1, 2. ¿Baʼax ken k-xakʼalt teʼ xookaʼ?

BEJLAʼEʼ yaʼab baʼax eʼesik kuxaʼanoʼon tu tsʼoʼokbal u tsʼook kʼiiniloʼob le kʼasaʼan yóokʼol kaabaʼ. Maʼ kun xáantaleʼ Jéeoba yéetel Jesucristoeʼ yaan u xuʼulskoʼob le gobiernoʼob ku tsʼáaikubaʼob tu contra le Reinooʼ. Chéen baʼaleʼ antes u yúuchul lelaʼ, u reyil xaman yéetel u reyil noojoleʼ yaan u seguer u atacarkubaʼob yéetel yaan xan u seguer u atacarkoʼob u kaajal Dios.

² Teʼ xookaʼ yaan k-xakʼaltik u profecíail Daniel 11:40 tak 12:1. Yaan k-naʼatik máax u reyil xaman teʼ kʼiinoʼobaʼ yéetel yaan xan k-ilik baʼaxten maʼ unaj k-sajaktal k-aktáant le baʼaxoʼob ku taal u kʼiinil u yúuchloʼ.

3, 4. Tsol máax u reyil xaman teʼ kʼiinoʼobaʼ.

³ Le ka saʼat le Unión Soviética tu añoil 1991, le máaxoʼob meyajtik Dios kajaʼanoʼob teʼ luʼumiloʼob jeʼeloʼ xuʼul u chʼaʼpachtaʼaloʼob junpʼéel tiempo. Bey úuchik u kʼamkoʼob le «junpʼíit áantaj» tu yaʼalaj le profeta Danieloʼ (Dan. 11:34). Yoʼolal lelaʼ béeychaj u kʼaʼaytajoʼob jeʼex suukil u beetkoʼobeʼ, le oʼolal maʼ xáanchaj ka yaʼabchaj le sukuʼunoʼob teʼ luʼumiloʼob táakaʼanoʼob kaʼach ichil le Unión Soviéticaoʼ. Chéen baʼaleʼ jujunpʼíitileʼ Rusia yéetel le luʼumoʼob apoyarkoʼ kʼuch u beetubaʼob u reyil xaman. Jeʼex t-kanil teʼ xook máanoʼ yaan óoxpʼéel baʼal kʼaʼabéet u beetik junpʼéel gobierno utiaʼal ka aʼalaʼak letiʼ u reyil xaman wa u reyil noojol: yáaxeʼ ka gobernarnakoʼob tuʼux kajaʼan yaʼab máaxoʼob meyajtik Dios wa ka u chʼaʼpachtoʼob.  U kaʼapʼéeleʼ ka u beetoʼob baʼaloʼob ka u yeʼes jach u pʼekmoʼob Jéeoba yéetel u kaajal. Yéetel u yóoxpʼéeleʼ ka u paklan atacartubaʼob.

⁴ Beoraaʼ koʼoneʼex ilik baʼaxten k-aʼalikeʼ Rusia yéetel le luʼumoʼob apoyarkoʼ letiʼob u reyil xaman. Yáaxeʼ tumen tsʼoʼok u prohibirkoʼob u kʼaʼaytaj u kaajal Dios yéetel tsʼoʼok u chʼaʼpachtikoʼob le sukuʼunoʼob teʼ luʼumiloʼob tuʼux ku gobernaroʼoboʼ. U kaʼapʼéeleʼ tumen yoʼolal le baʼax ku beetkoʼoboʼ ku yeʼeskoʼob u pʼekmoʼob Jéeoba bey xan u kaajal. Yéetel u yóoxpʼéeleʼ táan u baʼateloʼob tu contra u reyil noojol wa Gran Bretaña yéetel Estados Unidos. Koʼoneʼex ilik baʼaxoʼob tsʼoʼok u beetik Rusia yéetel le luʼumoʼob apoyarkoʼ utiaʼal u yaʼalaʼal letiʼob u reyil xaman.

