1-2. Ko e heigoa ha tautolu ka fakatutala he vala tala nei?

KUA loga atu e tau fakamooliaga ne kitia mogonei kua nonofo a tautolu he tau aho fakahiku he fakatokaaga nei. Nakai leva, ko Iehova mo Iesu Keriso ka moumou e tau fakatufono oti ne totoko ke he Kautu. Ato hoko e magaaho ia, ko e patuiki he faahi tokelau mo e patuiki he faahi toga to latau ni a laua mo e latau foki ke he tau tagata he Atua.

² He vala tala nei, to fakatutala a tautolu ke he perofetaaga ne tohi ia Tanielu 11:40–12:1. To iloa e tautolu ko hai e patuiki he faahi tokelau mogonei mo e fakatutala ke he kakano kua maeke a tautolu ke fehagai mo e mauokafua ke he tau paleko ka hohoko.

3-4. Ko hai e patuiki he faahi tokelau mogonei? Fakamaama.

³ He kaumahala e Soviet Union he 1991, ko e tau tagata he Atua he matakavi ia ne moua e “lagomatai tote”​—ko e atāina he magaaho kū. (Tani. 11:34) Ko e fua, ne atāina a lautolu ke fakamatala ti nakai leva ne tupu lahi e numera he tau tagata fakailoa ke totou teau afe he tau motu Kominisi fakamua ia. Ka e fai tau he mole, ko Rusia mo e tau kau ne lafi ki ai ne eke mo patuiki he faahi tokelau. Tuga ne talahau he vala tala fakamua, lata e fakatufono ke taute tolu e mena to eke mo patuiki he faahi tokelau po ke patuiki he faahi toga: (1) fehagai mo e tau tagata he Atua, (2) fakakite ke he tau gahua ha lautolu ko e tau fī ha Iehova mo e tau tagata haana, mo e (3) fetoko e tau patuiki.

 ⁴ Ko e tau kakano anei ati talahau e tautolu ko Rusia mo e tau kau ne lafi ki ai ko e patuiki he faahi tokelau mogonei. (1) Totoko e lautolu e tau tagata he Atua he pā malu e gahua fakamatala mo e fakamatematekelea e tau matakainaga ne totou teau afe kua nonofo i lalo he pule ha lautolu. (2) Fakakite he tau gahua ia kua vihiatia e lautolu a Iehova mo e tau tagata haana. (3) Kua fetoko a lautolu mo e patuiki he faahi toga, ko e Pule Malolō he Lalolagi ko Igilani-Amerika. To kitekite a tautolu ke he puhala kua eke a Rusia mo e tau kau ne lafi ki ai mo patuiki he faahi tokelau.

5. Ko e magaaho fe ne fakamaama he Tanielu 11:40-43, ti ko e heigoa e mena ka tupu he magaaho ia?

⁵ Totou Tanielu 11:40-43. Ko e vala nei he perofetaaga ne fakamaama e magaaho he fakahikuaga. Fakamaama ai e puhala ne fetokoaki e patuiki he faahi tokelau mo e patuiki he faahi toga. Tuga ne talahau tuai e Tanielu, he magaaho he fakahikuaga ko e patuiki he faahi toga to totoko atu ke he patuiki he faahi tokelau “ti tau ai.”​—Tani. 11:40.

