ARTIKEL DIPELAJAR 20
Sapa ke nyadi “Raja Utara” Kemayaharitu?
“Iya deka dirusak, nadai orang nulung iya.”—DAN. 11:45, NWT.
LAGU 95 Penampak Majak Terang-Seterang
DALAM ARTIKEL TU *
1-2. Nama deka dipejuraika kitai ba artikel tu?
BISI mayuh bukti nunjukka kitai benung idup ba hari ti penudi. Enda lama agi, Jehovah enggau Jesus deka ngerusak semua perintah mensia ke ngelaban Perintah Petara. Sebedau utai nya nyadi, raja utara enggau raja selatan deka terus besemekih enggau pangan diri sereta merinsaka nembiak Jehovah.
2 Ba artikel tu, kitai deka bejuraika jaku ti benabi ke bisi ba Daniel 11:40–12:1. * Kitai deka ngelala sapa ke nyadi raja utara kemayaharitu sereta berandauka kebuah kitai enda ibuh kelalu irau lalu ulih arapka Jehovah deka nyelamatka kitai.
RAJA UTARA TI BARU
3-4. Sapa ke nyadi raja utara kemayaharitu? Terangka.
3 Pengudah Soviet Union dialahka ba taun 1991, nembiak Petara ke dipegai perintah nya nerima “tulung mimit,” iya nya pengelepas ti enda lama. (Dan. 11:34) Ketegal nya, sida ulih nginjil. Asil iya, penyampau penginjil ba menua Komunis nya nambah nyadi beratus ribu iku penginjil. Tang pengudah beberapa taun, Rusia enggau menua bukai ke nyukung iya nyadi raja utara. Artikel sebedau tu bisi madah, siti-siti perintah patut ngereja tiga iti pekara ngambika iya ulih dikumbai raja utara tauka raja selatan. Kesatu, iya nyerang tauka merinsaka nembiak Jehovah. Kedua, utai ke digaga iya nunjukka iya begedika Jehovah enggau nembiak Iya. Lalu ketiga, iya besemekih enggau raja ke seiku agi.
4 Peratika kebuah kitai ulih ngumbai Rusia enggau menua ke nyukung iya nya raja utara kemayaharitu. Kesatu, sida nyerang nembiak Petara lebuh sida nagang pengawa nginjil sereta merinsaka beratus ribu iku nembiak Petara ke diau ba menua ke dipegai sida. Kedua, pengawa nagang enggau merinsa nya nunjukka sida begedika Jehovah enggau nembiak Iya. Ketiga, sida besemekih enggau raja selatan, iya nya menua Britain enggau Amerika Serikat. Aram kitai meda kebuah Rusia enggau menua ke nyukung iya ulih dikumbai raja utara.
RAJA UTARA ENGGAU RAJA SELATAN MAJAK BESEMEKIH ENGGAU PANGAN DIRI
5. Nama timpuh ke dipadah ba Daniel 11:40-43? Nama nyadi maya nya?
5 Bacha Daniel 11:40-43 ari nota kaki. * Jaku ti benabi berandau pasal timpuh maya pengujung dunya. Ayat nya nerangka baka ni raja utara enggau raja selatan besemekih enggau pangan diri. Baka ke dipadah Daniel, maya pengujung dunya, raja selatan enggau raja utara deka “belaban enggau pangan diri.”—Dan. 11:40.
6. Nama nunjukka raja utara enggau raja selatan majak belaban enggau pangan diri?
6 Ketegal deka nyadi perintah ti pemadu bekuasa, raja utara enggau raja selatan majak belaban enggau pangan diri. Ambika chunto, peratika utai ke nyadi pengudah Perang Dunya II. Soviet Union enggau menua ke nyukung iya berengkah nguasa mayuh menua bukai ba Eropah. Pengawa raja utara tu ngasuh raja selatan enggau menua bukai ngempungka bala soldadu sida kena ngelaban raja utara. Raja utara enggau raja selatan majak besemekih deka nyadi raban soldadu ti pemadu kering. Nya alai seduai iya ngena mayuh duit meli senyata perang. Ba perang ke nyadi ba Afrika, Asia, enggau Amerika Latin, raja utara nyukung munsuh ke ngelaban raja selatan. Empai lama ti udah, Rusia enggau menua ke nyukung iya majak kering. Raja utara mega ngena komputer ngelaban raja selatan. Seduai iya bela nyalahka pangan diri laban ngena program komputer ngerusak sistem ekonomi enggau politik pangan diri. Lalu baka ke dipadah Daniel, raja utara majak nyerang nembiak Petara.—Dan. 11:41.
