1-2. Oshike hatu ka kundafana moshitukulwa eshi?

OTU NA oumbangi muhapu shi dulife nale oo tau ulike kutya otu li komuxundalili womafiku axuuninwa ounyuni ou. Mafiku, Jehova naJesus Kristus otava ka hanauna po omapangelo aeshe oo e li omhinge nOuhamba waYe. Fimbo oshiningwanima osho inashi ningwa, ohamba yokoumbangalanhu nohamba yokoumbuwanhu otadi ka twikila okulwifafana nokuhepeka oshiwana shaKalunga.

² Moshitukulwa eshi, ohatu ka kundafana exunganeko olo li li muDaniel 11:40–12:1. Ohatu ka tala kutya olyelye ohamba yokoumbangalanhu kunena, nokukundafana kutya omolwashike tu na okukala twa ngungumana notu na elineekelo kutya Jehova ote ke tu xupifa kashi na nee mbudi kutya ohatu ka taalela omayeleko a tya ngahelipi.

3-4. Olyelye ohamba yokoumbangalanhu kunena? Shi yelifa.

³ Konima eshi Soviet Union sha teka po mo 1991, oshiwana shaKalunga osho sha li koshi yepangelo lasho osha li shi na “ekwafo linini,” ile tu tye emanguluko lopakafimbo. (Dan. 11:34) Oshidjemo, ovapiya ovo vaJehova ova li va dula okuudifa va manguluka, nomuvalu wovaudifi moilongo oyo ya li koshi yepangelo laSoviet Union owa li wa hapupala neenghono. Mokweendela ko kwefimbo, Russia nosho yo ovayambididi vaye ova li va ninga ohamba yokoumbangalanhu. Ngaashi sha kundafanwa moshitukulwa sha dja ko, epangelo olo tali dana onghandangala li li ohamba yokoumbangalanhu ile ohamba yokoumbuwanhu oli na okuninga oinima itatu: (1) okufininika oshiwana shaKalunga odikilila, (2) okuulika kutya oli tonde Jehova noshiwana shaye (3) eehamba odo otadi kala tadi lwifafana.

 ⁴ Didilika kutya omolwashike hatu dulu okutya Russia novayambididi vaye ovo ohamba yokoumbangalanhu kunena. (1) Okwa ponokela odikilila oshiwana shaKalunga mokushilika oilonga yasho yokuudifa nokuhepeka ovamwatate novamwameme omayovi omafele, ovo ve li moitukulwa oyo i li koshi yepangelo laye. (2) Eenghatu odo otadi ulike kutya ove tonde Jehova noshiwana shaye. (3) Okwa kala nokukendabala okukala e na eenghono e dule ohamba yokoumbuwanhu, Britain naAmerika. Natu ka taleni nghee Russia novayambididi vaye va kala tava dana onghandangala ve li ohamba yokoumbangalanhu.

5. Daniel 11:40-43 okwa popya efimbo lilipi, noshike tashi ka ningwa po pefimbo olo?

⁵ Lesha Daniel 11:40-43. Oshitukulwa shexunganeko olo osha popya kombinga yomafiku axuuninwa. Oshitukulwa osho osha kundafana kombinga yanghee ohamba yokoumbangalanhu nohamba yokoumbuwanhu tadi kondjifafana. Ngaashi sha xunganekwa kuDaniel, momafiku axuuninwa, ohamba yokoumbuwanhu oya kala ‘nokulwa’ nohamba yokoumbangalanhu. — Dan. 11:40.

