaun “razam ani odhikariam pasot” magtat. Hem odhikari Jehovachea lokanchea bhokte sombondit nirnnoi ghetat tednam te khas korun tanchea pasot magtat.—1 Tim. 2:1, 2.

10. Ut’torecho raza dokxinnechea razacho nas kortolo kai? Somzaiat.

¹⁰ Daniel 11:40-45-ant sangloli bhasaunni chodd korun ut’torechea razachea kamam vixim asa. Hacho orth to dokxinnechea razacho nas kortolo kai? Na. Armaged’don-achea zhuza vellar Jehova ani Jezu soglea munxanchea sorkarancho nas kortat tednam, dokxinnecho raza ‘jivoch’ astolo. (Prok. 19:20) Hem ami itlea khatren kiteak mhunnonk xoktat? Daniel ani Prokasovnni pustokant asloleo bhasaunneo kitem sangta tacher atam ami dhean dium-ia.

11. Daniel 2:43-45 kitem dakhoun dita? (Masikachem fuddlem chitr polloiat.)

¹¹ Daniel 2:43-45 vachat. Daniel provadi veg-vegllea dhatumnim kel’lea eka murti vixim sangta. Tea murticho dor ek bhag oslea veg-vegllea sorkarank suchit korta, zannim choddxe Devache lok ravtale tea zagear razvottki choloilea. Hea sorkaramnim veg-vegllea kallar razvottki choloili. Tea murtiche paim lokhoddache ani matieche asle. Te xevottachea sorkarak suchit korta jem sonvsarachi bollixtt razvottki Anglo-America zaun asa. Tor, Anglo-America razvottki choloit astolem tednam Devachem Raj soglea munxanchea sorkarachem nas korunk ietolem mhunn ti bhasaunni dakhoun dita.

12. Tea savzachi satvi tokli kitem suchit korta, ani tem zannam zavop kiteak mhotvachem?

¹² Apostl Juanvan pasun Jehovachea lokancher eka-fattlean-ek razvottki choloilolea sonvsarachea bollixtt razvottkeam vixim sanglem. Juanvan hea sorkarank sat tokleo aslolea savzak suchit kelem. Tea savzachi satvi tokli sonvsarachi bollixtt razvottki, Anglo-America-k suchit korta. Hem mhotvachem zaun asa karonn tea sat toklechea savzacher anik ek tokli uprastoli mhunn sangona. Tor, Krist ani tachi sorginchi fouz tea toklek ani tea savzak nas kortole tednam ti satvi tokli razvottki choloit astoli. *—Prok. 13:1, 2; 17:13, 14.

13-14. ‘Magog desacho Gog’ konn, ani to Devachea lokancher kiteak akromonn kortolo?

¹³ Ut’torechea razacho ani dokxinnechea razacho nas zaunchea poilim kitem zaunk xokta tea vixim Ezekiel-an ek bhasaunni kel’li. Ezekiel 38:10-23; Daniel 2:43-45; 11:44–12:1; ani Prokasovnni 16:13-16, 21-ant boroiloleo bhasaunneo polloilear teo ekach vellar ghoddttat tea ghoddnne vixim sangtat oxem dista. Hem khorem zalear, teo ghoddnneo hea toren ghoddttoleo mhunn amkam dista.

¹⁴ Vhodd sontap suru zaun thoddea vella uprant, ‘sonvsarantle raza’ ektthaim ieun raxttrancho ek zomo toiar zatolo. (Prok. 16:13, 14; 19:19) Tea raxttranchea zomeak Bible-ant ‘Magog desacho Gog’ mhunnttla. (Ez. 38:2) To raxttrancho zomo Devachea lokancher nimannem akromonn kortolo ani tankam sompurnn toren nas korunk proitn kortolo. To kiteak akromonn kortolo? Hea kalla vixim, apostl Juanvan dorxonant korveancho paus polloilo. Tea pausant ekdom vhodd korveanche fator Devachea dusmanancher poddttat te tannem polloile. To korveancho paus, Jehovache lok ditat tea khor zhoddttechea sondexak suchit korunk puro. Ghoddie hea sondexak lagon, Magogacho Gog Devachea lokank sompurnn toren nas korunk tancher akromonn kortolo.—Prok. 16:21.

