1-2. Yisinke natu ka zogera mosirongwa esi?

NAINA ose twa kara nomaumbangi gomanzi aga gana kulikida asi ose kuna kuparuka kehagero lyomazuva gopouhura. Ntantani Jehova naJesus Kristusa ngava ya zonagure po mapangero nagenye aga aga rwanesa Uhompa waKarunga. Nye komeho ngayi horoke oyo, hompa gokoMuzogo nahompa gokoMbindakano ngava twikira kulirwanesa vene ntani ngava rwanesa vantu vaKarunga.

² Mosirongwa esi tatu ka zogera uporofete ou wa kara mwaNdaniyera 11:40–12:1. Tatu ka lironga asi yilye hompa gokoMuzogo gwanaina ntani neyi natu karera nehuguvaro asi Jehova nga tu parura.

3-4. Yilye hompa gokoMuzogo gomupe? Faturura

³ Konyima zapa epangero lyaSoviet Union lya hege mo-1991, vantu vaKarunga kwa gwene “nakauke ekwafo.” (Ndan. 11:34) Eyi kwa ninkisire vantu vaKarunga va zuvhise nemanguruko. Ntani sivaro sovazuvhisi kwa ligwedererere moyirongo eyi ngali pangere epangero lyaSoviet Union. Konyima zonomvhura dongandi, Rusia noyirongo eyi ayi mu kwatesa ko, kwa ya kere hompa gokoMuzogo gomupe. Ngomu ka tu yi zogerere mosirongwa sa ka pita, mokuninka asi epangero va li tumbure asi hompa gokoMuzogo ndi gokoMbindakano, lya hepa kurugana yininke yitatu: (1) lya hepa kuhomokera vantu vaKarunga, (2) lya hepa kulikida asi kapi va hara Karunga monkedi omu ava tekura vakareli vaKarunga, (3) lya hepa kulirwanesa nepangero limwe.

 ⁴ Koneka nokonda deyi tuna kuuyungira asi Rusia noyirongo eyi ayi mu kwatesa ko kuna kara hompa gokoMuzogo gwanaina. (1) Awo kwa homokera vantu vaKarunga pokuhagekesa po sirugana sawo sokuzuvhisa ntani nokuhepeka vanavazinyetu wovanzi ava va tunga moyirongo oyo. (2) Eyi va rugana kulikida asi awo va nyenga Jehova novantu vendi. (3) Awo kwa lirwanesa nahompa gokoMuzogo ndi epangero lyaBritaniya naAmerika. Tu zeni tu ka zogere eyi ga rugana Rusia noyirongo eyi ayi mu kwatesa ko, eyi ayi likida asi age hompa gokoMuzogo.

5. Yisinke va zogera mwaNdaniyera 11:40-43?

⁵ Resa Ndaniyera 11:40-43. Uporofete ou kwa zogera kuhamena eyi ngayi horoka pomazuva gopouhura. Novelise odo kwa zogera omu hompa gokoMuzogo nahompa gokoMbindakano ava lirwanesa. Ndaniyera kwa pumbire asi pomazuva gopouhura, hompa gokoMuzogo nga “rwisa” hompa gokoMbindakano.—Ndan. 11:40.  

