1-2. Re tlo ithuta’ng sehlogong se?

GO NA le dilo tše dintši tšeo di bontšhago gore re phela mehleng ya mafelelofelelo ya bofelo. Kgauswinyane, Jehofa le Jesu ba tlo fediša mebušo ka moka yeo e lwago le Mmušo wa Modimo. Eupša pele seo se direga, kgoši ya leboa le kgoši ya borwa di tlo no tšwela pele di bakišana go buša le go hlasela batho ba Modimo.

² Sehlogong se re tlo ithuta ka boporofeta bjo bo lego go Daniele 11:40–12:1. Re tlo kwa gore kgoši ya leboa ke mang lehono, e bile re tlo ithuta gore ke ka baka la eng re sa swanela go tšhoga eupša re tshepe gore Jehofa o tla re phološa go sa šetšwe seo se ka diregago.

3-4. Lehono kgoši ya leboa ke mang? Hlalosa.

³ Ka morago ga gore Mmušo wa Soviet Union o we ka 1991, batho ba Modimo ba ile ba newa thušo e nyenyane, e lego tokologo. (Dan. 11:34) Seo se ile sa dira gore ba bolele ditaba tše dibotse ka tokologo, gomme go se go ye kae palo ya bagoeledi dinageng tšeo e bego e le tša Soviet Union e ile ya oketšega kudu. Eupša ka morago ga mengwaga e sego kae, Russia le dinaga tšeo di e thekgago di ile tša ba kgoši e mpsha ya leboa. Ka ge re kwele sehlogong sa go feta, e le gore mmušo o itšego e be kgoši ya leboa goba kgoši ya borwa o swanetše go dira dilo tše tharo. Sa pele, dikgoši tšeo di bušitše moo batho ba bantši ba Modimo ba bego ba le gona goba di kile tša ba hlasela. Sa bobedi,  tsela yeo di ilego tša swara batho ba Modimo ka yona e be e bontšha gore di hloile Modimo wa therešo e lego Jehofa le batho ba gagwe. Sa boraro, dikgoši tše ka botšona di be di dutše di bakišana go buša.

⁴ Ke ka baka la’ng re ka re lehono kgoši ya leboa ke Russia le dinaga tšeo di e thekgago. Lebaka la pele ke gore Russia le dinaga tšeo di e thekgago di hlasetše batho ba Modimo ka go thibela modiro wa go bolela ditaba tše dibotse le ka go tlaiša bana babo rena le dikgaetšedi ba bantši bao ba dulago dinageng tšeo di di laolago. Lebaka la bobedi ke gore dilo tšeo di di dirago di bontšha gore di hloile Jehofa le batho ba gagwe. Lebaka la boraro ke gore Russia le dinaga tšeo di e thekgago, di bakišana go buša le kgoši ya borwa e lego mmušo wa lefase wa Maisemane le Maamerika. Ga bjale a re kweng gore Russia le dinaga tšeo di e thekgago di dirile eng, le gore ke ka baka la eng re kgodišegile gore ke tšona kgoši ya leboa.

5. Daniele 11:40-43 e bolela ka eng?

⁵ Bala Daniele 11:40-43. Karolo ye ya boporofeta e bolela ka nako ya mehleng ya bofelo. Ditemana tše di hlalosa kamoo kgoši ya leboa le kgoši ya borwa di bakišanago go buša. Ka ge Daniele a porofetile, mehleng ya bofelo kgoši ya borwa e be e tla “kgorometšana” le kgoši ya leboa.—Dan. 11:40.