6. Ko e heigoa e fakamooliaga hane felatauaki e tau patuiki ne ua?

⁶ Ko e patuiki he faahi tokelau mo e patuiki he faahi toga ne felatauaki he manako ke moua e pule malolō he lalolagi. Ma e fakatai, manamanatu ke he mena ne tupu he mole e Felakutaki II he Lalolagi he mogo ne pule ai e Soviet Union mo e tau kau ne lafi ki ai ke he laulahi ha Europa. Ko e patuiki he faahi toga ne kau mo e falu motu ke lafi auloa e tau kautau ke totoko ke he patuiki he faahi tokelau, ti fakahigoa ai ko e NATO. Ko e patuiki he faahi tokelau ne matutaki ke totoko ke he patuiki he faahi toga ke fakatū e kautau malolō lahi. Felatauaki a laua he lalago e tau kau ha laua ne latau i Aferika, Asia, mo Latini Amerika. He tau tau kua mole, ko Rusia mo e tau kau ne lafi ki ai ne pule malolō he lalolagi katoa. Tau foki a lautolu ke he patuiki he faahi toga he fakaaogaaga he tau komopiuta. Ne tukupau he taha patuiki e taha patuiki he fakaaoga e tau polokalama komopiuta ke moumou e tau fakaholoaga tupe mo e fakatufono. Ti tuga ne talahau tuai e Tanielu, matutaki e totokoaga he patuiki he faahi tokelau ke he tau tagata he Atua.​—Tani. 11:41.

7. Ko e heigoa e “motu fulufuluola”?

⁷ Pehē e Tanielu 11:41 ko e patuiki he faahi tokelau to hoko atu “ke he motu fulufuluola.” Ko e heigoa e motu ia? He vahā i tuai, ko Isaraela ne “mua e fulufuluola he motu ia he tau motu oti.” (Eseki. 20:6) Ka kua uho lahi e motu ia ha ko e matakavi ne taute e tapuakiaga mooli. Tali mai he Penetekoso 33 V.N., ko e “motu” ia ne nakai ko e taha matakavi pauaki; ha ko e tau tagata ha Iehova kua ha ha he lalolagi katoa. Ka ko e “motu fulufuluola” mogonei ko e tau gahua he tau tagata ha Iehova tuga e tapuakiaga ha lautolu ki a Iehova he tau feleveiaaga mo e gahua fakamatala.

8. Hoko atu fēfē e patuiki he faahi tokelau “ke he motu fulufuluola”?

⁸ He tau aho fakahiku, ko e patuiki he faahi tokelau ne lagaloga e hoko atu “ke he motu fulufuluola.” Ma e fakatai, magaaho ne eke e Nasi i Sihamani mo patuiki he faahi tokelau, mua atu he tauaga ke uaaki he lalolagi, ne hoko atu e patuiki ia “ke he motu fulufuluola” he fakamatematekelea mo e tamate e tau tagata he Atua. He mole e Felakutaki II he Lalolagi he mogo ne eke e Soviet Union mo patuiki he faahi tokelau, ne hoko atu e patuiki ia  “ke he motu fulufuluola” he fakamatematekelea e tau tagata he Atua mo e uta fakapaea a lautolu.

9. Nakaila leva ia, hoko atu fēfē a Rusia mo e tau kau ne lafi ki ai “ke he motu fulufuluola”?

⁹ Nakaila leva ia, ne hoko atu foki a Rusia mo e tau kau ne lafi ki ai “ke he motu fulufuluola.” Puhala fe? He 2017, ko e patuiki he faahi tokelau mogonei ne pā malu e gahua he tau tagata ha Iehova mo e tuku e falu matakainaga ha tautolu ke he fale puipui. Pā foki e ia e tau tohi ha tautolu, putoia e New World Translation. Uta foki e la ofisa ha tautolu i Rusia ti pihia mo e tau Fale he Kautu mo e tau Fale he Toloaga. Mole e tau mena nei, he 2018 ne talahau he Kau Fakatufono ko Rusia mo e tau kau ne lafi ki ai ko e patuiki he faahi tokelau. Pete kua fakamatematekelea lahi e tau tagata ha Iehova, nakai tau atu po ke lali a lautolu ke totoko ke he ha fakatufono. Ka e muitua a lautolu ke he fakatonuaga he Tohi Tapu ke liogi ma “lautolu oti ne toka ai e pule,” mua atu ka taute e lautolu ia e tau fifiliaga ka lauia e atāina ke tapuaki.​—1 Timo. 2:1, 2.

