1-2. Tukendikania okuki omo mwatsi ono?

LINO, hali emyatsi mingyi kwilaba kera eyikakanganaya ngoko tuli omo biro by’enduli by’ekihugho kino. Hakisiya hake, Yehova na Yesu Kristo ibatoghotya amatabali wosi awakalwa n’oBwami b’oMungu. Embere omwatsi oyo ahike, omwami w’elutambi lw’endata n’ow’elutambi lw’eyikwa bakendikanyirirya obuyighu bwabo ibo kw’ibo, n’oko bandu b’oMungu.

² Omo mwatsi ono tukendikania oko buminyereri obuli omo Danieli 11:40–12:1. Tukendilangira omwami w’elutambi lw’endata nga nindi munabwire kandi tukendilangira busanaki litolere itwayiketera ngoko Yehova akendisyatulamya n’omo hangabyaki.

3-4. Nindi yo “mwami w’elutambi lw’endata” munabwire? Kanaya.

³ Obughuma bw’Abasoveti bwabere bwatera omo mwaka 1991, Abandu b’oMungu ab’omo kiharo kinene ekyo ‘mubawatikibwa hake,’ nibughambu, mubahumula omo katambi kake. (Dan. 11:34) Ekyo mukyaleka ibatoka eritulira omo bwiranda, neryo emighanzo yabatuliri omo bihugho by’Ekikoministi kya kera muyakanya kundu n’erihika oko maghana w’amaelfu. Lyolo-lyolo, Oburusi n’ebihugho ebikayighunga haghuma nabo, mubabya mwami w’elutambi lw’endata. Ngoko tunalyabugha omo mwatsi owalaba, obutabali eribya mwami w’elutambi lw’endata kutse w’elutambi lw’eyikwa, litolere ibwakola emyatsi isatu eyi: (1) ibwatabala ekihugho ekirimo abandu ba Yehova bangyi kutse ibwaghalyabo, (2) ibwakakanganaya omo mikolere ngoko buponire Yehova n’abandu biwe, kandi (3) ibwabya omo buyighu n’obundi butabali.

 ⁴ Tulangire emyatsi eyikaleka itwabuga tuti munabwire omwami w’elutambi lw’endata b’Oburusi haghuma n’ebihugho ebikawatikanayana nabo. (1) Mubaghania omubiri w’abandu b’oMungu ow’eritulira n’eryaghalya amaghana w’amaelufu w’abaghala n’abali betu ababya omo biharo ebyo bakatabala. (2) Emyatsi eyo, yikakanganaya ngoko baponire Yehova n’abandu biwe. (3) bakalwa n’omwami w’elutambi lw’eyikwa, Obutabali Bukulu bw’eKihugho b’Obungereza n’Obuamerika. Tulebaye emyatsi eyo Oburusi n’ebihugho ebikawatikanayana nabo babirikola kandi emyatsi eyo nga ikakanganaya yiti ngoko ibo b’omwami w’elutambi lw’endata.

5. Obuminyereri obuli omo Danieli 11:40-43 bukakanaya oko mughulu wahi?

⁵ Soma Danieli 11:40-43. Ekihande ky’obuminyereri ekyo kikakanaya oko biro by’enduli. Obuminyereri obu bukatuwatikaya eriminya ndeke obuyighu obuli omo katikati k’omwami w’elutambi lw’endata n’omwami w’elutambi lw’eyikwa. Ngoko Danieli anabugha embere, omo biro by’enduli omwami w’elutambi lw’eyikwa “asyabandana” kutse asyalwa n’omwami w’elutambi lw’endata.”​—Dan. 11:40.

6. Ni myatsi yahi eyikakanganaya ngoko omwami w’elutambi lw’endata n’omwami w’elutambi lw’eyikwa banemulola embere n’amalwa wabo?

