1-2. Ndai sumhpa hta hpa lam hkaja na kun?

JAHTUM nhtoi na jahtum daw hta anhte asak hkrung nga ai hpe madi madun nga ai lam ni grau law wa ai. Karai Mungdan hpe ninghkap ai asuya yawng hpe Yehowa hte Yesu jahten kau na re. N jahten kau shi yang, dingdung hkawhkam hte dingda hkawhkam gaw shada da mung, Karai a masha ni hpe mung gasat na re.

² Daniela 11:40–12:1 hta lawm ai myihtoi ga hpe ndai sumhpa hta hkaja na re. Ya aten na dingdung hkawhkam gaw kadai re ai lam chye lu na re. Hkrum wa na mayak mahkak ni hpe tawt lai lu ai lam hpe mung hkaja lu na re.

3-4. Dingdung hkawhkam nnan gaw kadai rai kun? Sanglang dan u.

³ 1991 hta Sobiyet Munghpawm Mungdan hten run mat ai hpang, dai ginra hta nga ai Karai a masha ni gaw aten loi mi hkyam sa lu ai. Dai gaw Daniela myihtoi da ai “karum ai lam kaji mi” lu ai re. (Dan 11:34) Dai majaw, wanglu wanglang hkaw tsun lu wa ai. Sobiyet Munghpawm Mungdan hta lawm ai mungdan ni hta hkaw tsun masha sen hku law wa ai. Raitim, shaning loi mi na ai hpang, Rasha hte jinghku mungdan ni gaw dingdung hkawhkam byin wa ai. Shawng na sumhpa hta hkaja wa ai hte maren, dingdung hkawhkam (sh) dingda hkawhkam byin na matu, lam 3 hte hkrak rai ra ai: (1) Karai  a masha ni hte dingtawk seng ang ra ai (2) Yehowa hte Karai a masha ni a hpyen re ai hpe galaw ai lam hte madun dan ra ai (3) shada da gasat shingjawng ra ai.

⁴ Rasha hte jinghku mungdan ni gaw, dai ni aten na dingdung hkawhkam re ai ngu hpa majaw lu tsun ai lam yu yu ga. (1) Karai a masha ni hte dingtawk seng ang nga ai. Hkaw tsun bungli hpe pat shingdang ai. Mungdan hta nga ai hkying hku law ai hpunau nauna ni hpe zingri ai. (2) Dai gaw, Yehowa hte Karai a masha ni hpe nju ndawng ai re. (3) Dingda hkawhkam Engalo-Amerikan Mungkan Daru Magam hte gasat shingjawng ai. Rasha hte jinghku mungdan ni gaw dingdung hkawhkam re ai lam gara hku sakse madun ai hpe yu yu ga.

5. Daniela 11:40-43 gaw gara lam hte seng nna tsun da ai kun?

⁵ Daniela 11:40-43 hpe hti u. Myihtoi ga a ndai daw gaw, aten ladaw jahtum hta, dingdung hkawhkam hte dingda hkawhkam a gasat ai lam hpe ahkyak shatai tsun da ai. Myihtoi ga hte maren, hpang jahtum nhtoi hta dingda hkawhkam gaw, dingdung hkawhkam hte “gasat” na re.​—Dan 11:40.