6. Oumbangi ulipi tau ulike kutya eehamba odo mbali oda kala nokukondjifafana?

⁶ Ohamba yokoumbangalanhu nohamba yokoumbuwanhu oda kala nokulwifafana molwaashi keshe imwe oya hala okukala inaenghono mounyuni i dule ikwao. Pashihopaenenwa, diladila kwaasho sha ningwa po konima yOita Itivali yOunyuni eshi Soviet Union novayambididi vaye va li va kwata ko oshitukulwa sha kula shaEuropa. Ohamba yokoumbuwanhu oya li ye limanga oukuni kumwe noilongo ikwao opo va tote po etangakwaita lopaiwana lopamuhanga olo hali ifanwa NATO. Ohamba yokoumbangalanhu nohamba yokoumbuwanhu oda twikila okulongifa oimaliwa ihapu mokunduluka po oilwifo oyo ya nyika oshiponga nohai longo oushada. Eehamba odo oda kala nokulwifafana mokuyambidida moita ovatondi vamukwao ngaashi muAfrika, Asia nomuLatin America. Omido opo da di ko, Russia novayambididi vaye ova ninga ovanaenghono mounyuni aushe. Ova kala yo tava lwifafana nohamba yokoumbuwanhu okupitila meekombiyuta. Eehamba odo oda kala nokulundilafana kutya ohadi longifa eeprograma deekombiyuta da nyika oshiponga opo di shunife eliko lamukwao pedu nokuteya po epangelo layo. Ngaashi sha xunganekwa kuDaniel, ohamba yokoumbangalanhu otai twikile okuponokela oshiwana shaKalunga. — Dan. 11:41.

7. ‘Oshilongo shiwa sha wapala’ oshike?

⁷ Daniel 11:41 okwa popya kutya ohamba yokoumbangalanhu otai ka ya “moshilongo shiwa sha wapala.” Oshilongo osho oshike? Pefimbo lonale, oshilongo shaIsrael osha li sha talika ko osho ‘sha fimana mokati koilongo aishe.’ (Hes. 20:6) Ashike osho sha li sha ningifa oshilongo osho shi kale sha fimana unene osheshi osha li onhele omo hamu longelwa Jehova. Okudja pOpentekoste yomo 33 O.P., “oshilongo” osho kasha li vali onhele yokondadalunde molwaashi oshiwana shaJehova kunena oshe lihanena keshe pamwe. Ponhele yaasho, ‘oshilongo shiwa sha wapala’ kunena otashi ulike komalipyakidilo oshiwana shaJehova ngaashi okulongela Jehova pokwoongala nosho yo moukalele.

8. Ongahelipi ohamba yokoumbangalanhu ye uya “moshilongo shiwa sha wapala”?

⁸ Momafiku axuuninwa, ohamba yokoumbangalanhu oye uya lwoikando “moshilongo shiwa sha wapala.” Pashihopaenenwa, eshi epangelo laNazi muGermany la li tali dana onghandangala li li ohamba yokoumbangalanhu, unene tuu  pefimbo loita itivali younyuni, ohamba oyo oya li ye uya “moshilongo shiwa sha wapala” eshi ya hepeka nokudipaa oshiwana shaKalunga. Konima yOita Itivali yOunyuni, eshi Soviet Union a li ta dana onghandangala e li ohamba yokoumbangalanhu, ohamba oyo oya li ye uya “moshilongo shiwa sha wapala,” eshi ya dipaa oshiwana shaKalunga noku shi twala moukwatwa.

9. Omido opo da di ko, ongahelipi Russia novayambididi vaye ve uya “moshilongo shiwa sha wapala”?

⁹ Omido opo da di ko, Russia novayambididi vaye ova li ve uya “moshilongo shiwa sha wapala.” Ngahelipi mbela? Mo 2017, Russia okwa li a shilika oilonga yoshiwana shaJehova, nokwa tula ovamwatate novamwameme vamwe modolongo. Okwa shilika yo oishangomwa yetu, mwa kwatelwa Ombiibeli yo-New World Translation. Okwa nyeka ko yo oshitaimbelewa shetu, Omalupale Ouhamba nosho yo Omalupale Oyoongalele omoRussia. Konima yaasho, mo 2018, Olutuwiliki ola li la didilika kutya Russia novayambididi vaye ovo ve li ohamba yokoumbangalanhu. Nonande oshiwana shaJehova oshi hepekwe neenghono, ihashi lwifa epangelo ile shi kendabale oku li kufa ko koshipundi. Ponhele yaasho, ohashi tula moilonga omayele Ombiibeli e na sha nokwiilikanena ‘ovapangeli aveshe,’ unene tuu ngeenge tava ningi omatokolo oo taa dulu okukuma emanguluko letu lokulongela Jehova. — 1 Tim. 2:1, 2.

