1, 2. მუს გუვარჩიენთ თე სტატიას?

ამდღა ირფელ თიშა მეუთითენს, ნამდა თე ქვეყნიერებაშ ბოლო დღალეფიშ უკანასკნელ პერიოდის ფცხოვრენთ. თენა დღას ვა ჸოფე თეცალ არგამა! მალას, იეჰოვა დო იესო განადგურენა არძა მთავრობას, ნამუთ ოწინააღმდეგ ღორონთიშ სამეფოს. თე დროშ მოულაშახ, ჩრდილოეთიშ დო სამხრეთიშ მეფეეფ გაგრძელენა ართიანიშ წინააღმდეგ დო ღორონთიშ ხალხიშ წინააღმდეგ ბრძოლას.

² თე სტატიას, გუვარჩიენთ დანიელიშ 11:40—12:1-ს ინოჭარილ წინასწარმეტყველებას. ქიგებგენთ, მი რე ჩრდილოეთიშ მეფე ამდღა დო მუშენ შემლებნა მშვიდას ვორდათ დო მიღდან იმენდ, ნამდა იეჰოვა დამცვენა თი მოვლენეფიშ დროს, ნამუთ მალას მოხვადუ.

3, 4. მი რე ამდღა ჩრდილოეთიშ მეფე? გენწყით.

³ თიშ უკულ მუთ, 1991 წანას საბჭოთა კავშირქ აკოცუ, ღორონთიშ ხალხის თავისუფლებაქ ქიმიაჩ. დანიელ თეს მიშინუანს, მუჭოთ „ჭიჭე მოხვარას“ (დან. 11:34). შედეგო, თინეფს საშვალებაქ ქიმიაჩეს, თავისფალო იქადაგესკო დო მალას მაუწყებელეფიშ რიცხვიქ ოშობით ანთასეფს ქიმიოჭირინუ თი ქიანეფს, ნამუთ თეიშახ საბჭოთა კავშირიშ ნაწილ რდუ. მარა წანეფიშ უკულ, რუსეთ დო თიშ მოკავშირეეფქ ჩრდილოეთიშ მეფეთ გინირთჷ. მუჭოთ წოხლენ სტატიას გუვარჩით, მთავრობას, ნამუთ ჩრდილოეთიშ მეფეშ ვარდა სამხრეთიშ მეფეშ როლს ასრულენს სუმ მუდგარენ ოკო ახასიათენდას: 1) პირდაპირ გავლენა ოკო უღდას ღორონთიშ ხალხწკუმა, 2) მუშ მოქმედებეფით ოკო ოძირანდას, ნამდა ჯოგჷ იეჰოვა დო თიშ ხალხ, დო 3) ოკო ობრძოლდას მოწინააღმდეგე მეფეს.

 ⁴ თუდო მოჩამილ რე მიზეზეფ, მუდგაშ გურშენ იფჩიებუთ, ნამდა ჩრდილოეთიშ მეფე რუსეთ დო თიშ მოკავშირეეფ რე: 1) თინეფქ ღორონთიშ ხალხიშ წინააღმდეგ მიდართეს თით, ნამდა აკრძალეს ქადაგებაშ საქმე დო თხოზნა ოშობით ანთას და დო ჯიმას, მით თი ქიანეფს ცხოვრენა, ნამუთ მუნეფიშ მართველობაშ თუდო რე, 2) თინეფიშ მოქმედებეფ ოძირანს, ნამდა ჯოგნა იეჰოვა დო თიშ ხალხ, 3) თინეფ ოწინააღმდეგნა სამხრეთიშ მეფეს, ინგლის-ამერიკაშ მსოფლიო იმპერიას. მორთ ქობძირათ, მუ აკეთ რუსეთ დო თიშ მოკავშირეეფქ დო მუჭო ამტკიცენს თენა, ნამდა თინეფ ჩრდილოეთიშ მეფეშ როლს ასრულენა.

5. ნამ დროშ გურშენ რე ნაწინასწარმეტყველებ დანიელიშ 11:40—43-ს დო მუ მოხვადუდ თე დროს?