5. 1) ¿Tiʼ baʼax tiempoil táan u tʼaan Daniel 11:40 tak 43? 2) ¿Baʼax kun úuchul teʼ tiempo jeʼeloʼ?

⁵ (Xok Daniel 11:40-43). Le profecíaaʼ táan u tʼaan tiʼ baʼax kun úuchul teʼ tu tsʼook kʼiinoʼoboʼ. Le baʼax ku yaʼalik le versículoʼob 40 tak 43, ku yeʼesik bix u paklan atacarkuba u reyil xaman yéetel u reyil noojol. Danieleʼ tu yaʼaleʼ tu tsʼook kʼiinoʼobeʼ u reyil noojol yéetel u reyil xamaneʼ «yaan u paklan léenchʼintikubaʼob» wa u «atacarkubaʼob» (Dan. 11:40; nota).

6. ¿Baʼax eʼesik láayliʼ táan u paklan atacarkuba le kaʼatúul reyoʼoboʼ?

⁶ U reyil xaman yéetel u reyil noojoleʼ láayliʼ táan u baʼateloʼob utiaʼal u yilkoʼob máax tiʼ letiʼob maas yaan u páajtalil tiʼ tuláakal yóokʼol kaab. Jeʼex le ka tsʼoʼok le u Kaʼapʼéel Nojoch Guerraoʼ le Unión Soviética yéetel le luʼumoʼob apoyarkoʼ ku controlarkoʼob óoliʼ tuláakal u luʼumiloʼob Europa. Yoʼolal leloʼ u reyil noojoleʼ tu yilaj u formartik junpʼéel ejército yéetel uláakʼ luʼumiloʼob utiaʼal ka baʼatelnak tu contra u reyil xaman, le luʼumoʼob tu muchʼubaʼobaʼ tu kʼaabaʼtaj OTAN. U reyil xaman yéetel u reyil noojoleʼ táan u competiroʼob utiaʼal ka ilaʼak tiʼ máax yaan le ejército maas yaan u páajtaliloʼ. Tsʼoʼoleʼ teʼ guerraʼob tsʼoʼok u yantal África, Asia yéetel América Latinaoʼ cada juntúul tiʼ le reyoʼobaʼ tu apoyartaj le máaxoʼob yanoʼob tu favoroʼ. Lelaʼ ku yeʼesik láayliʼ táan u atacarkubaʼobeʼ. Teʼ tu tsʼook añosaʼ Rusia yéetel le luʼumoʼob apoyarkoʼ tsʼoʼok u káajal u controlarkoʼob uláakʼ luʼumiloʼob. Tsʼoʼoleʼ tsʼoʼok xan u meyajtiʼob Internet utiaʼal u atacarkoʼob u reyil noojol. Le kaʼatúul reyoʼobaʼ ku paklan takik u pooloʼob, tumen juntúuleʼ ku yaʼalik tiʼ uláakʼeʼ táan bin u kʼaskúuntaʼal le información yaantiʼ utiaʼal u yóotsiltal wa utiaʼal u perjudicartaʼal u gobiernooʼ. Tsʼoʼoleʼ jeʼex tu yaʼalil Danieleʼ u reyil xamaneʼ láayliʼ táan u atacartik u kaajal Dioseʼ (Dan. 11:41).

7. ¿Baʼax le «Kiʼichkelem Luʼumoʼ»?

