1-2. Ano an aton hihisgotan hini nga artikulo?

MAS damu gud an aton ebidensya yana kay han naglabay nga nagkikinabuhi na kita ha ultimo nga bahin han kataposan nga mga adlaw hini nga sistema han mga butang. Diri na mag-iiha, bubungkagon ni Jehova ngan ni Jesu-Kristo an ngatanan nga gobyerno nga nakontra ha Ginhadian. Antes ito mahitabo, an hadi han norte ngan an hadi han sur padayon nga makontra ha usa kag usa ngan ha katawohan han Dios.

² Hini nga artikulo, aton hihisgotan an tagna nga nakarekord ha Daniel 11:40–12:1. Mahibabaroan naton kon hin-o an hadi han norte yana ngan hihisgotan naton kon kay ano nga may pagsarig nga maaatubang naton an tiarabot nga mga pagsari.

3-4. Hin-o an hadi han norte yana? Isaysay.

³ Han nabungkag an Unyon Sobyet han 1991, an katawohan han Dios hito nga haluag nga katunaan nagkaada hin “gutiay nga bulig”​—kagawasan ha pipira ka panahon. (Dan. 11:34) Sugad nga resulta, may kagawasan nga nakasangyaw hira, ngan waray pag-iha nagkaada ginatos ka yukot nga magwarali ha mga nasud nga sakop hadto han Unyon Sobyet. Pero paglabay hin pipira ka tuig, an Russia ngan an mga kaalyado hito amo an nagin hadi han norte. Sugad han ginhisgotan ha nauna nga artikulo, basi magin hadi han norte o hadi han sur, kinahanglan buhaton han usa nga gobyerno an tulo nga butang: (1) nagmamando ha lugar diin naukoy an damu han katawohan han Dios o nagtitimaraot ha katawohan han Dios, (2) iginpapakita niya pinaagi ha iya buhat nga kaaway hiya ni Jehova ngan han Iya katawohan, ngan (3) nakikigkompetensya ha kaaway nga hadi.

 ⁴ Tagda kon kay ano nga makakasiring kita nga an hadi han norte yana amo an Russia ngan an mga kaalyado hito. (1) Gin-aatake nira an katawohan han Dios han igindiri nira an pagsangyaw nga buruhaton ngan gintitimaraot an ginatos ka yukot nga kabugtoan nga naukoy ha mga lugar nga sakop nira. (2) Iginpapakita hito nga mga buhat nga nasisina gud hira kan Jehova ngan ha Iya katawohan. (3) Nakikigkompetensya hira ha hadi han sur, an Anglo-Amerikano nga Gahum ha Kalibotan. Kitaon naton kon ano an ginbuhat han Russia ngan han mga kaalyado hito ngan kon kay ano nga nagpapamatuod ito nga hira an hadi han norte.

5. Ano an ginhihisgotan ha Daniel 11:40-43?

⁵ Basaha an Daniel 11:40-43. Ini nga bahin han tagna naghihisgot mahitungod han panahon han kataposan. An teksto nagpapabug-at han pagkompetensyahay han hadi han norte ngan han hadi han sur. Sugad han igintagna ni Daniel, ha panahon han kataposan, an hadi han sur “makikigdusoay,” o “makikigsungayay” ha hadi han norte.​—Dan. 11:40; ftn.

6. Ano an ebidensya nga an duha nga hadi nagdudusoay?

⁶ An hadi han norte ngan an hadi han sur padayon nga nakikigkompetensya ha usa kag usa para ha pagin pinakagamhanan nga gobyerno ha kalibotan. Pananglitan, tagda an nahitabo katapos han Girra ha Kalibotan II han gindominar han Unyon Sobyet ngan han mga kaalyado hito an kadak-an han Europa. An ginbuhat han hadi han norte nag-aghat ha hadi han sur nga mag-organisar hin internasyonal nga alyansa ha militar kontra ha hadi han norte. Ito nga organisasyon gintatawag nga NATO. An hadi han norte padayon nga nakikigkompetensya ha hadi han sur pinaagi ha paniguro nga magkaada han pinakamakusog nga pwersa-militar. An hadi han norte nakig-away ha hadi han sur pinaagi ha pagsuporta ha mga kaaway han hadi han sur ha mga girra ha Aprika, Asia, ngan Latin Amerika. Hinin bag-o la nga mga tuig, an Russia ngan an mga kaalyado hito nagin gamhanan gud ha bug-os nga kalibotan. Nakikig-away liwat hira ha hadi han sur pinaagi han mga kompyuter. An duha nga hadi nag-aakusar ha usa kag usa nga nagamit an tagsa ha ira hin nakakadaot nga mga computer program basi paluyahon an ira ekonomiya ngan politikal nga sistema. Ngan sugad han igintagna ni Daniel, an hadi han norte padayon nga maatake ha katawohan han Dios.​—Dan. 11:41.