6. Umbangi musinke una kulikida asi hompa gokoMuzogo nahompa gokoMbindakano kuna kutwikira kulirwanesa?

⁶ Hompa gokoMuzogo nahompa gokoMbindakano kulirwanesa, morwa nkenye ogu kuna hara a kare mupangeli gononkondo po mouzuni mudima. Pasihonena, koneka eyi ya horokere konyima zoyita yauvali youzuni mudima apa epangero lyaSoviet Union nava ngava li kwatesa ko va tamekere kupangera sinzi soyirongo yomoEuropa. Ayo kwa ninkisire hompa gokoMbindakano a tulisire po mbunga ezi ava tumbura asi NATO, yipo va ruganene kumwe noyirongo yapeke va rwise hompa gokoMuzogo. Hompa gokoMuzogo nahompa gokoMbindakano kwa ruganesere yimaliva yoyinzi mokulipongaikira vakwayita wovanzi wononkondo. Vahompa owo kwa lirwanesere hena pokukwatesa ko nonkore damukwawo moyita, edi da kara moAfrika, Asia, ntani moLatin Amerika. Naina, sirongo saRusia nava ava si kwatesa ko kuna kara nononkondo mouzuni mudima. Awo kwa lirwanesa hena nahompa gokoMbindakano kupitira moyikwakonentu. Hompa gokoMuzogo nahompa gokoMbindakano navenye kutanta asi nonkore dawo kuruganesa hena yikwakonentu yipo va zonagure epangero lyawo. Ntani ngomu ga yi pumbire Ndaniyera, hompa gokoMuzogo kuna kutwikira kuhomokera vantu vaKarunga.—Ndan. 11:41.

7. Yisinke “sirongo sosiwa”?

⁷ Ndaniyera 11:41, NW kwa tanta asi hompa gokoMuzogo nga homokera “sirongo sosiwa.” Sirongo musinke oso? Pwanare, sirongo saIsraeli kwa kere “sirongo sosiwa po unene kwanayinye.” (Hes. 20:6) Sirongo oso unene po kwa kere sosiwa, morwa yimo va tungire vantu ava ngava karere Jehova. Nye kutundilira poPentekoste momvhura 33 , “sirongo” oso kapi sa tamba hena kosirongo saIsraeli morwa vantu vaKarunga neina kuna kara mouzuni mudima. Mokulisiga, neina “sirongo sosiwa” kwa tamba monkedi omu ava paruka vantu vaKarunga. Eyi kwa kwatera mo omu ava karere Jehova komapongo nomoyirugana yokuzuvhisa.

8. Ngapi omu hompa gokoMuzogo ga homokera “sirongo sosiwa”?

⁸ Pomazuva gopouhura, hompa gokoMuzogo kwa homokera “sirongo sosiwa” yikando yoyinzi. Pasihonena, apa epangero  lyaGermany lya kere hompa gokoMuzogo posiruwo soyita yauvali youzuni mudima, awo kwa homokerere “sirongo sosiwa” pokuhepeka nokudipaga vantu vaKarunga. Apa epangero lyaSoviet Union lya ya kere hompa gomupe gokoMuzogo konyima zoyita yauvali youzuni mudima, alyo kwa homokerere “sirongo sosiwa” pokuhepeka vantu vaKarunga nokuvatjida mo mosirongo.  

9. Ngapi omu sirongo saRusia nava ava si kwatesa ko va homokera “sirongo sosiwa” monomvhura dantani?

⁹ Monomvhura dantani, sirongo saRusia ntani nava ava si kwatesa ko nawo kwa homokera “sirongo sosiwa.” Monkedi musinke? Momvhura 2017, sirongo saRusia kwa silikire yirugana yovakareli vaJehova ntani nokutura vanavazinyetu vamwe modorongo. Awo hena kwa silika yimbapiratjangwa yetu mosirongo sawo, kukwatera mo Bibeli zoNew World Translation. Age hena kwa tu hakana mberewa zetu zomutayi zomoRusia, noYinyanga yoUhompa ntani Yinyanga yoyigongi. Konyima zeyi, momvhura 2018, Mbungagendesi kwa divisire asi sirongo saRusia nava ava si kwatesa ko kuna kara hompa gokoMuzogo gomupe. Nye nampili ngomu mapangero aga hepeke vakareli vaJehova, awo kapi ava hetekere ko asi nawo va rwanese mapangero ogo. Nye awo kukwama epukururo eli lya kara moBibeli pokukanderera po ava “va kara momapangero navenye,” unene po apa ava tulisa po noveta edi adi kundama umanguruki wetu wokukarera Jehova.—1 Tim. 2:1, 2.