15-16. (a) Daniel 11:44, 45 ghoddie khoinche ghoddnnem vixim sangta? (b) Ut’torechea razachem ani Magogacho Gog zaun aslolea her raxttranchem kitem zatolem?

¹⁵ Heo ghoddnneo, mhunnche, zhoddttecho khor sondex Devache dusman kortat tem nimannem akromonn ani Daniel 11:44, 45-ant (vachat) sangloleo ghoddnneo ekuch asonk puro. Thoim, ut’torecho raza ‘udenti ani ut’tore thaun taka pavta ti khobor’ aikon ‘ragan bhortolo’ mhunn Daniel sangta. Uprant, to ut’torecho raza “zaitea zannanchem nisontton” korunk bhair sortolo. Hanga “zaitea zannanchem” mhunn sanglam tem ghoddie Jehovachea lokam vixim sangta oxem dista. * Tor hanga Devachea lokancher zatolea nimannea akromonna vixim Daniel sangtalo zait.

 ¹⁶ Ut’torecho raza ani her sorkaram, Devachea lokancher akromonn kortat tednam Sorvpodvedar Dev ragan bhoron Armaged’don zhuz suru kortolo. (Prok. 16:14, 16) Tea vellar, ut’torecho raza ani Magogacho Gog zaun aslolim her raxttram nas zatolim, ani “taka adar diunk konnuch ascho na.”—Dan. 11:45.

17. Daniel 12:1-ant sanglolo “vorto kunvor,” Mikael konn zaun asa, ani to kitem korta?

¹⁷ Ut’torecho raza ani tachim vangddi raxttram koxim nas zatolim ani ami koxim salvar zatolim tea vixim Daniel fuddlea versant bariksannechi mahiti dita. (Daniel 12:1 vachat.) Hea versacho orth kitem? Amcho Raza, Jezu Kristachem anik ek nanv, Mikael zaun asa. 1914-ant tachem Raj sorgar suru zalem tednam thaun Devachea lokank rakhonk lagon to ‘utthla’ vo ubo ravla. Ani beginuch, to fuddarak Armaged’don-achea zhuza vellar “utthtolo” vo aplea dusmanacho nas kortolo. Hi nimanni ghoddnni, mhunnche, hem zhuz munxachea itihasant “vhoddam son-koxttancho kall” astolo mhunn Daniel sangta. Hea zhuza poilim, ‘vhodd sontap’ ietolo mhunn Prokasovnni pustokant Juanvachi bhasaunni sangta.—Prok. 6:2; 7:14.

18. Fuddarak kitem-i ghoddom, ami xantponnim kiteak ravonk xoktat?

¹⁸ Vhodd sontapachea vellar, Jehova ani Jezu aplea sevokank salvar kortole mhunn Daniel ani Juanvan sanglolem. Tor, fuddarak kitem-i ghoddom, ami xant ravonk zata. Jea konnachi “nanvam pustokar boroil’lim asat tim” salvar zatolim mhunn Daniel sangta. (Dan. 12:1) Tor, amchim nanvam tea pustokar asonk zai zalear ami kitem korunk zai? Devacho Menddro, Jezucher, amkam bhavarth asa mhunn ami spoxttponnim dakhoun diunk zai. (Juanv 1:29) Ami Devak amchem jivit somorponn korunk zai ani bautizm gheunk zai. (1 Ped. 3:21) Ani Jehova vixim zannam zaunk dusreank modot korunk, zata titlem korun Devachea Rajeak ami tenko diunk zai.

19. Ami aiz kitem korunk zai, ani kiteak?

¹⁹ Jehovacher ani tachea visvaxi sevokamnim bhorlolea songottnnecher bhavarth vaddouncho vell, ho zaun asa. Devachea Rajeak ami aiz tenko diunk zai. Ami oxem kortat zalear, Devachem Raj ut’torechea razak ani dokxinnechea razak nas korta tednam ami salvar zatolim.