RAJA UTARA TAMA NGAGAI “MENUA TI MANAH”
7. Nama utai ke dikumbai “Menua ti Manah”?
7 Daniel 11:41 madahka raja utara deka tama ngagai “Menua ti Manah.” Nama menua nya? Maya jeman Bup Kudus, menua Israel dikumbai “menua ti pemadu manah ari semua menua bukai.” (Esk. 20:6) Tang utai ke ngasuh menua nya amat manah laban nya endur orang nyembah Jehovah. Kenyau ari Pentikos 33 Masihi, “Menua ti Manah” ukai agi ditujuka ngagai siti-siti endur ba dunya. Tu endang amat laban nembiak Jehovah bisi ba serata dunya. Nya alai, “Menua ti manah” dituju ngagai chara idup nembiak Jehovah ti nyengkaum pengawa begempuru sereta nginjil.
8. Baka ni raja utara tama ngagai “Menua ti Manah”?
8 Maya hari ti penudi, raja utara suah amat tama ngagai “Menua ti Manah.” Ambika chunto, lebuh Nazi Jerman nyadi raja utara maya Perang Dunya II, raja nya tama ngagai “Menua ti Manah” lebuh iya merinsa sereta munuh nembiak Petara. Pengudah Perang Dunya II, Soviet Union nyadi raja utara. Iya mega tama ngagai “Menua ti Manah” lebuh iya merinsaka nembiak Petara lalu mejal sida pindah jauh ninggalka rumah sida.
9. Empai lama ti udah, baka ni Rusia enggau menua bukai ke nyukung iya tama ngagai “Menua ti Manah”?
9 Empai lama ti udah, Rusia enggau menua ke nyukung iya mega tama ngagai “Menua ti Manah.” Baka ni sida tama? Ba taun 2017, raja utara ti baru tu nagang pengawa nembiak Jehovah lalu ngejil sekeda bala menyadi Kristian kitai. Iya mega enda ngemendarka litaricha kitai ke nyengkaum New World Translation dikena. Kelimpah ari nya, iya ngerampas pampang opis, Palan Gempuru sereta Palan Gempuru Besai kitai ke bisi ba Rusia. Ketegal utai ke digaga Rusia, nya alai ba taun 2018, Raban ti Ngiring ngumbai Rusia enggau menua ke nyukung iya, raja utara. Tang taja pan nembiak Jehovah balat diperinsa, sida enda ngelaban perintah tauka nguji deka nukar perintah nya. Sida nitihka jaku lalau ari Bup Kudus ke ngasuh besampika “semua orang ke megai kuasa,” kelebih agi enti orang ke megai kuasa nya patut ngaga pemutus ke bekaul enggau sembah kitai.—1 Tim. 2:1, 2.
KATI RAJA UTARA ULIH NGERUSAK RAJA SELATAN?
10. Kati raja utara ulih ngerusak raja selatan? Terangka.
10 Ba Daniel 11:40-45, bisi madah pasal utai ke digaga raja utara. Kati reti nya iya ulih ngerusak raja selatan? Enda. Raja selatan agi bisi lebuh Jehovah seduai Jesus ngerusak semua perintah mensia ba perang Armagedon. (Pem. 19:20) Nama kebuah kitai ulih arapka tu? Peratika jaku ti benabi ba bup Daniel enggau bup Pemandang.
Maya Armagedon, Perintah Petara, ke baka sigi batu, deka ngerusak perintah mensia, ti digambarka seiku engkeramba ti besai (Peda genteran 11)
11. Nama utai ke dipadah ba Daniel 2:43-45? (Peda gambar ba kulit majalah.)
11 Bacha Daniel 2:43-45. Nabi Daniel madah pasal tubuh engkeramba ti besai ke digaga ari bemacham bansa utai. Tiap iti begian engkeramba nya ngambarka perintah ti bebida, ke merintah menua alai mayuh nembiak Petara diau. Tiap iti perintah tu merintah ba maya ti enda sama. Begian kaki engkeramba ti digaga ari besi enggau tanah liat ngambarka perintah ti penudi, iya nya Britain enggau Amerika Serikat. Tu nunjukka perintah nya agi merintah lebuh Perintah Petara ngerusak semua perintah mensia.