7. Ano an “tuna nga Matahom”?

⁷ An Daniel 11:41 nasiring nga an hadi han norte masulod ha “tuna nga Matahom.” Ano ito nga tuna? Ha kadaan nga panahon, an literal nga tuna han Israel ginkukonsiderar nga amo “an pinakamatahom ha ngatanan nga katunaan.” (Ezek. 20:6) Pero nagin presyoso gud ito nga tuna kay ito an lokasyon diin ginbubuhat an tinuod nga pagsingba. Tikang han Pentekostes 33 C.E., an “tuna nga Matahom” diri na literal nga lugar ha kalibotan; angayan ito, kay an katawohan ni Jehova naukoy ha iba-iba nga dapit ha bug-os nga kalibotan. Lugod, an “tuna nga Matahom” yana amo an paagi han pagkinabuhi han katawohan ni Jehova nga nag-uupod han mga butang sugad han ira pagsingba kan Jehova pinaagi ha mga katirok ngan pagsangyaw.

8. Paonan-o an hadi han norte sinulod ha “tuna nga Matahom”?

⁸ Ha kataposan nga mga adlaw, an hadi han norte pauroutro nga sinulod ha “tuna nga Matahom.” Pananglitan, han an Nazi Germany an hadi han norte, partikular na han Girra ha Kalibotan II, ito nga hadi sinulod ha “tuna nga  Matahom” pinaagi ha pagtimaraot ngan pagpatay han katawohan han Dios. Katapos han Girra ha Kalibotan II han an Unyon Sobyet an nagin hadi han norte, ito nga hadi sinulod ha “tuna nga Matahom” pinaagi ha pagtimaraot ngan pagdistyero han katawohan han Dios.

9. Hinin bag-o la nga mga tuig, paonan-o an Russia ngan an mga kaalyado hito sinulod ha “tuna nga Matahom”?

⁹ Hinin bag-o la nga mga tuig, an Russia ngan an mga kaalyado hito sinulod liwat ha “tuna nga Matahom.” Paonan-o? Han 2017, igindiri hini nga hadi han norte yana an buruhaton han katawohan ni Jehova ngan ginpriso an iba han aton kabugtoan. Igindiri liwat hito nga hadi an aton mga publikasyon, pati na an Bag-o nga Kalibotan nga Hubad. Dugang pa, ginkompiskar niya an aton sanga nga opisina ha Russia pati an mga Kingdom Hall ngan mga Assembly Hall. Katapos hini nga iya mga ginbuhat, han 2018 an Nagmamando nga Lawas nagsiring nga an Russia ngan an mga kaalyado hito amo an hadi han norte. Pero, bisan pa kon sobra nga gintitimaraot an katawohan ni Jehova, diri hira nakikigbahin ha bisan ano nga buruhaton nga nakontra ha gobyerno o nangangalimbasog nga liwanan an mga gobyerno. Lugod, ginsusunod nira an sagdon ha Biblia nga mag-ampo para “ha ngatanan nga may higtaas nga katungdanan,” labi na kon an sugad nga mga tawo naghihimo hin mga desisyon nga makakaapekto ha kagawasan ha pagsingba.​—1 Tim. 2:1, 2.

