1-2. Waut woa wie ons en disen Artikjel unjastonen?

NOCH kjeenmol ea haud wie soo väl Bewies aus nu, daut wie gaunz aum Enj von de latste Tiet läwen. Jehova un Jesus Christus woaren boolt aule Rejierungen oppriemen, waut jäajen daut Kjennichrikj sent. Oba ea daut bat doa es, woaren de Kjennich vom Nuaden un de Kjennich vom Sieden nich opphieren, unjarenaunda to kjamfen un uk jäajen Gott siene Deena.

² En disen Artikjel woa wie ons de Profezeiunk ut Daniel 11:40 bat 12:1 unjastonen. Wie woaren seenen, wäa nu de Kjennich vom Nuaden es un wuarom wie nich brucken Angst haben fa de schwoare Tiet, waut noch kjemt.

3-4. Wäa es de frescha Kjennich vom Nuaden? Laj daut ut.

³ Vonne 1991 aun jeef et de Sowjetunion nich mea un fa een Stoot hauden Gott siene Deena doa mea Frieheit. Doawäajen sajcht daut en Daniel, daut dee “een bät Help” kjrieejen (Dan. 11:34, NW). Dee kunnen gaunz frie prädjen un boolt jeef daut en de Lenda, waut ea to de Sowjetunion jehieeden, een poa hundatdusent Vekjindja. Oba een poa Joa lota worden dan Russlaunt un siene Poatna de frescha Kjennich vom Nuaden. En dän väajen Artikjel hab wie jeseenen, daut soone Rejierungen, waut de Kjennich vom Nuaden ooda de Kjennich vom Sieden sent, emma dreeatlei doonen. Ieeschtens haben dee väl met Gott sien Volkj to doonen un tweedens bewiesen dee daut met äare Woakjen, daut see Jehova un dän sien Volkj schlajcht lieden kjennen, un dreddens  wellen dise Kjennichs emma eena dän aundren jewennen.

⁴ Woo weet wie, daut vondoag dän Dach Russlaunt un siene Poatna de Kjennich vom Nuaden sent? Ieeschtens haben dee väl met Gott sien Volkj to doonen, wiels dee ons Prädichtwoakj veboden haben un uk aule Breeda un Sestren doa vefoljen. Tweedens bewiesen dee doaderch, daut see Jehova un dän sien Volkj schlajcht lieden kjennen. Un dreddens wellen dee emma dän Kjennich vom Sieden jewennen, waut de Weltmacht Enjlaunt un Stäts es. Well wie nu mol eenjet seenen, waut Russlaunt un siene Poatna jedonen haben un woo daut bewiest, daut dee de Kjennich vom Nuaden sent.

5. Von woone Tiet rät Daniel 11:40-43, un waut passieet doa?

⁵ Läs Daniel 11:40-43. Dise Varzh haundlen sikj von de Enjtiet. Doa rät daut doavon, daut de Kjennich vom Nuaden un de Kjennich vom Sieden sikj unjarenaunda toosaten wudden. Soo aus Daniel verutsäd, wudd de Kjennich vom Sieden en de Enjtiet “jäajen . . . [dän Kjennich vom Nuaden] kjriejen”, ooda kjamfen (Dan. 11:40).

6. Aun waut es daut to seenen, daut de beid Kjennichs emma unjarenaunda kjamfen?

⁶ De Kjennich vom Nuaden un de Kjennich vom Sieden kjamfen unjarenaunda, wäajen dee beid daut stoakjste sennen wellen. No dän Tweeden Weltkjrich biejlikj hauden de Sowjetunion un äare Poatna een grootet Poat von Europa en äare Macht. Doawäajen stald de Kjennich vom Sieden met aundre Lenda toop eene Organisazion opp, waut NATO heet, soo daut äare Soldoten sikj wudden toopstonen jäajen dän Kjennich vom Nuaden. Un de beid Kjennichs brucken uk wieda väl Jelt, wäajen beid de stoakjste Soldoten un daut baste Kjrichsjereetschoft haben wellen. Un wan daut en Afrika, Asien un Latien-Amerika Kjrich jeef, dan stunt de Kjennich vom Nuaden deejanje bie, waut jäajen dän Kjennich vom Sieden wieren, un de Kjennich vom Sieden dee, waut jäajen dän Kjennich vom Nuaden wieren. En de latste Joaren haben Russlaunt un siene Poatna väl Macht jekjräajen un brucken dee aulawäajen oppe Welt. Un beid Kjennichs brucken mau rajcht Komputasch, om sikj unjarenaunda tootosaten. Dee schmieten sikj omzajcht väa, daut dee jefäadelje Komputa-Programs brucken, daut de aundra väl Jelt vespält un daut dän siene Rejierunk Schoden kjricht. Daniel säd uk verut, daut de Kjennich vom Nuaden wieda jäajen Gott siene Deena gonen wudd (Dan. 11:41).

