1-2. So ka osmotrina ko akava članko?

ISI AMEN pobuter dokazija nego li angleder so čače živinaja ko krajo ando poslednja dive kotar akava lošno sveto. Pana hari, o Jehova hem o Isus Hrist ka uništinen sa o vlastija kola borinena pe protiv e Devleso Kraljevstvo. Angleder te ovel odova, o kralj ando sever hem o kralj ando jug ka nastavinen te borinen pe jekh jekheja hem e Devlese narodoja.

² Ko akava članko, ka osmotrina o proročanstvo ando Danilo 11:40–12:1. Ka dikha koj tano avdije o kralj ando sever. Isto adžahar, ka dikha sose na valjani te dara ando buduća događaja, već te ovel amen poverenje so o Jehova ka arakhi amen bizo obzir so ka ovel.

3-4. Koj tano avdije o kralj ando sever? Objasnin.

³ Palo odova so o Sovjetsko Savez raspadindža pe ko 1991. berš, e Devleso narodo jekh period uživindža ki sloboda ko odola phuvja. O Danilo akija sloboda opisujindža sar „tikni pomoć“ (Dan. 11:34). Sar rezultati, on šajindže slobodno te propovedinen. Sebepi odova, uskoro hine stotine hiljada objaviteljija ko phuvja kola hine deo ando Sovjetsko Savez. Hari pohari, i Rusija hem olake saveznikija ulje o kralj ando sever. Sar so dikhljam ko prošlo članko, te bi neko ovela o kralj ando sever ja kralj ando jug, ov mora te ispunini trin buča. Ov valjani: (1) direktno te utičini upro e Devleso narodo, (2) jasno te mothovi soj tano neprijatelj e Jehovase hem olese narodose hem (3) te takmičini pe avere kraljeja.

⁴ Hajde te dikha trin razlogija kola mothovena so avdije i Rusija hem olake saveznikija tane o kralj ando  sever. Sar prvo, on direktno utičinena upro e Devleso narodo, adžahar so zabranindže amare aktivnostija hem so progoninena buten phraljen hem phenjen kola živinena ko phuvja kuri on vladinena. Sar dujto, olenge postupkija mothovena so mrzinena e Jehova hem olese narodo. Hem sar trito, on dena sa pestar te ovel len pobari vlast nego li o kralj ando jug kas predstavini i angloameričko svetsko sila. Hajde te dikha sar i Rusija hem olake saveznikija ulje o kralj ando sever.

5. Kova period opisujini o izveštaj ando Danilo 11:40-43 hem so tegani ka ovel?

⁵ Čitin Danilo 11:40-43. Akava deo ando proročanstvo opisujini o vreme ando kraj. Akava izveštaj opisujini sar akala duj kraljija takmičinena pe jekh jekheja. Sar so o Danilo proreknindža, ko vreme ando kraj, o kralj ando jug ka „borini pe“ e kraljeja ando sever (Dan. 11:40).

6. Kola buča jasno mothovena so o duj kraljija takmičinena pe jekh jekheja?

⁶ O kralj ando sever hem o kralj ando jug nastavinena te takmičinen pe jekh jekheja ko ka ovel najmoćno sila ki phuv. Na primer, palo Dujto svetsko rat, o Sovjetsko Savez počmindža te vladini ko pobaro deo andi Evropa. Odolese, o kralj ando jug dogovorindža pe avere phuvjencar te udružinen olenge vojske protiv o kralj ando sever. Akija organizacija tani pendžardi sar NATO. Isto adžahar, o kralj ando sever hem o kralj ando jug trošinena but pare te bi čerena so pozorali vojska hem pozoralo naoružanje. On borinena pe jekh jekheja adžahar so podržinena jekh averese neprijateljen ko mariba ki Afrika, Azija hem ki Latinsko Amerika. Ko amaro vreme, i Rusija hem olake saveznikija ulje but moćna ko celo sveto. Isto adžahar, on napadinena e kralje ando jug prekalo sajber napadija. Akala kraljija jekh jekhe optužinena so koristinena o štetna programija te bi lošno utičinena upro olengo političko sistem hem sebepi kola našalena but pare. Hem sar so o Danilo proreknindža, o kralj ando sever nastavini te napadini e Devlese narodo (Dan. 11:41).

7. So predstavini i „Šuži phuv“?

⁷ Ko Danilo 11:41 phenela pe so o kralj ando sever ka khuvel „ki Šuži phuv.“ So predstavini odija phuv? Angleder, odova hine i doslovno phuv Izrael, koja hine pendžardi sar phuv koja tani „najšuži ando sa avera phuvja“ (Jezek. 20:6). Ama, odija phuv hine posebno than, sose odothe o manuša obožavindže e Jehova. Pali Pedesetnica 33. berš andi nevi era, odija „Šuži phuv“ na hine više disavo doslovno than ki phuv. Odova tano logično sose e Jehovaso narodo bešela ki celo phuv. Avdije, i „Šuži phuv“ predstavini o duhovno raj kuri sa o manuša obožavinena e Jehova, adžahar so džana ko sastankija hem ki služba.

