1, 2. ¿Tlen timomachtiskej?

NOCHI tlen panotok kiteititia yitlamis tlen amo kuali. Jehová uan Jesús yikinmixpoloskej nochtin tekiuajkej tlen kixnamikij iTekiuajkayo. Pero achto, tekiua tlen kajki norte moteuis iuan tekiua tlen kajki sur uan kitlajyouiltiskej ialtepe toTajtsin Dios.

² Axkan timomachtiskej profecía tlen ijkuilitok itech Daniel 11:40-12:1. Noijki tikitaskej akin tekiua tlen kajki norte uan tleka amo ma techmomojti tlen tikixnamikiskej.

3, 4. ¿Akin kineskayotia tekiua tlen kajki norte uan ken tikmatij?

³ Itech 1991 opojpoliuik Unión Soviética, ik non, itech nonmej altepemej ayakmo okintlajyouiltijkej itekipanojkauan toTajtsin Dios (Dan. 11:34). Ijkon yejuan opejki monechikouaj uan tetlapouiaj. Noijki omomiaktilijkej tokniuan itech nonmej altepemej. Pero satepan Rusia uan akinmej kipaleuiaj omochijkej tekiua tlen kajki norte. Itech okse tlamachtil otikitakej se tekiuajkayotl mochiua tekiua tlen kajki norte noso tekiua tlen kajki sur ijkuak kichiua ninmej eyi tlamantli. Achto, kixnamiki ialtepe Jehová. Ome, kiteititia kikokolia toTajtsin  Dios ijkuak kitlajyouiltia ialtepe. Eyi, ninmej tekiuajkej moteuiaj.

⁴ Ma tikitakan tleka tikijtouaj Rusia uan akinmej kipaleuiaj kineskayotiaj tekiua tlen kajki norte. Achto, kintlajyouiltiaj miakej itekipanojkauan toTajtsin Dios uan amo kinkauiliaj ma tetlapouikan. Ome, kiteititiaj kikokoliaj Jehová uan ialtepe. Eyi, moteuia iuan tekiua tlen kajki sur tlen kineskayotia Gran Bretaña uan Estados Unidos. Ma tikitakan ken Rusia uan akinmej kipaleuiaj kiteititiaj kineskayotiaj tekiua tlen kajki norte.

5. ¿Keman mochiua tlen kijtoua Daniel 11:40-43 uan tlen panos?

⁵ (Xiktlajtolti Daniel 11:40-43). Nin profecía techpaleuia ma tikmatikan tlen panos itlamian tonalmej. Ninmej versículos kiteititiaj tekiua tlen kajki norte moteuia iuan tekiua tlen kajki sur. Daniel okijto: “Itlamian tonalmej, tekiua tlen kajki sur iuan mokualanis [...] tekiua tlen kajki norte” (Dan. 11:40).

6. ¿Ken tikmatij ninmej ome tekiuajkej ok moteuiaj?

⁶ Tekiua tlen kajki norte ok moteuia iuan tekiua tlen kajki sur porque kinekij kinauatiskej tlaltikpak. Itech Segunda Guerra Mundial, Unión Soviética uan akinmej okipaleuiayaj opejki kinnauatiaj miakej altepemej ompa Europa. Ik non, tekiua tlen kajki sur okinsetili isoldados iuan okseki altepemej uan nin moixmati ken Organización del Tratado del Atlántico Norte (OTAN). Ninmej ome tekiuajkej motlatlanij kinpiaskej miakej soldados uan teposmej tlen ika temiktiaj. Noijki mokajkalakiaj itech guerras ompa África, Asia uan América Latina. Ayamo kipia miak xiuitl, Rusia uan akinmej kipaleuiaj okachi ueyititokej. Noijki kitekitiltiaj Internet para kitlajyouiltiskej tekiua tlen kajki sur. Ninmej ome tekiuajkej mokualaniaj porque kitekitiltiaj Internet para motlachtekiskej uan ayakmo kuali ma tlanauatikan. Noijki tekiua tlen kajki norte kitlajyouiltijtok ialtepe toTajtsin Dios ijkon ken okijto Daniel (Dan. 11:41).

7. ¿Tlen kijtosneki “kanin tlakualtsin”?

⁷ Daniel 11:41 kijtoua tekiua tlen kajki norte kalaki “kanin tlakualtsin”. ¿Tlen kijtosneki “kanin tlakualtsin”? Yiuejkika omoijtouaya Israel “okatka okachi kualtsin” (Ezeq. 20:6). Ijkon okixmatiayaj porque ompa okiueyichiuayaj Jehová. Pero itech Pentecostés xiuitl 33 “kanin tlakualtsin” ayakmo kijtosneki se altepetl. ¿Tleka? Porque itekipanojkauan toTajtsin Dios katej ipan nochi tlaltikpak. Ik non, “kanin tlakualtsin” kijtosneki ialtepe toTajtsin Dios porque kiueyichiuaj ijkuak monechikouaj uan tetlapouiaj.