10. Mbela ohamba yokoumbangalanhu otai ka finda ohamba yokoumbuwanhu? Shi yelifa.

¹⁰ Exunganeko olo li li muDaniel 11:40-45 otali popi unene kombinga yohamba yokoumbangalanhu. Mbela osho osha hala okutya ohamba oyo otai ka finda ohamba yokoumbuwanhu? Ahowe. Ohamba yokoumbuwanhu otai ka kala “nomwenyo” eshi Jehova naJesus tava ka hanauna po omapangelo aeshe opanhu poita yaArmagedon. (Eh. 19:20) Osho otu shi shii ngahelipi? Natu ka taleni kexunganeko olo tali hangwa muDaniel nosho yo mEhololo.

11. Daniel 2:43-45 okwa hala okutya ngahelipi? (Tala efano kombada yoshifo.)

¹¹ Lesha Daniel 2:43-45. Omuprofeti Daniel okwa popya kombinga yomusholondodo womapangelo opanhu oo a kuma oshiwana shaKalunga. Omapangelo oo okwa popiwa e li oitukulwa ya yoolokafana yoshihongwafano shinenenene sha longwa moivela ya yoolokafana. Eemhadi doshihongwafano osho odo da longwa moshivela sha lumbakanifwa nelova otadi faneke epangelo lopanhu laxuuninwa, olo li li Britain naAmerika. Exunganeko olo otali ulike kutya Britain naAmerika oko tava ka hangwa eshi Ouhamba waKalunga tau ka hanauna po omapangelo opanhu.

12. Omutwe omutiheyali woshilyani otau faneke shike, nomolwashike osho shididilikwedi?

¹² Omuyapostoli Johannes okwa popya yo kombinga yomapangelo omanaenghono oo a hepeka oshiwana shaJehova. Mexunganeko laJohannes, omapangelo oo oku lilwe po koshilyani shomitwe heyali. Omutwe omutiheyali woshilyani osho ou lile po Epangelo Enaenghono laBritain naAmerika. Osho oshididilikwedi molwaashi omutwe omutiheyali oo waxuuninwa. Omutwe omutiheyali woshilyani osho otau ka hangwa tau pangele eshi Kristus netangakwaita laye lomeulu tali ke u hanauna po pamwe noshilyani. * — Eh. 13:1, 2; 17:13, 14.

13-14. Olyelye “Gog, medu laMagog,” noshike tashi dulika tashi ke mu handukifa a ponokele oshiwana shaKalunga?

¹³ Exunganeko olo tali hangwa muHesekiel otali tu kwafele tu mone oinima imwe oyo tashi  dulika i ka ningwe momafiku axuuninwa kohamba yokoumbangalanhu nosho yo kohamba yokoumbuwanhu. Osha fa shi li ngaha kutya omaxunganeko oo taa hangwa muHesekiel 38:10-23; Daniel 2:43-45; 11:44–12:1 nosho yo mEhololo 16:13-16, 21, okwa popya oinima ya faafana. Ngeenge osho shi li ngaho, otwa teelela oiningwanima tai landula i ka ningwe.

¹⁴ Ngeenge oudjuu munene owa hovele, ‘eehamba adishe dokombada yedu’ otadi ka tota po ongudu yoiwana. (Eh. 16:13, 14; 19:19) Ongudu oyo oya popiwa mOmishangwa i li “Gog, medu laMagog.” (Hes. 38:2) Ongudu oyo yoiwana otai ka ponokela oshiwana shaKalunga ashishe nokukendabala oku shi hanauna po filufilu. Oshike tashi ke i handukifa opo i ponokele oshiwana shaKalunga? Omuyapostoli Johannes okwa xunganeka shi na sha nefimbo olo kutya keulu otaku ka dja odula yeemhawe dinene odo tadi ka denga ovatondi vaKalunga. Eemhawe odo otadi faneke etumwalaka letokolo olo tali ka udifwa kovapiya vaJehova. Etumwalaka la tya ngaho, olo tali ka handukifa Gog yaMagog noku mu ningifa a ponokele oshiwana shaKalunga nelalakano loku shi hanauna po filufilu. — Eh. 16:21.