7. Waut es “daut straume Launt”?

⁷ Daniel 11:41 sajcht, daut de Kjennich vom Nuaden “en daut straume Launt” nenkomen wudd. Waut fa een Launt es daut? En de Bibeltiet tald Israel aus “schmocka aus aundre Lenda” (Hes. 20:6). Dit Launt tieekjend ut, wäajen de Menschen doa Jehova deenden. Von Pinjsten 33 n. Chr. aun es dit “Launt” nich werkjlich eene Städ oppe Ieed, wäajen Gott siene Deena sent je aulawäajen oppe Welt. Vondoag dän Dach es “daut straume Launt” daut jeistelje Paradies, wua wie Jehova biejlikj en de Toopkomes un em Prädichtdeenst deenen.

8. Woo kjeem de Kjennich vom Nuaden “en daut straume Launt nenn”?

⁸ En de Enjtiet kjeem de Kjennich vom Nuaden emma wada “en daut straume  Launt nenn”. Woo deed dee daut? Aus biejlikj en de Nazi-Tiet Dietschlaunt de Kjennich vom Nuaden wia, worden Gott siene Deena doa vefolcht un dootjemoakt, besonda en de Tiet von dän Tweeden Weltkjrich. No dän Tweeden Weltkjrich wort dan de Sowjetunion de Kjennich vom Nuaden un kjeem en “daut straume Launt nenn”, aus dee Gott siene Deena vefoljd un dee bemust, wiet fuattotrakjen.

9. Woo kjeemen Russlaunt un siene Poatna en de latste Joaren “en daut straume Launt nenn”?

⁹ Nu sent Russlaunt un siene Poatna de Kjennich vom Nuaden. Woo kjeemen dee en de latste Joaren “en daut straume Launt nenn”? Aune 2017 deeden dee ons Woakj vebeeden un stopten eenje Breeda un Sestren en. Dee deeden uk onse Bieekja vebeeden un uk de Neue-Welt-Übersetzung. Un dee neemen ons doa daut Betel fuat un uk eenje Vesaumlungshiesa un Kongresshiesa. Wäajen aul daut säd de Väastaunt von Jehova siene Zeijen dan aune 2018, daut Russlaunt un siene Poatna de Kjennich vom Nuaden wieren. Jehova siene Zeijen woaren eenjemol sea vefolcht. Oba nich mol dan schaufen dee jäajen de Rejierunk ooda proowen, eene fresche Rejierunk opptostalen. Enne Städ daut jehorchen dee de Schreft un bäden fa “aule dee huach aunjestalt sent”, besonda wan de Rejierungen entscheiden, aus eena Gott frie deenen kaun ooda nich (1. Tim. 2:1-2).

10. Woat de Kjennich vom Nuaden dän Kjennich vom Sieden jewennen? Laj daut ut.

¹⁰ De Profezeiunk en Daniel 11:40-45 rät mieeschtens von daut, waut de Kjennich vom Nuaden deit. Bediet daut dan, daut dee dän Kjennich vom Sieden jewennen woat? Nä. De Kjennich vom Sieden woat noch emma “läwendich” sennen, wan Jehova un Jesus em Kjrich von Harmagedon aule menschelje Rejierungen venichten (Opb. 19:20). Woo weet wie daut? Daut woa wie seenen, wan wie aundre Profezeiungen en Daniel un en de Openboarunk unjasieekjen.

11. Waut jeft Daniel 2:43-45 auntovestonen? (See daut Bilt oppe väaschte Sied.)

¹¹ Läs Daniel 2:43-45. De Profeet Daniel rät von eene groote Jestault. De veschiedne Poat von dee stalen veschiedne Rejierungen väa, waut väl met Gott sien Volkj to doonen haben. De Feet un Teeen von de Jestault sent von Iesa un von jebrenden Leem jemoakt un stalen de latste von dise Rejierungen väa. Daut es de Weltmacht Enjlaunt un Stäts. Dise Profezeiunk jeft auntovestonen, daut dise Weltmacht noch rejieren woat, wan Gott sien Kjennichrikj met aule menschelje Rejierungen een Enj moaken woat.

12. Waut stalt de säwenda Kopp von daut wille Tia väa, un wuarom es daut oppfaulent?

¹² De Apostel Johanes räd uk von veschiedne Weltmachten, waut väl met Gott siene Deena to doonen hauden. Hee vejlikjt dee en siene Profezeiunk met een willet Tia, waut säwen Kjap haft. De säwenda Kopp von daut wille Tia stalt de Weltmacht Enjlaunt un Stäts väa. Un daut es oppfaulent, daut de Schreft nich sajcht, daut dit wille Tia lota noch mea Kjap kjrieen woat. De säwenda Kopp woat noch rejieren, wan Christus met siene himlische Armee toop komen woat, om dän met daut äwaje Tia toop to venichten (Opb. 13:1-2; 17:13-14). *

13-14. Wäa es “Gog . . . en daut Launt Magog”, un waut brinjt dän woomäajlich bat doa, jäajen Gott siene Deena to komen?