12. Nama digambarka pala jelu ti ketujuh? Nama kebuah kitai patut nemu pasal nya?
12 Rasul John mega nyebut pasal beberapa iti perintah ke mai empas ngagai nembiak Jehovah. John ngambarka bala perintah nya baka seiku jelu ke bisi tujuh igi pala. Pala iya ti ketujuh ngambarka Britain enggau Amerika Serikat. Kitai patut nemu tu laban nadai agi pala bukai pengudah pala jelu ti ketujuh nya. Pala ti ketujuh nya agi merintah lebuh Jesus enggau soldadu serega iya ngerusak pala nya sereta jelu ke bukai. *—Pem. 13:1, 2; 17:13, 14.
NAMA DEKA DIGAGA RAJA UTARA DUDI HARI?
13-14. Sapa Gok ari menua Magok? Lalu nama ke engka ngasuh iya nyerang nembiak Petara?
13 Esekiel 38:10-23 nerangka sekeda utai ke engka deka nyadi sebedau raja utara enggau raja selatan dirusak. Enti utai ke dipadah ba Esekiel enggau ba Daniel 2:43-45; 11:44–12:1; enggau Pemandang 16:13-16, 21 nyebut pasal pekara ti sama, kitai ulih meda sekeda ari utai tu nyadi.
14 Enda lama pengudah penusah ti besai berengkah, “semua raja di dunya” deka begempung numbuhka siti raban. (Pem. 16:13, 14; 19:19) Bup Kudus ngumbai raban nya “Gok” ari menua Magok. (Esk. 38:2) Raban nya deka nyerang semua nembiak Petara lalu nguji deka ngerusak sida abis lengis. Nama ke ngasuh serang tu nyadi? Bekaul enggau timpuh tu, rasul John madahka ujan batu ti balat deka ninggang munsuh Petara. Ujan batu nya engka ngambarka pesan berat ke dibai nembiak Jehovah bekaul enggau utai ke deka nyadi ngagai munsuh Petara. Engka pesan nya ke ngasuh Gok ari menua Magok nyerang nembiak Jehovah lalu nguji deka ngerusak semua sida abis lengis.—Pem. 16:21.
15-16. (a) Nama utai ke engka dipadah ba Daniel 11:44, 45? (b) Nama deka nyadi ngagai raja utara enggau Gok ari menua Magok?
15 Pesan ti berat nya enggau serang ti penudi ari munsuh Petara engka utai ke sama ti dipadah ba Daniel 11:44, 45. (Bacha ari nota kaki.) * Dia Daniel madahka bisi “berita ti datai ari timur enggau ari utara” ke ngasuh raja utara irau lalu ‘enggau ati ti balat pedis deka ngerusak mayuh orang.’ Rambai jaku “mayuh orang” dituju ngagai nembiak Jehovah. * Ditu Daniel engka madah pasal serang ti penudi kena ngelaban nembiak Petara.
16 Lebuh raja utara enggau bala perintah bukai nyerang nembiak Jehovah, tu ngujungka Jehovah pedis ati lalu perang Armagedon berengkah. (Pem. 16:14, 16) Maya nya, raja utara enggau Gok ari menua Magok deka dirusak, lalu ‘nadai orang deka nulung sida.’—Dan. 11:45, NWT.