10. Mapipirde ba han hadi han norte an hadi han sur? Isaysay.

¹⁰ An tagna nga nakarekord ha Daniel 11:40-45 kadak-an nga nakapokus ha buruhaton han hadi han norte. Nagpapasabot ba ini nga mapipirde niya an hadi han sur? Diri. An hadi han sur “buhi pa,” o naeksister pa ha panahon nga bubungkagon na ni Jehova ngan ni Jesus an ngatanan nga gobyerno han tawo ha girra han Armagedon. (Pah. 19:20) Kay ano nga makakasiguro gud kita? Tigamni an iginpapakita han mga tagna ha Daniel ngan ha Pahayag.

11. Ano an iginpapasabot han Daniel 2:43-45? (Kitaa an retrato ha kobre.)

¹¹ Basaha an Daniel 2:43-45. Iginhulagway ni​ propeta Daniel an sunod-sunod nga mga gobyerno han tawo nga nagmando ha lugar diin naukoy an damu han katawohan han Dios. Iginhulagway hira sugad nga iba-iba nga parte han usa nga daku gud nga metal nga estatwa. An ultimo hiton sunod-sunod nga mga gobyerno han tawo iginhulagway sugad nga mga tiil han estatwa nga hinimo ha puthaw nga may halo nga lapok. Ito nga mga tiil nagsisimbolo ha Anglo-Amerikano nga Gahum ha Kalibotan. Ito nga tagna nagpapasabot nga an Anglo-Amerikano nga Gahum ha Kalibotan nagmamando pa gihapon ha panahon nga bubungkagon na han Ginhadian han Dios an ngatanan nga gobyerno han tawo.

12. Ano an ginsisimbolohan han ikapito nga ulo han mapintas nga hayop, ngan kay ano nga importante nga hibaroan ito?

¹² Naghisgot liwat hi apostol Juan hin sunod-sunod nga mga gobyerno ha kalibotan nga nagmando ha lugar diin naukoy an damu han katawohan ni Jehova. Iginhulagway ni Juan ini nga mga gobyerno sugad nga mapintas nga hayop nga pito an ulo. An ikapito nga ulo hito nga hayop nagsisimbolo han Anglo-Amerikano nga Gahum ha Kalibotan. Importante gud ini kay waray na iba nga ulo nga maulpot katapos hini nga ulo. An ikapito nga ulo hini nga hayop nagmamando pa gihapon ha panahon nga bubungkagon na han Kristo ngan han iya langitnon nga kasundalohan ito nga ulo upod na han iba pa nga bahin han hayop. *​—Pah. 13:1, 2; 17:13, 14.

13-14. Hin-o hi “Gog ha tuna han Magog,” ngan ano an mahimo mag-aghat ha iya nga atakehon an katawohan han Dios?

¹³ An usa nga tagna nga iginrekord ni Ezekiel nagsusumat ha aton kon ano an posible mahitabo ha kataposan nga mga adlaw han hadi han norte ngan hadi han sur. Kon ginhuhunahuna naton nga an mga tagna ha Ezekiel 38:10-23; Daniel 2:43-45; 11:44–12:1; ngan Pahayag 16:13-16, 21 naghihisgot hin pariho nga peryodo han panahon ngan mga panhitabo, baga hin makakalaom kita nga ini nga masunod nga mga butang an mahitatabo.

¹⁴ Katapos magtikang an daku nga kasakitan, an “mga hadi ha bug-os nga inuukyan nga tuna” maghihimo hin alyansa han mga nasud. (Pah. 16:13, 14; 19:19) Ito nga alyansa gintatawag han Kasuratan nga “Gog ha tuna han Magog.” (Ezek. 38:2) Ito nga alyansa han mga nasud maatake ha katawohan han Dios ngan mangangalimbasog nga poohon hira. Ano an mag-aaghat hito nga pag-atake? Mahitungod hini nga panahon, hi apostol Juan nakakita hin diri ordinaryo nga dagku nga yelo nga nauran ha mga kaaway han Dios. Ito nga uran nga yelo mahimo magsimbolo ha mapwersa nga mensahe han paghukom nga iginpapasamwak han katawohan ni Jehova. Posible nga ito nga mensahe an mag-aghat kan Gog han Magog nga atakehon an katawohan han Dios basi poohon hira ha tuna.​—Pah. 16:21.

