1-2. Bichi rhwaganirako mu gunola mwazi?

RHUHERHE ebyemezo binene zene kulusha ezindi siku zoshi biyerekene oku rhulamire oku buzinda bw’esiku zizinda z’elila gulu. Hanola hofi-hofi, Yehova na Yesu baharabisa boshi bali bapinga obwami bwage. Embere bibe, omwami w’enoro n’omwami w’eside bagenderera kulwisanya bonyine oku bonyine n’oku lwisa abantu ba Mungu.

² Mu gunola mwazi, rhwayiga obulebi buli omu Danieli 11:40–12:1. Rwabona inde oli mwami w’enoro mu manola mango na bulagurhe rhwakayorha rhurhulerere rhulangalire oku Yehova arhurhabala chiro akaba ebyakahika byoshi.

3-4. Inde warhengerere nka mwami w’enoro? Ofasiriye.

³ Echinya-buguma che Soviyeti chamalire kuhena omu mwaka gwa 1991, abantu ba Mungu balilamire ah’obola burhegesi bwalilirire hoshi, baba nka bahumuka. Daniyeli aliyirikire okola kuhumuka oku “burhabale bugeke.” (Da. 11:34) Echola charhuma bagala kuhubiri omu buhuru, na buzira kulegama oluganjo lw’abahubiri lwayongezeka bwenene omu bihugo byoshi byaliri omu chinya-buguma che Soviyeti. Kubuya-buya, Erisi n’ebihugo binayigwasa yarhengerera nka mwami w’enoro. Nk’oku biyerekenwe omu mwazi g’oburhanzi, y’oburhegesi buba mwami w’enoro changwa mwami w’eside, bukwanene bujire bintu bisharhu: 1) Bujire echi bwajira chibonekene oku bantu ba Mungu, 2) Buyerekane oku bijiro byabo oku bushombere Yehova n’abantu bage, n’echa 3) buhangane n’omwami w’eside.

 ⁴ Tala ebyemezo byakarhuma rhwaderha mu zinola siku oku Erisi haguma n’abera bayo ye mwami w’enoro. 1) Bajirire echi bajira oku bantu ba Mungu, omu kulahiza akasi k’amahubiri n’okurhindibuza amagana ma bene-berhu na bali-berhu balamire hoshi barhegekere. 2) Ebyola bijiro biyerekene oku bashombere Yehova n’abantu bage. 3) Bahangene n’omwami w’eside, k’okuderha oburhegesi bukulu bw’egulu lyoshi bwe Angletere ne Amerike. Leka rhulole gurhe Erisi n’ebihugo biyili ebirhugo yagenderere kuyerekana oku ye mwami w’enoro.

5. Chihe ch’amango mahe chidereherwe omu Danieli 11:40-43, na bichi bili byaba mw’echola chihe?

⁵ Osome Danieli 11:40-43. Echila chigabi ch’obulebi chiyerekene echihe ch’esiku z’obuzinda choshi. Elila andiko likazize obuhaka ahakagarhi k’omwami w’enoro n’omwami w’eside. Nk’oku Daniyeli anabaga aderha, omu chihe chizinda, omwami w’eside akarhangire “kuhirikana” n’omwami w’enoro changwa akarhangire “kushurhana amahembi naye.”​—Da. 11:40; amahugulo m’eshishi.

6. Byemezo bihe biyerekene bwinja oku abola bami yibahirikana?

⁶ Omwami w’enoro n’omwami w’eside yibagenderera kulwira oburhegesi bukulu bw’egulu lyoshi. Omufano, waza oku byarhengereraga enyuma w’evita lya kabiri ly’egulu lyoshi, Echinya-buguma che Soviyeti n’ebihugo byaliri byachirhabala, charhondera kurhegeka chigabi chinene omu Bulaya. Omwami w’eside achibona ntyo, akola endagano y’echirungu y’amashanja yaliyirikirwe NATO [North Atlantic Treaty Organization]. Omwami w’enoro agenderere kuhangana n’omwami w’eside omu kukola entwaro zidarhi zibahemere bakolese furanga zinene bwenene. Omwami w’enoro n’omwami w’eside banalwisanya omu kujira okuntu buli muguma wabo agwase omwanzi w’owabo omu Afrike, omu Azi, ne Amerike y’eshishi. Omu myaka ya hanola hofi-hofi, Erisi n’abera bayo yayerekene oku gulu lyoshi oku eherhe emisi minene bwenene. Kandi bali balwisa omwami w’eside omu kukolesa amaordinatere. Abola bami bombi yi basidakana oku bali bakolesa eprograme ze ordinatere z’okulonza ababo baheze efuranga zinene n’okukoroga oburhegesi bw’ababo. Kandi nk’oku Daniyeli anaderhaga, omwami w’enoro ali agenderera kurhera abantu ba Mungu.​—Da. 11:41.