⁶ Omwami w’elutambi lw’endata n’omwami w’elutambi lw’eyikwa bakalwa busana obuli mughuma wa kubo anzire obutabali bwiwe ibwabya butabali bukulu bw’ekihugho kyosi. Eky’erileberyako, langira ekyabya enyuma sy’amalwa w’akabiri w’ekihugho, Obughuma bw’Abasovieti n’ebihugho ebyayighunga nabo mubatabala ebiharo bingyi by’eBulaya. Omwami w’elutambi lw’endata erikola atya, mukyaleka omwami w’elutambi lw’eyikwa inyahiraho obughuma obw’eriwatikania omo malwa n’ebindindi bihugo obwahulawamo OTAN (Organisation du traité de l’Atlantique). Omwami w’elutambi lw’endata n’omwami w’elutambi lw’eyikwa bakakolesaya esyofranga nene bakasondya eribya n’esyombundu esikala-kalire kulenga esyabandi. Kandi obuli mwami mwalwa n’oghundi omwiwatikya esyonzighu sy’oghundi omo Afrika, Asia, ne Amerika y’Endina. Omo myaka ya lino-lino, Oburusi n’ebihugho ebikawatikanayana nabo, mubakangania akaghala kabo omo kihugho kyosi. Kandi mubalwire n’omwami w’elutambi lw’eyikwa emwikolesya emyatsi y’ekielektronike. Obuli mughuma akatsongera oghundi ati akakolesaya esyoprograme esye ordinatere esituwene akasonda eritsandya obuteke n’epolitike y’oghundi. Kandi ngoko Danieli anabugha embere, omwami w’elutambi lw’endata akinalola embere erilwa n’abandu b’oMungu.​—Dan. 11:41.

7. “Ekihugo kibuya” niki?

⁷ Obuminyereri obuli omo Danieli 11:41 bukabugha buti omwani w’elutambi lw’endata akendisyingira omo “kihugo kibuya.” Ekihigo ekyo niki? Kera, ekihugo ekye Israeli ikikalangirawamo “ekikakanga oko bihugo byosi,” kutse ekighambire kutsibu kulenga ebihugo byosi. (Ezek. 20:6) Nikwa, ekyaleka ekihugho ekyo ikyahulwamo ekighambire kulenga ebihugo byosi ni busana kyo kyabya kikakolwamo eriramya ly’ekwenene. Eritsuka oko Pentekoste 33 M.W., sihakiri ahandu halebe oko kihugho ahangahulwamo “ekihugo kibuya,” kusangwa lino abandu ba Yehova bali ehosi-hosi omo kihugo. Aliwe, munabwire “ekihugo kibuya” y’emibiri y’abandu ba Yehova eyikahiramo  eriramya Yehova erilabira emihindino n’omubiri w’eritulira.

8. Omwami w’elutambi lw’endata mwiringira ati omo “kihugo kibuya”?

⁸ Omo biro by’enduli, omwani w’elutambi lw’endata abir’ingira ngendo nyingyi omo “kihugo kibuya.” Eky’erileberyako, omughulu obutabali bw’eBujeremani obw’Abanazi bwabya mwami w’elutambi lw’endata, kutsibu-tsibu omo malwa w’akabiri w’ekihugho, omwami oyo mwingira omo “kihugo kibuya” omughulu agalaya n’erita abandu b’oMungu. Enyuma sy’amalwa w’akabiri w’ekihugho Obughuma bw’Abasovieti mubwabya mwami w’elutambi lw’endata; omwami oyo mwingira omo “kihugo kibuya” omughulu aghalaya abandu b’oMungu n’eritwalabo ehali oko wabo.

9. Omo myaka ya lino-lino, Oburusi n’ebihugho ebikayighunga okw’ibo mubingire bati omo “kihugho kibuya”?

⁹ Omo myaka ya lino-lino, Oburusi n’ebihugho ebikayighunga okw’ibo, nabo mubingire omo “kihugo kibuya”. Bati? Omo mwaka 2017, Oburusi mubwaghania omubiri w’abandu ba Yehova n’erighusa abaghala n’abali betu balebe omo ngomo. Kandi mubwaghania ebichapo byetu, n’eBiblia Tafsiri ya Ulimwengu Mupya. Kandi, mubwatusaghula ebetheli yetu eyiri omo Burusi, n’Ebisenge by’oBwami n’Ebisenge by’Emihindano Minene-Minene. Babere babikola emyatsi eyo, omo mwaka 2018 Akatunga Akakasondola mukabughire kati Oburusi n’ebihugho ebikawatikanayana nabo bo mwami w’elutambi lw’endata. Nibya n’omughulu bakaghalibawa kutsibu, abandu b’oMungu sibalilwa n’obutabali bosi-bosi kutse sibalisonda eribindulabo. Aliwe, bakakwama erihano ly’eBiblia erikabugha liti itwasaba “busana n’abami, n’abandi bosi abakatabala,” kutsibu-tsibu omughulu bakayisogha erikola emyatsi eyangaleka abandu ibatabya n’obwiranda obw’eriramya.​—1 Tim. 2:1, 2.