8. ¿Keman okalak tekiua tlen kajki norte “kanin tlakualtsin”?

⁸ Itlamian tonalmej, tekiua tlen kajki norte miak uelta yokalak “kanin tlakualtsin”. Ijkuak Alemania okatka tekiua tlen kajki norte okalak “kanin tlakualtsin” ijkuak okintlajyouilti uan okinmikti itekipanojkauan toTajtsin Dios. Okachi ijkon  okichi itech Segunda Guerra Mundial. Ijkuak otlanki Segunda Guerra Mundial, Unión Soviética omochi tekiua tlen kajki norte. Okalak “kanin tlakualtsin” ijkuak okintlajyouilti tokniuan uan uejka okintitlanki.

9. ¿Ken yokalakej Rusia uan akinmej kipaleuiaj “kanin tlakualtsin”?

⁹ Axkan Rusia uan akinmej kipaleuiaj noijki yokalakej “kanin tlakualtsin”. ¿Ken kichiuaj? Itech 2017 nin tekiua tlen kajki norte ayakmo kinkauilia tokniuan ma tetlapouikan nion ma monechikokan uan sekimej yokintsakej. Noijki ayakmo kinkauilia ma kintekitiltikan toamatlajkuiloluan nion Traducción del Nuevo Mundo. Okinmoaxkatijkej kalmej kanin omonechikouayaj tokniuan, kanin okinchiuayaj uejueyij nechikolmej uan kali Betel. Ik non, itech 2018 akinmej pouij itech Cuerpo Gobernante okitakej Rusia uan akinmej kipaleuiaj kineskayotiaj tekiua tlen kajki norte. Tiitlaixpantijkauan Jehová amo tikinmixnamikij tekiuajkej nion tiknekij tikinpatlaskej maski techtlajyouiltiaj. Tejuan timotlatlaujtiaj “por nochteh n tekiwajkeh” ijkon ken kijtoua Biblia. Okachi ijkuak kipejpenaskej kox techkauiliskej ma titetlapouikan uan ma timonechikokan (1 Tim. 2:1, 2).

10. ¿Ken tikmatij tekiua tlen kajki norte amo kitlanilis tekiua tlen kajki sur?

¹⁰ Daniel 11:40-45 okachi tlajtoua itech tekiua tlen kajki norte. ¿Nin kijtosneki kitlanilis tekiua tlen kajki sur? Amo. Ijkuak Jehová uan Jesús kinpojpoloskej tekiuajkej itech Armagedón, ok yetos tekiua tlen kajki sur (Apoc. 19:20). ¿Ken tikmatij? Ma tikitakan profecías tlen ijkuilitokej itech amochtli Daniel uan Apocalipsis.

11. ¿Tlen kiteititia profecía tlen ijkuilitok itech Daniel 2:43-45? (Xikita ixko revista).

¹¹ (Xiktlajtolti Daniel 2:43-45). Daniel okitak se ueyi estatua tlen chijchitok ika tlatlamantli tepostli. Sejse tepostli kineskayotia se tekiuajkayotl tlen itlaj okichiuili ialtepe toTajtsin Dios. Ikxiuan estatua tlen ochijchitokaj ika tepostli uan sokitl kineskayotiaj Gran Bretaña uan Estados Unidos uan nin saiktlami tekiuajkayotl. Profecía kiteititia nin tekiuajkayotl ok yetos ijkuak iTekiuajkayo toTajtsin Dios kinmixpolos nochtin tekiuajkej.

12. ¿Akin kineskayotia chikome itsonteko “yolkatl temojti” uan tleka miak ipati ma tikmatikan?

¹² Tlatitlanil Juan noijki okijto seki tekiuajkayomej itlaj kichiuiliskiaj ialtepe Jehová. Ye okinneskayoti ninmej tekiuajkayomej ika se “yolkatl temojti non okimpiaya chikome itsontekonwah”. Chikome itsonteko nin yolkatl kineskayotia Gran Bretaña uan Estados Unidos. Nin miak ipati ma tikmatikan porque ayakmo kipia okse itsonteko. Chikome itsonteko nin yolkatl ok tlanauatijtos ijkuak Cristo uan akinmej kipaleuiskej kipojpoloskej “yolkatl temojti” (Apoc. 13:1, 2; 17:13, 14). *

13, 14. ¿Akin Gog de Magog uan tleka kinekis kipojpolos ialtepe toTajtsin Dios?

