1-2. Yini lesitawucoca ngayo kulesihloko?

SINEBUFAKAZI lobunyenti bekutsi siphila ekupheleni kwemalanga ekugcina alesimiso saSathane. Ngekushesha, Jehova naJesu Khristu batawubhubhisa yonkhe imibuso lemelene neMbuso waNkulunkulu. Ngaphambi kwekutsi kwenteke loko, inkhosi yasenyakatfo nenkhosi yaseningizimu titawuchubeka tilwa futsi tihlasele nebantfu baNkulunkulu.

² Kulesihloko, sitawucoca ngesiprofetho lesibhalwe kuDanyela 11:40–12:1. Sitawufundza ngekutsi ingubani inkhosi yasenyakatfo lamuhla nekutsi kungani kufanele singetfuki, kunaloko setsembe Jehova kutsi utasivikela kunobe yini lengenteka.

3-4. Chaza kutsi ingubani inkhosi yasenyakatfo lamuhla?

³ Ngemuva kwekuwa kwe-Soviet Union nga-1991, bantfu baNkulunkulu lebebabuswa ngiyo bakhululeka sikhatsi lesitsite, futsi Danyela watsi lenkhululeko ‘ilusito loluncane.’ (Dan. 11:34) Umphumela waba kutsi bakhona kushumayela ngekukhululeka, futsi kwaba nebamemeteli labanyenti kulamave lebekabuswa yi-Soviet Union. Ngemuva kweminyaka leminyenti i-Russia kanye nemave layisekelako yaba yinkhosi yasenyakatfo. Njengobe kuvetiwe esihlokweni lesendlulile, kuze umbuso ube yinkhosi yasenyakatfo nobe ube yinkhosi yaseningizimu, kufanele wente tintfo letintsatfu: (1) kufanele ubuse endzaweni lenebantfu baNkulunkulu, (2) kufanele ukhombise ngetento kutsi usitsa saNkulunkulu nebantfu bakhe, futsi (3) kufanele ubange kubusa nalenye inkhosi.

 ⁴ Nati tizatfu letisenta sitsi i-Russia kanye netive letiyisekelako iyinkhosi yasenyakatfo lamuhla. (1) Ihlasele bantfu baNkulunkulu ngekutsi ivimbe umsebenti wabo wekushumayela, futsi yaphatsa kabuhlungu bazalwane nabodzadze labanyenti lababuswa ngiyo kanye nalabo labayisekelako. (2) Letento tayo tikhombisa kutsi iyamenyanya Jehova kanye nebantfu bakhe. (3) I-Russia kanye nalabayisekelako iyachubeka yetama kuba nemandla kunenkhosi yaseningizimu, lokuyi-Britain ne-United States. Asesibone loko lokwentiwe yi-Russia kanye netive letiyisekelako kuze ikhombise kutsi iyinkhosi yasenyakatfo.

5. Umbhalo waDanyela 11:40-43 ukhuluma ngani, futsi yini letawenteka ngaleso sikhatsi?

⁵ Fundza Danyela 11:40-43. Lencenye yalesiphrofetho ikhuluma ngesikhatsi sekuphela kwalelive, lokwacala nga-1914 futsi lokutawuphela nakucala kuhlupheka lokukhulu. Lesiphrofetho sikhuluma ngekutsi inkhosi yasenyakatfo nenkhosi yaseningizimu titawuhlaselana. Danyela wabiketela kutsi ngesikhatsi sekugcina, inkhosi yaseningizimu ‘itawuhlaselana’ nenkhosi yasenyakatfo emphini.—Dan. 11:40.

