1, 2. Мае ми эскеромы та статьяын?

 АЗЬВЫЛ дыръёсын ӵошатыса, али ми тужгес но умой адӟиськомы, та дуннелэн берпум нуналъёсаз улӥськомы шуыса. Иегова но Иисус Христос ӝоген быдтозы вань кивалтэтъёсты, кудъёсыз Эксэйлыклы пумитъясько. Нош со дырозь уйпал но лымшор эксэйёс нюръяськозы ог-огенызы но, Инмарлэн калыкеныз но.

² Та статьяын ми эскеромы азьпалзэ ивортонэз, кудӥз гожтэмын Данииллэн 11:40—12:1. Ми тодомы, кин туннэ уйпал эксэй луэ, но эскеромы, малы ми быгатӥськомы каньыл сюлмын улыны но Иеговалы оскиськыны, вуоно шуг-секытъёс шоры учкытэк.

3, 4. Кин выль уйпал эксэй луиз? Валэктэ.

³ Совето Союзлэн 1991-тӥ арын куашкамез бере, Инмарлэн калыкезлы, кудӥз солэн кивалтэмез улсын улӥз, «кӧня ке но юрттэт» сётэмын вал — кӧня ке дыр ӵоже со быгатӥз кышкатэк тодытыны но Инмарлы ужаны-тыршыны (Дан. 11:34). Соберегес ик ивортӥсьёслэн лыдзы, кудъёсыз улӥзы Совето Союзэ пырись шаеръёсын, трос сю сюрсозь йылӥз. Дыр ортчыса, Россия но со пала кариськись шаеръёс уйпал эксэй луизы. Кызьы кылем статьяын валэктэмын вал, уйпал но лымшор эксэйёсты тодманы луэ куинь тодметъёсъя: 1) та эксэйёс яке кивалто отын, кытын Инмарлэн трос ужась-тыршисьёсыз уло, яке соосты уйыло-улляло; 2) соослэн ужъёссы возьмато, соос Иеговалэн но солэн калыкезлэн тушмонъёссы луо шуыса; 3) та кык эксэйёс ог-огенызы ожмаськыса уло.

 ⁴ Тани мугъёс, малы ми малпаськомы, Россия но со пала кариськись шаеръёс туннэ уйпал эксэй луо шуыса: 1) та шаеръёс тодытон ужмес нуыны уг лэзё но уйыло-улляло трос сю сюрс вын-агайёсмес но сузэр-апайёсмес, кудъёсыз соослэн кивалтэмзы улсын уло; 2) сыӵе ужъёсынызы соос возьмато, Иеговаез но солэсь калыксэ адӟемпотостэм каро шуыса; 3) соос вожвылъясько лымшор эксэен, Англо-Американской дунневыл державаен. Ойдолэ эскеромы, кызьы Россиялэн но со пала кариськись шаеръёслэн ужъёссы возьмато, соос уйпал эксэй луо шуыса.

5. Кыӵе дыр сярысь вераське Данииллэн 11:40—43 но мар луэ со дыре?

⁵ Лыдӟе Данииллэсь 11:40—43. Азьпалзэ ивортонлэн та люкетаз дыръёслэн пумзы сярысь гожтэмын. Отын вераське, кызьы уйпал но лымшор эксэйёс ог-огенызы нюръясько. Даниил азьпалзэ тодытыса вераз, уйпал эксэен «лымшор эксэй ожмаськоз» шуыса (Дан. 11:40).

6. Кызьы уйпал но лымшор эксэйёс ог-огенызы нюръяськыны азьланьто?