7. “Echihugo ch’Obulimbi che chihe”?

⁷ Danieli 11:41 ederhere oku omwami w’enoro nji aja omu “ chihugo ch’Obulimbi.” Che chihugo chihe echola? Omu mango ma mira, echihugo nya chihugo che Izraeli chalimenyikene oku che “chihugo chikwirire bwenene kulusha byoshi.” (Eze. 20:6) Aliko echajiraga echola chihugo chibe chikwirire kulusha byoshi, okuba m’obuharamye b’okuli bwaliri bwajirika. Kurhangirira oku Pentekose y’omwaka gwa 33 N.K.Y., echola “chihugo” chirhachili mpu fasi nya fasi y’ahantu halebe; birhakaba ntyo bulala zene abantu ba Yehova bashandere eyi n’eyi oku gulu lyoshi. Ahubwe, “echihugo ch’Obulimbi” zene bili bilala byoshi abantu ba Yehova banakola biheberwe m’okuharamya Yehova kugerera embuganano n’akasi k‘amahubiri.

8. Gurhe omwami w’enoro ajaga omu “chihugo ch’Obulimbi”?

⁸ Omu chihe ch’esiku z’obuzinda, ashubirize kuja “omu chihugo ch’obulimbi” mango manene. Omufano, Alemanye y’Abanazi yachibere mwami w’enoro, ahanene omu mango m’evita lya kabiri ly’egulu lyoshi, oyola mwami  aja omu “chihugo ch’obulimbi” omu kulibuza n’okuyirha abantu ba Mungu. Enyuma w’evita lya kabiri ly’egulu lyoshi, amango Echinya-buguma che Soviyeti chabaga mwami w’enoro, oyola mwami aja omu “chihugo ch’Obulimbi” omu kulibuza abakozi ba Mungu n’okubaheka buhungiro oku chingufu.

9. Omu myaka ya hanola hofi-hofi, gurhe Erisi n’abera bayo yajaga “omu chihugo ch’Obulimbi”?

⁹ Omu myaka ya hanola hofi-hofi, Erisi nayo haguma n’abera bayo yalijire omu “chihugo ch’Obulimbi.” Nka gurhe? Omu 2017, oyola okala ali mwami w’enoro alahiza akasi k’abantu ba Yehova n’okuheba baguma mu bene-berhu na bali-berhu omu pirizo. Ashuba kulahiza ebichapo byerhu biheberwe mwe Tafusiri ya Ulimwengu Mupya. Kandi ashabana amaju m’ebiro by’omurhabi gw’Erisi, n’Amachumbi m’Obwami, n’Amachumbi m’Embuganano zikulu. Enyuma w’ebyola byoshi, omu mwaka gwa 2018 Ebaraza lirhambwire lyaderha oku Erisi n’ebihugo biyili omu birhugo ye mwami w’enoro. Omu bulyo boshi, chiro n’amango abantu ba Yehova bali balibuzwa bwenene, banalahira kuchihira omu bijiro byoshi by’okulonza okuhindamula oburhegesi bw’abantu. Ahali h’okujira ntyo, banakulikira empanulo ye Biblia y’okusalirira “abakulu bali oku ngazi z’enyanya” n’ahanene amango bakala kuchishoga ebyakarhubuza kuharamya omu buhuru.​—1 Ti. 2:1, 2.

