1, 2. ¿Drebätä ja tötikai kukwe ja tötikara nekänti?

KUKWE keta kabre tä nemen bare ye tä mike gare nie kä ne bikera krüte. Jehová aune Jesukristo köböra gobrantre jökrä gainte. Akwa ye känenkri, rei ngwitärikri aune rei mötörikri tädi rüre jankunu jabe aune juta Ngöbökwe rüere.

² Profecía tä Daniel 11:40-12:1 yebätä nibike ja tötike kukwe ja tötikara nekänti. Nire abokän rei ngwitärikri kä nengwane ye rabai gare nie. Aune kukwe tare näire Jehovakwe ni mikai kwäre yei ñobätä ni raba tö ngwen, ye rabai gare nie arato.

3, 4. ¿Nire abokän rei ngwitärikri kä nengwane aune ñobätä nita niere?

³ Unión Soviética juani tibien kä 1991 ye bitikäre juta Ngöbökwe ye dimikani chi, ye köböire nitre Jehová mikaka täte juta yekänti ye nünanbare jäme kä braibe te (Dan. 11:34). Ye köböire namani bäri nuäre kräketre kukwe driekäre aune kä braibe te nitre kwati ja mikani testiko juta jene jene gobrainbare Unión Soviética yekwe känti. Akwa bätärekä jatäri Rusia aune juta ja ketaka ben namani rei ngwitärikri. Kukwe ja tötikara käne yekänti rababa gare nie erere, juta meden rabadre rei ngwitärikri o rei mötörikri ye tädre kukwe ketamä nuainne. Kena, ja mikadre kwe juta Ngöbökwe rüere. Ketebukäre, dre nuainta kwe juta Ngöbökwe yebätä yebiti bämikadre kwe brukwä Jehová kräke aune nitre niara mikaka täte kräke. Aune ketamäkäre, tädre rüre jabe kwärikwäri.

 ⁴ Ñobätä ni raba niere Rusia aune juta ja ketaka ben ye abokän rei ngwitärikri ye ani mike gare jai. Kena, tä kukwe drie ye ñäkäire aune tä nitre testiko Jehovakwe nünanka yete ye kwati kain ngite, yebiti tä ja mike juta Ngöbökwe rüere. Ketebukäre, kukwe nuainta kwetre yebiti tä bämike brukwä Jehová kräke aune juta kwe kräke. Ketamäkäre, rei mötörikri yebe tä rüre, ye abokän Gran Bretaña aune Estados Unidos. Rusia aune juta ja ketaka ben tä kukwe ketamä ne nuainne ño kä nengwane ye ani mike gare jai.

5. ¿Daniel 11:40-43 tä blite drebätä aune ñongwane kukwe ye rabai bare?

⁵ (Ñäkädre Daniel 11:40-43 yebätä). * Kukwe rakadikä kä krüte näire yebätä profecía ne tä blite. Rei ngwitärikri aune rei mötörikri tädi rüre jabe ye bersikulo ne tä mike gare. “Kä krüte näire, rei mötörikri käkwe rüdi” rei ngwitärikri yebe ye Danielkwe mikani gare (Dan. 11:40).

6. ¿Dre tä mike gare reitre nibu ne täbe rüre jabe?

⁶ Rei ngwitärikri aune rei mötörikri tä rüre jankunu jabe ne kwe rabadre kä jökrä gobraine. Ñodre, rübare kri bobukäre ye bitikäre Unión Soviética aune juta ja ketaka ben ye namani juta keta kabre Europa ye gobraine. Ye käkwe rei mötörikri töi mikani ja kete juta mada dite ben. Kukwe ükaninte kwetre jabe ye kädekani OTAN. Reitre nibu ne tä ja di ngwen ne kwe jondron rükäre aune nitre rükä rabadre bäri kwetre. Ne madakäre, tätre juta mada ye dimike rübätä, ñodre África, Asia aune América Latina. Bitinkä Rusia aune juta ja ketaka ben ye kite bäri dite. Arato reitre nibu ne tä kukwe käme nuainne jabätä kwärikwäri ne kwe ngwian kitadrekä ngwarbe aune gobran kwetre rikadre tibien, ye jökrä nuainta kwetre Internet yebiti. Aune Danielkwe mikani gare ye erere, rei ngwitärikri ye täbe ja mike juta Ngöbökwe rüere (Dan. 11:41).

