1-2. Ania ti usigentayo iti daytoy nga artikulo?

NAKAAD-ADU itan ti ebidensia nga agbibiagtayon iti panungpalan ti maudi nga al-aldaw daytoy a sistema ti bambanag. Din agbayag, dadaelenton ni Jehova ken ni Jesu-Kristo ti amin a gobierno a kumonkontra iti Pagarian. Sakbay a mapasamak dayta, agtultuloy ti panaglaban ti ari ti amianan ken ti ari ti abagatan ken ti panangbusorda iti ili ti Dios.

² Iti daytoy nga artikulo, usigentayo ti naipadto iti Daniel 11:40–12:1. Ammuentayo no asino ti ari ti amianan ita ken pagsasaritaantayo no apay a makapagtalinaedtayo a kalmado aniaman ti mapasamak iti masanguanan.

3-4. Asino ti ari ti amianan ita? Ilawlawag.

³ Kalpasan a nasinasina ti Soviet Union idi 1991, dagiti adipen ti Dios iti dayta a naglawa a rehion ket nakaawat iti “bassit a tulong”—wenno apagbiit a tiempo ti wayawaya. (Dan. 11:34) Kas resultana, nawayada a nakapangasaba, ken di nagbayag, nagbalin a ginasut a ribu dagiti agibumbunannag kadagiti dati a paset ti Soviet Union. Ngem kalpasan ti sumagmamano a tawen, ti Russia ken dagiti kaaliadona ti nagbalin nga ari ti amianan. Kas nailawlawag iti napalabas nga artikulo, tapno agbalin nga ari ti amianan wenno ari ti abagatan ti maysa a gobierno, masapul nga adda tallo nga aramidenna: (1) dakkel ti impluensiana iti ili ti Dios, (2) ipakita dagiti aramidna a kabusorna ni Jehova ken ti ili ti Dios, ken (3) makikomkompetensia iti karibalna nga ari.

 ⁴ Dagitoy ti rason a maibagatayo a ti Russia ken dagiti kaaliadona ti ari ti amianan ita: (1) Dakkel ti impluensiada iti ili ti Dios ta iparparitda ti trabaho a panangasaba ken idaddadanesda ti ginasut a ribu a kakabsattayo nga adda kadagiti lugar a kontroladoda. (2) Ipakita dagita nga ar-aramidenda a kagurgurada ni Jehova ken ti ilina. (3) Makikomkompetensiada iti ari ti abagatan, ti Anglo-America a Kabilgan a Turay iti Lubong. Kitaentayo no kasano a nagbalin nga ari ti amianan ti Russia ken dagiti kaaliadona.

5. Ania a tiempo ti nailadawan iti Daniel 11:40-43, ken ania ti mapasamak bayat dayta a tiempo?

⁵ Basaen ti Daniel 11:40-43. Daytoy a paset ti padto ket maipapan iti tiempo ti panungpalan. Iladawanna ti panagribal ti ari ti amianan ken ti ari ti abagatan. Kas impadto ni Daniel, iti tiempo ti panungpalan, ti ari ti abagatan ket ‘makidinnuron’ wenno ‘makisinnangdo’ iti ari ti amianan.—Dan. 11:40; ftn.

