Be flɛ bla kun kɛ Sara. * Ɔ seli kɛ: “N sa ɲan. Yɛ n lafiman min wun su kpa. Ɔ maan kɛ e nin be nga be lafi be wun su dan annzɛ be ti wakawaka e o’n, n wunman min wun fɛ. Sanngɛ kɛ e nin be nga be ti wɛtɛɛfuɛ’n annzɛ be ti wun ase kanfuɛ’n e o’n, min wun fa min feke. Afin n kwla kan wafa nga min wun yo min’n, ɔ nin min su sa’m be ndɛ n kle sran sɔ mun. Min janvuɛ nga e nin be e afiɛn mantan kpa’n, be kwlaa be ti wɛtɛɛfuɛ annzɛ wun ase kanfuɛ.”

Ndɛ nga Sara kannin’n kle kɛ sɛ e ti wɛtɛɛfuɛ’n, sran’m bé kúnndɛ kɛ bé fá be wun bé mántan e naan bé káci e janvuɛ. Sran ng’ɔ ti wɛtɛɛfuɛ’n kusu’n, Zoova klo i sa. I sɔ’n ti yɛ Biblu’n se kɛ e ‘yo wɛtɛɛfuɛ’n’ niɔn. (Kol. 3:12) ?Sanngɛ kɛ be se kɛ sran kun ti wɛtɛɛfuɛ’n, i bo’n yɛle benin? ?Wafa sɛ yɛ Zezi kleli kɛ ɔ ti wɛtɛɛfuɛ-ɔ? ?Ngue ti yɛ sɛ e ti wɛtɛɛfuɛ’n, é dí aklunjuɛ-ɔ?

Sran ng’ɔ ti wɛtɛɛfuɛ’n, i like yolɛ yoman ya. Kpɛkun ɔ nin i wiengu’m be tran klanman. Kɛ sa’m be tɔ i su kusu’n ɔ si i awlɛn tra.

Sran wie’m be bu i kɛ sran ng’ɔ ti wɛtɛɛfuɛ’n, ɔ ti srɛfuɛ annzɛ ɔ leman wunmiɛn. Sanngɛ i sɔ’n timan nanwlɛ. Glɛki nun ndɛ mma nga be kacili i wawle nun kɛ “wɛtɛɛ yolɛ’n,” be fa kan nnɛn kpanngɔ kun mɔ be ko trɛ i blo lɔ be wa tɛ i klɔ’n i ndɛ. Kɛ be tɛ i’n i wunmiɛn’n wieman, sanngɛ be sa sɔn i su. I wafa kunngba’n, sɛ e ti wɛtɛɛfuɛ’n kannzɛ fɔ o e nun’n, sanngɛ é sí e wun su nían. Kpɛkun e nin e wiengu mun é trán klanman.

E kwla se e wun kɛ ‘e timan wɛtɛɛfuɛ.’ Andɛ’n, e tran be nga be siman be wun su nian mɔ be yo be wiengu’m be sa yaya’n be afiɛn. I sɔ’n ti’n, kɛ ɔ ko yo naan y’a yo wɛtɛɛfuɛ’n, ɔ kwla yo kekle. (Rɔm. 7:19) Ɔ maan ɔ fata kɛ e mian e ɲin kpa naan y’a kwla yi nzuɛn sɔ’n i nglo. Sanngɛ Zoova kwla fɛ i wawɛ’n uka e naan y’a yi nzuɛn sɔ’n i nglo. (Gal. 5:22, 23) ?Sanngɛ ngue ti yɛ ɔ fata kɛ e mian e ɲin naan y’a yo wɛtɛɛfuɛ titi-ɔ?

Sɛ e ti wɛtɛɛfuɛ’n, sran’m bé fá be wun bé mántan e. Kɛ Sara sa’n e kunndɛ kɛ e nin be nga be ti wɛtɛɛfuɛ mun’n yɛ é trán-ɔn. Wɛtɛɛ yolɛ nin klun ufue yolɛ nun’n, Zezi kle e ajalɛ kpa. (2 Kor. 10:1) I kpa bɔbɔ’n, ba kanngan wie mɔ be simɛn i’n be kunndɛli kɛ bé fá be wun mɛ́ntɛn i.​—Mar. 10:13-16.