6. Ngubuphi bufakazi lobukhona bekutsi lamakhosi lamabili ayahlaselana?

⁶ Inkhosi yasenyakatfo nenkhosi yaseningizimu titawuchubeka tihlaselana ngobe totimbili tifuna kuba yimibuso lenemandla emhlabeni. Nasi sibonelo, ngemuva kweMphi yeLive yesibili, i-Soviet Union yacala kubusa tindzawo letinyenti e-Europe. Ngako inkhosi yaseningizimu yakha bungani nalamanye emave kuze kuhlanganiswe libutfo lemphi lebelitakulwa nenkhosi yasenyakatfo. Lenhlangano ibitwa ngekutsi yi-NATO. Inkhosi yasenyakatfo nenkhosi yaseningizimu tiyachubeka tisebentisa imali lenyenti kuze naloyo abe nelibutfo lemphi lelinemandla emhlabeni. Tiyahlaselana ngekutsi tisekele emave latitsa nalenye yalamakhosi lamabili etimphini letise-Africa, e-Asia nase-Latin America. Eminyakeni leyendlulile, i-Russia kanye nemave layisekelako ibe nemandla emhlabeni. Iyachubeka ihlaselana nenkhosi yaseningizimu isebentisa ema-computer (cyber warfare). Inkhosi yasenyakatfo nenkhosi yaseningizimu tiyachubeka tihlaselana tisebentisa tinhlelo letiyingoti letikuma-computer kuze tiphatamise temnotfo kanye nendlela yekubusa. Njengobe Danyela abiketela, inkhosi yasenyakatfo iyachubeka ihlasela bantfu baNkulunkulu.—Dan. 11:41.

7. Liyini “live lelihle”?

⁷ Danyela 11:41 utsi inkhosi yasenyakatfo itawungena ‘eveni lelihle.’ Nguliphi lelive? Endvulo, live laka-Israyeli belitsatfwa njengelive “lelihle kwendlula onkhe lamanye emave.” (Hez. 20:6) Lelive belibalulekile ngobe beliyindzawo lapho bantfu bebakhontela khona Jehova. Kusukela ngeliPhentekoste langa-33 C.E., ‘lelive lelihle’ beselingasasiyo indzawo lekhona mbamba emhlabeni. Loko kuliciniso ngobe lamuhla bantfu baJehova bakuwo wonkhe umhlaba. Kunaloko, ‘lelive lelihle’ lamuhla liyindlela yekuphila yebantfu baJehova, lefaka ekhatsi kuya emihlanganweni kuze bakhonte Jehova kanye nekwenta umsebenti wekushumayela.

8. Inkhosi yasenyakatfo ingene njani ‘eveni lelihle’?

⁸ Kulamalanga ekugcina, inkhosi yasenyakatfo ingene ‘eveni lelihle’ tikhatsi  letinyenti. Nasi sibonelo, ngesikhatsi i-Nazi Germany iyinkhosi yasenyakatfo, ikakhulukati ngesikhatsi semphi yelive yesibili, yangena ‘eveni lelihle’ ngekutsi ihluphe futsi ibulale bantfu baNkulunkulu. Ngemuva kweMphi yeLive yesibili, ngesikhatsi i-Soviet Union iba yinkhosi yasenyakatfo, nayo yangena ‘eveni lelihle’ ngekutsi ihluphe bantfu baNkulunkulu, futsi ibamikise etinkambu tekuhlushwa lebetikhashane nemakhaya abo.

9. Eminyakeni lesandza kwendlula, i-Russia kanye nemave layisekelako ingene njani ‘eveni lelihle’?

⁹ Eminyakeni lesandza kwendlula, i-Russia kanye nemave layisekelako ingenile ‘eveni lelihle.’ Kanjani? Nga-2017, i-Russia yawuvala umsebenti wekushumayela webantfu baJehova, futsi yavalela labanye bazalwane nabodzadze emajele. Yaphindze yavala netincwadzi tetfu, lokufaka ekhatsi Lihumusho Lemhlaba Lomusha. Ngetulu kwaloko, yatsatsa netakhiwo teligatja letise-Russia, emaHholwa eMbuso kanye nemaHholwa eMhlangano. Ngemuva kwato tonkhe letintfo, nga-2018, Sigungu Lesibusako satsi i-Russia kanye nemave layisekelako iyinkhosi yasenyakatfo. Nobe kunjalo, bantfu baJehova ngeke balwisane nanobe ngumuphi hulumende nobe betame kuwushintja, ngisho nobe loyo hulumende ubahlupha. Kunaloko, balalela seluleko lesiseBhayibhelini sekuthantazela “bonkhe labasetikhundleni letiphakeme,” ikakhulukati nangabe benta tincumo letitawutsintsa inkhululeko yetfu yekukhonta Nkulunkulu.—1 Thim. 2:1, 2.