10. Omwami w’enoro nji ahima omwami w’eside si? Ofasiriye.

¹⁰ Obulebi buli omu Danieli 11:40-45 buderhere ahanene ebijiro by’omwami w’enoro. K’okuderha oku nji ahima omwami w’eside si? Nanga. Omwami w’eside nji aba y’achiliho amango Yehova na Yesu nji bayinja kuharabisa oburhegesi bw’abantu oku vita lye Armagedoni. (Ufu. 19:20) Bulagurhe rhwakava rhwachizera ntyo? Lola eby’obulebi bwa Danieli na Ufunuo buyerekene.

11. Bichi Danieli 2:43-45 eyerekene? (Olole efoto eli oku chiganda.)

¹¹ Osome Danieli 2:43-45. Omulebi Daniyeli afasiriye gurhe amarhegesi m’abantu makajirire echi majira oku bantu ba Mungu makulikirene. Amafasiriye nka bigabi by’echishushanyo chizibu-zibu che chuma. Oburhegesi buzinda bw’abantu buderherwe nka bishando by’echola chishushanyo chikolerwe n’echuma n’ebumba. Ebishando bishushanyize Oburhegesi bukulu bw’Egulu lyoshi bwe Angletere ne Amerike. Obola bulebi buyerekene oku oburhegesi bukulu bw’egulu lyoshi bwe Angletere ne Amerike nji bwaba eyi buchili bwakola amango Obwami bwa Mungu nji bwayinja kuvunanga n’okuharabisa amarhegesi m’abantu.

12. Bichi erhwe lya mushanvu ly’echinya-lubala lishushanyize, na bulagurhe bili by’akamaro okumenya ntyo?

¹² Entumwa Yowane nayo yalifasiriye omukololo gw’amarhegesi makulu m’egulu lyohi makajirire echimajira oku bantu ba Mungu. Yowane ashushanyize amola marhegesi n’echinya-lubala cha marhwe mushanvu. Erhwe lya mushanvu ly’echola chinya-lubala lishushanyize Oburhegesi bukulu bw’Egulu lyoshi bwe Angletere ne Amerike. Okumenya ntyo kuli kw’akamaro bwenene bulala echinya-lubala chirhayerekenwe oku chashuba kumera kw’elindi rhwe. Elyola rhwe lya mushanvu ly’echola chinnya-lubala lyagenderera kurhegeka kugera amango Kristu n’ebigusho by’omu mbingu biherhe emisi bayinja kulihombola haguma n’ebindi bigabi byoshi by’echinya-lubala. *​—Ufu. 13:1, 2; 17:13, 14.

13-14. “Gogu w’echihugo cha Magogu,” ye nde na bichi byakamushunika arhere abantu ba Mungu?

¹³ Obulebi buli omu Ezekieli burhuyerekere ebinji byarhanga kuba embere omwami w’enoro n’omwami w’eside baharabiswe. Nka rhurholere obulebi bwa Ezekieli 38:10-23; Danieli 2:43-45; 11:44–12:1; na Ufunuo 16:13-16, 21 oku buderhere ebinji byaba mu chihe chiguma, rhwakalangalira oku ntyo ku nji byaba.

¹⁴ Bisanzi bigeke amalibuko makulu mamalire kurhondera, “abami b’egulu lyoshi lilamirweko” nji bakola echinya-buguma ch’amashanja. (Ufu. 16:13, 14; 19:19) Echola chinya-buguma, che Biblia eyirika “Gogu w’echihugo cha Magogu.” (Eze. 38:2) Echola chinya-buguma ch’amashanja nji charhera abantu ba Mungu omu kulonza babamale liguma na liguma. Bichi nji byamurhuma kubarhera? Entumwa Yohana yaliderhe oku bilolere echola chihe, oku yalibwene echihonzi ch’olubula lurhasaga kubaho lw’ebibale bizibu-zibu luli lwachihonda oku bashombanyi ba Mungu. Olola lubula lw’echishushanyo lwakaba lushushanyize oburhumwa bukalihire buli bwahanwa n’abantu ba Mungu. Byakashobokana oku obola burhumwa bunji bwarhuma Gogu wa Magogu arhera abantu ba Mungu omu kulonza abachire hale.​—Ufu. 16:21.

