1-2. Со ка дикха ки акаја статија?

АВДИВЕ иси амен повише доказија таро било кеда англедер кај живинаја ко крајо таро последна диве акале светоскере. Панда хари о Јехова хем о Исус Христос ка уништинен са о владе кола со противинена пе е Царствоске. Ама, англедер те случинел пе адава, о северно хем о јужно цари понадари да ка боринен пе јекх јекхеа хем против е Девлескоро народо.

² Ки акаја статија ка дикха о пророштво сој пишимо ко Даниел 11:40 — 12:1. Ка дикха кој тано о северно цари авдиве, хем соске шај те ачхова смириме хем те овел амен доверба кај, бизи разлика со ка случинел пе, о Јехова ка спасинел амен.

3-4. Кој тано о северно цари авдиве? Објаснин.

³ Откеда пело о Советско Сојуз ко 1991 берш, е Девлескоро народо со сине тели лескири власт несаво време сине слободно. О Даниел опишинела адаја слобода сар „тикни помош“ (Дан. 11:34). Несаво време о пхраља шај сине слободно те проповединен, хем башо кратко време о број е објавителенгоро уло бут побаро ко пхувја кола со сине дело таро Советско Сојуз. Ама, башо некобор берш, и Русија хем лакере сојузникија уле о северно цари. Сар со дикхлем ки англуни статија, ваљанена трин буќа те шај јекх влада те овел северно или јужно цари: 1) мора те овел ла директно влијание упро е Девлескере слуге, 2) пле постапкенцар  мора те сикавел кај тани душмани е Јеховаске хем лескере народоске, хем 3) мора те боринел пе баши власт е противничко цареа.

⁴ Иси некобор причине соске шај те вакера кај авдиве и Русија хем лакере сојузникија тане о северно цари. 1) Ола директно влијајнѓе упро е Девлескоро народо аѓаар со забранинѓе и проповедничко активност хем почминѓе те прогонинен е пхрален хем е пхењен со живинена ко адала подрачја. 2) Адале постапкенцар сикавена кај мрзинена е Јехова хем лескере народо. 3) И Русија хем лакере сојузникија пробинена те овен бут посилна таро јужно цари, и англо-американско светско сила. Те дикха подетално о доказија со сикавена кај и Русија хем лакере сојузникија тане о северно цари.

5. Башо кова периоди керела пе лафи ко Даниел 11:40-43, хем со случинела пе тегани?

⁵ Читин Даниел 11:40-43. Акава дело таро пророштво керела лафи башо време е крајоскоро. Акала стихија опишинена сар о северно хем о јужно цари боринена пе јекх јекхеа. О Даниел пророкујнѓа кај ко последна диве о јужно цари ка противинел пе е северно цареске, јавере лафенцар „ка гуринел пе“ леа (Дан. 11:40).

6. Саве доказија иси амен кај о солдуј царија „гуринена пе“ јекх јекхеа?

⁶ О северно хем о јужно цари понадари да боринена пе машкар песте адалеске со секој лендар мангела те овел и најмоќно влада ко свето. На пример, размислин со случинѓа пе пали Дујто светско војна, кеда о Советско Сојуз хем лескере сојузникија почминѓе те влијајнен ко побаро дело тари Европа. Адалеа, о северно цари чхивѓа е јужно царе те керел е јавере пхувјенцар јекх воено сојуз, пенџардо сар НАТО. О северно хем о јужно цари понадари да трошинена бут паре те шај те овел лен и најмоќно војска. Освен адава, о северно цари боринела пе сине пле противникоја аѓаар со поддржинела сине војне хем бунтија ко територие таро несаве пхувја ки Африка, Азија хем Јужно Америка. Ко последна некобор берша, и Русија хем лакере сојузникија ширинѓе пли моќ ко цело свето. Исто аѓаар, о северно цари боринела пе пле противникоја преку компјутерска нападија. О солдуј царија кривинена пе јекх јекхеа кај користинена опасна компјутерска програме те шај те керен песке штета ко економско хем политичко поглед. Хем, сар со пророкујнѓа о Даниел, о северно цари понадари да нападинела е Девлескере народо (Дан. 11:41).

7. Сој тани и „Шужи пхув“?

