Sowal ni Sara *: “Mikikaemang kako halingodoay, cangoˈotay ko pakasoˈlin no niyah. Ano kalacafay to misatakalaway tamdaw i, cowa ka rihaday kako, malacafay to damsayay tamdaw mahokalay kako. Samanen o mahaenay tamdaw madoloay mifohat to falocoˈ, mihadak to nafalocoˈan ato pasangaray no niyah. O sangaˈayay a widang ako sahtoay o damsayay a tamdaw.”

O nafalocoˈan ni Sara mahapinangay ita, o damsayay a capeling misolotay to tamdaw. Ano paihkal kita to damsayay wa pakahemek ci Yihofaan, mihaenay Cingra pakalalok kitaanan: ‘Ka picaˈedong to . . . damsayay.’ (Kolosay 3:12) Mankora, o maanan ko damsayay hani? Samanay ci Yis paihkal to mahaenay a capeling hani? Malo damsayay tamdaw hano patongal to lipahak ita hani?

O damsayay o rihadayay a capeling. O damsayay tamdaw madaˈmaˈay a micada to tao, soˈlin misiˈayaw to kacarirawan a pakayraan ngaˈayayho a rihaday.

O damsayay tamdaw tanektekay ko falocoˈ. Mihongyakan to ‘damsayay’ Krisiya sowal ngaˈayay patinakoen to mapaenepay a efa. Soˈlin taˈangayay ko ˈicel noniya efa, kawra mapahatatanamto i, minanamayto cira miˈimer to ˈicel no niyah. Malecaday, o damsayay tamdaw pakaˈimeray to keter no niyah, ngaˈay mararihaday to tao.

Harateng ita hofochan o cowa ko damsayay ko niyah saan alatek. Roma i, adihayay ko misatakalaway anca macalohay a tamdaw i tatihi ita, pasangaray kita paihkal to damsayay. (Loma 7:19) Palahad to damsayay wa misadak to ˈicel, kawra o papafeli ci Yihofa to fangcalay saocor kitaanan, padama kitaanan padadotoc a mihaen to demak. (Kalatiya 5:22, 23) Mihadak to ˈicel hano iraay ko epoc hani?

O damsayay malo ngaˈayay ingiden a tamdaw kita. Malecad o misowalan ni Sara, maolahay kita malacafay to damsayay a tamdaw. O mikiriwiˈay a damsay, mikiriwiˈay a sidaˈit ci Yis, ano oyato cowa kafanaˈ cingranan a wawa maolahay kalacafay cingraanan.—2 Korinto 10:1; Marko 10:13-16.

O damsayay wa ngaˈay midipot kitaanan ato itihiay ita a tamdaw eca ka madokaˈ. Mitafo kita to damsayay, cowato ko mamararid a maketer anca macariraw. (Taneng 16:32) Mihaen, cato ko  mamadokaˈ ko itihiay ita a tamdaw, ano oniyahto cowa ko papakayni pidokaˈ to tao, mangalef oya kaolahan ita a tamdaw, makesem ko falocoˈ.

Soˈlin ˈifowaay ci Yis, aretengay ko ˈinorong, kawra oyanan a damsay micada to polong a tamdaw. O kaˈorip no tamdaw itiya tada marorayay, taˈangayay ko saroero, misaaliay to sapakalalok. Hananay ni Yis pasowal cangra: ‘Katayni takowanan . . . samanen damsayay ko capeling ako, misapoeneray ko falocoˈ.’ Matengil ko pihaen ni Yis to sowal, maedeng masayaray cangra.—Matay 11:28, 29.

Samaan ko demak ita ngaˈ malecad ci Yisan a damsay hani? Ngaˈayay micekiw kita to Fangcalay Cudad, minengneng to samanay ci Yis micada to tao, samanay misiˈayaw to pasangaray pakayraan. Mihaen, ano misiˈayaw kita to malecaday a pakayraan i, mamafanaˈ minanam ci Yisan. (1 Pitiro 2:21) Dotoc, nengnengen ita ko tolo a lalangian to hano ngaˈay ci Yis mitafo to damsayay.

