Sara seh, “Ai reeli shai an Ah noh reeli shoar a miself. * Soh Ah noh reeli feel komfatabl rong peepl weh ga wahn schrang persnaliti. Bot Ah feel rilaks wen Ah deh rong sombadi weh jentl ahn hombl. Ah ku tel dehn how Ah feel ahn taak tu dehn bowt mi prablemz. Mai bes fren dehn jentl ahn hombl.”

Sara koment shoa wi dat if wi jentl tuwaadz adaz den adaz wahn moa dan laikli waahn bee wi fren. Aalso, wahn jentl haat pleez Jehoava. Di Baibl seh: “Unu fi chreet wan anada gud.” * (Kol. 3:12) Weh ih meen fi ga wahn jentl haat? How Jeezas mi shoa dat hihn ga wahn jentl haat? Ahn how wi laif ku geh hapiya if wi ga dis kwaliti?

Fi ga wahn jentl haat meenz dat bai naycha yu da wahn peesful persn. Wahn persn wid wahn jentl haat deel wid adaz eena wahn jentl ahn kain way. Ih aalso eeziya fi mek dehn stay kaam wen tingz get pahn dehn nervz.

Wahn lata peepl tink dat peepl weh ga wahn jentl haat week, bot dat da noh chroo. Di Greek werd fi “jentl haat” mi geh yooz fi diskraib wahn wail haas weh geh chrayn fi kanchroal ih powa. Di haas stil schrang bot ih laan how fi kanchroal ih schrent. Jos laik dat, wen wi jentl wi kanchroal wi rang dizaiyaz ahn wi kip pees wid adaz.

Wi mait tink ‘Bai naycha Ai da noh wahn jentl persn.’ Wi liv eena wahn werl wehpaat wahn lata peepl noh ga payshens ahn dehn laik fait, soh wi mait fain it haad fi bee jentl. (Roam. 7:19) Soh, ih tek wahn lata efoat fi laan fi ga wahn jentl haat, bot Jehoava hoali spirit wahn help wi fi kantinyu chrai haad fi bee jentl. (Gal. 5:22, 23) Wai wi shuda mek di efoat fi ga wahn jentl haat?

Wahn jentl haat da wahn kwaliti weh peepl admaiya. Jos laik Sara, weh wi mi menshan erliya, wi laik deh rong peepl weh jentl ahn hombl. Jeezas da wahn wandaful egzampl a wahn jentl ahn kain persn. (2 Kor. 10:1) Eevn chiljren weh neva reeli noa ahn mi waahn deh rong ahn.—Maak 10:13-16.

 Wahn jentl haat protek wee ahn peepl rong wi. If wi jentl, wi noh wahn eezi fi geh beks er foschraytid. (Prov. 16:32) Sayka dat wi noh wahn hert nobadi weh wi lov ahn soh wi noh wahn feel gilti. An adaz wahn benifit bikaaz wi wahn kanchroal wi feelinz ahn bihayvya soh dat wi noh hert dehn.

Eevn doa Jeezas mi ga wahn bizi skejul an ih mi ga lata rispansabiliti, ih mi stil jentl ahn kain tu evribadi weh mi deh rong ahn. Wahn lata peepl bak den mi-di schrogl. Dehn mi ga lata prablemz ahn dehn mi need komfert. Dehn mosi mi tek komfert wen Jeezas tel dehn: “Kohn da mee, . . . kaa Ai payshent ahn jentl”!—Mach. 11:28, 29.

How wi ku laan fi ga wahn jentl haat jos laik Jeezas? Wen wi stodi Gaad Werd wi laan fahn Jeezas how hihn mi chreet peepl ahn weh hihn mi du eena tof sichuwayshanz. Den wen wi fays sichuwayshanz weh tes weda wi ga wahn jentl haat, wi wahn chrai haad fi fala Jeezas egzampl. (1 Peet. 2:21) Kansida chree tingz weh mi mek Jeezas jentl.

Jeezas mi hombl. Jeezas mi seh dat hihn “payshent ahn jentl.” (Mach. 11:29) Wahn jentl haat goh tugeda wid hyoomiliti bikaaz if yu hombl yu noh wahn eezi fi kech feelinz ahn yu wahn du tingz eena wahn jentl way. (Ifee. 4:1-3)

Wen wi hombl wi noh wahn tek wiself seeryos ahn wi noh wahn kech feelinz fi evri lee ting. Weh Jeezas mi du tu dehn wan weh mi tel ahn dat ih “kraybm” ahn dat ih “da wahn jronkad”? Hihn mi proov dat dis da neva chroo bai di way how ih mi liv ih laif. Ahn hihn tel dehn eena wahn kain way dat “wizdom wahn proov fi bee rait eena di langa ron.”—Mach. 11:19.

If sombadi seh sohnting bowt yu rays, yu seks, er wehpaat yu kohn fram, chrai yu bes fi rispan eena wahn jentl ahn kain way. Peeta, wahn Kristyan elda da South Africa, seh: “Wen Ah fain dat Ah geh beks er kech feelinz bowt weh sombadi seh bowt mi, Ah aks miself, ‘Weh Jeezas wuda mi du?’ Ah laan fi noh kech feelinz fi evri lee ting.”