⁷ Ко Даниел 11:41 пишинела кај о северно цари ка кхувел ки „Шужи пхув“. Со претставинела ој? Ко библиска времија, адаја сине и израелско пхув, баши која со мислинела пе сине кај тани „најшужи таро са о пхувја“ (Езек. 20:6). Ој сине посебно адалеске со о народо кова со живинела сине ки лате служинела сине е чачутне Девлеске, е Јеховаске. Таро 33 берш а.е., адаја „пхув“ нане више несаво посебно тхан ки Пхув. Акава тано логично адалеске со е Јеховаскере слуге живинена ки цели Пхув. Авдиве „и Шужи пхув“ тани о духовно рај коте сој вклучиме амаре состанокија хем о проповедибе преку кола со славинаја е Јехова.

8. Сар кхувела сине о северно цари ки „Шужи пхув“?

⁸ Џикоте трајнена о последна диве, о северно цари бут пути кхувѓа ки „Шужи пхув“.  На пример, кеда и нацистичко Германија сине о северно цари, посебно ки Дујто светско војна, адава цари кхувѓа ки „Шужи пхув“ аѓаар со прогонинѓа хем мударѓа е Девлескере слуген. Пали Дујто светско војна, кеда о Советско Сојуз уло северно цари, ов да кхувѓа ки „Шужи пхув“ аѓаар со прогонинела сине е Девлескере народо хем силаја палдинѓа лен дур таро ленгере кхера.

9. Сар и Русија хем лакере сојузникија кхувѓе ки „Шужи пхув“ ко последна берша?

⁹ Ко последна берша, и Русија хем лакере сојузникија исто аѓаар кхувѓе ки „Шужи пхув“. Сар? Ко 2017 берш, и Русија забранинѓа и активност е Јеховаскере народоскири хем чхивѓа ко затвор несавен таро амаре пхраља хем пхења. Освен адава, забранинѓа амаре публикацие, машкар кола сој хем о Превод Нов свет. Исто аѓаар, леља амендар амари подружница ки Русија хем несаве амаре дворане хем конгресна сале. Пало са акала настанија, ко 2018 берш, о Водечко тело вакерѓа кај и Русија хем лакере сојузникија тане о северно цари. Сепак, чак кеда о властија прогонинена лен, е Јеховаскере слуге нане те боринен пе против нисави влада или те пробинен те менинен ла. Наместо адава, шунаја о совет тари Библија те молина амен „сариненге сој ки власт“, посебно ако несаве лендар ваљани те анен одлуке башо право слободно те служинел пе е Јеховаске (1. Тим. 2:1, 2).

10. Дали о северно цари ка уништинел е јужно царе? Објаснин.

¹⁰ О пророштво сој пишимо ко Даниел 11:40-45 повише керела лафи башо адава со ка керел о северно цари. Дали ов ка уништинел е јужно царе? На. О јужно цари панда ка овел „џивдо“, јавере лафенцар панда ка постојнел кеда о Јехова хем о Исус ка уништинен са е манушикане владен ки војна Армагедон (Отк. 19:20). Соске шај те ова сигурна ко акава? Те дикха со откринена о пророштвија сој пишиме ко лила Даниел хем Откровение.

11. Со сикавела о пророштво таро Даниел 2:43-45? (Дикх и слика тари насловно страна.)

¹¹ Читин Даниел 2:43-45. О пророко о Даниел опишинѓа јекх бут баро кипи каскере делија таро тело сине керде таро различна металија. Секова дело претставинела сине влада која со сине ла директно влијание упро е Девлескоро народо. Са адала владе владинѓе ко различна времија. О пре акале кипескере сине керде таро састрн хем глина. Ола претставинена и последно манушикани влада — и англо-американско светско сила. Акава пророштво сикавела кај и Британија хем и Америка панда ка овен ки власт кеда е Девлескоро Царство ка уништинел са о манушикане владе.

12. Со претставинела о ефтато шеро е ѕвероскоро, хем соске тано важно адава те џана?

¹² О апостол Јован исто аѓаар керела лафи башо некобор светска владе колен со сине влијание упро е Девлескоро народо. Ко лескоро пророштво, акала владе тане претставиме јекхе ѕвероја ефта шеренцар. О ефтато шеро претставинела е англо-американско светско сила. Акава тано важно соске ој тани о последно шеро таро ѕверо, пали лате на појавинела пе јавер шеро. О ефтато шеро акале ѕвероскоро панда ка овел светско сила кеда о Христос, заедно пле небесно војскаја, ка уништинел ла заедно са е јавере владенцар ко свето * (Отк. 13:1, 2; 17:13, 14).

13-14. Кој тано о „Гог тари пхув Магог“, хем со шај те анел џи ко адава те нападинел е Девлескере народо?

