Sahalak hasomanta naboru na margoran si Sara * mangkatahon, “Ahu sahalak na parmaila tumang, janah lang urah ahu patugahkon aha na ibagas uhurhu. Jadi, lang sai marosuh ahu marsaor pakon halak na urahtu patugahkon aha na ibagas uhurni janah bahat marsahap. Tapi rosuhan do ahu marsaor pakon halak na lamlam janah toruh maruhur. Jadi sonai ma ganup hasomanku. Halani ai urah ma ahu patugahkon aha na ibagas uhurhu ampa parsoalanku.”

Hunjai gabe ibotoh hita ma, rosuhan do hita marsaor pakon halak na lamlam. Anjaha ai pe boi do mambahen Jahowa marmalas ni uhur. Bibel mangkatahon, “Pakei nasiam ma biak . . . halamlamon.” (Kol. 3:12) Aha do halamlamon ai? Sonaha Jesus patuduhkon halamlamon? Anjaha mase halamlamon boi mambahen hita marmalas ni uhur?

Halamlamon ai ma biak atap sifat na ipatuduh halak halani dong damei ibagas uhurni. Halak sisonai pe bujur do bani na legan. Anjaha sanggah dong parsoalan totap do ia lamlam.

Bani Bibel hata Junani na iterjemahkon gabe “halamlamon”, igunahon do homa manggambarhon huda liar na dob ijinakkon. Hassi pe huda ai domma jinak, sedo artini ia galek, tapi totap ope gogoh huda ai. Sonai homa halak na lamlam, sedo artini ia galek. Tapi sasintongni halak na gogoh do ia halani boi mangorom sifat-sifat na lang madear, janah boi totap mardamei pakon halak na legan.

Ra do nini uhurta, ‘Ahu lang halak na lamlam.’ Sobali ai, bahat do homa ididah hita halak na kasar ampa lang sabar, na mambahen hita lang urah patuduhkon halamlamon. (Rom 7:19) Tapi marhitei pangurupion tonduy na pansing boi do hita patuduhkon halamlamon. (Gal. 5:22, 23) Tapi mase hita maningon patuduhkon halamlamon?

Anggo hita lamlam gabe marosuh ma halak marsaor pakon hita. Songon na ihatahon si Sara nongkan ai, hita pe rosuhan do marsaor pakon halak na lamlam. Jesus ma contoh halak na patuduhkon halamlamon ampa hasabaron. (2 Kor. 10:1) Bahat do dakdanak na marosuh dohor bani Jesus hassi pe lape itanda sidea ia.​—Mrk. 10:13-16.

Anggo hita lamlam marguna do ai hubanta sandiri ampa hasomanta. Mase? Halani anggo hita lamlam lang urah-urah hita marborit ni uhur atap pe manggila. (Pod. 16:32) Anjaha hasoman atap na hinaholonganta pe lang marborit ni uhur hubanta.  Leganni ai, lang adong na porlu isolsoli hita i pudian ni ari.

Hassi pe Jesus sibuk janah banggal tanggung jawabni, tapi totap do ia lamlam bani ganup halak. Ijia bahat do halak na sunsah janah marsitaronon. Halani ai porlu ma sidea ipasonang. Tontu malas do uhur ni sidea sanggah ihatahon Jesus, “Roh ma nasiam hu bangku, . . . ai na lamlam do ahu anjaha na toruh maruhur”!​—Mat. 11:28, 29.

Sonaha hita boi totap lamlam songon Jesus? Porlu ma iparlajari hita Bibel ase ibotoh hita sonaha ia marparlahou bani halak na legan, anjaha aha na ibahen ia bani situasi na sunsah. Jadi sanggah susah pangahapta patuduhkon halamlamon, marusaha ma hita maniru Jesus. (1 Ptr. 2:21) Ulas hita ma dong tolu na mambahen Jesus totap lamlam.

Halak na toruh maruhur do Jesus. Ihatahon Jesus ‘lamlam do ia anjaha toruh maruhur’. (Mat. 11:29) Bani Bibel gati do dua sifat on rup ihatahon halani halamlamon markaitan do pakon toruh maruhur. (Ep. 4:1-3) Aha ma kaitanni ai?

Toruh ni uhur boi mangurupi halak ase ulang urah manggila atap pe marborit ni uhur halani parsahap ni halak na legan. Sonaha do pangahap ni Jesus sanggah ihatahon halak ia “sipapangan magou” ampa “sisobur anggur”? Lang mintor manggila ia. Tapi marhitei pambahenan ipatuduh Jesus do lang tongon na ihatahon sidea ai. Halani ai ihatahon ia ma, “Gabe pintor do hapentaran in marhitei pambahenanni.”​—Mat. 11:19.

Sonaha anggo dong na mangapasi ham halani na boru ham, sukumu, atap pe hasomalan bani iananmu? Rahanan ma ham totap patuduhkon halamlamon. Si Petrus sahalak sintua i Afrika Selatan mangkatahon, “Sanggah sihol ahu manggila dobkonsi manangar hata ni sasada halak, mintor husungkun ma diringku, ‘Anggo Jesus ibahen sonai, aha ma na ibahen ia?’” Nini use, “Ai ma na mangurupi ahu ase lang urah-urah marborit ni uhur halani parsahap ni halak.”