10. Hompa gokoMuzogo nga funda hompa gokoMbindakano ndi? Faturura.

¹⁰ Uporofete ou wa kara mwaNdaniyera 11:40-45, kwa demenena kweyi nga rugana hompa gokoMuzogo. Eyi kutanta nye asi age nga funda hompa gokoMbindakano ndi? Hawe. Hompa gokoMbindakano yipo nga kara apa Jehova naJesus ngava ya zonagura po mapangero govantu poyita yaHarumagedoni. (Ehor. 19:20) Ngapi omu twa yi diva? Koneka mauzera aga ga kara mouporofete waNdaniyera ntani nemEhororo.

11. Yisinke au likida uporofete ou wa kara mwaNdaniyera 2:43-45? (Tara efano lyopontunda.)

¹¹ Resa Ndaniyera 2:43-45. Muporofete Ndaniyera kwa fatwilire mapangero govantu aga ngaga kundama vantu vaKarunga. Mapangero ogo kwa ga fanekesa komaruha gosihwi sefano lyosivera. Epangero lyokuhulilira kwa li fanekesa konompadi dosihwi oso sefano. Nompadi odo kwa di ruganesa kosivera nekerova. Ntani ado kwa fanekesa epangero lyaBritaniya naAmerika. Uporofete owo kulikida asi epangero lyaBritaniya naAmerika yipo nga li kara apa Uhompa waKarunga ngau ya zonagura po mapangero govantu.

12. Yilye gwa fanekesa mutwe gwauntambali gosikasama ntani morwasinke ya karera nomulyo tu yi dive?  

¹² Mupositoli Johanesa nage kwa fatwilire mapangero aga ga kundama vantu vaJehova. Johanesa kwa fanekesere mapangero ogo kosikasama sonomutwe ntambali. Mutwe gwauntambali gosikasama oso, kwa fanekesa epangero lyaBritaniya naAmerika. Ayo kuna kara nomulyo tu yi dive, morwa mutwe gwauntambali yigo gokuhulilira. Mutwe gwauntambali gosikasama oso, ngagu pangera dogoro posiruwo apa Jesus novakwayita vendi vemeguru ngava ya zonagura po sikasama nasinye. *—Ehor. 13:1, 2; 17:13, 14.

13-14. Yilye ‘Gogo gomosirongo saMagogo’ ntani yisinke ngayi mu ninkisa a homokere vantu vaKarunga?

¹³ Uporofete ou wa kara mwaHesekiyeli kututantera eyi ngayi horoka komeho ngava zonagure po hompa gokoMuzogo nahompa gokoMbindakano. Ayo kumoneka asi uporofete ou wa kara mwaHesekiyeli 38:10-23; ntani mwaNdaniyera 2:43-45; 11:44–12:1; nEhororo 16:13-16, 21, kwa zogera yininke yokulifana. Nsene asi mauporofete ogo kwa pumba yininke yokulifana, eyi yiyo tuna kundindira ngayi horoka.

¹⁴ Konyima zapa ngau tameka udigu wounene, vahompa “womouzuni naunye” ngava lipakerera kumwe. (Ehor. 16:13, 14; 19:19) Elipakerero olyo yilyo azi tumbura Bibeli asi: ‘Gogo gomosirongo saMagogo.’ (Hes. 38:2) Vahompa owo, ngava homokera vantu vaKarunga nokuhetekera ko kuvazonagura po navenye. Yisinke ngayi ninkisa vahompa owo va homokere vantu vaKarunga? Mupositoli Johanesa kwa mwene mvhura zakamanya ezi zina kurokera nonkore daKarunga. Mvhura ozo kwa fanekesa kombudi zompanguro ezi ngava divisa vantu vaKarunga. Nampo mbudi ozo yizo ngazi ninkisa Gogo zaMagogo a homokere vantu vaKarunga nositambo sokuvazonagura po.—Ehor. 16:21.