8. Sar o kralj ando sever khuvdža ki „Šuži phuv“?

⁸ Ko poslednja dive, o kralj ando sever but putija khuvdža ki „Šuži phuv.“ Sar odova? Na primer, ked i nacističko Nemačka hine kralj ando sever, posebno dži trajindža o Dujto svetsko  rat, odova kralj khuvdža ki „Šuži phuv“ adžahar so progonindža hem mudardža disave ando e Devleso narodo. Palo Dujto svetsko rat, o Sovjetsko Savez ulo kralj ando sever. Odova kralj khuvdža ki „Šuži phuv“ adžahar so progonindža e Devlese narodo hem so uspudindža len dur kotar olenge čhera.

9. Sar ko amaro vreme i Rusija hem olake saveznikija khuvdže ki „Šuži phuv“?

⁹ Isto adžahar hem ko amaro vreme, i Rusija hem olake saveznikija khuvdže ki „Šuži phuv.“ Sar? Ko 2017. berš, i Rusija zabranindža amare aktivnostija hem phanlja disave amare phraljen hem phenjen. Uzo odova, i Rusija zabranindža amare publikacije, a jekh olendar tani i Biblija, o prevod Novi svet. Isto adžahar, i Rusija ljelja pese amare objektija ki odija phuv, sar soj tane i podružnica, o dvorane hem o kongresna dvorane. Palo sa akala događaja, o Vodeće telo ko 2018. berš haljilo so i Rusija hem olake saveznikija tane o kralj ando sever. Čak iako disave vlastija progoninena e Jehovase narodo, amare phralja na pokušinena te borinen pe olencar ja te menjinen i vlast. Umesto odova, on šunena e biblijako savet te molinen pe aso sare „kola tane ki vlast“, pogotovo ked o vlastija anena o odluke kola šaj te utičinen upri amari versko sloboda (1. Tim. 2:1, 2).

10. Da li o kralj ando sever ka uništini e kralje ando jug? Objasnin.

¹⁰ Sebepi so o proročanstvo kotar Danilo 11:40-45 uglavnom vačeri kotar odova so čerela o kralj ando sever, šaj pučaja amen: „Da li odova značini so ov ka uništini e kralje ando jug?“ O odgovor tano na! O kralj ando jug pana ka ovel „[dživdo]“ odnosno pana ka postojini, ked o Jehova hem o Isus ka uništinen sa o manušikane vlastija ko Armagedon (Otkr. 19:20). Sose šaj te ova odobor sigurna so odova ka ovel adžahar? O proročanstvo ando Danilo hem Otkrivenje ka del amendže odgovor.

11. So značinena o lafija ando Danilo 2:43-45? (Dikh i slika ko početko ando akava časopis.)

¹¹ Čitin Danilo 2:43-45. O proročanstvo ando Danilo opisujini nekobor svetska sile kola hine len uticaj ko e Devleso narodo. On tane opisujime sar različita delovija ando jekh baro kip. O stopala, kola tane čerde ando sastron hem andi glina, kotar akava baro kip predstavinena i poslednjo svetsko sila. Odola stopala predstavinena i angloameričko svetsko sila. Akava proročanstvo mothovi so i angloameričko svetsko sila pana ka ovel ko po položaj ked o Devleso Kraljevstvo ka napadini hem ked ka uništini e manušikane vlastija.

12. Kas predstavini o eftato šero andi zver hem sose tano odova važno?

¹² Hem o apostol Jovan vačerdža ando svetska sile kola utičindže ko e Devleso narodo. Sa odola sile, o Jovan opisujindža sar jekh zver koja isi la efta šere. O eftato šero kotar akija zver predstavini i angloameričko svetsko sila. Odova tano but važno sose nane nijekh šero palo akava eftato. O eftato šero kotar akija zver pana ka vladini ked o Hrist hem olesi nebesko vojska ka avel te uništini ola hem aver deo andi odija zver * (Otkr. 13:1, 2; 17:13, 14).

13-14. Koj tano „Gog andi phuv Magog“ hem so možda ka podstaknini le te napadini e Devlese narodo?