¹³ Hesekiel schreef eene Profezeiunk opp, waut ons wiest, woo daut woomäajlich sennen woat, ea de Kjennich vom Nuaden un de Kjennich vom Sieden venicht woaren. Daut späat sikj soo, daut Hesekiel 38:10-23 un Daniel 2:43-45 un 11:44 bat 12:1 un Openboarunk 16:13-16, 21 von dautselwje räden. Well wie mol seenen, waut no dise Varzh no aules passieren saul.

¹⁴ Nodäm daut de groote Triebsaul aunjefongen haft, woaren de Velkja, ooda “Kjennichs opp de Ieed”, sikj toopstonen (Opb. 16:13-14; 19:19). De Schreft nant dise Velkja “Gog . . . en daut Launt Magog” (Hes. 38:2). Dee woaren toop jäajen Gott siene Deena kjamfen un vesieekjen, dee uttoroden. Wuarom woaren dee daut doonen? En eene Profezeiunk äwa dise Tiet säd de Apostel Johanes, daut opp Gott siene Fiend sea groote Hoagelbieta raufkomen wudden. Woomäajlich sent dise Hoagelbieta een Jlikjnis fa de strenje Jerechtsbootschoft, waut Gott siene Deena bekauntmoaken woaren. Veleicht woat Gog von Magog sikj wäajen dise Jerechtsbootschoft eenich, daut dee jäajen Gott siene Deena komen well un dee aula venichten (Opb. 16:21).

15-16. (a) Von waut rät daut en Daniel 11:44-45 woomäajlich? (b) Woo woat daut met dän Kjennich vom Nuaden un met de aundre Velkja utkomen, waut uk to Gog von Magog jehieren?

¹⁵ Woomäajlich rät daut en Daniel 11:44-45 uk von dise strenje Jerechtsbootschoft un von de Tiet, wua Gott siene Fiend toom latste Mol jäajen siene Deena komen woaren (läs). Daniel sajcht je, daut “Norecht vom Oosten un Nuaden” komen woat, waut dän Kjennich vom Nuaden soo väl toosat, daut dee “schrakjlich omhäa gonen” woat. De Kjennich vom Nuaden woat dan wellen “väle Doodes veuasoaken”, woomäajlich mank Jehova siene Deena. * Daut es goot mäajlich, daut  Daniel hia von dee Tiet rät, wua Gott siene Fiend siene Deena gaunz utroden wellen.

¹⁶ Wan de Kjennich vom Nuaden met de aundre Rejierungen toop jäajen Gott siene Deena kjemt, dan woat de aulmajchtja Gott sea doll woaren un de Kjrich von Harmagedon woat aunfangen (Opb. 16:14, 16). Dan woat de Kjennich vom Nuaden toop met de aundre Velkja, waut uk to Gog von Magog jehieren, venicht woaren “un kjeena woat am halpen” (Dan. 11:45).

17. Wäa es “Michael, de groota Schutzenjel”, wua Daniel 12:1 von rät, un waut deit dee aules?

¹⁷ Fuaz de näakjsta Varsch en daut Buak Daniel sajcht ons noch mea doaräwa, woo de Kjennich vom Nuaden un de aundre Rejierungen woaren venicht woaren un woo wie woaren jerat woaren (läs Daniel 12:1). Waut bediet dis Varsch? Michael es een aundra Nomen fa onsen Kjennich Jesus Christus, waut aul harscht. Sien Kjennichrikj wort aune 1914 em Himmel oppjestalt un von doa aun es hee “de groota Schutzenjel, dee äwa . . . [Gott sien] Volkj steit”. Boolt woat hee “sikj bewiesen”, wan hee siene Fiend en dän Kjrich von Harmagedon venichten woat. Met disen Kjrich woat de “Noot . . . aus noch nienich ea”, wua Daniel von rät, to Enj gonen. Un en de Openboarunk nand Johanes dise Tiet de “groote Triebsaul” (Opb. 6:2; 7:14, Reimerbibel).

18. Wuarom bruck wie nich Angst haben?

¹⁸ Wie brucken nich Angst haben, wiels Daniel un Johanes beid doavon räden, daut Jehova un Jesus äare Deena en de groote Triebsaul raden woaren. Daniel sajcht je, daut soone äwaläwen woaren, dee äa “Nomen em Buak jefungen woat” (Dan. 12:1). Waut mott eena doonen, daut eenem sien Nomen doa nenkjemt? Eena mott bewiesen, daut eena aun Jesus jleeft, waut Gott sien Laum es (Joh. 1:29). Un eena mott sikj Gott hanjäwen un sikj deepen loten (1. Pet. 3:21). Un eena mott uk Gott sien Kjennichrikj doaderch unjastetten, daut eena aundre halpt, Jehova kjanen to lieren.

19. Waut sell wie nu doonen, un wuarom?

¹⁹ Wie motten nu doaropp schaufen, daut wie noch dolla opp Jehova vetruen un opp siene Organisazion. Un wie motten Gott sien Kjennichrikj nu aul unjastetten. Wan wie daut doonen, dan woa wie jerat woaren, wan Gott sien Kjennichrikj dän Kjennich vom Nuaden un dän Kjennich vom Sieden venichten woat.