15-16. (a) Yisinke nampo va pumbire mwaNdaniyera 11:44, 45 ? (b) Yisinke ngayi horokera hompa gokoMuzogo ntani novahompa vamwe?

¹⁵ Mbudi ezi zompanguro ntani nehomokero lyovantu vaKarunga, nampo yiyo ga pumbire Ndaniyera mwaNdaniyera 11:44, 45. (Resa.) Ndaniyera kwa tente asi: “Mbudi ezi ngazi tunda koUpumezuva nokoMuzogo” ngazi tjilisa hompa gokoMuzogo ntani ngazi mu ninkisa a ‘rwe unene’ nositambo ‘sokudipaga vantu wovanzi.’ Vantu “wovanzi” owo, kumoneka asi kwa tamba kovakareli vaJehova. * Ndaniyera nampo kwa faturura siruwo apa vahompa ngava homokera vantu vaKarunga.

¹⁶ Apa hompa gokoMuzogo novahompa vamwe ngava homokera vantu vaKarunga, eyi ngayi handukisa Karunga nokumuninkisa a rete yita yaHarumagedoni. (Ehor.  16:14, 16) Posiruwo oso, hompa gokoMuzogo ntani novahompa vamwe, ngava va zonagura po ‘pwa hana gokuvakwafa.’—Ndan.11:45.

17. Yilye Mikayera “muengeli gomunene” ogu va tumbura mwaNdaniyera 12:1 ntani yisinke a rugana?

¹⁷ Velise zokukwama ko mobuke zaNdaniyera kututantera omu hompa gokoMuzogo novahompa vakwawo ngava va zonagura po ntani nomu Jehova nga tu parura. (Resa Ndaniyera 12:1.) Yisinke azi tanta velise ozo? Mikayera kuna kara edina limwe lyahompa gwetu Jesus Kristusa. Age kwa tameka ‘kugamena’ vantu vaKarunga kutunda apa va mu tulire a kare hompa goUhompa waKarunga momvhura 1914. Komeho, age nga ka zonagura po nonkore dendi poyita yaHarumagedoni. Yita oyo yiyo ngayi ka kara yokuhulilira posiruwo esi ga fatwilire Ndaniyera asi “siruwo somaudigu sosidona unene.” Siruwo esi yiso ga tumbwire Johanesa mEhororo asi ‘somahepeko gomanene.’—Ehor. 6:2; 7:14.

18. Morwasinke natu dilira kukara nosinka kuhamena eyi ngayi horoka komeho?

¹⁸ Ndaniyera naJohanesa navenye kwa tente asi Jehova naJesus ngava ka parura vakareli vawo posiruwo soudigu wounene. Yi kare asi yisinke ngayi horoka, kapisi hepero tu kare nosinka. Ndaniyera kwa tente asi ava ngava ka paruka kuna kara vava va tjanga ‘madina gawo mobuke zaKarunga.’ (Ndan. 12:1) Yisinke natu rugana yipo va tu tjange mobuke ozo? Twa hepa kuyilikida asi twa kara nepuro mwaJesus, Nzwigona zaKarunga. (Joh 1:29) Twa hepa kuligava kwaKarunga nokugwana ekuho. (1 Pet. 3:21) Ntani twa hepa ku kwatesa ko Uhompa waKarunga pokuvatera wopeke va lironge kuhamena Jehova.

19. Yisinke twa hepa kurugana ngesi ntani morwasinke natu yi ruganena?

¹⁹ Ngesi kuna kara siruwo sokuhuguvara Jehova nombunga zovakareli vendi wovalimburukwi. Esi kuna kara siruwo sokukwatesa ko Uhompa waKarunga. Nsena tu yi rugana, ose ngatu ka paruka apa Uhompa waKarunga ngau ka zonagura po hompa gokoMuzogo nahompa gokoMbindakano.