6. Ania ti ebidensia nga agdindinnuron ti dua nga ari?

⁶ Agtultuloy nga agkinnompetensia ti ari ti amianan ken ti ari ti abagatan ta agpada a kayatda ti agbalin a kabilgan iti lubong. Kas pagarigan, kitaentayo dagiti napasamak kalpasan ti Gubat Sangalubongan II idi kontroladon ti Soviet Union ken dagiti kaaliadona ti dakkel a paset ti Europe. Gapu iti dayta nga inaramid ti ari ti amianan, napilitan ti ari ti abagatan a mangbuangay iti internasional a namilitariaan nga aliansa, a pagaammo kas NATO. Intultuloy ti ari ti amianan ti makikompetensia iti ari ti abagatan iti panangbuangay iti kabilgan a puersa militar. Nakilaban met ti ari ti amianan iti karibalna babaen ti panangsuportana kadagiti kabusor ti kalabanna kadagiti gubat idiay Africa, Asia, ken Latin America. Kadagiti nabiit pay a tawen, insaknap ti Russia ken dagiti kaaliadona ti impluensiada iti intero a lubong. Makilablabanda met iti ari ti abagatan babaen ti kompiuter. Agin-innakusar dagitoy nga ari iti panangusar kadagiti makadadael a programa iti kompiuter tapno madadael ti ekonomia ken gobierno ti kalabanda. Ken kas impadto ni Daniel, itultuloy ti ari ti amianan ti panangrautna iti ili ti Dios.—Dan. 11:41.

7. Ania ti “daga ti Dekorasion”?

⁷ Kuna ti Daniel 11:41 a sumrekto ti ari ti amianan iti “daga ti Dekorasion.” Ania dayta a daga? Idi un-unana, ti literal a daga ti Israel ket naibilang kas “ti kapintasan iti amin a daga.” (Ezek. 20:6) Ngem ti kangrunaan a rason a nakapatpateg dayta a daga ket idiay ngamin ti sentro ti pudno a panagdaydayaw. Sipud idi Pentecostes 33 C.E., dayta a “daga” ket saanen a maymaysa ken literal a lugar ditoy daga. Ngamin ti ili ni Jehova ket adda iti intero a daga. Ti ngarud “daga ti Dekorasion” ita ket ti aktibidad ti ili ni Jehova a pakairamanan ti panagdaydayawda ken Jehova babaen kadagiti gimong ken panangasaba.

8. Kasano a simrek ti ari ti amianan iti “daga ti Dekorasion”?

⁸ Bayat ti maudi nga al-aldaw, maulit-ulit a simrek ti ari ti amianan iti “daga ti Dekorasion.” Kas pagarigan, idi nagbalin nga ari ti amianan ti Germany nga inturayan dagiti Nazi, nangnangruna bayat ti Gubat Sangalubongan II, simrek dayta nga ari iti “daga ti Dekorasion” idi indadanes ken pinapatayna dagiti adipen ti Dios. Kalpasan ti Gubat Sangalubongan II, idi nagbalin ti Soviet Union nga ari ti amianan, simrek dayta nga ari iti “daga ti Dekorasion” idi indadanes  ken impanna dagiti adipen ti Dios iti sabali a lugar.

9. Iti nabiit pay a tawtawen, kasano a simrek ti Russia ken dagiti kaaliadona iti “daga ti Dekorasion”?

⁹ Iti nabiit pay a tawtawen, simrek met ti Russia ken dagiti kaaliadona iti “daga ti Dekorasion.” Kasano? Idi 2017, imparit daytoy agdama nga ari ti amianan ti trabaho ti ili ni Jehova ken impaibaludna ti dadduma a kakabsattayo. Imparitna met dagiti publikasiontayo, agraman ti Baro a Lubong a Patarus. Kasta met, kinompiskarna ti sanga nga opisinatayo idiay Russia, ken ti dadduma a Kingdom Hall ken Assembly Hall. Gapu kadagita, imbaga ti Bagi a Manarawidwid idi 2018 a ti ari ti amianan ket ti Russia ken dagiti kaaliadona. Ngem uray nakaro ti pannakaidadanes dagiti adipen ni Jehova, saanda a kayat ti makiraman iti aniaman nga aramid a mangkontra wenno mangbalbaliw kadagiti gobierno ti tao. Sursurotenda ketdi ti balakad ti Biblia nga ikararaganda ti amin a “nangato ti saadna,” nangruna no mangaramid dagita kadagiti desision a makaapektar iti wayawaya iti panagdaydayaw.—1 Tim. 2:1, 2.