⁶ Уйпал но лымшор эксэйёс ог-огенызы нюръяськыны азьланьто, малы ке шуоно котькудӥзлэн дунне вылын тужгес но кужмо кивалтэт луэмез потэ. Кыкетӥ дунневыл ож бере Совето Союз Европалэсь бадӟым люкетсэ чакласа возиз. Соин ик лымшор эксэй но мукет шаеръёс вераськизы армиоссэз огазеяны, уйпал эксэен ожмаськон понна. Соослэн огазеяськонзы нимаське НАТО. Озьы ик уйпал но лымшор эксэйёс трос коньдон быдто, асьсэлы тужгес но кужмо армия кылдытыны тыршыса. Уйпал но лымшор эксэйёс ог-огенызы лушкемен нюръяськизы, куке ог-огзылэн тушмонъёссылы юрттыса улӥзы Африкаын, Азиын но Латин Америкаын ожмаськонъёс дыръя. Берло аръёсы Россия но со пала кариськись шаеръёс кужмо но кужмо луизы. Озьы ик уйпал но лымшор эксэйёс, компьютеръёсты уже кутыса, ог-огенызы ожмасько. Соос ог-огзэс янгыше уськыто, уже куто шуыса компьютерной программаосты, кудъёсыз сэрен соос быгато коньдонзэс ыштыны но кивалтэтсылы изъян вайыны. Со сяна, кызьы азьпалзэ тодытыса вераз Даниил, уйпал эксэй Инмарлэн калыкез вылэ урдскылэмысь уг дугды (Дан. 11:41).

7. Мае возьматэ «чеберлэсь но чебер музъем»?

⁷ Данииллэн 11:41 азьло ик верамын вал, уйпал эксэй «чеберлэсь но чебер музъеме» пыроз шуыса. Кыӵе музъем сярысь татын вераське? Вашкала дыръя со вал Израиль, кудзэ «вань музъемъёс пӧлысь чеберлыко интыен» лыдъязы (Иез. 20:6). Маин та музъем аспӧртэмлыко вал? Отын улӥз калык, кудӥз Иеговалы йыбыртъяз. Асьме вакытысь 33-тӥ арын Витьтонэтӥ нуналысен кутскыса, «чеберлэсь но чебер музъем» нимысьтыз инты луэмысь дугдӥз. Со озьы луиз, малы ке шуоно туннэ Иеговалэн калыкез быдэс дунне вылын улэ. Асьме нуналъёсы «чеберлэсь но чебер музъем» — со Инмарлэн калыкезлэн улон амалэз. Кылсярысь, татчы пыре христиан пумиськонъёсы ветлон но тодытон уже пыриськон.

8. Кызьы уйпал эксэй «чеберлэсь но чебер музъеме» пыралляз?

⁸ Берпум нуналъёс куспын уйпал эксэй «чеберлэсь но чебер музъеме» кӧня ке пол пыраз. Тодамы ваёмы, мар луиз, куке нацистской Германия уйпал эксэй вал, тужгес но Кыкетӥ дунневыл ож дыръя. Та эксэй  «чеберлэсь но чебер музъеме» пыралляз, куке Инмарлэсь калыксэ уйылӥз-улляз но виылӥз. Нош Кыкетӥ дунневыл ож бере Совето Союз «чеберлэсь но чебер музъеме» пыриз, Инмарлэсь калыксэ уйылыса-улляса но соосты улон интыосысьтызы кыдёке келяса.

9. Кызьы Россия но со пала кариськись шаеръёс «чеберлэсь но чебер музъеме» пыризы?

⁹ Кӧня ке аръёс талэсь азьло уйпал эксэй нош ик «чеберлэсь но чебер музъеме» пыриз. Кызьы? 2017-тӥ арын Россия Иеговалэн калыкезлы ужзэс нуыны ӧз лэзьы но куд-ог вын-агайёсты но сузэр-апайёсты пытсэтэ пуктӥз. Со сяна, со уже кутыны ӧз лэзьы публикациосмес, озьы ик «Выль дуннелэсь берыктэмзэ» но, нош собере талаз Россиысь филиалэз, Эксэйлык юртъёсты но конгрессъёсты ортчытон юртъёсты. Та югдуръёс бере, 2018-тӥ арын, Кивалтӥсь кенешлы валамон луиз, Россия но со пала кариськись шаеръёс — со уйпал эксэй шуыса. Озьы ке но Иеговалэн калыкез нокыӵе но кивалтэтэн уг нюръяськы но сое воштыны уг тыршы, соку но, куке кивалтӥсьёс соосты уйылыса-улляса возё. Инмарлэн ужась-тыршисьёсыз Библиысь визь-кенешез уже куто: соос вӧсясько «вань кузёос понна», тужгес но соку, куке кивалтӥсьёс ужпум куто, Иеговалы эрико йыбыртъяны лэзёно-а яке ӧвӧл-а (1 Тим. 2:1, 2).

10. Вормоз-а уйпал эксэй лымшор эксэез? Валэктэ.