⁷ Daniel 11:41, ku yaʼalikeʼ u reyil noojoleʼ yaan u yokol teʼ «Kiʼichkelem Luʼumoʼ». ¿Baʼax le Kiʼichkelem Luʼumoʼ? Úuchjeakileʼ u luʼumil Israeleʼ ‹letiʼ u maas jatsʼutsil tiʼ tuláakal le luʼumoʼoboʼ› (Eze. 20:6). Ku yaʼalaʼal kaʼach jach jatsʼuts tumen tiʼ ku adorartaʼal Jéeobaiʼ. Chéen baʼaleʼ desde le Pentecostés tiʼ le año 33, le «Kiʼichkelem Luʼumoʼ» maʼ junpʼéel kaajiʼ mix junpʼéel luʼumiʼ, tumen u kaajal Dioseʼ tiaʼan tiʼ tuláakal yóokʼol kaabeʼ. ¿Baʼax túun le «Kiʼichkelem Luʼum» teʼ kʼiinoʼobaʼ? Letiʼe u kaajal Dios yaan way Luʼumeʼ. Ichil le kaajaʼ le máaxoʼob meyajtik Diosoʼ ku beetkoʼob yaʼab baʼaloʼob utiaʼal u adorarkoʼob, jeʼex le muchʼtáambaloʼob yéetel le kʼaʼaytajoʼ.

8. ¿Bix tsʼoʼok u atacartik u reyil xaman le «Kiʼichkelem Luʼumoʼ»?

⁸ Teʼ tu tsʼook kʼiinoʼobaʼ u reyil xamaneʼ yaʼab  u téenel tsʼoʼok u atacartik le «Kiʼichkelem Luʼumoʼ». Bey úuchik u beetik Alemania teʼ Kaʼapʼéel Nojoch Guerraoʼ, teʼ kʼiinoʼoboʼ letiʼ kaʼach u reyil xaman. Letiʼeʼ tu atacartaj le «Kiʼichkelem Luʼum» le ka tu chʼaʼpachtaj yéetel ka tu kíimsaj le máaxoʼob meyajtik Diosoʼ. Le ka tsʼoʼok le Kaʼapʼéel Nojoch Guerraoʼ le Unión Soviéticaoʼ kʼuch u beetuba u reyil xaman. Letiʼ xaneʼ tu atacartaj le «Kiʼichkelem Luʼum» le ka tu chʼaʼpachtaj yéetel le ka tu jóoʼsaj le máaxoʼob meyajtik Dios teʼ luʼum tuʼux kajaʼanoʼoboʼ.

9. ¿Bix tsʼoʼok u atacartaʼal le «Kiʼichkelem Luʼum» tumen Rusia yéetel le luʼumoʼob apoyarkoʼ?

⁹ Maʼ úucheʼ Rusia yéetel le luʼumoʼob apoyarkoʼ tu atacartoʼob le «Kiʼichkelem Luʼumoʼ». ¿Bix tu beetiloʼob? Tu añoil 2017, Rusiaeʼ tu prohibirtaj le meyaj ku beetik u testigoʼob Jéeobaoʼ yéetel tu yoksaj cárcel jujuntúul sukuʼunoʼob. Tu prohibirtaj xan le publicaciónoʼob yaantiʼoboʼ, jeʼex le Biblia Túumben Luʼumoʼ. Tsʼoʼoleʼ tu chʼaʼaj u najil Betel, le najoʼob tuʼux ku muchʼkuba u testigoʼob Jéeobaoʼ yéetel le najoʼob tuʼux ku beetaʼal asambleaʼoboʼ. Yoʼolal le baʼaloʼob úuchaʼ tu añoil 2018, le Cuerpo Gobernanteoʼ tu yileʼ Rusia yéetel le luʼumoʼob áantkoʼ letiʼob u reyil xaman teʼ kʼiinoʼobaʼ. Chéen baʼaleʼ le máaxoʼob meyajtik Diosoʼ kex ka sen chʼaʼpachtaʼakoʼobeʼ maʼ tu baʼateloʼob tu contra le gobiernooʼ mix tu yilkoʼob ka kʼeʼexek. Tu lugareʼ ku yilik u oraroʼob tu «yoʼolal tuláakal le máaxoʼob yaan autoridad tiʼoboʼ», maases wa le autoridadoʼobaʼ táan u yilkoʼob wa yaan u seguer u chaʼikoʼob k-meyajtik Dios wa maʼ (1 Tim. 2:1, 2).

