1-2. Wanem nao bae iumi storyim lo disfala study?

WINIM enitaem bifor, iumi garem staka pruv wea showimaot iumi stap lo end blo olketa last day blo disfala world. Klosap nao, Jehovah and Jesus Christ bae finisim evri gavman wea faet againstim Kingdom blo God. Bifor datwan happen, king blo north and king blo south bae gohed faet againstim each other and againstim pipol blo God.

² Lo disfala study, iumi bae storyim profesi lo Daniel 11:40–12:1. Iumi bae lukim hu nao king blo north distaem, and bae iumi storyim why iumi barava sure dat iumi bae no fraet taem iumi feisim olketa challenge wea bae kamap.

3-4. Hu nao kamap king blo north? Explainim.

³ Bihaen Soviet Union lusim paoa lo 1991, pipol blo God wea bin stap anda lo rul blo Soviet Union olketa kamap free for samfala taem. Daniel kolem datwan “lelebet help.” (Daniel 11:34) From diswan, olketa free for preach and no longtaem nomoa, namba blo olketa pablisa lo olketa kantri wea bin part lo Soviet Union kasem staka handred thousand. Gogo, Russia and olketa kantri wea sapotim hem nao kamap king blo north. Olsem iumi storyim lo study bifor diswan, for wanfala gavman kamap king blo north or king blo south, hem mas duim thrifala samting: (1) bae hem duim samting wea barava affectim pipol blo God, (2) wanem hem duim showimaot hem enemy blo Jehovah and olketa pipol blo hem, and (3) tufala king hia bae compete for paoa.

 ⁴ Lukim olketa reason why iumi savve sei Russia and olketa wea sapotim hem nao king blo north distaem. (1) Olketa duim samting wea barava affectim pipol blo God, olketa banim preaching waka and persecutim staka handred thousand brata and sista wea stap lo olketa ples wea olketa rulim. (2) Olketa samting hia wea olketa duim showimaot olketa heitim Jehovah and pipol blo hem. (3) Olketa gohed for compete witim king blo south, wea hem England-America World Paoa. Bae iumi lukim wanem Russia and olketa wea sapotim hem duim wea pruvim olketa nao king blo north.

5. Daniel 11:40-43 hem story abaotem wanem taem, and wat nao bae happen lo datfala taem?

⁵ Readim Daniel 11:40-43 lo footnote. * Disfala part lo profesi storyim olketa samting wea bae happen lo taem blo end. Disfala profesi storyim hao king blo north and king blo south bae compete witim each other. Olsem Daniel profesi abaotem, lo taem blo end, king blo south and king blo north, “tufala bae againstim each other.”—Dan. 11:40, NW.

6. Wanem pruv nao showimaot tufala king hia gohed for againstim each other?

⁶ King blo north and king blo south gohed for compete for kasem big paoa ovarem full world. Olsem example, tingim samting wea happen bihaen lo World War II, Soviet Union and olketa wea sapotim hem tekovarem staka part lo Europe. Samting wea king blo north duim hem mekem king blo south for mas mekem agreement witim olketa nara kantri for startim wanfala international military organization wea olketa kolem NATO. King blo north gohed for compete witim king blo south lo wei for spendem staka selen for wakem olketa samting for faet. Tufala king hia faet againstim each other, taem tufala bihaenem and sapotim tu olketa war wea kamap midolwan lo olketa enemy blo each other lo Africa, Asia, and Latin America. Lo olketa year wea just go pas, Russia and olketa wea sapotim hem garem big paoa evriwea lo world. And tu, olketa attakim king blo south lo wei for iusim cyber warfare. Olketa king hia accusim each other lo wei for iusim olketa computer program for spoelem economy and gavman blo each other. And olsem Daniel talem, king blo north gohed for attakim pipol blo God.—Dan. 11:41, NW.

7. Wanem nao datfala “land wea Luk Naes”?

⁷ Daniel 11:41 sei king blo north bae go insaed lo datfala “land wea Luk Naes.” Wanem nao datwan minim? Lo bifor, hem minim datfala land blo Israel wea barava luk naes tumas winim eni nara land. (Esikiel 20:6) Samting wea mekem datfala land for barava spesol hem bikos tru worship stap lo there. Start lo Pentecost 33 C.E., datfala “land” hem no minim wanfala ples nomoa lo earth, bikos distaem pipol blo Jehovah stap evriwea lo earth. Bat, distaem datfala “land wea Luk Naes” hem minim waka wea pipol blo Jehovah duim, olsem for worshipim Jehovah lo olketa meeting and for duim preaching waka.

