1-2. Antoy aralen tayo ed sayan artikulo?

DAKDAKEL so ebidensya ya manbibilay tayo la ed sampot a parte na kaunoran iran agew na mundo nen Satanas. Magano lan deralen nen Jehova tan Jesu-Kristo so amin ya gobierno ya onkokontra ed Panarian. Antis ya nagawa itan, tuloytuloy ya manlaban so ari na amianen tan ari na abalaten tan tuloytuloy dan pairapen iray totoo na Dios.

² Diad sayan artikulo, aralen tayo so propesiyan akarekord ed Daniel 11:40–12:1. Amtaen tayo no siopa so ari na amianen natan tan pantongtongan tayo no akin ya makapanmatalek tayon iliktar itayo nen Jehova anggan antoy nagawa.

3-4. Siopa so ari na amianen natan? Ipaliwawa.

³ Nen binmagsak so Soviet Union nen 1991, saray totoo na Dios et akaawat na “daiset a tulong.” (Dan. 11:34) Labay ton ibaga, bulos lamet iran makapandayew. Kanian akapanpulong lamet ira. Tan ag-abayag, dinmakel so Tasi ed saray bansan datin sakop na Soviet Union. Balet kalabas na pigaran taon, say Russia tan saray kaalyado ton bansa so nagmaliw ya ari na amianen. Singa naaralan tayod apalabas ya artikulo, pian say sakey ya gobierno et nibagan ari na amianen odino ari na abalaten, nepeg ya (1) walad sakop to so dakel ya totoo na Dios, odino papairapen to ra, (2) sankanengneng ed saray gagawaen to ya talagan kabusol toy Jehova tan saray totoo To, tan (3) manlalaslasan ira parad pakapanyari.

 ⁴ Akin et segurado tayo ya say ari na amianen natan et say Russia tan saray kaalyado ton bansa? (1) Imbawal da so panagpulong ya kimey tan pinairap da so nilibon Tasi ya walad saray bansan sakop da. (2) Ipapanengneng na saratan ya ginawa da ya talagan kabusol day Jehova tan saray totoo to. (3) Milalaslasan irad ari na abalaten, say alyansa na Britanya tan Amerika. Nengnengen tayo no panon ya nagmaliw ya ari na amianen so Russia tan saray kaalyado ton bansa.

5. Anton panaon so indeskribe diad Daniel 11:40-43, tan antoy nagawa diad satan a panaon?

⁵ Basaen so Daniel 11:40-43. Indeskribe na sarayan bersikulo iray nagawa diad panaon na anggaan. Nabasa dia so panlaban na ari na amianen tan ari na abalaten. Impasakbay nen Daniel ya “mantulakan” odino “manbunoan” so ari na amianen tan ari na abalaten diad panaon na anggaan.​—Dan. 11:40; paimanod leksab.

6. Anto ray paneknek ya tuloytuloy ya mantutulakan so duaran arari?

⁶ Tuloytuloy ya manlalaslasan so ari na amianen tan ari na abalaten pian magmaliw iran sankamakapanyarian diad interon mundo. Singa bilang, kayari na World War II, kontrolado la na Soviet Union tan saray kaalyado to so Europe. Lapud satan, akialyansa so ari na abalaten ed arum ya bansa pian ombiskeg so puersa militar to, tan tinawag itan ya North Atlantic Treaty Organization. Talagan gagastosan na ari na amianen tan ari na abalaten so pamparakel day armas. Tan susuportaan da met so pigi-guerra na saray kaalyado dan bansa diad Africa, Asia, tan Latin Amerika. Diad agano ni ran taon, nagmaliw ya kontrolado na Russia tan saray kaalyado to so dakel ya bansa ed interon mundo. Lalabanan da met so ari na abalaten diad panha-hack da ed saray sekreton impormasyon ed computer. Diad tua, manpapalsaan irayan arari ya manguusar kuno so kalaban da na saray computer program pian pabagsaken so ekonomya tan gobierno ra. Tan singa impasakbay nen Daniel, tuloytuloy ya papairapen na ari na amianen iray lingkor na Dios.​—Dan. 11:41.

7. Anto so “dalin na Dekorasyon”?

⁷ Ibabaga na Daniel 11:41 ya say ari na amianen et onloob ed “dalin na Dekorasyon.” Anto itan ya dalin? Nensaman, say Israel so tinawag ya “sankarakepan ed amin a dalin.” (Eze. 20:6) Balet say talagan rason no akin ya espisyal itan ya dalin et lapud ditan mandadayew iray lingkor nen Jehova. Balet manlapu la nen Pentecostes 33 C.E., say “dalin na Dekorasyon” et agla ontutukoy ed saksakey a lugar ta saray lingkor nen Jehova et wala lad interon mundo. Kanian say “dalin na Dekorasyon” natan et ontutukoy ed kabibilay na saray totoo nen Jehova, kaiba lay pandadayew da ed sikato diad saray aral da tan say pampupulong da.