6. Kgoši ya leboa le kgoši ya borwa di be di dutše di kgorometšana bjang?

⁶ Kgoši ya leboa le kgoši ya borwa di be di dutše di elwa ka gobane e nngwe le e nngwe ya tšona e nyaka go ba mmušo o mogolo wa lefase. Ka mohlala, nagana ka seo se ilego sa direga ka morago ga Ntwa ya Bobedi ya Lefase ge Mmušo wa Soviet Union o be o thoma go buša karolong e kgolo ya Yuropa. Ka gona, kgoši ya borwa e ile ya dumelelana le dinaga tše dingwe gore ba kopanye mašole a tšona go lwa le kgoši ya leboa. Kgoši ya borwa le dinaga tšeo di ile tša thoma mokgatlo wo o bitšwago North Atlantic Treaty Organization (NATO). Kgoši ya leboa le kgoši ya borwa di ile tša diriša tšhelete e ntši kudu e le ge di leka go phadišana ka go ba le mašole a matla. Kgoši ya leboa e ile ya lwa le kgoši ya borwa ka go hlasela dinaga tšeo di šomišanago le kgoši ya borwa. Dinaga tšeo ke Afrika, Asia le Latin Amerika. Gona bjale, Russia le dinaga tšeo di e thekgago di na le matla kudu lefaseng ka moka. Kgoši ya leboa e lwa le kgoši ya borwa e diriša dikhomphutha. Dikgoši tše tše pedi di latofatšane ka gore di hlaselane ka go diriša mananeo a itšego a khomphutha go dira gore ikonomi e we le go wiša mmušo. Ka ge Daniele a porofetile, kgoši ya leboa e tšwela pele go hlasela batho ba Modimo.—Dan. 11:41.

7. ‘Naga ya Mokgabišo’ ke eng?

⁷ Daniele 11:41 e itše kgoši ya leboa e be e tla tsena “nageng ya Mokgabišo.” Naga yeo ya Mokgabišo ke eng? Mehleng ya kgale, naga ya Mokgabišo e be e le naga ya Isiraele. Beibele e re naga ya Isiraele e be e le e botse, goba “e le mokgabišo wa dinaga tše dingwe ka moka.” (Hesek. 20:6) Selo seo se dirilego gore naga ya Isiraele e be bohlokwa go feta dinaga ka moka, ke gore ke moo batho ba bego ba rapela Jehofa gona. Ga e se le go tloga ka Pentekoste ya 33 C.E., ‘naga ya Mokgabišo’ ga e sa le lefelo le itšego mo lefaseng. Ke ka baka la’ng re re’alo? Ke ka gobane lehono batho ba Jehofa ba phatlaletše lefaseng ka moka. Bjale ‘naga ya Mokgabišo’ ke’ng lehono? Ke mediro yeo Dihlatse tša Jehofa di e dirago go  hlankela Modimo, e bjalo ka go ya dibokeng le go ya tšhemong.

8. Kgoši ya leboa e tsene bjang “nageng ya Mokgabišo”?

⁸ Ga e sa le mehla ya bofelo e thoma, kgoši ya leboa e tsene gantši “nageng ya Mokgabišo.” Ka mohlala, nakong ya Ntwa ya Bobedi ya Lefase, Mmušo wa Manazi wa Jeremane e be e le kgoši ya leboa. Kgoši yeo e ile ya tsena “nageng ya Mokgabišo” ka go tlaiša le go bolaya batho ba Modimo. Ka morago ga Ntwa ya Bobedi ya Lefase, Mmušo wa Soviet Union o ile wa thoma go ba kgoši ya leboa. Kgoši yeo le yona e ile ya tsena “nageng ya Mokgabišo” ka go tlaiša batho ba Modimo le go ba iša kgolegong dikampeng tša tlaišo.

9. Ga e sa le go tloga mengwageng e sego kae ya go feta, Russia le dinaga tšeo di e thekgago di tsene bjang “nageng ya Mokgabišo”?

⁹ Ga e sa le go tloga mengwageng e sego kae ya go feta, Russia le dinaga tšeo di e thekgago le tšona di tsene “nageng ya Mokgabišo.” Di dirile seo bjang? Ka 2017, Russia yeo e lego kgoši ya leboa gona bjale, e ile ya thibela modiro wa Dihlatse tša Jehofa gomme ya golega ba bangwe ba bana babo rena le dikgaetšedi. E ile ya thibela dikgatišo tša rena gore di se sa tšweletšwa le go dirišwa, go akaretša le Beibele ya Phetolelo ya Lefase le Lefsa. Eupša ga se ya felelela moo, e ile ya tšea le meago ya bethele ya Russia gotee le Diholo tša Mmušo le Diholo tša Kopano. Ka morago ga gore dilo tše di direge, ka 2018 Sehlopha se Bušago se ile sa phetha ka gore Russia le dinaga tšeo di e thekgago ke kgoši ya leboa. Eupša le ge batho ba Jehofa ba tlaišwa, ga ba leke go lwa le mmušo woo o ba tlaišago goba go leka go o fetoša. Go e na le moo, ba leka go kwa keletšo ya Beibele ya gore ba rapelele “bohle bao ba lego maemong a godimo,” kudukudu ge mebušo e tlo dira diphetho tšeo di amago borapedi bja rena.—1 Tim. 2:1, 2.

