1-2. Ino raha hidinihintsika amy lahatsoratra ty ato?

MARO porofo anan̈antsika fa miain̈y amy tapany farany aminandra farany atsika, intsaka eky iziô. Tsy ho ela, Jehovah ndreky Jesosy Kristy han̈afoan̈a fitondrasan̈a jiaby manohitry Fanjakan̈any Zan̈ahary. Fa alohanizen̈y, panjakany avaratra ndreky panjakany atsimo hiady amy vahoakany Jehovah.

² Amy lahatsoratra ty ato, atsika handiniky faminanian̈any Daniela 11:40–12:1. Ho hitantsika ato azovy marin̈y panjakany avaratra izioty, baka io amy karakory fatokisantsika Jehovah han̈ampy atsika tsy ho taitaitry, na ino na ino raha mandalo.

3-4. Azovy ma panjakany avaratra iziô? Hazavà.

³ Izikoa fa ravan̈a Firaisan̈a Sovietiky taminy 1991, somary nahazo fahafahan̈a hely panompony Zan̈ahary tan̈y. Nahazo “fan̈ampian̈a hely” iro, ho Daniela. (Dan. 11:34) Tsy navoasakan̈a asa fitorian̈a nataondro, ke betibetiky nanjary antapitrisany maro isakany pitory tamy Firaisan̈a Sovietiky taloha. Koa fa nandeha fotoan̈a, Russie ndreky fanamany nanjary panjakany avaratra. Efa nikoran̈intsika tamy lahatsoratra taloha in̈y fa tsy maintsy mahafeno raha telo ty fitondrasan̈a araiky zay vo mety kahian̈a panjakany avaratra na atsimo: 1) Fitondrasan̈a io man̈enjiky vahoakany Jehovah na manjaka amy tany maro olo manompo Jehovah, 2) hita amy raha ataony fa halany i Jehovah ndreky vahoakanany, baka io 3) hifan̈oesa panjaka aroe io.

⁴ Ino aby antony ivolan̈antsika fa Russie ndreky fanamany ankitin̈y panjakany avaratra io izioty? 1) Iro nan̈enjiky vahoakany  Jehovah, avio nisakanandro asa fitorian̈a. Anjatony tapitrisa koa rahalahy ndreky ranabavy an̈y injehindro. 2) Hita baka amy raha ataondro fa halandro Jehovah ndreky panomponany. 3) Tsy voly iro mifan̈oesa amy panjakany atsimo: Grande-Bretagne ndreky Etazonỳ. Alo hizahavantsika ino aby raha nataony Russie ndreky fanamany, misy azahoantsika antoko tsarabe fa iro ankitin̈y panjakany avaratra.

5. Ombian̈a ma raha koran̈iny Daniela 11:40-43 io tanteraka, baka io ino raha misy amy leranizen̈y?

⁵ Vakia Daniela 11:40-43. Faminanian̈a io mikoran̈a raha mandalo amy vanimpotoan̈any farany. Hifan̈oesa mare panjakany avaratra ndreky atsimo. Zen̈y raha ten̈a hita amizio ao, fotony efa nambarany Daniela fa iro io “hifan̈aposy.”—Dan. 11:40.

6. Baiboly mivolan̈a fa iro panjaka aroe io ‘hifan̈aposy.’ Akory nampatanteraka zen̈y?

⁶ Panjakany avaratra ndreky atsimo tsy voly mifan̈oesa, fotony iro samby tihanjary fanjakan̈a farany matanjaka erantany. Diniha hely baka raha nandalo tafarany Ady Lehibe II in̈y! Nanjary nanjaka tamy faritry maro tan Eropy tan̈y Firaisan̈a Sovietiky ndreky fanamany. Izikoa fa hitany panjakany atsimo fa tiho ratsiratsy fandehany, nitaon̈o firenena maromaro izy nanangana fikambanan̈a araiky. OTAN an̈arany fikambanan̈a io. Natraotrondro tafikindro jiaby, fotony iro mikendry hiady amy panjakany avaratra. Tsy voly mifan̈oesa amy panjakany atsimo koa panjakany avaratra amy fan̈amboaran̈a fitaovan̈a fiadivan̈a, ke masaky mandany vola mandeha miliara miliara. Tsy basinizen̈y fo fa, nitahitahy fahavalony panjakany atsimo koa iro, koa fa nisy lagera tan Afriky, tan Asie, ndreky tan Ameriky Latiny tan̈y. Nahainahazo fahifan̈a fo Russie ndreky iro fanamany aby io, tan̈atiny taon̈o vitsivitsy tato. Mampiasa programo aminy ordinatera koa iro hiadivan̈a amy panjakany atsimo. Panjaka aroe io samby mifan̈ady fa mampiasa programo aminy ordinatera zen̈y ny araiky handrobatan̈a fanan̈ana ndreky fitondrasan̈any araiky. Tsy zen̈y fo fa eraka raha nikoran̈iny Daniela in̈y, mbala manafiky vahoakany Zan̈ahary mare koa panjakany avaratra.—Dan. 11:41.