¹⁰ Азьпалзэ ивортонын, кудӥз гожтэмын Данииллэн 11:40—45, нырысь ик вераське уйпал эксэй сярысь. Возьматэ-а со, уйпал эксэй лымшор эксэез вормоз шуыса? Уг, уг возьматы. Лымшор эксэй улэп луоз на, куке Иегова но Иисус Армагеддон ожмаськонын музъем вылысь вань кивалтэтъёсты быдтыны кутскозы (Усьт. 19:20). Малы ми озьы малпаськомы? Ойдолэ эскеромы, мар вераське азьпалзэ ивортонъёсын, кудъёсыз гожтэмын Данииллэн книгаяз но Усьтӥськонын.

11. Мае возьматэ азьпалзэ ивортон, кудӥз гожтэмын Данииллэн 2:43—45? (Учке вылбамысь суредэз.)

¹¹ Лыдӟе Данииллэсь 2:43—45. Даниил пророк вера бадӟым сульдэр сярысь, кудӥзлэн мугор люкетъёсыз пӧртэм кортъёслэсь лэсьтэмын. Котькудӥз люкет возьматэ пӧртэм кивалтэтъёсты, кудъёсыз кивалто отын, кытын Инмарлэн трос ужась-тыршисьёсыз уло. Та кивалтэтъёс пӧртэм дыръёсы кивалто. Сульдэрлэн пыдъёсыз лэсьтэмын кортлэсь но горд сюйлэсь. Со возьматэ берпуметӥ кивалтэтэз — Англо-Американской дунневыл державаез. Озьыен, куке Инмарлэн Эксэйлыкез вань адями кивалтэтъёсты быдтыны кутскоз, Англо-Американской дунневыл держава кивалтоз на.

12. Мае возьматэ пӧйшурлэн сизьыметӥ йырыз но малы сое тодыны кулэ?

¹² Апостол Иоанн но вера кивалтэтъёс сярысь, кудъёсыз кивалто отын, кытын Иеговалэн калыкез улэ. Иоаннлэн азьпалзэ ивортоназ та кивалтэтъёсты возьматэ сизьым йыро пӧйшур. Пӧйшурлэн сизьыметӥ йырыз — со Англо-Американской дунневыл держава. Та туж кулэ луись малпан, малы ке шуоно азьпалзэ ивортонын уг вераськы, пӧйшурлэн мукет йыръёсыз потозы шуыса. Куке Христос но солэн инмысь ожгарчиосыз та пӧйшурез, яке дунне вылысь вань кивалтэтъёсты, быдтыны кутскозы, пӧйшурлэн сизьыметӥ йырыз кивалтоз на b (Усьт. 13:1, 2; 17:13, 14).

13, 14. Кин со «Магог музъемысь Гог» но мар солэсь мылкыдзэ ӝутоз, вылды, Инмарлэн калыкез вылэ урдскыны?

¹³ Азьпалзэ ивортон, кудзэ Иезекииль гожтӥз, милемлы валаны юрттэ, мар луыны быгатэ уйпал но лымшор эксэйёсты быдтон азьын. Азьпалзэ ивортонъёсын, кудъёсыз гожтэмын Иезекиильлэн 38:10—23; Данииллэн 2:43—45; 11:44—12:1 но Усьтӥськонын 16:13—16, 21, одӥг югдур сярысь вераське, вылды. Та зэм ке, ми малпамъя, тани мар луыны кулэ.

¹⁴ Бадӟым куректонлэн кутскемез бере кӧня ке дыр ортчыса, «быдэс дунне вылысь музъем выл эксэйёс» кылдытозы калыкъёслэсь огазеяськонзэс (Усьт. 16:13, 14; 19:19). Библия та огазеяськонэз «Магог музъемысь Гог» шуыса нима (Иез. 38:2). Калыкъёслэн огазеяськонзы Инмарлэн калыкез вылэ урдскоз но сое быдэсак быдтыны тыршоз. Малы соос урдскозы? Со дыр сярысь азьпалзэ ивортоназ апостол Иоанн вера, Инмарлэн тушмонъёсыз вылэ «талант быдӟаесь йӧзоръёс» усьылозы шуыса (Усьт. 16:21). Та йӧзор возьматэ лек судъян иворез, кудзэ Иеговалэн ужась-тыршисьёсыз ялозы. Ӵапак та ивор «Магог музъемысь Гоглэсь» мылкыдзэ ӝутоз, вылды, Инмарлэн калыкез вылэ урдскыны, музъем вылысь сое быдэсак быдтон понна.