10. Na kgoši ya leboa e tla fenya kgoši ya borwa? Hlalosa.

¹⁰ Boporofeta bjo bo lego go Daniele 11:40-45 bo bolela kudu ka kgoši ya leboa. Na se se ra gore kgoši ya leboa e tla fenya kgoši ya borwa? Aowa. Kgoši ya borwa e tla be e sa “phela” goba e sa le gona ge Jehofa le Jesu ba tla be ba fediša mebušo ka moka ya lefase ntweng ya Haramagedone. (Kut. 19:20) Ke ka baka la’ng re kgodišegile ka taba yeo? Diporofeto tšeo di lego go Daniele le Kutollo di tlo re thuša go araba potšišo yeo.

11. Daniele 2:43-45 e ra go re’ng? (Bona seswantšho sa letlakala la ka ntle.)

¹¹ Bala Daniele 2:43-45. Moporofeta Daniele o ile a bolela ka seswantšho se segolo seo se dirilwego ka dilo tše di fapafapanego. Karolo e nngwe le e nngwe e swantšhetša mmušo wo o kilego wa buša nageng yeo go bego go na le batho ba Modimo ba bantši. Mebušo ye ga se ya buša ka nako e tee. Maoto a seswantšho seo a be a dirilwe ka tšhipi ye e tswakanego le letsopa. Maoto ao a swantšhetša mmušo wa mafelelo wa lefase, e lego Mmušo wa Maisemane le Maamerika. Boporofeta bjoo bo ra gore Mmušo wa Maisemane le Maamerika o tla be o sa buša ge Modimo a tla be a fediša mebušo ka moka ya batho.

12. Hlogo ya bošupa ya sebata e emela mmušo ofe, gona ke ka baka la’ng go le bohlokwa go tseba seo?

¹² Moapostola Johane le yena o ile a bolela ke mebušo e megolo ya lefase yeo e ilego ya ama batho ba Modimo. Boporofeteng bja gagwe, mebušo ye e emelwa ke sebata sa dihlogo tše šupa. Hlogo ya bošupa ya sebata seo e emela mmušo wa lefase wa Maisemane le Maamerika. Taba ye e bohlokwa ka gobane hlogo yeo ya bošupa ke ya mafelelo, ga go sa na hlogo e nngwe. Hlogo yeo ya bošupa e tla be e sa  buša ge Jesu Kriste le madira a gagwe a legodimong ba tla be ba fediša sebata seo ka moka. *—Kut. 13:1, 2; 17:13, 14.

13-14. “Gogo wa naga ya Magogo” ke mang, gona ke’ng seo se tlo dirago gore a hlasele batho ba Modimo?

¹³ Hesekiele o ile a ngwala boporofeta bjo bo re botšago gore go tlo direga eng pele kgoši ya leboa le kgoši ya borwa di ka fedišwa. Go bonagala diporofeto tšeo di lego go Hesekiele 38:10-23; Daniele 2:43-45; 11:44–12:1 le Kutollo 16:13-16, 21, di bolela ka dilo tša go swana. Ge e ba go le bjalo, gona re ka letela gore go direge dilo tše di latelago.

¹⁴ Nakong e itšego ka morago ga gore masetlapelo a magolo a thome, “dikgoši tša lefase ka moka” di tlo ipopa ngatana e tee. (Kut. 16:13, 14; 19:19) Beibele e re ditšhaba tšeo di ipopilego ngatana e tee ke “Gogo wa naga ya Magogo.” (Hesek. 38:2) Ditšhaba tše tšeo di ipopilego ngatana e tee, di tlo hlasela batho ba Modimo ka moka le go leka go ba fedišetša sa ruri. Ke’ng seo se tlo dirago gore ditšhaba tšeo di hlasele batho ba Modimo? Moapostola Johane o ile a porofeta gore nakong e itšego ka morago ga gore masetlapelo a magolo a thome, go tla ba le sefako se segolo seo se tla rothothago manaba a Modimo. Sefako seo se ka ba se swantšhetša molaetša o matla wa kahlolo wo o tla bego o bolelwa ke batho ba Jehofa. Go ka direga gore molaetša wo ke wona o tlo dirago gore Gogo wa Magogo a hlasele batho ba Modimo, e le ge a nyaka go ba fediša ka moka.—Kut. 16:21.

