Ariñagatu aban íbiri gíritu Sara *: “Haburigubeñadina ani sanditina giñe machouruni. Ligía mínsiñe lubéi nun lun nerederun harugabu gürigia ha deregüdati hagaburi o hanarimetiña. Gama lumoun, dan le hama nan gürigia ǘnabugutiña, buiti nasandiragun nungua. Hama gürigia ítaratiña, ménrengunti nun lun nayanuhan luagu le nasandirubei luma luagu nituróbulin. Ani le linarün katei, ítara liña hagaburi besi numadagu”.

Arufuda lumuti le tariñagubei Sara aban lan igaburi le achawaha lumutiña gürigia ǘnabuguni. Gama lumoun hínsiñetiña gürigia ǘnabugutiña lun Heowá. Amuriahati wama tidan lererun: “abagarida humá keisi lánigu, lau [...] ǘnabuguni” (Kol. 3:12). Ka ǘnabugunibei? Ida liña larufuduni Hesusu igaburi le? Ani ida luba líderaguniwa igaburi le lun gúndaatima wamá?

Ǘnabuguni, ligía aban igaburi le adügübei lun gunda lan hasandiragun gürigia houngua. Gürigia ha ǘnabugubaña óuseratiña amu gürigia lau gamadóuni, areiduni, ani gagibuguatiña luma turobuli le lídanbei ibagari lau darangilaü luma lau hárügüdagun houngua.

Gürigia ha ǘnabugubaña derebugutiña ani anihein aban darangilaü hadan. Dimurei güriegu le ásügürawagüdübei kei “ǘnabuguni” yúsuati dan le hayanuhan luagu aban gabayu le gáñiti le amasurúti. Aban gabayu le amasurúti aniheingua erei luagu, gama lumoun, másuwaali lau gurasu lun lárügüdagun lungua. Ligiaméme asuseredubei woun dan le ǘnabugu wamá: ragüguatiwa woungua luéi wóuserun kei animaalu ani áfaaguatiwa wabagaridun lidan darangilaü hama amu gürigia.

Másiñati wasaminarun mama lan lau ǘnabuguni wagüriahóua. Ani kei geyegu waña lan hau gürigia ha márügüdaguntiña houngua ani furundetiña, ani mama súnwandan lun ménrengun lan lun warufudun ǘnabuguni (Rom. 7:19). Le linarün katei, lun gagaburi wamani igaburi le mosu láfaawagun saragu, lau sun lira, líderagubadiwa lani Heowá sífiri sandu lun mábürühan lan warüna (Gal. 5:22, 23). Ka uagu mosu lubéi wáfaagun lun ǘnabugu wamá?

Achawaha lumutiña ǘnabuguni amu. Kei tariñaguni Sara, würi to uáguboun wayanuhan lidan lagumeserun arütíkulu, buiti wasandiragun woungua harugabu gürigia ha ǘnabugubei hanaagun houngua. Subudiwati meha Hesusu lau ǘnabugu lan ani areida ligía (2 Ko. 10:1). Íbini irahüñü ha lóuguabei hasubudiruni Hesusu busentiña meha herederun luma (Mar. 10:13-16).

Buiti ǘnabuguni woun luma houn ha geyegubaña wau. Anhein ǘnabugu wabéi, wárügüdagunba woungua, ani magañidunbadiwa lau lumenrengun  (Ari. 16:32). Líderagubadiwa katei le lun masandiragun wamá woungua lau duru le áhüchübei dan le wadügün wuribani lun somu gürigia, hóuntima gürigia ha hínsiñebaña woun. Luagu le aban oubaü, sagatiña gürigia ha geyegubaña wau buiti lídangiñe ǘnabugu wamá. Ánhawa masafaragun, úabei ni aban asufuriruti.

Íbini gibe lan lidasin Hesusu ani beresegu ligía, súnwandan ǘnabugu lan. Saragu gürigia hénrenguti meha habagari ani buin haña meha lau turobuli. Mégeitiña meha awalidaguni. Chóuruti ru lan dimurei le lariñagubei Hesusu gurasu houn: “Higougu numoun, [...] furendei huguyame númagiñe; lau gaguraasun nan, ñulú tuguya nanigi” (Mat. 11:28, 29).