⁵ წეკითხით დანიელი 11:40—43. წინასწარმეტყველებაშ თე ნაწილ ყურადღებას ამახვილენს ბოლო დღალეფშე. თის მოჩამილ რე, მუჭო ოწინააღმდეგნა ჩრდილოეთიშ დო სამხრეთიშ მეფეეფ ართიანს. დანიელქ იწინასწარმეტყველ, ნამდა ბოლო დღალეფს, სამხრეთიშ მეფე გიშელენდჷ თიშ წინააღმდეგ (დან. 11:40).

6. მუჭო ობრძოლნა ჩრდილოეთიშ დო სამხრეთიშ მეფეეფ ართიანს?

⁶ ჩრდილოეთიშ დო სამხრეთიშ მეფეეფ აგრძელენა ართიანწკუმა ბრძოლას, მუშენდა ჟირხოლოს ოკო, ნამდა მსოფლიოს არძაშ უმოს ძალიერ მართველ რდას. მაგალთო, გუვარჩუათ მუქ მოხვად მაჟია მსოფლიო ომიშ უკულ, მუჟამსით საბჭოთა კავშირ დო თიშ მოკავშირეეფ ევროპაშ უმენტაშ ნაწილს მართუნდეს. ჩრდილოეთიშ მეფეშ თეცალ მოქმედებაქ აძულ სამხრეთიშ მეფე, ნამდა შექმნუკო საერთაშორისო სამხედრო ალიანს, ნამდგას ნატოთ მიშინუანა. ჩრდილოეთიშ დო სამხრეთიშ მეფეეფ ბრელ ფარას ახარჯენა, ნამდა შექმნან არძაშ უმოს ძალიერ ჯარ. ჩრდილოეთიშ მეფე თი გაგებათ ხოლო ობრძოლ სამხრეთიშ მეფეს, ნამდა ოხვარ თიშ ნტერეფს თი ომეფს, ნამუთ აფრიკას, აზიას დო ლათინურ ამერიკაშ ქიანეფს მეურს. ბოლო წანეფს, რუსეთ დო თიშ მოკავშირეეფს ხოლო უმოს ძალაუფლება უღნა მსოფლიოს. თეს გეძინელ, თინეფ სამხრეთიშ მეფეშ წინააღმდეგ კიბერ თავდასხმას ხოლო გიმირინუანა. თე ჟირ მეფე ართიანს აბრალენს თიცალ კომპიუტერულ პროგრამეფიშ გიმორნაფას, ნამუთ თინეფიშ ეკონომიკურ დო პოლიტიკურ სისტემეფს აზიანენს. მუჭოთ დანიელქ იწინასწარმეტყველ, ჩრდილოეთიშ მეფე აგრძელენს ღორონთიშ ხალხიშ წინააღმდეგ ულას (დან. 11:41).

7. მუ რე „სისქვამეშ ქიანა“?

⁷ დანიელიშ 11:41-ის ჭარჷ, ნამდა ჩრდილოეთიშ მეფე მიშელენდჷ „სისქვამეშ ქიანაშა“. ნამ ქიანაშე მეურს რაგად? ბიბლიურ დროს თენა რდუ ისრაელ, „არძა ქიანაშ სისქვამე“ (ეზეკ. 20:6). თინა თიშენ რდუ განსაკუთრებულ, ნამდა თექ მახორუ ხალხ იეჰოვას ცენდჷ თაყვანს. ახ. წ. 33 წანაშ ჟარნეჩდომავითა დღაშ დღახუშე მოჸუნაფილ თე „ქიანა“ ვა მეუთითენს კონკრეტულ გეოგრაფიულ ადგილშა, მუშენდა ამდღა ღორონთიშ ხალხ მთელ მსოფლიოს რე. ამდღა „სისქვამეშ ქიანა“ მეუთითენს სულიერ სამოთხეშა, მუდგაშა ქრისტიანულ შეხვალამეფ დო სამქადაგებლო მსახურება მიშურს.

8. მუ გაგებათ მიშართჷ ჩრდილოეთიშ მეფექ „სისქვამეშ ქიანაშა“?