15-16. a) Danieli 11:44, 45 yakaba y’ederhere bichi biguma nji byaba? b) Bichi nji byahikira omwami w’enoro n’ebindi bigabi byoshi bya Gogu wa Magogu?

¹⁵ Obula burhumwa bukalihire n’echirhero ch’obuzinda ch’abashombanyi ba Mungu byakaba bye biguma n’ebiderherwe omu Danieli 11:44, 45. (Osome.) Ahola Daniyeli aderhere oku, “emyazi erhengerere emahulukiro n’enoro” nji ya vuruga omwami w’enoro oli wahuluka “n’oburhe bunenene.” Omwami w’enoro ahigirire “okuniga banene.” Bishushire oku abola “banene” bayerekene abantu ba Yehova. * Byakashobokana oku ahala Daniyeli ali aderha kuyerekera echirhero ch’obuzinda oku bantu ba Mungu.

¹⁶ Echola chirhero ch’omwami w’enoro haguma n’amandi marhegesi moshi m’egulu oku bantu ba Mungu chi nji chaba nka chamahuma  Ogala byoshi omu lisho n’okulerha Evita lye Armagedoni. (Ufu. 16:14, 16) Amola mango omwami w’enoro, n’amandi mashanja moshi makolere Gogu wa Magogu, nji ahikira oku buzinda bwage, na ntaye nji wabaho “wakamurhabala”.​—Da. 11:45.

17. Mikaeli “omurhwali mukulu” oderherwe omu Danieli 12:1 ye nde, na bichi nji ajira?

¹⁷ Omustari gukulikire ho omu bi Daniyeli aderhere, gushubire kurhuha amandi mafasiriyo mayerekene gurhe omwami w’enoro n’abera bage nji bahikira oku buzinda na gurhe nji rhwayokolwa. (Osome Danieli 12:1.) Bichi ogola mustari guderhere? Mikaeli lili lindi zino ly’Omwami werhu oli warhegeka, k’okuderha Yesu Kristu. Aliri eyi ayimangire oku lunda lw’abantu ba Mungu kurhenga omu mwaka gwa 1914 amango Obwami bwage bwashimikwaga omu mbingu. Hanola hofi-hofi, “ayumanga” n’okujira echintu chiherhe echi chimalire oku vita lye Armagedoni. Elyola vita linji lyaba ly’obuzinda omu bi Daniyeli ayirikire “chihe ch’amalibuko” chidarhi omu ngani y’abantu. Obulebi bwa Yowane buli omu Ufunuo buderhere echihe nji charhanga kuba ho embere w’evita lye Armagedoni oku “malibuko makulu.”​—Ufu. 6:2; 7:14.

18. Bulagurhe rhwakayorha rhurhuzize chiro akaba ebi nji byaba byoshi omu mango mayinjire?

¹⁸ Rhwakayorha rhurhuzize oku bilolere amango mayinjire bulala Daniyeli na Yowane boshi barhuhakanire oku boshi bali bakolera Yehova na Yesu nji bafuma echila chihe chidarhi chirhasaga kuba ho. Daniyeli aderhere oku abechunguke nji baba eyi amazino mabo “mayandikirwe omu chitabu.” (Da. 12:1) Gurhe amazino merhu makayandikwa mw’echola chitabu? Rhukwanene rhuyerekane bwinja-bwinja oku rhuherhe obwemere mu Yesu, omwana-buzi wa Mungu. (Yoh. 1:29) Birhuhemere rhubatizwe omu kuyerekana oku rhwachihanire emwa Mungu. (1 Pe. 3:21) Kandi rhukwanene kugwasa oku bwami bwa Mungu omu kurhabala abandi bayige eju ya Yehova.

19. Bichi rhukwanene rhube rhwajira bunola, na bulagurhe?

¹⁹ Zene che chihe ch’okukomeza obulangalire bwerhu mu Yehova n’olubaga lwage lw’abakozi bimana. Che chihe chinola ch’okugwasa oku Bwami bwa Mungu. Nka rhujirire ntyo, nji rhwanafuma amango Obwami bwa Mungu nji bwaharabisa omwami w’enoro n’omwami w’eside.