6. Hkawhkam lahkawng gaw gara ladat hte shada gasat ma ai kun?

⁶ Dingdung hkawhkam hte dingda hkawhkam gaw atsam kaba mayu ai majaw gasat ma ai. Ga shadawn, nambat 2 mungkan majan ngut ai hpang, Sobiyet Munghpawm Mungdan hte jinghku mungdan ni gaw Urawpa Dan a shara law law hpe zing la kau ai. Hpa byin wa ai kun? Dingda hkawhkam gaw “NETO” (Dingdung Atalantik Ga Shaka Uhpung) hpe hpawng de ai. Dingdung hkawhkam hte dingda hkawhkam gaw, hpyen n-gun ja hkra gumhpraw law law jailang ai. Ahprika, Asha, Letin Amerika hta byin ai majan ni hta tinang a jinghku mungdan hpe madi shadaw ya ai hku nna shada gasat ma ai. Kade n na shi ai shaning ni hta, Rasha hte jinghku mungdan ni gaw, mungkan hta tsawmra n-gun ja wa ai. Kumpyuta ladat hte dingda hkawhkam hpe gasat ai. Dai ladat hte sha, hpaga lam, mung masa lam ni hpe jahten na matu shakut ai ngu shada mara shagun ma ai. Daniela tau hkrau tsun da ai hte maren, dingdung hkawhkam gaw Karai a masha ni hpe matut gasat ai.​—Dan 11:41.

7. “Reng htum ai mung” gaw hpa rai kun?

⁷ “Reng htum ai mung” de dingdung hkawhkam shang wa na ngu Daniela 11:41 hta tsun da ai. Dai gaw gara mungdan kun? Moi prat hta Israela mung hpe “mungdan ni mahkra hta grau kaja” ai ngu sawn la wa ai. (Eze 20:6) Yehowa hpe nawku daw jau ai shara re ai majaw grau kaja ai re. A.D. 33 Pentekoti Poi kaw nna, dai “mungdan” gaw gaja wa nga ai Israela mungdan hpe tsun ai n rai sai. Hpa majaw nga yang, Yehowa a masha ni gaw mungkan ting hta chyam bra nga sai majaw re. Dai ni aten na, “reng htum ai mung” gaw mungdan langai hte bung ai Yehowa a amyu masha ni a uhpung re. Dai hta zuphpawng ni lung ai, hkaw tsun bungli hte Yehowa hpe nawku daw jau ai lam lawm ai.

8. Dingdung hkawhkam gaw “reng htum ai mung” de gara hku shang wa ai kun?

⁸ Hpang jahtum nhtoi hta, “reng htum ai mung” de dingdung hkawhkam chyahkring hkring shang wa ai. Ga shadawn, nambat 2 mungkan  majan laman, dingdung hkawhkam Nazi Jamani gaw, Karai a masha ni hpe zingri ai, sat kau ai hku nna, “reng htum ai mung” de shang wa ai. Majan ngut ai hpang, Sobiyet Munghpawm Mungdan gaw dingdung hkawhkam byin wa ai. Dai shaloi, Karai a masha ni hpe zingri ai, kaga mung de gawt kau ai hku nna, “reng htum ai mung” de shang wa ai.

9. Kade n na shi ai shaning ni hta “reng htum ai mung” de Rasha hte jinghku mungdan ni gara hku shang wa ai kun?

⁹ Kade n na shi ai shaning ni hta, Rasha hte jinghku mungdan ni mung “reng htum ai mung” de shang wa ai. Gara hku nna kun? 2017 hta, Yehowa amyu masha ni a bungli hpe pat shingdang nna, hpunau nauna nkau hpe htawng jahkrat kau ai. Mungkan Nnan Ga Gale Chyum Laika hte hpawn, laili laika ni hpe pat shingdang ai. Rasha kaw nga ai ginjaw garan rung, Nawku Htingnu, Zuphpawng Htingnu ni hpe zing la kau ai. Dai majaw, 2018 hta, Uphkang Hpung gaw Rasha hte jinghku mungdan ni hpe dingdung hkawhkam ngu masat wa ai. Yehowa a masha ni gaw laja lana zingri hkrum tim, asuya galai mat hkra galaw ai lam hta tsep kawp n lawm ai. Laksan hku nna, wanglu wanglang nawku daw jau na ahkang hpe hkra machyi shangun ai dawdan lam raitim pyi, “ahkang aya lu ai ni mahkra a matu” akyu hpyi ya u ngu ai Chyum Laika hpaji jaw ga hpe hkan sa ai.​—1 Tm 2:1, 2.