15-16. (a) Ano nga panhitabo an posible nga ginhihisgotan ha Daniel 11:44, 45? (b) Ano an mahitatabo ha hadi han norte ngan ha iba pa nga mga nasud nga nagkukompwesto han Gog han Magog?

¹⁵ Ini nga mapwersa nga mensahe ngan an ultimo nga pag-atake han mga kaaway han Dios posible nga amo gihapon an ginhihisgotan ha Daniel 11:44, 45. (Basaha.) Dida hito, nasiring hi Daniel nga “may mga sumat tikang ha este ngan tikang ha norte” nga nakakasamok ha hadi han norte, nga nagawas nga “may duro nga kapungot.” Katuyoan han hadi han norte nga “bungkagon an damu.” An gintutudlok han “damu” baga hin an katawohan ni Jehova. * Posible nga gin-uunabi dinhi ni Daniel an  pag-atake ha katawohan han Dios basi poohon hira.

¹⁶ Ini nga pag-atake han hadi han norte, upod han iba pa nga mga gobyerno ha kalibotan, makakapasina gud ha Makagarahum-ha-ngatanan ngan magriresulta ito ha girra han Armagedon. (Pah. 16:14, 16) Hito nga panahon, an hadi han norte, upod han iba pa nga mga nasud nga nagkukompwesto han Gog han Magog, bubungkagon, ngan “waray mabulig ha iya.”​—Dan. 11:45.

17. Hin-o hi Miguel nga “harangdon nga prinsipe” nga gin-unabi ha Daniel 12:1, ngan ano an iya ginbubuhat?

¹⁷ An sunod mismo nga bersikulo ha rekord ni Daniel naghahatag hin dugang nga detalye kon paonan-o bubungkagon an hadi han norte ngan an mga kaalyado hito ngan kon paonan-o kita matatalwas. (Basaha an Daniel 12:1.) Ano an iginpapasabot hini nga bersikulo? An Miguel iba nga ngaran han aton nagmamando nga Hadi, hi Kristo Jesus. “Natindog [hiya] para ha kaopayan” han katawohan han Dios tikang pa han 1914 han igin-establisar ha langit an iya Ginhadian. Diri na mag-iiha, “matindog” hiya, o bubungkagon niya, an iya mga kaaway ha girra han Armagedon. Ito nga girra magigin an ultimo nga panhitabo ha gintatawag ha Daniel nga an pinakamakuri gud nga “panahon han kasakitan” ha kasaysayan. Ha tagna ni Juan nga nakarekord ha Pahayag, an panahon antes gud hito nga girra gintatawag nga “daku nga kasakitan.”​—Pah. 6:2; 7:14.

18. Kay ano nga makakapabilin kita nga kalmado anoman an mahitabo ha tiarabot nga panahon?

¹⁸ Makakapabilin kita nga kalmado anoman an mahitabo kay hi Daniel ngan hi Juan nagsiring nga adton nag-aalagad kan Jehova ngan kan Jesus makakatalwas hinin waray kapariho nga panahon han kasakitan. Nagsiring hi Daniel nga an mga ngaran han matatalwas ‘isusurat ha libro.’ (Dan. 12:1) Ano an mahimo naton buhaton basi mahisurat an aton ngaran hito nga libro? Kinahanglan pamatud-an naton nga natoo kita kan Jesus, an Kordero han Dios. (Juan 1:29) Kinahanglan magpabawtismo kita sugad nga simbolo han aton dedikasyon ha Dios. (1 Ped. 3:21) Ngan kinahanglan ipakita naton an aton suporta ha Ginhadian han Dios pinaagi ha pagbuhat han aton mahihimo basi buligan an iba nga mahibaro mahitungod kan Jehova.

19. Ano an kinahanglan naton buhaton yana, ngan kay ano?

¹⁹ Yana na an panahon nga parig-unon an aton pagsarig kan Jehova ngan ha iya organisasyon han maunungon nga mga surugoon. Yana na an panahon nga suportaran an Ginhadian han Dios. Kon ginbubuhat naton ito, matatalwas kita kon bungkagon na han Ginhadian han Dios an hadi han norte ngan an hadi han sur.