Jeezas mi noa dat hyoomanz noh perfek. Jeezas disaipl dehn mi aalwayz waahn du weh rait, bot bikaaz dehn neva perfek dat neva hapm. Fi egzampl, di nait bifoa Jeezas mi ded, Peeta, Jaymz, ahn Jan neva stay awayk wid Jeezas wen hihn mi need dehn sopoat. Jeezas shoa dat hihn mi andastan wai dehn mi jrap asleep wen ih mi seh “di spirit wilin bot di badi week.” (Mach. 26:40, 41) Bikaaz hihn mi andastan dat ih apasl dehn neva perfek, hihn neva geh beks wid dehn.

Wahn sista weh naym Mandy yoostu kritisaiz adaz wahn lat, bot now ih chrai fala Jeezas egzampl ahn bee jentl tuwaadz adaz. Shee seh, “Ah chrai fi memba dat nobadi noh perfek, soh Ah foakos pahn peepl gud kwalitiz, jos laik weh Jehoava du.” Yu tink wee ku kapi Jeezas egzampl ahn chreet adaz eena wahn jentl way?

Jeezas mi chros eena Gaad. Wen Jeezas mi deh pahn di ert, peepl mi chreet ahn bad. Peepl neva andastan weh hihn mi seh, soh dehn mi hayt ahn, an dehn eevn mek ih sofa. Eevn doa aala dat mi hapm, hihn mi stil jentl ahn kain bikaaz “ih lef dehn tu Gaad bikaaz Gaad joj fyaa-wan.” (1 Peet. 2:23) Jeezas noa dat fi hihn hevnli Faada mi wahn help ahn bayr op, an ponish dehn wan weh chreet ahn bad.

If sombadi chreet wi bad fi no reezn ahn wi geh beks ahn chrai fait dehn, wi wahn mek di sichuwayshan wers. Dat da wai di Baibl tel wi: “Wen wahn man geh beks, ih kyaahn du weh Gaad waahn ih du.” (Jay. 1:20) Eevn if wi ga gud reezn fi geh beks wi mait du sohnting weh rang sayka weh wi noh perfek.

Wahn sista weh liv da Germany weh naym Cathy yoostu tink, ‘If yu noh stan op fi yuself, nobadi els wahn du it fi yu.’ Bot wen shee mi laan fi chros eena Jehoava, ih atichood mi chaynj. Ih seh “Ah noh feel laik Ah haftu stan op fi miself agen, Ah feel free fi bee jentl, an Ah noa dat Jehoava ga evriting anda kanchroal.” If sombadi eva chreet yu bad fi no reezn, fala Jeezas  egzampl ahn chros dat Gaad wahn help yu fi kip wahn jentl haat.

Jeezas mi seh dat wi need fi ga wahn jentl haat, er bee hombl, fi mek wi ga Gaad blesin ahn bee hapi. Hihn seh, “Gaad bles dehn wan weh hombl.” (Mach. 5:5) Noatis how wahn jentl haat ku help wi eena dehnya sichuwayshanz.

Wahn jentl haat mek it eeziya fi deel wid schres eena wahn marij. Wahn brada weh naym Robert fahn Australia seh, “Ah seh wahn lata tingz weh hert mi waif feelinz. Ah neva meen it, bot wen yu beks ahn yu seh tingz weh hert, yu kyaahn tek dehn bak. Ah feel reeli bad wen Ah si dat Ah mi reeli hert mi waif.”

“Aala wi slip dong eena difrent kaina way evri now ahn agen” espeshali eena di way wi taak. Wi ku kaaz prablemz eena wi marij wen wi taak widowt tink. (Jay. 3:2) Wen dehnya sichuwayshanz kom op, wahn jentl haat wahn help wi fi stay kaam ahn kanchroal weh wi seh.—Prov. 17:27.

Robert mi werk haad fi bee kaam ahn ga self-kanchroal. How dat help ahn? Hihn seh: “Now, wen mee ahn mi waif noh gree pahn sohnting, Ah chrai fi lisn tu ahn gud, taak eena wahn jentl way, an Ah noh alow miself fi geh beks. Mi rilayshanship wid mi waif geh moch beta.”

Wahn jentl haat help wi fi get lang wid adaz beta. Moas peepl weh eezi fi geh beks noh ga lata frenz. Wahn jentl haat, pahn di ada han, help “soh dat unu kud aal ga pees wid wan anada.” (Ifee. 4:2, 3) Cathy, weh wi mi menshan erliya, seh: “Wen Ah ga wahn jentl haat, Ah injai fi deh rong adaz eevn doa ih haad fi get lang wid sohn peepl.”

Wahn jentl haat mek yu ga pees. Di Baibl seh dat kainis ahn pees goh tugeda wid “di wizdom weh kohn fahn Gaad.” (Jay. 3:13, 17) Wahn persn weh jentl ga wahn “kaam haat.” (Prov. 14:30) Martin, weh werk haad fi ga wahn jentl haat seh, “Now Ah noh presha peepl fi du tingz di way how Ai waahn, Ah feel kantentid an Ah moa hapi.”

Wee mait haftu werk haad fi ga wahn jentl haat. Wahn brada seh, “fi tel yu di chroot, sohntaim sohn sichuwayshan stil mek Ah geh beks.” Bot Jehoava da di wan weh inkorij wi fi ga wahn jentl haat, ahn hihn wahn help wi fi werk haada fi bee jentl. (Isa. 41:10; 1 Tim. 6:11) “Hihn wahn mek yu bee aal weh yu sopoas tu bee”; hihn ku “mek yu schrang.” (1 Peet. 5:10) Wid taim, wi wahn ku fala di apasl Paal egzampl ahn bee laik “Krais, weh kain ahn hombl.”—2 Kor. 10:1.