 Kɛ e ti Wɛtɛɛfuɛ’n e bɔbɔ e ɲan su ye kpɛkun e wiengu’m be ɲan su ye wie. Sɛ e ti wɛtɛɛfuɛ’n, e su faman ya ndɛndɛ. (Nya. 16:32) Ɔ maan e su wɔman sran wie i safle ngbɛn. I li be nga e klo be’n be yɛ e su yoman sɔ be lika-ɔ. Ɔ maan e akunndan’n su buman e fɔ. Asa ekun’n, kɛ e ti wɛtɛɛfuɛ’n, e wiengu’m be ɲan su ye wie. Afin e nian e wun su yɛ e nin be tran klanman.

Zezi dili junman dan, yɛ blɛ wie nun’n w’a ɲɛnmɛn i ti. Sanngɛ ɔ yoli wɛtɛɛfuɛ titi. I blɛ su’n, afɛ o sran kpanngban be su yɛ be wunman be wun fɛ. Ɔ maan ɔ fata kɛ be fɔnvɔ be. I sɔ’n ti’n, Zezi seli be kɛ: “Amun bla min sin. [...] Afin n ti wɛtɛɛfuɛ, yɛ n ti wun ase kanfuɛ.” (Mat. 11:28, 29) E si kɛ kɛ ɔ seli be sɔ’n, ɔ yoli be fɛ kpa.

?Wafa sɛ yɛ e kwla yo wɛtɛɛfuɛ kɛ Zezi sa-ɔ? Maan e suan Ɲanmiɛn Ndɛ’n nun like naan e wun wafa nga Zezi nin sran’m be nantili’n, ɔ nin like nga blɛ kekle nun’n ɔ yoli’n. I liɛ’n sɛ sa wie nun’n wɛtɛɛ yolɛ’n ti kekle man e’n, é nían Zezi i ajalɛ’n su. (1 Piɛ. 2:21) Maan e fa e ɲin e sie i like nsan ng’ɔ ukali Zezi naan w’a kwla yo wɛtɛɛfuɛ’n, be su.

Zezi yoli wun ase kanfuɛ. I bɔbɔ seli kɛ ɔ ti ‘wɛtɛɛfuɛ, yɛ ɔ ti wun ase kanfuɛ.’ (Mat. 11:29) Kpɛ sunman Biblu’n nun’n kɛ bé kán wɛtɛɛ yolɛ’n i ndɛ’n, be kan wun ase kanlɛ’n i ndɛ wie. Afin nzuɛn nɲɔn sɔ’m be kɔ likawlɛ. (Efɛ. 4:1-3) ?Ngue ti yɛ ɔ ti sɔ-ɔ?

Sɛ e ti wun ase kanfuɛ’n, e su bumɛn i kɛ e ti kpa e tra e wiengu mun. Yɛ sɛ be yo e sa’n, e su faman ya ndɛndɛ. ?Kɛ sran’m be seli Zezi kɛ ɔ ti ‘aliɛ safuɛ nin nzan nɔnfuɛ’n,’ ngue yɛ ɔ yoli-ɔ? Wafa ng’ɔ yoli ninnge mun’n, ɔ kleli kɛ sran sɔ’m be ndɛ’n timan nanwlɛ. Asa ekun’n, kɛ m’ɔ ti wun ase kanfuɛ’n ti’n, ɔ seli kɛ “kɛ sran kun yo sa’m be nuan su sɛsɛsɛ’n, yɛ ɔ kle kɛ ɔ si ngwlɛlɛ-ɔ.”​—Mat. 11:19.

Sɛ e wunnɛn kplo’n, annzɛ e finwlɛ’n, annzɛ like uflɛ ti’n sran wie kan e ndɛ tɛtɛ’n, maan e mian e ɲin e tɛ i su amanniɛn su. I sɔ yɛ asɔnun kpɛnngbɛn kun m’ɔ tran Afriki di Sidi’n ɔ yoli-ɔ. Be flɛ i kɛ Piɛli. Ɔ seli kɛ: “Kɛ sran kun kan min ndɛ m’ɔ yoman min fɛ’n, n usa min wun kɛ ‘?Sɛ ɔ ti Zezi’n, nn ngue yɛ ɔ́ yó-ɔ?’” Ɔ kan guali su kɛ: “N wunnin i wlɛ kɛ ɔ fataman kɛ n bu i kɛ n ti kpa n tra min wiengu mun.”