10. To kautū nakai e patuiki he faahi tokelau ke he patuiki he faahi toga? Fakamaama.

¹⁰ Ko e perofetaaga ia Tanielu 11:40-45 ne hagaaki lahi ke he gahua he patuiki he faahi tokelau. Kakano kia e mena nei to kautū a ia ke he patuiki he faahi toga? Nakai. Ko e patuiki he faahi toga to “moui” agaia he mogo ka moumou e Iehova mo Iesu e tau fakatufono oti he tagata he tauaga i Amaketo. (Fakakite. 19:20) Ko e ha kua mauokafua lahi a tautolu? Manamanatu ke he tau perofetaaga ne talahau ia Tanielu mo e Fakakiteaga.

11. Ko e heigoa ne fakakite he Tanielu 2:43-45? (Kikite fakatino he kili.)

¹¹ Totou Tanielu 2:43-45. Fakamaama he perofeta ko Tanielu e tau fakatufono he tagata ne kua lauia e tau tagata he Atua. Tuga e tau vala kehekehe he fakatino he tupua lapatoa lahi. Ko e fakatufono fakahiku he tagata ne fakakite ko e tau tauluhui he tupua ne fiofio e lapatoa mo e kelekele. Ko e tau tauluhui kua hagaao ke he Pule Malolō he Lalolagi ko Igilani-Amerika. Fakakite he perofetaaga ia ko e Pule Malolō he Lalolagi ko Igilani-Amerika kua pule agaia he magaaho ka moumou he Kautu he Atua e tau fakatufono oti he tagata he lalolagi.

12. Ko e heigoa ne hagaao ki ai e ulu ke fituaki he manu favale, mo e aoga he ha ke iloa?

¹² Fakakite foki he aposetolo ko Ioane e tau pule kehekehe he lalolagi ne lauia e tau tagata ha Iehova. Fakamaama e Ioane e tau fakatufono nei kua tuga e manu favale ne fitu e ulu. Ko e ulu ke fituaki he manu favale kua hagaao ke he Pule Malolō he Lalolagi ko Igilani-Amerika. Aoga ke iloa e mena nei ha kua nakai fai ulu foki ke tupu hake. Ko e ulu ke fituaki he manu favale nei kua pule agaia he magaaho ka moumou he Keriso mo e haana tau kau he lagi e manu favale mo lautolu ne kau mo ia. *​—Fakakite. 13:1, 2; 17:13, 14.

13-14. Ko hai a “Koku he motu a Makoku,” ti ko e heigoa ka fakaohooho a ia ke totoko ke he tau tagata he Atua?

¹³ Tohi e Esekielu e perofetaaga ke he mena ka tupu ato moumou e patuiki he faahi tokelau mo e patuiki he faahi toga. Tuga kua tatai e fakamaamaaga he tau perofetaaga ia Esekielu 38:10-23; Tanielu 2:43-45; 11:44–12:1; mo e Fakakiteaga 16:13-16, 21. Ti ka pihia, manatu a mautolu to fakamooli ai he puhala nei.

 ¹⁴ Fai mogo he mole e kamataaga he matematekelea lahi, ko e “tau patuiki he lalolagi, mo e lalolagi oti kana” to kau auloa ke fakatū e matakau he tau motu. (Fakakite. 16:13, 14; 19:19) Ko e matakau ia he tau motu ne fakahigoa he Tohi Tapu ko “Koku he motu a Makoku.” (Eseki. 38:2) Ko e matakau ia he tau motu to totoko ke he tau tagata he Atua he lali ke utakehe katoatoa a lautolu. Ko e heigoa ka fakaohooho e totokoaga? He perofetaaga hagaao ke he magaaho ia, ne kitia he aposetolo ko Ioane e afā uha tuli lahi mahaki kua tō mai ke he tau fī he Atua. Ko e uha tuli ia kua hagaao ke he fekau malolō lahi he fakafiliaga ne talahau he tau tagata ha Iehova. Liga ko e fekau nei ka fakaohooho a Koku ha Makoku ke totoko ke he tau tagata he Atua he foli ke utakehe a lautolu mai he lalolagi.​—Fakakite. 16:21.

15-16. (a) Liga ko e heigoa e mena ka tupu ne fakamaama ia Tanielu 11:44, 45? (e) Ko e heigoa ka tupu ke he patuiki he faahi tokelau mo e tau motu oti a Koku ha Makoku?