10. Omwami w’elutambi lw’endata anemwendisyatoghotya omwami w’elutambi lw’eyikwa kwehi? Kanaya.

¹⁰ Obuminyereri obuli omo Danieli 11:40-45 bukakanaya kutsibu-tsibu oko mwami w’elutambi lw’endata. Nikwa ekyo ni bughambu akendisyatoghotya omwami w’elutambi lw’eyikwa kwehi? Iyehe. Omwami w’elutambi lw’eyikwa akasyabya “inyaneho” omughulu Yehova na Yesu bakasyatoghotaya amatabali wosi w’abandu omo vita ye Armagedoni. (Erib. 19:20) Twikirirye ekyo busanaki? Tulebaye emyatsi eyo obuminyereri obuli omo Danieli n’obuli omo Eribisulirwa bukakanganaya.

11. Obuminyereri obuli omo Danieli 2:43-45 bukakanganayaki? (Lebaya epitsa eyiri oko kijalada.)

¹¹ Soma Danieli 2:43-45. Omuminyereri Danieli akakanaya oko matabali w’abandu awatabala eyiri abandu b’oMungu bangyi kutse awaghalayabo. Amatabali ayo akasosekanibawa n’ebitsweka mbiriri-mbiriri by’ekisanamu kinene. Obutabali b’omwiso oko matabali ayo bukasosekanibawa n’ebisando by’ekyuma ekitulungene n’olondo eby’ekisanamu ekyo. Ebisando bikasosekanaya Obutabali Bukulu bw’eKihugho b’Obungereza n’Obuamerika. Obuminyereri obo bukakanganaya ngoko obutabali b’Obungereza n’Obuamerika bukasyabya ibukineho omughulu oBwami bw’oMungu bukasyatoghotaya amatabali w’abandu.

12. Omutwe w’eririnda w’enyama y’emoli akasosekanayaki, kandi busanaki ni ky’omughaso eriminya omwatsi oyo?

¹² Omukwenda Yoane naye akakanaya oko matabali makulu-makulu oko kihugho awatabala eyiri abandu ba Yehova bangyi kutse awaghalayabo. Yoane akasosekania amatabali ayo n’enyama y’omoli eyiwite emitwe irinda. Obutabali Bukulu bw’eKihugho Obungereza n’Obuamerika bo bukasosekanibawa n’omutwe w’eririnda w’enyama eyo. Ni ky’omughaso eriminya  omwatsi oyo kundi enyama eyo muyatayira eyindi mitwe enyuma sy’aho. Omutwe w’eririnda w’enyama eyo akendisyabya inyakinatabala omughulu Yesu n’emilondo yiwe y’elubula bakasyatoghotayagho haghuma n’eyindi mitwe y’enyama eyo. *​—Erib. 13:1, 2; 17:13, 14.

13-14. “Gogi w’ekihugo kya Magogi” nindi, kandi alinga ni kyahi kyo kikasyaleka inyayibamba oko bandu b’oMungu?

¹³ Obuminyereri bughuma obuli omo Ezekieli bukatuwatikaya eriminya ebikendisyabya embere sy’eritoghotibwa ly’omwami w’elutambi lw’endata n’omwami w’elutambi lw’eyikwa. Amaminyereri awali omo Ezekieli 38:10-23; Danieli 2:43-45; 11:44–12:1; n’ Eribisulirwa 16:13-16, 21 amabya inyakakanaya oko mughulu n’emyatsi mighumerera, itwanganabuga tuti emyatsi eyikwamire hano yikendikoleka.

¹⁴ Mughulu mulebe obulighe bunene bwabitsuka, “abami b’ekihugo kyosi” bakendisyayighunga haguma. (Erib. 16:13, 14; 19:19) EBiblia yikahula eriyighunga haghuma ery’abami eryo mo ‘Gogi w’ekihugo kya Magogi’. (Ezek. 38:2) Ebihugho ebikendisyayighunga haghuma ebyo byasyayibamba oko bandu b’oMungu. Bakendisyakola batya busanaki? Amukwenda Yoana akakania oko mughulu oyo, mwalangira amatwa kutse amatsuku manene-manene akatoghongera oko syonzighu sy’oMungu. Alinga amatsuku manene-manene ayo akasosekanaya engulu eyikalire ey’eritswera, eyo abandu ba Yehova bakasyatulaghanaya. Alinga engulu eyo ikasyaleka Gogi w’ekihugo kya Magogi inyayibamba oko bandu b’oMungu akasonda eribughabo oko kihugho.​—Erib. 16:21.