Zezi si kɛ fɔ o klɔ sran’m be nun. Zezi i sɔnnzɔnfuɛ’m be kunndɛli kɛ bé yó sa ng’ɔ ti kpa’n. Sanngɛ kɛ mɔ fɔ o be nun’n ti’n, nán cɛn kwlaa yɛ be kwla yoli sɔ-ɔ. I wie yɛle kɛ kɔnguɛ kasiɛn ka naan b’a kun Zezi’n, ɔ seli Piɛli nin Zaki nin Zan be kɛ be ɲin tran su. Sanngɛ b’a kwlá yoman sɔ. Kɛ ɔ yoli sɔ’n, Zezi seli be kɛ “amun awlɛn o su kpa kɛ amún yó, sanngɛ amun lemɛn i wun fanngan.” (Mat. 26:40, 41) Kɛ mɔ Zezi si kɛ fɔ o be nun’n ti’n, w’a faman be wun ya.

Be flɛ aniaan bla kun kɛ Mandi. Kpɛ sunman’n i klun jɔman like nga i wiengu’m be yo’n su. Sanngɛ siɛn’n, ɔ miɛn i ɲin kpa naan w’a kwla yo wɛtɛɛfuɛ kɛ Zezi sa. Ɔ seli kɛ: “N mian min ɲin naan min wla w’a fiman su kɛ fɔ o e kwlaa e nun. Ɔ maan kɛ Zoova sa’n, n fa min ɲin n sie i sran’m be nzuɛn kpa’n su.” Ɔ maan kɛ Zezi sa’n, sɛ e wun i wlɛ kɛ fɔ o e kwlaa e nun’n, e nin e wiengu mun é trán klanman.

Zezi fɛli i su sa’n kwlaa wlɛli i Zoova sa nun. I nun mɔ Zezi o asiɛ’n su wa’n, sa suman tɔli i su. I wie yɛle kɛ sran wie’m b’a wunman sa nga ti yɛ ɔ yoli ninnge wie mun’n i wlɛ. Kpɛkun be yoli i finfin yɛ be kleli i ɲrɛnnɛn. Ɔ nin i sɔ ngba’n, ɔ yoli wɛtɛɛfuɛ titi. Afin “ɔ fɛli i wun wlali Sran ng’ɔ di jɔlɛ nanwlɛ su’n i sa nun.” (1 Piɛ. 2:23) Zezi si kɛ i Si úkɛ i naan w’a kwla jran sa sɔ’m be ɲrun kekle. Kpɛkun ɔ́ tú be nga be kleli i ɲrɛnnɛn’n be fɔ blɛ ng’ɔ ti su’n i su.

Sɛ sran kun yo e like naan w’a yoman e fɛ naan e tɛ i su ya su’n, ɔ cɛman naan e nin i e afiɛn w’a saci w’a tra laa’n. I sɔ’n ti’n, Ɲanmiɛn Ndɛ’n se kɛ: “Kɛ sran kun fa ya’n, ɔ kwlá yoman sa ng’ɔ ti kpa Ɲanmiɛn ɲrun’n.” (Zak. 1:20) Kannzɛ bɔbɔ ya nga e fali’n ti su’n, sanngɛ kɛ mɔ fɔ o e nun’n ti’n, ɔ cɛman naan y’a yo like wie m’ɔ timan kpa-ɔ.

Aniaan bla kun suan Kati. Ɔ tran Alemaɲin. Ɔ seli kɛ: “Sɛ ɔ bɔbɔ w’a kpliman ɔ ti’n, sran fi su kpliman ɔ ti manman wɔ.” Sanngɛ kɛ ɔ wa lafili Zoova su’n, i akunndan’n kacili. Ɔ seli kɛ: “Siɛn’n, n seman kɛ n bɔbɔ ń kplí min ti kun. N kwla yo wɛtɛɛfuɛ siɛn’n. Afin n si kɛ Zoova wá yó maan sa tɛtɛ kwlaa nga be o mɛn’n nun’n, bé wíe.” Sɛ be bu e lufle naan e lafi Ɲanmiɛn su kɛ Zezi sa’n, i sɔ’n úka e naan y’a yo wɛtɛɛfuɛ titi.

Zezi kleli kɛ sɛ e kunndɛ kɛ é dí aklunjuɛ’n ɔ fata kɛ e yo wɛtɛɛfuɛ. I sɔ’n ti’n ɔ seli kɛ: “Be nga be ti wɛtɛɛfuɛ’n, be liɛ su ti ye.” (Mat. 5:5) Siɛn’n, maan e fa e ɲin e sie i wafa nga wɛtɛɛ yolɛ’n kwla uka e sa wie’m be nun’n, i su.