7. Ino ma “Taniny Hatsaran̈a” zen̈y?

⁷ Koran̈iny Daniela 11:41 fa panjakany avaratra hiditry amy “Tany Kanto” na “Taniny Hatsaran̈a.” Izio ma ten̈a tany ankitikitin̈y? Zen̈y ke. Izio manondro tanindro Israelita aby io. “Sanjiny tany jiaby” nahaizanolo taniny Israely taloha tan̈y, fotony izio tamy zen̈y tany farany tsara erantany. (Ezek. 20:6) Fa ny raha ten̈a nampiavaka izio, olo tao nanompo Jehovah. Nanomboko tamy Pantekoty taon̈o 33, izio efa tsy tany ankitikitin̈y eky. Nan̈ino ma? Fotony misy panompony Jehovah aby amy tany jiaby. Amy zioty, “Taniny Hatsaran̈a” io manondro fanompoan̈a ataony vahoakany Jehovah erantany. An̈isanizen̈y fivorian̈a ndreky fitorian̈a.

8. Akory nahitan̈a fa niditry tamy “Taniny Hatsaran̈a” ankitin̈y panjakany avaratra?

⁸ Efa matetiky panjakany avaratra niditry tamy “Taniny Hatsaran̈a” io tan̈atiny andra farany ty. Ohatra iziô, taminy Allemagne mbala panjakany avaratra, tamy faha Nazỳ in̈y, efa niditry tao edy izy taminy Ady Lehibe II. Nan̈enjiky ndreky namono panompony Jehovah izy. Niditry  tamy “Taniny Hatsaran̈a” io koa Firaisan̈a Sovietiky taminizy nanjary panjakany avaratra, tafarany Ady Lehibe II. Fotony nan̈ino? Nan̈enjiky vahoakany Jehovah mare koa izy, avio maro tamindro io nalefany sesitany.

9. Ino porofo fa niditry tamy “Taniny Hatsaran̈a” koa Russie ndreky fanamany, tatoatony tato?

⁹ Tatoatony tato, niditry tamy “Taniny Hatsaran̈a” io koa Russie ndreky fanamany aby io. Amy karakory? Taminy 2017, Russie nisakana asa fitorian̈a ataony Vavolombelon̈o Jehovah, amy faritry hanjakany. Nigadrainy koa sasany amindro rahalahy ndreky ranabavintsika an̈y. Tsy nimboany naboaka foeky boky ndreky gazetintsika, an̈isanizen̈y Baiboly Fandikan-tenin’ny Tolontolo Vaovao. Nisakanany koa jw.org, baka io nalainy lastio birôny sampan̈a ta Russie tan̈y miaraka amy Tran̈o Fivorian̈a ndreky Tran̈o Fan̈anovan̈a Fivoriambe. Raha jiaby zen̈y nahavy Filankevipitantan̈ana nivolan̈a taminy 2018 in̈y, fa Russie ndreky firenena miaraka aminany panjakan̈any avaratra. Marin̈y ndraiky fa injehin̈y mare vahoakany Jehovah, fa tsy honohono iro foeky han̈andran̈a handrongana fanjakan̈a na hitariky fan̈ovoan̈a. Mifen̈y fo iro man̈araka raha koran̈iny Baiboly ke iro “mivavaka ninolo jiaby manan̈a plasy an̈abo”, intsaka eky izikoa fanapahankevitrindro pitondra aby io mety hisy vokany amy fanompoan̈andro.—1 Tim. 2:1, 2.