Ida luba wáyeihani ǘnabugu lan Hesusu? Furumiñe, lau waturiahanu Lererun Bungiu lun wafurendeirun ida liña lan lóuseruniña Hesusu gürigia luma ida liña lan lagagibudagun luma sügǘ hénrenguti. Lárigiñe, dan le wagagibudagun luma sügǘ le óuchagubalin ǘnabuguni le wawagubei lidan wáfaagun lun wáyeihani Hesusu (1 Fe. 2:21). Akutiha wamá ǘrüwa lídangiñe burí katei le íderagubalin Hesusu lun ǘnabugu lan.

Ǘnabuguti meha Hesusu le tímatimaati. Ligía guánarügü ariñagubei ‘gaguraasun lan, ñulú tuguya lanigi’ (Mat. 11:29). Írida tumuti Bíbülia bián dimurei le dan le tayanuhan luagu ǘnabuguni (Efe. 4:1-3). Ka uagu wariñagei le?

Íderagua lumutiwa ǘnabuguni lun masandiragun wamá woungua luagu súdinitima wamá ni lun hanarime lan delikoun wamá. Ida liña lóunabun Hesusu dan le hayanuhanbei luagu ‘géigadi lan, gátadi’? Lau lani hénpulu manigüda lumutiña lau larufuduni igaburi le, le lánina ǘnabuguni ani ariñagati “arihúati lichú lau gürigia lidan burí katei buiti le ladügübei” (Mat. 11:19, TNM).

Anhein ariñaga aban gürigia aban dimurei le mabuidunti luagu warasan, luagu kátañadiwa lan o luagu halíagiñe lan wayabin, áfaagua wamá lun wóunabun lau ǘnabuguni. Ariñagati Peter, aban wéiyaali lidan afiñeni Suruafürikana: “Dan le lariñagun aban gürigia somu dimurei le adügati lun nasansiragun nungua wuriba, aba nasaminarun ida luba lan hamuga lóunabun Hesusu”. Ani ariñagayati Peter: “Furendeihadina lun ǘnabugu nan”.

Gunfuranda lumuti Hesusu chará hamá gürigia. Lau sun busén hamá lani Hesusu disipulugu hadügüni le buídubei, lau sun lira charamémetiña ladüga gafigoun hamá ani adügati katei le lun madügün hamani le úaraguabei. Kei hénpulu, lagumuhóun guñoun le laubei hama lubaragiñe lounwen, míchugunti Féduru, Santiagu luma Huan dǘgüdaguaü le lamuriahabei hama. Ariñagati Hesusu houn: “Inarüni luagu anha tan huani lun katei le buídubei; ánheinti húgubu, débiliti” (Mat. 26:40, 41). Kei le gunfuranda lubalin chará hamá lani apostolugu, magañidunti hama.

Ariha waméi tikesin aban íbiri gíritu Mandy. Luagu aban dan hínsiñeti meha tun lun ladügǘn katei kei le aubei tabusenra, guentoti, tadügüñein sun tiyaraati lun táyeihani ǘnabuguni le larufudubei Hesusu. Ariñagatu: “Áfaaguatina lun naritaguni sun lan gürigia chará hamá ani hóuchatina lun narihini lubuidun igaburi le hawagubei kada gürigia ítara kei ladügüni Heowá”. Áyeiha tumuti Mandy ǘnabuguni le larufudubei Hesusu dan le lóuserun hama gürigia. Ánhawa adügei ligiaméme, ménrengunbei ǘnabugu wamá hama amu.

Ígira lumuti Hesusu sun katei lúhaburugun Bungiu. Dan le ya lubéi Hesusu ubouagu súfuriti marichaü. Barǘ hamuti le lariñagubei wuriba, iyereeguti meha houn láganigu ani súfurigüda hamuti. Lau sun lira, súnwandan ǘnabugunmeme lan ladüga “deregeguarügüti lungua lun Bungiu le aguseragüdübei lau ísuruni” (1 Fe. 2:23). Subudi lumuti meha Hesusu lóunigirubei lan Lúguchi le siélubei ani labeichubaña lan ha asufuriragüdübalin danme lachülürün hadaani.

Ánhawa ouserúa lau marichaü ani aba wagañidun, gayaraati wadügün lun laweiridagun turobuli luma lun wíchugun lubúa. Ligía taritaguagüdübaliwa Lererun Bungiu: “Lugundun gürigia le gáñibei, madügün lumuti le aubei lagundaara Bungiu” (Sant. 1:20). Íbini hamuga gébuna lan wagañidun, gayaraabei hamuga wóuserun wuriba ladüga gafigoun wamá.