10. Chaza kutsi inkhosi yasenyakatfo itayincoba yini inkhosi yaseningizimu.

¹⁰ Siphrofetho lesiku-Danyela 11:40-45 sikhuluma kakhulu ngenkhosi yasenyakatfo. Loko kusho kutsi itayincoba yini inkhosi yaseningizimu? Cha. Inkhosi yaseningizimu itawube ‘isaphila’ ngesikhatsi Jehova naJesu babhubhisa yonkhe imibuso yebantfu emphini ye-Armagedoni. (Semb. 19:20) Kungani siciniseka ngaloku? Cabanga ngaloko lokuvetwa siphrofetho lesikuDanyela nalesikuSembulo.

11. Usho kutsini umbhalo waDanyela 2:43-45? (Buka sitfombe lesisekhasini lekucala.)

¹¹ Fundza Danyela 2:43-45. Umphrofethi Danyela wakhuluma ngesitfombe lesikhulu lesinetitfo temtimba letakhiwe ngetinsimbi letehlukehlukene. Sitfo ngasinye besimelela hulumende lowehlukile lobuse endzaweni lebeyinebantfu baNkulunkulu labanyenti. Labohulumende babuse ngetikhatsi letingafani. Tinyawo talesitfombe betakhiwe ngensimbi lehlanganiswe nelubumba. Timelela umbuso wekugcina, lokuyi-Britain ne-United States. Lesiphrofetho sisho kutsi i-Britain ne-United States titawube tibusa ngesikhatsi umbuso waNkulunkulu ubhubhisa yonkhe imibuso yebantfu.

12. Inhloko yesikhombisa yalesilo imelela ini, futsi kungani kubalulekile kukwati loko?

¹² Umphostoli Johane wakhuluma nangemibuso lebeyibusa bantfu baJehova. Johane wafananisa lemibuso nesilo sasendle lesinetinhloko letisikhombisa. Inhloko yesikhombisa yalesilo imelela i-Britain ne-United States. Kubalulekile kukwati loku ngobe kute letinye tinhloko ngemuva kwalena yesikhombisa. Lenhloko yesikhombisa yalesilo, itawube ibusa ngesikhatsi Khristu kanye nelibutfo lakhe lasezulwini bayibhubhisa nalesilo. *—Semb. 13:1, 2; 17:13, 14.

13-14. Ngubani “Gogi waseveni lakaMagogi,” futsi yini letawenta kutsi ahlasele bantfu baNkulunkulu?

¹³ Hezekeli wabhala siphrofetho lesisitjela loko lokungenteka kwenteke ngaphambi kwekutsi inkhosi yasenyakatfo nenkhosi yaseningizimu ibhujiswe. Kubonakala shengatsi tiphrofetho letikuHezekeli 38:10-23; Danyela 2:43-45; 11:44–12:1; nalesikuSembulo 16:13-16, 21 tikhuluma ngetintfo letifanako. Nangabe kunjalo, nati tintfo lesingalindzela kutsi tenteke.

¹⁴ Ngemuva kwekucala kwekuhlupheka lokukhulu, ‘emakhosi emhlaba wonkhe’ atawuhlangana abe licembu. (Semb. 16:13, 14; 19:19) Lokuhlangana kwalamakhosi nguloko liBhayibheli lelikubita ngekutsi ‘nguGogi waseveni lakaMagogi.’ (Hez. 38:2) Lamakhosi lahlangene atawuhlasela bonkhe bantfu baNkulunkulu futsi etame kubabhubhisa. Yini letawubangela lokuhlasela? Kulesiphrofetho lesimayelana nalesikhatsi, umphostoli Johane watsi ematje lamakhulu esangcotfo atawushaya titsa taNkulunkulu. Lesangcotfo kungenteka simelela umlayeto wesehlulelo lotawube umenyetelwa bantfu baJehova. Kungenteka lomlayeto ngiwo lotawenta Gogi wakaMagogi kutsi ahlasele bantfu baNkulunkulu ngenhloso yekubacedza bonkhe emhlabeni.—Semb. 16:21.