10. Abakento kadi ti ari ti amianan ti ari ti abagatan? Ilawlawag.

¹⁰ Ti padto iti Daniel 11:40-45 ket nakasentro iti ar-aramiden ti ari ti amianan. Kayat kadi a sawen dayta nga abakennanto ti ari ti abagatan? Saan. ‘Sibibiag’ pay ti ari ti abagatan inton dadaelen ni Jehova ken ni Jesus ti amin a gobierno ti tao inton gubat ti Armagedon. (Apoc. 19:20) Apay a siguradotayo? Usigentayo ti ipakita dagiti padto iti Daniel ken Apocalipsis.

11. Ania ti ipakita ti Daniel 2:43-45? (Kitaen ti ladawan iti akkub.)

¹¹ Basaen ti Daniel 2:43-45. Inladawan ni propeta Daniel ti agsasaruno a gobierno ti tao a dakkel ti impluensia ken epektoda iti ili ti Dios. Nailadawan dagita kas nadumaduma a paset ti nakadakdakkel a metal nga imahen. Ti kaudian kadagita a gobierno ti tao ket nailadawan kas dagiti saka ti imahen a naaramid iti naglaok a landok ken pila. Dagiti saka irepresentarda ti Anglo-America a Kabilgan a Turay iti Lubong. Ipakita dayta a padto a ti Anglo-America a Kabilgan a Turay iti Lubong ket agturturay pay laeng inton dadaelen ti Pagarian ti Dios ti amin a gobierno ti tao.

12. Ania ti irepresentar ti maikapito nga ulo ti narungsot nga animal, ken apay a napateg dayta?

¹² Dineskribir met ni apostol Juan ti agsasaruno a kabilgan a turay iti lubong a nangituray iti ili ni Jehova. Inladawan ni Juan dagitoy a gobierno kas ti narungsot nga animal a pito ti ulona. Ti maikapito nga ulo dayta nga animal irepresentarna ti Anglo-America a Kabilgan a Turay iti Lubong. Napateg daytoy ta awanen ti sabali nga ulo a nagtubo kalpasan dayta. Agturturay pay laeng ti maikapito nga ulo daytoy nga animal inton ni Kristo ken ti nailangitan nga armadana dadaelenda dayta agraman ti nabatbati a paset ti animal. *—Apoc. 13:1, 2; 17:13, 14.

13-14. Asino ni “Gog iti daga ti Magog,” ken ania ti mabalin a mamagpungtot kenkuana tapno rautenna ti ili ti Dios?

¹³ Tulongannatayo ti padto ni Ezekiel a mangtarus iti mabalin a mapasamak bayat ti maudi nga al-aldaw ti ari ti amianan ken ti ari ti abagatan. No ibilangtayo nga agpada a tiempo ken paspasamak ti tuktukoyen dagiti padto iti Ezekiel 38:10-23; Daniel 2:43-45;  11:44–12:1; ken Apocalipsis 16:13-16, 21, mabalin nga ekspektarentayo a mapasamak dagiti sumaganad.

¹⁴ Sumagmamano a tiempo kalpasan ti panangrugi ti dakkel a rigat, dagiti “ari iti intero a daga” mangbuangayda iti maysa nga aliansa dagiti nasion. (Apoc. 16:13, 14; 19:19) Sigun iti Biblia, dayta nga aliansa ket maawagan “Gog iti daga ti Magog.” (Ezek. 38:2) Dayta nga aliansa dagiti nasion rautennanto ti ili ti Dios tapno ikisapna ida. Apay? Iti padto maipapan iti dayta a tiempo, imbaga ni apostol Juan a dagiti kabusor ti Dios ket matupakanto iti nagdadakkel nga uraro. Dagita nga uraro ket mabalin a mangisimbolo kadagiti nadagsen a mensahe ti panangukom nga ipakaammo ti ili ni Jehova. Posible a daytoy a mensahe ti mamagpungtot ken Gog iti Magog isu a rautennanto ti ili ti Dios tapno ikisapna ida.—Apoc. 16:21.

15-16. (a) Ania a pasamak ti mabalin a tuktukoyen ti Daniel 11:44, 45? (b) Anianto ti mapasamak iti ari ti amianan ken iti dadduma pay a mangbukel iti Gog iti Magog?