Saminatu meha aban íbiri Yámanina gíritu Cathy, anhoun lan mageindagun luagu tiricha, madügün habéi lan ni aban tuagu. Gama lumoun, aba tasansiruni tigaburi dan le tagumeserun afiñera luagu Heowá. Ariñagatu: “Mamegeiruhadina nageindagun luagu niricha. Ani guenlé ménrengunhali nun lun ǘnabugu nan, chouru numuti Heowá lan gamaniharibei lau sun katei”. Ánhawa hamuga asufurira marichaü, afiñe wamá  luagu Bungiu kei ladügüni Hesusu, líderagubadiwa katei le lun ǘnabugu wamá.

Ariñagati Hesusu súdini lan ǘnabuguni lun gunda hamá gürigia. Ariñagati: “Fuleseiwatiña o [gúndaatiña] ha ǘnabugubaña” (Mat. 5:5). Ariha waméi ida liña lan lahuudun igaburi le woun lidan ámuñegueinarügü gádantiwa.

Adügati lun ua lan saragu turobuli lidan habagari maríeitiña. Ariñagati aban íbiri Australiana gíriti Robert: “Ariñagaadina saragu dimurei le abuliseihati tun nani weiriou ani dimurei burí le masaminaruntina yebe nariñagun. Ani dan le láfuridun dimurei le abuleseihati wayumulugugiñe siñá hali wagiribudagüdüni lárigoun. Wuribati meha nasandiragun nungua dan le níchugun fe luagu dañu le adüga náalibei tun nani weiriou”.

“Sun wagía charatiwa” dan le wayanuhan. Dimurei le lariñagubei aban gürigia masaminarunga gayaraati lanügün turobuli lidan habagari maríeitiña (Sant. 3:2). Sügǘ burí líbeina le, íderagua lumutiwa ǘnabugu wamá lun ñein lan darangilaü luma lun wágüdahanu wañeñe (Ari. 17:27).

Áfaaguati Robert saragu lun darangilu lan luma lun lárügüdagun lungua. Ida liña lidin lun? Abahüdaguati: “Lidan nebelurun lidoun múarani tuma nani weiriou, adüga numuti sun niyaraati lun naganbunu, nayanuha tuma lau darangilaü luma lun mígiraguagüdün nan nungua lun nasafaragun. Ani guentó buiti nanügagun nungua tuma”.

Íderagua lumutiwa lun buidu lan wanaagun woungua hama amu. Ha agañidubaña lau lumenrengun lóuguatiña hamadagu. Ánhaña ha ǘnabugubaña hóuchatiña lun “lidan hamá aban [...] lidan darangilaü le óundarubaliwa súngubei” (Efe. 4:2, 3). Ariñagatu Cathy to buga uáguboun wayanuha: “Seremei ǘnabuguni, gúndaatina dan le hama nan amu gürigia, íbini añahein lan hádangiñe hénrenguti hanaagun gürigia houngua hama”.

Ruti darangilaü woun. Arufudatu Bíbülia lichú lan aau le lúmagiñebei Bungiu ligía lan ǘnabugunibei luma darangilaü (Sant. 3:13, 17). Aban gürigia le ǘnabuguti darangilati (Ari. 14:30). Ariñagati Martin le áfaagubei saragu lun ǘnabugu lan: “Guentó ménrengun hali nun nanaagun nungua hama gürigia ani úaali furunde nan, darangilu háadina ani gúndaahadina giñe”.

Inarüni mosu lan wáfaagun lun gagaburi wamani ǘnabuguni. Ariñagati aban íbiri: “Le linarün katei, íbini uguñe weyu anihein dan aba láhabuhan nita lau igañi”. Lau sun lira, ínchaha lumutiwa Heowá lun ǘnabugu wamá, líderagubadiwa lidan áfaaguni le (Isa. 41:10; 1 Tim. 6:11). Ligíaba agumuchei larufudaha woun ani lederebudagüdübadiwa (1 Fe. 5:10). Ani lau lásügürün dan, gayaraabei larihíniwa wawagu igaburi le lánina ‘ǘnabuguni luma aban areini libe le larufudubei Kristu’ ítara kei ladügüni apostolu Pábulu (2 Ko. 10:1 Lerérun Búngiu to lánina iséri darádu).