15-16. (a) Oiningwanima oyo tai popiwa muDaniel 11:44, 45 otashi dulika tai ulike kushike? (b) Oshike tashi ka ningilwa ohamba yokoumbangalanhu nosho yo Gog yaMagog ashishe?

¹⁵ Etumwalaka la kwata moiti letokolo nosho yo eponokelo laxuuninwa lovatondi vaKalunga otashi dulika la faafana noiningwanima oyo tai hangwa muDaniel 11:44, 45. (Lesha.) Daniel okwa popya mexunganeko olo a ti kutya ‘eenghundana dokoushilo nodokoumbangalanhu’ otadi ka piyaaneka ohamba yokoumbangalanhu notai ka fikama “nehandu linene.” Ohamba yokoumbangalanhu otai ka yelekwa i ‘hanaune po ovanhu vahapu.’ “Ovanhu vahapu” otashi dulika tava ulike kovapiya vaJehova. * Daniel otashi dulika a li ta popi kombinga yeponokelo laxuuninwa loshiwana shaKalunga.

¹⁶ Ngeenge ohamba yokoumbangalanhu nosho yo omapangelo makwao okwa ponokele oshiwana shaKalunga, osho otashi ka handukifa neenghono Kalunga Omunaenghono adishe nota ka eta oita yaArmagedon. (Eh. 16:14, 16) Pefimbo opo, ohamba yokoumbangalanhu nosho yo oiwana oyo i li Gog yaMagog otai ka  hanaunwa po ‘nokape na ou te ke i kwafa.’ — Dan. 11:45.

17. Olyelye Mikael oo a popiwa e li “omweengeli omukulunhu munene” muDaniel 12:1, nota ka ninga shike?

¹⁷ Ovelishe ya shikula ko mehokololo laDaniel oya popya ouyelele muhapu u na sha nanghee ohamba yokoumbangalanhu novayambididi vayo tava ka hanaunwa po, nanghee hatu ka xupifwa. (Lesha Daniel 12:1.) Ovelishe ei oya hala okutya ngahelipi? Mikael edina limwe lOhamba yetu oyo tai pangele, Kristus Jesus. Okwa kala “ha popile” oshiwana shaKalunga okudja mo 1914 eshi Ouhamba wa dikwa po meulu. Ndele ote ke tu ‘popila’ yo natango monakwiiwa i li popepi, ile tu tye ota ka katuka onghatu ididilikwedi eshi ta ka eta oita yaArmagedon. Oita oyo otai ka kala oshiningwanima shaxuuninwa osho sha popiwa muDaniel kutya “efimbo lidjuu” mondjokonona. Exunganeko laJohannes olo li li mEhololo ola popya shi na sha nefimbo olo tali tetekele oita oyo kutya oli li ‘oudjuu munene.’ — Eh. 6:2; 7:14.

18. Omolwashike hatu dulu okutaalela onakwiiwa tu na omukumo?

¹⁸ Ohatu dulu okutaalela onakwiiwa tu na omukumo molwaashi Daniel naJohannes ova popya kutya Jehova naJesus otava ka xupifa ovapiya vavo poudjuu munene. Daniel okwa popya kutya ovanhu ovo tava ka xupifwa omadina avo okwa ‘shangwa membo.’ (Dan. 12:1) Ongahelipi hatu dulu okushangifa omadina etu membo olo? Otu na okuulika filufilu kutya otu na eitavelo muJesus, oo e li Odjona yaKalunga. (Joh. 1:29) Otwa pumbwa okuliyapulila Kalunga nokuninginifwa. (1 Pet. 3:21) Otwa pumbwa okuyambidida Ouhamba waKalunga mokuninga ngaashi hatu dulu tu kwafele ovanhu ve lihonge kombinga yaye.

19. Oshike tu na okuninga paife, nomolwashike?

¹⁹ Tu li ovapiya vaJehova ovadiinini, paife olo efimbo loku mu lineekela nosho yo ehangano laye. Paife olo efimbo lokuyambidida Ouhamba waye. Ngeenge otwa ningi ngaho, ohatu ka xupa eshi Ouhamba waKalunga tau ka hanauna po ohamba yokoumbangalanhu nosho yo ohamba yokoumbuwanhu.