10. U reyil xamaneʼ, ¿yaan wa u xuʼulsik tiʼ u reyil noojol? Tsole.

¹⁰ Le baʼax ku yaʼalik Daniel 11:40 tak 45, maases táan u tʼaan tiʼ u reyil xaman. Le profecíaaʼ, ¿u kʼáat wa túun u yaʼaleʼ u reyil xamaneʼ yaan u xuʼulsik tiʼ u reyil noojol? Maʼ. Tumen ichil le gobiernoʼob kun xuʼulsbil teʼ Armagedón tumen Jéeoba yéetel Jesúsoʼ, tiaʼan tak u reyil noojoliʼ (Apo. 19:20). ¿Baʼaxten bey k-aʼalikoʼ? Utiaʼal k-ojéeltikeʼ koʼoneʼex xakʼaltik u profecíail Daniel yéetel Apocalipsis.

11. ¿Baʼax ku yeʼesik u profecíail Daniel 2:43 tak 45? (Ilawil le dibujo yaan tu yáax táan juʼunil le revistaaʼ).

¹¹ (Xok Daniel 2:43-45). Le profeta Danieloʼ tʼaanaj tiʼ junpʼéel nuxiʼ imagen beetaʼan yéetel jejeláas metaloʼob. Cada xóotʼ tiʼ le imagenaʼ ku keʼetel yéetel junpʼéel gobierno tu atacartaj u kaajal Dios. U yook le imagen beetaʼan de kʼat yéetel fierrooʼ ku chíikbesik le u tsʼook gobiernooʼ: Gran Bretaña yéetel Estados Unidos. Le profecíaaʼ ku yeʼesikeʼ le gobiernoaʼ láayliʼ táan u gobernar le kéen xuʼulsaʼak tiʼ tuláakal le gobiernoʼob tumen u Reino Diosoʼ.

12. ¿Máax le u tsʼook pool tiʼ le u siete pooloʼob le baʼalcheʼoʼ, yéetel baʼax maʼ unaj u tuʼubultoʼoniʼ?

¹² Le apóstol Juanoʼ tʼaanaj xan tiʼ le gobiernoʼob tsʼoʼok u chʼaʼpachtikoʼob u kaajal Jéeobaoʼ. Letiʼeʼ tu ketaj le gobiernoʼobaʼ yéetel juntúul tsʼíitsʼik baʼalcheʼ yaan siete u pooloʼob. Le u tsʼook pool tiʼ le u siete pooloʼoboʼ ku chíikbesik Gran Bretaña yéetel Estados Unidos. Maʼ unaj u tuʼubultoʼoneʼ minaʼan uláakʼ pool, letiʼ u tsʼookoʼ. Le u siete poolaʼ láayliʼ táan u gobernar le kéen taalak Cristo yéetel u ángeloʼob utiaʼal u xuʼulskoʼobtiʼ. Bey kun xuʼulsbil tiʼ letiʼ paʼteʼ yéetel u maasil luʼumoʼob táakaʼanoʼob ichil le tsʼíitsʼik baʼalcheʼoʼ (Apo. 13:1, 2; 17:13, 14). *

13, 14. ¿Máax «Gog ku taal tiʼ u luʼumil Magog», yéetel baʼax wal kun péeksik u xuʼuls u kaajal Dioseʼ?

¹³ Junpʼéel profecía yaan tu libroil Ezequieleʼ ku yáantkoʼon k-naʼat baʼax wal kun úuchul tiʼ u reyil xaman yéetel tiʼ u reyil noojol antes u xuʼulsaʼaloʼobeʼ. Le profecíaʼob ku chíikpajal tiʼ Ezequiel 38:10 tak 23; Daniel 2:43 tak 45; Daniel 11:44 tak 12:1 yéetel Apocalipsis 16:13 tak 16 yéetel 21, maʼ xaaneʼ tiʼ junpʼéeliliʼ baʼax ku tʼaan. Wa beyoʼ koʼoneʼex xakʼaltik jujunpʼéel tiʼ le baʼaxoʼob k-tuklik kun úuchloʼ.