¹³ О Езекиел пишинѓа јекх пророштво кова со вакерела аменге со шај ка случинел пе англедер те овен уништиме о северно хем о јужно цари. Изгледа о пророштвија таро Езекиел 38:10-23; Даниел 2:43-45; 11:44 — 12:1 хем Откровение 16:13-16, 21 керена лафи башо исто временско периоди хем башо иста буќа. Ако тано аѓаар, тегани шај те аџикера кај ка случинен пе о буќа башо кола со ка кера лафи акана.

¹⁴ Несаво време откеда ка почминел и бари неволја, „о царија таро цело свето“ ка кхеден пе заедно, јавере лафенцар ка керен коалиција таро са о народија (Отк. 16:13, 14; 19:19). Ки Библија баши акаја коалиција вакерела пе „Гог тари пхув Магог“ (Езек. 38:2). Акаја коалиција ка нападинел е Девлескере народо хем ка пробинел те уништинел ле целосно. Со ка анел џи ко акава напад? Ки јекх визија башо адава време, о апостол Јован дикхља сар упро е Девлескере душмања перела бут бари кукудик. Акаја симболично кукудик шај ка овел пхаро хабери баши осуда кова со ка објавинел е Девлескоро народо. Шај акава хабери ка керел о Гог таро Магог те нападинел е Девлескере слуген те шај целосно те уништинел лен (Отк. 16:21).

15-16. а) Башо кола настанија шај керела пе лафи ко Даниел 11:44, 45? б) Со ка овел е северно цареа хем е јавере народонцар сој дело таро Гог таро Магог?

¹⁵ Акава пхаро хабери баши осуда хем о последно напад таро е Девлескере душмања шај тане о иста буќа башо кола со керела пе лафи ко Даниел 11:44, 45. (Читин.) Адатхе о Даниел вакерела кај „о хаберија таро исток хем таро север“ ка вознемиринен е северно царе кова со ка икљол „бут хољамо“ те шај „те мударел бутен“. Изгледа е лафеа „бутен“ мислинела пе ко е Девлескоро народо. * Шај о Даниел да керела лафи акате башо последно напад упро е Девлескере слуге.

¹⁶ О напад таро северно цари хем таро са о  јавера светска владе упро е Девлескоро народо ка хољанкерел бут е Семоќно Девле, хем тегани ка почминел и војна Армагедон (Отк. 16:14, 16). Ко адава време, ка авел о крајо е северно цареске, а исто аѓаар са е јавере народонге сој дело таро Гог таро Магог. Тегани, „нане те овел кој те поможинел леске“ (Дан. 11:45).

17. Кој тано о Михаел „о баро кнези“, кова сој спомнимо ко Даниел 12:1, хем со керела ов?

¹⁷ Одма ко следно стихо ко е Даниелескоро извештај иси повише информацие башо адава сар ка овен уништиме о северно цари хем лескере сојузникија, хем сар ка ова амен спасиме. (Читин Даниел 12:1.) Со значинела акава стихо? Михаел тано о јавер анав амаре Царескоро, о Исус Христос. Ов „терѓола хем поможинела“ е Девлескере слугенге таро 1914 берш, кеда уло Цари ко е Девлескоро небесно Царство. Панда хари ов „ка уштел“ ки адаја смисла со ка уништинел пле душманен ки војна Армагедон. Акаја војна ка овел о крајо башо адава со о Даниел вакерела кај тано о најстрашно „време е неволјакоро“ ки манушикани историја. Ко пло пророштво ко лил Откровение, о Јован адава исто време викинела ле „и бари неволја“ (Отк. 6:2; 7:14).

18. Соске шај те ачхова смириме бизи разлика со ка случинел пе?

¹⁸ Хем о Даниел хем о Јован јасно вакерѓе кај окола со служинена е Јеховаске хем е Исусеске ка преживинен и бари неволја. Адалеске шај те ачхова смириме бизи разлика со ка случинел пе. О Даниел вакерела кај ка преживинен окола каскере анава тане пишиме „ко лил“ (Дан. 12:1). Сар шај амаро да анав те овел адатхе пишимо? Мора јасно те сикава кај иси амен вера ко Исус, е Девлескоро Бакхро (Јован 1:29). Ваљани те да лафи е Јеховаске кај ка служина леске хем те крстина амен (1. Пет. 3:21). Хем мора те поддржина е Девлескоро Царство аѓаар со ка поможина е јаверенге те сикљовен башо Јехова.

19. Со ваљани те кера акана, хем соске?

¹⁹ Акана тано о време те бајрара амари доверба ко Јехова хем ки лескири организација која со верно служинела леске. Акана тано време те поддржина е Девлескере Царство. Ако кераја адава, ка ова спасиме кеда о Царство ка уништинел е северно хем е јужно царе.