7. ¿Kä bä nuärebätä blitata ye dre gärätä?

⁷ Daniel 11:41 tä niere, rei ngwitärikri käkwe “Kä Bä Nuäre” ye diandi jai. ¿“Kä Bä Nuäre” medenbätä blitata? Kirabe sete Israel ye juta bäri bä nuäre kä tibienbätä nie nämäne (Ezeq. 20:6). ¿Ñobätä Israel ye mika nämäne tuin bä nuäre jai? Ñobätä ñan aune kä yekänti Jehová mika nämäne täte. Akwa Pentecostés kä 33 yete ja käne, “Kä Bä Nuäre” nieta tärä Danielbätä ye ñaka kä keteiti gärätä. ¿Ñobätä nita ye niere? Ñobätä ñan aune nitre Jehová mikaka täte ye tä kä jökräbiti tibien aune ñaka kä keteitibe känti. Kä nengwane “Kä Bä Nuäre” nieta tärä Danielbätä ye ñaka kä metre, ñakare aune ye kä ja üaire meden gärätä. Ye abokän nitre Jehová mikaka täte tä ja ngwen ño aune tätre kukwe driere aune näin gätäbätä Jehová mikakäre täte medenbätä blitata.

8. ¿Rei ngwitärikri tä dre nuainne “Kä Bä Nuäre” ye diankäre jai?

⁸ Kä krüte ne näire bati bobu rei ngwitärikri tä “Kä Bä Nuäre” ye den jai. Ñodre, rübare kri bobukäre ye näire Alemania nazi nämäne rei ngwitärikri ngwane, “Kä Bä Nuäre” ye diani  kwe jai. Ye abokän ja mikani kwe nitre Jehová mikaka täte ye rüere aune kwati murie ketani kwe. Aune rü ye bitikäre Unión Soviética nämäne rei ngwitärikri ngwane, “Kä Bä Nuäre” ye diani kwe jai arato. Ye abokän ja mikani kwe nitre Jehová mikaka täte ye rüere aune kwati kitani ngite ja tare nikakäre.

9. ¿Bitinkä Rusia aune juta ja ketaka ben tä “Kä Bä Nuäre” den jai aune nuainta ño kwetre?

⁹ Bitinkä ja käne Rusia aune juta ja ketaka ben ye tä “Kä Bä Nuäre” den jai arato. ¿Nuainta ño kwe? Kä 2017 yete ja käne rei ngwitärikri ye tä sribi Jehovakwe ñäkäire, tä ja mräkätre kain ngite aune tä tärä ñäkäire, ñodre, Biblia Traducción del Nuevo Mundo ye ñäkäibare kwetre. Arato sukursal nitre testiko Jehovakwe, Ju Ja Ükarakrö aune ju gätä kri nuainkäre juta Rusia yete ye dikani kwetre. Kukwe nakaninkä ye jökräbätä kä 2018 yete Nitre Braibe Konkrekasion Jökrä Ngübabitikä käkwe niebare, Rusia aune juta ja ketaka ben ye abokän rei ngwitärikri. Ni Jehová mikaka täte ñaka ja mike gobrantre kä nebätä rüere aune ñaka niaratre töi kwite. Tätre ja mike ni rüere akwa ni ñaka krörö nuainne bätätre, ñakare aune Biblia tä niere erere nita orare gobrantre ye kräke. Kukwe ükateta kwetre yebätä Ngöbö mika raba täte o ñakare ye ngwane bäri nita nuainne (1 Tim. 2:1, 2).