Tada misapoeneray ko falocoˈ ni Yis. Sowal ni Yis to niyah ‘damsayay ko capeling, misapoeneray ko falocoˈ.’ (Matay 11:29) Marariday ko Fangcalay Cudad malecad ko pilengo to misapoeneray ato damsayay, samanen oniya tosa capeling makelecay caka licinowas.—Ifiso 4:1-3.

O misapoeneray tamdaw cowa pisaidahi, cowa ka nalikay maketer. Ira ko milikafay ci Yisan to ‘halikaenay haliepahay’ i, samanay ko caˈof ni Yis hani? Tada misapoeneray cingra, saan: ‘O taneng tano waywayan ko sapisawacay.’ O waywayan ningra soˈlinay misawacay to mararaway ko pilikaf no tamdaw.—Matay 11:19.

Ano ira ko tamdaw pakayni i finacadan iso, tatirengan ato kalomahadan a lalengawan somowal to tatiihay sowal i, wa ngaˈay kiso damsay ko pipacaˈof cingranan han? Itini Katimol Afrika salikaka ci Pitelo, sanay: “Latekay cowa ka hemek kako to sowal no tao, saan kako miharateng: ‘Ano ci Yis i, wa samaan ko harateng ningra hani?’” Sanay ko dotoc a sowal ni Pitelo: “Maharekayto kako minanam eca ka nalikay a maketer.”

Mafanaˈay ci Yis cowa kalefot ko tamdaw. O nisawawaan ni Yis makalimay midemak to matatodongay a demak, kawra pakayni kaeca kalefot cowa pakadangar. Tinakoen, ˈayaw no mamapatay ci Yis a dadaya, mitahidangan ningra ci Pitiro, Yakop aci Yohani pacafay cingraanan, midama cingraanan, kawra mafotiˈay cangra. Siniˈadaay ci Yis cangraanan, sanay: ‘Faedetay ko falocoˈ, kawra malonayay ko tireng.’ (Matay 26:40, 41) Mafanaˈay ci Yis citolasay ko ˈicel nangra, mansa cowa ka maketer.

Maˈaraway ni Yis ko dangoc no tao, kamayan a siniˈada cangraanan, mitafo to damsayay, wa ngaˈay kiso malecad ci Yisan a micada to tamdaw han? Ci Manti ˈakawangay ko saali to tao, kawra misaˈicelay cingra minanam ci Yisan nohatini, damsay a micada to tao. Sanay cingra: “Marariday kako patalipaˈelal to niyah, cowa ko malefotay ko tamdaw, pahecaden ako ci Yis minengneng to kangaˈayan no tao.”

Mitiˈeray ci Yis to Kawas. Itiniho fafekang no sera ci Yis i, cowa ka sadafdaf ko macadaay, pakararawan no tamdaw cingra, misakahmawan, pasemseman. Kawra padotocay cingra mitafo to damsayay, samanen ‘paikenan ningra ko niyah toya masadafdafay ko pisawkit a Tatapangan.’ (1 Pitiro 2:23) Mafanaˈay ci Yis, oha papadama ko kakarayan Wama cingraanan, itini matatodongay a tatokian patado cingraanan misalof to demak.

Ano samsamen no tamdaw kita i, micoˈay kita, mamatongal ko tatiih no demak alatek, samanen sowal no Fangcalay Cudad: ‘O keter no tamdaw cowa ko mamicowat to moecelay no Kawas.’ (Yakop 1:20) Soˈlin iraay ko lalangian ita a maketer, pakayni kaeca kalefot nalikay a maketer, telocto mamidemak to mararaway a demak.