10. Ho resiny panjakany avaratra ma panjakany atsimo? Hazavà.

¹⁰ Raha hataony panjakany avaratra fo ten̈a koran̈iny Daniela 11:40-45 ao. Dikanizen̈y ma panjakany atsimo io ho resiny? Aha. Mbala ho “velon̈o” fo panjakany atsimo, lera fitondrasan̈a jiaby ambony tany ty hiravan̈iny Jehovah ndreky Jesosy, aminy ady Aramagedona. (Apok. 19:20) Mankamarin̈y zen̈y raha koran̈iny faminanian̈any Daniela ndreky Apokalypsy ao.

11. Ino ma raha tiany Daniela 2:43-45 io koran̈iny? (Zahava sary amy fon̈ony gazety ty.)

¹¹ Vakia Daniela 2:43-45. Paminan̈y Daniela nikoran̈a momba sarivongana maventy be vita amy metaly isankarazany. Izio manondro karazan̈a fitondrasan̈a nanjaka tamy faritry ten̈a nisy panompony Jehovah. Samby isany fotoan̈a nanjakandro io. Vita amy vy miaro tanimanga vitiny sarivongana io. Vitinany aroe io manondro Fanjakan̈a Farany Matanjaka Erantany Angiley-Amerikain, ke amy fanjakan̈a jiaby nisolosolo zay, io farany amy fitondrasan̈a misy ambony tany eto. Hita baka amy faminanian̈a io fa mbala manjaka fo fitondrasan̈a Angiley-Amerikain io, lera Fanjakan̈any Zan̈ahary handravan̈a fitondrasan̈a jiaby erantany.

12. Manondro ino ma loha fahafitony biby dy io? Nan̈ino raha zen̈y mampandiniky?

¹² Apostoly Jaona koa nikoran̈a mikasiky fitondrasan̈a maromaro nifandimby, nanjaka tamy faritry ten̈a nisy panompony Jehovah. Fitondrasan̈a aby io nampiran̈iny amy biby dy misy loha fito, ke loha fahafito aminany io manondro Angiley-Amerikain Firenena Farany Matanjaka Erantany. Mampandiniky raha zen̈y, fotony efa tsy ho hisy loha hafa eky haniry baka amy biby dy in̈y afaranizen̈y. Dikanizen̈y, mbala mitondra loha fahafito io lera Kristy ndreky tafikinany aby andan̈itry an̈y handripaka izio ndreky lambiny amy biby dy in̈y. *—Apok. 13:1, 2; 17:13, 14.

13-14. Azovy “Goga baka amy tany Magoga”? Mety ho ino antony hahavy izy hanafiky olony Zan̈ahary?

¹³ Fandinihan̈a faminanian̈a nisoratany Ezekiela han̈ampy atsika hahay raha handalo alohany handripahan̈a panjakany avaratra ndreky atsimo. Izikoa faminanian̈a io ampifandraisin̈y amy Daniela 2:43-45; 11:44–12:1 avio Apokalypsy 16:13-16, karaha raha araiky fo tiandro jiaby io koran̈iny. Izikoa zen̈y ankitin̈y, ino raha efa ampoizintsika fa hiboaka?

¹⁴ Afara heliny fanombohany fahorian̈a be, ‘panjakany tany jiaby misy olo’ hitambatra. (Apok. 16:13, 14; 19:19) Ke iro firenena maromaro mitambatra io izy kahiany Soratra Masin̈y aminy an̈aran̈a “Goga baka amy tany Magoga” io. (Ezek. 38:2) Hifen̈y angovo jiaby iro io hanafiky vahoakany Jehovah erantany. Asa nan̈ino? Nisy raha nambarany apostoly Jaona momba zen̈y. Izy ho izy nahita havandra maro maventy latsaka tamy fahavalony Zan̈ahary. Mifan̈itsy aminino ma havandra aby io? Izio hafatra mahery momba didipitsaran̈any Zan̈ahary, handeha hambarany vahoakany Jehovah aminolo amy donia ty. Mety ho baka amy zen̈y hahavy Goga baka Magoga hanafiky vahoakany Zan̈ahary, fotony tiany ho ripaka iro!—Apok. 16:21.