¹⁵ Daytoy a nadagsen a mensahe ken ti maudi nga iraraut dagiti kabusor ti Dios ket mabalin nga isu met laeng dagiti pasamak a natukoy iti Daniel 11:44, 45. (Basaen.) Impadto ni Daniel nga “addanto damdamag manipud iti daya ken iti amianan” a mangriribuk iti ari ti amianan, ket rummuarto a “napalalo ti pungtotna.” Panggep ti ari ti amianan nga “adunto ti patayen ken dadaelenna.” Agparang a ti “adu” a natukoy ditoy ket ti ili ni Jehova. * Mabalin a desdeskribiren ditoy ni Daniel ti maudi a pannakaraut ti ili ti Dios.

¹⁶ Gapu iti daytoy nga iraraut ti ari ti amianan, agraman ti dadduma pay a gobierno iti lubong, makapungtot ti Mannakabalin-amin ket iyegna ti gubat ti Armagedon. (Apoc. 16:14, 16) Daytanton ti kanibusanan ti ari ti amianan agraman ti amin a nasion a mangbukel iti Gog iti Magog ket “awanto ti tumulong kenkuana.”—Dan. 11:45.

17. Asino ni Miguel a “naindaklan a prinsipe” a nadakamat iti Daniel 12:1, ania ti ar-aramidenna, ken ania ti asidegen nga aramidenna?

¹⁷ Ti sumaruno a bersikulo iti salaysay ni  Daniel ket mangted iti kanayonan a detalye no kasano a madadael ti ari ti amianan ken dagiti kaaliadona ken no kasano a maisalakantayo. (Basaen ti Daniel 12:1.) Ania ti kayat a sawen daytoy a bersikulo? Miguel ti sabali pay a nagan ti agturturayen nga Aritayo a ni Kristo Jesus. ‘Agtaktakderen para’ iti ili ti Dios sipud 1914 idi naipasdek ti Pagarianna idiay langit. Asidegen nga ‘agtakder,’ wenno agtignay, tapno dadaelenna dagiti kabusorna inton gubat ti Armagedon. Dayta a gubat ti maudi a pasamak iti aw-awagan ni Daniel a kakaruan pay laeng a “tiempo ti rigat.” Iti padto ni Juan a nairekord iti Apocalipsis, tinukoyna dayta a tiempo agingga iti gubat ti Armagedon kas “ti dakkel a rigat.”—Apoc. 6:2; 7:14.

18. Apay a makapagtalinaedtayo a kalmado aniaman ti mapasamak iti masanguanan?

¹⁸ Makapagtalinaedtayo a kalmado aniaman ti mapasamak iti masanguanan, ta impasigurado da Daniel ken Juan a makalasatto dagiti agserserbi ken Jehova ken ni Jesus iti daytoy awan kapadana a dakkel a rigat. Kuna ni Daniel a ti nagan dagiti makalasat ket “naisurat iti libro.” (Dan. 12:1) Kasano a maisurat ti nagantayo iti dayta a libro? Masapul a paneknekantayo nga adda pammatitayo ken Jesus, ti Kordero ti Dios. (Juan 1:29) Masapul nga agpabautisartayo kas simbolo ti panagdedikartayo iti Dios. (1 Ped. 3:21) Ken masapul nga ipakitatayo ti panangsuportatayo iti Pagarian ti Dios babaen ti panangikagumaantayo a tumulong iti sabsabali a mangammo iti maipapan ken Jehova.

19. Ania ti masapul nga aramidentayo itan, ken apay?

¹⁹ Itan ti tiempo a pabilgentayo ti panagtalektayo ken Jehova ken iti organisasionna a buklen dagiti matalek nga adipenna. Itan ti tiempo a suportarantayo ti Pagarian ti Dios. No aramidentayo dayta, maisalakantayo inton dadaelen ti Pagarian ti Dios ti ari ti amianan ken ti ari ti abagatan.