8. Hao nao king blo north go insaed datfala “land wea Luk Naes”?

⁸ Lo olketa last day, staka taem nao king blo north go insaed datfala “land wea Luk Naes.” Olsem example, taem Nazi Germany kamap  king blo north, especially lo taem blo World War II, datfala king go insaed lo datfala “land wea Luk Naes” taem hem persecutim and killim pipol blo God. Then bihaen World War II taem Soviet Union kamap king blo north, hem go insaed datfala “land wea Luk Naes” taem hem persecutim pipol blo God and sendem olketa olsem prisoner lo nara ples.

9. Lo olketa year wea just go pas, hao nao Russia and olketa wea sapotim hem go insaed “land wea Luk Naes”?

⁹ Lo olketa year wea just go pas, Russia and olketa wea sapotim hem tu go insaed datfala “land wea Luk Naes.” Lo wanem wei? Lo 2017, disfala king blo north distaem banim waka blo pipol blo Jehovah and putim samfala brata and sista lo prison. Hem banim tu olketa pablikeson, and New World Translation. And tu, hem tekem branch office lo Russia and olketa Kingdom Hall and Assembly Hall. Bihaen datwan happen, lo 2018 Governing Body sei Russia and olketa wea sapotim hem nao king blo north. Bat, pipol blo Jehovah bae no againstim or trae for changem eni gavman, nomata sapos datfala gavman persecutim olketa. Bat, olketa followim wanem Bible talem for prea for “olketa king and olketa bigman” especially taem olketa gavman bae mekem olketa disison wea bae affectim wei wea pipol blo God free for worship.—1 Tim. 2:1, 2.

10. Waswe, king blo north bae winim king blo south? Explainim.

¹⁰ Main samting wea profesi lo Daniel 11:40-45 story abaotem hem olketa samting wea king blo north duim. Waswe, datwan minim hem bae winim king blo south? Nomoa. Datfala king blo south bae still “laef yet” taem Jehovah and Jesus finisim evri gavman blo man lo war blo Armageddon. (Rev. 19:20) Why nao iumi barava trustim datwan? Tingim samting wea olketa profesi blo Daniel and Revelation storyim.

11. Wanem nao Daniel 2:43-45 hem minim? (Lukim piksa lo kava.)

¹¹ Readim Daniel 2:43 lo footnote * and verse 44, 45 lo Bible. Profet Daniel storyim olketa gavman blo man wea rul blo olketa hem affectim pipol blo God. Hem storyim olketa gavman hia olsem didifren part blo wanfala big maeti image. Last gavman lo datfala profesi hem nao feet blo datfala image wea hem iron wea mix witim clay. Datfala feet piksarem England-America World Paoa. So datfala profesi showimaot England-America World Paoa bae still rul taem Kingdom blo God finisim evri gavman blo man.

12. Wanem nao mek-seven hed blo datfala wild animal hem piksarem, and why nao hem important for iumi savve lo datwan?

¹² Aposol John tu storyim olketa world paoa wea rul blo olketa affectim pipol blo Jehovah. John storyim olketa gavman hia olsem wanfala wild animal wea garem sevenfala hed. Mek-seven hed blo datfala animal hem piksarem England-America World Paoa. Important samting abaotem diswan nao, bae no eni nara hed moa kamap. Mek-seven hed blo disfala animal bae still rul taem Christ and army blo hem lo heven bae distroem hem witim datfala full wild animal. *—Rev. 13:1, 2; 17:13, 14.

13-14. Hu nao ‘Gog from land blo Magog,’ and wat nao maet mekem hem for attakim pipol blo God?

¹³ Wanfala profesi wea Ezekiel raetem hem helpem iumi for savve lo wanem maet happen lo olketa last day blo king blo north and king blo south. Luk olsem datfala profesi blo Esikiel 38:10-23; Daniel 2:43-45; 11:44–12:1; and Revelation 16:13-16, 21 hem storyim sem samting, and sapos datwan hem tru, diswan nao wanem iumi expectim for happen.