10. Dingdung hkawhkam gaw dingda hkawhkam hpe awng dang lu na kun? Sanglang dan u.

¹⁰ Daniela 11:40-45 hta lawm ai myihtoi ga gaw, dingdung hkawhkam galaw na lam hpe ahkyak shatai tsun da ai. Dai majaw, dingda hkawhkam hpe awng dang na kun? N dang ai. Hara Magedon majan hta, shinggyim asuya yawng hpe Yehowa hte Yesu jahten na aten du hkra, dingda hkawhkam gaw naw nga nga na re. (Shr 19:20) Hpa majaw dai hku lu tsun ai kun? Daniela hte Shingran Laika hta lawm ai myihtoi ga ni hpe yu yu ga.

11. Daniela 2:43-45 gaw hpa lam hpe tsun dan ai kun? (Makawp sumla hpe yu u.)

¹¹ Daniela 2:43-45 hpe hti u. Karai a masha ni hte seng ang nga ai shinggyim asuya ni a lam myihtoi Daniela tsun wa ai. Shanhte hpe nhprang sumla kaba a adaw achyen hku nna madun da ai. Hpang jahtum na shinggyim asuya hpe hpri hte ga kagam kayau da ai lagaw hku nna madun da ai. Lagaw gaw Engalo-Amerikan Mungkan Daru Magam hpe malai tsun ai re. Shinggyim asuya hpe Karai a Mungdan shamyit kau ai aten hta, dai asuya matut nga nga na ngu myihtoi htoi da ai.

12. Matse labye a sanit ngu na baw gaw hpa hpe malai tsun ai kun? Dai hpe chye na matu hpa majaw ahkyak ai kun?

¹² Kasa Yawhan mung, Yehowa masha ni hpe uphkang ai mungkan daru magam ni a lam tsun wa ai. Dai asuya ni hpe baw sanit tu ai matse labye hku nna hkrang shapraw da ai. Matse labye a sanit ngu na baw gaw, Engalo-Amerikan Mungkan Daru Magam hpe malai tsun ai re. Matse labye hta kaga baw n nga sai. Dai hpe chye na matu grai ahkyak ai. Hpa majaw nga yang, Hkristu hte sumsing hpyen dap gaw shanhte hpe sa shamyit ai aten hta, matse labye a sanit ngu na baw gaw ahkang aya matut nga nga na re. *​—Shr 13:1, 2; 17:13, 14.

13-14. “Magoga masha Goga” gaw kadai rai kun? Karai a masha ni hpe hpa majaw gasat na kun?

¹³ Dingdung hkawhkam hte dingda hkawhkam n jahten hkrum shi yang, hpa byin na hpe Ezekela myihtoi htoi da ai. Ezekela 38:10-23; Daniela 2:43-45; 11:44–12:1 hte Shingran 16:13-16, 21 hta lawm ai myihtoi ga ni gaw, aten langai hta sha byin na mabyin ni hpe tsun nga ai re. Dai zawn byin wa yang, lawu na lam ni byin wa na ngu myit mada mai ai.

¹⁴ Ru tsang kaba hpang ngut nna aten langai ngai hta, “mungkan ting na hkawhkam ni” gaw shada da jinghku hku na re. (Shr 16:13, 14; 19:19) Chyum Laika hta, dai uhpung hpe “Magoga masha Goga” ngu tsun da ai. (Eze 38:2) Shanhte gaw Karai a masha ni hpe hpang jahtum lang gasat na re. Hpa majaw kun? Dai aten hte seng ai myihtoi ga langai hta, Karai a hpyen ni a ntsa sin marang htu wa na hpe kasa Yawhan mu ai. Dai ga shadawn da ai sin gaw, Yehowa a masha ni ndau shana na tara jeyang ai shiga re. Karai a masha ni hpe mungkan ntsa kaw nna, tsep kawp jahten kau na matu Magoga masha Goga hpe shadut ya ai gaw dai shiga rai chye ai.​—Shr 16:21.