15-16. (a) Daniele 11:44, 45 e ka ba e bolela ka ditiragalo dife? (b) Go tlo direga’ng ka kgoši ya leboa le Gogo wa Magogo?

¹⁵ Go ka direga gore molaetša wa kahlolo le tlhaselo ya Gogo wa Magogo ke ditiragalo tšeo Daniele a boletšego ka tšona go Daniele 11:44, 45. (Bala.) Boporofeteng bjo, Daniele o itše “go tla ba le dipego tšeo di tšwago bohlabatšatši le leboa” tšeo di tlago go ferekanya kgoši ya leboa, gomme e tla tšwa lesolo e “befetšwe kudu.” Kgoši yeo ya leboa, e tlo nyaka “go fediša ba bantši.” “Ba bantši” bao go  bolelwago ka bona ke bomang? Go bonagala e le batho ba Jehofa. * Go ka direga gore ditemaneng tše, Daniele o bolela ka nako yeo batho ba Modimo ba tlogo hlaselwa la mafelelo.

¹⁶ Ge kgoši ya leboa le mebušo e mengwe e tla be e hlasela batho ba Modimo, seo se tlo galefiša Modimo Ramatlaohle kudu, gomme ntwa ya Haramagedone e tlo thoma. (Kut. 16:14, 16) Ka nako yeo, kgoši ya leboa le ditšhaba ka moka tšeo e tla bego e le karolo ya Gogo wa Magogo, di tlo fedišwa gomme “e ka se be le mothuši.”—Dan. 11:45.

17. Mikaele yo e lego kgoši e kgolo yo go bolelwago ka yena go Daniele 12:1 ke mang, gona o dira’ng?

¹⁷ Temaneng ya go latela boporofeteng bjona bjoo, re kwa kamoo kgoši ya leboa le dinaga tšeo di e thekgago di tlogo fedišwa, le kamoo re tlago go phološwa. (Bala Daniele 12:1.) Temana ye e ra go re’ng? Mikaele ke leina le lengwe la kgoši ya rena e bušago e lego Kriste Jesu. Mikaele o be a dutše a “emela” batho ba Modimo ga e sa le go tloga ka 1914 ge a thoma go ba kgoši ya Mmušo wa Modimo legodimong. Kgauswinyane o tla “ema” goba a fediša manaba a gagwe ntweng ya Haramagedone. Ntwa yeo ke tiragalo ya mafelelo yeo Daniele a boletšego ka yona ge a be a re go tla ba le “tlalelo” yeo e sa kago ya ba gona. Boporofeta bja Johane bjo bo lego go Kutollo bo re pele ntwa ya Haramagedone e thoma, go tlo ba le ‘masetlapelo a magolo.’—Kut. 6:2; 7:14.

18. Ke ka baka la’ng re sa swanelwa go tšhošwa ke dilo tšeo di tlago go direga nakong e tlago?

¹⁸ Daniele le Johane ba boletše gore Jehofa le Jesu ba tlo phološa bahlanka ba bona nakong ya masetlapelo a magolo. Ka gona, ga se ra swanela go tšhoga. Daniele o itše go tlo phologa batho bao maina a bona a ‘ngwadilwego ka pukung.’ (Dan. 12:1) Re ka dira’ng gore maina a rena a ngwalwe ka pukung yeo? Re swanetše go bontšha gore re na le tumelo go Jesu Kriste, yo e lego Kwana ya Modimo. (Joh. 1:29) Re swanetše go ineela go Modimo gomme re kolobetšwe. (1 Pet. 3:21) Le gona re swanetše go thekga Mmušo wa Modimo ka go dira sohle seo re ka se kgonago go ruta batho ka Modimo.

19. Re swanetše go dira’ng gona bjale, gona ka baka la’ng?

¹⁹ Gona bjale re swanetše go tshepa Jehofa go feta, gotee le mokgatlo wa gagwe. E bile ye ke nako ya gore re thekge Mmušo wa Modimo. Ge re ka dira bjalo, Modimo o tlo re phološa ge a tla be a fediša kgoši ya leboa le kgoši ya borwa a diriša mmušo wa gagwe.