¹⁴ Le maʼ úuch káajak le nojoch muʼyajiloʼ, «u reyiloʼob tuláakal yóokʼol kaab[eʼ]» yaan u muchʼkubaʼob (Apo. 16:13, 14; 19:19). Teʼ Bibliaoʼ le múuchʼ luʼumoʼobaʼ ku kʼaabaʼtik «Gog ku taal tiʼ u luʼumil Magog» (Eze. 38:2). Letiʼobeʼ yaan u atacarkoʼob u kaajal Dios yéetel yaan u yóotik u láaj xuʼulsoʼob. ¿Baʼaxten kun taaktal u xuʼulskoʼob? Tiʼ junpʼéel profecía tu tsʼíibtaj apóstol Juaneʼ tu yilaj táan u kʼáaxal nukuch bat yóokʼol u enemigoʼob Dios. Maʼ xaaneʼ le nukuch bataʼ ku chíikbesik le baʼax ken u kʼaʼayt le máaxoʼob meyajtik Diosoʼ, yaan u yaʼalikoʼob tiʼ le kʼasaʼan máakoʼob yaan u xuʼulsaʼaltiʼoboʼ. Maʼ xaaneʼ le baʼax kun kʼaʼaytbiloʼ le kun péeksik «Gog ku taal tiʼ u luʼumil Magog» utiaʼal u xuʼulsik u kaajal Dios (Apo. 16:21).

15, 16. 1) Maʼ xaaneʼ, ¿tiʼ baʼax ku tʼaan u profecíail Daniel 11:44 yéetel 45? 2) ¿Baʼax kun úuchul tiʼ u reyil xaman yéetel tiʼ Gog ku taal tiʼ u luʼumil Magog?

¹⁵ Maʼ xaaneʼ Daniel 11:44 yéetel 45 (xoke), láayliʼ táan u tʼaan tiʼ le xuʼulsajil ken u kʼaʼayt u kaajal Dios le táan le nojoch muʼyajiloʼ. Le tekstoaʼ maʼ xaaneʼ táan xan u tʼaan tiʼ le kéen tsʼok atacartaʼak u kaajal Diosoʼ. U profecíail Danieleʼ ku yaʼalikeʼ u reyil xamaneʼ «le kéen u yuʼub le noticiaʼob ku taaloʼob desde teʼ lakʼin yéetel desde teʼ xamanoʼ yaan u chiʼichnaktal. Letiʼ túuneʼ jach pʼujaʼan le kéen jóokʼok utiaʼal u [...] xuʼulsik tiʼ yaʼab máakoʼob». Maʼ xaaneʼ le «yaʼab máakoʼob» ku yaʼalik le tekstoaʼ letiʼe máaxoʼob meyajtik Jéeobaoʼ. * Maʼ xaaneʼ Danieleʼ táan u tʼaan tiʼ bix kun tsʼok atacarbil u kaajal Dios.

 ¹⁶ Le kéen líikʼik u reyil xaman yéetel le luʼumoʼob áantik tu contra u kaajal Diosoʼ yaan u beetik u pʼuʼujul Jéeoba, le Dios jach táaj yaan u poderoʼ. Bey túun kun káajal Armagedónoʼ (Apo. 16:14, 16). Le kéen úuchuk lelaʼ u reyil xamaneʼ «maʼ kun antal mix máak utiaʼal áantik», tumen tsʼoʼok «u kʼuchul u kʼiinil u xuʼulsaʼaltiʼ» (Dan. 11:45). Bey xan kun xuʼulsbil tiʼ le múuchʼ luʼumoʼob ku kʼaabaʼtik «Gog ku taal tiʼ u luʼumil Magog[oʼ]».