¹⁴ No longtaem bihaen bigfala trabol start, “olketa king evriwea long earth” bae join tugeta olsem wanfala grup blo olketa nation. (Rev. 16:13, 14; 19:19) Bible kolem datfala grup blo olketa nation, ‘Gog from land blo Magog.’ (Esikiel 38:2) Datfala grup blo olketa nation bae mekem wanfala last attak for finisim pipol blo God. Wat nao bae mekem hem duim datwan? Lo wanfala profesi abaotem datfala taem, aposol John lukim olketa bigfala hail ston foldaon kam lo olketa enemy blo God. Datfala hail ston hem piksarem wanfala strong judgment message wea pipol blo Jehovah bae talemaot. Luk olsem datfala message nao bae mekem Gog blo Magog for attakim pipol blo God witim disfala tingting for finisim olketa from disfala earth.—Rev. 16:21.

15-16. (a) Wanem samting nao maet Daniel 11:44, 45 storyim? (b) Wat nao bae happen lo king blo north and datfala Gog blo Magog?

¹⁵ Datfala strong message and datfala last attak wea olketa enemy blo God bae duim maet hem olketa sem samting wea Daniel 11:44 storyim. (Readim.) Daniel sei ‘wanfala nius hem kam from east and from north’ wea bae mekem datfala king for kros tumas. Datfala king blo north bae laek for ‘killim dae plande pipol.’ Luk olsem datfala toktok “plande pipol” hem minim pipol blo Jehovah. * So Daniel maet story abaotem datfala last attak againstim pipol blo God.

¹⁶ Datfala attak wea king blo north witim evri gavman lo world duim, bae mekem Olmaeti God for barava kros and then war blo Armageddon bae start. (Rev. 16:14, 16) Lo  datfala taem, king blo north and evri nation wea join tugeta for kamap Gog blo Magog bae finis, and “no eniwan bae helpem hem.”—Dan. 11:45, NW.

17. Hu nao Michael wea Daniel 12:1 storyim, and wanem nao bae hem duim?

¹⁷ Lo next verse Daniel storyim samfala information moa abaotem hao king blo north and olketa wea sapotim hem bae finis, and hao iumi bae sev. (Readim Daniel 12:1.) Wat nao disfala verse hem minim? Michael hem nara nem blo King blo iumi Jesus Christ wea rul distaem. Hem bin “lukaftarem” pipol blo God start kam lo 1914 taem Kingdom blo hem start lo heven. Klosap nao, bae hem duim samting for distroem olketa enemy blo hem lo war blo Armageddon. Datfala war bae kamap lo end blo taem wea Daniel hem kolem lo ‘taem blo trabol’ wea barava nogud tumas winim eni nara taem. Lo Revelation, John kolem datfala taem wea lead go lo Armageddon, “datfala big trabol.”—Rev. 6:2; 7:14.

18. Nomata wanem nao bae happen lo future, why nao iumi no need for fraet?

¹⁸ Daniel and John sei Jehovah and Jesus bae sevem olketa servant blo tufala lo taem blo big trabol, so iumi no need for fraet nomata wanem bae happen lo future. Daniel sei olketa wea nem blo olketa ‘stap insaed lo datfala buk’ bae sev. (Daniel 12:1) Wanem nao iumi savve duim mekem nem blo iumi stap insaed datfala buk? Iumi mas duim samting for showimaot iumi garem faith lo Jesus, datfala Pikinini Sheepsheep blo God. (John 1:29) Iumi need for baptaes for showimaot iumi dedicate lo God. (1 Pet. 3:21) And iumi mas showimaot iumi sapotim Kingdom blo God taem iumi duim wanem iumi fit for duim for helpem olketa narawan for lane abaotem Jehovah.

19. Wanem nao iumi shud duim distaem, and why nao olsem?

¹⁹ Distaem nao hem taem for strongim trust wea iumi garem lo Jehovah and olketa faithful servant lo organization blo hem. Distaem nao hem taem for sapotim Kingdom blo God. Sapos iumi duim datwan, bae iumi sev taem Kingdom blo God hem finisim king blo north and king blo south.