8. Panon ya linmoob so ari na amianen ed “dalin na Dekorasyon”?

⁸ Legan na kaunoran iran agew, aminpigan linmoob so ari na amianen ed “dalin na Dekorasyon.” Alimbawa, nen say Nazi Germany so ari na amianen nen World War II, sikatoy linmoob ed “dalin na Dekorasyon” diad impamairap tan impamatey tod saray lingkor na  Dios. Ontan met, kayari na World War II, nen say Soviet Union la so ari na amianen, sikatoy linmoob ed “dalin na Dekorasyon” nen pinairap to ray lingkor na Dios tan puersaan to ran inyakar ed ararawin lugar.

9. Diad imbebeneg iran taon, panon ya linmoob so Russia tan saray kaalyado to ed “dalin na Dekorasyon”?

⁹ Diad imbebeneg iran taon, say Russia tan saray kaalyado to et nilooban da met so “dalin na Dekorasyon.” Panon? Nen 2017, sayan ari na amianen et imbawal to so kimey na saray lingkor nen Jehova tan inkulong to so arum ya agagi tayon lalaki tan bibii. Imbawal to met iray publikasyon tayo, kaiba lay Balon Mundo a Patalos. Inala to met so sangan opisina ed Russia, pati saray Kingdom Hall tan Assembly Hall. Kayari na sarayan inkagawa, nen 2018 et imbaga na Mananguley ya Ulop ya say Russia tan saray kaalyado to so ari na amianen. Balet anggano papairapen na saray gobierno iray lingkor nen Jehova, ag-ira manrerebelde. Imbes, uunoren da so bilin na Biblia ya ipikasi so “amin a walad atagey a posisyon,” lalo la no wala ray gawaen dan desisyon ya makaapekto ed panagdayew tayo.​—1 Tim. 2:1, 2.

10. Kasin natalo na ari na amianen so ari na abalaten? Ipaliwawa.

¹⁰ Say nabasa labat ed Daniel 11:40-45 et nipaakar ed saray gawaen na ari na amianen. Kasin labay ya ibaga na satan ya natalo to so ari na abalaten? Andi. Say ari na abalaten et “mabilay ni” sano deralen nen Jehova tan Jesus so amin ya gobierno diad guerra na Armagedon. (Apo. 19:20) Akin et segurado tayo ed satan? Amtaen tayo ray detalye ed propesiya ya walad Daniel tan Apocalipsis.

11. Antoy labay ya ibaga na Daniel 2:43-45? (Nengnengen so litrato ed apis.)

¹¹ Basaen so Daniel 2:43-45. Indeskribe nen propeta Daniel so balbaleg ya imahen ya say nanduruman parte to et gawad nanduruman metal. Irerepresenta na kada parte so nanduruman gobierno ya nanuley ed saray bansa ya kawalaan na dakel a lingkor na Dios. Nanduruman panaon so impanuley na sarayan gobierno. Say sali na satan ya imahen et gawad balatyang ya alaokan na pitek. Irerepresenta na sali so sampot ya gobierno​—say alyansa na Britanya tan Amerika. Labay ton ibaga, manuuley ni so Britanya tan Amerika sano deralen na Panarian na Dios so amin ya gobierno na too.

12. Anto so irerepresenta na komapiton ulo na atap ya ayep, tan akin ya importante itan ya detalye?

¹² Indeskribe met nen apostol Juan so nanduruman gobierno ya manuley ed saray bansa ya kawalaan na dakel ya lingkor nen Jehova. Diad propesiya nen Juan, sarayan gobierno et isisimbolo na atap ya ayep ya pitoray ulo to. Say komapiton ulo na sayan atap ya ayep et irerepresenta toy alyansa na Britanya tan Amerika. Importante iyan detalye ta anggapo lay ontubon komawalon ulo. Manuuley ni iyan komapiton ulo sano pateyen nen Kristo tan saray armada to ed tawen iyan atap ya ayep. *​—Apo. 13:1, 2; 17:13, 14.

13-14. Siopa si “Gog ed dalin na Magog,” tan akin ya iplano ton atakien iray lingkor na Dios?

¹³ Walay propesiya ed Ezequiel ya makatulong  pian mas natalosan tayo no antoy nagawa antis ya naderal so ari na amianen tan ari na abalaten. Ompapaway ya parepareho so tutukoyen na saray propesiya ya walad Ezequiel 38:10-23; Daniel 2:43-45; 11:44–12:1; tan Apocalipsis 16:13-16, 21. No ontan sirin, nia ray talaranan tayon nagawa.