Kɛ ndɛ tɔ yasua kun nin i yi be afiɛn’n, wɛtɛɛ yolɛ’n kwla uka be. Aniaan bian kun suan Robɛɛ. Ɔ tran Ɔstrali. Ɔ seli kɛ: “N kannin ndɛ wie mɔ m’an bumɛn i sin’n, n kleli min yi. Kɛ e fa ya’n ndɛ tɛtɛ nga e kan’n, ɔ ti kɛ njin yɛ y’a fa guɛ i tro nun sa-ɔ. E kwlá yimɛn i kun. Kɛ n ma wunnin i kɛ ndɛ nga n kannin be’n ti’n min yi’n wunmɛn i wun fɛ mlɔnmlɔn’n, i sɔ’n yoli min ya dan.”

Kɛ é íjɔ’n “e fɔn kpɛ sunman.” Sɛ é kán ndɛ naan e bumɛn i sin’n, i sɔ’n kwla yo maan ndɛnngan tɔ e nin e yi annzɛ e wun e afiɛn. (Zak. 3:2) Blɛ sɔ nun’n, sɛ e ti wɛtɛɛfuɛ’n i sɔ’n úka e naan y’a tra e awlɛn naan y’a kwla bu ndɛ nga e waan é kán’n i sin kpa ka naan y’a kan.​—Nya 17:27.

Robɛɛ mɔ e kɛnnin i ndɛ’n ɔ miɛnnin i ɲin kpa naan w’a kwla si i awlɛn tra annzɛ w’a si i wun su nian. ?Kɛ ɔ yoli sɔ’n, wafa sɛ yɛ i bo guali-ɔ? I bɔbɔ seli kɛ: “Siɛn’n, kɛ min nin min yi e nuan sɛman ndɛ wie su’n, n sie min su kpa i nuan bo, yɛ n kan ndɛ’n wɛtɛɛ su, kpɛkun n faman ya ndɛndɛ. Ɔ maan siɛn’n, e afiɛn sɛ kpa tra laa’n.”

Sɛ e ti wɛtɛɛfuɛ’n e nin e wiengu mun é trán klanman. Be nga be fa ya ndɛndɛ’n, be ɲanman janvuɛ kaka. Sanngɛ wɛtɛɛ yolɛ’n kwla uka e naan e nin e wiengu mun ‘e bo w’a yo kun titi.’ (Efɛ. 4:2, 3) Kati mɔ e kɛnnin i ndɛ’n, ɔ seli kɛ: “Kannzɛ bɔbɔ sran wie’m be janvuɛ tralɛ yo ya’n, sanngɛ wɛtɛɛ yolɛ’n uka min naan e nin sran sunman y’a kwla tra janvuɛ.”

Sɛ e ti wɛtɛɛfuɛ’n, é dí aklunjuɛ. Kpɛ sunman’n, Biblu’n kan “ngwlɛlɛ m’ɔ fin ɲanmiɛn su’n,” nin wɛtɛɛ yolɛ’n nin aklunjuɛ’n be ndɛ likawlɛ. (Zak. 3:13, 17) Sran ng’ɔ ti wɛtɛɛfuɛ’n i ‘wla gua ase.’ (Nya. 14:30) Be flɛ bian kun kɛ Maatɛn. Ɔ miɛnnin i ɲin kpa naan w’a yo wɛtɛɛfuɛ. Ɔ seli kɛ: “Siɛn’n, n mianman sran’m be kɛ be yo ninnge mun kɛ nga n bɔbɔ n fa klo’n sa. I sɔ’n ti’n, n di aklunjuɛ yɛ min wla gua ase.”

Nanwlɛ, ɔ fata kɛ e mian e ɲin kpa naan y’a yo wɛtɛɛfuɛ. I sɔ’n ti’n aniaan bian kun seli kɛ: “Nanwlɛ ti kpa, ɔ ju wie’n kɛ sran kun yo min like’n, ɔ yo min ya tratra su.” Sanngɛ Zoova m’ɔ wla e fanngan kɛ e yo wɛtɛɛfuɛ’n, ɔ kwla uka e naan y’a yi nzuɛn sɔ’n i nglo. (Eza. 41:10; 1 Tim. 6:11) Asa ekun’n, ɔ kwla ‘gua e like klelɛ’n i bo, yɛ ɔ kwla yo maan ‘e ɲan wunmiɛn.’ (1 Piɛ. 5:10) Ɔ maan kɛ Pɔlu sa’n, é kwlá nían “Klisi m’ɔ ti wɛtɛɛfuɛ’n, mɔ i kunngba’n ti aklunyefuɛ’n” i ajalɛ’n su.​—2 Kor. 10:1.