⁸ ბოლო დღალეფს ჩრდილოეთიშ მეფექ ბრელშა მიშართჷ „სისქვამეშ ქიანაშა“. მაგალთო, მუჟამსით ჩრდილოეთიშ მეფე ნაცისტურ გერმანია რდუ, თინა თხოზუდ დო ჸვილუნდჷ ღორონთიშ ხალხის, განსაკუთრებულო მაჟია მსოფლიო ომიშ დროს. თეშნერო თიქ მიშელ „სისქვამეშ ქიანაშა“. მაჟია  მსოფლიო ომიშ უკულ საბჭოთა კავშირქ გინირთჷ ჩრდილოეთიშ მეფეთ დო თინა ხოლო თხოზუდ დო გინახორუანდჷ ღორონთიშ ხალხის. თეშნერო თიქ მიშელ „სისქვამეშ ქიანაშა“.

9. მუჭო მიშართეს ბოლო წანეფს რუსეთ დო თიშ მოკავშირეეფქ „სისქვამეშ ქიანაშა“?

⁹ ბოლო წანეფს, რუსეთ დო თიშ მოკავშირეეფქ ხოლო მიშართეს „სისქვამეშ ქიანაშა“. მუ გაგებათ? 2017 წანას რუსეთიქ აკრძალ ღორონთიშ ხალხიშ საქმიანობა დო ნამთინე ციხეს ქუდახუნუ. თეს გეძინელ, თიქ აკრძალ ჩქინ პუბლიკაციეფ, თინეფ შქას ბიბლიაშ „ახალ ქიანაშ თარგმანი“. ხვალე თენა ვარინ, თიქ მიდამღეს რუსეთიშ ფილიალიშ შენობეფ, სამეფო დო საკონგრესო დარბაზეფ. თე ირფელიშ უკულ, 2018 წანას ხემძღვანელ საბჭოქ რუსეთ დო თიშ მოკავშირეეფ ჩრდილოეთიშ მეფეთ გეგმაცხად. მარა სასტიკ თხოზინიშ უმკუჯინუო, ღორონთიშ ხალხ ხელისუფლებაშ წინააღმდეგ ვემურს დო თინეფ ვაცადნა დოთირუან მთავრობა. თეშ გინაწონს, მეჸუნა ბიბლიურ რჩევას, ნამდა ილოცან „არძაშო, მიდგას მაღალ მდგომარეობა უკინებ“ (1 ტიმ. 2:1, 2).

10. განადგურენსო ჩრდილოეთიშ მეფე სამხრეთიშ მეფეს? გენწყით.

¹⁰ დანიელიშ 11:40—45-ის ინოჭარილ წინასწარმეტყველება უმენტაშო ყურადღებას ამახვილენს ჩრდილოეთიშ მეფეშ მოქმედებეფშე. ნიშნენსო თენა თის, ნამდა ჩრდილოეთიშ მეფე სამხრეთიშ მეფეს განადგურენს? მუშო ოკო რაგად, ვარ. სამხრეთიშ მეფე „ცოცხალო“ იჸუაფ, მუჟამსით იეჰოვა დო იესო არძა ადამიანურ მთავრობას არმაგედონიშ ომს განადგურენა (გამოცხ. 19:20). მუშენ იფჩიებუთ თეს? მორთ გუვარჩუათ, მუს ნიშნენს დანიელს დო გამოცხადებას მოჩამილ წინასწარმეტყველებეფ.

11. მუ რე მოჩამილ დანიელიშ 2:43—45-ს ინოჭარილ წინასწარმეტყველებას? (ქოძირით სურათ გალენ გვერდის)

¹¹ წეკითხით დანიელი 2:43—45. დანიელიშ წინასწარმეტყველებას ეჭარილ რე ადამიანურ მართველობეფ, ნამდგას გავლენა უღჷ ღორონთიშ ხალხწკუმა. თინეფ მეტალიშ დიდ ქანდაკებაშ შხვადოშხვა ნაწილით რენა წარმოდგენილ. თინეფშე ბოლო ადამიანურ მთავრობა წარმოდგენილ რე ქანდაკებაშ ნარჩაკუჩხით, ნამუთ რკინა დო თიხაშ ნარევ რე. თე ნარჩაკუჩხ განასახიერენს ინგლის-ამერიკაშ მსოფლიო იმპერიას. მუჭოთ თე წინასწარმეტყველებას რე მოჩამილ, ინგლის-ამერიკაშ მსოფლიო იმპერია არსებენდას იჸი, მუჟამსით ღორონთიშ სამეფო განადგურენს ადამიანურ მთავრობეფს.