¹⁵ Ko e fekau malolō lahi nei mo e totokoaga fakahiku he tau fī he Atua ne liga tatai mo e tau mena tutupu ne hagaao ia Tanielu 11:44, 45. (Totou.) Talahau e Tanielu ko e “tau ogo mai he fahi uta, mo e fahi tokelau” kua fakaatukehe e patuiki he faahi tokelau ti fina age a ia mo e “ita lahi.” Ne foli e patuiki he faahi tokelau ke “kelipopo ai e tau tagata tokologa.” Tuga kua hagaao e “tau tagata tokologa” ke he tau tagata ha Iehova. * Liga fakamaama e Tanielu e mena nei ko e laliaga ke utakehe katoatoa e tau tagata he Atua.

¹⁶ Ko e totokoaga nei he patuiki he faahi tokelau mo e tau fakatufono ne toe he lalolagi ka fakaohooho e Atua Malolō Ue Atu ke tamai e tauaga i Amaketo. (Fakakite. 16:14, 16) He magaaho ia, ko e patuiki he faahi tokelau mo e tau motu oti a Koku ha Makoku to fakaotioti mo e to “nakai ha i ai taha ke lagomatai kia ia.”​—Tani. 11:45.

17. Ko hai a Mekaeli “ko e iki ne mua” ne talahau he Tanielu 12:1, mo e ko e heigoa ne taute e ia?

¹⁷ Ko e kupu tohi ne mui mai he fakamauaga ia Tanielu, ne talahau foki e falu vala tala  ke he puhala ka moumou ai e patuiki he faahi tokelau mo e tau kau ne lafi ki ai, mo e puhala ka fakahao a tautolu. (Totou Tanielu 12:1.) Ko e heigoa e kakano he kupu nei? Ko Mekaeli ko e taha higoa he Patuiki ha tautolu ne pule ko Keriso Iesu. Ko ia ne “tu ha ko e tau tagata” he Atua tali mai he 1914 he mogo ne fakatū e Kautu haana he lagi. He vahā i mua, to “tu ki luga,” po ke fakaotioti e ia e tau fī haana he tauaga i Amaketo. He tauaga nei ko e fakaotiaga a ia he mena ne talahau e Tanielu ko e “tau aho ke matematekelea ai” he tali mai. Ko e perofetaaga ha Ioane ne fakamau ia Fakakiteaga ne hagaao ke he magaaho ne takitaki atu ke he tauaga he “matematekelea lahi.”​—Fakakite. 6:2; 7:14.

18. Ko e ha kua maeke a tautolu ke haga atu mo e mauokafua ke he vahā i mua?

¹⁸ Maeke a tautolu ke haga atu mo e mauokafua ke he vahā i mua ha kua fakamooli e Tanielu mo Ioane ko lautolu kua fekafekau ki a Iehova mo Iesu to momoui he matematekelea lahi. Pehē a Tanielu ko lautolu ka momoui to “tohi ke he tohi” e tau higoa ha lautolu. (Tani. 12:1) Ko e heigoa ha tautolu ne lata ke taute ke tohi e tau higoa he tohi ia? Kua lata ia tautolu ke fakakite e tua ki a Iesu, ko e Punua Mamoe he Atua. (Ioane 1:29) Lata a tautolu ke tukulele e tau momoui ke he Atua mo e papatiso. (1 Pete. 3:21) Ti lata a tautolu ke fakakite e lalagoaga ke he Kautu he Atua he lagomatai e falu ke fakaako hagaao ki a Iehova.

19. Ko e heigoa kua lata ia tautolu ke taute mogonei, ti ko e ha?

¹⁹ Ko e magaaho hanei ke atihake e falanaki ki a Iehova mo e fakatokatokaaga haana he tau fekafekau fakamooli. Ko e magaaho hanei ke lalago e Kautu he Atua. Ka taute pihia e tautolu, to fakahao a tautolu he magaaho ka fakaotioti he Kautu he Atua e patuiki he faahi tokelau mo e patuiki he faahi toga.