Iarusi Jesus do anggo ganupan jolma lang sempurna. Sihol do susian ni Jesus mambahen na dear. Tapi halani lang sempurna, sipata lang tarbahen sidea sonai. Umpamani, bani borngin paima matei Jesus, ihatahon ia do hubani si Petrus, si Jakobus, pakon si Johannes ase sidea totap marjaga-jaga. Tapi tarpodom do sidea. Iarusi Jesus do mase sidea tarpodom. Ihatahon ia do, “Hinsah do namin tonduy, tapi galek do anggo daging.” (Mat. 26:40, 41) Jadi halani mangarusi situasi ni apostelni, lang manggila Jesus hubani sidea.

Hinan, hasomanta na margoran si Meri, urah-urah do ia manguhumi halak na legan. Tapi sonari domma marusaha ia maniru Jesus ase patuduhkon halamlamon. Ia mangkatahon, “Marusaha do ahu tongtong mardingat anggo ganupan jolma lang sempurna. Hutiru do homa Jahowa na mangidah sifat-sifat na madear humbani manisia.” Tongon, anggo marusaha hita maniru Jesus na mangarusi hahurangan ni halak na legan, on ma na mangurupi hita patuduhkon halamlamon.

Jesus marondos hubani Naibata. Sanggah Jesus i tanoh on, gati do ia manaron na marsik. Bahat do halak na marsogam ni uhur hu bani, anjaha irisai do homa ia. Hassi pe sonai totap do Jesus patuduhkon halamlamon halani “iondoskon do ai bani Panguhum na pintor”, ai ma Jahowa. (1 Ptr. 2:23) Ibotoh Jesus do anggo Bapani ai tongtong do mangurupi ia ase totap martahan, anjaha uhumon ni Naibata do halak na mambahen na lang dear hu bani.

Anggo manggila hita hubani halak na mambahen na lang dear hubanta, boi do ujungni holi gabe parah situasini. Hassi pe iahap hita sosok do hita manggila hu bani, tapi halani lang sempurna, boi do ujungni gabe lepak holi pambahenanta. Halani ai ma Bibel pasingatkon hita, “Seng ihorhon marah ni jolma hapintoron i lobei ni Naibata.”​—Jak. 1:20.

Sahalak hasomanta naboru na margoran si Katty hun Jerman mangkatahon, “Hinan, pangahapku maningon hupatuduh do anggo ahu sintong halani lang adong halak na legan na mambahen sonai bangku.” Ujungni, porsaya ma si Katty hubani Jahowa, anjaha mubah ma sifatni ai. Ia mangkatahon, “Sonari, lang pala porlu ahu patuduhkon anggo ahu sintong. Tapi boi do ahu gabe lamlam halani hubotoh sasapon ni Jahowa do ganup na jahat na dong i  tanoh on.” Anggo dong na mambahen na lang dear bamu, tiru ma Jesus na tongtong porsaya hubani Jahowa. Ai ma na boi mangurupi ham ase totap lamlam.

Ongga do ihatahon Jesus, “Martuah ma na lamlam uhur.” (Mat. 5:5) Jadi anggo sihol hita martuah, maningon lamlam do hita. Aha do gunani halamlamon ai? Ulas hita ma piga-piga contohni.

Porlu do totap lamlam sanggah suami istri lang sapanriahan. Sada hasomanta dalahi na margoran si Robert hun Australia mangkatahon, “Sanggah manggila, sipata ra do huhatahon na mambahen borit uhur ni istringku. Tapi ujungni manosal do ahu halani hubahen sonai hu bani.”

“Ganup hita gati marsalah” ibagas parsahap. Anjaha hata na kasar boi do mambahen suami istri lang be orot. (Jak. 3:2) Jadi anggo dong na lang sapanriahan, porlu do totap lamlam ase boi iantan sanggah marsahap.​—Pod. 17:27.

Marusaha ma si Robert patuduhkon halamlamon ampa panrajaion diri. Aha ma gunani ai? Ia mangkatahon, “Sanggah lang sapanriahan hanami, marusaha ma ahu ase dear manangihon, lamlam marsahap, anjaha lang urah manggila. Halani ai lambin orot ma hanami.”

Anggo lamlam hita, gabe urah ma hita mardamei pakon na legan. Anggo urah-urah borit uhurta, lang bahat hasomanta. Tapi anggo lamlam hita, ai ma na mangurupi hita “manramotkon hasadaon” na parohkon hadameion. (Ep. 4:2, 3) Si Katty na ipatugah nongkan ai mangkatahon, “Halani lamlam, boi ma ai mangurupi ahu marsaor pakon ganupan halak tarmasuk ma pakon halak na hurang dear sifatni.”

Anggo lamlam hita, gabe damei ma pangahapta. Bibel mangkatahon anggo “hauhuron na hun babou” boi mangurupi hita totap lamlam ampa mangahapkon hadameion. (Jak. 3:13, 17) Sahalak na lamlam, tontu ‘lamlam do homa uhurni’. (Pod. 14:30) Sahalak hasomanta dalahi na margoran si Martin, marusaha do ia ase totap lamlam. Nini do, “Lang be hupaksa halak na legan mangihutkon harosuhku. Halani ai, lambin damei anjaha sonang ma huahap.”

Tongon, sipata lang urah patuduhkon halamlamon. Sahalak hasomanta dalahi mangkatahon, “Sipata ronsi sonari sihol do ahu manggila tumang.” Tapi dingat hita ma, Jahowa do na marsuruh ase hita patuduhkon halamlamon. Tontu urupan-Ni do hita ase boi mangkorjahon ai. (Jes. 41:10; 1 Tim. 6:11) Anjaha “pauli-ulion-Ni” janah “pargogohan-Ni” do hita ase boi totap lamlam. (1 Ptr. 5:10) Ujungni songon si Paulus, boi ma hita patuduhkon “halamlamon ampa hasabaron ni Kristus”.​—2 Kor. 10:1.