15, 16. а) Кыӵе югдур сярысь вераське, вылды, Данииллэн 11:44, 45? б) Мар луоз уйпал эксэен но «Магог музъемысь Гоглэн» мукет люкетэныз?

¹⁵ Та югдур сярысь ик — лек иворез веран сярысь но Инмарлэн калыкез вылэ урдскон сярысь — вераське, луоз, озьы ик Данииллэн 11:44, 45 (лыдӟе). Отын гожтэмын: «Шундыӝужанысь, уйпалась вуэм иворъёс сое [уйпал эксэез] куалектытозы, троссэ виылон, быдтон понна туж бадӟым вожпотонэн со султоз». «Троссэ» кыл Иеговалэсь ужась-тыршисьёссэ возьматэ, вылды. Та кылбуръёсын Даниил берпуметӥзэ лек урдскон сярысь вера, луоз c.

¹⁶ Куке уйпал эксэй но мукет кивалтӥсьёс Инмарлэн калыкез вылэ урдскозы, Иеговалэн туж вожез потоз. Собере Армагеддон  ожмаськон кутскоз (Усьт. 16:14, 16). Соку уйпал эксэй но мукет калыкъёс, кудъёсыз Библиын «Магог музъемысь Гог» шуыса нимасько, быдтэмын луозы, но нокин соослы уз юртты (Дан. 11:45).

17. Кин со Михаил, «Инмысь быдӟым азьвалтӥсь», кудӥз сярысь Данииллэн 12:1 вераське? Мар со али каре но мар ӝоген кароз?

¹⁷ Данииллэн азьпалзэ ивортонысьтыз мукетыз кылбур тросгес тодыны юрттэ со сярысь, кызьы уйпал эксэй но мукет кивалтэтъёс быдтэмын луозы но кызьы ми утемын луомы. (Лыдӟе Данииллэсь 12:1.) Мае возьматэ та кылбур? Михаил — со Иисус Христослэн, кивалтӥсь Эксэймылэн, эшшо одӥгез нимыз. Со Инмарлэн калыкез палан «сылэ» 1914-тӥ арысен, куке инмысь Эксэйлыкын эксэй луиз. Ӝоген со Инмарлэн калыкез пала «султоз» Армагеддон ожмаськонын, куке аслэсьтыз вань тушмонъёссэ быдтоз. Та ожмаськон адямиослэн улоназы туж секыт дырлэсь йылпумъяськемзэ возьматоз. Иоаннлэн азьпалзэ ивортоназ, кудӥз Усьтӥськон книгаын гожтэмын, та дыр «бадӟым курадӟон-куректон» шуыса нимаське (Усьт. 6:2; 7:14).

18. Малы ми азьпала кышкатэк учкыны быгатӥськомы?

¹⁸ Ми азьпала кышкатэк учкыны быгатӥськомы, малы ке шуоно Даниил но, Иоанн но азьло ик веразы, Иегова но Иисус Христос бадӟым куректон дыръя асьсэлэсь ужась-тыршисьёссэс утёзы шуыса. Даниил вераз: «Кинъёс книгае гожтэмын луозы, ваньзы утиськозы» (Дан. 12:1). Мар милемлы кароно, ниммы та «книгае» гожтэмын мед луоз шуыса? Милемлы возьматыны кулэ, ми Иисуслы, «Инмарлэн Ыжпиезлы», оскиськомы шуыса (Иоанн 1:29). Милемлы улонмес Инмарлы сӥзёно но пылатӥськоно (1 Пётр 3:21). Со сяна, милемлы Инмарлэн Эксэйлыкез пала султоно — вань кужмысьтымы мукетъёсызлы юрттыны тыршоно Иегова сярысь тодыны.

19. Мар милемлы али ик кароно ини но малы?

¹⁹ Али тужгес но тупась дыр Иеговалы но солэн организациезлы осконмес юнматыны. Али тупась дыр Инмарлэн Эксэйлыкез пала султыны. Озьы гинэ ми утиськыны быгатомы, куке Инмарлэн Эксэйлыкез уйпал но лымшор эксэйёсты быдтоз.