¹⁴ No baleg a kairapan la, mankokomplot iray “arari na interon dalin” tan manbuo ira na alyansa. (Apo. 16:13, 14; 19:19) Satan ya alyansa et atawag ed Biblia ya “Gog ed dalin na Magog.” (Eze. 38:2) Atakien da iray lingkor na Dios ta labay da ran upoten. Antoy rason? Diad samay propesiya nen apostol Juan nipaakar ed sayan panaon, anengneng to ya onuran na angkakabaleg ya kristal ed saray kalaban na Dios. Isisimbolo na sarayan angkakabaleg ya uran a kristal so ambelat ya mensahe na panangukom ya ipulong na saray Tasi nen Jehova. Posiblin onsyodot ed satan ya mensahe so Gog na Magog kanian iplano ton upoten so amin ya lingkor na Dios.​—Apo. 16:21.

15-16. (a) Antoy posiblin tutukoyen na samay nabasa ed Daniel 11:44, 45? (b) Antoy nagawa ed ari na amianen tan arum nin bansa ya kabiangan na Gog na Magog?

¹⁵ Sayan ambelat ya mensahe na panangukom tan sampot ya iyataki na saray kalaban na Dios et nayarin sikato met imay adeskribe ed Daniel 11:44, 45. (Basaen.) Ditan et imbaga nen Daniel ya say ari na amianen et “napagaan ed saray balita ed bukig tan amianen” tan “sikatoy ompaway a walaay baleg a sanok.” Lapud satan et iplano to ya ‘upoten tan deralen so dakerakel.’ Nayarin say tutukoyen na “dakerakel” dia et saray lingkor nen Jehova. * Posible ya say dedeskribien dia nen Daniel et say sampot ya pangataki ed saray lingkor na Dios.

¹⁶ Sano say ari na amianen tan arum nin gobierno et atakien da la iray lingkor na Dios, onsanok so Makapanyarin-amin, tan onggapo la so guerra na Armagedon. (Apo. 16:14, 16) Diad satan ya panaon, deralen nen Jehova so  ari na amianen tan saray arum nin bansa ya kabiangan na Gog na Magog, tan “anggapoy ontulong” ed sikara.​—Dan. 11:45.

17. Siopa si Miguel ya abitla ed Daniel 12:1? Antoy gagawaen to natan, tan antoy gawaen to ed arapen?

¹⁷ Basaen so Daniel 12:1. Nabasa dia so arum nin detalye no panon ya naderal so ari na amianen tan saray kaalyado to, tan no panon itayon niliktar. Antoy labay ya ibaga na sayan bersikulo? Say Miguel et sananey a ngaran nen Kristo-Jesus. Sikatoy “akaalagey” la parad saray lingkor na Dios manlapu la nen 1914 sanen sikatoy nagmaliw ya ari na Panarian na Dios diad tawen. Sikatoy magano lan “ontalindeg” pian deralen iray kalaban to diad guerra na Armagedon. Satan ya guerra so sampot ya nagawa ed samay imbaga nen Daniel ya sankagrabian ya “panaon na gonigon.” Diad propesiya nen Juan ya walad Apocalipsis, sayan panaon et atawag ya “baleg a kairapan.”​—Apo. 6:2; 7:14.

18. Akin ya agtayo nepeg ya pampagaan iray nagawa ed arapen?

¹⁸ Agtayo nepeg ya pampagaan iray nagawa ed arapen ta parehon imbaga nen Daniel tan Juan ya saray manlilingkor ed si Jehova tan Jesus et makaliktar ed sayan sankagrabian ya panaon na gonigon. Imbaga nen Daniel ya saray makaliktar et saramay say ngaran da et ‘akasulat ed libro na Dios.’ (Dan. 12:1) Antoy gawaen tayo pian nisulat so ngaran tayo ed satan a libro? Kaukolan ya ipanengneng tayod kabibilay tayo ya walay pananisia tayo ed si Jesus, say Kordero na Dios. (Juan 1:29) Importante met ya idedika tayoy sarili tayo ed Dios tan manpabautismo tayo. (1 Ped. 3:21) Tan suportaan tayo so Panarian na Dios diad panggawa tayo ed anggaay nayarian tayo ya tulongan so arum pian nakabat day Jehova.

19. Antoy nepeg tayo lan gawaen natan, tan akin?

¹⁹ Natan la sirin so panaon pian pabiskegen tayoy katooran tan panagmatalek tayod si Jehova tan ed organisasyon to. Natan met la so panaon pian suportaan tayoy Panarian na Dios. No oniay gawaen tayo, seguradon makaliktar tayo no deralen la na Panarian na Dios so ari na amianen tan ari na abalaten.