10. ¿Rei ngwitärikri ye ñaka rei mötörikri ganaindi jire ye ñokänti gare nie?

¹⁰ Profecía tä tikani Daniel 11:40-45 ye tä blite metrere rei ngwitärikri yebätä. ¿Akräke rei mötörikri ye gaite kwe? Ñakare. ¿Ñobätä nita ye niere? Ñobätä ñan aune Jehová aune Jesús gobrantre kä nebätä gaite rü Armagedón yete ngwane, rei mötörikri ye tädi gobrane (Apoc. 19:20). ¿Ñokänti kukwe ye gare nie? Profecía tä Daniel aune Apocalipsis yebätä ani ja tötike mikakäre gare jai.

11. ¿Daniel 2:43-45 tä dre mike gare? (Üai kena täräkwatabätä mikadre ñärärä).

¹¹ (Ñäkädre Daniel 2:43-45 yebätä). * Juta keta kabre ja mikai juta Ngöbökwe rüere ye bämikani ni üai kri sribebare jondron bätäkä ngwarbe yebiti niebare Danielkwe. Ni üai kri ngoto hierrore mritani dobro ngätärebe ye tä gobran mrä bämike, ye abokän Gran Bretaña aune Estados Unidos gärätä. Profecía tä mike gare erere, juta dite ye tädi gobrane Gobran Ngöbökwe gobrantre jökrä gaite ngwane.

12. ¿Jondron nire dokwä kwä kükükäre ye abokän nire aune ñobätä kukwe ye ütiäte krubäte?

¹² Juta dite dite rabai gobrane käbiti tibien ye ja mikai juta Jehovakwe rüere yebätä apóstol Juan blitabare arato. Profecía niebare kwe yete juta dite dite ye bämikani kwe jondron nire dokwä kwä kükü yebiti. Jondron nire ye dokwä kwä kükükäre abokän juta Gran Bretaña aune Estados Unidos bämikata. Kukwe ye ütiäte ñobätä ñan aune jondron nire ye dokwä kwä kükü aibe. Jondron nire ye dokwä kwä kükükäre tädi gobrane ngwane, Kristo aune nitre rükä kä kwinbiti käkwe jondron nire dokwä kwä kükü ye gaite täte (Apoc. 13:1, 2; 17:13, 14). *

13, 14. ¿“Gog kite kä Magog yekri” ye abokän nire aune ñobätä ja mikai juta Jehovakwe rüere raba ruin nie?

¹³ Rei ngwitärikri aune rei mötörikri ye gadrete känenkri dre rabai bare ye Ezequiel käkwe mikani gare profecía keteitibätä. Profecía tä Ezequiel 38:10-23, Daniel 2:43-45; 11:44-12:1 aune Apocalipsis 16:13-16, 21 tä blite kukwe rabai bare ja näirebe yebätä. Ye erere akräke kukwe ne raba nemen bare.

¹⁴ Ja tare nikadi kri kömikaira ye bitikäre, gobrantre kä jökräbiti tibien käkwe ja ükaikrö keteitibe (Apoc. 16:13, 14; 19:19). Juta ja ükaikrö keteitibe ye Biblia tä kädeke “Gog kite kä Magog yekri” (Ezeq. 38:2). Gobrantre käkwe ja ükaikrö keteitibe ye käkwe rü gaikä juta Jehovakwe rüere aune tö rabaitre gaite täte. ¿Ñobätä rü gaikä kwetre juta Jehovakwe rüere? “Ñü jä kukwän” krikri kwrere nämäne näkäin nitre ja mikaka Jehová rüere yebiti ye apóstol Juan tuabare. Nitre Jehová mikaka täte kukwe tarebe driei ye bämika raba ñü järe ye kwrere. Yebätä Gog kite kä Magog yekri käkwe ja mikai juta Jehovakwe ye rüere gatekäre raba ruin nie (Apoc. 16:21).