Itini Towic fafahiyan salikaka ci Kaysi, harateng ningra i salakat ano eca paˈading to niyah, wa awato ko papaˈading cingraanan a tamdaw. Kawra ikor minanamay cingra mitiˈer ci Yihofaan, mafalicayto ko harateng. Sanay cingra: “Nohatini cowato ka caloh kako paˈading to moecelay noniyah. Ngaˈayay mitafo kako to damsayay, samanen mafanaˈay kako, o kihecod maontingay no kamay ni Yihofa.” Ano tahacadaay kiso to cowa ka sadafdaf a demak,  palecaden ci Yisan mitiˈer to Kawas, mihaen o ngangaˈay mitafo to damsayay.

Sowal ni Yis: ‘O damsayay tamdaw o lalipahak.’ (Matay 5:5) Tatodong ningra i, saka lipahakaw ko kaˈorip no tamdaw, o damsayay a capeling o kalimlaan. Dotoc nengnengen ita, o damsayay itini pina pakayraan wa ira ko maanan a sakangaˈay ita.

Ano eca kalecad ko harateng to raramod i, o damsayay wa ngaˈay misayar to marawraway a pakayraan. Itini Australia cecay faˈinayan salikaka ci Lopote, sanay: “Maketer kako i, somowalay to midokaˈay a sowal i fafahi, mahadak koniya sowal cowato ka ngaˈay lidongen. Maˈaraw cingra masomad, makesemay kako.”

Ano somowal i, ‘kinapinaay a mararaw ko tamdaw,’ ano mararaw ko sowal mipalakay to kalalaˈed no raramod. (Yakop 3:2) Ano iraay ko damsayay a capeling ita, eca kalecad ko harateng to raramod i, ngaˈayay mitafo to rihadayay, eca ka patelas a somowal.—Taneng 17:27.

Ikor misaˈicelay ci Lopote mitafo to rihadayay ato miˈimeray. Sanay: “Nohatini, ano eca kalecad ko harateng ako to fafahi i, misaˈicelay kako a mitengil, damsay a pacaˈof, eca ka maketer ko niyah. Mansa ngaˈayayto ko kalalaˈed niyam.”

O damsayay matongalay ko kangaˈay no kalacafay ita to tao. O haliketeray a tamdaw awaay ko widang, o damsayay ngaˈayay ‘pakayni ka rihaday a makelec.’ (Ifiso 4:2, 3) O masowalay i fafekang ci Kaysi sanay: “Misaˈicelay kako mitafo to damsayay, mansa ngaˈay malacafay to tao, ano oyato pasangaray kalacafayen a tamdaw cowa ka mamaan.

O damsayay parihadayay to falocoˈ no tamdaw. O rihadayay ato damsayay masalalomaˈay no ‘minaroˈan no fangcalay saocor,’ oniya tosa capeling o malalitingay. (Kalatiya 5:22, 23) O damsayay tamdaw ‘rihadayay ko falocoˈ.’ (Taneng 14:30) Cecay ci Mating a faˈinayan salikaka misaˈicelay palahad to damsayay a capeling, sanay: “Nohatini makahiayto kako a micaˈi, cowato kalecad to salakatay ˈatekak ko falocoˈ, mansa matongalay ko lipahak ako, rihadayayto ko falocoˈ.”

Palahad to damsayay cowa ko madoloay. O cecay faˈinayan salikaka sanay: “Soˈlinen ko sowal, maketerayho ko falocoˈ ako nolatekay.” Kawra, kamayan pakalalok ci Yihofa kitaanan micangacang to damsayay, hanaca o papadama Cingra kitaanan malaˈosi koniya patosokan. (Isaya 41:10; 1 Timoti 6:11) Wa lahecien Ningra ko pipahatatanam kitaanan, patanektek kitaanan. (1 Pitiro 5:10) Salikor, wa malecad kita ci Pawloan, paihkal to ‘mahaenay ni Kristo a damsay ato sidaˈitay waywayan.’—2 Korinto 10:1.