15-16. a) Mety mikoran̈a momba ino Daniela 11:44, 45 io? b) Han̈ano akory hifaran̈any panjakany avaratra ndreky lambiny fitondrasan̈a jiaby an̈isany Goga baka Magoga?

¹⁵ Mety ho momba raha aroe io raha koran̈iny Daniela 11:44, 45 (Vakia). Tsy ino zen̈y fa, atsika han̈ambara hafatra mahery, avio hanafiky atsika iro fahavalony Zan̈ahary io. Koran̈iny Daniela fa hialamboetry mare panjakany avaratra koa fa haharen̈y ‘tatitry baka amy tany fiboahany masoandra ndreky baka avaratra.’ Ho ‘meloko mare’ izy, ke tetikinany ‘hamono olo farany maro.’ Mety ho vahoakany Jehovah * ‘olo farany maro’ tiany koran̈iny io. Ary mety ho zen̈y koa raha tiany Daniela hambara iô io.

 ¹⁶ Ino ma raha handalo lera panjakany avaratra ndreky fitondrasan̈a jiaby ambony tany eto hanafiky vahoakany Jehovah? Ho meloko mare Jehovah Zan̈ahary Farany Mahery io, ke hanomboko ady Aramagedona. (Apok. 16:14, 16) Panjakany avaratra miaraka amy fitondrasan̈a jiaby ambony tany eto Goga baka Magoga io. Amy zen̈y eky hifatesany, fotony “tsisy olo han̈avotro izy.”—Dan. 11:45.

17. Azovy ma Mikaela “araiky andriana be” koran̈iny Daniela 12:1 io, baka io ino raha hataony?

¹⁷ Amy Daniela 12:1 (vakia) ao man̈azava tsarabe fomba hifaran̈any panjakany avaratra ndreky iro fanamany aby io. Izio mikoran̈a momba Mikaela, na Kristy Jesosy efa manjaka. Nanjary panjakany Fanjakan̈any Zan̈ahary andan̈itry an̈y izy taminy 1914, ke nanomboko tamy zen̈y izy ‘nitsangana hiaro’ vahoakany Zan̈ahary. Mbala ‘hitsangana hiaro’ vahoakany Zan̈ahary koa izy tsy ho ela, ke haripany iro fahavalony Zan̈ahary aby io aminy ady Aramagedona. Manomboko ady io, izikoa fa tapitry “fotoan̈a hisiany fahorian̈a” mbala tsiary nisy tamy tantara, koran̈iny andininy io. “Fahorian̈a be tsisy ambaka izy” fomba hikoran̈iny Jaona “fotoan̈a hisiany fahorian̈a” io, aminy Apokalypsy ao.—Apok. 6:2; 7:14.

18. Nan̈ino ma atsika tsy tokony havozo na ino na ino raha handalo aminy hoavy?

¹⁸ Nan̈ino ma atsika tsy tokony havozo na ino na ino raha handalo aminy hoavy? Fotony na Daniela na Jaona, samby nan̈ambara fa amy fahorian̈a be io, Jehovah ndreky Jesosy hamonjy lan̈iany olo manompo Jehovah. Nivolan̈a Daniela fa ho “voasoratra an̈atiny boky” an̈aranolo tafitsaka velon̈o. (Dan. 12:1) Ino raha tokony hataontsika baka ho voasoratra ao an̈arantsika? Tsy maintsy aboakantsika fa atsika mino Jesosy, Zanaka ondrikondriky Zan̈ahary. (Jaona 1:29) Atsika mila manokanten̈a amy Zan̈ahary, baka io hatao batisa. (1 Pet. 3:21) Tsy maintsy milampy amy Fanjakan̈any Zan̈ahary koa atsika, ke han̈ampy olo hahay Jehovah tsarabe.

19. Ino ma raha tokony hataontsika rango zioty? Nan̈ino?

¹⁹ Iziô fotoan̈a tokony hampitombosan̈a fatokisan̈a Jehovah ndreky fandaminan̈anany. Iziô koa fotoan̈a tokony han̈aboahantsika tsarabe fa milampy amy Fanjakan̈any Zan̈ahary atsika. Izikoa atsika man̈ano zen̈y, atsika ho voavonjy lera Fanjakan̈a io handravan̈a panjakany avaratra ndreky atsimo.