¹³ O proročanstvo kova tano pisimo ko Jezekilj vačeri odolestar so šaj te desini pe ko poslednja dive e kraljese ando sever hem e kraljese ando jug. Ako o proročanstvija kotar Jezekilj 38:10-23; Danilo 2:43-45; 11:44–12:1 hem Otkrivenje 16:13-16, 21 vačerena ando isto period hem ista događaja, tegani mangaja te mothova tumendže so mislinaja so ka ovel.

¹⁴ Ko disavo trenutko palo so ka počmini i bari nevolja, o „kraljija ando celo sveto“ ka udružinen pe hem ka formirinen i koalicija naroda (Otkr. 16:13, 14; 19:19). Ki Biblija, akija koalicija vičimi tani „Gog andi phuv Magog“ (Jezek. 38:2). Akija koalicija naroda ka napadini sa e Devlese narodo hem ka pokušini potpuno te uništini len. So ka podstaknini len te napadinen e Devleso narodo? O apostol Jovan dela amen odgovor. Ked vačerdža kotar odova vreme, ov dikhlja bari kukudi koja alji upro e Devlese neprijateljija. Akija simbolično kukudi verovatno predstavini i zorali poruka osude koja ka propovedini e Jehovaso narodo. Možda baš sebepi odija poruka, o Gog ando Magog ka napadini e Devlese narodo hem ka del sa pestar te uništini le (Otkr. 16:21).

15-16. (a) Kola događaja šaj opisujinena pe ko Danilo 11:44, 45? (b) So ka desini pe e kraljeja ando sever hem okolencar kola ka oven deo kotar Gog ando Magog?

¹⁵ Akija zorali poruka hem završno napad upro e Devleso narodo tane možda o ista događaja kola tane opisujime ko Danilo 11:44, 45. (Čitin.) Odothe, o Danilo phenela so e kralje ando sever „ka uznemirinen... o vestija ando istok hem ando sever, hem ka ikljol e bare holjaja.“ O kralj ando sever ka mangel te „uništini buten.“ O lafi „buten“ izgleda odnosini pe upro e Jehovaso narodo. * Šaj o Danilo akate opisujindža o završno napad ko e Devleso narodo.

 ¹⁶ Ked o kralj ando sever hem avera vlastija ka napadinen e Devlese narodo, odoleja ka holjančeren e Svemoćno Devle hem o Armagedon ka počmini (Otkr. 16:14, 16). Tegani, o kralj ando sever zajedno avere phuvjencar kola predstavinena o Gog ando Magog ka oven uništime. Tegani, „na ka ovel niko ko ka pomožini“ odole kraljese (Dan. 11:45).

17. (a) Koj tano o Mihailo „o baro knez“ kotar Danilo 12:1? (b) So čerela akana hem so pana hari ka čerel?

¹⁷ O izveštaj kotar Danilo dela amendže pobuter informacije ando odova sar o kralj ando sever hem olese saveznikija ka oven uništime, a sar amen ka ova zaštitime. (Čitin Danilo 12:1.) So značini akava stih? Dujto anav aso amaro Kralj, o Isus Hrist, tano Mihailo. Ov „terdžola hem pomožini“ e Devlese narodose kotar 1914. berš, ked oleso Kraljevstvo hine uspostavimo ko nebo. Uskoro, ov „ka uštel“, adžahar so ka uništini sa pe neprijateljen ko Armagedon. Odova maribe ka ovel o završno događaj kova o Danilo opisujindža sar najpharo vreme ki manušikani istorija. E Jovaneso proročanstvo vačeri so odova period vičini pe „bari nevolja“ (Otkr. 6:2; 7:14).

18. Sose na valjani te dara ando odova so ka ovel ki budućnost?

¹⁸ Solduj džene, hem o Danilo hem o Jovan, vačerdže so ki bari nevolja o Jehova hem o Isus ka zaštitinen pekle slugen. Odolese na valjani te dara kotar o događaja kola ka oven. O Danilo phendža so okola kola ka preživinen ka oven o manuša kolenge anava tane „zapisime ki knjiga“ (Dan. 12:1). Ama, so valjani te čera te bi amare anava ovena zapisime ki odija knjiga? Amen mora jasno te mothova so isi amen vera ko Isus, e Devleso Bakro (Jov. 1:29). Amen valjani te predajina amaro dživdipe e Devlese hem te krstina amen (1. Petr. 3:21). Isto adžahar, mora te mothova so podržinaja e Devleso Kraljevstvo, adžahar so ka pomožina averendže te sikljon ando Jehova.

19. So valjani te čera već akana hem sose?

¹⁹ Akana tano vreme te zorjačera amari vera ko Jehova, ki olesi organizacija hem te podržina e Devleso Kraljevstvo. Ako čeraja sa odova, ka ova zaštitime ked o Devleso Kraljevstvo ka uništini e kralje ando sever hem e kralje ando jug.