15-16. (a) Alinga obuminyereri obuli omo Danieli 11:44, 45 bukakanaya okuki? (b) Ekikendisyahikira Gogi we Magogi omwami w’elutambi lw’endata haghuma omwami w’elutambi lw’endata haghuma n’awandi matabali awakayira Gogi we Magogi?

¹⁵ Engulu eyikalire eyo n’eriyibamba ly’omwiso ly’esyonzighu sy’oMungu oko bandu biwe alinga ni myatsi mighumerera n’eyikanibweko omo Danieli 11:44, 45. (Soma.) Danieli akabugha ati “Esyongulu esikalua ebwanga bwa [matanga lyuba,] n’ebwanga bw’elutambi lw’eNdata” syasyahangya-hangya omwami w’elutambi lw’endata, naye asyahuluka “n’erihitana  linene.” Omwami w’olutambi lw’endata anzire “Eriherya n’er’ita abandu bangyi.” Alinga ekinywa “bangyi” kikakaniraya oko bandu ba Yehova. * Alinga hano, Danieli akakanaya oko eriyibamba ry’omwiso oko bandu b’oMungu.

¹⁶ Eriyibamba oko bandu b’oMungu eryo omwami w’elutambi lw’endata haghuma n’awandi matabali w’ekihugho akasyakola, likendisyendererya Omutoki w’Ebyosi, neryo ekyo kikendisyaleka inyaleta evita ye Armagedoni. (Erib. 16:14, 16) Oko mughulu oyo, omwami w’elutambi lw’endata haghuma n’awandi matabali awakayira Gogi we Magogi, basyahika oko nduli yabo, kandi sihendisyabya ‘mundu asyabawatikya’.​—Dan. 11:45.

17. Mikaeli “Omunya-mwami mukulu” oyukahulawa omo Danieli 12:1 nindi, kandi akakolaki?

¹⁷ Omo myatsi eyo Danieli akakanayako, omulondo owakwamire akatuwatikaya eriminya ngoko omwami w’elutambi lw’endata n’abakayighunga naye bakendisyatoghotibwa, netu ngoko tukendisyalama. (Soma Danieli 12:1.) Omulondo oyu akasondibugha atiki? Mikaeli ni rindi rina ly’omwami wetu oyukatabala, Yesu Kristo. Abiribya “oyukategaya” abandu b’oMungu eritsuka oko mwaka 1914 omughulu abya Mwami w’obwami b’oMungu omo lubula. Hatya-hatya, “asyahangana,” kutse asyatoghotya esyonzighu siwe omo malwa awe Armagedoni. Amalwa ayo akasyabya mwatsi w’enduli owo Danieli akahula mo “endambi y’obulighe” omo historia y’abandu. Obuminyereri bwa Yohana obuli omo Eribisulirwa bukahula akatambi ako, akali embere sye Armagedoni, mo “[Obulige] bunene.”​—Erib. 6:2; 7:14.

18. Busanaki twanganalindirira ebiro ebikasa butsiryubaha?

¹⁸ Twanganalindirira ebiro ebikasa butsiryubaha kundi ye Danieli na Yohana, abosi bakabugha butsira eritika-tika bati Yehova na Yesu bakasyalamaya abaghombe babo omughulu w’obulighe bunene. Danieli akabugha ati abakendisyalama b’abandu abo amena wabo abya “iniabirisakwa omo kitabu.” (Dan. 12:1) Twangakola kyahi amena wetu akote erisakwa omo kibatu ekyo? Litolete itwakangania kwenene ngoko twikirirye Yesu, Ekyana ky’embuli ky’oMungu. (Yoa. 1:29) Litolere itwayiherera oko Mungu n’eribatisibwa. (1 Pet. 3:21) Kandi litolere itw’imira Obwami b’oMungu omwiwatikya abandi er’igha oko Yehova.

19. Litolere itwakolaki lino, kandi busanaki?

¹⁹ Ebiro bino w’omughulu w’eriwatya obwikirirya bwetu oko Yehova n’oko ndondeko yiwe eyirimo abaghombe biwe bataleghula. Ono w’omughulu w’erimira Obwami b’oMungu. Twamakola tutya, itukendisyalama omughulu Obwami bw’oMungu bukenditoghotya omwami w’elutambi lw’endata n’omwami w’elutambi lw’eyikwa.