¹³ Se profecía tlen ijkuilitok itech amochtli Ezequiel kijtoua tlen uelis panos ijkuak yikixpoloskej tekiua tlen kajki norte uan tekiua tlen kajki sur. Nesi profecías tlen ijkuilitokej itech Ezequiel 38:10-23; Daniel 2:43-45; 11:44-12:1 uan Apocalipsis 16:13-16, 21 san se tlamantli kijtosneki uan san sekan mochiuaskej. Tla nin melauak, panos nin tlamantli.

¹⁴ Satepan ijkuak peuas ueyi tlajyouilistli, nochtin tekiuajkej mosetiliskej (Apoc. 16:13, 14; 19:19). Biblia kitokayotia “Gog tlen kajki itech tlali Magog” (Ezeq. 38:2). Nochtin ninmej tekiuajkej kitlajyouiltiskej ialtepe toTajtsin Dios uan kinekiskej kipojpoloskej. ¿Tleka kinekiskej kipojpoloskej? Juan okitak ouetsiaya tesiuitl ken uejueyij temej inpan akinmej okikokoliayaj toTajtsin Dios. Xamo tesiuitl kijtosneki tiktematiltiskej tlen Jehová kichiuas. Nin amo kipaktis Gog de Magog uan kinekis kipojpolos ialtepe toTajtsin Dios (Apoc. 16:21).

15, 16. (1) ¿Tlen xamo kijtosneki Daniel 11:44, 45? (2) ¿Tlen kipanos tekiua tlen kajki norte uan Gog de Magog?

¹⁵ Xamo tlen kijtoua Daniel 11:44, 45 (xiktlajtolti) noijki kijtosneki tiktematiltiskej tlen Jehová kichiuas uan tekiuajkej techtlajyouiltiskej. Ompa Daniel okijto tekiua tlen kajki norte motekipachos porque kikakis tlen “tlamochiua ik kanin kisa tonaltsin uan ik norte”, ye kualankamikis uan “miakej kinmixpolos”. Nesi ijkuak kijtoua “miakej” kijtosneki itekipanojkauan Jehová. * Xamo Daniel okijtojtoka ken saiktlami kitlajyouiltiskej ialtepe toTajtsin Dios.

 ¹⁶ Ijkuak tekiuajkej kinekiskej techtlajyouiltiskej, kikualaniskej toTajtsin Dios uan peuas Armagedón (Apoc. 16:14, 16). Ijkuakon tekiua tlen kajki norte “ompa tlamis uan amikaj kipaleuis” (Dan. 11:45). Noijki ijkon kipanos Gog de Magog.

17. ¿Akin Miguel “ueyi príncipe” tlen moijtoua itech Daniel 12:1 uan tlen kichiua?

¹⁷ Daniel 12:1 (xiktlajtolti) kijtoua ken kipojpoloskej tekiua tlen kajki norte uan akinmej kipaleuiaj uan ken techmakixtiskej. ¿Tlen kijtosneki nin versículo? Totekiua Cristo Jesús noijki kitokayotiaj Miguel. Itech 1914 opejki tlanauatia iTekiuajkayo toTajtsin Dios uan Jesús kipaleuijtok ialtepe Jehová. Ayakmo miak poliui uan Jesús kinmixpolos itech Armagedón nochtin akinmej kikokoliaj. Ijkuakon tlamis tlajyouilistli ijkon ken okijto Daniel. Itech Apocalipsis, Juan okijto “weyi tlaijyowílistli” tlamis ijkuak panos Armagedón (Apoc. 6:2; 7:14).

18. ¿Tleka amo techmomojtia tlen panos satepan?

¹⁸ Daniel uan Juan okijtojkej akinmej kitekichiuiliaj Jehová uan Jesús kinmakixtiskej ijkuak panos ueyi tlajyouilistli. Ik non, tejuan amo timomojtiaj. Daniel okijto intoka akinmej momakixtiskej ijkuilitos “itech amochtli” (Dan. 12:1). ¿Tlen moneki tikchiuaskej tla tiknekij totoka ompa ma ijkuilito? Moneki tikneltokaskej Jesús “ichkatsi Dios” (Juan 1:29). Moneki timotemakaskej ixpan toTajtsin Dios uan timoapolaktiskej (1 Ped. 3:21). Noijki ma tikinpaleuikan oksekimej ma kixmatikan Jehová uan ijkon tikteititiaj tikpaleuiaj iTekiuajkayo.

19. ¿Tlen moneki tikchiuaskej uan tleka?

¹⁹ Axkan moneki okachi ma tikneltokakan Jehová uan ialtepe. Ma tikpaleuikan iTekiuajkayo. Tla ijkon tikchiuaskej, timomakixtiskej ijkuak iTekiuajkayo toTajtsin Dios kixpolos tekiua tlen kajki norte uan tekiua tlen kajki sur.