17. 1) ¿Máax Miguel, «le nojoch príncipe», ku yaʼalik Daniel 12:1? 2) ¿Baʼax ku beetik teʼ kʼiinoʼobaʼ, yéetel baʼax ken u beet ichil junpʼíit kʼiin?

¹⁷ Le Bibliaoʼ ku maas tsolik bix kun xuʼulsbil u reyil xaman paʼteʼ yéetel le luʼumoʼob wa gobiernoʼob áantkoʼ, bey xan bix kun salvarbil u kaajal Dios. Le profecíaaʼ tiaʼan tiʼ Daniel 12: 1 (xoke). Koʼoneʼex ilik bix unaj u naʼataʼal le tekstoaʼ. Migueleʼ uláakʼ kʼaabaʼ tsʼaʼan tiʼ Jesucristo. Letiʼeʼ desde tu añoil 1914, táan u yeʼesik ‹tiaʼan tu favor u kaajal› Dioseʼ. Teʼ año xanoʼ beetaʼab Reyil tiʼ u Reino Dios. Maʼ kun xáantaleʼ Jesucristoeʼ «yaan u líikʼil», lelaʼ u kʼáat u yaʼaleʼ yaan u xuʼulsik tiʼ u enemigoʼob teʼ Armagedónoʼ. Le «kʼiinoʼob tuʼux kun sen muʼyaj máak» tu yaʼalaj Danieloʼ yaan u tsʼoʼokol tu baʼatelil Armagedón. Le kʼiinoʼob tu yaʼalaj Danieloʼ láayliʼ letiʼe «nojoch muʼyajil» tu chʼaʼchiʼitaj Juan tu libroil Apocalipsisoʼ (Apo. 6:2; 7:14).

18. ¿Baʼaxten maʼ unaj k-sajaktal kex jeʼel baʼalak ka úuchkeʼ?

¹⁸ Le profecíaʼob tu tsʼíibtaj Daniel yéetel Juanoʼ ku yaʼalikeʼ le máaxoʼob meyajtik Jéeoba yéetel Jesúsoʼ yaan u salvartaʼaloʼob tu kʼiinil le nojoch muʼyajiloʼ. Le oʼolaleʼ jeʼel baʼalak ka úuchkeʼ maʼ unaj k-sajaktaliʼ. Danieleʼ ku yaʼalikeʼ yaan u salvarkuba tuláakal le máaxoʼob «tsʼíibtaʼan u kʼaabaʼob teʼ librooʼ» (Dan. 12:1). ¿Baʼax unaj k-beetik utiaʼal u tsʼíibtaʼal k-kʼaabaʼiʼ? Unaj k-eʼesik yaan k-fe tiʼ Jesús, u Taman Dios (Juan 1:29). Unaj xan k-kʼubik k-kuxtal tiʼ Jéeoba yéetel k-okjaʼ (1 Ped. 3:21). Tsʼoʼoleʼ unaj k-eʼesik tiʼ yanoʼon tu tséel u Reino Dioseʼ, lelaʼ k-eʼesik kéen k-beet tuláakal le ku páajtal utiaʼal k-áantik u maasil u kʼaj óoltoʼob Jéeobaoʼ.

19. ¿Baʼax unaj k-beetik bejlaʼeʼ, yéetel baʼaxten?

¹⁹ Bejlaʼeʼ u kʼiinil k-kanik k-maas confiar tiʼ Jéeoba yéetel tiʼ u kaajal. U kʼiinil xan k-eʼesik tiaʼanoʼon tu tséel u Reino Dioseʼ. Wa k-beetik beyoʼ yaan k-salvartaʼal kéen xuʼulsaʼak u reyil xaman yéetel u reyil noojol tumen u Reino Dios.