15-16. (a) Yini lokungenteka ichazwa nguDanyela 11:44, 45? (b) Yini letawenteka enkhosini yasenyakatfo nakuGogi wakaMagogi?

¹⁵ Kungenteka lomlayeto lonemandla kanye nekuhlasela kwekugcina kwetitsa taNkulunkulu kutawuba nguletintfo letichazwe kuDanyela 11:44, 45. (Fundza.) Kulombhalo, Danyela watsi “imibiko levela emphumalanga nasenyakatfo” itawuphatamisa inkhosi yasenyakatfo lephume “nemphi lenkhulu.” Lenkhosi yasenyakatfo itimisele ‘ngekubhubhisa labanyenti.’ Kubonakala shengatsi laba “labanyenti” lokukhulunywa ngabo, bantfu baJehova. * Kungenteka Danyela bekachaza kuhlaselwa kwekugcina kwebantfu baNkulunkulu.

¹⁶ Lokuhlasela kwenkhosi yasenyakatfo ikanye nayo yonkhe leminye imibuso  yemhlaba, kutawutfukutselisa Nkulunkulu longuSomandla futsi imphi ye-Armagedoni itawubese iyacala. (Semb. 16:14, 16) Ngaleso sikhatsi, inkhosi yasenyakatfo kanye nayo yonkhe leminye imibuso lenguGogi wakaMagogi, itawubhujiswa futsi “kute namunye loyawuyilamulela.”—Dan. 11:45.

17. Ngubani Mikhayeli “ingilosi lenkhulu” lokukhulunywa ngaye kuDanyela 12:1, futsi yini latawuyenta?

¹⁷ Sehluko lesilandzelako kulesiphrofetho saDanyela sisiniketa imininingwane leyengetiwe mayelana nekutsi inkhosi yasenyakatfo kanye naleminye imibuso itawubhujiswa njani nekutsi tsine sitawusindziswa njani. (Fundza Danyela 12:1.) Lisho kutsini lelivesi? Mikhayeli ngulelinye ligama leNkhosi yetfu lebusako, Jesu Khristu. Bekasolo ‘angumvikeli’ webantfu baNkulunkulu kusukela nga-1914 ngesikhatsi aba yiNkhosi yeMbuso waNkulunkulu ezulwini. Ngekushesha ‘utawuvela,’ nobe abhubhise titsa takhe emphini ye-Armagedoni. Lemphi itawuba nguloko Danyela lakubita ngekutsi “sikhatsi sekuhlupheka lokukhulu” emlandvweni. Siphrofetho saJohane lesibhalwe kuSembulo sibita lesikhatsi lesingaphambi kwemphi ye-Armagedoni ngekutsi ‘kuhlupheka lokukhulu.’—Semb. 6:2; 7:14.

18. Kungani singakhona kulindzela likusasa ngekuciniseka?

¹⁸ Singakhona kulindzela likusasa ngekuciniseka ngobe Danyela naJohane baveta kutsi bonkhe labakhonta Jehova futsi labalalela Jesu batawusindza ngesikhatsi sekuhlupheka lokukhulu. Danyela watsi bonkhe labatawusindza, kutawuba ngulabo ‘emabito abo labhaliwe encwadzini.’ (Dan. 12:1) Yini lokufanele siyente kuze emabito etfu abhalwe kulencwadzi? Kufanele sikhombise kutsi siyakholwa kuJesu, loliWundlu laNkulunkulu. (Joh. 1:29) Kufanele sinikele kuphila kwetfu kuNkulunkulu futsi sibhajatiswe. (1 Phet. 3:21) Kufanele siphindze sisekele uMbuso waNkulunkulu ngekutsi sente konkhe lokusemandleni etfu kuze sisite labanye bati ngaJehova.

19. Yini lokufanele siyente nyalo, futsi leni?

¹⁹ Nyalo sikhatsi sekutsi simetsembe mbamba Jehova kanye nenhlangano yakhe lenetikhonti letetsembekile. Lesi sikhatsi sekutsi sisekele uMbuso waNkulunkulu. Nangabe senta njalo, sitawusindziswa ngesikhatsi uMbuso waNkulunkulu ubhubhisa inkhosi yasenyakatfo nenkhosi yasengizimu.