15, 16. a) ¿Kukwe meden rabai bare abokänbätä Daniel 11:44, 45 tä blite? b) ¿Dre rabai bare rei ngwitärikri aune gobrantre mada Gog kite Magog yekri yebätä?

¹⁵ Nikwe kukwe tare driedi aune ja mikai ni rüere ye arabätä Daniel 11:44, 45 tä blite (ñäkädrebätä). * Yete Danielkwe mikani gare, “kukwe mikai gare kädrikri aune ngwitärikri ye ñaka [rei ngwitärikri] mikai nemen nuäre, yebätä brukwä rubunbiti rikai nitre kwati gatekäre”. “Nitre kwati” nieta yete ye abokän nitre Jehová mikaka täte meden gärätä. * Rü gaikä mrä juta Ngöbökwe rüere yebätä Danielkwe blitabare raba ruin nie.

¹⁶ Rei ngwitärikri aune gobrantre mada rü gaikä juta Ngöbökwe rüere ngwane Ngöbö  dite krubäte rabai rubun ye käkwe Rü Armagedón kömikai (Apoc. 16:14, 16). Ye ngwane rei ngwitärikri aune gobrantre mada Gog kite kä Magog yekri ye gaite jökrä aune “dimikaka ñaka rabai” (Dan. 11:45).

17. ¿Daniel 12:1 yete Miguel ni “ji ngwanka kri” nieta ye abokän nire aune tä dre nuainne?

¹⁷ Bersikulo mada profecía yebätä tä mike gare, rei ngwitärikri aune juta ja ketaka ben ye gaite ño aune ni mikai ño kwäre yebätä blitata kwe arato (ñäkädre Daniel 12:1 yebätä). * ¿Bersikulo ne tä dre mike gare? Rei Jesús ye kädekata Miguel arato. Niara “tä nünaninkä krö” juta Ngöbökwe yekri kä 1914 yete ja käne, Gobran Ngöbökwe ükaninte kä kwinbiti ye ngwane. Ja känenkäre “rükai krö” ye abokän nitre ja mikaka niara rüere ye gaite jökrä kwe rü Armagedón yete. Ja tare nika kri ñaka rababare jire abokänbätä Danielkwe blitabare ye bitikäre rü kri ye rakaikä. Rü Armagedón kömikai ngwane ja tare nika kri ye krütai mikani gare Juankwe Apocalipsis yete (Apoc. 6:2; 7:14).

18. ¿Ñobätä ni raba tö ngwen kä ja känenkäre yei?

¹⁸ Daniel aune Juan mikani gare nire nire käkwe Jehová aune Jesús mikai täte ye rabaite nire ja tare nikai kri ye ngwane. Ye medenbätä, ni raba tö ngwen kä ja känenkäre yei ñobätä ñan aune Danielkwe niebare, nire nire rabaite nire ye kä täi “tikani täräbätä” (Dan. 12:1). ¿Ni kä tädre tikani täräbätä yekäre nikwe dre nuaindre? Yekäre, nita tödeke Jesús ie nikwe bämikadre (Juan 1:29). Nikwe ja diandrekä mento Jehová kräke aune ja ngökadre ñöte (1 Ped. 3:21). Ne madakäre, nikwe sribidre ja di tätebiti Gobran Ngöbökwe kräke nitre dimikakäre Jehová mike gare jai.

19. ¿Nikwe dre nuaindre gwä ngwane aune ñobätä?

¹⁹ Gwä ngwane nikwe tö ngwandre bäri Jehovai aune juta kwe ie. Arato nikwe sribidre Gobran Ngöbökwe kräke. Nikwe ye erere nuaindi ngwane, Gobran Ngöbökwe rei ngwitärikri aune rei mötörikri gaite ngwane ni rabaite nire.