Ba perang Armagedon, Jesus Kristus enggau bala soldadu serega iya deka ngerusak dunya ti dikuasa Sitan lalu nyelamatka nembiak Jehovah (Peda genteran 17)
17. Sapa melikat Mikael ke disebut ba Daniel 12:1, lalu nama deka digaga iya?
17 Bacha Daniel 12:1. Nama reti ayat tu? Ayat tu madahka enggau mayuh agi chara raja utara enggau menua ke nyukung iya deka dirusak, sereta baka ni kitai ulih diselamatka. Mikael nya nama bukai ke dikena Raja kitai, Jesus Kristus. Iya “nyaga” nembiak Jehovah kenyau ari taun 1914, lebuh Perintah iya ditumbuhka di serega. Enda lama agi, iya deka “pegari,” tauka ngerusak munsuh iya ba perang Armagedon. Baka ke dipadah Daniel, “nadai penusah ti jai agi” ari perang ke penudi tu dalam sejarah mensia. Ba bup Pemandang, John madahka, maya nya dikumbai “penusah ti besai.”—Pem. 6:2; 7:14.
KATI NAMA NUAN DEKA “DITULIS DALAM BUP”?
18. Nama kebuah kitai enda ibuh kelalu irau enggau utai ke deka nyadi?
18 Enda ngira nama utai ke deka nyadi, kitai enda ibuh kelalu irau. Nama kebuah? Daniel seduai John bela madahka Jehovah enggau Jesus deka nyelamatka nembiak Jehovah maya penusah ti besai. Daniel mega madahka, nama sida ke selamat deka “ditulis dalam bup.” (Dan. 12:1) Baka ni nama kitai ulih ditulis dalam bup nya? Kitai patut nunjukka diri arapka Jesus, ke nyadi Anak Domba Petara. (Jhn. 1:29) Kitai patut nyerahka pengidup diri ngagai Petara lalu dibaptisa. (1 Pet. 3:21) Kitai mega patut nyukung Perintah Petara, iya nya enggau naka ulih nulung orang belajar pasal Jehovah.
19. Nama patut digaga kitai diatu, lalu nama kebuah?
19 Diatu meh maya kitai negapka pengarap kitai ba Jehovah, gerempung Iya, sereta nyukung Perintah Petara. Enggau nya, kitai deka selamat lebuh raja utara enggau raja selatan dirusak Perintah Petara.
LAGU 149 Lagu ke Pemenang
^ per. 5 Sapa ke nyadi “raja utara” kemayaharitu? Baka ni iya deka dirusak? Saut ngagai tanya nya ulih negapka pengarap sereta nulung kitai sedia napi utai ke deka nyadi maya penusah ti besai.
^ per. 2 Ba artikel tu, leka jaku “raja Siria” diganti ngena “raja utara” lalu leka jaku “raja Ejip” diganti ngena “raja selatan,” ke diambi ari Daniel bagi 11 ngambika sejalai enggau jaku asal ke dikena nulis Bup Kudus.
^ per. 5 Daniel 11:40-43, NWT: “Ba pengujung dunya, iya enggau raja selatan deka belaban enggau pangan diri. Baka ribut, raja utara deka nyerang iya ngena kerita perang, kuda, enggau mayuh kapal. Iya deka tama ngagai mayuh menua lalu nganyutka sida baka ai bah. Iya mega deka tama ngagai Menua ti Manah, lalu mayuh menua deka dialahka iya. Tang orang Edom, orang Moap, enggau bala pemesai orang Amon, deka ngelepaska diri ari iya. Lebuh iya nyerang semua menua nya, iya enda ngalau menua Ejip. Iya deka nguasa pengaya ti dilalai ke digaga ari emas, pirak, enggau utai bukai ti dikesayauka, ari menua Ejip. Lalu orang Libia enggau orang Etiopia deka nitihka singkang iya.”
^ per. 12 Ke penerang mayuh agi pasal Daniel 2:36-45 enggau Pemandang 13:1, 2, peda majalah Menara Pengawal, kena 15 Jun 2012, lambar 7-19, dalam jaku Melayu.
^ per. 15 Daniel 11:44, 45, NWT: “Udah nya iya deka irau ninga berita ti datai ari timur enggau ari utara, lalu iya enggau ati ti balat pedis deka ngemunaska lalu ngerusak mayuh orang. Iya deka nirika langkau kain diraja iya ba entara tasik ti besai enggau bukit ti kudus ba Tanah ti Manah. Udah nya iya deka dirusak, lalu nadai orang deka nulung iya.”
^ per. 15 Ke penerang mayuh agi, peda majalah Menara Pengawal kena 15 Mei 2015, lambar 29-30 dalam jaku Melayu.