12. მუს განასახიერენს მხეციშ მაშქვითა დუდ დო მუშენ რე თენა მნიშვნელოვან?

¹² მოციქულ იოანე ხოლო ეჭარუნს თი მსოფლიო იმპერიეფს, მით თი ქიანეფს მართუნდეს, სოდეთ იეჰოვაშ ხალხ ცხოვრენდჷ. იოანეშ წინასწარმეტყველებას თე მთავრობეფ წარმოდგენილ რენა შქვითდუდამ მხეცით. თე მხეციშ მაშქვითა დუდ განასახიერენს ინგლის-ამერიკაშ მსოფლიო იმპერიას. თენა მნიშვნელოვან რე, მუშენდა თენა მხეციშ ბოლო დუდ რე. მხეციშ მაშქვითა დუდ იჸუაფ მართველ, მუჟამსით იესო დო მუშ ზეციერ ლაშქარ განადგურენს მხეციშ თე დუდის დო თიწკუმა ართო მთლიანო მხეცის * (გამოცხ. 13:1, 2; 17:13, 14).

13, 14. მი რე „გოგ მაგოგიშ დიხაშე“ დო მუ მიზეზით შილებე გიშელას თიქ ღორონთიშ ხალხიშ წინააღმდეგ?

¹³ ეზეკიელს ინოჭარილ წინასწარმეტყველებაშე ვორწყეთ, მუქ შილებე მოხვადას სოიშახ  ჩრდილოეთიშ დო სამხრეთიშ მეფეეფ გენადგურებნა. მუჭოთ იძირენ ეზეკიელიშ 38:10—23, დანიელიშ 2:43—45, 11:44—12:1 დო გამოცხადებაშ 16:13—16, 21-ის დროშ ართდოიგივე მონაკვეთშე დო მოვლენეფშე მეურს ჩიება. ათეშენ, შემლებნა ველდათ, ნამდა მოვლენეფ თეშ გევითარებ, მუჭოთ თე მუხლეფს რე მოჩამილ.

¹⁴ დიდ გასაჭირიშ დოჭყაფაშე გარკვეულ დროშ უკულ, „მთელ მსოფლიოშ მეფეეფ“ შექმნენა ერეფიშ კოალიციას (გამოცხ. 16:13, 14; 19:19). თე კოალიცია ბიბლიას მოშინაფილ რე, მუჭოთ „გოგ მაგოგიშ დიხაშე“ (ეზეკ. 38:2). ერეფიშ კოალიცია გიშელენს ღორონთიშ ხალხიშ წინააღმდეგ დო ეცადებ განადგურას თინეფ. მუ იჸუაფ თეშ მიზეზ? მუჟამსით მოციქულ იოანე თე დროშე წინასწარმეტყველენდჷ, თიქ თქუ, ნამდა ღორონთიშ ნტერეფშა ჭვემაცალო მოლეშ დიდ კირცხ. თე სიმბოლურ კირცხ შილებე მეუთითენდას იეჰოვაშ განაჩენშე, ნამდგას ღორონთიშ ხალხ გაცხადენს. შილებე ზუსტას თე ცნობაშ გურშენ გიშელას გოგ მაგოგიქ ღორონთიშ ხალხიშ წინააღმდეგ, ნამდა მოსპას თინეფ (გამოცხ. 16:21).

15, 16. ა) მუ მოვლენეფ შილებე რდას ეჭარილ დანიელიშ 11:44, 45-ის? ბ) მუ აღოლე ჩრდილოეთიშ მეფეს დო შხვა მთავრობეფს, მით გოგ მაგოგელიშ როლს შეასრულენა?

¹⁵ ღორონთიშ განაჩენიშ გაცხადება დო ღორონთიშ ნტერეფიშ თავდასხმა, შილებე თი მოვლენეფ რდას, ნამუთ ეჭარილ რე დანიელიშ 11:44, 45-ის (წეკითხით). თაქ დანიელ იჩიებ, ნამდა „აღმოსავლეთშე დო ჩრდილოეთშე მოულირ ამბეეფ“ გოუზარზალუანს ჩრდილოეთიშ მეფეს, ნამუთ „დიდ რისხუათ“ გიშელენს. თინა ეცადებ, „განადგურას ანაყუ“. მუჭოთ იძირე სიტყვა „ანაყუ“ იეჰოვაშ ხალხშა მეუთითენს. * შილებე დანიელ თაქ ეჭარუნდას ღორონთიშ ხალხშე საბოლა თავდასხმას.