15-16. (a) Daniela 11:44, 45 gaw gara mabyin hpe tsun ai rai kun? (b) Dingdung hkawhkam hte Magoga masha Goga hpa byin mat na kun?

¹⁵ Dai shiga hte Karai a hpyen ni a hpang jahtum gasat ai lam hpe sha, Daniela 11:44, 45 (hti u) mung tsun mayu ai rai na re. Dingdung hkawhkam gaw “sinpraw hte dingdung maga de na pru ai shi ga” ni a majaw, myit shanut nna “n-yun bu” wa ai ngu Daniela tsun ai. ‘Masha law law hpe shamyit kau na matu’ dingdung hkawhkam yaw shada da ai. Dai “law law” ngu ai gaw Yehowa a amyu masha ni hpe tsun ai rai na re. * Karai a masha ni hpang jahtum lang gasat hkrum ai hpe Daniela tsun nga ai rai na re.

¹⁶ Kaga asuya ni hte arau, dingdung hkawhkam a gasat ai lam a majaw, Chyahtum Chyalai N-gun Rawng Ai Madu gaw masin pawt nna, Hara Magedon majan hpang na  re. (Shr 16:14, 16) Dai aten hta, dingdung hkawhkam hte arau, Magoga masha Goga hku nna hpawng chyawm da ai mungdan ni hten run mat na re. “Shi hpe karum ai wa kadai n nga ai.”​—Dan 11:45.

17. Daniela 12:1 hta lawm ai “du kaba” ngu ai Mihkaela gaw kadai rai kun? Shi hpa galaw na kun?

¹⁷ Daniela Laika a hpang na daw kaji hta, dingdung hkawhkam hte manang ni gara hku hten run mat na, anhte gara hku hkye hkrang la hkrum na hpe chye shangun ai. (Daniela 12:1 hpe hti u.) Dai daw kaji gaw hpa hpe tsun mayu ai kun? Mihkaela ngu ai gaw Hkawhkam Yesu Hkristu a kaga amying re. Mungdan gawgap ngut ai 1914 kaw nna Karai a masha ni hpe shi “makawp maga” ya nga ai. Hara Magedon majan hta mung, hpyen ni hpe jahten kau ai (sh) “rawt pru” ai hku nna karum ya na re. Dai majan gaw labau hta, sawng dik ai ‘ru tsang aten’ byin na ngu Daniela tsun ai. Shingran Laika hta lawm ai Yawhan a myihtoi ga mung, dai aten hpe “ru tsang kaba” ngu tsun da ai.​—Shr 6:2; 7:14.

18. Htawm hpang hta byin wa na lam ni hpe kamhpa myit hte hpa majaw anhte tawt lai lu na kun?

¹⁸ Ru tsang kaba laman, Yehowa hte Yesu gaw shan a mayam ni hpe hkye la na ngu Daniela hte Yawhan tsun da ai. Dai majaw, kamhpa myit hte htawm hpang hpe anhte tawt lai lu na re. Hkye hkrang la hkrum na ni a amying hpe “jahpan laika” hta ka da na ngu Daniela tsun ai. (Dan 12:1) Anhte a amying lawm na matu hpa galaw ra na kun? Karai a Sagu Kasha Yesu hpe kamsham ai lam sakse madun ra ai. (Yhn 1:29) Karai kaw apnawng nna hkalup hkam la ra ai. (1 Pe 3:21) Yehowa a lam kaga ni chye hkra karum ya nna, Karai Mungdan hpe madi shadaw ra ai.

19. Ya anhte hpa galaw ging ai kun? Hpa majaw kun?

¹⁹ Ya aten gaw, Yehowa hte shi a uhpung hpe kamhpa myit nga hkra galaw ra na aten re. Karai a Mungdan hpe madi shadaw ra na aten mung re. Rai yang, dingdung hkawhkam hte dingda hkawhkam hpe Karai a Mungdan jahten kau ai shaloi anhte hkye la hkrum na re.