¹⁶ მუჟამსით ჩრდილოეთიშ მეფე დო მსოფლიოშ შხვა მთავრობეფ ღორონთიშ ხალხიშ წინააღმდეგ გეგშულა, თენა მანგარო გარისხენს ღორონთის, მუდგას არმაგედონიშ ომი ქუმაჸუნუ (გამოცხ. 16:14, 16). თე დროს, ჩრდილოეთიშ მეფე მსოფლიოშ შხვა  მთავრობეფწკუმა ართო, მით გოგ მაგოგელიშ როლს ასრულენა, გენადგურებ „დო მოხვარე მითინ ვაჸვენუ“ (დან. 11:45).

17. მი რე „დიდ მთავარ“ მიქაელ, ნამუთ დანიელიშ 12:1-ს რე მოშინაფილ, დო მუს ორთჷ თინა?

¹⁷ დანიელიშ 12:1 მეტ ინფორმაციას მარზენა თიშ გურშენ, მუჭო გენადგურებნა ჩრდილოეთიშ მეფე დო თიშ მოკავშირეეფ დო მუჭო გინოფსქიდუთ ჩქი (წეკითხით). მუს ნიშნენს თე მუხლის ინოჭარილ სიტყვეფ? მიქაელ, ჩქინ მეფეშ, იესო ქრისტეშ ხოლო ართ სახელ რე. თინა ღორონთიშ ხალხიშ „გვერდით გერე“ 1914 წანაშე მოჸუნაფილ, მუჟამსით თიქ ღორონთიშ სამეფოშ მეფეთ გინირთჷ ზეცას. მალას თინა „მოქმედებას ქიდიჭყანს“, ნამდა განადგურას მუშ ნტერეფ არმაგედონიშ ომს. თე ომი ბოლო მოვლენა იჸუაფ, მუდგას დანიელ მიშინუანს მუჭოთ „გასაჭირს“, მუნერით დღას ვა ჸოფე. იოანე გამოცხადებაშ წიგნის თე დროს მიშინუანს, მუჭოთ „დიდ გასაჭირს“ (გამოცხ. 6:2; 7:14).

18. მუშენ შემლებნა მშვიდას ვორდათ დო მომავალს იმენდიშ თოლით ვუჯინათ?

¹⁸ დანიელ დო იოანექ თქუეს, ნამდა იეჰოვა დო იესო დიდ გასაჭირიშ დროს ირსხენა მუნეფიშ მსახურეფს. ათეშენ, მუდგაქ ვა მოხვადას, შემლებნა მშვიდას ვორდათ, დო მომავალს იმენდიშ თოლით ვუჯინათ. დანიელ იჩიებ, ნამდა თინეფ მიდგაშ სახელეფ „წიგნშა იჸუაფ ინოჭარილ“ გინასქიდუნა (დან. 12:1). მუ ოკო ვაკეთათ, ნამდა ჩქინ სახელქ წიგნშა იჸუას ინოჭარილქ? ჩქი არგამათ ოკო ვოძირათ, ნამდა იესოშ, ღორონთიშ კირიბიშ, რწმენას გიმიფრჩქინანთ (იოან. 1:29). ჩქი ოკო დიბნათათ დო თეთ ვოძირათ, ნამდა ღორონთშა მაფნა დუდ მეძღვინელ (1 პეტ. 3:21). თეს გეძინელ, ჩქი იეჰოვაშ გურშენ შხვეფს ოკო ქუგვოგებაფუათ დო თეშნერო ვოძირათ, ნამდა ხუჯის ვუკინენთ ღორონთიშ სამეფოს.

19. მუ ოკო ვაკეთათ ასე დო მუშენ?

¹⁹ ზუსტას ასე რე თიშ დრო, ნამდა უმოსო მივენდათ იეჰოვას დო თიშ ორგანიზაციას. ასე რე დრო, ხუჯ დუკინათ ღორონთიშ სამეფოს. თაშ ქიმიფქციებუთ-და, გეგნოფსქიდუთ, მუჟამსით ღორონთიშ სამეფო ჩრდილოეთიშ დო სამხრეთიშ მეფეეფს განადგურენს.